Matio 13
13
A Boreborɔ Sekpɔgre
(Mak 4:1-9; Luk 8:4-8)
1A bebiri na zaa daare, Yeezu da yi la a yiri poɔ a te zeŋ a mane noɔreŋ. 2Nembeɛoŋ da ŋmaagyili O la, ka O da kpɛ zeŋ gbori poɔ, kyɛ ka a noba zaa are a mane noɔreŋ. 3O da lɔɔ la sekpɔgɔ a yeli yɛlɛ yaga ko ba, a yele, “Yɛ kyɛllɛ! Boreborɔ kaŋ la da yi ka o te bore o weɛ. 4O naŋ da borɔ, a bombie mine da le la sobiri zu ka nuuli wa de di. 5Ka a bombie mine le pikubo zu, a be da ba taa tɛne yaga, ka a da buli wieũ zaa, a tɛne naŋ da ba e zuluŋ zuiŋ. 6Kyɛ ŋmenaa naŋ da wa do, a bombulo da zoɔlɛɛ la, a ko, a naŋ da ba taa nyaga zuiŋ. 7A bombie mine da le la goore poɔ, ka a goore baa fogle a. 8A bombie mine meŋ da le la tɛnnoɔ poɔ, a maale velaa. Ka a bonzuri mine eŋ bie kɔɔ, amine lezaata, amine lezare ne pie. 9Vɛŋ ka soba na zaa naŋ taa tobo kyɛlle woŋ!”
A Sekpɔgɔ Lɔɔbo Tɛgɛ
(Mak 4:10-12; Luk 8:9-10)
10Lɛ la ka a potuuribo wa soore O, “Bonso ka fo lɔɔrɔ sekpɔgɔ korɔ a noba?” 11Ka O yelsɔge, “Yɛnee, ba ko yɛ la a bammo ka yɛ na baŋ a tenvelaa naaloŋ yelsɔglɔ, kyɛ ba ba ko bana eŋ. 12#Mat 25:29; Mak 4:25; Luk 8:18 Banaŋ zaa naŋ taa, ba na ko ba la bon-yaga poɔ, ka ba taa ka a gore ba. Kyɛ banaŋ naŋ ba taa bonzaa, haali gba bon ba naŋ taa, ba na de a la yi ba zie. 13#Begɛ 29:4 Bon naŋ so ka N yele a yɛlɛ ne sekpɔgɔ korɔ ba la, ‘ba kaara la, kyɛ ba nyɛrɛ, a wono kyɛ ba kyɛllɛ, bee a baŋ a tɛgɛ.’ 14#Aza 6:9-10 A ba zie la ka a Ŋmen-yelmanna Azaaya yelbie na sereŋ tu a tuubu, a seŋ o naŋ yeli:
‘Yɛ sereŋ na kyɛllɛ la, kyɛ daŋ koŋ baŋ a tɛgɛ,
yɛ sereŋ na kaara la, kyɛ daŋ koŋ nyɛ.
15A noba ŋa sukyie darɛɛ la,
ka ba tobo e kpeɛne a ba wono yɛlɛ,
ka ba ũũ ba nimie;
ka ka ba na ta kaa ne ba nimie,
a woŋ ne ba tobo,
a baŋ a tɛgɛ ne ba sukyie kyɛ leɛ ba eebo,
ka N na saŋ ba.’ ”
16 #
Luk 10:23-24
Kyɛ yɛ nimie ane yɛ tobo nyɛ la maaloo, bonso, yɛ nimie nyɛrɛ la, ka yɛ tobo meŋ wono. 17Yelmeŋɛ ka N yele korɔ yɛ, Ŋmen-yelmanneba yaga ane nemmenne yaga da boɔrɔ la ka ba nyɛ bon yɛ naŋ nyɛrɛ kyɛ ba nyɛ a, a da boɔrɔ ka ba woŋ a yɛlɛ ama yɛ naŋ wono, kyɛ ba woŋaa.
A Boreborɔ Sekpɔgre Tɛgɛ
(Mak 4:13-20; Luk 8:11-15)
18“Yɛ pãã woŋ a boreborɔ sekpɔgre tɛgɛ. 19A bombie anaŋ ba naŋ da bore a sori zu la neɛzaa naŋ woŋ a naaloŋ yelbiri kyɛ ba baŋ a tɛgɛ, a sebɛlbɛllɛ maŋ wa zeɛ la a bonna ba naŋ bore o sukyiri poɔ gaa ne. 20A anaŋ ba naŋ bore a pikubo poɔ, la soba na naŋ woŋ a yelbiri a de o wieũ zaa ane kyelloo; 21kyɛ a soba ŋa tɔ ba taa nyaga, o maŋ taa la kannyiri belãã lɛ, kyɛ ka yelwonaa bee dɔgroŋ kaŋ wa kpɛ o a Naaŋmen yelbiri zuiŋ, o yeldeebo maŋ le la wieũ zaa. 22#Mat 6:19-34; 1 Tim 6:9 A bombie na ba naŋ da bore goore poɔ, la soba na naŋ woŋ a yelbiri, kyɛ ka a teŋɛzu yeltarre ane bombɔ nɔmmo maŋ fogle a yelbiri taa ka o koŋ wɔŋ bonzaa. 23Kyɛ a anaŋ ba naŋ bore tɛnnoɔ poɔ, la a soba na naŋ woŋ a yelbiri a baŋ o tɛgɛ, a sereŋ wɔŋ a eŋ bie, amine bie kɔɔ, amine lezaata, amine lezare ne pie.”
Narse Naŋ Be Kyi Poɔ Sekpɔgre
24 #
Mat 13:36-43
A Yeezu da la lɔɔ la sekpɔgre kaŋ ko ba, a yeli, “A tenvelaa naaloŋ waa seŋ ŋa, koɔraa kaŋ naŋ bore bombi-sonne o weɛ poɔ; 25kyɛ saŋ na neɛzaa naŋ wa te gbiri, a dɔndɔma da wa bore la narse eŋ a kyi poɔ kyɛ gaa. 26A bombulo naŋ wa baa, a dɔge eŋ bie, a narse meŋ pãã da sããɛ la. 27Ka a koɔraa tontonema wa soore o, ‘Daana, bombi-sonne yoŋ naane ka fo da bore a weɛ poɔ be? Ka yeŋ pãã ka a narse ŋa meŋ yi a kyi poɔ?’ 28Ka o yelsɔge, ‘A dɔndɔma la e a lɛ.’ Ka a tontonema soore o, ‘Fo na boɔrɔ la ka te gaa te vɔ a narse bare be?’ 29Kyɛ ka o leɛ yelsɔge ba, ‘Ai! Bonso, ka yɛnee voɔrɔ a narse, yɛ na erɛ la wa laŋ vɔ ne a kyi meŋ. 30#Mat 3:12 Yɛ vɛŋ ka a zaa laŋ baara te ta a kyi kyeɛbo saŋ. A kyi kyeɛbo saŋ, N na yeli la a kakyeɛrebɛ; Yɛ daŋ vɔ a narse leŋ lantaa a nyege. Kyɛ pãã kyɛ a kyi a eŋ n bugo poɔ.’ ”
Bombi-bile Sekpɔgre
(Mak 4:30-32; Luk 13:18-19)
31A Yeezu da la lɔɔ la sekpɔgre kaŋ ko ba, “A tenvelaa naaloŋ waa seŋ ŋa badog-biri neɛ kaŋ naŋ de bore o weɛ poɔ; 32o sereŋ waa la a bomboorbie zaa poɔ bombi-bile, kyɛ ka o naŋ wa te baa baare, o maŋ waa la kpoŋ gaŋ a zɛva-teere zaa, a leɛ teɛ ka nuuli maŋ wa wuo a kyogri o ulli#13:32 Ulli: A Dagaaba mine maŋ boɔle la teɛ ulli ka Danuuri. zu.”
Dããbelɛ Sekpɔgre
33 #
Luk 13:20-21
O da la lɔɔ la sekpɔgre kaŋ ko ba, “A tenvelaa naaloŋ waa seŋ ŋa pɔge kaŋ naŋ de dããbelɛ eŋ zɔŋ ŋmannɔɛ ata poɔ, ka a iri pi a zaa.”
A Sekpɔgɔ Lɔɔbo Tɛgɛ
(Mak 4:33-34; Luk 13:20-21)
34 #
Mak 4:33-34; Yiel 78:2 A Yeezu da yeli la a yɛlɛ ama zaa ko a nembeɛoŋ ne sekpɔgɔ. O da ba yeli yelzaa ko ba ka sekpɔgɔ yoŋ naane. 35A ŋaa da eɛɛ la ka ka a Ŋmen-yelmanna yeluu na tu a tuubu:
“N na haa la N noɔre a lɔɔ sekpɔgɔ;
N na manne la a yelsɔglɔ zaa, a yi a tendaa piiluu saŋ a ko ba.”
A Kyi Ane A Narse Sekpɔgre Tɛgɛ
36 #
Mat 13:24-30
Lɛ la ka a Yeezu da bare a nembeɛoŋ kyɛ iri kpɛ die. A O potuuribo da wa la O zie a wa yele, “Iri a weɛ narse sekpɔgre pare ko te.” 37Ka a Yeezu yelsɔge, “A neɛ na naŋ bore a bombi-sonne la a Nensaala Bie; 38#1 Kor 3:9 a weɛ la a andonɛɛ, ka a bombi-sonne meŋ waa a naaloŋ biiri, ka a narse meŋ waa Setaana biiri. 39A dɔndɔma na naŋ bore a narse la a sebɛlbɛllɛ. A boma kyeɛbo saŋ la a teŋɛ baaroo, ka a kakyeɛrebɛ e a malekere. 40Aŋa lɛ ba naŋ vɔ a narse leŋ lantaa a nyege vũũ na, lɛ ka a na waa a teŋɛ baaroo saŋ. 41#Mat 25:31-46 A Nensaala Bie na toŋ la O malekere ka ba wa gbaale banaŋ zaa naŋ erɛ ka noba erɛ yelbebe ane yelbe-erebɛ zaa yi ne a O naaloŋ poɔ, 42#Mat 8:12 ka ba de ba lɔɔ eŋ vũũ kpoŋ poɔ, zie na ba naŋ na kono kyɛ nyerɛ nyemɛ. 43#Dan 12:3 A lɛ la ka a nemmenne pãã na nyegrɛ aŋa ŋmenaa a ba Saa naaloŋ poɔ. Vɛŋ ka soba na zaa naŋ taa tobo kyɛlle woŋ.”
Sekpɔgɔ Ata Naŋ Tu Taa Yɛlɛ
44 #
Mat 19:29; Luk 14:33; Fil 3:7 “A tenvelaa naaloŋ waa seŋ ŋa nabontegroŋ kaŋ ba naŋ sɔgle weɛ poɔ, ka neɛ kaŋ nyɛ o, a de maaleŋ sɔgle, kyɛ ka o poɔ pɛle yaga, ka o leɛ gaa te koɔre o boma zaa a wa da ne a weɛ.
45“Laboreŋ, a tenvelaa naaloŋ waa ŋa yɛreyɛrɛ naŋ boɔrɔ salema; 46#Sek 8:10-11 o naŋ wa te nyɛ kaŋ daaroŋ naŋ ba wono, ka o gaa te koɔre o boma zaa a wa da ne.
47 #
Mat 22:9-10
“Lamaaleŋ, a tenvelaa naaloŋ waa ŋa zuŋkyogi ba naŋ de lɔɔ eŋ mane poɔ, a nyɔge zomparɛɛ parɛɛ zaa. 48A zuŋkyogi naŋ da wa paale, a zonnyɔgrebɔ da tage la a zuŋkyogi yi ne dondoli, a te zeŋ teŋɛ kyɛ tuuri a bonveɛle eŋ peɛ poɔ, kyɛ de a bonfaare lɔɔ bare. 49#Mat 25:32 Lɛ ka a na waa a andonɛɛ baaroo saŋ. A malekere na wa wɛle la a nenfaare yi a nemmenne poɔ, 50a de ba lɔɔ eŋ vũũ kpoŋ poɔ, zie na ba naŋ na kono kyɛ nyerɛ nyemɛ.
Nabompaala Ane Boŋkorɔ
51“Yɛ baŋ la a yɛlɛ ama zaa tɛgɛ be?” Ka ba yelsɔge, “Õõ.” 52Ka O yeli ko ba, “A lɛ zuiŋ, a bege wulwullo zaa ba naŋ wuli a tenvelaa naaloŋ yɛlɛ, waa seŋ ŋa yidaandɔɔ naŋ yage bompaala ane boŋkorɔ yi ne o naboma poɔ.” 53A Yeezu naŋ da wa lɔɔ a sekpɔgɔ ama baare, O da yi la a be gaa.
Ba Naŋ Zagre Yeezu Naazɛrɛ Poɔ
(Mak 6:1-6; Luk 4:16-30)
54A Yeezu da leɛ wa la O meŋɛ teŋɛ poɔ a wa piili wullo a noba ba puoruuderi pooreŋ. A noba zaa nɔɛ da maaɛ la ka ba yele, “Yeŋ ka a dɔɔ ŋa nyɛ a yɛŋ ŋa tɔ, ane a toŋkpeɛne ama? 55A kapenta bidɔɔ mɔɔ naane a ŋa be? O ma naane ka ba boɔlɔ Maria? O yɔɔmine naane Gyems, Gyosɛf, Saamon ane Gyudas be? 56#Gyn 7:15; 7:52 Te ne a O yɔɔpuuli zaa naane be a kyɛ be? Ka yeŋ pãã la ka a dɔɔ ŋa nyɛ a ama zaa?” 57#Gyn 4:44 Ka ba poore da sãã ne O. Kyɛ ka a Yeezu yeli ko ba, “Ŋmen-yelmanneba daŋ ba nyɛ yuori bamenne tenne ane ba yie poore, ka ten-yobo poore naane.” 58A Yeezu da ba toŋ toŋkpeɛne yaga a be, ba naŋ da ba taa yeldeebo zuiŋ.
Currently Selected:
Matio 13: DGA
Highlight
Copy
Compare
Share
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.