Matayo 26
26
Ebakwakare b'eBayuta baronjee Yesu nama y'imushura
(Mar 14.1-2; Ruk 22.1-2; Yoh 11.45-53)
1Yesu wakianga wamakinda ieba ebinwa biti mbyo, were ebanafunsi bae mbu: 2«Banu mwosi mbu kuruma na matu abi, erotu rukiri rw'ePasaka ruseya. Nampo ani eMwana w'eMwea nasesiburwa kongo banitundika mu musaraba.»
3Ebakwakare b'ebakuhani hima n'ebakungu b'eBayuta bakumanana mu numba y'eKuhani Mukiri Kayafa. 4Mu nkumanano njo, baronja nama y'eritinge Yesu mu kwibisa kongo bamushura. 5Ina beba mbu: «Kiro twamutinge mu rotu rukiri rw'ePasaka kongo ebea batarishi burunga.»
Mumina uma wasingo Yesu marashi hiyo n'emuntwe
(Mar 14.3-9; Yoh 12.1-8)
6Yesu wakianga uri ku Betania, wakime kumunda na numba ya mwea uma mbu nge Simoni. Simoni ngo wabesenga mubembi. 7Bakianga barisange, mumina uma wakensere kwihi na Yesu twahata murangi wa marashi a busi bwasuma nguru. #26.7 Emurangi ngo wabesenga watunganyiwa n'ikoi rabikirwa mbu arubatere. Wasingo o Yesu hiyo n'emuntwe. 8Ebanafunsi ba Yesu bakianga bamasunga mbo, bayongwa nguru n'ibucha kwiebesha mbu: «Bushwa nki emumina ngu wabisha-bisha emarashi ngi? 9Emarashi ngi amuchukange busi bwasuma n'ebehe mbi ebyamushekanange, byamuninkwange rero ebasene!»
10Eriyongwa rabo ndo, Yesu wakengura ro. Bushwa nancho, were bo mbu: «Mbeni bushwa nki banu munubyange emumina ngu bumbo? Ebyamanikore we byakonda! 11Bushwa mbu ebasene basebese hima ninu ematu ati, ina mutubesi hima nani ematu ati. 12Emumina uno wamanisingo emarashi ano muritayarisha ebusetawa ani. 13Nibwirengi muriira mbu mu chuo kiti, ekuti nku kusenda kuturwange eMwasi Wakonda, ebea basenda bebange bushwa n'ekinwa chamakora emumina ngo. Bushwa nancho, wasenda ukandirwange.»
Yuta warisia isibura Yesu kuri ebakwakare b'ebakuhani
(Mar 14.10-11; Ruk 22.3-6)
14Kuruma nampo, uma musantumwa ikumi na sibi sa Yesu mbu nge Yuta Isikarioti, wenda kuri ebakwakare b'ebakuhani. 15Washisha bo mbu: «Mbeni mukunininka nki kuba nabusibure Yesu?» Bamuninka bikoroto makumi ashatu bya behe, #26.15 EkuBayuta, bikoroto makumi ashatu bya behe, nge byabesenga byituanga kuri mine kahungu nki kakushurwa na nkambu. Soma Ituka 21.32; Sakaria 11.12. 16Itukire nampo, Yuta wabucha isondekanya entambi yakonda nji isekɨa wasibure we bo Yesu.
Yesu warisa ebio by'ePasaka hima n'ebanafunsi bae
(Mar 14.12-21; Ruk 22.7-14,21-23; Yoh 13.21-30)
17Erotu rwaroso rw'erotu rukiri rw'emikati nji isira chachu rwakianga rwameya, ebanafunsi ba Yesu bamweyere n'imushisha mbu: «eNyere Kuritu, kuni nge kwarae ǒngo mbu twendi kakuronjee ko ebio by'ePasaka?»
18Yesu wasako bo mbu: «Mwendi murubungu#26.18 Erubungu rwa ku Yerusaremu nge rwashembwa hano. kwa mwea uma. Emwea ngo, mumwirenga mbu: ‹Emuhani wameba mbu entambi nji irindirenge rero we ngie iri keya. Kai, iwe n'ebanafunsi bae baserire ebio by'ePasaka mumwabe.›»
19Ebanafunsi nabo baronja imbu bwakianga Yesu were bo. Baronja ebio by'ePasaka.
20Ebutu bwakianga bwamaoroba, Yesu warika hima n'esantumwa sae ikumi na sibi mwirisa bio. 21Bakianga barisange, Yesu weba mbu: «Nibwirengi muriira mbu uma munkanti ninu wasenisibura.» 22Ebanafunsi batindibara nguru. Kira uma wabucha imushisha mbu: «eNyere Kuritu, mbeni ani?» 23Yesu wasako mbu: «Ingu urubiengi hima nani mu ntengi, nge wasenisibura. 24Ani eMwana w'eMwea nasekwa imbu bwaandikwanga bushwa nani mu Mitiro Yashurukara. Ina buhanya kuri emwea ngu wasenisibura! Emwea ngo, ramuhundange rero kuri we watabutwi!»
25Nampo, Yuta ngu wasiburanga Yesu, washisha mbu: «eMuhani, mbeni ani?» Na Yesu mbu: «Ǒngo ng'umeba.»
Ebio byerikandire mo Nyere Kuritu
(Mar 14.22-26; Ruk 22.14-20; 1Bako 11.23-25)
26Barekia barisange, Yesu watinge mukati, watata Ongo. Wabengaa o, waninka ebanafunsi bae. Kuruma nampo, were bo mbu: «Mutingi emukati uno na murise o, bushwa mbu uno nge mubi wani.»
27Kuruma nampo, watinge erusara, watata Ongo. Waninka ro bo n'iere bo mbu: «Mwomu banu bati, 28bushwa mbu ino nge nchama yani, inji yashea erirai ndi rakia Ongo waronja n'ebea bae. Enchama ino isekubuka mwikombora bea bingi kongo basasirwa esansambi sabo. 29Nibwirengi mbu itukire enompena, ntomu tu ndifai ieya n'erotu ndu ruseomoyo ani ndifai nchasha hima ninu mu Bwami bwa Tita.»
30Barekia bamahea isimba,#26.30 eBayuta bakianga bamahea irisa ebio by'ePasaka, babesenga basimbanga eSaburi 113-118; 136. benda murou rw'eMiseituni.
Yesu weba mbu Petero wasemutuna
(Mar 14.27-31; Ruk 22.31-34; Yoh 13.36-38)
31Kuruma nampo, Yesu were ebanafunsi bae mbu: «Mu butu buno, banu bati mukunisia ani kisine. Bushwa mbu raandikwa mu Mitiro Yashurukara mbu:
‹Naseshura emurangi w'emburi,
n'eriimba riti r'esamburi, risensansabana›#26.31 Soma Sak 13.7. 32Ina, nasekia namafuka, nabusondore ku Ngariraya.»
33Petero wamwire mbu: «Nakiro mbu ebati bamakusia, ani ntakusii karankuso.» 34Yesu wamusako mbu: «Nikwirengi muriira: ebutu bwa runotu, kubusondori n'enchongore yakua, ukubese nt'umanituna meta ashatu mbu ntíǒngo nosi.»
35Petero wamwire mbu: «Kuba nakomenwa ikwire hima nabe, narisia! Ina erikutuna nge ntakoche ikutuna karankuso!» Ebampe banafunsi bati nabo beba hotu bumbo.
Yesu uhemange Ongo ku Ketesemani
(Mar 14.32-42; Ruk 22.39-46)
36Kuruma nampo, Yesu n'ebanafunsi bae benda impi habikirwa mbu Ketesemani. Bakianga bameya mpo, Yesu were bo mbu: «Murike kasa hano, imbu bwenda ani kahema Ongo hiha.» 37Yesu watinge Petero n'emisike ibi ya Sebendayo. Wabucha itindibara n'ebwenge bwitimba. 38Bushwa nancho, were bo mbu: «Eritindibara rino riri kanishura. Kai, murike hano na mukereshe hima.»
39Kuruma nampo, wakensere kubusondori kakeke, windamya embaso ekwansi. Wabucha ihema Ongo mbu: «eTita! Kuba rakochekana, erusara runo rw'eminubo, nechei ro kore! Ina nakiro mbo, kiro byabese mbu bwashima ani, ina erisasa rabe nge rironjiwe.»
40Kuruma nampo, Yesu wakuruke mpi hakusia we ebanafunsi bae, wakumana bo barere. Were Petero mbu: «Ntimukukocha ikeresha hima nani nakiro ntambi nima ho? 41Mukereshe na nti banu muhemange, kongo mutukiri mu myereko, bushwa mbu emutima munkangwe ina emubi watetera.»
42Yesu wasia tu bo, wenda kahema r'emeta abi mbu: «eTita! Kuba erusara runo rw'eminubo rutamukocha ieta na nti tinomo ro, kai erisasa rabe nge rironjiwe!»
43Wakianga wamakuruka tu hari ebanafunsi bae, wakumana tubo nti barere, bushwa mbu emeso abo abesenga amaritoha n'etoro. 44Bushwa nancho, wasia tubo n'ienda kahema Ongo r'emeta ashatu. Wakuruke emahemo iya-iya.
45Kuruma nampo, wakuruka hari ebanafunsi bae, were bo mbu: «Banu mukiri murere n'iruhuka? Mukai! Entambi yameya! Ani eMwana w'eMwea nasesiburwa mu mine y'ebea b'esansambi. 46Musimane, twendi! Emwea ngu wasenisibura nge uno, uri kwihi!»
Yesu watingirwa
(Mar 14.43-50; Ruk 22.47-53; Yoh 18.3-12)
47Yesu wakianga ukiri webange, Yuta, uma mu banafunsi bae ikumi na babi, weya. Yuta ngo, wabesenga ubungange na kikembe kikiri cha bea bahata mbenge na nkoma mu mine. Ebea bati mbo babesenga batuwa n'ebakwakare b'ebakuhani n'ebakungu b'eBayuta. 48Yuta, ingu wasiburanga Yesu, wabesenga wamashea bo ekiteerere kino: «Ingu waserimba ani, nge uo, mumutingi!»
49Hiha-hiha, Yuta wákensere kwihi na Yesu. Wamwire mbu: «eMuhani, nakukea!» Nampo, wamurimba. 50Ina Yesu wamwire mbu: «Emirani, echamakurisha, ronja cho.» Kuruma nampo, ebea mbo bakensere, batinge Yesu n'imumina.
51Mu kashangi nko, mwea uma mu mbi babesenga hima na Yesu wasubira embenge yae, n'irasa yo ekahungu k'ekuhani mukwakare, wamukera ekote. 52Ina Yesu wamwire mbu: «Kurucha embenge yabe mu hara yayo. Bushwa mbu kinsi ngu ukwanange mwikoresha mbenge, nae waseshurwa na mbenge! 53Mbeni ntí banu mosi mbu namukonga Tita mbu wanisaki, nampo wamunitumire bamaraika bingi irenga bikembe ikumi na bibí? 54Ina, mbeni eMitiro Yashurukara isebererera buni nji yeba mbu ebinwa biti bino byahwa ibese bumbo?»
55Kuruma nampo, Yesu washisha ebea mbo mbu: «Bushwa nki munihiere na mbenge hima na nkoma bukiangǎ bea bendange katinge munyai? Ematu ati nabesenga nisibanange mu numba ya Ongo nti nihanange ebea, ina nti timurinitinge. 56Ebinwa biti bino byeya buno kongo ebinwa byebanga ebatahwa mu Mitiro Yashurukara byabererera.»
Nampo ebanafunsi bae bati bamusia n'ibeka.
Yesu waburana ha Rushu Rukiri rw'eBayuta
(Mar 14.53-65; Ruk 22.54-55,63-71; Yoh 18.13-14,19-24)
57Ebea mbo bakianga bamatinge Yesu, bamurisha kuri ekuhani mukiri Kayafa. Ebahani b'eMyomba n'ebakungu b'eBayuta babesenga bamatumana mpo. 58Ina Petero wabesenga wakusiere Yesu kuruma kansoka. Nae wakime ha numba y'ekuhani mukiri. Warika mu butara hima n'ebarangi, kongo wasunga ebinwa mbi bisesaa.
59Ebakwakare b'ebakuhani mbo hima n'ebakungu b'eRushu Rukiri rw'eBayuta basonda binwa bya bushukishuki kuri Yesu kongo bamushura. 60Bea bingi beya mpo kamuhambike binwa, ina nakiro mbo, bamurukwa mo kinwa ch'erimushura.
Kuruma nampo, kwasaa bea babi 61n'ieba mbu: «Emwea uno webayo mbu wasekakura eNumba ya Ongo n'iumba tu yo mu matu ashatu.»
62Nampo ekuhani mukiri wasimana n'ishisha Yesu mbu: «Mbeni ǒngo usira kinwa kiti-kiti chisako mu binwa biti mbi bikusongerengi bo?» 63Ina Yesu wikobe. Ekuhani mukiri wamushisha tu mbu: «Nikukongange, mu rina ra Ongo w'ekaramo, sere kuba ǒngo nge Kirisitu Musike wa Ongo.» 64Yesu wamusako mbu: «Ǒngo ng'umeba! Bushwa nancho, nibwirengi mbu itukire enompena, mukusunga imbu ani eMwana w'eMwea narika mu ruharo rw'ekwabume kwa Ongo ngu mine maa. Mukusunga hotu mbu bweyange ani ituka mu mbingu mu rutundo.»
65Emukwakare w'ebakuhani ngo warekia warukira mbo, wibengae mo esanchangi. Weba mbu: «Emwea uno wamakamba Ongo! Inye turiho nge tusondange tu bate? Banu bisine mumirukire mbu bwamakamba we Ongo! 66Mukae buni?» Nabo mbu: «Wakomenwa ishurwa.»#26.66 Soma Bar 24.16.
67Nampo, bima bamuturae inte mu mbaso, n'imurasaka nkundo. Na bampe bamurasaka bihi,#26.67 Soma Isa 50.6. 68n'imwire mbu: «eKirisitu, tabura ngu wamakurasa, twiiri kuba inye ngwamakukaso!»
Petero watuna Yesu
(Mar 14.66-72; Ruk 22.56-62; Yoh 18.15-18,25-27)
69Mu kashangi nko, Petero wabesenga wakurika hambuka mu butara. Kwasaa mukori uma mumina, wakensere kwihi na Petero. Wamwire mbu: «N'ongori rero hima na Yesu ngu wa ku Ngariraya.» 70Ina Petero watuna munkati n'ebea bati mbi babesenga mpo, weba mbu: «Ebisondange ieba ǒngo, ntinosi byo!»
71Kuruma nampo, Petero watuka mpo, n'ienda ha rubi rw'eruba. Mukori umpe mumina nae wamusunga, n'iere ebea mbi babesenga mpo mbu: «Emwea uno, uri rero hima na Yesu wa ku Nasareti.» 72Ina Petero watʉna tu mbu: «Nasere mbu emwea ngo ntinimosi!»
73Kuruma na kashangi kakeke, ebea mbi babesenga basimana mpo bakensere kwihi na Petero, n'imwire mbu: «Muriira, ǒngo uma mu bo, bushwa mbu n'emyeberi yabe yakushea.» 74Mu rahende, Petero wabucha ieba mbu: «Kuba nebange manko, niherwe! Namasere mbu emwea ngo, ntinimosi!» Hiha-hiha, enchongore yakua.
75Nampo, Petero wasubukia ebinwa mbi byakumwerenga Yesu mbu: «Kubusondori n'erɨkʉa r'enchongore, ukubese nt'umanituna meta ashatu.» Bushwa nancho, Petero wasaa hambuka n'ibucha irire na bwae nguru.
Currently Selected:
Matayo 26: nyj
Highlight
Copy
Compare
Share
Want to have your highlights saved across all your devices? Sign up or sign in
2025 GAPLCDI, Group of Associations for the Promotion of Languages, Cultures for Integral Development
Matayo 26
26
Ebakwakare b'eBayuta baronjee Yesu nama y'imushura
(Mar 14.1-2; Ruk 22.1-2; Yoh 11.45-53)
1Yesu wakianga wamakinda ieba ebinwa biti mbyo, were ebanafunsi bae mbu: 2«Banu mwosi mbu kuruma na matu abi, erotu rukiri rw'ePasaka ruseya. Nampo ani eMwana w'eMwea nasesiburwa kongo banitundika mu musaraba.»
3Ebakwakare b'ebakuhani hima n'ebakungu b'eBayuta bakumanana mu numba y'eKuhani Mukiri Kayafa. 4Mu nkumanano njo, baronja nama y'eritinge Yesu mu kwibisa kongo bamushura. 5Ina beba mbu: «Kiro twamutinge mu rotu rukiri rw'ePasaka kongo ebea batarishi burunga.»
Mumina uma wasingo Yesu marashi hiyo n'emuntwe
(Mar 14.3-9; Yoh 12.1-8)
6Yesu wakianga uri ku Betania, wakime kumunda na numba ya mwea uma mbu nge Simoni. Simoni ngo wabesenga mubembi. 7Bakianga barisange, mumina uma wakensere kwihi na Yesu twahata murangi wa marashi a busi bwasuma nguru. #26.7 Emurangi ngo wabesenga watunganyiwa n'ikoi rabikirwa mbu arubatere. Wasingo o Yesu hiyo n'emuntwe. 8Ebanafunsi ba Yesu bakianga bamasunga mbo, bayongwa nguru n'ibucha kwiebesha mbu: «Bushwa nki emumina ngu wabisha-bisha emarashi ngi? 9Emarashi ngi amuchukange busi bwasuma n'ebehe mbi ebyamushekanange, byamuninkwange rero ebasene!»
10Eriyongwa rabo ndo, Yesu wakengura ro. Bushwa nancho, were bo mbu: «Mbeni bushwa nki banu munubyange emumina ngu bumbo? Ebyamanikore we byakonda! 11Bushwa mbu ebasene basebese hima ninu ematu ati, ina mutubesi hima nani ematu ati. 12Emumina uno wamanisingo emarashi ano muritayarisha ebusetawa ani. 13Nibwirengi muriira mbu mu chuo kiti, ekuti nku kusenda kuturwange eMwasi Wakonda, ebea basenda bebange bushwa n'ekinwa chamakora emumina ngo. Bushwa nancho, wasenda ukandirwange.»
Yuta warisia isibura Yesu kuri ebakwakare b'ebakuhani
(Mar 14.10-11; Ruk 22.3-6)
14Kuruma nampo, uma musantumwa ikumi na sibi sa Yesu mbu nge Yuta Isikarioti, wenda kuri ebakwakare b'ebakuhani. 15Washisha bo mbu: «Mbeni mukunininka nki kuba nabusibure Yesu?» Bamuninka bikoroto makumi ashatu bya behe, #26.15 EkuBayuta, bikoroto makumi ashatu bya behe, nge byabesenga byituanga kuri mine kahungu nki kakushurwa na nkambu. Soma Ituka 21.32; Sakaria 11.12. 16Itukire nampo, Yuta wabucha isondekanya entambi yakonda nji isekɨa wasibure we bo Yesu.
Yesu warisa ebio by'ePasaka hima n'ebanafunsi bae
(Mar 14.12-21; Ruk 22.7-14,21-23; Yoh 13.21-30)
17Erotu rwaroso rw'erotu rukiri rw'emikati nji isira chachu rwakianga rwameya, ebanafunsi ba Yesu bamweyere n'imushisha mbu: «eNyere Kuritu, kuni nge kwarae ǒngo mbu twendi kakuronjee ko ebio by'ePasaka?»
18Yesu wasako bo mbu: «Mwendi murubungu#26.18 Erubungu rwa ku Yerusaremu nge rwashembwa hano. kwa mwea uma. Emwea ngo, mumwirenga mbu: ‹Emuhani wameba mbu entambi nji irindirenge rero we ngie iri keya. Kai, iwe n'ebanafunsi bae baserire ebio by'ePasaka mumwabe.›»
19Ebanafunsi nabo baronja imbu bwakianga Yesu were bo. Baronja ebio by'ePasaka.
20Ebutu bwakianga bwamaoroba, Yesu warika hima n'esantumwa sae ikumi na sibi mwirisa bio. 21Bakianga barisange, Yesu weba mbu: «Nibwirengi muriira mbu uma munkanti ninu wasenisibura.» 22Ebanafunsi batindibara nguru. Kira uma wabucha imushisha mbu: «eNyere Kuritu, mbeni ani?» 23Yesu wasako mbu: «Ingu urubiengi hima nani mu ntengi, nge wasenisibura. 24Ani eMwana w'eMwea nasekwa imbu bwaandikwanga bushwa nani mu Mitiro Yashurukara. Ina buhanya kuri emwea ngu wasenisibura! Emwea ngo, ramuhundange rero kuri we watabutwi!»
25Nampo, Yuta ngu wasiburanga Yesu, washisha mbu: «eMuhani, mbeni ani?» Na Yesu mbu: «Ǒngo ng'umeba.»
Ebio byerikandire mo Nyere Kuritu
(Mar 14.22-26; Ruk 22.14-20; 1Bako 11.23-25)
26Barekia barisange, Yesu watinge mukati, watata Ongo. Wabengaa o, waninka ebanafunsi bae. Kuruma nampo, were bo mbu: «Mutingi emukati uno na murise o, bushwa mbu uno nge mubi wani.»
27Kuruma nampo, watinge erusara, watata Ongo. Waninka ro bo n'iere bo mbu: «Mwomu banu bati, 28bushwa mbu ino nge nchama yani, inji yashea erirai ndi rakia Ongo waronja n'ebea bae. Enchama ino isekubuka mwikombora bea bingi kongo basasirwa esansambi sabo. 29Nibwirengi mbu itukire enompena, ntomu tu ndifai ieya n'erotu ndu ruseomoyo ani ndifai nchasha hima ninu mu Bwami bwa Tita.»
30Barekia bamahea isimba,#26.30 eBayuta bakianga bamahea irisa ebio by'ePasaka, babesenga basimbanga eSaburi 113-118; 136. benda murou rw'eMiseituni.
Yesu weba mbu Petero wasemutuna
(Mar 14.27-31; Ruk 22.31-34; Yoh 13.36-38)
31Kuruma nampo, Yesu were ebanafunsi bae mbu: «Mu butu buno, banu bati mukunisia ani kisine. Bushwa mbu raandikwa mu Mitiro Yashurukara mbu:
‹Naseshura emurangi w'emburi,
n'eriimba riti r'esamburi, risensansabana›#26.31 Soma Sak 13.7. 32Ina, nasekia namafuka, nabusondore ku Ngariraya.»
33Petero wamwire mbu: «Nakiro mbu ebati bamakusia, ani ntakusii karankuso.» 34Yesu wamusako mbu: «Nikwirengi muriira: ebutu bwa runotu, kubusondori n'enchongore yakua, ukubese nt'umanituna meta ashatu mbu ntíǒngo nosi.»
35Petero wamwire mbu: «Kuba nakomenwa ikwire hima nabe, narisia! Ina erikutuna nge ntakoche ikutuna karankuso!» Ebampe banafunsi bati nabo beba hotu bumbo.
Yesu uhemange Ongo ku Ketesemani
(Mar 14.32-42; Ruk 22.39-46)
36Kuruma nampo, Yesu n'ebanafunsi bae benda impi habikirwa mbu Ketesemani. Bakianga bameya mpo, Yesu were bo mbu: «Murike kasa hano, imbu bwenda ani kahema Ongo hiha.» 37Yesu watinge Petero n'emisike ibi ya Sebendayo. Wabucha itindibara n'ebwenge bwitimba. 38Bushwa nancho, were bo mbu: «Eritindibara rino riri kanishura. Kai, murike hano na mukereshe hima.»
39Kuruma nampo, wakensere kubusondori kakeke, windamya embaso ekwansi. Wabucha ihema Ongo mbu: «eTita! Kuba rakochekana, erusara runo rw'eminubo, nechei ro kore! Ina nakiro mbo, kiro byabese mbu bwashima ani, ina erisasa rabe nge rironjiwe.»
40Kuruma nampo, Yesu wakuruke mpi hakusia we ebanafunsi bae, wakumana bo barere. Were Petero mbu: «Ntimukukocha ikeresha hima nani nakiro ntambi nima ho? 41Mukereshe na nti banu muhemange, kongo mutukiri mu myereko, bushwa mbu emutima munkangwe ina emubi watetera.»
42Yesu wasia tu bo, wenda kahema r'emeta abi mbu: «eTita! Kuba erusara runo rw'eminubo rutamukocha ieta na nti tinomo ro, kai erisasa rabe nge rironjiwe!»
43Wakianga wamakuruka tu hari ebanafunsi bae, wakumana tubo nti barere, bushwa mbu emeso abo abesenga amaritoha n'etoro. 44Bushwa nancho, wasia tubo n'ienda kahema Ongo r'emeta ashatu. Wakuruke emahemo iya-iya.
45Kuruma nampo, wakuruka hari ebanafunsi bae, were bo mbu: «Banu mukiri murere n'iruhuka? Mukai! Entambi yameya! Ani eMwana w'eMwea nasesiburwa mu mine y'ebea b'esansambi. 46Musimane, twendi! Emwea ngu wasenisibura nge uno, uri kwihi!»
Yesu watingirwa
(Mar 14.43-50; Ruk 22.47-53; Yoh 18.3-12)
47Yesu wakianga ukiri webange, Yuta, uma mu banafunsi bae ikumi na babi, weya. Yuta ngo, wabesenga ubungange na kikembe kikiri cha bea bahata mbenge na nkoma mu mine. Ebea bati mbo babesenga batuwa n'ebakwakare b'ebakuhani n'ebakungu b'eBayuta. 48Yuta, ingu wasiburanga Yesu, wabesenga wamashea bo ekiteerere kino: «Ingu waserimba ani, nge uo, mumutingi!»
49Hiha-hiha, Yuta wákensere kwihi na Yesu. Wamwire mbu: «eMuhani, nakukea!» Nampo, wamurimba. 50Ina Yesu wamwire mbu: «Emirani, echamakurisha, ronja cho.» Kuruma nampo, ebea mbo bakensere, batinge Yesu n'imumina.
51Mu kashangi nko, mwea uma mu mbi babesenga hima na Yesu wasubira embenge yae, n'irasa yo ekahungu k'ekuhani mukwakare, wamukera ekote. 52Ina Yesu wamwire mbu: «Kurucha embenge yabe mu hara yayo. Bushwa mbu kinsi ngu ukwanange mwikoresha mbenge, nae waseshurwa na mbenge! 53Mbeni ntí banu mosi mbu namukonga Tita mbu wanisaki, nampo wamunitumire bamaraika bingi irenga bikembe ikumi na bibí? 54Ina, mbeni eMitiro Yashurukara isebererera buni nji yeba mbu ebinwa biti bino byahwa ibese bumbo?»
55Kuruma nampo, Yesu washisha ebea mbo mbu: «Bushwa nki munihiere na mbenge hima na nkoma bukiangǎ bea bendange katinge munyai? Ematu ati nabesenga nisibanange mu numba ya Ongo nti nihanange ebea, ina nti timurinitinge. 56Ebinwa biti bino byeya buno kongo ebinwa byebanga ebatahwa mu Mitiro Yashurukara byabererera.»
Nampo ebanafunsi bae bati bamusia n'ibeka.
Yesu waburana ha Rushu Rukiri rw'eBayuta
(Mar 14.53-65; Ruk 22.54-55,63-71; Yoh 18.13-14,19-24)
57Ebea mbo bakianga bamatinge Yesu, bamurisha kuri ekuhani mukiri Kayafa. Ebahani b'eMyomba n'ebakungu b'eBayuta babesenga bamatumana mpo. 58Ina Petero wabesenga wakusiere Yesu kuruma kansoka. Nae wakime ha numba y'ekuhani mukiri. Warika mu butara hima n'ebarangi, kongo wasunga ebinwa mbi bisesaa.
59Ebakwakare b'ebakuhani mbo hima n'ebakungu b'eRushu Rukiri rw'eBayuta basonda binwa bya bushukishuki kuri Yesu kongo bamushura. 60Bea bingi beya mpo kamuhambike binwa, ina nakiro mbo, bamurukwa mo kinwa ch'erimushura.
Kuruma nampo, kwasaa bea babi 61n'ieba mbu: «Emwea uno webayo mbu wasekakura eNumba ya Ongo n'iumba tu yo mu matu ashatu.»
62Nampo ekuhani mukiri wasimana n'ishisha Yesu mbu: «Mbeni ǒngo usira kinwa kiti-kiti chisako mu binwa biti mbi bikusongerengi bo?» 63Ina Yesu wikobe. Ekuhani mukiri wamushisha tu mbu: «Nikukongange, mu rina ra Ongo w'ekaramo, sere kuba ǒngo nge Kirisitu Musike wa Ongo.» 64Yesu wamusako mbu: «Ǒngo ng'umeba! Bushwa nancho, nibwirengi mbu itukire enompena, mukusunga imbu ani eMwana w'eMwea narika mu ruharo rw'ekwabume kwa Ongo ngu mine maa. Mukusunga hotu mbu bweyange ani ituka mu mbingu mu rutundo.»
65Emukwakare w'ebakuhani ngo warekia warukira mbo, wibengae mo esanchangi. Weba mbu: «Emwea uno wamakamba Ongo! Inye turiho nge tusondange tu bate? Banu bisine mumirukire mbu bwamakamba we Ongo! 66Mukae buni?» Nabo mbu: «Wakomenwa ishurwa.»#26.66 Soma Bar 24.16.
67Nampo, bima bamuturae inte mu mbaso, n'imurasaka nkundo. Na bampe bamurasaka bihi,#26.67 Soma Isa 50.6. 68n'imwire mbu: «eKirisitu, tabura ngu wamakurasa, twiiri kuba inye ngwamakukaso!»
Petero watuna Yesu
(Mar 14.66-72; Ruk 22.56-62; Yoh 18.15-18,25-27)
69Mu kashangi nko, Petero wabesenga wakurika hambuka mu butara. Kwasaa mukori uma mumina, wakensere kwihi na Petero. Wamwire mbu: «N'ongori rero hima na Yesu ngu wa ku Ngariraya.» 70Ina Petero watuna munkati n'ebea bati mbi babesenga mpo, weba mbu: «Ebisondange ieba ǒngo, ntinosi byo!»
71Kuruma nampo, Petero watuka mpo, n'ienda ha rubi rw'eruba. Mukori umpe mumina nae wamusunga, n'iere ebea mbi babesenga mpo mbu: «Emwea uno, uri rero hima na Yesu wa ku Nasareti.» 72Ina Petero watʉna tu mbu: «Nasere mbu emwea ngo ntinimosi!»
73Kuruma na kashangi kakeke, ebea mbi babesenga basimana mpo bakensere kwihi na Petero, n'imwire mbu: «Muriira, ǒngo uma mu bo, bushwa mbu n'emyeberi yabe yakushea.» 74Mu rahende, Petero wabucha ieba mbu: «Kuba nebange manko, niherwe! Namasere mbu emwea ngo, ntinimosi!» Hiha-hiha, enchongore yakua.
75Nampo, Petero wasubukia ebinwa mbi byakumwerenga Yesu mbu: «Kubusondori n'erɨkʉa r'enchongore, ukubese nt'umanituna meta ashatu.» Bushwa nancho, Petero wasaa hambuka n'ibucha irire na bwae nguru.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
2025 GAPLCDI, Group of Associations for the Promotion of Languages, Cultures for Integral Development