San Juan 18
18
Unaꞌtse bee bene Jesuse
(Mt. 26:47-56; Mr. 14:43-50; Lc. 22:47-53)
1Chenu ulaxu nú uni Jesuse bee bedichiaꞌ quieꞌ, uchiuꞌunu nú nzanu cuna bee beneꞌnu stucu chú reꞌcu nú lee Cedrón. Zeꞌe nuꞌ bee aca olivos nu uyuꞌununu bee beneꞌnu leta bee aca zeꞌe. 2Nu Judas, enu udeteꞌ cuenda liꞌinu nuꞌlui zeꞌe, xne huaxi bese uyanu Jesuse liꞌibeella zeꞌe. 3Nu zeꞌe uriñayu Judas texcuaꞌa bee sundado, nu cuna texcuaꞌa bee bene enu rriucu Indu llene Jerusalén enu uxeꞌla bee uleꞌya enu rnibiyaꞌ nu bee fariseo nu nuyaꞌ beei bee lanza cuna bee espada nu leꞌca nuyaꞌ beei bee quinqué cuna bee antorcha. 4Pero lunú nediyaꞌlaꞌ Jesuse ye nú zecanu, uchiuꞌunu leta bee aca zeꞌe, nu unidichiaꞌnu lubeei:
―¿Ti rlaꞌnahua?
5Nu ucuaquibeei lunu:
―Liꞌiru rlaꞌnaru Jesuse bene Nazaret.
Che ucuaqui Jesuse nú uninu:
―Liꞌá neca nzeꞌe.
Nu Judas enu udeteꞌ cuenda liꞌinu leꞌca nzui leta beei zeꞌe. 6Nu chenu uni Jesuse lubeei: “Liꞌá neca nzeꞌe”, ulacaquie beei enza diꞌchibeei nu uyecata beei lu yuu. 7Chequie unidichiaꞌ zecaꞌla Jesuse lubeei nú uninu:
―¿Ti rlaꞌnahua?
Nu uniaꞌla beei stucu bese:
―Liꞌiru rlaꞌnaru Jesuse bene Nazaret.
8Che uniaꞌla Jesuse stucu bese lubeei:
―Unila luhua nú liꞌá neca nzeꞌe. Tunu liꞌá rlaꞌnahua, uzelahua nú yue bee benequieꞌ.
9Ungae scua para nú uyalu nú uni Jesuse chenu uninu: “Niꞌ tucu bee bene enu uliquiꞌlu lua né nitilu beella.”
10Chequie Simón Pedro ulualla espada nú nuyaꞌlla nu uchiecuꞌlilla diaca chubé tucu bene enu lee Malco mosoꞌ uleꞌya enu rnibiyaꞌ lubee uleꞌya. 11Che uni Jesuse lu Pedro:
―Uducheꞌ espada cuaꞌ luhuareꞌe. Xne tunu Pa Diose unilanu nú nehuana zecaa rquiꞌña nú nehuana zecaa.
Unguyaꞌ bee bene Jesuse lu uleꞌya enu masela rnibiyaꞌ
(Mt. 26:57-58; Mr. 14:53-54; Lc. 22:54)
12Chequie bee sundado zeꞌe nu tucu sundado enu rnibiyaꞌ lubeei, cuna bee bene Israel enu rriucu Indu llene Jerusalén, unaꞌtsebeei Jesuse nu ullicaꞌcubeei liꞌinu. 13Nu unguyaꞌ beei liꞌinu rluti niꞌ Anás, enu neca suegroꞌ Caifás, Caifás quieꞌ neca uleꞌya enu máse rnibiyaꞌ lubeelá uleꞌya lana zeꞌe. 14Nu leꞌca liꞌi Caifás quieꞌ neca enu uni lubee bene Israel nú neca nzeꞌcalá para liꞌibeella nú ati tucutsia bene equie cuendaꞌ ye bee bene Israel.
Utsacuꞌ arquiꞌ Pedro nú nuꞌlulla Jesuse
(Mt. 26:69-70; Mr. 14:66-68; Lc. 22:55-57)
15Simón Pedro cuna stucu beneꞌ Jesuse uyanala beella liꞌinu. Nu lunú nuꞌlu uleꞌya enu mase rnibiyaꞌ cuaꞌ stucu benecuaꞌ, che uyuꞌulla cuna liꞌinu niꞌ uleꞌyacuaꞌ, 16pero Pedro uyaꞌna ruꞌu puertatsia. Che uchiuꞌu beneꞌ Jesuse enu nuꞌlu uleꞌya enu máse rnibiyaꞌ, nu unilla lu unaꞌa enu rriucu ruꞌu puerta zeꞌe para nú uyuꞌu Pedro. 17Che uni unaꞌa enu rriucu ruꞌu puerta zeꞌe lu Pedro:
―¿Pianu leꞌca liꞌilu necalu tucu beneꞌ Jesuse?
Nu ucuaqui Pedro lunchu nú unilla:
―Liꞌá laca beneꞌlla.
18Nu lunú nucuaa che bee mosoꞌ cuna bee bene enu rriucu Indu llene Jerusalén ucuaꞌa beei quii para nú ubichia beei. Nu leꞌca nzu Pedro cuna liꞌibeei ruꞌu quii zeꞌe rebichia beei.
Uleꞌya enu másela rnibiyaꞌ huaxi nú unedichiaꞌlla lu Jesuse
(Mt. 26:59-66; Mr. 14:55-64; Lc. 22:66-71)
19Chequie uleꞌya enu mase rnibiyaꞌ uquixie unedichiaꞌ lu Jesuse equie cuendaꞌ bee beneꞌnu nu cuna equie nú seteꞌnu bee bene. 20Che ucuaqui Jesuse lulla nú uninu:
―Liꞌá siempre unia ante luye bee bene nu uzetea liꞌibeella liñi bee indu nu cuna liñi Indu llene Jerusalén elu rieteꞌsaꞌ ye bee bene Israel, nu lecaxi nú unia aꞌchiꞌ lubeella. 21¿Enzeꞌe xinu rnedichiaꞌlu lua? Unedichiaꞌ lubee bene enu ubeneꞌ nú unia, liꞌibeella nediyaꞌ beella lunú uzetea liꞌibeella.
22Chenu uni Jesuse scua tucu bee bene enu rriucu ruꞌu Indu llene Jerusalén, udichiui ruꞌunu nu uni:
―¿Xieꞌ scua rcuaqui bene lu uleꞌya enu máse rnibiyaꞌ la?
23Nu ucuaqui Jesuse lui nú uninu:
―Tunu nuꞌ xi nú necha neca unia, uniꞌ xine. Pero tunu uni nzeꞌcaa, ¿xinu udiñilu liꞌá che?
24Che nacaꞌcunu uxeꞌla Anás liꞌinu lu Caifás uleꞌya enu másela rnibiyaꞌ.
Stucuaꞌla utsacuꞌ arquiꞌ Pedro nú nuꞌlulla Jesuse
(Mt. 26:71-75; Mr. 14:66-72; Lc. 22:58-62)
25Pero Pedro nzuscaꞌ rebichia ruꞌu quii zeꞌe. Nu unibeei lulla:
―¿Pianu leꞌca liꞌilu necalu tucu beneꞌ Jesuse?
Nu ucuaqui Pedro lubeei nú unilla:
―Liꞌá laca beneꞌlla.
26Chequie tucu bee mosoꞌ uleꞌya enu máse rnibiyaꞌ cuaꞌ, enu recasaꞌ bene enu uchiecuꞌ Pedro diaca, uni lu Pedro:
―¿Xieꞌlanu liꞌá ulañialu cuna liꞌilla leta bee aca olivos la?
27Nu stucuaꞌla utsacuꞌ arquiꞌ Pedro nú nuꞌlulla Jesuse. Hora zeꞌe ubixia tucu tiula.
Nzu Jesuse lu Pilato
(Mt. 27:1-2, 11-14; Mr. 15:1-5; Lc. 23:1-5)
28Chenu uyeꞌe lu yuu uchiuꞌunu beei Jesuse niꞌi Caifás nu unguyaꞌ beei liꞌinu ruꞌu palacioꞌ gobernador Roma. Nu bee bene Israel cuaꞌ né chuꞌu beei liñi palacio zeꞌe, xne para liꞌibeei tunu achuꞌu beei zeꞌe lixiu naa beei lu Diose, nu che lecaꞌ modo acubeei exe baxcu. 29Che uchiuꞌu Pilato nu unilla lubeei:
―¿Xi uriꞌi benequieꞌ nú uriñayuhualla caꞌa?
30Che ucuaqui beei nú unibeei lulla:
―Tunu necalla bene nzeꞌca né ayelayurulla lulu caꞌa.
31Che uni Pilato lu beei:
―Uyaꞌhualla, nu ulualuhua lu cuendaꞌlla tucu nú rnibiyaꞌ leyꞌhua.
Che unibeei lu Pilato:
―Liꞌiru la luꞌcuru elurnibiyaꞌ nú nibiyaꞌru nú ati tucu bene.
32Scua uyalu nú uni Jesuse chenu uninu equie cuendaꞌ nú xa atinu. 33Chequie uyuaꞌla Pilato liñi palacio zeꞌe nu ubixialla Jesuse nu unedichiaꞌlla lunu:
―¿Xieꞌ liꞌilu necalu arreꞌ bee bene Israel la?
34Che ucuaqui Jesuse lulla nú uninu:
―¿Liꞌitsialu rnidichiaꞌlu nucuaꞌ la o stucu bene uni nucuaꞌ lulu la?
35Nu ucuaqui Pilato lunu:
―¿Xieꞌ bene Israel liꞌá la? Liꞌi eꞌcu bee bene lachilu cuna bee uleꞌya enu rnibiyaꞌ udeteꞌ cuenda liꞌilu lua. ¿Xi uriꞌilu che?
36Che ucuaqui Jesuse lulla:
―Elurnibiyaꞌ nú rluꞌcua lacane elurnibiyaꞌ nú nuꞌ lu iliulabequieꞌ. Tunu necane elurnibiyaꞌ nú nuꞌ lu iliulabequieꞌ, rluꞌcua bee bene enu ariꞌi xuu para nú lecati adeteꞌ cueda liꞌá lubeei pero elurnibiyaꞌ nú rluꞌcua lacane elurnibiyaꞌ nú nuꞌ lu iliulabequieꞌ.
37Chequie uni Pilato lunu:
―¿Liꞌilu necalu arre chela?
Nu ucuaqui Jesuse lulla nú uninu:
―Tucu nu rnilu scua necane, liꞌá neca arre. Para nucuaꞌ ungula, nu para nucuaꞌ ubela lu iliulabe quieꞌ para nú nia lunú neli neca lubee bene. Ye bee bene enu nzenala nú neli neca rieneꞌ bee nzeꞌe nú rnia.
38Che uni Pilato lunu:
―¿Xi neca nú neli neca che?
Unibiyaꞌ beei nú ati Jesuse
(Mt. 27:15-31; Mr. 15:6-20; Lc. 23:13-25)
Chenu ulaxu uni Pilato nucuaꞌ, uchiuꞌu zecaꞌlalla uyaniꞌlla lubee bene Israel zeꞌe nu unilla lubeei:
―La llela niꞌ tucu equiya nú uriꞌi benequieꞌ. 39Pero liꞌihua rluꞌcuhua custumbre nú liꞌá laꞌa tucu bene enu nchiñi niꞌcuꞌ lu eliñi baxcu. ¿Niarquiꞌhua nú laꞌa Arre Israel che la?
40Chequie ubixialí zecaꞌlabeei nú unibeei:
―La laꞌalu benequieꞌ, ulaꞌa Barrabás.
Nu Barrabás necai tucu huanaꞌ.
Currently Selected:
San Juan 18: zpl
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.