Acts 10

1ఇటలీర్ ఫోజ్ కన్ కజకో ఫోజేమా సో సిపాయీర్ సర్దార్ కైసరయామా వెత్తో, ఓర్ నామ్ కొర్నేలీ. ఊ భక్తీదార్.

2ఊ ఓర్ ఘరేవాళూఁతీ సదా దేవేర్ ఉంపర్ ఘణ్ భక్తితీ రో. ఊ జనూన ఘణో ధరమ్ కర్తో హర్ఘడీ దేవేన అరజ్ కరేవాళో.

3దొప్పెర్ కమ్ జాదా తీన్ బజేర్ వక్తేపర్ దేవేర్ సోజా ఓర్ ఢైఁ ఆన్ -కోర్నేలీ కన్ బలాయెర్ ఓన దర్సణే మా దకాయో.

4ఊ సోజార్ సామ్ ఆంకిపాడన్ దేకన్ చమ్కన్ - ప్రభూ, కాఁయిఁ కన్ పూచో జేతీ సోజా తార్ అరజన్ తార్ ధర్మేర్ కామ్ దేవేర్ ముణాంగ హర్దేమా ఆవ్గేచ.

5అబ్బ తుఁ యొప్పేన ఆద్మీన మేలన్, పేత్రు కన్ కజకో సీమోనేన బలా మంగా.

6ఊ సమ్దరేర్ ఢైఁ రజకో సీమోన్ కజకో ఏక్ ఖాల్డేర్ కామ్ కరెవాళేర్ ఘరేమా ఛకన్ కో.

7ఓతీ వాతే కీదోజకో సోజా డగర్గో జేర్పచ్చ, ఓర్ ఘరేర్ బాఁయాఁవుమా దీజణానన్, ఓర్ ఢైఁ హర్ఘడి రజేమా ఏక్ భక్తిదార్ సిపాయిన ఊ బలాన్

8ఉందేన ఏవాతే సే ఖోలన్ కేన్ ఉందేన యొప్పేన మేలో

9లారేర్ దాడ ఓ నిక్ళన్ జాన్ శారేర్ ఢైఁ ఆవ్తేఖమ్, దొప్పేర్ కమ్ జాదా బార బజేర్, అరజ్ కరేన పేత్రు మాడి ఉంపర్ చడన్ గో.

10ఓన ఘణ్ భూక్ లాగన్ బాటీ ఖాయేన కూంతో. ఘరేవాళ్ ఖొరాకి తయార్ కర్తేర జనా, పేత్రు ఆత్మాతీ భరాన్,

11ఆస్మాన్ ఖోలన్, చారీ కొసా ఝలన్ వతారేజకో ఏక్ తరీకార్ మోట్ ఖోళేర్ సరీక్ జమ్మీపర్ ఉత్రన్ ఆరీజేన దీటో.

12ఓమా ధర్తీపర్ రజకో సే తరీకా తరీకార్ చార్ టాంగేర్ జీవ్రాసన్, పేటేతి సర్కన్ చాలజకో కీడాన్, ఆస్మానేర్ పంకేరూ ర.

13జనా -పేత్రూ, తూఁ ఊటన్ మార్లేన్ ఖోకన్ ఏక్ ఆట్ ఊ సామ్ళో.

14పణ్ పేత్రు-మత్ ప్రభూ, అపవిత్తర్ ఛజకో నఖాయేర్ చీజ్ కాఁయిఁ తోయి మ కన్నాఁయీజ్ ఖాదొ కొని కన్ కేతేఖమ్.

15దేవ్ పవిత్తర్ కీదో జేన తూఁ- అపవిత్తర్ కన్ కేలమత్ కన్ ఉజ్జీ దీమోవణా ఊ ఆట్ ఓన ఆటాయి.

16హనూ తీన్ వణా చాలో. జన్నాజ్ ఊ ఖోళ్ ఆస్మానేన డగర్ గో.

17ఓన దకాయో జకో దర్శణ్ కాఁయిఁ ఛకో కన్ ఓర్ ఊజ్ కాఁయిఁ న కళజుఁ రజనా, కొర్నేలీ మేలోజకో ఆద్మీ, సీమోనేర్ ఘర్ కుణ్సోకన్ పూచన్, మాలమ్ కర్లేన్ ఘరే ముణాంగ హూబ్రేన్ ఘరేవాళూన బలాన్

18పేతురు కన్ కజకో దూస్రో నామేరో సీమోన్ అత్త ఛ కాఁయిఁ కన్ పూచె.

19పేత్రు ఓ దర్సణేర్ కార్ణే సోంచ్రో జనా, ఆత్మ-ఇదేక్, తీన్ ఆద్మీ తోన ఢూండ్రేచ.

20తూఁ ఊటన్ హెట ఉత్రన్ అన్మాన్ న కరస్ జూఁ ఉందేర్ సాత్ జో. మ ఉందేన మేలో కన్ కో.

21పేత్రు ఉత్రన్ ఓ ఆద్మీకన ఆన్-ఇదేక్, తమ్ ఢూండ్రే జకో ఆద్మీ మజ్ తమ్ ఆయెజకో కారణ్ కాఁయిఁ? కన్ పూచో.

22జేతీ ఓ-నియత్ దారన్ దేవేతీ చమ్కేవాళోన్ సే యూదులేతీ ఆచో నామ్ లాల్దో జకో సో సిపాయీర్ సర్దార్, కొర్నేలీ కజకో ఏక్ ఆద్మీ ఛ. ఉ తోన ఓర్ ఘరేన బలా మంగాన్, తూఁ కస్ జకోవాత్ సామళ్ణో కన్, పవిత్తర్ సోజా ఓన మాలమ్ కీదో కన్ కె. జనా ఊ ఉందేన మాఁయి బలాన్ ఖొరాకి ఘాలో.

23లారేర్ దాడ ఊ ఊటన్, ఉందేర్ సాత్ నికళో. యొప్పేవాళ్ థోడ్సేక్ భాయిబంద్ సదా ఉందేర్ లార గె.

24లారేర్ దాడ ఓ కైసరయామా గే. జనా కొర్నేలీ ఓర్ పామణేవునన్ ఠాఁసేర్ దోస్తిదారూన బలామంగాన్ ఉందేర్ వాస దేక్తో రో.

25పేత్రు మాఁయి ఆవ్తేఖమ్, కొర్నేలీ ఓర్ సమ్నక్ జాన్, ఓర్ పగేపర పడన్, నమస్కార్ కీదో.

26జేతీ పేత్రు- తూఁ ఊటన్ హుబ్ర. మ సదా నరజ్ కన్ కేన్ ఓన వటాడన్

27ఓతీ వాతే కర్తో, మాఁయిఁ ఆన్, వార్సేక్ లోగ్ గోళావేన్ రజేన దీటో.

28జనా ఊ-పరల్ జాతేవాళేతీ దొస్తి కరేరోక, అసే ఆద్మీన ఛీపేరో యూదావాళేన ధరమ్ కొని కన్ తమేన మాలమ్. పణ్ కుణ్సీ ఆద్మీ వతోయీసదా, న ఛీప్ణో కన్ క, ఖరాప్ ఛకన్ క, న కేణో కన్ దేవ్ మన దకాళోచ.

29జేతీ మన బలాయెజనా, హాటొ కాఁయీఁజ్ న కజూఁ ఆయోంచుఁ; జేతి మన బలాయెర్ కారణ్ కాఁయిఁకో మన క కన్ ఉందేన కో.

30జనా కొర్నేలీ-చార్ దాడేర్ హెటె దొప్పేర్ తీన్ బజేతీ అబ్బెలగు మ ఘరేమా అరజ్ కర్తోరూఁజనా ఝాంక్రేజకో కప్డా పేర్ మేలోజకో ఏక్ ఆద్మీ మార్ ముణాంగ హూబ్రేన్

31-కోర్నేలీ, తార్ అరజ్ ఆటాయోచ, తార్ ధర్మేర్ కామ్ దేవేర్ ముణాంగ హర్దేమా ఆయేచ. జేతి తూఁ యొప్పేన ఖబర్ కేమేలన్.

32పేత్రు కన్ ఉజ్జేక్ నామేరో సీమోనేన బలామంగా. ఊ సమ్దరేర్ ఢైఁ ఛజకో ఖాల్డేర్ కామ్ కరెవాళో సీమోనేర్ ఘర వస్రోచ కన్ మన కో.

33జన్నాజ్ తోన బలామంగాయో. తుఁ ఆయొజకో ఆచో. ప్రభుతోన హకమ్ దీనోజకో సే సామ్ళేన అబ్బ హమ్ సే దేవేర్ ముణాంగ అత్త గోళా వేన్ ఛాఁ కన్ కో.

34జేతీ పేత్రుమూండో వగాడన్ హనూకో, దేవేన కుణ్సీ ఆద్మీర్ వడి సదా భేద్ భావ్ ఛేని కన్ మ సాసీజ్ మాలమ్ కర్లిదో.

35హర్యేక్ జనూమా ఓతీ చమ్కన్ నీయతేతీ చాలె వాళేన ఊ ఢైఁ కర్లచ.

36యేసు క్రీస్తు సేన ప్రభు. ఓర్ వడితి దేవ్ శాంతి దజే ఆచ్ ఖబరేన ప్రచార్ కరన్, ఇశ్రాయేలేవాళూన దేమేలో జకో వాత్ తమేన మాలమ్ ఛ.

37యేహాన్ బాప్మీసమ్ ప్రచార్ కీదొ జేర పచ్చ, గలిలయాతిలేన్ యూదయామా సేన మాలమ్ వేగీజకో వాత్ తమేన మాలమ్ ఛ.

38ఊ కాఁయిఁకతో, దేవ్ నజరేతేరో యేసూన పవిత్తర్ ఆత్మాతీన్ జోరేతీ అభిషేక్ కీదో కన్ కజకోజ్. దేవ్ ఓర్ సాత్ రజేతీజ్, ఊ భలాయి కర్తో, శాతానేతి భావేటి పారే జేన సేన ఆచ్చో కర్తో ఫర్తో ర.

39ఊ యూదా వాళేర్ దేశేమాన్ యెరూషలేమేమా కీదోజే సే కామేర్వడీ హమ్ గవాయి ఛాఁ. ఓన ఓ లాకడే ఉంపర్ లట్కాన్ మార్నాకె.

40దేవ్ ఓన తీన్ దాడేమా వటాడన్

41సే జనూన దకావజుఁ కీదోకొని పణ్ దేవ్ అగ్డి నియమ్ కిదోజకో గవాయివూనజ్ కతో, ఊ మర్గేజేమాఁయితీ ఊటో జేర్ పచ్చ, ఓతీ సదా ఖాదే పీదేజే హమేనజ్, ఊ హమార్ ఆంకీన దకావజుఁ కీదో.

42అత్రాజ్ కొని. దేవ్ బంచ్రేజేనన్ మర్గేజేన న్యాయ్ కరేవాళో హకమ్దారేర్ నైఁ నియమ్ కీదోజకో ఈజ్ కన్, జనూన ప్రచార్ కరన్ గవాయి దేణో కన్ హమేన హకమ్ దీనో.

43ఓర్ ఉంపర్ విశ్వాస్ రకాడ జకో కూణ్ కో, ఊ ఓర్ నామేర్ కార్ణే పాప్ మాఫ్ కర్లచ కన్ ప్రవక్త సే ఓర్ కార్ణే గవాయి దేరేచ కన్ కో.

44పేత్రు ఏవాతేన ఉజ్జీ కేతోరోజనా, ఓర్ బోధాన సామ్ళేజే సేర్ ఉంపర్ పవిత్తర్ ఆత్మా ఉత్రో.

45-46సున్నత్ కరామేలెజే మాఁయిర్, పేత్రూర్ సాత్ ఆయెజకో విశ్వాసి సే, పవిత్తర్ ఆత్మా అన్య జనూర్ ఉంపర్ సదా ఉత్రన్ ఆయేర్ దేకన్ అప్సోస్ వేగె, కసెనకతో ఓ నాళి-నాళి వాతేతీ వాతే కర్తే దేవేన మహిమ కర్తే రజకో సామ్ళే.

47జేతి పేత్రు- ఆపణేర్ నైఁ పవిత్తర్ ఆత్మాన పాల్దేజకో ఏ, బాప్తీసమ్ నలజుఁ పాణీన కుణీ వతొయి థామ్ సక్యెక? కన్ కేన్

48యేసుక్రీస్తూర్ నామేపర్ ఓ బాప్తీసమ్ లేలెణో కన్ హకమ్ దీనో. పచ్చ థోడ్సేక్ దాడ్ ఉందేర్ ఢైఁ రకన్ ఓ ఓన నోరా కీదె.

Currently Selected:

Acts 10: Lambadi

Highlight

Copy