Lok 22
22
M'hungɔ kwa om'haka Yɛso
(Mat 26.1-5; Mlk 14.1-2; Yɔa 11.45-53)
1Halweǐlɛ lusuku lwa m'monda kwa mikatɛ kishikibiiwɛ n'shimi*, kôbuchiwa Pasaka*lwebɛlɛ hɔka, 2bahɛla ba bibole* na nɔmbɔchi cha Ndɔ* betolilɛ oɛba ndela kya om'hakya Yɛso, ela bebɛlɛ na bɔ̌ba bwa bato.
Yola kwakitabowa otambola Yɛso
(Mat 26.14-16; Mlk 14.10-11)
3Nǎ Ehengele kwen'kingelɛ Yola, minɛ kwebɛlɛ buchiwa Ishikaliyɔti. Koko Yola kwebɛlɛ komwɛ hawǐngi ha bakikiwa* umi na babele ba Yɛso. 4Koya Yola kwekělɛ oholechanya na bahɛla ba bibole* na bahɛla ba bilusha bɛnɛ bebɛlɛ ohɛmba lobonga, yolo ya ndela kya kebatambolela Yɛso. 5Besɛ̌lɛlɛ wɛ̌nɛ, na ben'kaninɛ kɛte bem'ha bomɔná. 6Yola kwekitabowɛ, na kwetolilɛ oɛba mɛngɔ mabɛnju maken'tambola Yɛso wabele, bila bato omana.
Yɛso kweholɔngya elewa ya Pasaka
(Mat 26.17-25; Mlk 14.12-21; Yɔa 13.21-30)
7Lusuku lwa m'monda kwa mikatɛ kishikibiiwɛ n'shimi* lwehǐlɛ. Loya lusuku nǎ lusuku lwɛnɛ bebɛlɛ ohaka bǎna ba miɔɔ, yolo ya m'onda kwa pasaka. 8Yɛso kwehililɛ Pɛtɛlɔ na Yɔana na obakanina kɛte: «M'bɛ̌kya otolɔngɛcha elewa ya Pasaka*.» 9Bem'buchichɛ kɛte: «Wabɛnja tokyɛ olɔngɛcha eya elewa ohe?» 10Kɛ kɛte: «Holechakwɛ: mɛngɔ mamwehiya m'mboka, mwebanga komwɛ̌ n'lomyana kwe n'tɛtɛ n'tɔndɔ kwa mǎte, môn'lamɛ m'paka o sɛsɛ kyakekingela. 11Na mon'kaninɛ koya minɛ keya sɛsɛ kɛte: ‹N'lɔmbɔchi kwabocha i ohé we yomba yakelela elewa ya m'monda kwa Pasaka hamwêchi na balɔmbwɛ bakɛ.› 12Kɛ kwěm'mɔnya yomba eolo ya hakolo ya elɔngiwɛ. N̂'ya nǎ mwamwelɔngɛcha elewa ya asaka!» 13Baya balɔmbwɛ* bekělɛ o keya mboka. Oya, bebangilɛ bito byɔsɛ bilɔngiwɛ byɛnɛ byebasambelɛ Yɛso. Nǎ byabelɔngichɛ elewá ya Pasaka*.
Elewa oɛngɛlɛcha ya Ɔlɔ
(Mat 26.26-30; Mlk 14.22-26; 1Kɔ 11.23-25)
14Hamehǐlɛ mɛngɔ ma oya, Yeso kweshaminɛ hamwɛ̂chi ná bakikiwa* bakɛ umi na babelɛ oya elewa. 15Kwebasambelɛ kɛte: «Nabɛnja wɛ̌nɛ oya ê elewa ya Pasaka hamwɛchi nɛ̌nyu, hambɛlɛ ha nɛnɛ ososoa! 16Yolo nehon'sambelá kěnɛ okana nishǐya eyaka ya pasaka, m'paka lusuku lwandeya n'ta Boɔlɔ bwa Abɛcha*.»
17Ohwa haya, Yɛso kwetɛtilɛ esɛngɔ ya livai, kwen'tɔninɛ Abɛcha, na okana kɛte: «Kohakwɛ ee esɛngɔ, mokabanyanyɛ. 18Yolo nan'kanina, nishǐnywa eyaka livai*, m'paka mɛngɔ mɛnɛ Boɔlɔ bwa Abɛcha* bwehiya.»
19Ohwa, Yɛso kwekuhilɛ n'katɛ na otɔna Abɛcha, ohwa otɔna Abɛcha, kwenɔkilɛ koya n'katɛ na okabanya o balɔmbwɛ bakɛ. Na okaná kɛte: «Konɔ nǎ m'bele kwanyi kwɛnɛ kwatambolwa yolo yɛnyu. Mobeoeta binɔ wa okɛngɛlɛcha.»
20Mɛngɔ mabehulɛ oya, Yɛso kwekuhilɛ esɛngɔ na obakanina kɛte: «Enɔ esɛngɔ i alakɔ ahya* a Abɛcha, ohetela mashí manyi mamwakeá yolo yɛnyu.
21Ela molɔlɛ! Koya minɛ kwetambola, nǎ nehoya nǎkɛ hamwɛ̂chi. 22Kěnɛ nɛnɛ Mwǎna kwa N'to nelewela olamana na byekaninɛ Abɛcha. Ela in'shicha wa koya minɛ kwetambola.» 23Nǎ betolilɛ obochana bɔka wabɔka kɛte i nanyi hawǐngi habɔ minɛ kwenaeta biya.
Pǎ cha ba Yɛso yolo ya bohɛla
24Ohwa, hawingi ha balɔmbwɛ ba Yɛso we huminɛ pǎ kɛte, i nanyi nǎ m'hɛla hawǐngi habɔ. 25Yɛso kwebakaninɛ kɛte: «Maɔlɔ ma bilɔngɔ mebakimanina bato babɔ wa oɔma. Na baya bɛnɛ be na boɔmɛ hakolo ha bato, bebalebocha "Basɔka" 26Ela bɛnywɛ mushibɛ oeta biya. Koya minɛ kwe m'hɛla hawǐngi hɛnyu, kolebeɛ nɛhɛ kɛ nǎ mwanyuwɛ. Na minɛ kohokimanina bangɛ kolebeɛ nɛhɛ kɛ nǎ n'kichi. 27Obibyɔ, i nanyi minɛ kwe m'hɛla oheta minǎkɛ hawingi ha banɔ babele? i koya minɛ kwen'shamɛ m'oya aɔ i koya kohom'ha? Atambɛ i koya minɛ kwen'chamɛ m'oya elewa! Ela Ata biya, nɛnɛ nee hawǐngi hɛnyu nɛhɛ n'kichi.
28Bɛnywɛ nǎ mwaihya ochama nanyi mɛngɔ mɔsɛ ma bikinjwa byanyi, 29Obibyɔ, nam'ha Boɔlɔ*, nɛhɛ byenɛ tata kwebopɛlɛ. 30Obibyɔ mwêya na onywa hamwɛchi nǎnyi m'Boɔlɔ bwanyi, eyaka bɛnywɛ nǎ mwechama m'bilemba bya boɔlɔ na mweha ateka biya bilɔngɔ umi na bibele bya Ishilaɛli.»
Yɛso kohokana kɛte Pɛtɛlɔ kwem'hanya
(Mat 26.31-35; Mlk 14.27-31; Yɔa 13.36-38)
31Yɛso kwekaninɛ Shimɔ Pɛtɛlɔ kɛte: «Shimɔ,Shimɔ! Holechaka! Ehengele kwem'hɛwɛ loosa lwa om'ota, nɛhɛ byɛnɛ byebaota nganɔ, yolo kon'tɔndɛ 32Ela nǎsaba yolo yɔbɛ, yolo washa lyɔbɛ wandele lishihongowɛ. Na mɛngɔ mawesuwelela, ohɛ bashiwɛnyu n'tema.» 33Pɛtɛlɔ kwen'kailɛ kɛte: «Ɔlɔ, nahwa olelɔngya wa okya nɔ̌bɛ n'kolé na ata owa nɔ̌bɛ.» 34Yɛso lwakɛ kɛte: «Pɛtɛlɔ, naokanina, lenɔ, hambɛlɛ ha akɔngɔ otoka, wepanya nyɛndɔ chitato, okana ushingiti.»
Olelɔngya yolo ya masoso
35Ohwa Yɛso kwebabuchichɛ balɔmbwɛ* bakɛ kɛte: «Mɛngɔ mandem'hililɛ, bila bomɔná na bila ahwaba na bila mikalabanda, mweholilwɛ eto?» Ben'kailɛ kɛte: «Nǎngo.»
36Nǎ Yɛso kwebakaninɛ kɛte: «Ela wa binɔ, koya minɛ kwe na hibomɔná kokohɛ, byɔka bîya koya minɛ kwe na ahwaba, na koya minɛ kushi na selete kokochɛ ngobɔ chakɛ, yolo kolekolɛ. 37Yolo, nan'kanina: byelěngyɛ bibi binywa byepiilɛ, byɛnɛ byebâba bikɔliwɛ m'Mikɔlɔ Kehaha kɛte: ‹Kwěbaliwɛ hamwɛchi na bilomɛ pamba#22.37 Sɔmaka Isaya 53.12.› Yolo, biya byekɔliwɛ yolo yanyi, byesele hɔka na ohiya oesula.»
38Balɔmbwɛ bakɛ ben'kaninɛ kɛte: «Ɔlɔ, lɔlaka hanɔ twe na panga chibele.» Kwebakaninɛ: «Bibi binywa byahulɛ hahɔ.»
Yɛso kohosaba o aɔnɔ a Mizɛituni
(Mat 26.36-46; Mlk 14.32-42)
39Yɛso kwehuminɛ haya, na kwehɛlilɛ o aɔnɔ a Mizɛituni nɛhɛ kɔlɔbɛchi kyǎkɛ. Balɔmbwɛ* bakɛ ben'laminɛ. 40Mɛngɔ makehǐlɛ ha eya ibu, kwekaninɛ balɔmbwɛ* bakɛ kɛte: «Sabakwɛ Abɛcha yolo mushikingelɛ m'bikinjwa.»
41Ohwa, kweshikanɛ nabɔ olahu hinɛ wa olaha wa n'to otɛla lewɛ. Kwebungilɛ machú hasé, na kwetolilɛ osaba Abɛcha kɛte: 42«Tata, nambɔ webɛnja, opunyinyɛ ée esɛngɔ ya masoso olahu nanyi! Ata bînɔ ushibɛ obɛnja wanyi, ela byawebɛnja nǎ byabɛ.»
[ 43Ohwa n'kɛnji kwechǔlɛ ohumá hakolo yolo ya om'ɔmya n'tema. 44Yɛso kwebɛlɛ n'ta anyɔtɛla hɛ̌nɛ, kwekelelelɛ osaba Abɛcha na oɔma wɛnɛ, yǒta yɛnɛ yɛbɛlɛ om'uma yɛbɛlɛ nɛhɛ matata ma mashí mebɛlɛ okwa hasé.]
45Ohwa osaba, kwesuwelɛ ha ibu hɛnɛ yebɛlɛ balɔmbwɛ* bakɛ. Kwebabangilɛ babetɛ, yolo beiminywɛ ná onyɔngɔtɛla. 46Kwebakaninɛ kɛte: «Yolo ya é mwabeta? Byowakwɛ na mosabɛ Abɛcha, yolo mushikingelɛ m'bikinjwa.»
Yɛso kwawaswa
(Mat 26.47-56; Mlk 14.43-50; Yɔa 18.3-11)
47Mɛngɔ mɛnɛ Yɛso kwebɛlɛ kwele otɔkɔma, eoto ya bato yetɔbɔɛ. Yola, komwɛ kwa bakikiwa umi na babele nǎ kwebalɔmbɔlɛ. Kwasɛninɛ hɔka na Yɛso, yolo ya on'yambelela. 48Ela Yɛso kwem'bochichɛ kɛte: «Yola! We, watambola nɛnɛ Mwǎna kwa N'to m'oyambelela?»
49Balɔmbwɛ bakɛ habemɔninɛ byɛnɛ byehobɛnja oetea, bem'buchichɛ: «Ɔlɔ, twenabachuta na selete chɛto?» 50Na komwɛ hawǐngi habɔ hɔka haya, kwealilɛ n'kichi kwa ebolɛ m'hɛla leto lya olomɛ. 51Ela Yɛso kwekaninɛ kɛte: «Lɛakwɛ bibyɔ.» Kweuminɛ litó lya koya n'to, na kwem'hɔnyinyɛ.
52Ohwa, Yɛso kwekaninɛ bahɛla ba bibole, na bahɛla ba bilusha bɛnɛ bebɛlɛ ohɛmba lobonga, na baongo ba Bayola bɛnɛ bechǔlɛ om'wata kɛte: ‹‹Yolo yaé mwanjula na maselete na toté nɛhɛ nɛnɛ nee elomɛ pamba? 53Masuku mɔsɛ nibɛlɛ nǎnyi n'lobonga, na mushimbwatilɛ. Ela manɔ nǎ mɛngɔ mɛnyu, eyǎka nǎ mɛngɔ ma boɔmɛ bwa n'tɔ.»
Pɛtɛlɔ kwam'hanya Yɛso
(Mat 26.57-58,69-75; Mlk 14.53-54,66-72; Yɔa 18.12-18,25-27)
54Ohwa, baya bato bem'watilɛ Yɛso. Bekělɛ nakɛ o sɛsɛ kya m'hɛla kwa bibolɛ *. Pɛtɛlɔ kwebɛlɛ on'lama wa kɔ.
55Ahya ebɛlɛ alamiwɛ hawǐngi ha lakala lya m'hɛla kwa bibole*, Pɛtɛlɔ kweshaminɛ m'ohɔta ahya hamwɛchi nǎbɔ. 56Komwɛ hawǐngi ha bakichi bǎchana hakem'mɔninɛ pɛtɛlɔ kwen'shamɛ hɔka na ahya, kwen'lɔlilɛ wɛ̌nɛ na okana: «Koko n'to lwakɛ kwebɛlɛ hamwɛchi yɛso.» 57Ela Pɛtɛlɔ kweɛminɛ na okana kɛte: «Kɔkwɛ m'achana! Nɛnɛ nishikiti koko n'to!»
58Mɛngɔ manɛ oheta, kongɛ n'to kwem'mɔninɛ Pɛtɛlɔ, na kwen'kaninɛ kɛte: «Kɔkwɛ wee komwɛ kwǎbɔ ka!» Ela Pɛtɛlɔ kwekailɛ: «Nǎngo! Nɛnɛ nishi komwɛ kwǎbɔ.»
59Ohwa oheta olanga saa kemwɛchi, kongɛ n'to kwehyelelɛ Pɛtɛlɔ kɛte: «Chikelwɛ koko n'to kwebɛlɛ hamwɛchi na yɛso ka, ebalɔ kɛ lwakɛ i n'to kwa Galilaya!» 60Ela Pɛtɛlɔ kwen'kailɛ kɛte: «Ee Kɔkwɛ! Nishikiti yɛnɛ ohobɛnja otɔkɔma!» Mɛngɔ mɛnɛ kwebɛlɛ kwele otɔkɔma biya, hɔka haya akɔgɔ nôtoka. 61Hɔka haya, Ɔlɔ kwekalowɛ, na on'lɔla Pɛtɛlɔ ebangabanga. Nǎ Pɛtɛlɔ kwehɛngɛlɛchɛ biya byɛnɛ Ɔlɔ kwen'kaninɛ kɛte: «Lenɔ, hambɛlɛ ha akɔngo otoka, wêba wesele m'pǎnyɛ nyɛndɔ chitato.» 62Nǎ hɔka haya Pɛtɛlɔ kwehuminɛ haya, na kwetolilɛ olela wɛ̌nɛ wa anyɔngɔtɛla.
Bato ban'towa Yɛso na om'hola
(Mat 26.67-68; Mlk 14.65)
63Baya bato bɛnɛ bebɛlɛ ohɛmba Yɛso, bebɛlɛ on'sɛa na om'hola. 64Bem'ahambilɛ mɛ̌sɔ, na om'bocha kɛte: «I nanyi minɛ kweohola? Langolaka tomɔnɛ!» 65Ben'tɔkɔmɛ bingɛ binywa bǐngi bya on'toa.
Yɛso hambɛlɛ ha makoko ma Bayaole
(Mat 26.59-66; Mlk 14.55-64; Yɔa 18.19-24)
66Ahehǐlɛ ham'mɛshi kɔsɛ, makoko* ma Bayola na bahɛla ba bibole* na nɔmbɔchi cha ndɔ* besombelɛ. Bechulɛ na Yɛso hambɛlɛ ha makoko* mabɔ. 67Bɔ nôm'bocha kɛte: «Kɔkwɛ nǎ Mashiya*? Otokaninɛ!» Kɛlwakɛ kɛte: «Nambɔ nan'kanina, mushimbwasha, 68ata nambɔ naom'bocha enywa eto, mushingaa. 69Ela hɔka hanɔ, Nɛnɛ Mwǎna kwa N'to nekya oshama olomɛ wa Abɛcha kwe na boɔmɛ́.»
70Bɔsɛ bem'buchichɛ kɛte: «Kɔkwɛ nǎ Mwǎna kwa Abɛcha?» Kwebakailɛ: «Bɛnywɛ nǎ mwakana.»
71Ohwa, bekaninɛ bɔka wa bɔka kɛte: «Tushilěngyɛ oɛba angɛ alɛhɔ yolo ya koko n'to! Ebalɔ bɛswɛ bɛ̌nɛ twaholecha binywa byakeotɔkɔma.»
Currently Selected:
Lok 22: byi
Highlight
Copy
Compare
Share
Want to have your highlights saved across all your devices? Sign up or sign in
2025 Forum Communautairre des Traducteurs de la bible et Alphabetisation
