San Mateo 21
21
Ri Jesús xo'pan chpam un tinmit Jerusalén
(Mr 11:1-11; Lc 19:28-38; Jn 12:12-19)
1Echi' xa nqaj chik ik'wi che un tinmit Jerusalén, o jun jyub' xiyok ruk', Olivos ub'i', chla' k'wi putlok' jun kanton Betfagé ub'i'. Echi' xiyo'pan chla', ri Jesús xyutaq b'i keb' udiscípulo, 2xub'ij b'i chke: «Jix chpam un kanton che o pnoq chiquch. Chla' kiriq jun ati' b'uru xmilik rich'il jun laj ral. Chitru', chik'ma loq chwe. 3We o jun o su kub'ij chiwe, chib'ij che: “Jare Qajaw ku'on nmister che; kutzlij chuloq chawe kmik”, kixche che». Jala xub'ij b'i Jesús chke.
4Jala x'antjik rech k'alnik che puro qtzij su utz'ib'am kan najb'il utzij Dios ujer. Re jawa utz'ib'am kanoq:
5«Chib'ij chke mnaq chpam tinmit Sion:#21:5 Un tinmit Jerusalén soq kb'ix Sion che.
“¡Chiwla'! Pitnaq jun che kitqan na pijlom,
ya kk'un iwuk', puro ch'uch'uj laj achi.
Re ukjem loq jun laj b'uru,
ral jun ati' b'uru, che jare ajb'nal eqa'n”». (Zac 9:9)
Jala utz'ib'am kan najb'il utzij Dios ujer.
6Keb' discípulo xib'e che u'anik su xub'ij Jesús chke. 7Xikyuqej loq nati' b'uru trin un laj ral chrij y xikkoj k'u' chkij. Xa jala', ri Jesús xukjej un laj b'uru. 8Mas ik'i nk'aj mnaq xiklik' k'u' chpam b'e jachi k'ax Jesús, kojb'al u'ij. Iy'o nk'aj chik xikket uxaq taq che' rech xikya pub'e, kojb'al u'ij. 9Nk'aj mnaq che inab'e chjuch Jesús rich'il nk'aj che itrin loq chrij, ko xich'awik xikb'ij:
—¡Hosanna!#21:9 Un tzij Hosanna kel kub'ij chujt'o la. Le mnaq soq kikkojo rech kikya u'ij Dios. ¡Tyox k'mow che Dios,
tyox k'mow che un ri'y umam un rey David!
¡Chinmirsax u'ij! ¡Nimlaj utzil pujlom nachi ri',
che pitnaq ruk' uchu'ab' Qajaw Dios!
¡Hosanna! ¡Tyox k'mow che Dios o chla' chkaj! (Sal 118:25-26)
—xicha'.
10Echi' xok Jesús chpam tinmit Jerusalén, kunjel nk'aj mnaq chla' xiyel ch'u'j. Xikmaj utayik chikuch, xikb'ij:
—¿Chin lo nachi ri'? —xicha'.
11Ni nk'aj chik mnaq xikb'ij:
—Nachi ri', jare Jesús che jare ajb'il utzij Dios. Re jala pitnaq chpam tinmit Nazaret che o pukwent Galilea, —xicha'.
Ri Jesús xyuresaj nk'aj ajk'ay chpam nimlaj rchoch Dios
(Mr 11:15-19; Lc 19:45-48; Jn 2:13-22)
12Ri Jesús xok ruk' nimlaj rchoch Dios. Ena xyuresaj loq kunjel jumpa nk'aj mnaq che kik'an kk'ay, rich'il nk'aj che kiyil'o'man chla'. Xuch'ikb'a b'i nk'aj kmixa nk'aj mnaq che kikk'ex uwuch pwaq, y xuch'ikb'a b'i nk'aj ktem nk'aj mnaq che kikk'ij nk'aj tz'kin paloma ub'i'. 13Xub'ij chke nk'aj mnaq:
—Tz'ib'tal kan chpam Tyox Wuj, kub'ij: “Ri wchoch kb'ix che che jare jun ja rech ch'ab'al ruk' Dios”,#Is 56:7. kcha'. Per ni ix inom peche mow kchoch el'om che rchoch Dios,#Jer 7:11. —xche Jesús chke.
14Iy'o nk'aj mnaq che xa ipotz' rich'il nk'aj chik che xa kib'in taj, xiyok b'i ruk' Jesús chpam nimlaj rchoch Dios, ena xyuknaj Jesús. 15Ni nk'aj ajk'mal b'e chke nk'aj rajchak Dios rich'il nk'aj ajtojnel rech upxab' Dios, mas xpi kiwal echi' xkilo che ku'on nmaq taq k'utb'al Jesús, soq xpi kiwal echi' xikta' che kiksik'b'aj kib' nk'aj ak'lab' che ub'ixik: «¡Hosanna! ¡Chinmirsax u'ij un ri'y umam un rey David!» kiche che, chpam nimlaj rchoch Dios.
16Jumpa nk'aj mnaq che xpi kiwal, xikb'ij che Jesús:
—¿Le kata' su kiyitjin nk'aj ak'lab' che ub'ixik? —xiche che.
Ni Jesús xub'ij chke:
—In kinta' su kiyitjin che ub'ixik. Ni ix, ¿le ot jmul isk'im uwuch Tyox Wuj che kub'ij:
“Xya la chke taq ak'lab' rich'il taq noch'
che kiyikunik kkib'xaj b'i' la”, kcha'? (Sal 8:2)
—xche chke.
17Tik'ri xel b'i Jesús chikxo'l nk'aj ajk'mal b'e chke nk'aj rajchak Dios rich'il nk'aj ajtojnel rech upxab' Dios. Xel b'i chla' chpam tinmit Jerusalén, x'e chpam jun chik tinmit Betania ub'i'. Chla' xu'axij na'ab'.
Ri Jesús tzel xuril un che' higo ub'i', che ot uwuch kuya'o
(Mr 11:12-14,20-24)
18Xaq kisqarik xitzlij loq Jesús chpam tinmit Jerusalén. Echi' kitjin che ub'e, xpi numik che. 19Xuril pnoq jun uch'el prut higo ub'i', o chuchi' b'e. Ena xok ruk' rech kurilo we o uwuch, per ot su kri' jun uwuch xuriqo, xaq xaw nk'aj uxaq olik. Ena xub'ij Jesús che un che':
—Kmik otchich jun b'welt katiwchinik, —xche che.
Ena chanim xichqij jwi' higo. 20Nk'aj discípulo, mas xikmiyma' echi' xkilo che jala x'antjik, ena xikta che Jesús:
—¿Suche che chanim xichqij jwi' higo? —xiche che.
21Ni Jesús xub'ij chke:
—Ruk' saqlaj tzij kimb'ij chiwe, che we kikub'a ik'u'x chrij Dios, we ku'on t keb' ik'u'x chrij Re, soq kixkun ix ki'an che jwi' higo peche xin'an in che, per xaw taj ile', soq kixkunik kib'ij che un jyub' o chiri': “Katel chi', jak'qa awib' chpam mar”, kixche che, y jala k'antjik chiwuch. 22We ix kikojo che Dios kuya chiwe runjel sutaq kita che chpam ich'ab'al, Dios kuya na chiwe. —Jala xub'ij Jesús chke.
Nk'aj mnaq xikta che Jesús jachi pitnaq atb'altzij che o pu'ab'
(Mr 11:27-33; Lc 20:1-8)
23Tik'ri xok Jesús chpam nimlaj rchoch Dios. Echi' kitjin Jesús che ktojxik mnaq chla', xiyo'pan nk'aj ajk'mal b'e chke nk'aj rajchak Dios, soq rich'il nk'aj aj Israel che o keqle'n. Ena xikta che:
—¿Jachir pitnaq atb'altzij o pa'ab' che jala katitjin che u'anik? —xiche che.
24Ri Jesús xuk'ul uwuch ktzij, xub'ij chke:
—In soq o jun tzij kinta chiwe. We kib'ij chwe su kinta chiwe, tik'ri kimb'ij chiwe chin uy'om atb'altzij pin'ab' che jala kin'ano. 25¿Su kib'ij ix? ¿Chin xutaq u Wan che u'anik qasna' chke mnaq? ¿Le jare Dios xutaqo? ¿Le xa jare mnaq xiktaqo? —xche chke.
Ena xikmaj utayik chikuch, xikb'ij: «¿Sur kqab'ij che? We kqab'ij che, che jare Dios xutaqo, Re kuta na chqe: “¿Suche k'ut xikoj t utzij?” kche na chqe. 26Ni we kqab'ij che, che jare mnaq xiktaqo, kqax'ej qib' chikuch mnaq, mal kunjel mnaq kikb'ij che u Wan, jare jun ajb'il utzij Dios». Jala xikb'ij chikuch.
27Ena xikb'ij che Jesús:
—Qit'am taj, —xiche che.
Ni Jesús xub'ij chik chke:
—In soq kimb'ij taj chiwe chin uy'om atb'altzij pin'ab' che jala kin'ano, —xche chke.
Jun k'amb'al n'oj chkij keb' uk'jol jun achi
28Ri Jesús soq xub'ij chik chke:
—¿Su kichomaj ix chrij wari' che kimb'ij chiwe? O jun achi o keb' uk'jol. Ena x'e ruk' un nab'e, xub'ij che: “Nik'jol, kmik, jat chpam ntiko'n rech ka'an nchak. Jare kaxluj uwuch nk'aj uva”, xche che. 29Ni nala xub'ij: “Kimb'e taj”, xche che. Per ma'tan xuk'ex uchomnik, x'e na. 30Nachi x'e ruk' un chik uk'jol y soq jala xub'ij chik che re. Ni nala xub'ij: “Utza' qaw. Kimb'ek”, xche che, per x'e taj. 31¿Chin jun chke keb' ab'om xu'ono su xub'ij uqaw che? —Jala xub'ij Jesús chke.
Ni ke xikb'ij:
—Jare un nab'e xu'ono su xub'ij uqaw, —xiche che.
Ri Jesús xub'ij chik chke:
—Ruk' saqlaj tzij kimb'ij chiwe che jare nk'aj aj'esal alkawal rich'il nk'aj ixqib' che kikch'ak kirjil chrij kib'qil, nab'e kiyok chiwuch ix chla' jachi ku'on utzlaj atb'altzij Dios. 32Jare ke kiyok chla' nab'e, xa rmal mel echi' xpi u Wan ajb'nal qasna' iwuk' rech kuk'ut chiwuch su mow ki'an che u'anik jun sk'umlaj k'asnmal chjuch Dios, ix xikoj t utzij. Ni nk'aj aj'esal alkawal rich'il nk'aj ixqib' che kikch'ak kirjil chrij kib'qil, ke xikkojo su xub'ij. Per ni ix miskini' xiwilo che xikkoj ke, xik'ex t iwanma'. Xikoj taj su xub'ij u Wan. —Jala xub'ij Jesús chke nk'aj ajk'mal b'e chke nk'aj rajchak Dios, rich'il nk'aj achjab' che o keqle'n chikxo'l aj Israel.
Ri Jesús xub'ij jun k'amb'al n'oj chkij nk'aj ajchkib' che xa iyitzel mnaq
(Mr 12:1-12; Lc 20:9-19)
33Ri Jesús soq xub'ij chik chke: «Chitatb'ej jun chik k'amb'al n'oj. O jun achi xutik utiko'n, uva ub'i'. Xukoj kral chrij utiko'n, xuk'ot jun jul rech yitz'b'alre nk'aj uva, soq xuyak jun tak'tik ja, rech uk'olb'al jun ajchjal kuchjij tiko'n. Tik'ri un rjaw tiko'n, xuya kan un rlew pqajik chke nk'aj ajchak, ni re x'e che jun ub'yaje chnaj. 34Echi' xuriq ij che kkixluj uwuch nk'aj tiko'n, un rjaw tiko'n xyutaq loq nk'aj utaqo'n che uk'amik nk'aj uwuch uva che rech re. 35Per ni nk'aj ajchak, xa xikchap nk'aj utaqo'n, jun xikch'ayo, nun chik xikkamsaj, nun chik xikk'eq chab'aj. 36Tik'ri', un rjaw xyutaq chuloq nk'aj chik utaqo'n kuk'. Ik'i chjuch nk'aj xyutaq loq nab'e b'welt, per ni nk'aj ajchak, soq jala xik'an chik chke ke, peche xik'an chke nk'aj nab'e b'welt.
37»K'isb'alre xutaq chuloq nuk'jol kuk', xub'ij puk'u'x: “Ruk' la le', kikkoj utzij nik'jol”, xcha'. 38Per echi' xkil nk'aj ajchak che xo'pan nuk'jol un rjaw ulew kuk', xikb'ij chikuch: “Nachi che xpitiki', jare re kurechb'ej kan nulew. Jo qakamsaj rech jala', qo'j kqechb'ej kan nulew”, xiche chikuch. 39Ena xikchapo, xkesaj b'i chpam nk'aj tiko'n, tik'ri xikkamsaj». Jarela jun k'amb'al n'oj xub'ij Jesús chke.
40Tik'ri xuta chik chke, xub'ij:
—We jala xik'an nk'aj ajchak, echi' kitzlij loq un rjaw ulew, ¿su ku'on chke nk'aj ajchak kib'ij ix? —xche Jesús chke.
41Ni ke xikb'ij:
—Un rjaw ulew kuril t to'b'al kwuch, su kyukamsaj na jumpa nk'aj itzel taq ajchak. Tik'ri kuya kan un rlew pqajik chke nk'aj chik ajchak che kikya pink'aj re uwuch tiko'n echi' kkixluj, —xiche che.
42Ri Jesús xub'ij chke:
—¿Le xa isk'im t uwuch su tz'ib'tal chpam Tyox Wuj? Jala kub'ij:
“Nab'aj che xkixtuj kan nk'aj ajykal ja,
jare xoksax che utk'alb'al ja.
Jare Qajaw Dios xinawre y mas utz ka'y chiquch”. (Sal 118:22-23)
Jala tz'ib'tal kan chpam Tyox Wuj.
43»Xa rmal, kimb'ij chiwe che ri utzlaj atb'altzij rech Dios, kesax na chiwi'x y kjach na chke mnaq chpam jun chik tinmit che kik'an jun utzlaj chak, peche mow kiwchinik. 44Chin jun mnaq ktzaq pujlom nab'aje', ksoktaj na. Niw jare nab'aj ktzaq chrij jun, soq ksoktajik, per su kumuchu, peche uk'ej b'aq ku'on che.#21:44 Kel kub'ij che Jesús jare nab'aje'. —Jala xub'ij Jesús chke mnaq.
45Echi' xikta nk'aj ajk'mal b'e chke nk'aj rajchak Dios, rich'il nk'aj fariseo, jumpa nk'aj k'amb'al taq n'oj xub'ij Jesús, xikch'ob'o che chkij ke xch'aw Jesús. 46Jare kkaj ke wet xikchap Jesús, per xkix'ej kib' chikuch mnaq, mal kunjel mnaq kikb'ij che ri Jesús, jare jun ajb'il utzij Dios.
Currently Selected:
San Mateo 21: qucSAS
Highlight
Share
Copy
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
