Lok 12
12
Osɔmya yolo ya bubisakolo
(Mat 10.26-27)
1Mɛngɔ mɛnɛ Yɛso kwebɛlɛ osɔmya bato, eoto eolo ya bato yesambanɛ na bebɛlɛ ohinana yolo bebɛlɛ bɛ̌ngi. Yɛso kwetangilɛ okanina bakikiwa bakɛ kɛte: «Mobɛ lwɛngɛlolomɛ na n'shimi* kwa Bafalisayɔ, i okana bubisakolo bwabɔ. 2Eto yɔsɛ yɛnɛ yeibisiwɛ, yebisulwa, na eya yêteɛ m'bubisɔkɔlɔ yemanyiwa. 3Obiya, biya byɔsɛ bya mwǎtɔkɔma n'n'tɔ, bato bebiholecha n'chǒba, na biya bya mwekaninana oyomba ehambwɛ, byekaniwa lete leolo hakolo sɛsɛ.»
Koya kwelěngyɛ osenwa
(Mat 10.28-31)
4Ohwa, Yɛso kwekaninɛ eyǎka bato kɛte: «Nan'kanina bɛnywɛ makɛnda manyi: mushibɛ na bɔ̌ba o baya benahaka m'bele, ela ohwa ohaka, bashinaɔsha oeta engɛ eto. 5Nem'mɔnya koya minɛ kwamwenaba omɔna bɔ̌ba: mobɛ na bɔ̌ba bwa Abɛcha minɛ kwenaɔsha osapa mwɛkɔ kwa n'to, na ohwa okosapa, kwe na boɔmɛ́ bwa on'tɛla n'ta Jɛanamu. Chikelwɛ nan'kanina, koya nǎ mwelěngyɛ oba na bɔ̌ba wakɛ!
6«Mushiomana kɛte bisɔlɛ bitanɔ byebakolwa bomɔná bobele ka? Ela Abɛcha kushibakibelela ata esɔlɛ emwɛs. 7Ata chɛnɛ njuli cha o miswɛ́ kyɛnyu; Abɛcha kwem'mǎnɛ i chinga. Yolo ya bîya mushibɛ na bɔ̌ba, yolo bɛnywɛ mwebahetɛ bisɔlɛ onyɛma wa Abɛcha.»
Om'washa Yɛso aɔ om'hanya
(Mat 10.32-33; 12.32; 10.19-20)
8Yɛso kwekaninɛ eyǎka kɛtɛ: «Nan'kanina kěnɛ, n'to kɛkɛsɛ minɛ kwewasha n'lakala kɛte kɛnyikɛ i n'lɔmbwɛ kwanyi, na nɛnɛ Mwǎna kwa N'to něm'washa hambɛlɛ ha bakɛnji* ba Abɛcha. 9Ela koya mine kwǎpanya hambɛlɛ ha bato, na nɛnɛ Mwǎna kwa N'to nem'hanya hambɛlɛ ha bakɛnji ba Abɛcha. 10N'to kɛkɛsɛ kwěkana enywa ebe yolo yanyi nɛnɛ Mwǎna kwa N'to kwelɛ̌lɛlwa. Ela koya minɛ kwetoa N'tema Kohaha kɛ kushilɛ̌lɛlwa ata hinɛ. 11Habeba okya nɛnyu yolo motɔtɔlɛ n'ta mwa mashinagɔgi* aɔ hambɛlɛ ha bahɛla aɔ hambɛlɛ ha maɔlɔ, mushibɛ na bɔ̌ba yolo ya biya byamwekaa aɔ byɛnɛ bya mwetɔkɔma. 12Ebalɔ m'maya mɛngɔ, N'tema Kohaha kwem'bululila bya mwelěngyɛ okaa aɔ otɔkɔma.»
Eta ya mbɔna minɛ kushi na lwɛ̌nyi
13Komwɛ n'to hawǐngi ha eoto ya bato kwen'kaninɛ Yɛso kɛte: «N'lɔmbɔchi ondɔkɔmɛnɛ wa n'shiwɛto kokabanyinyɛ yanyi eba o bohyanyi bwetoshikilɛ sɛto.» 14Yɛso kwen'kailɛ: «Kenda lyanyi, i nanyi kwambea nɛnɛ oba aloleya hawǐngi hɛnyu aɔ yolo ya on'kabanyinya bomɔná bwɛnyu?»
15Nǎ Yɛso kwekaninɛ bato bɔsɛ kɛte: «Mobɛ lwɛngɛlolomɛ na ǒnda bomɔná. Yolo mwɛkɔ kwa n'to kushi kuhutanyɛ na bomɔná bwakɛ, ata nǎmbɔ kwenabá na bomɔná bwǐngi.»
16Ohwa, Yɛso kwebakaninɛ ê eta: «Webɛlɛ komwɛ mbɔna minɛ kwebɛlɛ na mabala makɛ mɛnɛ mebɛlɛ na n'kembo kwǐngi. 17Koya mbɔná kwetolilɛ olanga n'ta n'tema kwakɛ na olebocha: ‹Naetɛ ě? Nishi na ibu yandebeela n'kembo kwanyi.› 18Nǎ kwekaninɛ kɛte: «Nikiti byandêta: nebɛla tohɔmbɔ twanyi na nekubaa tôngɛ tǒlo tǒlo oheta tôya. N'ya, na mwandebea mikembo kyanyi kyɔsɛ na bǐngɛ bito byanyi. 19Ohwa, nelekanina nɛnɛ mǐnɛ kɛte: ‹Hanɔ nee na bomɔná bwǐngi bwandeya miâ kǐngi. Obinɔ, n'nalehɔ̂cha, neyɛ, nenywɛ na nebɛ na sasɔ!›
20Ela Abɛcha kwen'kaninɛ: ‹Kokwɛ ehinda, bonɔ busuku nekoha n'tema kɔbɛ. Na biya bito byɔbɛ byɔsɛ byawele n'lebeelɛ byeba bya nanyi?› » 21Yɛso kwekaninɛ eyǎka binɔ: «Bibi Nǎ byebabá wa n'to kwe olebeela bomɔná bwakɛ, yolo ya kɛ buchima, ela i mbuchu hambɛlɛ ha Abɛcha.»
Oba na utakelɔ wa Abɛcha
(Mat 6.25-34)
22Ohwa, Yɛso kwekaninɛ balɔmbwɛ bakɛ kɛte: «Yolo ya biya nan'kanina kɛte: mushibɛ onyɔngɔtɛlɛla elewa yolo ya mwɛkɔ kwɛnyu, aɔ onyɔngɔtɛlɛla ngobɔ yolo ya mibele kyɛnyu. 23Yolo mwekɔ kwɛnyu nǎ kwé konyɛmu wɛ̌ne oheta elewa, na mibele kyɛ̌nyu nǎ kye kenyɛmu wɛ̌ne oheta ngobɔ. 24Monakwɛ eta ya bǐmpole: Bishibaona, bishibakembola eyǎka bishibabea elewa na bishibaba na ahɔmba. Ela Abɛcha kwebabalesha. Obibyɔ, mushibamanɛ kɛte bɛnywɛ mwe banyɛ̌mu oheta bǐmpole! 25Ushi n'to kɛkɛsɛ hawǐngi hɛnyu kwenaɔsha otɛtɛa mɛngɔ manɛ o mwɛkɔ kwakɛ. 26Nambɔ mushiɔ̌sha oeta hieto hinɛ nɛhɛ hiya, obibyɔ, yolo yaě mweholetɛnja na bingɛ bito?
27Monakwɛ byɛnɛ asoso byaebatɔta, ashioeta n'kelɔ wala olelɔngɛcha ngobɔ. Ela nan'kanina, ata ɔlɔ sɔlɔmɔnɔ m'bombɔna bwakɛ bɔsɛ, kushichwalilɛ ngobɔ kebɛnju nɛhɛ anɔ asoso. 28Byǎnyi bya m'mabala bye omɔnɛa lênɔ na m'mɛshi kwakɛ byetɛlwa o ahya, ela Abɛcha kwebabichuya chibɛnju. I we kushina n'chuya bibɛnju, bɛnywɛ bé na washá lenɛ?
29Mushibeoletɛnjɛ m'oɛba byamwêya aɔ byamwênywa. 30I bashibawashɛ Abɛcha na bato ba enɔ ebalɔ nǎ bebaɛba biya, bila oimwa. Ela bɛnywɛ, mwe na Tata minɛ kwekiti byɔsɛ byamwehobɛnja. 31Obibyɔ, bɛnywɛ motangɛ oɛba Boɔlɔ bwa Abɛcha, na kɛ kwem'buchicha bito byɔsɛ byamweobɛnja.
32«Mushibɛ oshama na bɔ̌ba bɛnywɛ eoto enɛ! Yolo sɛnyu kwabɛnja om'ha boɔlɔ bwakɛ.»
Bombɔná hakolo
(Mat 6.19-21)
33Yɛso kwekaninɛ eyǎka kɛte: «Mokochɛ bomɔná bwɛnyu bɔsɛ. Na chiya falanga mohɛ chɔ bambuchu. Molelɔngɛchɛ bǒmbɛ bwɛnɛ bushina ahwaba ɛnɛ ashiachibowɛ, na mobeɛ bomɔná bwɛnyu hakolo hɛnɛ bushichimina. Oya wɛnɛ bɛ̌bi bashibahiya wala bichimu bishinatɔkya. 34Yolo, haya hɛnɛ he bǒmbɛ bɔbɛ, nǎ hɛba n'tema kɔbɛ.»
Bakichi bɛnɛ be lwɛngɛ lolomɛ
35Yɛso kwekaninɛ eyǎka kɛte: «Mobɛ oshama lwɛngɛ lolomɛ m'owɛnya aleɔmɔ (n'kaba) n'lobonda, na yɛ̌ngɛ yɛnyu yebɛ olama. 36Mobɛ nɛhɛ bakichi bɛnɛ beohɛmba minɛ sɛsɛ m'paka mɛngɔ makesuwela o lohangwɛ, yolo hɔka hâya, ban'sulilɛ n'changɔ hake ɔkɔla. 37Komba o bakichi bɛnɛ mɛngɔ mesuwela ɔlɔ lyabɔ, kobabangɛ be mɛ̌sɔ! Nan'kanina kěnɛ koya ɔlɔ kwelehamba n'kaba n'lobonda, na obachamya hase na obaha elewa. 38Komba o baya bakichi ata nâmbɔ leya Ɔlɔ lyabɔ lyahosuwela m'bwǐngi na busuku aɔ ham'hɛshi kɔsɛ na obabanga beele mɛ̌sɔ!
39«Manakwɛ binɔ: nâmbɔ minɛ sɛsɛ kwenamaninɛ mɛngɔ mɛnɛ mechwa mǐbi, kushinalɛilɛ sɛsɛ kyǎkɛ obɛlwa. 40Na bɛnywɛ molelɔ̌ngyɛ, yolo nɛnɛ Mwǎna kwa N'to nechwa mɛngɔ mɛnɛ mushiolanga.»
N'kichi n'sɔka na N'kichi m'bé
(Mat 24.45-51)
41Nǎ Pɛtɛlɔ kwen'buchichɛ Yɛso kɛte: «Ɔlɔ, eya eta ya wǎ eta i yolo yɛto ka, aɔ i yolo ya bato bɔsɛ?» 42Ɔlɔ kwen'kailɛ kɛte: «Nanyi nǎ n'kichi n'sɔka na kwa lwɛ̌nyi? I koya minɛ ɔlɔ lyakɛ lyam'bea ohɛmba sɛsɛ, yolo kokabanyinyɛ bǎngɛ bakichi elewa yabɔ, mɛngɔ mɛnɛ melěngyɛ? 43Komba wa koya n'kichi minɛ nambɔ ɔlɔ lyakɛ lyahosuwela lyem'bangɛ kohoeta biya. 44Chikelwɛ lea Ɔlɔ lyakɛ lyem'bea oba m'hɛla yolo kokongɛ bomɔná bwakɛ bɔsɛ.
45«Ela nâmbɔ koya n'kichi kwatola oletɔkɔmɛna kɛ mǐnɛ okana: ‹Ɔlɔ lyanyi lyasenga osuela.› Hanyuma na otola ohola bakichi nakɛ, balomyana na bǎchana, na oya na onywa na oɔlwa, 46ɔlɔ lyakɛ lyesuwela lusuku na mɛngɔ mɛnɛ kushikiti, kwem'ha koya n'kichi malipizi mabe na om'bea lǒbe lomwɛ̌chi na baya bakichi babé.
47«N'kichi minɛ kwem'mǎnɛ byɛnɛ ɔlɔ lyakɛ lyehobɛnja, ela kushiooeta byakelěngyɛ oeta, lea Ɔlɔ lyakɛ lyem'hola wɛ̌nɛ. 48Ela koya n'kichi minɛ kweeta byɛnɛ bishilěngyɛ wa ushiomana byɛnɛ byehobɛnja ɔlɔ lyakɛ, kweholwa hinɛ. Koya minɛ kwahɛwa bǐngi nǎ kwěsabwa bǐngi, na koya minɛ kwahɛwa bǐngi wɛ̌nɛ nǎ kwesabwa bǐngi wɛ̌nɛ.
Yɛso nǎ ebalɔ ya okabana wa bato
(Mat 10.34-36)
49Yɛso kwǎkana eyǎka kɛte: «Nechǔlɛ olamya ahya m'ebalɔ na nehobɛnja, abe alǎmɛ! 50Nelěngyɛ ohɛwa lochundɔ na n'nabɛnjichɛ loya lochundɔ lowelelɛ! 51Moholanga nechǔlɛ oshika talala m'ebalɔ? Nǎngo! I okabanya! 52Otola hanɔ, lobotɔ lwa bato batanɔ lwekabana, batato bebá lǒbe lwabɔ, na babele lǒbe lwabɔ. 53Tata kushiholechanya na mwanǎkɛ, na mwǎna lwakɛ kushiholechanya na sakɛ, m'ma kushiholechanya na enyundu yakɛ, na ɛnyundu lwayɔ, ishiholechanya na n'nakɛ, m'ma boɔ kushiholechanya na m'achi kwa mwanǎkɛ, na m'achi kwa mwǎna lwakɛ, kushiholechanya na n'nakɛ boɔ.»
Omana mɛngɔ
(Mat 16.2-3)
54Yɛso kwekaninɛ eyaka eya eoto ya bato kɛte: «Mɛngɔ mamwebamɔna lisu lyahohɛla uhuma wɛnɛ webakya chǒba (ngelelɔ), haya mwebakana kɛte: ‹Mbula kyelɔa, na kěnɛ kyebaloa.› 55Hamwemɔna n'naka kwa kusini kwahochwa kwǐngi, mwebakana: ‹Weba yǒta›, na byeetea byɔka biya. 56Bɛnywɛ tolombe ndokecha! Mwebamǎnɛ olangola n'naka wa omana byebaba ebalɔ na kolo. Yolo yaě mushinaɔsha omana bito bya manɔ mɛngɔ?»
Oholechanya na amango ɔbɛ
(Mat 5.25-26)
57Yɛso kwekaninɛ eyǎka kɛte: «Yolo yaě mushinalealela bɛnywɛ bɛ̌nɛ eto esɔka yemwelěngyɛ oeta? 58Nambɔ n'komanyi nɔbɛ kwaohicha o mashitaki na mohokya bɛnywɛ bɔsɛ o tololeya, byenabɛlɛ bisɔka moholechanyɛ nǎkɛ mɛngɔ mɛnɛ mwele n'tela. Nambɔ ushioeta biya, koya n'to kwe ohicha o tololeya, na tololeya tweotambola o bamishipala, na bamishipala beotɛla n'kole. 59Kěnɛ naokanina kɛte: ‹Ushihuma n'lea kole, m'paka hawehwa olepa bomɔná bwa isula.› »
Currently Selected:
Lok 12: byi
Highlight
Copy
Compare
Share
Want to have your highlights saved across all your devices? Sign up or sign in
2025 Forum Communautairre des Traducteurs de la bible et Alphabetisation
