Matio 28
28
A Yeezu Kũũ Poɔ Leɛ-iruu
(Mak 16:1-10; Luk 24:1-12; Gyɔɔn 20:1-10)
1A pɛnnoo bebiri naŋ da wa di yi baare, zie naŋ da wa nyaana a koseɛraa bebi-dɛndɛŋ daare, Maria Magdalina ane o yo-tɔ Maria da gaa la a yaa zie ka ba te nyɛ. 2A paretɛloŋ lɛ, ba wa berɛ ka a teŋɛ deɛ gbigri yaga zaa, bonso, a Daana maleke da sigi waɛ la a wa billi a kuuri naŋ da pɔge a yaa noɔreŋ bare, a do zeŋ a kuuri zu. 3#Mat 17:2; Tom 1:10 A o waaloŋ da waa ŋa saa naŋ nyegrɛ, kyɛ ka o bonsuuri pɛle parepare lɛ aŋa sazɔŋ. 4A yaa guguuribo naŋ da wa nyɛ a maleke, dabeɛ̃ da kpɛ ba la yaga, ka ba miiŋ a te waa seŋ noba naŋ kpi. 5Kyɛ ka a maleke yeli ko a pɔgeba, “Yɛ ta zoro dabeɛ̃, N baŋ ka a Yeezu ba naŋ da kpa a dagaraa zu la ka yɛ boɔrɔ. 6#Mat 12:40; 16:21; 17:23; 20:19; Tom 2:36 O ba kye a kyɛ, O iree la, a seŋ O naŋ da yeli ko yɛ lɛ. Yɛ wa nyɛ zie na O naŋ da gaŋ. 7#Mat 26:32 Yɛ pãã leɛ gaa wieũ zaa a te yeli ko a O potuuribo, ‘O iri yi la a kũũ poɔ. Serɛzaa O de la weɛ a gɛrɛ Galili teŋɛ, be la ka yɛ na te nyɛ O.’ A duoro N naŋ taa ka N ko yɛ la a lɛ.” 8Ba da leɛ yi la a yaa zie wieũ lɛ ane dabeɛ̃ ane kyelloo yaga, a zoro ka ba te yeli ko a O potuuribo. 9A tɔntɔbaalɛ ka a Yeezu wa page ba a yeli, “N puoro yɛ la!” Ba da wa la a Yeezu zie a wa le vɔgle O puliŋ kyɛ eŋ O. 10#Hib 2:11 Lɛ la ka a Yeezu yeli ko ba, “Yɛ ta zoro dabeɛ̃, yɛ gaa te yeli ko a N yɔɔmine ka ba gaa Galili, be la ka ba na nyɛ ma.”
A Yaa Guguuribo Duoro
11A pɔgeba naŋ da naŋ gɛrɛ la ka a yaa guguuribo mine gaa te kpɛ a teŋkpoŋ poɔ, a manne a yɛlɛ zaa naŋ e a ko a Naaŋmen bagmaalkare. 12A Naaŋmen bagmaalba naŋ wa boɔle a teŋɛ nembɛrɛ zaa lantaa baare, ba da boɛ la ka ba de libi-kpoŋ a ko a sogyɛre, 13#Mat 27:64 kyɛ yeli ko ba, “Yɛ yeli, ‘O potuuribo la wa zu a O eŋɛ tensogɔ saŋ, te naŋ da gbiri.’ 14Ka a yeli ŋa wa kpɛ a gɔbena tobo, te na e la ka o poɔ pɛle ka yelfaa zaa ta pɔge yɛ.” 15Lɛ la ka ba da de a libie kyɛ e seŋ ba naŋ wuli ba lɛ. A lɛnso ka ba naŋ yele a yeli ŋa a Gyuumine poɔ a wa tɔ zenɛ.
Yeezu Naŋ Toŋ A Potuuribo
(Mak 16:14-18; Luk 24:36-49; Gyɔɔn 20:19-23; Toma 1:6-8)
16 #
Mat 28:7
A potuuribo pie ne yeni na da gaa la Galili, a te do a taŋ na zu a Yeezu naŋ wuli ba ka ba gaa. 17Ba naŋ da wa nyɛ O, ba da eŋ O la, kyɛ ka ba mine meŋ da bonnɔ. 18#Mat 11:27; Efe 1:20-22 Ka a Yeezu wa yeli ko ba, “Ba ko Ma la kpeɛ̃õ zaa naŋ be sazu ane teŋɛ. 19#Mak 16:15-16 Yɛ pãã gaa a tenne zaa a te e ka a nemboorɔ zaa leɛ a N potuuribo, ka yɛ korɔ ba suobu; a Saa ane a Bie ane a Vooroŋ Soŋ yuori eŋɛ, 20#Mat 18:20 a wullo ba ka ba tuuro a yɛlɛ na zaa N naŋ ko yɛ noɔre. Kyɛ yɛ baŋnea, N be la yɛ zie tegitegilɛ, a na te ta a teŋɛ baaroo saŋ.”
Currently Selected:
Matio 28: DGA
Highlight
Copy
Compare
Share
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.