San Juan 5
5
Ri Jesús xuknaj jun achi che xa skirnaq ch'qap che ub'qil
1X'ax na keb' uxib' ij, xurqa jun nim'ij kech nk'aj aj Israel. Ena x'e Jesús chla' Jerusalén. 2Chla' Jerusalén o jun tijb'al itnem Betesda#5:2 Jun tijb'al itnem Betesda kb'ix che soq kb'ix Betsaida che, soq kb'ix Betzatá che. kb'ix che piktzij aj hebreo.#5:2 O nk'aj mnaq kikb'ij che jare piktzij aj arameo y piktzij taj aj hebreo. Chla' k'wi chunqaj nuchija kech nk'aj chij. O j'ob' (5) rqinja che un tijb'al itnem. 3Chla' chuchi' nk'aj uchija, ik'i nk'aj yab' iktz'ol chuchlew, che jaljoj uwuch yab'il o chke, o nk'aj che xa kika'y taj, o nk'aj che xa kib'in taj, o nk'aj chik che skirnaq kib'qil, ki'em jumpa kislib'sax un ja'.#5:3 O nk'aj taq wuj rech Tyox Wuj, manuscrito kb'ix che, che tz'ib'tal taj ki'em jumpa kislib'sax un ja' chpam. 4Chla' ki'em mal o jun ángel che xaq jumpa taq kqaj loq rech kuslib'saj un ja' o chpam un tijb'al itnem. Chin jun che nab'e kutrij rib' chpam un ja' echi' kuslib'saj kanoq un ángel, kik'chojik xaq pachinchke yab'il o che.#5:4 O nk'aj taq wuj rech Tyox Wuj, manuscrito kb'ix che, che tz'ib'tal taj v. 4 chpam. 5Pre o pnoq jun achi chla' che och ju'wnaq waxaqljuj (38) jnab' che, che urqom jun k'axlaj yab'il. 6Echi' xuril Jesús che ktz'ol nachi chla', soq xurit'amaj che k'i jnab' o chik che, che urqom nuyab', ena xub'ij che:
—¿Le kawaj katik'chojik? —xche che.
7—Wjaw, ot chin jun knuk'eq chpam ja' echi' kislib'ik. Echi' kintij u'jil wib' nitkel, wa'l jun chik kqaj nab'e chpam un ja', —xche nachi che Jesús.
8Ena xub'ij Jesús che:
—¡Katwa'ljoq, chiyka b'i nasok, katb'inoq! —xche che.
9Xaw jala xb'itaj che rmal Jesús, nachi chanim xik'chojik, xuyak b'i nusok, x'ek. Jesús xuk'chojsaj nachi chpam jun uxnb'al ij, echi' ya'tal taj chke nk'aj aj Israel kiyichkunik. 10Ni nk'aj aj Israel xikb'ij che nachi che ruk'am nusok rich'il nk'aj u u':
—Pwa'ij, jare uxnb'al ij. Ya'tal taj chawe chpam qapxab', kaweqaj nasok rich'il nk'aj a'u', —xiche che.
11Ni nachi xub'ij chke:
—Jare jun che xnuknaj, xub'ij chwe: “Chiyka b'i nasok, katb'inoq”, xche chwe, —xche chke.
12Ni nk'aj aj Israel xikta che:
—¿Chin xub'ij chawe: “Chiyka b'i nasok, katb'inoq”? —xiche che.
13Ni nachi rit'am t uwuch chin xik'chojsanre, mal ri Jesús el'al xutas pnoq rib' chikxo'l nk'aj mnaq echi' xuknaj.
14Tik'ri Jesús xuril uwuch nachi chpam nimlaj rchoch Dios, ena xub'ij che:
—Chtampe' su kimb'ij chawe, —xche che.
—Otchich ayab' mal xatik'chojik. Per xa matzkujch amak chawij, rech kpi t jun chik ayab' che mas nim chjuch jun che xel chawe, —xche che.
15Ni nachi x'ek, xub'ij chke nk'aj aj Israel che jare Jesús xik'chojsanre.
16Xa rmal, che nk'aj aj Israel xikmaj uchapik Jesús rech kikkamsaj, rmal che jala ku'on chpam uxnb'al ij. 17Jesús xub'ij chke:
—Ri nQaw runjel ij kichkunik, xa rmal che in soq runjel ij kinchkunik, —xche chke.
18Xaq ruk' che jala xub'ij chke, xa mas xuyak kiwal nk'aj aj Israel rech kikkamsaj Jesús. Nk'aj aj Israel, jawa xikb'ij chrij Jesús: «Xaw taj kichkun chpam uxnb'al ij, soq kub'ij che jare uQaw Dios. ¡Su kujnamsaj rib' ruk' Dios!» xicha'.
Ri uK'jol Dios o atb'altzij pu'ab'
19Ena xub'ij chik Jesús chke nk'aj aj Israel: «Qatz qtzij, qatz qtzij kimb'ij chiwe: ri uK'jol Dios, ot su ku'ono che xaq utkel Re ku'ono, xaq xaw ku'ono su kuril ruk' uQaw che ku'ono, mal runjel jumpa sutaq'ik ku'on uQaw, soq ku'on Re. 20Ri qaQaw mas kul'oj uK'jol. Runjel sutaq ku'on Re, kuk'ut chjuch ri uK'jol. Soq o na kraj kuk'ut chjuch ri uK'jol che nim na rilik chjuch ri', ni ix kimiyma' echi' kiwilo. 21Ri qaQaw kikunik kuyak loq jun che kamnaq chik, kikunik kuya na uk'asnmal. Soq jala ri uK'jol, chin che kraj Re kuya k'asnmal, kikunik kuya che. 22Per xaw taj ile', xani jare taj nQaw ku'on atb'altzij pkijlom mnaq, xuya kan pin'ab' in nuK'jol rech kin'an atb'altzij pkijlom mnaq. 23Rech jala', kunjel mnaq chkinmirsaj u'ij ri uK'jol peche kik'an che unmirsaxik u'ij qaQaw. Chin jun che kunmirsaj t u'ij ri uK'jol, kitjin taj che unmirsaxik u'ij qaQaw che xutaq loq.
24»Qatz qtzij, qatz qtzij kimb'ij chiwe: chin jun kutatb'ej ntzij soq kukub'a uk'u'x chrij nQaw che xnutaq loq, o uk'asnmal che ot uk'isik. Kurla t uwuch tijb'al k'ax, xani xuya kan ri kmik, mal x'ax chpam jun k'asnmal che ot uk'isik.
25»Qatz qtzij, qatz qtzij kimb'ij chiwe: chanimi' xo'pan ij che chin ikamnaq chik, kikta uch'ab'al ri uK'jol Dios. Chin kikto, jarewa ke kiyik'se' na. 26Mal jala peche qaQaw che o k'asnmal ruk', soq uy'om che uK'jol che kikunik kuya k'asnmal. 27Soq xuya reqle'n rech kikunik ku'on atb'altzij, mal jare Re nAchi nuK'jol Dios. 28Xa mimiyma', mal ko'pan na jun ij che kunjel jumpa nk'aj kamnaq kikta na ri uch'ab'al uK'jol Dios. 29Chintaq nk'aj che xik'an utz, kik'astaj na rech kikriq jun kk'asnmal ruk' Dios che ot uk'isik, per chintaq nk'aj che xa ustaj xik'ano, kik'astaj na rech k'an atb'altzij pkijlom rmal Dios.
30»In ot su kinkunik kin'ano we xaq in kinchomaj su kwaj kin'ano. Jala kin'an che u'anik atb'altzij peche kub'ij nQaw chwe. In kin'an jun sk'umlaj atb'altzij, mal jare taj kin'ano su kwaj in, xani jare kin'ano su kraj nQaw, mal jare Re nutqom loq», xche chke.
Ri Jesús xch'aw chrij jachi kpi wi ri atb'altzij o pu'ab'
31Ri Jesús xub'ij chik chke mnaq: «We in xaw kinya ub'ixik ri saqlaj tzij chwij in, ot kuchomaj su kimb'ij. 32O Jun che utz kch'aw chwij in. In wit'am che runjel su kub'ij chwij, jare saqlaj tzij.
33»Ix xitaq utayik rson che u Wan ajb'nal qasna'. Re xuya ub'ixik chiwe ri saqlaj tzij chwij. 34In nmister taj chwe che o jun chik mnaq kuya ub'ixik chwe chrij nk'asnmal in. We kina'tsaj chiwe su xub'ij re chwij in, xa jare kwaj che kixto'taj na rech kiriq jun ik'asnmal ruk' Dios che ot uk'isik. 35U Wan ajb'nal qasna' xa peche jtzuk' chaj kitluwik, rech kuya upximb'al, ni ix xixki'kat keb' uxib' ij rmal upximb'al un a' che kuya'o.
36»O su kuk'utu nchin in, mas nim rilik chjuch su xub'ij u Wan chwij. Sutaq kin'ano, jare xuchilb'ej nQaw chwe che kink'is u'anik. Jare rmal nchak kin'ano, che k'aljanik che jare nQaw xnutaq loq. 37Ri nQaw che xnutaq loq, ub'im saqlaj tzij chwij in. Per ni ix ot jmul itom uch'ab'al mowni iwlom uwuch. 38Mowni iy'om uk'olb'al utzij nQaw chpam iwanma'. ¿Suche che kikoj taj su kimb'ij chiwe? Jare k'ut nQaw nutqom loq che ub'ixik utzij chiwe. 39Ix, utz utojxik iwib' ki'an che su tz'ib'tal chpam Tyox Wuj, mal kichomaj ix che chla' kiriq jun ik'asnmal che ot uk'isik. Jarewa su tz'ib'tal chpam Tyox Wuj, kub'ij saqlaj tzij chwij in. 40Per ni ix, kiwaj taj kixpi wuk' rech kiriq jun ik'asnmal che ot uk'isik.
41»In kwaj taj che xa mnaq kkinmirsaj n'ij. 42In wit'am iwuch. Wit'am che kiwaj t Dios chpam iwanma', mal ot lo'b'al uk'u'x Dios iwuk'. 43In npitnaq pub'i' nQaw che o chla' chkaj, per ni ix kinik'am taj. Wet o jun kpitik che jare t nQaw utqom loq mal xaq chjuch re pitnaq wi, jare re, chanim kixikjon chjuch. 44¿Su mow kixkunik kixikjonik? Xaq chiwuch ix kinmirsaj i'ij chijunjnal. ¿Suche kiya t che Dios, che jare Re kunmirsaj i'ij, mal iwit'am k'ut che xaq xaw Re qatz qtzij Dios? 45Xa michomaj che in kinkoj tzij chiwij chjuch nQaw chrij sutaq ki'ano. Xa jare u Moisés kukoj tzij chiwij chjuch nQaw, chrij sutaq kixtjin che u'anik che xa ustaj, miskini' chrij re ikub'am ik'u'x. 46Wet qtzij ixkjonaq chrij su xub'ij kan u Moisés, kixkjon b'ari' chwe in, mal chwij in xch'aw wi u Moisés chpam sutaq xutz'ib'aj kanoq. 47We kikoj taj sutaq xutz'ib'aj kan u Moisés, ¿su mow ri kikojo su kimb'ij in chiwe?» Jala xub'ij Jesús chke.
Currently Selected:
San Juan 5: qucSAS
Highlight
Share
Copy
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
