Hechos 4
4
U Lu' rich'il u Wan xik'am b'i kmal mnaq chjuch atb'altzij
1U Lu' rich'il u Wan kiyitjinik na kich'aw kuk' mnaq, ti xipi nk'aj rajchak Dios, rich'il nachi che tk'al pkijlom mnaq che kkichjij nimlaj rchoch Dios, soq rich'il nk'aj saduceo. Kunjel ke xiyo'pan kuk' u Lu' rich'il u Wan. 2Per mas yaktajnaq kiwal chkij u Lu' ruk' u Wan, mal ustaj kikkilo che kkitjoj mnaq che utzij Dios y kikb'ij che puro saqlaj tzij kk'astaj kwuch nk'aj kamnaq. Jare k'utb'alre che xk'astaj uwuch Jesús chikxo'l nk'aj kamnaq. 3Ena, xikchap u Lu' rich'il u Wan, xikkoj pkarsa ast chkab' ij, mal mas ma'tan chik. 4Per kunjel jumpa mnaq che xikta utzij Dios, mas ik'i chke che xiyikjonik. Xaq xaw iyachjab', ya mer j'ob' mil (5,000) o chke che xiyikjonik.
5Chkab' ij, xikriq kib' Jerusalén kunjel jumpa nk'aj mnaq che itk'al pkijlom nk'aj aj Israel, rich'il jumpa nk'aj che o keqle'n, soq rich'il nk'aj ajtojnel rech upxab' Dios, 6soq o u Anás chikxo'l, che jare nimlaj ajk'mal b'e chke nk'aj rajchak Dios, soq rich'il u Caifás, rich'il u Wan, rich'il u Alejandro, y soq rich'il jumpa nk'aj kachlal nk'aj nmaq taq ajk'mal b'e chke nk'aj rajchak Dios. 7Tik'ri xiktaq kk'amik u Lu' rich'il u Wan. Xiktak'b'a pink'aj chke, tik'ri xikmaj uk'otik kchi', xikb'ij chke:
—¿Chin xixutaq che u'anik wari' che kixtjin che u'anik? ¿Chin ub'i' kib'ij ti kixkun che u'anik? —xiche chke.
8Nu Lu' o uchu'ab' Tyoxlaj Uxlab'xel ruk', ena xub'ij chke:
—Ix ixtk'al pujlom tinmit, rich'il ix ixri'j taq achjab' che o iweqle'n chikxo'l qamnaq aj Israel, 9chanim kixtjinik kik'ot qachi' rmal jun utzil x'an che jun achi yab' che xiknaxik. Soq kita' su mow x'an che ukanxik. 10Iwunjel ix, rich'il kunjel jumpa mnaq iyaj Israel, chiwit'amaj wari': xa rmal uchu'ab' Jesucristo aj Nazaret, xa rmal ub'i' Re che xik'choj nachi ri', kiwilo o chi' chiwuch, ya k'chojnaq chik. Jare mismo Jesús che xirip ix chjuch jun cruz, che xik'sux chikxo'l nk'aj kamnaq rmal Dios, jare Re xuknaj nachi ri'. 11Chpam Tyox Wuj tz'ib'tal wi chrij Jesús ri' echi' jawa kub'ij:
“Peche mow jare jun ab'aj xixtuj kan ix che peche ixajykal ja.
Per ni nab'aji', mas nim uchak xuriq chanim,
jare xoksax che utk'alb'al ja”. (Sal 118:22)
Jala tz'ib'tal kanoq. 12Ot chin jun chik che kikunik kujuto' chjuch qamak che kujach qawuch ruk' Dios. Dios kujuk'amo chpam k'ax jnam qawuch, mal chi' chuchlew ot jun chik mnaq che ya'tal che rmal Dios che kikunik kujuto'o peche le'.#4:12 Xaq xaw Jesucristo che kujuresaj chpam qamak rech kuya chqe jun qak'asnmal che ot uk'isik. —Jala xub'ij u Lu'.
13Echi' xkil nk'aj atb'altzij che mas o kowlaj k'u'x chke u Lu' rich'il u Wan, soq xkit'amaj che ot iskwe'l kitjom, xaq ijala peche mnaq che pachinchke mnaq kika'yik, ena mas xikmiyma'. Soq xikch'ob'o che naj xkuk'aj kib' ruk' Jesús. 14Per xaq kikka'yej chik un yab' che xiknaxik, tk'al nachi chikuch, k'chojnaq chik. Xa jala', otchich jun tzij xikb'ij chkij u Lu' rich'il u Wan. 15Tik'ri xtaq kesxik loq u Lu' rich'il u Wan chla' jachi ik'wi. Xaq kitkel nk'aj atb'altzij xikanaj kan chla', tik'ri xiyok che uchomxik chikuch. 16Xikb'ij: «¿Su lo kqa'an chke nk'aj achjab'e'? Mal kunjel jumpa mnaq iy'o Jerusalén kit'am chik che qtzij x'antaj un nimlaj k'utb'al kmal, y qo'j ot mow kqawaj uwuch chikuch. 17Per nmister che ko kiqach'ab'ej, rech kkix'ej kib', xa jala' otchich jun tzij kikb'ij chrij Jesucristo jumpa tiempo k'ek, soq otchich rson ko'pan kuk' mnaq». Jala xikb'ij chikuch.
18Tik'ri xkisk'ij jun b'welt chik u Lu' rich'il u Wan y xikb'ij chke che ot mow kkitjoj mnaq pub'i' Jesús, soq otchich mow kikb'ij jun tzij chrij Re. 19Nu Lu' rich'il u Wan xikb'ij chke:
—Chichomaj umpe ix chiwuch chinchke mas utz kuril Dios, ¿le jare utz kurilo che jare kqakoj itzij ix, o jare utz kurilo che jare kqakoj utzij Re? 20Mal qo'j, ot mow kqaya kan ub'ixik su qalom, rich'il su qatom, —xiche chke.
21Ni nk'aj atb'altzij xikb'ij chke che kik'an na k'ax chke we o jun chik tzij kikb'ij, tik'ri xa xiktzaqpij b'ik. Xikriq ti kmak che xa rmal kk'ejsaj kwuch, mal kunjel jumpa mnaq iy'o chla' xa kiyitjinik kkinmirsaj u'ij Dios, rmal sutaq x'antaj chikuch. 22Ni nachi che xiknax rmal un nimlaj milagro, o uwi' che kawnaq (40) jnab' o chik che.
Nk'aj mnaq che kikjom utzij Dios xikta kchu'ab' che Dios, soq xikta kowlaj kk'u'x che
23Echi' xitzaqpix b'i u Lu' rich'il u Wan, xib'e kuk' nk'aj kich'il kikjom utzij Jesús. Tik'ri xikmaj ub'ixik chke runjel sutaq xb'ix chke kmal nk'aj ajk'mal b'e chke nk'aj rajchak Dios rich'il nk'aj che o keqle'n chikxo'l nk'aj aj Israel. 24Echi' xikta nk'aj kich'il kikjom utzij Jesús che jala xikb'ij, jnam xich'awik, ko xik'an kch'ab'al ruk' Dios, xikb'ij: «Nimlaj Qajaw, jare la, lal Dios x'an la ri kaj ulew rich'il mar, soq jare la xtik la runjel jumpa sutaq'ik kriqtaj chjuch kaj ulew. 25Rmal Tyoxlaj Uxlab'xel la, jare la xch'aw loq la rmal qari'jal David, che jare taqo'n la, echi' jawa xub'iji':
¿Suche che kich'u'jar mnaq rmal kiwal ptaq tinmit?
¿Suche che xa jare mas kik'an pinsar jumpa sutaq'ik che xa ot uptan, xa rech a'ntre?
26Ni nk'aj achjab' che kik'an atb'altzij chi' chuchlew xiwa'ljik
ko xiktak'b'a kib' rich'il nk'aj achjab' che itk'al pujlom nk'aj tinmit soq kunjel xikmol kib' rech kik'an ch'oj ruk' Qajaw Dios rich'il ri Cristo,#4:26 Cristo kel kub'ij jun chaytajnaq rmal Dios. Un tzij Mesías xaq jnam kilwi. xchay rmal Dios. (Sal 2:1-2)
Jala utz'ib'am kan u David che xb'ij la. 27Saqlaj tzij che jala xik'an u Herodes rich'il u Poncio Pilato, rich'il mnaq che iyaj Israel, soq rich'il jumpa iyaj Israel taj. Kunjel jumpa kwuch ke xikmol kib' chi' Jerusalén, rech kik'an k'ax che Qajaw Jesús, che jare lo'laj taqo'n la, xchay la. 28Jala xik'ano, mal jare la chomam loq la ujer che nmister che jala k'antaj na, jumpa o pi'ab' la rmal chu'ab' la. 29Per ni le', chiwlampe la, Qajaw, kkaj ke kik'an k'ax chqe. Chiy'a la jun kowlaj k'u'x chqe qunjel jumpa ujtaqo'n la rech kqax'ej t qib' che ub'ixik tzij la. 30Soq kqata qachu'ab' che la rech kujto' la che kkanxik nk'aj yab', soq rech kujto' la che u'anik nmaq taq k'utb'al rich'il milagro, rmal uchu'ab' lo'laj K'jol la che Jesús ub'i'». Jala xikb'ij nk'aj apóstol ti xik'an kch'ab'al ruk' Dios.
31Echi' xikk'is u'anik kch'ab'al ruk' Dios, ko xislib' un ja jachi kirqom wi kib'; y kunjel ke xinojsax rmal Tyoxlaj Uxlab'xel. Tik'ri xik'an jun kowlaj k'u'x che ub'ixik utzij Dios.
Nk'aj mnaq che kikjom utzij Dios, xikjach uwuch chikuch runjel jumpa ub'itaqke olik rech jnam o ke
32Kunjel mnaq che kikjom utzij Dios, xaq jun kwuch, xaq jnam kpinsar. Ot jun kub'ij che runjel jumpa ub'itaqre xaq utkel chrij. Runjel jumpa ub'itaqke olik, kikjach uwuch chikuch rech jnam o ke. 33Nk'aj apóstol, ruk' nimlaj kchu'ab' xiktaqej ub'ixik chke mnaq che puro saqlaj tzij xk'astaj uwuch Qajaw Jesús chikxo'l nk'aj kamnaq. Ni Dios xuya mas utzil pkijlom kunjel mnaq kikjom utzij Jesús. 34Xa jala' otchich jun mnaq chikxo'l che o nmister che, mal chintaq o klew, rich'il chintaq o kchoch, kikk'ij kanoq, kikk'am loq pwaq; 35kikjach pik'ab' nk'aj apóstol, rech kikjach uwuch chikuch chintaq o nmister chke.
36O jun achi Jse ub'i'. Nk'aj apóstol xikkoj jun chik ub'i', Bernabé xikkoj che ub'i'. Un b'i' Bernabé jare kilwi che jare re kukub'saj kk'u'x mnaq. Nachi le' jare ri'y umam kan u Leví.#4:36 Un ri'y umam u Leví jare levita kb'ix che. Chla' xalax wi chpam jun ch'qap ulew o nk'aj mar che Chipre ub'i'. 37Re, xuk'ij jun rlew, y xuk'am loq pwaq, xujach chke nk'aj apóstol.
Currently Selected:
Hechos 4: qucSAS
Highlight
Share
Copy
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
