Esita 1
1
Omukhaye Washiti yakhaya omuruchi Ahasuwero
1Mundaalo tsiaAhasuwero, niye Ahasuwero tsana owaruka tsingongo eshikhumi amakhumi kabili namusaafu okhurula ebiHindi okhuula eEtiopia, 2mbu mundaalo etsio, olwa omuruchi Ahasuwero yali nali khushifumbi shioburuchibwe, eSusa, litookho, 3mumuyika kwakhataru kwoburuchibwe yakholela abakhulundube nabasumbabe lisabo, abaseesia belihe liaPerisia nebuMedi, nabamakuru, nende abakhulundu betsingongo nibali imbeliwe, 4olwa yalolosinjia ebiobuyinda bioburuchibwe bwoluyali, neifuma neing'oono yobukhulundubwe, tsindaalo tsinyinji, nitsio tsindaalo eshikhumi namakhumi munaane. 5Mana tsindaalo etsio olwa tsiali nitsihelile, omuruchi yabakholela lisabo abandu bosi abali nibaliho eSusa mwitookho, ari abakhongo ari abatuutu, tsindaalo musaafu, khushitonye eshilobole eshiomulwanyi Iweinzu ikhulundu yomuruchi. 6Tsialiho tsingubo tsinzelesia tsindafu etsieipamba, netsieibulu, etsiabohelwa tsinzaha tsieikitani indorotoro neisambarau khungaka tsieifeetsa netsisiilo tsiamarimari; ne bialiho ebitali bieitsahaabu neifeetsa, ebiali khubwelu bwamachina kamarimari amaranzayi, namalafu, nakamunyuria, namamali. 7Nibabaheelesia ebiokhunywa mubikombe bieitsahaabu, ebikombe ebio biosi nibiahukhaane lukano lukano, neidivai yeshiami inyinji muno, eyirula khumukhono omusiro kwomuruchi. 8Kata obunywi obwo bwalonda khumalako; yabulaho owaraichilisibwa; okhuba nindio omuruchi yali nalachile abakali bosi abomunzuye, mbu bakhole aka buli mundu yeenya. 9Khandi Washiti omukhaye womuruchi yesi yakholela abakhasi lisabo munzu ikhulundu eyali yomuruchi Ahasuwero.
10Khunyanga yomusaafu, olwa omwoyo kwomuruchi kwali nikutsatsahaale khulwa idivai, yalaka Mehumani, Bizitsa, Haribona, Bigitsa, Abigitsa, Zetsari, naKarikasi, abasumba abalate musaafu abakhalabananga imbeli waAhasuwero omuruchi, 11okhuleera Washiti omukhayewe imbeli womuruchi, nali nolusimbi Iweshiruchi, okhumanyia abandu nabakhulundu eshiisoshie, okhuba yali oweshiiso muno. 12Nebutswa omukhaye Washiti yaloba okhwitsa khwilako liomuruchi muminwa chiabasumba abalate; ne khulwako omuruchi yasinyikha muno, inda niyiyia.
13Mana omuruchi nareeba abachesibe, abachesibe, abachesihala khuketsindaalo etsio; okhuba nilwo olwa omuruchi yayinyanga okhureeba abo bosi abamanya akamalako nakobuyaasii; 14ne abo abamulondanga ahambi bali Karishena, Shetsari, Adimatsa, Tarishishi, Meresi, Marisena, naMemukani, nibo abakhulundu musaafu baPerisia nende buMedi, abali beshiina shiomuruchi, abeekhalanga hambeli muburuchibwe; 15nabareeba mbu Khukhamukholele shina omukhaye Washiti khukamalako, shichila shiakholile aka yabiilwa nomuruchi Ahasuwero muminwa chiabasumba abalate ta? 16Naye Memukani nakalusiamwo, imbeli womuruchi nabakhulundu, ari Omukhaye Washiti shiakholeele omuruchi yenyene obubii ta, habula abakhulundu bosi, nende abandu bosi abali mungongo tsiosi tsiomuruchi Ahasuwero. 17Okhuba eshikhole shino shiomukhaye womuruchi shilafuma ebulafu mubakhasi bosi, okhuchila abaami babwe nibachaywa mumoni tsiabwe, olwa kalasungwa mbu Omuruchi Ahasuwero yalaka Washiti omukhayewe okhuleerwa imbeliwe, ne shiyayeetsa ta. 18Mana kata leelo luno abeshikhaye bosi baPerisia nebuMedi ababa nibahuliile akeshikhole shino shiomukhaye womuruchi, balaba nibaboolelanga abasumba bosi bomuruchi; mana obuchayi noburima bulabaho obunji. 19Omuruchi naba nachama, lilako liomuruchi lirumbulwe ebulafu, nilihandiikwa mumalako kabaPerisia nabaMedi, mbu lileshe okhukalukhasibwa, eliboola mbu Washiti areetsa imbeli womuruchi Ahasuwero khandi ta; mana omuruchi aheelesie oundi oumushila olukhayelwe. 20Mana olwa oburumbusi bwomuruchi, obwa yeetsa okhurumbula, bulaba nibutswanile muburuchibwe bwosi, obuli burio obukhongo, abakhasi bosi balaheelesia abaami babwe oluyali, ari abatuutu. 21Likhuwa elo nilichamisia omuruchi nabakhulundu; omuruchi nakhola aka Memukani yaboola; 22yayila tsibarwa mungongo tsiosi tsiomuruchi, khubuli lukongo mubuhandiichi bwalwo, nokhubuli bandu mululimi lwabwe, mbu buli musaatsa abeetsenje omuruchi munzu yiye, naboola olulimi lwabandu boluyialwe.
Currently Selected:
Esita 1: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975