San Lucas 21
21
Jun ixoq kamnaq richjil xuya ulimosna che Dios
(Mr 12:41-44)
1Echi' o Jesús chpam nimlaj rchoch Dios, xyuril pnoq nk'aj b'yom che kiyitjinik kikya klimosna chpam un kxon rech uk'olb'al pwaq. 2Soq xuril jun b'yu't ixoq pobre, xuya keb' rqan pwaq che xa ch'in reqlem. 3Ena xub'ij Jesús:
—Ruk' saqlaj tzij kimb'ij chiwe che un b'yu't ixoq che xa pobre ri', nim ulimosna xuya chikuch nk'aj chik. 4Kunjel nk'aj b'yom, xa jare xikya che klimosna jumpa usowra o kuk'; per ni nixoqe' che mas pobre, runjel xuya'o jumpa o ruk' rech kukojo kutzuqb'aj rib' chpam uk'asnmal, —xche Jesús chke.
Ri Jesús xub'ij che kiwlujsax na ri nimlaj rchoch Dios
(Mt 24:3-28; Mr 13:1-2)
5Iy'o nk'aj mnaq kiyitjinik kich'aw chrij nimlaj rchoch Dios, kikb'ij che mas utz ka'y nk'aj ab'aj kjom che amb'alre. Soq kikb'ij che utz ka'yik jumpa sutaq'ik ksipam mnaq che kjom che wiqb'alre. 6Ni Jesús xub'ij chke:
—Runjel jumpa kixtjin che rilik, kurqan jun ij kiwlujsax na, otchich jun ab'aj kkanaj kan pujlom jun chik ab'aj, runjel kiwlujsax na, ktzaqik, —xche chke.
Ri Jesús xub'ij su k'utb'al kuya Dios echi' ya mer ksachtaj uwuch uwuchlew
(Mt 24:3-28; Mr 13:3-23)
7Tik'ri xikta che Jesús, xikb'ij:
—Ajtojnel, ¿jumpa k'antaj wari'? ¿Chinchke k'utb'al k'alnik echi' ya mer kuriqo che k'antjik su xb'ij la? —xiche che.
8Ri Jesús xub'ij chke:
—China kwent iwib' rech jala' ot chin jun kixusub'u, mal k'i nk'aj ajsub'nel kipi na che kikkoj nb'i', kikb'ij: “In ri' ri Cristo,#21:8 Cristo kel kub'ij jun chaytajnaq rmal Dios. Un tzij Mesías xaq jnam kilwi. xchay rmal Dios”, kicha'. Soq kikb'ij: “Ya kuriq k'isb'al taq ij”, kicha na. Per xa mix'e kuk'. 9Echi' kita rson che xaq paja k'wi nmaq taq ch'oj, soq we kita rson che xaq chikuch chik mnaq kik'an ch'oj chpam ktinmit, xa mix'ej iwib' rmal. Nmister che jawa k'antaj na nab'e, per ni k'isb'al taq ij, chanim taj kuriqo. —Jala xub'ij Jesús chke.
10Tik'ri xub'ij chik chke: «Nk'aj mnaq iy'o chpam jun tinmit kik'an na ch'oj kuk' mnaq iy'o chpam jun chik tinmit; soq nk'aj atb'altzij itk'al pujlom nk'aj tinmit kik'an na ch'oj chikuch. 11Ku'on nmaq taq kab'rqan. Xaq paja wi kpi wijal rich'il k'axlaj taq yab'il. O su k'antaj na che xib'al'ib' rilik, y o nmaq taq k'utb'al k'aljan chla' chkaj.#Mr 13:24,25; Mt 24:29.
12»Per echi' mja k'antaj wari', kixkchap na ri mnaq, kixkkoqtaj na. Kixkjach pik'ab' mnaq che nmaq keqle'n iy'o chpam nk'aj rchoch Dios rech kik'an atb'altzij pijlom, kixkya pkarsa. Wmal in, kixkk'am nub'i chikuch nk'aj mnaq che nim atb'altzij o pik'ab', peche nk'aj rey rich'il nk'aj gobernador. 13Per echi' jala kik'an chiwe, jare ni utz, rech o mow kib'ij utzlaj taq rson chke chwij in. 14Chichomaj rij chpam iwanma', che xa mib'soj nab'e su tzij kib'ij chke rech kito' iwib' pik'ab', 15mal in kimb'ij na chiwe sutaq kib'ij chke, soq kinya in'oj rech kikriq t chik nk'aj iwajch'oj su kikb'ij chiwe, soq kiyikun taj kixkch'ako. 16Kixjach na pik'ab' iwajch'oj kmal iqaw ichuch, kmal iwatz, icha', iwnab', iwachlal, iwich'il, jare ke kixkjach na pik'ab' iwajch'oj. Iy'o keb' uxib' chiwe che kikamsax na. 17Wmal in, kunjel mnaq xa k'ax chik kixkkilo. 18Per jare Dios kixuchjij na. Ot su kri' jun iwi' ksach che ijlom, utz ichijxik ku'on che. 19We kich'ijo jumpa k'ax kiriqo y ko kixtk'e' chpam ikojb'al, tik'ri kixto'taj na, kich'ak ik'asnmal ruk' Dios che ot uk'isik.
Ri Jesús xub'ij che kiwlujsax na un tinmit Jerusalén
20»Per echi' kiwilo che kistum kib' soldado chrij un tinmit Jerusalén, kiwit'amaj che chanim xuriq ij che ksachtaj uwuch un tinmit. 21Tik'ri k'ut, chiyanmaj b'ik jumpa mnaq iy'o pukwent Judea, chi'oj chutaq jyub'. Jumpa mnaq iy'o chpam un tinmit Jerusalén, soq chiyel b'i chla'. Ni mnaq che iy'o ptaq kanton, xa miyitzlij chuloq chpam tinmit Jerusalén. 22Jala k'antjik, mal jare ij kikriq k'ejsb'al kwuch mnaq rech tojb'al kmak, jala peche tz'ib'tal kan chpam Tyox Wuj. 23T'ob' kwuch ixqib' chintaq xa iyab' kuk' ak'lab', rich'il nk'aj kiktub'saj kal chpam taq ije', mal kikriq na jun nimlaj k'ax chi' chuchlew. Jare Dios kuresaj riwal chkij jumpa mnaq iy'o jala Judea. 24Ik'i mnaq kikamsax ruk' ch'ich' chpam ch'oj. Iy'o nk'aj chik kichap b'ik rech kik'am b'i pkarsa ptaq nk'aj chik tinmit. Nun tinmit Jerusalén kikje pik'ab' nk'aj mnaq che iyaj Israel taj. Jare chik ke kiktak'b'a kib' pujlom un tinmit Jerusalén. Jare kik'ano su kkaj kik'an che un tinmit, ast retal echi' kitz'qat ij che y'om chke rmal Dios». Jala xub'ij Jesús chke.
Ri Jesús xub'ij su mow kitzlij na ri uK'jol Dios chuchlew
(Mt 24:29-35; Mr 13:24-27)
25Xub'ij chik Jesús chke: «O k'utb'al k'aljan chkaj. O retal kuya chjuch ij, chjuch ik', chjuch ch'mil. Jumpa mnaq iy'o chi' chuchlew, xaq ksach kk'u'x, kit'am t chik su kik'ano. Echi' kikta' che jwert upuchi' mar, ko'ik kpitik, tik'ri kpisklan chkaj, mas kkix'ej kib' che. 26Ri mnaq xaq ksach kk'u'x rmal xib'al kib', xa rmal jare kikmiyma' su k'antaj na chuchlew; runjel jumpa sutaq'ik o chkaj che y'om kchu'ab' rmal Dios, kislib'sax na. 27Tik'ri kikkil nwuch mnaq, in nAchi nuK'jol Dios. Kikkilo che kimpi chpam jun sutz' ruk' nimlaj nchu'ab'; nim n'ij kimpitik. 28Echi' kumaj u'anik runjel jumpa nb'im chiwe, china jun kowlaj k'u'x, chixtk'aloq, chixka'y chkaj, mal ya mer kixukol Dios, kixuresaj chpam k'ax». Jala xub'ij Jesús chke.
Jun k'amb'al n'oj chrij jun che' higo ub'i'
29Tik'ri xub'ij jun k'amb'al n'oj chke mnaq, xub'ij chke: «Chiwlampe' su ku'on un che' rech higo rich'il jumpa nk'aj chik che'. 30Echi' kiwilo che o jun che' kpuq nk'aj uxaq, tik'ri wa'l nk'aj chik utux kpo' chuloq, ix mismo iwit'am che ya mer kqaj 'laj, pures che jala ku'ono.#Mr 13:28. 31Jala le', echi' kiwil ix che jala k'antjik peche nb'im chiwe, chiwit'amaj jare k'utb'alre chiwuch che ya mer kumaj utzlaj atb'altzij rech Dios.
32»Ruk' saqlaj tzij kimb'ij chiwe, runjel su nb'im kan chiwe, nab'e k'antaj na, tik'ri kikam mnaq che iy'o chi' chu'ij saq. 33Ri kaj rich'il uwuchlew che kiwil chanim, ksachtaj na uwuch, per ni ntzij in ksachtaj t uwuch, k'antaj na su nb'im chiwe.
Runjel ik'asnmal nmister che iyijb'am iwib'
34»China kwent iwib', rech k'e t mas ik'u'x ruk' jumpa sutaq'ik che xa rech uwuchlew. Xaq mujal uwi' ki'an che sutaq kitijo, xa mix'b'arik; xa mib'soj mas ik'asnmal chi' chuchlew, mal xaq t'et kuriq ij che nb'im chiwe, y kinab'ej taj. 35Jare chi' kuriq un ije', peche mow jun kral che kiknab'ej taj mnaq ti kitz'aptaj chpam. Jala kikriq mnaq, kunjel jumpa iy'o chuchlew. 36Chixk'ask'atoq, china ich'ab'em ruk' Qajaw Dios runjel ij, rech jala' kixuto' Qajaw Dios chjuch runjel jumpa k'ax kpitik, soq rech ya'tal chiwe kixtk'e' chinwuch in, nAchi nuK'jol Dios». Jala xub'ij Jesús chke mnaq.
37Ri Jesús runjel ij xyutjoj mnaq chpam nimlaj rchoch Dios; ni cha'ab' k'e chjuch un jyub' che Olivos ub'i', chla' kikje wi. 38Kunjel jumpa mnaq, b'ajchi' ptaq usqarb'al kib'e chpam nimlaj rchoch Dios rech kikta utzij Jesús.
Currently Selected:
San Lucas 21: qucSAS
Highlight
Share
Copy
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
