Acts 3

1దొప్పెర్ తీన్ బజేర్ అరజ్ కరేన పేత్రూన్ యోహాన్ దేవళేన చడన్ జారెజనా,

2హుయొ జనాతీలేన్ టూంటో రజే ఏకేన పాల్డేన్ జావ్తేర. దేవళేమా జాయెవాళూన భీక్ మాంగేన, థోడ్సేక్ ఆద్మీ ఓన దాడి సణ్గార్ కన్ కజకో దేవళేర్ దర్వాజె కన రకాడ్తేర.

3పేత్రూన్ యోహాన్ దేవళేమాఁయిఁ జారెజనా, ఊ ఉందేన దేకన్ భీక్ మాంగోజనా.

4పేత్రూన్ యోహాన్ ఓన దేకన్-హమార్ సామ్ దేక్ కన్ కే.

5ఉందేర్ ఢైఁ భీక్ కాఁయిఁతీ మళియె కన్ ఆసాతీ ఉందేన ఊ దీటో జనా"

6పేత్రు- రూపో, సోనో మార్ ఢైఁ ఛేని; పణ్ మన ఛజకో తోన దేరోఁచుఁ. నజరేతేర్ యేసుక్రీస్తూర్ నామేపర్ చాల్ కన్ కేన్

7ఓర్ జమ్ణో హాత్ ఝలన్ వటాడో. జన్నాజ్ ఓర్ తళ్వామాన్ ఖిలేర్ హడ్కామా జోర్ ఆయొ.

8ఊ జన్నాజ్ ఊటన్ హూబ్రేన్ చాలో. చాల్తో గర్తి మార్తో దేవేన స్తుతి కర్తో ఉందేర్ లార దేవళేమా గో.

9ఊ చాల్తో దేవేన స్తుతి కార్తో రజకో జన్ సే దేకన్

10సణ్గార్ కన్ కజే దేవళేర్ దర్వాజె కన భీక్ మాంగ్తో బేటో రజకో ఈజ్ కన్ వళ్కన్, ఓన వేగోజకో దేకన్ అప్సోస్ వేన్ పర్వష్ వేగె.

11ఊ పేత్రూన్ యోహానేన ఝల్లెన్ రజనా జన్సే అప్సోస్ వేన్ సోలొమేనేర్ మండపేమా రజకో ఉందేర్ ఢైఁ మళాయేర్ నైఁ ధాఁసన్ ఆయె.

12పేత్రు ఏన దేకన్ జనూతి హన్నూకో. ఇశ్రాయేలేర్ ఆద్మీయో, తమ్ ఏర్వడి కసెన అఫ్సోస్ వెరేచో. హమార్ ఖాస్ జోరేతీక, భక్తితీక చాలేన ఏన జోర్ దీనేజుఁ తమ్ కసెన హమార్ సామ్ దేక్రే చొ ?.

13అబ్రహామ్, ఇస్సాకన్, యాకోబ్ కన్ కజేరొ దేవ్, కతో ఆపణ్ వడ్బూడేరొ దేవ్, ఓర్ బేటా ఛజకో యేసూన మహిమా కర్మేలొచ. తమ్ ఓన పక్డాదీనె, ఓన ఛోడాయెన పిలాత్ ఓర్ మనేమా ఘట్ కర్లీదో జనా, తమ్ ఓర్ ముణాంగ ఓన లేకో కీదెకొని.

14తమ్ పవిత్తరన్, నియత్ దారేన మార్నాకన్ నర్ హత్యా కీదోజే ఆద్మీన తమార్ వాస ఛోడ్దేణోకన్ నోరాకీదే.

15తమ్ జీవేర్ హకమ్దార్ ఛజేన మార్నాకే, పణ్ దేవ్ ఓన మర్గేజేర్ మాఁయితీ వటాడో. ఓర్ హమ్ గవాయి ఛాఁ

16ఓర్ నామేర్ జోరజ్ ఓన బళ్దినో. తమ్ దేక్రేజకో ఉజ్జీ తమ్ మాలమ్ కర్లిదేజకో ఓర్ నామేపరేర్ విశ్వాసజ్ ఓన ఆచోకీదో: యేసు ఉంపరేర్ విశ్వాసజ్ తమార్ సేర్ ముణాంగ ఏన పూరో ఆచోకీదో.

17భాయియో, తమన్ తమార్ హకమ్దార్ నకళజూంజ్ ఏన కీదెకన్ మన మాలమ్.

18పణ్ ఓర్ క్రీస్తు భావేటీ పడియెకన్ సే ప్రవక్తఁవూర్ మూండేతీ దేవ్ ఆంగ మాలమ్ కీదోజకో వాత్ హన్నూభర్పూర్ కీదో.

19ప్రభూర్ ముణాంగెతీ సబ్బాతేర్ దాడ్ ఆవజూంజ్,

20తమార్ వాస నియమ్ కీదోజకో క్రీస్తుయేసూన ఊ మేలజూన్ తమార్ పాప్ మాఫ్ కరజూఁ దల్ బద్లా లేన్ ఫర్యావో.

21సేన సొమోర్ కరేర్ దాడ్ ఆవచ కన్ దేవ్ అగ్డీతీజ్ ఓర్ పవిత్తర్ ప్రవక్తాఁవుర్ మూండేతీ బోలాయో. జన్నాలగు, యేసు స్వర్గ్ లోకేమా వసేర్ జరూర్ ఛ.

22మోషె హన్నూకో- ప్రభు ఛజకో దేవ్ మార్ సరీకో ఏక్ ప్రవక్తాన తమార్ భాయి మాఁయితీ తమార్ వాస పేదా వజూఁకరియ. ఊ తమేతీ కాఁయికతోయి సదా, సేవాతుఁ తమ్ ఓర్ వాత్ మాన్ణో.

23ఓ ప్రవవక్తార్ వాత్ న మానేవాళో జనూమా నరజుఁ పురోనాశ్ వేజాచ కన్ కో.

24ఉజ్జీ సమూయేలన్ ఓర్ పచ్చ ఆయెజకో కత్రా ప్రవక్తా ప్రవచన్ కేకో ఓసే ఏ దాడేర్ బారేమా ప్రకట్ కీదె.

25ఓ ప్రవక్తాఁవుతి సదా, దేవ్ అబ్రాహామేతి - తార్ వలాదేర్ వడితి ధర్తీపరేర్ వలాదే సే అశీస్ పాయెకన్ కేన్, తమార్ బాప్ దాదాఁవుతి కీదోజకో కరారేన సదా, తమ్ హక్దార్ వేన్ ఛో.

26దేవ్ ఓర్ బేటాన పేదకరన్, తమేమా హర్యేకేన ఓర్ ఖరాప్ గొణేతీ ఛోడాన్ తమెన ఆశీస్ దేన ఓన అగ్డి తమార్ ఢైఁ మేలో కన్ కో.

Currently Selected:

Acts 3: Lambadi

Highlight

Copy

Compare