Ruka 23

Yesu warierwa kuri Pirato

(Mat 27.1-2,11-14; Mar 15.1-5; Yoh 18.28-38)

1Kuruma nampo, ebea bati mbi babesenga ha nkumanano y'eRushu rukiri rw'eBayuta basimana n'iria Yesu kuri Pirato. 2Bakianga bameya ho, babucha imusogere mbu: «Twamakumanyanya emwea uno nt'usheereshange ebea bitu. Werengi rero bo mbu kiro bendi batuange tu ehoro kuri Kaisari, na webange tu mbu iwe kisine nge Kirisitu, mwami.»

3Pirato washisha Yesu mbu: «Mbeni ǒngo nge Mwami w'eBayuta?» Yesu wamusako mbu: «Ǒngo ng'umeba mbo!» 4Nampo, Pirato were ebakwakare b'ebakuhani n'ekikembe ch'ebea mbu: «Ntínasunga kinwa nchi chamusingwa mbu emwea uno wahukumiwe ikwa.» 5Ina bimima nguru n'ieba mbu: «Emwea uno, ebinwa bihanange we ebea bisheeresha echuo kiti cha ku Yundea. Wakubuchie nabyo mu chuo cha ku Ngariraya, na nge uno wamarembera nabyo kuno ku Yerusaremu.»

Yesu warierwa kwa Herote

6Pirato wakianga warukira ebinwa mbyo, washisha mbu: «Mbeni emwea uno mwisa ku Ngariraya?» 7Wakianga wamarukira mbu Yesu mwisa echuo nchi chabesenga chasimanirwa na Herote, were bo mbu barie Yesu kwa Herote bushwa mbu erotu ndo Herote wabesenga uri ku Yerusaremu.

8Herote wabesenga urukiranga ho emyasi ya Yesu. Itukire kare nt'usondanga ho imusunga. Wabesenga uhunanga imusunga nt'uronjange bishisharo. Nampo ke wamoa nguru mu rimusunga. 9Washishirisha Yesu binwa bingi, ina Yesu ntwamusakonga. 10Ebakwakare b'ebakuhani n'ebahani b'eMyomba ebabesenga mpo babesenga bakwimima nguru mu rihambike Yesu binwa bingi. 11Herote n'ebasura bae babucha ikambaa Yesu n'imucharika. Bamumbaricha nchangi inji yabesenga yakoma nguru, nampo Herote wamukurucha tu kwa Pirato. 12Herote bana Pirato babesenga barenda, ina itukire erotu ndo babese bamwira na mwira.

Pirato wakera erubansa rwa Yesu mbu washurwe

(Mat 27.15-26; Mar 15.6-15; Yoh 18.39—19.16)

13Pirato wabikira ebakwakare b'ebakuhani n'ebampe bakwakare hima n'ebea. 14Were bo mbu: «Mumanirishie emwea uno mbu usheereshange ebea. Namamushisha mu makako inu bushwa n'ebinwa mbi byamamusongere banu, ina ani ntínasunga kiro na kinwa kima chema mu'mbi ebyamamusongere mo banu. 15Herote nae ntíwasunga kinwa chema kuri we nge chasingwa wamatukuruchie tu we. Kai emwea uno ntwakukora kinwa chema inchi chamusingwa washurwa. 16Kai naseninkana ho momba bamurase tushushu, kuruma nampo nasemwobora.» [ 17Mu kirotu rukiri rw'ePasaka, Pirato wabesenga woborenga bo mwea uma ituka mu mwiyororo.]

18Ina ebea bati bakua mongo mbu: «Shura emwea uno, ina twoboreri Baraba!» 19Baraba ngo waminwanga bushwa n'eburunga mbu bwabesenga murubungu, na kwakwa mwea. 20Mu riira, Pirato wabesenga uhunange ibora Yesu. Weba tu kasa n'ebea. 21Ina ebea babesenga bakuange mbu: «Mutundike mu musaraba, mutundike mu musaraba!»

22Pirato washisha tu bo r'emeta ashatu mbu: «Mbeni emwea uno wakukora kinki chema? Ani ntínasunga kiro kinwa kima chema nchi chamusingwa washurwa. Kai naseninkana ho momba bamurase tushushu, kuruma nampo nasemwobora.»

23Ina bakua ketu nguru n'ieba mbu Yesu watundikwe mu musaraba. N'emirenge yabo yahundusa Pirato. 24Nampo, Pirato wasunga nti rakoma waronjei bo imbu ebuhunange bo! 25Wobore bo Baraba ngu waminwanga bushwa n'eburunga murubungu n'erikwa r'emwea.

Ebasura batundika Yesu mu musaraba

(Mat 27.32-44; Mar 15.21-32; Yoh 19.17-27)

26Ebasura barekia bendange na Yesu, bakumana wabume uma mbu nge Simoni wa murubungu rwa ku Kurene na nt'utukange ekwishwa. Bamuriesha emusaraba wa Yesu, n'imwire mbu wamumise kuruma.

27Bea bingi babesenga basiere Yesu kuruma. Mubo, habesenga hotu bamina bingi barengi na bonso bwingi bushwa nae. 28Yesu wikebera kuri ebamina n'iere bo mbu: «Banu bamina ba ku Yerusaremu, kiro murire bushwa nani! Ina mwiriri banu bisine n'ebana binu. 29Bushwa mbu mu matu ngi eyange, ebea basebayo mbu: ‹Esangumba, nambi batangabutanga, n'ebatangarishanga bana mabere, nge bakasanirwa!› 30Mu matu ngo,

ebea basereyo esangu mbu: ‹Mutusuruki!› N'iire esantata mbu: ‹Mutusiki.›#23.30 Soma Ose 10.8.

31Bushwa mbu kuba baronjee emuti mubisi mbo, ngyabere hani emuti wakama?»

32Ebasura barishanga tu babisha babi kongo bashura bo hima na Yesu. 33Bakianga bameya mpi habikirwangǎ mbu «Kahangasi», batundika Yesu mu musaraba. Batundika hotu n'ebabisha mbo, uma ekwabume kwa Yesu n'eumpe ekurembe kwae. 34[Yesu weba mbu: «eTita, sasira bo bushwa mbu ntíbosi ebikorange bo.»]

Mu risonda ibanya esanchangi nsi sabesenga sambara we, ebasura barekera mishari ekwansi kongo basiba emuhango wa kira mwea.

35Ebea babesenga bakusimana mpo nti bakaengi. Ebakwakare b'eBayuta babesenga bamuseange na nti bebange mbu: «Wakushukayanga bampe, wishukaye ke nae, kuba iwe ho nge Kirisitu ngu warondorwanga na Ongo!»

36Ebasura nabo babesenga bamuseange. Bakensere kwihi nae n'imuninka ndifai eyashubuka, 37bamwire mbu: «Kuba ǒngo nge Mwami w'eBayuta muriira, ishukaye mpo ǒngo kisine!» 38Na hambasiro n'emuntwe wae habesenga haandikwa buno mbu: «Uno nge Mwami w'eBayuta.»

39Uma mu babisha mbi batundikwanga mpo, wabesenga umucharikange mbu: «Mbeni ntíǒngo nge Kirisitu? Ishukaye ke, na bate hotu tushukaye!» 40Ina eumpe wafine mine n'ieba mbu: «Mbeni ǒngo nt'usubaha Ongo nakiro mbu umahukumiwa hima n'emwea uno? 41Bate babi twahukumiwa itukana n'ebibi byakoranga bate. Ina emwea uno usira bubi buti-buti bwakukora we.»

42Kuruma nampo, weba mbu: «eYesu, ang'inobya mu ntambi isekurukayo ǒngo kasimanire ebea mu Bwami bwabe!» 43Yesu wamusako mbu: «Muriira, nikwirengi mbu runotu hona ukubese hima nani mu Paratiso.»

Erikwa ra Yesu

(Mat 27.45-56; Mar 15.33-41; Yoh 19.28-30)

44-45Rakianga rarengeka buna ntambi mutuba sa mumwishi, emwishi warima. Emwirimya wirasa ekwansi mu chuo kiti ieya na mu ntambi mwenda. Enchangi nji yabesenga irembengi mu Numba ya Ongo yabereka bebe bibí.#23.44-45 Enchangi njo yabesenga yabanya mpi hashurukara nampi hashurukara nguru mu Numba ya Ongo. 46Nampo, Yesu wakua mu murenge mukiri n'ieba mbu: «eTita, natereka emutima wani mu mine yabe.» Wakianga wamahea ieba ebinwa mbyo, wákera emutima.#23.46 Soma Sab 31.6.

47Emukwakare w'ebasura ba ku Roma wakianga wamasunga ebyameta, watata Ongo n'ieba mbu: «Iira, emwea uno wabesenga w'iira!»

48Ebea bati mbi beyanga kakae, bakuruka nti bikaso-kasongi mu bukuba bushwa n'ebonso. 49Ebati mbi babesenga bosi Yesu n'ebamina mbi babesenga bamutindikia itukire mu chuo cha ku Ngariraya, babesenga bakusimana kore mu risunga mbu bwabesenga bwetange ebinwa biti mbyo.

Eritawa ra Yesu

(Mat 27.57-61; Mar 15.42-47; Yoh 19.38-42)

50-51Kwabesenga mwea uma mbu nge Yosefu w'erubungu rwa ku Arimatayo, mu chuo cha ku Yundea. Yosefu ngo wabesenga murongu na mwea waombokara. Wabesenga urindirengi eBwami bwa Ongo bweye. Wabesenga tu uma mu bakwakare b'eRushu rw'eBayuta. Ina iwe ntwakimenga mu nama ya banachabo y'erishura Yesu. 52Yosefu ngo wenda kuri Pirato n'imukonga ekinda cha Yesu. 53Kuruma nampo, weba mbu bahiche cho. Wábiririre cho enchangi na wataa cho mu risinda rumbwa shu mu ukanga rukiri. Kusira mwea uti-uti ngu wabesenga wamatawanga mu ro. 54Ebiti mbyo byetanga otu rwa asanu, n'eSabato nti ngie iri kabucha.

55Ebamina mbi babesenga batindikiange Yesu itukire mu chuo cha ku Ngariraya, bamisa Yosefu. Basunga erisinda nambu bwaterekanga bo mo ekinda cha Yesu. 56Kuruma nampo, bakuruka n'itunganya mafuta na marashi erisingo ekinda. Erotu rw'eSabato, baruhuka itukana n'ebweba eMyomba.

Currently Selected:

Ruka 23: nyj

Highlight

Copy