YouVersion Logo
Search Icon

Ruka 21

21
Ebisabo by'emushumbakari musene
(Mar 12.41-44)
1Yesu wakianga uri mu Numba ya Ongo, watambya emeso mu bea, wasunga ebukiange ebatumba baria ebisabo byabo mu nku y'ebisabo. 2Wasunga tu mushumbakari uma musene ingu weyanga nae karia mo twabikoroto tubi. 3Nampo Yesu weba mbu: «Nibwirengi muriira, emushumbakari uno musene, iwe nge wamakuto bisabo bingi irenga mbi ebyamakia ebea bati bakuto. 4Bushwa mbu ebati bano, ebisabo byamakuto bo ibyo muhango wambi byakusianga mu behe byabo nti bamakindanya kasa emirao yabo iti. Ina emushumbakari uno, iwe mu busene bwae, wamakuto ebiti biri rero nae byerimusake mu buingo bwae.»
Yesu watura mwasi w'eribiha r'eNumba ya Ongo
(Mat 24.1-2; Mar 13.1-2)
5Bea bima babesenga bashambarange bushwa n'eNumba ya Ongo. Babesenga bebange mbu yimbwa mu makoi akonda-konda hima na bimpe bikai mbi byakianga ebea basaba Ongo. Ina Yesu were bo mbu: 6«Bino ebisungange banu, kwaseya matu ngi mutusungiyo tu ikoi rima hambasiro na rimpe, ebisusu biti bisekakurwayo.»
Ebinwa by'ematu a hende
(Mat 24.3-14; Mar 13.3-13)
7Ngerikia ebanafunsi bae bamushisha mbu: «eMuhani, mbeni ebinwa mbi byebange ǒngo byasetayo mu ani matu, na buni nge busekiayo ebea basiba mbu ebinwa mbyo biri keya?» 8Yesu wasako bo mbu: «Mukohyanga, kiro muhuswa na mwea uti-uti. Bushwa mbu bea bingi baseyayo mu rina rani n'ieba mbu ibo ke nge Kirisitu, entambi yameya! Ina kiro mumisa bo. 9Mukukiayo murukira emyasi y'ebita n'ebushokoshoko, kiro musubahi bushwa mbu ebiti mbyo byakomenwa kasa isungwa, ematu ngo echuo kisebeseyo ntíchahiere nensi engendero ya cho.»
10Yesu weba tu mbu: «Bea ba chuo kima basekwanayo na bea ba kimpe chuo, na bwami buma busekwanayo na bumpe bwami. 11Kwasetayo karingiri kakiri mu chuo. Kusebeseyo rwaka rwingi na makoni mingi asuma mu byuo. Kusesungwayo biteerere bya bishisharo ituka ekwio.
12«Ina kubusondori n'erisungwa r'ebinwa mbyo, ebea bendi babuminange n'ibunubya, kongo musambishwa mu masinangoki n'ibutaa mu mwiyororo. Na basenda baburiange tu mu makako ebami n'ebakwakare b'echuo bushwa nani. 13Ietere mbyo, mukwenda banu mwebange ebinwa ebyosi banu bushwa nani. 14Kino nge chasibiriranga banu: kiro mwinubya na kwishishirisha mbu mbeni buni nge busenda bwebange banu. 15Bushwa mbu ani ngi nendi nibuninkange ebinwa by'ebutesa ebisenda byebange banu, ieya n'entambi nji ebarenda binu batendi bakochange ienga byo abe itina byo. 16N'ebabuti binu, na basike binu, na banakinu, na bira binu nabo basebusiburayo kuri ebakwakare. Na bima munkati ninu basekererwayo ubansa rw'ikwa. 17Ebea bati basebubaayo bushwa n'erina rani. 18Ina mu biti mbyo, kusira anga n'uteo ruma rw'emintwe yinu indu ruseriminayo. 19Mwendi mwiandiya, bushwa nancho mukushukayayo ebuingo bwinu.»
Erishamburwa ra ku Yerusaremu
(Mat 24.15-21; Mar 13.14-19)
20Kuruma nampo, Yesu wenderana n'ieba mbu: «Mukukiayo musunga ebasura batimba erubungu rwa ku Yerusaremu, musibanga mbu ngie ruri kashamburwa. 21Nampo, ebea mbi basebeseyo mu chuo cha ku Yundea babeki mu sangu, nambi basebeseyo ku Yerusaremu batuke kuro. Nambi basebeseyo mu tunsari kiro bakuruka tu.
22«Bushwa mbu ematu ngo ngyasekiayo Ongo wahukumu ebea kongo ebiti mbi byebwanga mu Mitiro Yashurukara bibererere.#21.22 Soma Ose 9.7. 23Mu matu ngo, risebeseyo buhanya kuri ebamina barito na mbi barishange ebana mabere, bushwa mbu kusebeseyo minubo mingi mu chuo ncho. Na Ongo wasesheayo ebea mbo mbu iwe wasubuke bo. 24Bima baseshurwayo mu myere na bampe basendayo rereke mu byuo by'esankaro siti. Nambi ntíbosi Ongo basenantayo ku Yerusaremu ieya nambu busekiayo ematu aninkwanga bo arumira.»
Erikuruka ra Yesu Kirisitu
(Mat 24.29-31; Mar 13.24-27)
25Kuruma nampo, Yesu weba tu mbu: «Ebea basesungayo biteerere mu mwishi, mu mweri na mu sankekeni. Na hano hansi, ebea basekwayo koha n'itingirwa na boba bushwa emibimbi n'emirurumo y'enyansa. 26Ebea baseriminyayo ebwenge bushwa n'eboba mu rianikira ebinwa mbi bisetayo mu chuo. Bushwa mbu ebiti mbi biri n'emaa mu mbingu bisetenjiwayo. 27Kuruma nampo, ebea basenisungayo ani eMwana w'eMwea bweyange ani mu rutundo na maa hima na busime bwingi. 28Mu ntambi ebinwa mbyo bisekiayo byabucha isungwa, musimananga n'ibese na maa, bushwa mbu ematu inu erishukara ameya.»
Ebiteerere byerikuruka ra Yesu
(Mat 24.32-35; Mar 13.28-31)
29Kuruma nampo, Yesu wakere ebea emushinga uno mbu: «Mwihanisangǎ mu muti w'etini n'emiti impe: 30Entambi nji yasunga banu emasani ao abucha ishuka, banu musibanga mbu ekiranga chakonda ngie kiri keya. 31Nge bumbo, mukukiayo musungǎ ebinwa mbyo ngie byetange, musibiriranga mbu eBwami bwa Ongo ngie buri keya. 32Nibwirengi muriira mbu: ebinwa bino biseberereshiwayo na bea bima b'ematu ano nensi nti tíbakwa. 33Embingu n'echuo bisetayo, ina ebinwa byani ibyo bitetiyo karankuso.»
Erotu rwa hende ruseyayo nsisu
34Kuruma nampo, Yesu weba mbu: «Mukohyanga! Emitima yinu kiro yabinduke n'embusha y'erisonda irisa ringi, n'itamira, na kwinubya bushwa n'ebuingo bwinu. Kuba ntímukae shu, erotu rwa hende 35rusebeseyo imbu bukianga emuteo watinge. Bushwa mbu erotu ndo ruseyayo, rusesarimyayo ebea bati b'echuo. 36Mwendi mukohya na mwendi muhema kira ntambi. Murikia mbo, mukushee emaa eribeka ebinwa mbi biseyayo n'emaa erisimana mu makako nani, ani eMwana w'eMwea37Kirotu ndu rwakianga Yesu wabesenga usibanange mwihana ebea mu Numba ya Ongo, wabesenga wendanga kasame mu rou rw'eMiseituni. 38Na kirotu muranga-ranga, ebea bati babesenga beyanga kamurukira ha Numba ya Ongo.

Currently Selected:

Ruka 21: nyj

Highlight

Share

Copy

None

Want to have your highlights saved across all your devices? Sign up or sign in