Markə 8
8
Jezu kô rəgo kə azü sake vəna
(Matiɔ 15.32-39)
1Tə̂ alɔ nə səkɔ, ə̈bə̈ əgerə ə̂kpû azü kwâtə̂ndje ə ngbô tə̂ əndje gâ tə̂ nə. Ə̂në ərə ndə kə pa əndje zɨ nə gûta gû ne kɔ, Jezu ê atrawaya nə̂ ye ə pâ kə əndje ə pa: 2«Əyo ə̂kpû azü səye mbrə əmə ə mbrə, mbrə ə̂në ə mâ əlo vəta gâ ye ə̂në əndje dâka pə ngotə̂ əmə kotəye kɔ, â əndje sə sə də ə̈bə̈ ərə bale ndə kə zɨ nə ne. 3Kədə mə grɔ əndje ndə kə pa əndje gu na ye gâ ndə əndje â ko rəgo ko kə əndje ne, əndje sə kə mɔ də əgo lə äwä, mbrə ə̂në alabə̈ əndje tô ngrʉ̂ â nâ kɔ.» 4Atrawaya nə̂ ye nə kîrə əpʉ kə ətshə ə pa: «Ə̂në a sə koye lə ngbûndû kɔ, a sə kə sɔtə̂ rəgo nə kotâ ndə kə ko kə əndje ndə kə pa əndje zɨ ka tshelə əndje su?» 5Jezu yû əndje ə pa: «E sə də mapa vəkɔ?» Əndje kîrə əpʉ kirə kə ətshə ə pa: «Mindû amanə bishi.»
6Bale, tshə zâ ama kə azü nə ndə kə pa əndje sə gâ tʉ gâ tə̂ ashɔ. Mandânə, tshə kô amapa nə mindû amanə bishi nə ə zâ mərshe kə Ndjapä, ə ngɔ̂ tshelə nə ə kô kə atrawaya nə̂ ye nə ndə kə pa əndje kru tshelə nə tə̂ azü nə, â əndje krû tshelə nə tə̂ ə̂kpû azü nə. 7Əndje sə̂ ndje də alabə̈ aaya agiangû. Jezu ê ə̂rɔ̂ əpʉ gâ pâ agiangû səkɔ ə pâ kə atrawaya nə̂ ye nə ə pa əndje kru tshelə agiangû nə ndje tə̂ ə̂kpû azü nə. 8Əndje zɨ̂ rəgo nə tshelə əndje sû. Atrawaya nə rɔ̂ ə̂dû aə̈ndö arəgo nə ə sû kakli mindû amanə bishi. 9Azü nə sə̂ mata sake vəna (4 000). Mandânə, Jezu grɔ̂ əndje ndə kə pa əndje gu na ye gâ ndə əndje. 10Trale, mandânə, tshə ô gâ lə əgerə âgbâ də atrawaya nə̂ ye nə ə nâ mâ lə ashɔ əgɔ Daləmanuta.
Afariza yû Jezu ə pa tshə mbrə ə̈bə̈ ərə ə̈lü
(Matiɔ 16.1-4)
11 Afariza wûtu â vɔ̂tə̂ kə pa ashera də Jezu mbrə ə̂në əndje lê ətshə ə lê. Əndje yû ətshə ə pa tshə ma ə̈bə̈ ərə ə̈lü ndə kə yisə̂ nə ə pa Ndjapä kə wlâ əne kɔ. 12Jezu tɔ̂ foo tə âgbɔ̂ ə pa: «Mbrə yekɔ də̂ azü tshe kpəsəye yu tshuku ərə ə̈lü kɔ? Djatra əpʉ, mə pa kə e: əndje sə sə kə wu ə̈bə̈ ərə ə̈lü bale ne.» 13Mandânə, tshə kâtə̂ əndje tʉ ə ô gâ lə əgerə âgbâ â gbô ə̂ngû nə djoko ətshî.
Atrawaya djî tshelə əpʉ nə̂ Jezu djî bale ne
(Matiɔ 16.5-12)
14Ə̂sə̂ amapa ndə kə pa atrawaya nə ko djêrə əndje gâ ye, â əndje sə̂ kʉ də mapa bale ndə əndje lə əgerə âgbâ nə. 15Jezu zâ ama kə əndje ə pa: «Ala e në tə̂ əyï mapa nə̂ Afariza də əyï mapa nə̂ Erɔdə.» 16Atrawaya nə vɔ̂tə̂ kə pa ashera lə takpa tə̂ əndje mbrə ə̂në əndje sə̂ sə̂ də mapa ne kɔ.
17Jezu wûsə̂ əpʉ ə̂në əndje sə̂ kə pa nə lə takpa tə̂ əndje kɔ ə pâ kə əndje ə pa: «Mbrə yekɔ də̂ e sə kə pa ashera lə takpa tə̂ e mbrə mapa ə̂në e sə sə də nə ne kɔ? E te te pa ə wusə̂ ərə ne a? E dji tshelə âdâ əpʉ nə dji ne a? Lɔsu e gbɔ ə gbɔ a? 18Ala e sə tə̂ nə, e wu ərə wu ne a? Ətu e sə tə̂ nə, e dji əpʉ dji ne a? Ə̂sə̂ ərə sə̂ te te gâ lə e ne a? 19Alɔ ə̂në mə ngɔ̂ tshelə amapa mindû ndə kə kru tshelə nə tə̂ azü sake mindû (5 000) kɔ, ə̂dû ə̈ndö nə sû kakli vəkɔ â e kô ə gû na ye də nə kɔ?» Əndje pâ kə ətshə ə pa: «Kakli morofo amanə bishi.» 20Jezu kwâtə̂ye ə yû əndje ə pa: «Alɔ ə̂në mə ngɔ̂ tshelə amapa mindû amanə bishi ndə kə kru tshelə nə lə takpa tə̂ azü sake vəna (4 000) kɔ, ə̂dû ə̈ndö nə sû kakli vəkɔ â e kô ə gû na ye də nə kɔ?» Əndje kîrə əpʉ kə ətshə ə pa: «Mindû amanə bishi.» 21Bale, Jezu yû əndje ə pa: «E te te pa ə dji tshelə nə ne a?»
Jezu grɔ̂ rəka tə̂ ə̈bə̈ əyïbula mâ Betəsayida
22Jezu də atrawaya nə̂ ye nə yî kumu əndje mâ Betəsayida. Alabə̈ azü zâ ə̈bə̈ əyïbula ə nâ də ətshə kə Jezu nə, ə kɨ̂ ə̂sə̂ əyo tə̂ əndje kə ətshə ndə kə pa tshə goro ətshə. 23Jezu têgbɔ kəna ye ə wûtu də ətshə lagɔ nə. Mandânə, tshə mâ ngrusu gâ lə ala ye ə zâ kəna ye gâ pâ ye ə yû ətshə ə pa: «Bə wu ə̈bə̈ ərə a?» 24Əyïbula nə vrû ala ye ə pa: «Mə wu azü, bale əndje sə mata aayɔ ə̂në ə sə kə na ana.» 25Jezu zâ kəna ye kwatə̂ye gâ pâ ala ye nə, əyïbula nə lîshi ngbʉ̂, ala ye sɔ̂ â tshə lîshi tə ə̂rɔ̂nə. 26Mandânə, Jezu pâ tshə gu na ye ə pâ kə ətshə ə pa: «Gü gü gâ lagɔ nə ne.»
Piarə pâ Jezu sə tə Kristə
(Matiɔ 16.13-20; Luki 9.18-21)
27Mandânə, Jezu də atrawaya nə̂ ye nə nâ na ye lə aaya aəgɔ ə̂në ə sə̂ trö də gala Sezare nə̂ Flipə kɔ. Lə äwä, Jezu yû əndje ə pa: «Azü pa mə sə tə əde?» 28Əndje kîrə əpʉ kə ətshə ə pa: «Alabə̈ nə pa bə sə tə Zââ Batistə, alabə̈ əndje pa bə sə tə Eli, alabə̈ aata əndje pa ə̈bə̈ awopandəma Ndjapä.» 29Bale, Jezu yû əndje ə pa: «Ka ənə̂ e, e pa mə sə tə əde?» Piarə kîrə əpʉ ə pa: «Əbə, bə də̂ Kristə.» 30Bale, Jezu ngâ kə əndje tə bandanə ə pâ əndje pa ndə nə pa kə ə̈bə̈ əzü bale ne.
Jezu pâ əne sə kə tshu â she
(Matiɔ 16.21-23; Luki 9.22)
31Mandânə, Jezu vɔ̂tə̂ kə yisə̂ əpʉ kə atrawaya nə̂ ye ə pa: «Əgblə nə̂ Əzü lï ndə kə wu əyo tə bandanə. Aâgbɔ̂ azü də aâgbɔ̂ azü nə̂ aawotokrɔ gâ ndə aawoyisə̂ âgbɔ̂ əpʉ nə̂ Mayïzə sə kə wəra tə̂ əndje tə̂ ye, əndje sə kə wo ətshə, tshə sə kə she nə tə̂ vəta əlo nə.» 32Tshə pâ əpʉ səkɔ kə əndje orâ orâ. Piarə nə zâ ətshə ə gî tə̂ ye də ətshə teashe gashe â vɔ̂tə̂ kə nga kə ətshə. 33Bale, Jezu dô tə̂ ye ə wû atrawaya nə̂ ye nə ə ngâ kə Piarə nə ə pa: «Gï tə̂ zə ngrʉ̂ gashe tə̂ əmə, Sataa! Mbrə ə̂në kə tegbɔ kumu zə sə sə tə ənə̂ Ndjapä ne, bale, ə sə tə ənə̂ azü.»
Atrawaya lï ndə kə sə trö ndə kə tshu mata Jezu
(Matiɔ 16.24-28; Luki 9.23-27)
34Mandânə, Jezu ê ə̂kpû azü nə də atrawaya nə̂ ye nə ə pâ kə əndje ə pa: «Kədə əzü kə yində kə na mandâ əmə, tshə wə̈ra tə̂ ye tə̂ ye də ə̂tə̂ ye, ə zä masheyɔ nə̂ ye ka ə za äwä əmə. 35Əzü ə̂në tshə yində kə bata əwu ye, tshə sə kə tshu nə. Bale, əzü ə̂në tshə sə trö ndə kə tshu nə mbrə əmə, mbrə Ə̂rɔ̂ Əpʉ, tshə sə kə sə tə sorô. 36Kədə ə̈bə̈ əzü kə sɔtə̂ aərə tshepashɔ səye nɔ̂ â ndɨ əwu ye də ə̂tə̂ ye, ərə yekɔ də̂ tshə sə kə sɔtə̂ nə mandânə? 37Ərə yekɔ də̂ əzü lï ndə kə za nə ndə kə yɔ də sorô? 38Mbrə ə̂në kədə əzü kə mbrə gana əmə, mbrə əpʉ nə̂ əmə lə ala azü tshe kpəsəye, ə̂në əndje za lɔsu əndje za kʉ kə Ndjapä ne kɔ ə sə tə alayïnyaka kɔ, Əgblə nə̂ Əzü sə ndje kə mbrə gana lə ala ye, alɔ ə̂në tshə sə kə yi kumu ye lə ə̂yî Abä nə də atrawaya nə̂ Ndjapä ə̂në əndje sə kpî kɔ.»
Currently Selected:
Markə 8: liy
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation
Markə 8
8
Jezu kô rəgo kə azü sake vəna
(Matiɔ 15.32-39)
1Tə̂ alɔ nə səkɔ, ə̈bə̈ əgerə ə̂kpû azü kwâtə̂ndje ə ngbô tə̂ əndje gâ tə̂ nə. Ə̂në ərə ndə kə pa əndje zɨ nə gûta gû ne kɔ, Jezu ê atrawaya nə̂ ye ə pâ kə əndje ə pa: 2«Əyo ə̂kpû azü səye mbrə əmə ə mbrə, mbrə ə̂në ə mâ əlo vəta gâ ye ə̂në əndje dâka pə ngotə̂ əmə kotəye kɔ, â əndje sə sə də ə̈bə̈ ərə bale ndə kə zɨ nə ne. 3Kədə mə grɔ əndje ndə kə pa əndje gu na ye gâ ndə əndje â ko rəgo ko kə əndje ne, əndje sə kə mɔ də əgo lə äwä, mbrə ə̂në alabə̈ əndje tô ngrʉ̂ â nâ kɔ.» 4Atrawaya nə̂ ye nə kîrə əpʉ kə ətshə ə pa: «Ə̂në a sə koye lə ngbûndû kɔ, a sə kə sɔtə̂ rəgo nə kotâ ndə kə ko kə əndje ndə kə pa əndje zɨ ka tshelə əndje su?» 5Jezu yû əndje ə pa: «E sə də mapa vəkɔ?» Əndje kîrə əpʉ kirə kə ətshə ə pa: «Mindû amanə bishi.»
6Bale, tshə zâ ama kə azü nə ndə kə pa əndje sə gâ tʉ gâ tə̂ ashɔ. Mandânə, tshə kô amapa nə mindû amanə bishi nə ə zâ mərshe kə Ndjapä, ə ngɔ̂ tshelə nə ə kô kə atrawaya nə̂ ye nə ndə kə pa əndje kru tshelə nə tə̂ azü nə, â əndje krû tshelə nə tə̂ ə̂kpû azü nə. 7Əndje sə̂ ndje də alabə̈ aaya agiangû. Jezu ê ə̂rɔ̂ əpʉ gâ pâ agiangû səkɔ ə pâ kə atrawaya nə̂ ye nə ə pa əndje kru tshelə agiangû nə ndje tə̂ ə̂kpû azü nə. 8Əndje zɨ̂ rəgo nə tshelə əndje sû. Atrawaya nə rɔ̂ ə̂dû aə̈ndö arəgo nə ə sû kakli mindû amanə bishi. 9Azü nə sə̂ mata sake vəna (4 000). Mandânə, Jezu grɔ̂ əndje ndə kə pa əndje gu na ye gâ ndə əndje. 10Trale, mandânə, tshə ô gâ lə əgerə âgbâ də atrawaya nə̂ ye nə ə nâ mâ lə ashɔ əgɔ Daləmanuta.
Afariza yû Jezu ə pa tshə mbrə ə̈bə̈ ərə ə̈lü
(Matiɔ 16.1-4)
11 Afariza wûtu â vɔ̂tə̂ kə pa ashera də Jezu mbrə ə̂në əndje lê ətshə ə lê. Əndje yû ətshə ə pa tshə ma ə̈bə̈ ərə ə̈lü ndə kə yisə̂ nə ə pa Ndjapä kə wlâ əne kɔ. 12Jezu tɔ̂ foo tə âgbɔ̂ ə pa: «Mbrə yekɔ də̂ azü tshe kpəsəye yu tshuku ərə ə̈lü kɔ? Djatra əpʉ, mə pa kə e: əndje sə sə kə wu ə̈bə̈ ərə ə̈lü bale ne.» 13Mandânə, tshə kâtə̂ əndje tʉ ə ô gâ lə əgerə âgbâ â gbô ə̂ngû nə djoko ətshî.
Atrawaya djî tshelə əpʉ nə̂ Jezu djî bale ne
(Matiɔ 16.5-12)
14Ə̂sə̂ amapa ndə kə pa atrawaya nə ko djêrə əndje gâ ye, â əndje sə̂ kʉ də mapa bale ndə əndje lə əgerə âgbâ nə. 15Jezu zâ ama kə əndje ə pa: «Ala e në tə̂ əyï mapa nə̂ Afariza də əyï mapa nə̂ Erɔdə.» 16Atrawaya nə vɔ̂tə̂ kə pa ashera lə takpa tə̂ əndje mbrə ə̂në əndje sə̂ sə̂ də mapa ne kɔ.
17Jezu wûsə̂ əpʉ ə̂në əndje sə̂ kə pa nə lə takpa tə̂ əndje kɔ ə pâ kə əndje ə pa: «Mbrə yekɔ də̂ e sə kə pa ashera lə takpa tə̂ e mbrə mapa ə̂në e sə sə də nə ne kɔ? E te te pa ə wusə̂ ərə ne a? E dji tshelə âdâ əpʉ nə dji ne a? Lɔsu e gbɔ ə gbɔ a? 18Ala e sə tə̂ nə, e wu ərə wu ne a? Ətu e sə tə̂ nə, e dji əpʉ dji ne a? Ə̂sə̂ ərə sə̂ te te gâ lə e ne a? 19Alɔ ə̂në mə ngɔ̂ tshelə amapa mindû ndə kə kru tshelə nə tə̂ azü sake mindû (5 000) kɔ, ə̂dû ə̈ndö nə sû kakli vəkɔ â e kô ə gû na ye də nə kɔ?» Əndje pâ kə ətshə ə pa: «Kakli morofo amanə bishi.» 20Jezu kwâtə̂ye ə yû əndje ə pa: «Alɔ ə̂në mə ngɔ̂ tshelə amapa mindû amanə bishi ndə kə kru tshelə nə lə takpa tə̂ azü sake vəna (4 000) kɔ, ə̂dû ə̈ndö nə sû kakli vəkɔ â e kô ə gû na ye də nə kɔ?» Əndje kîrə əpʉ kə ətshə ə pa: «Mindû amanə bishi.» 21Bale, Jezu yû əndje ə pa: «E te te pa ə dji tshelə nə ne a?»
Jezu grɔ̂ rəka tə̂ ə̈bə̈ əyïbula mâ Betəsayida
22Jezu də atrawaya nə̂ ye nə yî kumu əndje mâ Betəsayida. Alabə̈ azü zâ ə̈bə̈ əyïbula ə nâ də ətshə kə Jezu nə, ə kɨ̂ ə̂sə̂ əyo tə̂ əndje kə ətshə ndə kə pa tshə goro ətshə. 23Jezu têgbɔ kəna ye ə wûtu də ətshə lagɔ nə. Mandânə, tshə mâ ngrusu gâ lə ala ye ə zâ kəna ye gâ pâ ye ə yû ətshə ə pa: «Bə wu ə̈bə̈ ərə a?» 24Əyïbula nə vrû ala ye ə pa: «Mə wu azü, bale əndje sə mata aayɔ ə̂në ə sə kə na ana.» 25Jezu zâ kəna ye kwatə̂ye gâ pâ ala ye nə, əyïbula nə lîshi ngbʉ̂, ala ye sɔ̂ â tshə lîshi tə ə̂rɔ̂nə. 26Mandânə, Jezu pâ tshə gu na ye ə pâ kə ətshə ə pa: «Gü gü gâ lagɔ nə ne.»
Piarə pâ Jezu sə tə Kristə
(Matiɔ 16.13-20; Luki 9.18-21)
27Mandânə, Jezu də atrawaya nə̂ ye nə nâ na ye lə aaya aəgɔ ə̂në ə sə̂ trö də gala Sezare nə̂ Flipə kɔ. Lə äwä, Jezu yû əndje ə pa: «Azü pa mə sə tə əde?» 28Əndje kîrə əpʉ kə ətshə ə pa: «Alabə̈ nə pa bə sə tə Zââ Batistə, alabə̈ əndje pa bə sə tə Eli, alabə̈ aata əndje pa ə̈bə̈ awopandəma Ndjapä.» 29Bale, Jezu yû əndje ə pa: «Ka ənə̂ e, e pa mə sə tə əde?» Piarə kîrə əpʉ ə pa: «Əbə, bə də̂ Kristə.» 30Bale, Jezu ngâ kə əndje tə bandanə ə pâ əndje pa ndə nə pa kə ə̈bə̈ əzü bale ne.
Jezu pâ əne sə kə tshu â she
(Matiɔ 16.21-23; Luki 9.22)
31Mandânə, Jezu vɔ̂tə̂ kə yisə̂ əpʉ kə atrawaya nə̂ ye ə pa: «Əgblə nə̂ Əzü lï ndə kə wu əyo tə bandanə. Aâgbɔ̂ azü də aâgbɔ̂ azü nə̂ aawotokrɔ gâ ndə aawoyisə̂ âgbɔ̂ əpʉ nə̂ Mayïzə sə kə wəra tə̂ əndje tə̂ ye, əndje sə kə wo ətshə, tshə sə kə she nə tə̂ vəta əlo nə.» 32Tshə pâ əpʉ səkɔ kə əndje orâ orâ. Piarə nə zâ ətshə ə gî tə̂ ye də ətshə teashe gashe â vɔ̂tə̂ kə nga kə ətshə. 33Bale, Jezu dô tə̂ ye ə wû atrawaya nə̂ ye nə ə ngâ kə Piarə nə ə pa: «Gï tə̂ zə ngrʉ̂ gashe tə̂ əmə, Sataa! Mbrə ə̂në kə tegbɔ kumu zə sə sə tə ənə̂ Ndjapä ne, bale, ə sə tə ənə̂ azü.»
Atrawaya lï ndə kə sə trö ndə kə tshu mata Jezu
(Matiɔ 16.24-28; Luki 9.23-27)
34Mandânə, Jezu ê ə̂kpû azü nə də atrawaya nə̂ ye nə ə pâ kə əndje ə pa: «Kədə əzü kə yində kə na mandâ əmə, tshə wə̈ra tə̂ ye tə̂ ye də ə̂tə̂ ye, ə zä masheyɔ nə̂ ye ka ə za äwä əmə. 35Əzü ə̂në tshə yində kə bata əwu ye, tshə sə kə tshu nə. Bale, əzü ə̂në tshə sə trö ndə kə tshu nə mbrə əmə, mbrə Ə̂rɔ̂ Əpʉ, tshə sə kə sə tə sorô. 36Kədə ə̈bə̈ əzü kə sɔtə̂ aərə tshepashɔ səye nɔ̂ â ndɨ əwu ye də ə̂tə̂ ye, ərə yekɔ də̂ tshə sə kə sɔtə̂ nə mandânə? 37Ərə yekɔ də̂ əzü lï ndə kə za nə ndə kə yɔ də sorô? 38Mbrə ə̂në kədə əzü kə mbrə gana əmə, mbrə əpʉ nə̂ əmə lə ala azü tshe kpəsəye, ə̂në əndje za lɔsu əndje za kʉ kə Ndjapä ne kɔ ə sə tə alayïnyaka kɔ, Əgblə nə̂ Əzü sə ndje kə mbrə gana lə ala ye, alɔ ə̂në tshə sə kə yi kumu ye lə ə̂yî Abä nə də atrawaya nə̂ Ndjapä ə̂në əndje sə kpî kɔ.»
Currently Selected:
:
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation