Hechos 11
11
U Lu' xuya jun rson chke nk'aj ajkojnel chpam tinmit Jerusalén
1Nk'aj apóstol rich'il nk'aj chik qachlal ajkojnel che iy'o chla' Judea, xikta rson che o nk'aj mnaq iyaj Israel taj, soq kikjom utzij Dios. 2Ena echi' xitzlij u Lu' chla' Jerusalén, jumpa nk'aj ajkojnel iyaj Israel xikmaj uyajik u Lu'. Jare kkaj ke wet kunjel jumpa ajkojnel koksax ketal kicuerpo tza'm amb'al kchul, peche 'nom chke ke; un retali', circuncisión kb'ix che. 3Xikta che:
—¿Suche che xatpi kuk' nk'aj mnaq che iyaj Israel taj? ¿Suche xatij awa kuk'? —xiche che.
4Ena xumaj ub'ixik u Lu' chke ptaq uchlaj runjel sutaq x'antjik, utz ub'ixik xu'on che, xub'ij:
5—Chla' nik'wi chpam tinmit Jope. Kintjinik kin'an nch'ab'al ruk' Dios ti o jun k'utb'al xuk'ut Dios chinwuch chisqil. Xinwilo che peche jun nim k'ul ulk'om rib', xmil kjeb' (4) utza'm kitjinik kqaj loq chkaj y xqaj chla' wuk' jachi nik'wi. 6Per echi' qatz xinwilo su o chpam un k'ul, xinwilo che o nk'aj tiko'n rich'il uy' chpam che kjeb' (4) kichkalb'al, soq xinwilo che o nk'aj chik itzel taq uy' chpam, rich'il nk'aj che xa kkijru'rej kib' chutaq ulew, y soq rich'il nk'aj tz'kin kiyixk'in chkaj. 7Tik'ri xinta uch'ab'al Jun che xch'aw loq chkaj, xub'ij chwe: “Katwa'ljoq, Lu', chkamsaj pachinchke tiko'n rich'il uy' kawaj rech katijo”, xche chwe. 8Per ni in ximb'ij: “¡Kin'an taj, Wjaw! Kintij taj, mal ot jun b'welt nitjom jun cosa che ya'tal taj chpam qapxab' che kitjiwik y soq ot su kri' jun cosa nitjom che we ustaj kitjiwik”, xinche che. 9Ena xch'aw jun b'welt chik chkaj Jun che xch'aw loq nab'e, xub'ij chwe: “Chinchke kub'ij Dios che y'om tijwik che, xa mab'ij at che ustaj kitjiwik”, xche chwe.
10»Uxib' b'welt che jala x'antjik, tik'ri xyaktaj chub'i un k'ul chkaj che iy'o nk'aj tiko'n rich'il uy' chpam. 11Mismo chanim xiyo'pan uxib' achjab' che ntzukxik, echi' pre n'o pnoq chla' chpam jun ja jachi nik'wi. Ke jala itqom loq wi chpam tinmit Cesarea. 12Xa jala' ri Tyoxlaj Uxlab'xel xub'ij chwe che utz we kimb'e kuk' y xa mu'on keb' nk'u'x. Ena ximb'e kuk'. Soq xib'e waqib' (6) qachlal aj Israel wuk'. Echi' xujo'pnik, xujok b'i chirchoch nachi che xujusk'ij. 13Nachi ri' xub'ij chqe che xuril jun ángel che xitk'e' chla' pja ruk', y xch'aw un ángel ruk', xub'ij che: “Chitqa b'i keb' uxib' achjab' chpam tinmit Jope, rech kkisk'ij loq u Simón, che soq kb'ix Lu' che. 14U Simón kub'ij na chawe chinchke nmister ka'ano, rech kixto'taj na chpam k'ax y kiriq ik'asnmal ruk' Dios che ot uk'isik, iwunjel jumpa iwuch ix jun ja mnaq”. Jala xub'ij un ángel che nachi.
15»Echi' k'ut xinmaj ub'ixik utzij Dios chke nk'aj mnaq che iy'o chla', xpi Tyoxlaj Uxlab'xel xqaj pkijlom, jala peche xu'ono ti xqaj pqajlom qo'j nab'e. 16Tik'ri k'ut xna'taj chwe su xub'ij Qajaw Jesús, Re xub'ij: “Qtzij che u Wan xu'on qasna' ruk' ja', per ix k'an na qasna' chiwe rmal Tyoxlaj Uxlab'xel echi' kqaj loq pijlom”, xcha'.#Hch 1:5. 17Xa jala', we Dios xuya Tyoxlaj Uxlab'xel chke mnaq che iyaj Israel taj, jala peche xuya chqo'j che qakjom utzij Qajaw Jesucristo, ¿su weqle'n in che we kin'atij sutaq ku'on Dios? —Jala xub'ij u Lu' chke mnaq.
18Ena echi' xikta nk'aj qachlal chla' Jerusalén runjel jumpa wari', xich'aw t chik, xa xkinmirsaj u'ij Dios, xikb'ij:
—¡Soq xuya b'a Dios chke nk'aj mnaq che iyaj Israel taj rech kikk'ex kanma' rech xa jala' kikriq jun kk'asnmal che ot uk'isik! —xicha'.
Chi' kqil wi su mow xo'pan utzlaj taq rson chrij Qajaw Jesucristo chpam tinmit Antioquía
19Echi' xkamsax u Esteban, xiyanmaj nk'aj ajkojnel chjuch un k'ax che xpi chkij chla' Jerusalén. Iy'o nk'aj xib'e chpam un lyar Fenicia, iy'o nk'aj chik xib'e chpam un lyar Chipre, y soq iy'o nk'aj chik xib'e chpam un tinmit Antioquía. Chla' kiyitjin che ub'ixik utzij Dios chke mnaq che iyaj Israel, per xikb'ij taj chke nk'aj che iyaj Israel taj. 20Per iy'o nk'aj ajkojnel kipi chpam un lyar Chipre rich'il chpam un lyar Cirene. Ke, xiyo'pan chpam tinmit Antioquía, jare ke xikmaj ub'ixik utzlaj taq rson chrij Qajaw Jesús chke mnaq che iyaj Israel taj. 21Xa jala' xya kchu'ab' rmal Dios y mas ik'i xikkoj utzij Dios, xikjach kib' pu'ab' Qajaw.
22Echi' k'ut xo'pan un rsoni' kuk' nk'aj ajkojnel iy'o chla' Jerusalén, xiktaq b'i u Bernabé chla' Antioquía. 23Echi' xo'pan u Bernabé, xurilo che jumpa qachlal iy'o chla', kirqom jun nimlaj utzil rmal Dios, ena mas xki'kat rmal. Xyupixb'ej kunjel, xub'ij chke che kik'an jun kowlaj k'u'x kiktaqej kkojb'al chrij Qajaw Jesús y xa mikya chkanoq. 24Jala xu'on u Bernabé mal jare jun utzlaj achi, o mas uchu'ab' Tyoxlaj Uxlab'xel ruk', y soq mas nim ukojb'al; rmal re, mas ik'i mnaq xiyikjon che Qajaw Jesús.
25Tik'ri k'ut x'e u Bernabé che utzukxik u Saulo chpam tinmit Tarso. Echi' xuriqo, xuk'am b'i ruk' chpam tinmit Antioquía. 26Enter jun jnab' xikanaj kan kuk' nk'aj ajkojnel. Ik'i mnaq xkitjoj che utzij Dios chla'. Chla' chpam tinmit Antioquía, tela nab'e b'welt xoksax «cristiano» che kb'i' mnaq che kikjom utzij Qajaw Jesús.
27Chpam un tiempo le', iy'o keb' uxib' ajb'il utzij Dios xiyel b'i Jerusalén, xiqaj loq Antioquía. 28O jun chke, Agabo ub'i', xitk'e' chikxo'l nk'aj qachlal. Ena xa rmal Tyoxlaj Uxlab'xel che o ruk', xub'ij chke che kpi na jun nimlaj wijal chjuch runjel uwuchlew. Y marewi, echi' o u Claudio César che atb'altzij pujlom runjel un tinmit Roma ti xpi un nimlaj wijal. 29Ena xikchomaj nk'aj qachlal chla' Antioquía kiktaq b'i jun tob'nik chke nk'aj qachlal chla' Judea. Jumpa kchuj xikmolo, jare xikya'o jumpa taq xiyikun che uya'ik chikjunjnal. 30Jala xik'an che. Jumpa pwaq xikmolo rech to'b'alke, jare xiktaq b'i chkij u Bernabé rich'il u Saulo, rech kikjach chke qachlal iyajk'mal b'e chikxo'l ajkojnel chla' Judea.
Currently Selected:
Hechos 11: qucSAS
Highlight
Share
Copy
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
