Hechos 23
23
1U Pablo naj xyuka'yej nk'aj nmaq keqle'n che tk'al chikuch, tik'ri xub'ij chke:
—Qachlal, in kinna' chpam wanma' che ot jun k'ax ninom chpam nk'asnmal chjuch Dios jumpa pitnaq loq, —xche chke.
2Nun nimlaj ajk'mal b'e chke nk'aj rajchak Dios che Ananías ub'i', xyutaq nk'aj mnaq che iy'o putlok' u Pablo rech kikch'ay u Pablo puchi'. 3Per nu Pablo xub'ij che u Ananías:
—Jare Dios katuch'ay na at mal xa keb' aplaj at'olik. At atku'l chla' rech ka'an atb'altzij pnijlom, jala peche tz'ib'tal chpam pxab'. ¿Suche k'ut che kataq nch'ayik we jala taj kub'ij chpam pxab'? Xa kakoj taj su kub'ij chpam pxab', —xche che.
4Ni nk'aj mnaq iy'o chunqaj u Pablo, xikb'ij che:
—¿Le jala katch'aw che nimlaj ajk'mal b'e chke nk'aj rajchak Dios? —xiche che.
5Nu Pablo xub'ij chik chke:
—Qachlal, in wit'am taj we jare re nimlaj ajk'mal b'e chke nk'aj rajchak Dios. Chpam Tyox Wuj tz'ib'tal wi che kub'ij: “Xa mab'ij jun tzij che xa ustaj chrij jun atb'altzij chpam atinmit”,#Éx 22:28. kcha'. —Jala xub'ij u Pablo.
6Ena xuril u Pablo che o keb' uxib' chke iyoknaq kuk' nk'aj mnaq che saduceo kb'ix chke, soq iy'o keb' uxib' chik iyoknaq kuk' nk'aj chik mnaq che fariseo kb'ix chke. Ena ko xusik'b'aj rib', xub'ij chke kunjel jumpa mnaq iy'o chla' che nim atb'altzij o pik'ab':
—Qachlal, in nfariseo mal fariseo nqaw. Ni le' kitjinik k'an atb'altzij pnijlom, xa rmal che kinkojo che kik'astaj chna kwuch nk'aj kamnaq. —Jala xub'ij u Pablo.
7Echi' k'ut jala xub'ij, nk'aj fariseo rich'il nk'aj saduceo, xikmaj uchapik kib' che tzij chikuch. Xa jala', xikjach kwuch kib'. 8Jala xik'ano xa rmal mel kikkoj taj nk'aj saduceo che kik'astaj chna nk'aj kamnaq, soq kikkoj taj che o ángel, y soq kikkoj taj che o espíritu, per ni nk'aj fariseo, kikkojo runjel jumpa wari'. 9Xa jala' ko xiksik'b'aj kib' kunjel jumpa mnaq iy'o chla'. Xiwa'laj keb' uxib' chke nk'aj ajtojnel rech upxab' Dios che iyoknaq kuk' nk'aj fariseo, xich'awik, xikb'ij:
—Ot su kri' jun mak kqariq chrij nachi ri'. ¿Sur qit'am we xa jun espíritu, seno jun ángel xuch'ab'ej? —xiche che.
10Mas xinmir un ch'oj chikxo'l, ena puk nachi che tk'al pkijlom nk'aj soldado, mas xux'ej rib' mal jare kuchomaj re che kikmuch u Pablo. Xa rmal, xyutaq nk'aj soldado rech kikkesaj loq u Pablo chikxo'l, y kikk'am b'i jun b'welt chik chpam un ja jachi ik'wi nk'aj soldado.
11Chkab' ij, echi' cha'ab' chik, xuk'ut rib' Qajaw Jesús chjuch u Pablo, xub'ij che: «China jun kowlaj k'u'x, Pablo, mal saqlaj tzij ab'im chwij in chpam tinmit Jerusalén, nmister che soq kab'ij chik chpam tinmit Roma», xche che.
Nk'aj mnaq xikchomaj su kik'an che ukamsxik u Pablo
12Kisqarik chkab' ij, xikchomaj nk'aj aj Israel chikuch su mow kik'an che ukamsxik u Pablo. Xikb'ij ruk' saqlaj tzij chjuch Dios che kpi na jun k'ax pkijlom we xa kik'an taj su xikchomaj. Ke xikchomaj che ot kwa kiktijo, soq ot kmi'na' kiktijo we mja kikkamsaj u Pablo, ast retal echi' kkamsam chik tik'ri o mow kiktijo, jala xikchomaj. 13O uwi' che kawnaq (40) nk'aj achjab' che jala xikchomaj chrij u Pablo. 14Tik'ri xib'e kuk' nk'aj achjab' che itk'al pkijlom nk'aj rajchak Dios, rich'il nk'aj ri'j achjab' che nmaq keqle'n chikxo'l nk'aj aj Israel, xikb'ij chke:
—Qo'j xqab'ij ruk' saqlaj tzij chjuch Dios che ot su kqatijo we mja kqakamsaj u Pablo. 15Ni ix, rich'il nk'aj achjab' che nim atb'altzij o pik'ab' chikxo'l nk'aj aj Israel, nmister kib'ij che nachi tk'al pkijlom nk'aj soldado che kuk'am loq u Pablo chiwuch chwe'q. Chib'ij che, che xa kik'ot uchi' rech kiwit'amaj su mero umak unom. Ni qo'j kqak'ak'lej pnoq ptaq b'e rech kqakamsaj. —Jala xikb'ij chke.
16Per o jun ral rnab' u Pablo xuta rson sutaq kiyitjin che uchomxik, ena xok b'i chpam un ja jachi ik'wi nk'aj soldado, xub'ij che u Pablo su xuta'. 17Nu Pablo xusk'ij jun chke nk'aj achjab' itk'al pkijlom jun ciento soldado, xub'ij che:
—Chik'ma b'i nala ri' ruk' nachi tk'al pkijlom kunjel nk'aj soldado mal xa o su kraj kub'ij che, chrij su xuto, —xche che.
18Xa jala' nachi che tk'al pkijlom jun ciento soldado, xuk'am b'i nala ruk' nachi tk'al pkijlom kunjel nk'aj soldado, xub'ij che:
—U Pablo che o pkarsa, xnusk'ij, xub'ij chwe che kink'am loq nala chawuchi', mal xa o su kub'ij chawe chrij su xuto, —xche che.
19Ni nachi tk'al pkijlom kunjel nk'aj soldado, xuch'elej b'i nala che u'ab', xuresaj pnoq utkel tik'ri xuta che:
—¿Su kawaj kab'ij chwe? —xche che.
20Ni nala xub'ij che:
—Nk'aj aj Israel xikchomaj chikuch, y xa jun xik'an che kchomnik. Jare xikchomaj che kikb'ij che la che chwe'q kk'am b'i la u Pablo chikuch nk'aj achjab' che nim atb'altzij o pik'ab' chikxo'l nk'aj aj Israel. Ke kikb'ij na che la che xa kikk'ot uchi', rech kkit'amaj su mero umak unom. 21Per xa mkoj la su kikb'ij mal o uwi' che kawnaq (40) nk'aj kich'il che el'al kk'ak'lem rech kikchapo, kikkamsaj. Kb'im ruk' saqlaj tzij chjuch Dios che kpi na jun k'ax pkijlom we xa kik'an taj su xikchomaj. Ke xikchomaj che ot kwa kiktijo, soq ot kmi'na' kiktijo we mja kikkamsaj u Pablo. Ni le' ya kyijb'amch kib' che u'anik su xikchomaj, xaq ki'em chik we kya la chke su kikta na che la. —Jala xub'ij nala che nachi tk'al pkijlom kunjel nk'aj soldado.
22Ni nachi tk'al pkijlom kunjel nk'aj soldado, xub'ij b'i che nala che mub'ij che jun chik mnaq su xub'ij kan che re.
Xtaq b'i u Pablo chjuch un gobernador Félix
23Nachi tk'al pkijlom kunjel nk'aj soldado, xyusk'ij keb' achjab' itk'al pkijlom jun ciento soldado y xyutaqo rech kikyijb'a kjeb' ciento ruk' oxk'al ljuj (470) soldado, keb' ciento (200) kib'e chaqan, rich'il oxk'al ljuj (70) kib'e chrij kej, y soq rich'il keb' ciento (200) iyaj k'qal lanza, rech kib'e chpam tinmit Cesarea ptaq las b'eljeb' (9) hora cha'ab'. 24Soq xutaq uyijb'axik keb' uxib' kej, rech o jun kukjej b'i u Pablo. Xa jala' utz uwuch ko'pan ruk' un gobernador Félix che nim atb'altzij o pu'ab' pukwent Judea. 25Ni nachi tk'al pkijlom kunjel nk'aj soldado, xutz'ib'aj jun wuj rech kutaq b'i ruk' un gobernador. Jarewa tzij xutz'ib'aj b'i chpam:
26In wa nClaudio Lisias,
Kintaq b'i un wuj che la Félix, che jare la lal gobernador.
Kinya jun rtzil wuch la.
27Nachi ri' xchap kmal nk'aj aj Israel, xikkoj pkarsa. Kikkamsaj kkaj ke, per echi' xinwit'amaj in che jare jun achi aj Roma, xiyinsk'ij nk'aj soldado, xiyintaq che resxik pik'ab'. 28Xwaj xinwit'amaj su umak unom chikuch, xa rmal xink'am b'i chikuch nk'aj achjab' che nim atb'altzij o pik'ab' chikxo'l nk'aj aj Israel. 29Xinto che jare umak chikuch che ku'on taj su kub'ij chpam kipxab' ke, per ot jun chik umak unom che we xa rmal kkamsxik, soq we xa rmal koksax pkarsa. 30Echi' xinta rson che kchomam nk'aj aj Israel kikkamsaj nachi ri', chanim xintaq b'i uk' la, y soq ximb'ij b'i chke nk'aj mnaq che kikjom umak che kikb'ij che la su umak unom.
Jala xutz'ib'aj b'i chpam un wuj.
31Xa jala', xik'an nk'aj soldado su xb'ix chke. Ena cha'ab' xikk'am b'i u Pablo chpam un tinmit Antípatris. 32Chkab' ij chik, xiyitzlij loq nk'aj soldado che ib'enaq chaqan chpam un ja jachi ik'wi chla' Jerusalén. Ni nk'aj chik soldado che ib'enaq chrij kej, xikk'am b'i u Pablo, xib'e chik. 33Echi' xiyo'pan chpam tinmit Cesarea, xikya un wuj che un gobernador Félix soq xikjach u Pablo pu'ab'. 34U Félix xusk'ij uwuch un wuj, tik'ri xuta che u Pablo jachi kpi wi. Ena echi' xurit'amaj che pukwent Cilicia kpi wi, 35xub'ij che: «Kintatb'ej runjel sutaq kab'ij chwe, echi' kipi nk'aj mnaq che kikjom amak», xche che. Tik'ri xuya chpam un nimlaj ja rech u Herodes, y xyutaq nk'aj soldado che uchijxik rech kanmaj tu b'ik.
Currently Selected:
Hechos 23: qucSAS
Highlight
Share
Copy
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
