Matayo 4
4
Yesu werekwa na Mushumbu
(Mar 1.12-13; Ruk 4.1-13)
1Kuruma nampo, eMutima Washurukara wenjanga Yesu mu bweru kongo Mushumbu wamwereka. 2Nanko, Yesu wakindanga matu makumi anye a mafungo mutu na mumwishi. Kuruma nampo, wakwa ke rwaka.
3Nampo, Mushumbu wamweyere n'imwire mbu: «Kuba ǒngo nge Musike wa Ongo, ere emakoi ano abinduke mikati.» 4Yesu wamusako mbu: «Raandikwa mu Mitiro Yashurukara mbu: ‹Emwea watamuishi bushwa n'ebio ho. Ina waseishi bushwa n'ekinwa kiti nchi chebange Ongo.›#4.4 Soma Isub 8.3.»
5Kuruma nampo, Mushumbu wámwenja murubungu rwashurukara rwa ku Yerusaremu. Wamusimanya hamambio eNumba ya Ongo, 6n'imwire mbu: «Kuba ǒngo nge Musike wa Ongo, irekere ekwansi. Bushwa raandikwa mu Mitiro Yashurukara mbu:
‹Ongo waseere ebamaraika bae
mbu bakurie mu mine yabo
kongo emwindi wabe utasitari mwikoi.›#4.6 Soma Sab 91.11-12.»
7Yesu wamusako mbu: «Raandikwa mu Mitiro Yashurukara tu mbu: ‹Ang'ienda wereka Nyere Kuritu Ongo wabe.›#4.7 Soma Isub 6.16.»
8Kuruma nampo, Mushumbu wamwenja tu hiyo n'erou ruma rore nguru. Wamushea emami ati echuo hima n'ebutumba bwao. 9Wamwire mbu: «Ebiti mbi nasekuninka byo kuba unikomere emaru n'inisimanike.» 10Ina Yesu wamwire mbu: «Tuka mpo, ǒngo Mushumbu! Bushwa raandikwa mu Mitiro Yashurukara mbu: ‹Wenda usimanike Nyere Kuritu Ongo wabe n'imukore iwe kisine.›#4.10 Soma Isub 6.13.»
11Nampo ke, Mushumbu wamureke. Hiha-hiha, ebamaraika beya kakore Yesu.
Yesu wabucha emurimo wae ku Ngariraya
(Mar 1.14-15; Ruk 4.14-15)
12Yesu wakianga wamarukira mbu Yohana wamamɨnwa mu mwiyororo, wenda mu chuo cha ku Ngariraya. 13Watukanga ku Nasareti n'ienda karika ku Kaperenaumu. Erubungu ndo rurikire mwendende n'enyansa ya ku Ngariraya, mu chuo cha Saburoni hima na cha Nafutari.#4.13 Saburoni na Nafutari ito nganda sibi kumunda n'esanganda ikumi na sibi s'eBaisiraeri 14Ebinwa mbyo byetanga mbo kongo chabererera ekinwa nchi chebanga emutahwa Isaya mbu:
15«Echuo cha Saburoni hima n'echuo cha Nafutari,
ieta munse nji yenda ekunyansa,
muo mwiri wa Yorondani,
mu chuo cha ku Ngariraya, kunko nge kurikanga ebea mbi nti Bayuta!
16Ebea mbo babesenga mu mwirimya,
bamasunga chaka kikiri!
Imbi babesenga mu mwirimya mukiri w'erikwa,
nabo echaka chamasaire bo!»#4.16 Soma Isa 8.23—9.1.
17Itukire ematu ngo, Yesu wabucha ihubiri ebea mbu: «Mubunduke n'ireke esansambi sinu, bushwa mbu eBwami bwa mu mbingu ngie buri kwihi!»
Yesu warondora ebanafunsi bae baroso
(Mar 1.16-20; Ruk 5.1-11)
18Otu ruma, Yesu wabesenga utambange mwendende n'enyansa ya ku Ngariraya. Nampo wasunga barobi babi ba bura buma. Uma nge Simoni ingu wabikirwa mbu Petero, n'eumpe nge Nderea. Babesenga barobange mwirekera ekakira kábó mu nyansa. 19Yesu were bo mbu: «Munimise, niseburonja ibese barobi ba bea.» 20Hiha-hiha, basia etukira twabo n'imumisa.
21Yesu wakianga wamakensere kakeke kubusondori, wasunga bampe bea babi nabo hotu bana ba bura buma. Uma nge Yakobo n'eumpe nge Yohana, basike ba Sebendayo. Babesenga batunganyange etukira twabo mu mutumbu uma hima n'ishe wabo Sebendayo. Nabo hotu, Yesu wábikira bo. 22Hiha-hiha, basia emutumbu ngo, basia n'ishe wabo, n'imisa Yesu.
Yesu uhanange bea n'iramya bakoni
(Ruk 6.17-19)
23Kuruma nampo, Yesu wabesenga wetange mu chuo kiti cha ku Ngariraya. Wabesenga uhanange ebea hotu mu masinangoki abo n'iture bo eMwasi Wakonda w'eBwami bwa mu mbingu. Wabesenga uramyange bea emakoni abo ati n'eburema bwabo buti.
24Emwasi wae wenda nkuru mu chuo kiti cha ku Suria. Bushwa nancho, ebea babesenga bamurishiengi ebakoni bati mbi barinuba na kira bukoni, n'ebifwasi, n'erungu, n'ebea b'erumbonsa. Ebati mbo, iwe wabesenga uramyange bo. 25Bushwa nancho, bikembe bingi bya bea byabesenga bimumisange. Ebea mbo babesenga basaange ku Ngariraya, mu chuo chabikirwa mbu mbungu ikumi#4.25 Mu bimpe bitabo, esambungu ikumi nso sabikirwa mbu Ndekapori., ku Yerusaremu, ku Yundea, na mu chuo cha muo mwiri w'erʉsɨ rwa Yorondani.
Currently Selected:
Matayo 4: nyj
Highlight
Copy
Compare
Share
Want to have your highlights saved across all your devices? Sign up or sign in
2025 GAPLCDI, Group of Associations for the Promotion of Languages, Cultures for Integral Development
