Hechos 6
6
Nk'aj apóstol xkitzkuj jqub' (7) achjab' rech kiyichkun chikxo'l mnaq che kikjom utzij Dios
1Chpam tiempo le', xa kitjinik kik'ir mas iyajkojnel. Iy'o nk'aj b'yu't ixqib' chikxo'l. Nk'aj ajkojnel che kich'aw piktzij aj griego xikyak uch'ojil chke nk'aj ajkojnel che kich'aw piktzij aj hebreo.#6:1 O nk'aj mnaq kikb'ij che jare piktzij aj arameo y piktzij taj aj hebreo. Nk'aj che kich'aw piktzij aj griego xikmaj ub'ixik che jumpa nk'aj b'yu't ixqib' iy'o chikxo'l, tz'qat taj kwa kya chke, ti kjach kwa rech kiktij runjel ij. 2Ni kab'aljuj (12) apóstol xikmol kunjel jumpa nk'aj ajkojnel, tik'ri xikb'ij chke:
—Ustaj we kqaya kan ub'ixik utzij Dios, xa rmal che kqa'an qachak che uya'ik kwa mnaq. 3Qachlal, jare utz we kitzkuj jqub' (7) achjab' chixo'l che i'utzlaj taq mnaq chikuch nk'aj ajkojnel. Ke, nmister che o uchu'ab' Tyoxlaj Uxlab'xel kuk', soq nmister che o mas kin'oj. Kqakojo rech kik'an kchak che kilik nk'aj b'yu't ixqib' ruk' su nmister chke. 4Qo'j kqataqej u'anik qach'ab'al ruk' Dios, y soq kqataqej ub'ixik utzij Dios. —Jala xikb'ij nk'aj apóstol chke nk'aj ajkojnel.
5Ena kunjel utz xikta' sutaq xb'ix chke, y xikmaj kchayik jqub' (7) achjab' chikxo'l. Nab'e xkitzkuj jun Esteban ub'i'; re o mas ukojb'al, soq o uchu'ab' Tyoxlaj Uxlab'xel ruk'. Tik'ri xkitzkuj jun chik Pelipe ub'i', rich'il u Prócoro, rich'il u Nicanor, rich'il u Timón, rich'il u Permenas,#6:5 U Permanas soq kb'ix Parmenas che. soq rich'il u Klax aj Antioquía; u Klax oknaq kuk' nk'aj aj Israel ujer chpam kkojb'al. 6Tik'ri xikk'am loq jqub' (7) achjab' kuk' nk'aj apóstol, xikya chikuch. Ni nk'aj apóstol xik'an kch'ab'al ruk' Dios pkijlom, soq xikya k'ab' pkijlom.
7Kitjinik kutix rib' mas utzij Dios chikxo'l mnaq, y soq kitjinik kik'ir mas nk'aj ajkojnel chla' Jerusalén. Ik'i chke nk'aj rajchak Dios rech nimlaj rchoch Dios che xikkoj utzlaj taq rson chrij Qajaw Jesús.
Nk'aj mnaq xikchap u Esteban y xikk'am b'i chjuch atb'altzij
8U Esteban, nim ut'ob' Dios uy'om pujlom, soq nim uchu'ab' Dios o ruk'. Ena xu'on nmaq taq k'utb'al rich'il milagro chikxo'l mnaq. 9Iy'o nk'aj mnaq chpam rchoch Dios xikmaj uchapik kib' che tzij ruk' u Esteban. Nk'aj mnaqi' iyoknaq chpam jun ja che kjom jun ub'i': «Kech Tzaqpim Achjab'» kb'ix che. Iy'o nk'aj chke che kipi Cirene, soq rich'il nk'aj chik kipi jala Alejandría, rich'il nk'aj chik kipi jala Cilicia, y soq rich'il nk'aj chik kipi jala Asia. Jare ke xikchap kib' che tzij ruk' u Esteban, 10per kiyikun taj kiktij kchu'ab' ruk' jumpa tzij kub'ij u Esteban, mal mas un'oj u Esteban, jare Tyoxlaj Uxlab'xel kub'ij che sutaq tzij kub'ij chke. 11Ena el'al xkitzkuj keb' uxib' mnaq rech kiktaqch'ij che ukojik umak u Esteban. Nk'aj mnaqe' xikb'ij: «Xqata' ti xub'ij nk'aj k'axlaj taq tzij chrij qari'jal Moisés, soq chrij Qajaw Dios», xicha'.
12Echi' jala xikb'ij, xikkoj kk'u'x mnaq; xa rmal, xyaktaj kiwal chrij u Esteban; soq xpi kiwal nk'aj achjab' che o keqle'n chikxo'l aj Israel rich'il nk'aj ajtojnel rech upxab' Dios. Ena xib'e chrij u Esteban. Xikchapo, xikk'am b'i chjuch atb'altzij. 13Soq iy'o nk'aj chik ajb'nal tzijtal xkitzkuj rech kikkoj umak u Esteban. Ke xikb'ij: «Nachi ri', ku'xan taj che ub'ixik k'axlaj tzij chrij lo'laj rchoch Dios, y soq jala kub'ij chrij lo'laj upxab' Dios utz'ib'am kan u Moisés. 14Qatom chik che kub'ij che jare Jesús aj Nazaret kuwlujsaj na un nimlaj rchoch Diosi', y soq xa kuk'ex costumbre che uy'om kan qari'jal Moisés chqe». Jala xikb'ij nk'aj ajb'nal tzijtal.
15Ena kunjel nmaq keqle'n, rich'il jumpa nk'aj chik mnaq che iku'l chpam atb'altzij, xikka'yej u Esteban, y xkilo che laj uplaj sare uplaj un ángel.
Currently Selected:
Hechos 6: qucSAS
Highlight
Share
Copy
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
