Toma 11
11
Piita Naŋ Leɛ Gaa Manne A Yɛlɛ Ko A Puoruu Laŋne Noba A Gyeruzɛlɛm Poɔ
1A apostoliimine ane a yelderebɛ naŋ da be a Gyudiya paaloŋ zaa da woŋee la ka a Nemboore-yobo meŋ sage de la a Naaŋmen yelbiri. 2#Tom 10:45 A lɛ zuiŋ a Piita naŋ da wa leɛ gaa a Gyeruzɛlɛm, a yelderebɛ na naŋ da iri ba dɛgre da ŋmɛ la nɔkpeɛne ne o, 3#Gal 2:12 a yele, “Bonso, ka fo da gaa a banaŋ naŋ ba iri ba dɛgre zie ka fo ne ba te laŋ di?” 4Lɛ la ka Piita da piili a manne a yɛlɛ naŋ da e a tu taa, a yele: 5#Tom 10:9-48 “N da puoro la a Gyopa teŋkpoŋ poɔ, a wa nyɛ nyaabo kaŋ. N da nyɛ la boŋkaŋ naŋ waa yɛloŋ lɛ, ka o yi a saluoni sigre waana, ka ba da nyɔge o nɔɛ anaare taa, kyɛ e ka o sigi wa peɛle ma. 6N naŋ da wa kaa o poɔ velaa, N da nyɛ la doŋgbɛɛ anaare, wɛdonne, bonvuuri ane bon-ɛgre. 7N da woŋ la kɔkɔre kaŋ meŋ ka o yele korɔ ma, ‘Piita, iri nyɔge ko ɔɔ.’ 8Lɛ la ka N da yeli, ‘Ai Daana, bonso, bonweɛ bee bondɛgre zaa daŋ ba kpɛ n noɔre.’ 9Kyɛ a kɔkɔre da la yeli la a saluoni poɔ a boyi soba, a yele, ‘Bonna Naaŋmen naŋ e ka o veɛlɛ, a ba seŋ ka fo yeli ka o waa la bondɛgre.’ 10A yeli ŋa da e la lɛ gbɛre bota kyɛ ka a bonzaa da leɛ-iri do a saluoni. 11A saŋ na meŋ poɔ la ka noba mine bata ba naŋ toŋ n zie, ka ba yi Sezaareya teŋɛ deɛ ta a yiri na poɔ te naŋ da be. 12A Vooroŋ Soŋ da yeli ko ma la ka N tu ba gaa, a kyɛ ta ogro. A yɔɔmine bama bayoɔbo meŋ da tu ma la gaa, ka te zaa te kpɛ a Konelio yiri. 13O da manne ko te la, lɛ o naŋ da nyɛ a maleke ka o wa are o yiri poɔ a yele, ‘Toŋ neɛ kaŋ ka o gaa a Gyopa teŋɛ a te taa Saamon ba naŋ boɔlɔ Piita, a wa ne. 14O na wa manne la yɛlɛ naŋ na e ka fo ne fo yideme zaa nyɛ faabo.’ 15Kyɛ N naŋ da piili yele a yɛlɛ, a Vooroŋ Soŋ da sigi la ba zu aŋa o naŋ da sigi te zu lɛ a piiluu saŋ. 16#Tom 1:5 Lɛ la ka N pãã da leɛ-teɛre a Daana yelbiri o naŋ da yeli, ‘Gyɔɔn da ko yɛ la suobu ne koɔ̃, kyɛ yɛnee ba na ko yɛ la suobu ne a Vooroŋ Soŋ.’ 17Ka Naaŋmen pãã da ko ba a kyɔɔtaa na O naŋ da ko te, a saŋ te naŋ da sage de a Daana Yeezu Kirista yɛlɛ, maa meŋ la aŋ a na pigi Naaŋmen sori?” 18Ba naŋ da wa woŋ a ŋaa, ba da ba la haa noɔre, kyɛ da danna Naaŋmen a yele, “Ka lɛ Naaŋmen ko la a Nemboore-yobo meŋ sori ka ba na leɛ ba eebo a nyɛ nyɔvore.”
A Puoruu Laŋne Naŋ Be A Anteyɔk Teŋɛ Poɔ
19 #
Tom 8:1-4
A Stevin koobo puoriŋ, a dɔgroŋ na naŋ da le a noba zu da eɛɛ la ka ba zo yaare. Ba mine da gaa la Foniseya, Sapuru ane Anteyɔk tenne, kyɛ a Gyuumine yoŋ la ka ba da manna a yelbiri terɛ. 20Kyɛ a noba mine naŋ da be ba poɔ a da yi Sapuru ane Saarin tenne naŋ da wa ta a Anteyɔk teŋɛ meŋ da manne la a yelbiri a ko a Hɛllɛni noba, a moɔlɔ a Daana Yeezu yɛlɛ. 21#Tom 2:47 A Daana kpeɛ̃õ da be la ba zie ka noba yaga leɛ yelderebɛ a da tu a Daana. 22#Tom 4:36 A yɛlɛ ama duoro da wa ta la a puoruu laŋne naŋ da be a Gyeruzɛlɛm teŋɛ poɔ. Lɛ la ka ba da toŋ Banabas ka o gaa a Anteyɔk teŋɛ. 23#Tom 13:43 O naŋ da wa nyɛ a Naaŋmen garaaseɛ, o poɔ da pɛle la yaga, ka o da kpaale ba zaa ka ba kpimare a Daana, a taa yelmeŋɛ ne O ane ba poɔ zaa; 24#Tom 6:5; 5:14 bonso, a Banabas da waa la nemmeŋɛ, a paale ne a Vooroŋ Soŋ ane yeldeebo. Nembeɛoŋ da leɛ la a Daana potuuribo. 25#Tom 9:30; Gal 2:11 Lɛ la ka a Banabas da gaa Taasus teŋɛ ka o te bɔ a Sɔɔl, 26kyɛ o naŋ da wa te nyɛ o, o da taa o la wa ne a Anteyɔk teŋɛ. A yuoni gbuli zaa poɔ, ba da laŋna ne la a puoruu laŋne noba, a wullo nen-yaga. A Anteyɔk poɔ la ka ba da piili boɔlɔ a potuuribo ka “Kiristabiiri.”
27 #
Tom 13:1; 15:32 A beri na poɔ, Ŋmen-yelmanneba da yi la Gyeruzɛlɛm a sigi wa Anteyɔk. 28#Tom 21:10 A Vooroŋ Soŋ da tu la ba kaŋ yuori naŋ da di Agabus zie, ka o da yeli ko ba ka kɔŋ kpoŋ na le la a tendaa zaa; ka a sereŋ da e a lɛ a Keladeo naaloŋ saŋ. 29#Gal 2:10 A potuuribo da laŋ la taa ka kanzaa maŋ tere seŋ o faŋ naŋ ta lɛ ka ba na de soŋ ne a yelderebɛ naŋ be a Gyudiya teŋɛ poɔ; 30#Tom 12:25 ba da sereŋ e la a lɛ a de a boma ko Banabas ane Sɔɔl ka ba te ko a nembɛrɛ.
Currently Selected:
Toma 11: DGA
Highlight
Copy
Compare
Share
Want to have your highlights saved across all your devices? Sign up or sign in
Dagaare First Bible © The Bible Society of Ghana, 2025.