Marɨko 11
11
Yesʉ ɨngɨra mo muyi w'ɨYerʉsalemʉ
(Mat 21:1-11; Luk 19:28-40; Yoa 12:12-19)
1Yesʉ n'abɨga bʉwe mobahika hofɨ n'omuyi w'ɨYerʉsalemʉ, ko mʉnda w'omuyi w'ɨBetefake na w'ɨBetanɨa, hofɨ n'ekɨthwa ky'eMiseituni. Yesʉ mwathʉma babɨrɨ b'oko bɨga bʉwe. 2Mwabwɨrabo athɨ: «Mʉgende mo muyi owalɨ embere senyu. Mo ndambi mwabya mwahika mʉwo, mweya kyana kya pʉnda kihangirwe, na kɨthahera kyathashambwako na mʉndʉ. Mʉmɨnʉlekyo na mʉnyɨretherekyo hano. 3Na mʉndʉ amababʉtsya athɨ: “Bʉshana na ki ʉmʉkola muthyo? Mʉmʉshʉbɨtsye mʉthɨ Nyinya-kowethʉ alayire kw'ɨkolesakyo, ashʉbʉtsyakyo tsʉba.”»
4Abɨga abo mobagenda, mobeya ekyana ky'epʉnda ekyo nɨ kihangirwe embʉga, hofɨ n'oluyi lwa nyʉmba emʉsɨke w'enzɨra. Babere balɨ abahangʉlakyo, 5bagʉma mo bandʉ bo babyaga aho mobabʉtsyabo bathɨ: «Imwe! Bʉshana na ki omʉhangʉla ekyana ky'epʉnda eki?» 6Mobashʉbɨtsyabo nga ko Yesʉ athabwɨrabo. N'abandʉ abo mobalikabo bagende. 7Mobalethera Yesʉ y'ekyana ky'epʉnda n'ɨshesha esongɨmba sabo so kʉkyo. Na Yesʉ mwikala kʉkyo#11:7 Soma Sakarɨa 9:9.. 8Bandʉ bangɨ mobashesha esongɨmba sabo mo nzɨra, n'abandɨ mobayatsa mathahɨ w'emɨthɨ nabo mobasheshawo mo nzɨra#11:8 Ɨshesha esongɨmba so mo nzɨra: Abayuta bagenda abakola bathyo balɨ abakokya mwamɨ kʉtse mʉndʉ mʉkʉlʉ. bʉshana Yesʉ atsʉke kʉwo. 9Abandʉ bo bathangaga Yesʉ y'embere n'abo bamʉkwamaga enyuma, mobathanga ɨhambala mʉ mʉlenge mʉnene bathɨ:
«Hosana#11:9 Hosana mo Kɨebʉranɨa n'ɨnegena mbʉ: Ʉthʉshabʉle lero.!
Agashanɨrwe
yo uhika kw'ɨtsɨna lya Nyinya-kowethʉ#11:9 Soma Saburi 118:25-26.!
10Bʉgashanɨrwe obwamɨ bo buhika,
obwamɨ bwa thatha-kʉlʉ Tawiti!
Hosana kʉ Gongo yo ʉlɨ elʉgʉlʉ mo lʉbʉla#11:10 Soma Mat 21:9 n'ebyo bishakirwe.!»
11Yesʉ abere ahika mo muyi w'ɨYerʉsalemʉ mwɨngɨra mo Nyʉmba ya Gongo. Abere amamala ɨshʉnga ebɨndʉ byoshi ko mbande soshi, mwathokamo n'ɨgenda ɨBetanɨa hagʉma n'abɨga bʉwe ikumi na babɨrɨ, kʉshangwa bwabyaga nɨ bwamamala ɨkʉra.
Yesʉ athakɨra omʉthɨ w'omutini
(Mat 21:18-19)
12Bwabere bwakya, mo ndambi bagenda abathoka ɨBetanɨa, Yesʉ mwafwa nzala. 13Mwashʉngɨra mʉthɨ wa mutini wo hale owalɨko bɨthɨ bɨngɨ. Aho mwaya shʉnga nga ng'anabona kʉwo ko biguma. Hewethuwe abere ahika hofɨ nawo, mwathashʉnga kʉwo ko kɨndʉ bɨthalɨ ebɨthɨ bɨsha, kʉshangwa kithabyaga kɨrɨmo kyawo ky'erɨheka biguma. 14Aho Yesʉ mwathakɨra omʉthɨ oyo athɨ: «Ɨthanga munobwire n'erihika kera na kera, hathandashubabya kiro na mʉndʉ n'omʉgʉma yo wandalya biguma kw'ɨwe.» N'abɨga bʉwe mobonvwa ebɨnwa ebyo anegenaga.
Yesʉ ahɨga abahingania mo Nyʉmba ya Gongo
(Mat 21:12-17; Luk 19:45-48; Yoa 2:13-22)
15Honyuma kw'aho, Yesʉ n'abɨga bʉwe mobahika mo muyi w'ɨYerʉsalemʉ. Aho mwɨngɨra mo mbʉga yeNyʉmba ya Gongo, n'ɨthanga ɨhɨga abandʉ bo bagenda abagʉtsya n'ɨgʉla ebɨndʉ byabo mo Nyʉmba ya Gongo. Mwabɨndʉngʉla esonyɨgalɨ sabo bagenda abahingania esofaranga n'ebifumbi by'abahingania b'othulikuku. 16Na kuthyo mwahangɨra abandʉ ɨheka obʉlɨ kɨndʉ kyoshi-kyoshi n'ɨtsʉka nakyo mo mbʉga y'eNyʉmba ya Gongo. (Image WA03896btif) 17Honyuma kw'aho, mwakangɨrɨtsyabo n'ɨbwɨrabo athɨ: «Kushakirwe mo Mashako Abuyirire kʉthɨ: “eNyʉmba aye yandahʉlwamo nyʉmba ya mɨshabe ko bɨhanda byoshi.” Hewethuwe imwe mwamabɨndʉlaro mo kabishamo k'abashamuli#11:17 Soma Isaya 56:7; Yeremia 7:11.!» 18Abaheri bakʉlʉ n'aBakangɨrɨtsya b'oMʉgomba babere bonvwa omwatsɨ oyu, mobashondya mwanya w'eritha Yesʉ. Hewethuwe mobamʉbaha, kʉshangwa omuhindano woshi w'abandʉ bagenda abashwekera amakangɨrɨtsya ʉwe. 19Bwabere bwahika igolo, Yesʉ n'abɨga bʉwe mobathoka mo muyi oyo.
Makangɨrɨtsya ko mʉthɨ w'omutini
(Mat 21:20-22)
20Bwabere bwakya mo mambya, Yesʉ n'abɨga bʉwe babere balɨ abatsʉka, mobashʉnga omʉthɨ w'omutini oyo nɨamʉma owoshi, ihika ko mirihi yawo. 21Petero mwɨbʉka ko Yesʉ mwathakɨra omʉthɨ oyo. Aho mwabwɨra Yesʉ athɨ: «Mʉkangɨrɨtsya, shʉnga, omʉthɨ w'omutini wo wathakɨraga amalire ʉma.» 22Yesʉ mwabwɨra abɨga bʉwe athɨ: «Mwɨkɨrɨtsye Gongo. 23Kwenene enyɨbabwɨra nyɨthɨ: “Omʉndʉ angabwɨra ekɨthwa eki athɨ thoka hano na ʉyɨgʉshe mo ngetsɨ.” Na amabya alɨanegena ebɨnwa ebyo bʉtsɨra ɨthɨka-thɨka mo mʉthɨma ʉwe, hewethuwe amɨkɨrɨtsya ko ekɨnwa ekyo amanegena kyakoleka, kwenene nɨahabwakyo. 24Nɨ bʉshana n'ekyo enyɨbabwɨra nyɨthɨ, mʉlɨ omʉshaba bʉshana na mʉlawo wa kɨndʉ kɨrebe, mwɨkɨrɨtsye ko mwamamala ɨbonakyo, n'ekyo nɨ mwahabwakyo. 25Na omunabya mwimana bʉshana n'ɨshaba, mwamabya mʉlɨ na kɨnwa na ʉndɨ mʉndʉ, mʉmʉganyɨre, nɨmo Thatha wenyu yo ʉlɨ mo lʉbʉla, abaganyɨre kuthyo ebɨbɨ byenyu. [26Hewethuwe muthaganyire abandɨ, Thatha wenyu yo ʉlɨ mo lʉbʉla naye nɨathɨbaganyɨre nemwe ebɨbɨ byenyu kuthyo#11:26 Omʉlondo ono athalɨ mʉ wandɨ mashako w'ekikiriki..»]
Amaka wa Yesʉ athoka hayi?
(Mat 21:23-27; Luk 20:1-8)
27Yesʉ n'abɨga bʉwe mobashʉba kandɨ mo muyi w'ɨYerʉsalemʉ. Yesʉ abere alɨ athimba mo mbʉga yeNyʉmba ya Gongo, aBaheri Bakʉlʉ, n'aBakangɨrɨtsya b'oMʉgomba hagʉma n'abakʉlʉ b'abandʉ, mobamuhikira. 28Mobamʉbʉtsya bathɨ: «Oʉkola ebɨndʉ ebi kʉ maka ahɨ? Na nɨ ndɨ yo wakʉhaga amaka aya?» 29Yesʉ mwashʉbɨtsyabo athɨ: «Nyababʉtsya ɨbʉtsyo ɨgʉma bʉsha. Mwamanyɨshʉbɨtsya, nangye kuthyo nyababwɨra nga nɨ kʉ maka ahɨ kw'enyɨkola ebɨndʉ bɨno. 30Mʉnyɨshʉbɨtsye! Yoani abonaga amaka w'eribatisya wo hayi? Kʉ Gongo kʉtse ko bandʉ?» 31Nabo mobathanga ibutsania ɨbo kw'ɨbo bathɨ: «Thwamashubya thʉthɨ: “Amaka ʉwe athokaga ewa Gongo,” athʉbʉtsya athɨ: “Bʉshana na ki momʉthamwɨkɨrɨtsya?” 32Na kuthyo thʉthangakotsya ɨnegena thʉthɨ: “Athokaga kʉ bandʉ.”» Bagenda abanegena ebyo kʉshangwa mobʉbaha omuhindano w'abandʉ, kʉshangwa aboshi babyaga nɨbɨkɨrɨtsye ko Yoani nɨ mʉmɨnyeretsɨ wa kwenene. 33Aho mobashʉbɨtsya Yesʉ bathɨ: «Thuthetsi.»
Naye mwabwɨrabo athɨ: «Nangye kuthyo nyɨthɨbabwɨre nga nɨ kʉ maka ahɨ w'enyɨkolako ebɨndʉ bɨno.»
Currently Selected:
Marɨko 11: ver
Highlight
Share
Copy
Want to have your highlights saved across all your devices? Sign up or sign in
2025 Group of Associations for the Promotion of Languages, Cultures for Integral Development
