Lok 24
24
Okuka wa Yɛso
(Mat 28.1-10; Mlk 16.1-8; Yɔa 20.1-10)
1Lusuku lwa inga ham'mɛshi kɔsɛ, baya bǎchana beɛlɛlɛ o echwate, bebatɛtɛ mauta na mwambɔ kwabelɔngichɛ. 2Bebangilɛ lewɛ lyebɛlɛ libǐwɛ o n'changɔ kwa echwate lye lebongoloshiwɛ habamba. 3Ela habekingelɛ n'ta mwa echwate, bashimɔninɛ m'bele kwa Ɔlɔ Yɛso. 4Eya eto ebakakechɛ wɛ̌nɛ. Habebɛlɛ beleokakelwa, hɔka haya bemɔninɛ bato babele bachwalɛ ngobɔ chihaha wɛ̌nɛ, bebɛlɛ bakimanɛ hɔka nǎbɔ. 5Obibyɔ baya bǎchana bewasilwɛ na bɔ̌ba, bekinyiɛ byɛnyi byabɔ hasé. Ela baya bato bebakaninɛ kɛte: «Yolo ya é mwehoɛbala m'babu koya minɛ kwe na mwɛkɔ? 6Kushi eyǎka hanɔ, kwahokuka! Moɛngɛlɛchɛ biya byaken'kaninɛ mɛngɔ mɛnɛ kwebɛlɛ kwěle Galilaya. 7Atambɛ kwekaninɛ kɛte: ‹Nɛnɛ Mwǎna kwa N'to nelěngyɛ otambolwa o bato babe, na bɔnyibɔ besosola o n'salaba, ela masuku matato hanyuma ha owa wanyi, nekuka.› »
8Haya, baya bǎchana beɛngɛlɛchɛ binywa byɛnɛ Yɛso kwebasambelɛ. 9Behuminɛ o eya echwate, bekělɛ okanina bakikiwa ba Yɛso umi na komwɛ̂chi na bǎngɛ bato bɔsɛ koya mwanɔ. 10Bǎchana bɛnɛ betɔkɔmɛ koya mwanɔ nǎ banɔ: Malia kwa mboka kya Magilalɛnɛ na Yɔanɛ na Malia n'nakɛ kwa Yakɔbɔ na bǎngɛ bǎchana. 11Ela bakikiwa belangilɛ kɛte byabebɛlɛ tɔkɔma baya bǎchana, bibɛlɛ bya bonɛnɛ, na bashibawashishɛ.
12Ela Pɛtɛlɔ kɛ kwechuilɛ, na okya abelɔ mpaka o eya echwate. Hakehǐlɛ ɔ, kwekinamɛ na olengamina n'ta, kwemɔninɛ sanda ka bonɛnɛ, lyɛnɛ lyebɛlɛ libungiwɛ m'bele kwa Yɛso. Ohwa kwesuwelɛ o sɛsɛ m'okakelwa yolo ya binywa byɛnɛ byêteɛ.
Yɛso kwatɔbɔɛla balɔmbwɛ bakɛ babelɛ n'tɛla kya Ɛmau
(Mlk 16.12-13)
13Lɔka loya lusuku, balɔmbwɛ babele ba Yɛso bebɛlɛ okya o mboka kyebɛlɛ buchiwa Ɛmau. Keya mboka kyebɛlɛ olanga o bilɔmɛtɛlɛ umi na kemwɛchi na mboka keolo kya Yɛlusalɛma. 14Bebɛlɛ okya na tɔkɔma yolo ya biya binywa byɔsɛ byêteɛ. 15Mɛngɔ mabebɛlɛ bele otɔkɔma, na obochana, Yɛso kɛ mǐnɛ kwebatɔbɔɛlɛ na onyata nabɔ hamwɛchi. 16Bem'mɔninɛ, ela mɛ̌sɔ mabɔ mechibilwɛ bashim'mǎnɛ. 17Yɛso kwebabuchichɛ kɛte: «Mohokya natɔkɔma yolo ya ě?» Bekimanɛ wa anyɔngɔtɛla. 18Komwɛ hawǐngi habɔ chǐna lyakɛ Kelɛɔpa kwen'kailɛ kɛte: «Kɔkwɛ ka nǎ n'to kwa Yɛlusalɛma kushim'mǎnɛ byɛnɛ byahetea m'manɔ mabele?» 19Kɛlwakɛ kwen'kailɛ: «I binywa naké?» Ben'kailɛ kɛte: «Twehotɔkɔma yolo ya binywa byɛnɛ byem'hǐlɛ Yɛso kwa Nazalɛti! Koko Yɛso kwebɛlɛ n'languchi* m'olo. Eyǎka kwemɔnyinyɛ boɔmɛ bwakɛ o binywa byakɛ na o bikake byakɛ ombɛlɛ wa Abɛcha na ombɛlɛ wa bato bɔsɛ.
20«Bahɛla ba bibole* na baongo bɛto ben'tambolɛ yolo kohɛwɛ ateka a owa. Ohwa, bem'beilɛ o n'salaba. 21Twebɛlɛ outakela okana kɛnyikɛ nǎ kwenahɔnyinyɛ Ishilaɛli. Ela, lenɔ nǎ lusuku lwa botato tango biya binywa byaeteɛ. 22Eyǎka, bamwɛ bǎchana ba eoto yɛto betokakechɛ. Baya bǎchana beyɛlɛlɛ ham'mɛshi kɔsɛ o echwate, 23ela bashibangilɛ m'bele kwakɛ. Besuwelɛ na otokanina mwanɔ kɛte bakɛnji* bebahuminɛ na bebakaninɛ kɛte Yɛso kwemwɛkɔ. 24Ohwa, bamwɛ hawǐngi hɛto bekělɛ o echwate na bebangilɛ byɛnɛ baya bǎchana bekaninɛ. Bɔ lwabɔ, bashimɔninɛ m'bele kwakɛ.»
25Nǎ Yɛso kwekaninɛ baya balɔmbwɛ kɛte: «Bɛnywɛ bato bashi na lwɛ̌nyi, mitema kyɛ̌nyu kye bushitɔ wa owasha abelɔ biya byɛnɛ ŋanguchi* cha Abɛcha chekaninɛ. 26byabalěngyɛ Kilishito kohetele manɔ masoso yolo kokingela n'ta butukufu bwakɛ!» 27Ohwa, kwebakaninɛ binywa byɛnɛ ibikɔliwɛ yolo yakɛ n'ta Mikɔlɔ Kehaha. Kwetolelɛ o bitabɔ bya Musa, mpaka o bitabɔ bya ŋanguchi* chɔsɛ.
28Mɛngɔ mabebɛlɛ hɔka na keya mboka kyabebɛlɛ okya, Yɛso kweitilɛ nɛhɛ kohokelelela na lwɛndɔ. 29Ela ben'tɛndɛlɛlɛ kɛte: «Ebombo enɔ: nǎngo okya eyǎka, busuku bwesele hɔka.»
Obibyɔ, kwekingelɛ n'sɛsɛ na ochama nabɔ. 30Mɛngɔ mabebɛlɛ hasé m'oya, Yɛso kwekuhilɛ n'katɛ na oha Abɛcha buswachi, ohwa kwenɔkilɛ koya n'katɛ na obakabanyinya. 31Hɔka haya mɛ̌sɔ mabɔ mesuliyɛ na bem'maninɛ, ela Yɛso kwechiminɛ o mɛ̌sɔ mabɔ. 32Betolilɛ okaninana kɛte: «Mitema kyɛto kyaba na sasɔ mɛngɔ mɛnɛ kwǎba otokanina n'tela na ototɔtɔbɔlɛla Mikɔlɔ Kehaha.»
33Hɔka haya, baya balɔmbwɛ babele bechuilɛ na osuwela Yɛlusalɛma. Bebangilɛ baya bakikiwa* umi na komwɛchi ba Yɛso na bangɛ baeoto yabɔ basambanɛ hamwɛchi. 34Baya bɛnɛ besambanɛ bekaninɛ baya balɔmbwɛ babele kɛte: «Kěnɛ, Ɔlɔ kwakuka! Ata Shimɔni Kwam'mɔna!»
35Nǎ baya balɔmbwɛ babele bebakaninɛ byɔsɛ byɛnɛ byebahǐlɛ n'tela, na byɛnɛ bem'maninɛ Yɛso mɛngɔ makenɔkilɛ n'katɛ.
Yɛso kwatɔbɔɛla balɔmbwɛ bakɛ
(Mat 28.16-20; Mlk 16.14-18; Yɔa 20.19-23; Bkk 1.6-8)
36Mɛngɔ mɛnɛ baya balɔmbwɛ babelɛ bebɛlɛ bele obakanina, hɔka haya Yeso kɛ mǐnɛ kwetɔbɔɛ hawǐngi habɔ. Kwebasambelɛ kɛte: «Mobɛ na talala!»
37Baya balɔmbwɛ bɔsɛ betulumuɛ na bewasilwɛ na bɔ̌ba bwɛ̌nɛ, yolo belangilɛ okana bamɔná m'ishi. 38Ela Yɛso kwebabuchichɛ kɛte: «Lwɛ̌nyi lwan'chongoloa yolo yaé? Yolo ya é mwena matoba m'mitema kyɛnyu? 39Molɔlɛ masanda manyi na makolo manyi, i nɛnɛ konɔ kěnɛ! Mombabatɛ na mombɔnɛ, yolo m'ishi kushibaba na m'bele na mauta. Ela nɛnɛ mwambɔna nee nǎbyɔ#24.39 Yɛso kwekaninɛ bîya yolo balɔmbwɛ* bamɔnɛ mihunya kya misomale m'masanda makɛ na makolo makɛ. Kwebɛnjichɛ bawashɛ kěnɛ kɛte nǎ kɛ.» 40Ohwa okana biya, Yɛso kwebamɔnyinyɛ masanda na makolo makɛ.
41Baya balɔmbwɛ bebɛlɛ bashinawashá yolo ya sasɔ na okakelwa wabɔ. Obibyɔ,Yɛso kwebabuchichɛ kɛte: «Mwe na emwɛ eto ya oya hanɔ?» 42Bem'hɛlɛ ehende ya swé ya echɛ̌lɛ. 43Kwěkuhilɛ na kwělelɛ hambɛlɛ habɔ. 44Ohwa, kwebakaninɛ kɛte: «Mɛngɔ mandebɛlɛ nele hamwɛchi nɛ̌nyu, n'sambelɛ kɛte: ‹Binywa byɛnɛ byekɔliwɛ yolo yanyi n'ta m'benda* kwa Musa , na n'ta bitabɔ bya ŋanguchi na n'ta Saboli, byelěngyɛ owelela byɔsɛ.› »
45Nǎ Yɛso kwebasulilɛ lwɛ̌nyi lwabɔ yolo batɔtɔbɔlɛ Mikɔlɔ Kehaha. 46Eyǎka kwebakaninɛ kɛte: «Byebikɔliwɛ okana: Byelěngyɛ Kilishito* kososoɛ na masuku matato hanyuma ha owa wakɛ kokukɛ#24.46 Sɔmakwɛ Isaya 53; Hɔsɛa 6.2. 47Na ohetela chǐna lyakɛ, nǎ bekanina bato bɔsɛ kɛte balekiluchɛ na ohuma m'bobé bwabɔ, yolo balɛɛlɛlwɛ. Na bîya byetolelɛ Yɛlusalɛma. 48Bɛnywɛ nǎ tolɛhɔ twa bibi binywa. 49Na nɛnɛ nem'hilila koya minɛ Tata kwen'lakilɛ. Ela bɛnywɛ, motangɛ ochama m'mboka kya Yɛlusalɛma m'paka mɛngɔ mamwehɛwa boɔmɛ́ ohuma hakolo#24.49 Sɔmakwɛ Bikɔkɔ bya bakikiwa 1.4-5.»
Yɛso kwǎhɛla hakolo
(Mlk 16.19-20; Bkk 1.9-11)
50Ohwa, Yɛso bechuilɛ na balɔmbwɛ* m'mboka kya Yɛlusalɛma, na okya nǎbɔ hɔka na mboka kya Bɛtania. Habehǐlɛ haya kwetondolɛ mabɔ̂ makɛ hakolo, na obahalela. 51Mɛngɔ makebɛlɛ kwele obahalela, kwebashikilɛ, na kwekuhilwɛ hakolo. 52Bɔlwabɔ, ben'nyɛmbɛtɛlɛ. Ohwa, besuwelɛ Yɛlusalɛma m'osɛ̌lɛla wɛ̌nɛ. 53Masuku mɔsɛ bebɛlɛ n'ta lobongá* m'on'tɔna Abɛcha.
Currently Selected:
Lok 24: byi
Highlight
Copy
Compare
Share
Want to have your highlights saved across all your devices? Sign up or sign in
2025 Forum Communautairre des Traducteurs de la bible et Alphabetisation
