Matio 24
24
Yeezu Naŋ Yeli A Naaŋmen Die Saamo Yɛlɛ
(Mak 13:1-2; Luk 21:5-6)
1A Yeezu naŋ da wa yi a Naaŋmen die poɔ a kyɛnɛ gɛrɛ, a O potuuribo da wa la O zie a wa teɛ wullo O a Naaŋmen die. 2#Luk 19:44 Lɛ la ka O soore ba, “Yɛ nyɛ la a ama zaa, bee yɛ ba nyɛ a? Yelmeŋɛ ka N yele korɔ yɛ, ba koŋ bare a yiri ŋa kusi-yenaa zaa ka o dɔgle o tɔ zu. A zaa pabo ka ba na daalɔɔ.”
A Andonɛɛ Baaroo Yelwulii
(Mak 13:3-13; Luk 21:7-19)
3A Yeezu naŋ da wa zeŋ a Oliva Taŋzu, a O potuuribo da wa la O zie ba yoŋ tɛgɛ, a wa soore O, “Yeli ko te, boŋ saŋ la ka a yeli ŋa na e? Ka boŋ la na wuli ka a fo leɛ-waabo ane a teŋɛ baaroo saŋ taɛ la?” 4Ka a Yeezu yelsɔge ba, “Yɛ gu yɛmenne velaa ka neɛzaa ta wa bɛlle yɛ. 5#Mat 24:24; Tom 5:36-37; 1 Gyn 2:18 Bonso, noba yaga na wa la N yuori eŋɛ, a yele, ‘maa la a Kirista!’ kyɛ na bɛlle noba yaga ka ba bɔre. 6Yɛ na woŋ la zɔɔre yɛlɛ, ane zɔɔre yɛlɛ ba naŋ na waala yele; yɛ ta vɛŋ ka dabeɛ̃ kpɛ yɛ. Ama zaa na e la kyɛ ka a teŋɛ naŋ koŋ baare sɛre. 7Bonso, paaloŋ na maŋ iri zɔɔrɔ ne la o paaloŋ tɔ, ka namine iri zɔɔrɔ ne ba namin-taaba. Kɔŋkpoŋ na le la a ziiri zaa, kyɛ ka a teŋɛ gbigre a ziiri yaga poore: 8kyɛ a ama zaa waa seŋ ŋa pɔg-poɔ naŋ ta dɔgebo ka a o poɔ piili beɛrɛ.”
Dɔgroŋ Kpoŋ Naŋ Waana Yɛlɛ
9 #
Mat 10:17; 10:22; Gyn 16:2 “Ba na de yɛ la tere ka ba dɔgre, kyɛ ko yɛ, ka a tenne zaa kyiiri yɛ, a N yuori zuiŋ. 10Noba yaga na zagre la a Naaŋmen yɛlɛ a lɛ saŋ, a yire taa poe, kyɛ kyiire taa. 11#Mat 7:15; 1 Gyn 4:1 Kaŋwaa ŋmen-yelmanneba yaga na yi la, a bɛlle noba yaga ka ba bɔre. 12#2 Tɛs 2:10; 2 Tim 3:1-5 Kyɛ potuoluŋ naŋ na do zu yaga zuiŋ, noba yaga nɔmmo na maa la. 13#Mat 10:22; Yuo 2:10 Kyɛ soba na zaa naŋ na di kannyiri te ta a baaroo saŋ, na nyɛ la faabo. 14#Mat 28:19; 10:18 Ba na moɔle la a Naaŋmen naaloŋ yelnoore a tendaa zaa zu, ka a e danseɛ a noba zaa zie kyɛ ka a baaroo pãã ta.”
A Kyiiruŋ Kpoŋ Kpoŋ Yɛlɛ
(Mak 13:14-23; Luk 21:20-24)
15 #
Dan 9:26-27; 12:11 “Azuiŋ, ka yɛnee wa nyɛ a kyiiruŋ kpoŋ kpoŋ ka o are a Naaŋmen die zisoŋ poɔ, aŋa lɛ a Ŋmen-yelmanna Daneɛl naŋ da daŋ yeli, (vɛŋ ka neɛ naŋ sɔre a gane baŋ a tɛgɛ), 16a ferɛɛ la ka banaŋ naŋ be Gyudiya paaloŋ zo kpɛ a tanne poore. 17#Luk 17:31 Soba na naŋ be peɛzu ta la sigi ka o te de o boma naŋ be a die poɔ. 18Soba na naŋ be weɛ poɔ ta wa leɛ kulo ka o te de kparoo. 19Pɔgpoore ane banaŋ naŋ taa bilɛɛre ka ba ɛnnɛ a bebie na poɔ yuori la we! 20#Tom 1:12 Yɛ puoro ka a yɛ zoobu ta wa le a sakyɔre saŋ, bee a pɛnnoo bebiri daare. 21#Dan 12:1 Bonso, a lɛ saŋ dɔgɛɛ kpoŋ ba naŋ daŋ ba nyɛ o tɔ a yi a tendaa piiluu saŋ a wa ta zenɛ, bee a daŋ na la nyɛ a dɔgɛɛ ŋa tɔ, na wa la. 22Kyɛ ka ba naŋ da ba ŋmaa a bebie ama kyɛlɛɛ bare, nensaala zaa da koŋ nyɛ faabo. Kyɛ a neŋkaa-irri zuiŋ, ba na ŋmaa la a bebie mine bare. 23Ka neɛzaa pãã wa yeli ko fo, ‘Nyɛ! A Kirista la kyɛ!’ Kyɛ bee O be la kyɛ! Yɛ ta sage de. 24#Mat 24:5; 24:11; Begɛ 13:1-3; 2 Tɛs 2:8-9 Kaŋwaa Kirista mine ane kaŋwaa Ŋmen-yelmanneba na wa la, a wa erɛ yelwulii kyɛ tonɔ toŋkpeɛne, ka ba bɛlle noba ka ba tuli, ka ba naŋ na toɔ̃, ba na e la ka a neŋkaa-irri meŋ gba tuli. 25Yɛ kaara velaa, N daŋ yeli ko yɛ la. 26A lɛ zuiŋ ka ba naŋ wa yeli ko yɛ, ‘Nyɛ! O be la wɛgyɛŋ poɔ,’ yɛ ta wa yire be, bee ka ba yeli, ‘Nyɛ! O be la a dikpaareŋ,’ yɛ ta sage de. 27#Luk 17:23-24 Aŋa saa nyegroo naŋ maŋ yi sapare, ka a sapii toɔ̃ wa te gaa saniŋe, lɛ ka a Nensaala Bie waabo na waa. 28#Gyob 39:30; Hab 1:8; Luk 17:37 Benee zaa boŋkũũ naŋ gaŋ, be la ka gyugmo#24:28 Gyugmo: A dagaaba mine maŋ boɔle la a gyugmo ka Sedume. na lantaa.
A Nensaala Bie Waabo Yɛlɛ
(Mak 13:24-27; Luk 21:25-28)
29 #
Aza 13:10; 2 Pit 3:10 “A paretɛloŋ lɛ, a dɔgɛɛ ama puoriŋ,
a ŋmenaa na ligi la,
ka a kyuu veɛloŋ meŋ koŋ kyaane;
a ŋmarbie na yi la a sazu le,
kyɛ ka a sazu boŋkpeɛne zaa zɛŋ.
30 #
Yuo 1:7; Mat 26:64; Dan 7:13-14; Yuo 19:11 A lɛ ka a Nensaala Bie yelwulaa pãã na sãã a saluoni poɔ, ka a tendaa nemboorɔ zaa koŋ, kyɛ ka ba pãã nyɛ ‘a Nensaala Bie ka O yi a sagama poɔ waana’ ne kpeɛ̃õ ane puubu. 31#1 Kor 15:52; 1 Tɛs 4:16; Yuo 8:1-2 O na toŋ la O malekere ka ba wa peɛle eelɛ gboligboli, a boɔle a O neŋkaa-irri zaa lantaa a yi a tendaa lamboe anaare zaa, a yi a saluoni baaraa te ta a kaŋ.”
A Kaŋkanteɛ Yelwulaa
(Mak 13:28-31; Luk 21:29-33)
32“Yɛ zanne a wuluu ŋa yi a kaŋkanteɛ zie: ka o ul-pɔrɔ wa te bɔrɔ vaare, yɛ maŋ baŋ ka sẽɛ saŋ peɛlɛɛ la. 33A lɛ ne o zu, ka yɛnee wa nyɛ a yɛlɛ ama zaa, yɛ baŋ ka a Nensaala Bie waabo pãã doŋɛɛ la, a gba be a dendɔre noɔreŋ. 34Yelmeŋɛ zaa ka N yele korɔ yɛ, a zenɛ noba boorɔ ŋa koŋ kpi baare kyɛ ka a yɛlɛ ama zaa e. 35#Mat 5:18 Sazu ne teŋɛ na wa tɔle gaa la, kyɛ N yelbie koŋ baŋ tɔle gaa togitogi.”
Neɛ Zaa Ba Baŋ A Bebiri Bee A Saŋ
(Mak 13:32-37; Luk 17:26-30, 34-36)
36 #
1 Tɛs 5:1-2
“Kyɛ neɛzaa ba baŋ a bebiri, bee a saŋ a Nensaala Bie naŋ na wa. A tenvelaa malekere bee a Bidɔɔ meŋ gba ba baŋ a saŋ, ka a Saa yoŋ naane. 37#Piil 6:11-13; Luk 17:26-27 Aŋa a Nowa bebie naŋ da waa lɛ, lɛ ka a Nensaala Bie meŋ waabo bebiri na waa. 38Aŋa a bebie na poɔ a kɔmpiiri naŋ da ba wa sɛre, ka noba da dire kyɛ nyuuro, ka dɔbɔ derɛ pɔgeba, ka pɔgeba meŋ kulo serebɛ, a te ta daare na a Nowa naŋ kpɛ a gbori, 39ka ba da ba baŋ yeli naŋ erɛ a te ta saŋ na a kɔmpiiri naŋ wa ŋmɛ, a wuo ba zaa gaa ne. Lɛ meŋ ka a na waa a Nensaala Bie waabo saŋ. 40#Luk 17:35-36 A lɛ saŋ, noba bayi na be la weɛ poɔ, ka ba wa taa kaŋ gaa ne kyɛ bare kaŋ. 41Pɔgebɔ bayi na laŋ ɛrɛ la zɔŋ, ka ba wa taa kaŋ gaa ne kyɛ bare kaŋ. 42#Mat 25:13 Azuiŋ, yɛ gu yɛmenne velaa, a kaara soŋ, bonso, yɛ ba baŋ a daare na yɛ Daana naŋ waana. 43#Luk 12:39-46 Kyɛ yɛ baŋ a ŋaa tɛgɛ: ka a yidaandɔɔ da baŋ bonna saŋ a nannyige naŋ na wa, o da na gu la a yiri velaa, o da koŋ vɛŋ ka a nannyige wa ŋma a yiri. 44#Yuo 16:15 Azuiŋ, yɛ meŋ nare yɛmenne, bonso, a Nensaala Bie na wa la saŋ na yɛ naŋ ba baŋnea.”
Gbaŋgba-bivelaa Bee Gbaŋgba-bifaa Yɛlɛ
(Luk 12:41-48)
45“Aŋ pãã la a gbaŋgba-bivelaa ane yɛmbaŋna, ka o daana na de o eŋ ka o kaara o yiri zu, a korɔ a o gbaŋgba-taaba ba bondirii a saŋ na a naŋ seŋ ne? 46Zunoɔ soba la a tontombie na o daana naŋ leɛ kulo waana a wa nyɛ o ka o tonɔ. 47#Mat 25:21; 25:23 Yelmeŋɛ zaa ka N yele korɔ yɛ, a o daana na e la ka o kaara o boma zaa zu. 48#Wul 8:11 Kyɛ ka a tontombi-faa ŋa wa yeli ko o meŋɛ, ‘A n daana kɔɔrɛɛ waabo,’ 49kyɛ pãã piili ŋmeɛrɛ a o tontombi-taaba, a dire kyɛ nyuuro ne dããnyu-kuolibo, 50a tontonɔ ŋa daana na uri wa la daare na o naŋ ba nare ane gogo na o naŋ ba baŋ. 51#Mat 8:12 A tontonɔ ŋa daana na wa kyɛ o la ŋmaare puropuro, a de o poɔ a bampuori-kombampoɔ mine poɔ, be ka ba na be kono kyɛ nyerɛ nyemɛ.”
Currently Selected:
Matio 24: DGA
Highlight
Copy
Compare
Share
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.