Lok 17
17
Yɛso kwatɔkɔma yolo ya bobe na olɛɛlɛla
(Mat 18.6-7; 21.22; Mlk 9.42)
1Ohwa Yɛso kwesambelɛ balɔmbwɛ* bakɛ kɛte: «Binywa bya okusha bato m'bobe byekelelela ka. Ela i inshicha wa koya n'to minɛ kwekingecha bangɛ m'bobe. 2Byenabɛlɛ bibɛnju n'to nɛhɛ koko kohambwɛ lewɛ leolo o ɔshi na on'tɛla m'echiba, naole kɛ kokoshɛ komwɛ hawingi ha baba bǎnyuɛ m'bobe.
3«M'bɛ oshama lwɛngɛlolomɛ! Nǎmbɔ inshiwɛnyu kwaolobela, m'hanakɛ, na kwaholekilocha, on'lɛ̌lɛlɛ. 4Nǎmbɔ kwaolobela nyɛndɔ njwe wa lusuku lomwɛ̌chi, na kwahoochwa ɔbɛ olekilocha nyɛndɔ njwe, on'lɛɛlɛlɛ ka.»
Yɛso kohosɔmya yolo ya washa
5Ohwa biya, bakikiwa* ben'sambelɛ Ɔlɔ okana: «Otobuchichɛ washa.» 6Kɛ lwakɛ kɛte: «Nǎmbɔ washa lyɛnyu lyenabɛlɛ nɛhɛ hiekuma hya halalali, mwenasambela koko n'te kɛte kocholeɛ kokyɛ oletɛla m'echiba, kwenam'washa.
N'kelɔ kwa n'kichi
7Yɛso kwekaninɛ eyaka kɛte: «Komwɛ n'to hawingi hɛnyu kwenaba na n'kichi kwakɛ kwehotɛma o lobala aɔ okonga bisukanywa byakɛ. Koko n'kichi kwahosuela o mabala, wé, ɔlɔ lyakɛ lyenan'sambela kɛte koshamɛ na kotolɛ oya? 8Nǎngo! Binɔ nǎ byakenan'kanina: ‹Tangaka opěla elewa, ohwa sɔmbɔlɔchaka ngobɔ yolo opakolelɛ. Ohwa biya, na kɔkwɛ wêya na onywa.› 9Wé, moholanga ɔlɔ lya koya n'kichi lyenaɔsha oha koya n'kichi boswachi, ebalɔ kwaeta biya byɔsɛ byɛnɛ kwan'sambela? Nǎngo! 10Bɛnywɛ lwɛnyu i bîbi ka. Mwahoeta byɔsɛ byɛnɛ Abɛcha kwan'kanina oeta, mobɛ okana bînɔ: ‹Bɛswɛ twee bakichi bonɛnɛ ka. Tohoeta n'kelɔ byelěngyɛ bɛswɛ oeta ka.› »
Yɛso kwahɔnya bawa boshɔndɔ umi
11Yɛso hakebɛlɛ n'ta lwendɔ okya Yɛlusalema, kwehitilɛ n'ŋumba kya ebalɔ ya Samalia na ya Galilaya. 12Hakekingelɛ n'kemwɛ mboka, bato umi bɛnɛ bawa boshɔndɔ bechǔlɛ osambana nǎkɛ#17.12 Olamana na byɛnɛ M'benda kwa Musa kwebaba m'okana, n'to minɛ kwe na boshɔndɔ, kushibɛlɛlěngyɛ osɛna hɔka na bangɛ bato. Sɔmaka Balawi 13.46. Bekimanɛ wa kɔ, 13na otola okololoa kɛte: «Ee N'nɔmbɔchi Yɛso, tomɔnɛnɛ kɛnɛ!»
14Mɛngɔ mɛnɛ Yɛso kwebamɔninɛ, kwebasambelɛ kɛte: «Mokyɛ olemɔnya o bibole*.»#17.14 Sɔmaka Balawi 14.2-3 Habebɛlɛ bele n'tela m'okya obɔ, behɔninɛ. 15Komwɛ hawǐngi habɔ, hakemɔninɛ kɛte kwahɔna, nǎ kwesuelɛ wa Yɛso m'on'tɔna Abɛcha wa lete leolo. 16Kweletɛlilɛ hase ombɛlɛ wa makolo ma Yɛso, pala na m'bitɛtɛ, kwem'hɛlɛ boswachi. Koya n'to kwebɛlɛ N'samalia. 17Nǎ yɛso kwekaninɛ kɛte: «We, atambɛ bashɔndɔ umi nǎ bahɔ̂nyiwa! Baya bangɛ lyahabola beohé? 18Ushiomɔnɛa kongɛ kwasuela on'tɔna Abɛcha, ela i konɔ kushi N'yola ka?» 19Ohwa kwen'sambelɛ koya N'samaliya kɛte: «Kimanaka, okyɛ na talala. Washa lyɔbɛ lyaohɔnya.»
Ochwa wa Boɔlɔ bwa Abɛcha*
(Mat 24.23-28,37-41)
20Ohwa haya, Bafalisayɔ* bem'buchichɛ yɛso kɛte: «Boɔlɔ bwa Abɛcha* bwechwa mɛngɔ naké?» Kwebakailɛ kɛte: «Boɔlɔ bwa Abɛcha* bushǐchwa nɛhɛ eto ya omɔnɛa. 21Bato bashikana kɛte: ‹Mɔnakwɛ, nǎ bonɔ bwe hanɔ!› Aɔ ‹Nǎ boya bwe hâya!› Hulichiwɛ! Boya Boɔlɔ bwesele hawǐngi hɛnyu.»
22Ohwa, Yɛso kwesambelɛ balɔmbwɛ* bakɛ kɛte: «Mɛngɔ mehochwa, mamwebɛnja ombɔna nɛnɛ Mwǎna kwa N'to ata lusuku lomwɛ̂chi, ela mushimbɔna. 23Na bato ben'sambela kɛte: ‹Lɔlakwɛ, kwee haya!› Aɔ ‹Lɔlakwɛ, kwe hanɔ!› Ela bɛnywɛ mushitɔɔ̌ndɛ osenena haya. 24Ebalɔ lusuku lwɛnɛ nɛnɛ Mwana kwa N'to nesuela, nemɔnea nɛhɛ ahɛnyuhɛnyu lwebamɔnɛa a hakolo wa olamia ebalɔ yɔsɛ. 25Ela hambɛlɛ ha biya byɔsɛ, nelěngyɛ nesosoɛ wɛ̌nɛ, na neɛmwɛ na bato ba enɔ elɔngɔ. 26Nɛhɛ byebɛlɛ m'mɛngɔ ma Nɔa, nǎ byeba mɛngɔ mɛnɛ nɛnɛ Mwana kwa N'to nesuela. 27Ebalɔ m'maya masuku, bato bebɛlɛ oya na onywa, bebɛlɛ okɔnda na okɔnjwa nǎ byewelelɛ mɛngɔ ma Nɔa okingela safina. Ohwa, pela kyechǔlɛ na ochimya bato bɔsɛ.#17.27 Sɔmakwɛ Botangi 6.5-22; 7.1-23 28Eyaka byebá byɔka biya nɛhɛ mɛngɔ ma Lɔti. Bato bebɛlɛ oya na onywa, bebɛlɛ okocha na okola, bebɛlɛ ǒna na okubaa. 29Ela lusuku lwehuminɛ Lɔti m'mboka kya Sɔlɔma, Abɛcha kwekushishɛ ahya ebɛlɛ nɛhɛ mbula kya mawɛ ohuma hakolo. Aya ahya echiminyɛ bato bɔsɛ.#17.29 Sɔmakwɛ Botangi 18.20-33; 19.1-25 30Biya nǎ byeba lusuku lwandesuela nɛnɛ Mwǎna kwa N'to.
31«Loya lusuku, kɛkɛsɛ kwêbá hakolo ha sɛsɛ kyakɛ, kushisalɛ eyaka okoha bito byɛnɛ bye n'ya. Byɔka bîya, koya kwebá olobala lwakɛ, kushisuelɛ eyaka o mboka. 32Moɛngɛlɛchɛ byehǐlɛ m'achi kwa Lɔti.#17.32 Sɔmaka Botangi 19.26 33Kɛkɛsɛ kweɛba ohɔnya mwɛkɔ kwakɛ, kwekochiminya. Ela, kɛkɛsɛ minɛ kwekochiminya, kwekohɔnya. 34Nehon'sambela kɛte m'boya busuku, bato babele bebá babetɛ hamwɛ̂chi, komwɛ kwětɛtwa na kongɛ kweshikwa. 35Bǎchana babele bebá oswa hamwɛ̂chi, komwɛ kwětɛtwa na kongɛ kweshikwa. [ 36Balomyana babele bebá n'lobala, komwɛ kwětɛtwa na kongɛ kweshikwa.] »
37Haya, balɔmbwɛ* bakɛ bem'buchichɛ kɛte: «Ɔlɔ, bibi binywa byeetea ohé?» Kwebakailɛ kɛte: «Haya hɛnɛ hee etomba na hɛnɛ hebakilola maobe.»
Currently Selected:
Lok 17: byi
Highlight
Copy
Compare
Share
Want to have your highlights saved across all your devices? Sign up or sign in
2025 Forum Communautairre des Traducteurs de la bible et Alphabetisation
