San Juan 13
13
Uquiee Jesuse cuchiuꞌ bee beneꞌnu
1Ante eliñi baxcu, nediyaꞌlaꞌ Jesuse nú entariñala hora nú tsaꞌnanu iliulabequieꞌ para nú nzianu zucunu cuna paꞌnu Diose. Liꞌinu chiquiꞌ uzecanu bee beneꞌnu lu iliulabe quieꞌ nu secascaꞌnu liꞌibeella hasta nee.
2Nu chenu racuxee beella, uyuꞌu bezeꞌlu arquiꞌ Judas Iscariote llianaꞌ Simón Iscariote para nú deteꞌ cuendai Jesuse. 3Pero nediyaꞌlaꞌnu nú Paꞌnu Diose utsaꞌnala yeene yanu, nu leꞌca nediyaꞌlaꞌnu nú enza lu Paꞌnu Diose nzeꞌtanu nu enza lu Paꞌnu Diose benchilaꞌ zecanu. 4Diquila nú racuxee beella utsulínu nu uluanu laquie nú nutunu lu xucunu nu ullicaꞌnu tucu tualla xlaꞌcunu. 5Che chu uduꞌnu inza liñi tucu exquiꞌña, nu uquixienu rquienu cuchiuꞌ bee beneꞌnu, nu rcuiꞌchinue cuna tualla nú nacaꞌcu xlaꞌcunu.
6Chenu nze quienu cuchiuꞌ Simón Pedro, unilla lunu:
―Detá, la yala nú quielu cuchiuꞌa.
7Nu ucuaqui Jesuse lulla:
―Nee la riꞌilu beyaꞌ lunú rriꞌá, pero enta chenu riꞌilu beyaꞌe.
8Chequie uni Pedro lunu:
―¡La zelaa nú quielu cuchiuꞌa!
Nu uninu lulla:
―Tunu la quiea cuchiuꞌlu la acaꞌlu benea che.
9Nu ucuaqui Simón Pedro lunu:
―Aa che, Detá, pero la quieelu cuchiuꞌtsia, leꞌca uquiee ya nu uꞌchaꞌ liꞌá che.
10Pero ucuaqui Jesuse lulla:
―Enu ungutsala, cuchiuꞌtsia nzeꞌe rquiꞌña nú chequielá, xne lecaꞌ xi naa diquilla. Nu liꞌihua lecaꞌ xi naahua, añinzuca nú laca yehua.
11Liꞌinu uninu: “Añinzuca nú laca yehua”, xne nediyaꞌnu nú ta enu deteꞌ cuenda liꞌinu.
12Chenu ulaxu nú uquieenu cuchiuꞌ bee beneꞌnu, che ungutu zecanu laquie nú uluanu lu xucunu, nu chu uzucu zecanu lu mexa nu uninu lubeella:
―¿Rriꞌihua beyaꞌ lunú uriꞌá luhua la? 13Liꞌihua rnihua Maestro nu Detá lua, nu neliꞌhua xne scua necane. 14Nee liꞌá nú neca ulaxcuela nu Detá uquia cuchiuꞌhua, leꞌca scua rquiꞌña nú quiehua cuchiuꞌ bee saꞌhua. 15Ulubela luhua xa riꞌihua para nú leꞌca scua tucu nú uriꞌá riꞌihua. 16Liꞌihua nediyaꞌhua nú niꞌtucu mosoꞌ la neca equielái lu patronꞌi, leꞌca bene enu nza luhuareꞌ stucu bene la neca equielái lu bene enu xeꞌla liꞌi. 17Ñia nza lu cuendaꞌhua tunu rriꞌihua beyaꞌ bee nucuaꞌ nu zucuꞌhuane.
18’La nia lu cuendaꞌ yehua, liꞌá nediya tahua bee enu ucañia. pero rquiꞌña nú yalu tucu nú rni lu ichiꞌ Stichiaꞌ Diose elu rni: “Liꞌi eꞌcu enu racunua, ubelleta equiea.” 19Nia nucuaꞌ luhua ante nú acane para nú chenu acane, chili arquiꞌhua nú liꞌá necaa enu necaa. 20Neli nia luhua: Nú bene enu riꞌi caso bene enu xeꞌlaa, rriꞌi caso nzeꞌe liꞌá, nu enu rriꞌi caso liꞌá, liꞌilla rriꞌi casolla enu uxeꞌla liꞌá.
Udixiuleꞌe Jesuse nú deteꞌ cuenda Judas liꞌinu
(Mt. 26:20-25; Mr. 14:17-21; Lc. 22:21-23)
21Chenu ulaxu nú uni Jesuse scua, chiquiꞌ nehuana utsu arquiꞌnu, che udixiuleꞌe nzeꞌcanu lubeella nú uninu:
―Neli nia luhua nú tucuhua deteꞌ cuenda liꞌá.
22Chequie uquixie ubiꞌya bee beneꞌnu lu saꞌbeella, nu la riꞌi beella beyaꞌ tabeella neca enu uninu lu cuendaꞌ. 23Nu tucu beneꞌ Jesuse enu chiquiꞌ secanu enu nzucu cueꞌtsenu diqui nú racuxe beella, 24uriꞌi Simón Pedro seña lulla para nú nedichiaꞌlla lunu, núti lu cuendaꞌ rninu. 25Che beneꞌnu enu nzucu cueꞌtsenu unedichiaꞌlla lunu:
―Detá, ¿Taru enu deteꞌ cuenda liꞌilu?
26Nu ucuaqui Jesuse, nu uninu:
―Cuachaa teleꞌe pá nu ya enu detene nzeꞌella.
Che ucuachanu teleꞌe pá udeteꞌnu ya Judas Iscariote, llianaꞌ Simón Iscariote. 27Hora nú unaꞌtse Judas pá zeꞌe chu uyuꞌu bezeꞌlu arquii, nu uni Jesuse lui:
―Lunú niarquiꞌlu riꞌilu, yexetsia uriꞌi.
28Nu niꞌ tucu beella enu nzucununu lu mexa zeꞌe né riꞌibeella beyaꞌ xinu uninu lui scua. 29Nu lunú Judas nuyaꞌ cuenda biti nú nuꞌcheꞌ melu, che nuꞌ beella enu uriꞌi elliebacuꞌ, nú uni Jesuse lui nú chetsii xi chetsii para eliñi, urre deteꞌi xi deteꞌi lubee bene enu seca. elitsi.
30Chenu ulaxu udacu Judas pa zeꞌe chu uchiuꞌui nzai nu uyuꞌula rulaꞌ che.
Tucu mandamiento cuqui
31Chenu uchiuꞌu Judas uni Jesuse:
―Nee aca achee poder nú rluꞌcu Bene enu uxeꞌla Diose lu iliulabe, nu equie cuendaꞌ liꞌinu aca achee poder nú rluꞌcu Diose. 32Nu scua tucu nú lubeꞌ Bene enu uxeꞌla Diose, xa neca poder nú rluꞌcu Diose, leꞌca scua lubeꞌ Diose poder nú rluꞌcu bene enu uxeꞌlanu, nu la leaꞌ nú acane scua. 33Bee lliꞌñia, lleꞌnatsia nzula cuna liꞌihua. Laꞌnahua liꞌá pero tucu nú unila lubee bene Israel, leꞌca scua nia luhua nee. Leca modo tsehua elu nzaꞌa. 34Nee liquia tucu mandamiento cuqui luhua: Uzecahua bee saꞌhua. Tucu nú seꞌca liꞌihua, leꞌca scua uzecahua bee saꞌhua. 35Tunu secahua bee saꞌhua, scua riꞌi ye bee bene beyaꞌ nú liꞌihua necahua bee benea.
Uni Jesuse nú ni Pedro nú la chululla liꞌinu
(Mt. 26:31-35; Mr. 14:27-31; Lc. 22:31-34)
36Nu uni Simón Pedro lu Jesuse:
―Detá, ¿ca nzalu?
Nu uni Jesuse:
―Elu nzaꞌa leca modo tselu nee, pero enta bichia nú yeꞌtanalalu liꞌá.
37Che uni Pedro lunu:
―Detá, ¿xiquie nú leca modo tsea cuna liꞌilu nee? ¡Nu liꞌá lecaxi riꞌi mase nú atia lu cuendaꞌlu!
38Nu ucuaqui Jesuse nú uninu:
―¿Neliꞌlu nú atilu lu cuenda la? Liꞌá nia lulu nú ante nú bixia tiula, liꞌilu chunala bese unilálu nú la chululu liꞌá.
Currently Selected:
San Juan 13: zpl
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.