Markə 12
12
Aəmbrʉ aawodjo kəndɨ vinyə
(Matiɔ 21.33-46; Luki 20.9-19)
1Mandânə, Jezu vɔ̂tə̂ kə pa əpʉ kə əndje lə aəpʉ kəwû. Tshə pâ: «Ə̈bə̈ koshe djô kəndɨ vinyə ə tɔ̂ ângâ dji ndʉ nə ə djî kudû lə əkpʉ ndə kə pʉ aə̂lê vinyə nə lə nə. Tshə mbrə̂ ə̈bə̈ ətshe gbrâ mâ lafɔ ndə kə pa əzü ka gâ pâ nə ka ə lishi pâ kəndɨ nə. Mandânə, tshə zâ kəndɨ nə gâ lə kəna alabə̈ aawodjo kəndɨ vinyə ə rô lə ə̈bə̈ əgɔ ngrʉ̂. 2Tə̂ tshekɨ kə ko aə̂lê vinyə nə, tshə wlâ ə̈bə̈ əyïkosəra kə aawodjo kəndɨ vinyə nə ndə kə pa əndje ko ə̂sə̂ aə̂lê vinyə nə̂ ye nə kə ətshə. 3Bale, əndje zâ ətshə ə dâ ətshə ə grɔ̂ ətshə də tshelə kəna ye ambanə. 4Tshə kwâtə̂ye ə wlâ ə̈bə̈ ata əyïkosəra kə aawodjo kəndɨ vinyə nə. Əndje dâ tshelə kumu ye ə gû ətshə. 5Tshə wlâ kwatə̂ye ə̈bə̈ vəta əyïkosəra nə. Əndje wô ətshə. Mandânə, əndje mbrə̂ kʉtə̂ marä tə̂ ərə səkɔ tə̂ alabə̈ alayïkosəra nə. Əndje dâ alabə̈ nə ə wô alabə̈ əndje. 6Əzü bale ə̂në tshə dâka pə je kə əyïnga kəndɨ nə kɔ kə də̂ kʉtə̂ ɨrɨ nə ə̂në tshə yîndə ye tə bandanə kɔ. Tshə wlâ ətshə djoko mandânə kə əndje ə pâ mâ lə ye ə pa: “Əndje kpe rawa ɨrɨ əmə je!” 7Bale, aawodjo kəndɨ nə pâ lə takpa tə̂ əndje ə pa: “E wü-a! Ətshə ə̂në tshə sə kə sə tə əyïnga kəndɨ nə mandâ abä nə kɔ kə səye! E nä gâ əmə, a wö ətshə ka kəndɨ nə sə tə ənə̂ əzə̂.” 8Â əndje têgbɔ ətshə ə wô ətshə ə wlî əko ye lə kəndɨ nə gashu.» 9Bale, Jezu yû əndje ə pa: «Əyïnga kəndɨ nə sə kə mbrə yekɔ? Tshə sə kə na ə wo aawodjo kəndɨ vinyə nə ə za kəndɨ nə gâ lə kəna alabə̈ aata azü kpî. 10E dɨ̂ əpʉ səye dɨ̂ lə Fraka nə̂ Ndjapä ne a? Əpʉ nə pâ:
“Əkpʉ ə̂në aawombrə anda wə̂ra tə̂ əndje tə̂ nə gâ ye kɔ
ə dô tə̂ ye tə âgbɔ̂ əkpʉ ə̂në ə sə tə ə̈nü anda nə kɔ.
11Ə sə tə ərə ə̂në Əyïlingû kə mbrə̂,
ərə nə fʉ lə ala əzə̂ ə rô pâ nə.”»#12.11 Wu Ətsh 118.22-23.
12Aâgbɔ̂ azü nə̂ Ajuwufu prâ äwä ndə kə tegbɔ Jezu, mbrə ə̂në əndje wûsə̂ nə ə pa tshə pâ əpʉ kəwû səkɔ mbrə alane. Bale, awa ə̂kpû azü nə mâ əndje. Rəkɔ, əndje tshî ətshə tʉ ə gû na ye.
Âgbɔ̂ əpʉ zâ äwä kə əzü ndə kə piyi lapɔ a?
(Matiɔ 22.15-22; Luki 20.20-26)
13Əndje wlâ alabə̈ Afariza də azü tshelə aangbɔ nə̂ Erɔdə kə Jezu ndə kə pa əndje le ətshə ə le ka ə sɔtə̂ ə̈bə̈ əpʉ lə ama ye. 14Əndje nâ ə pâ kə ətshə ə pa: «Awoyisə̂ ərə, ä wusə̂ nə ə pa bə pa kʉtə̂ djatra əpʉ, bə mbrə awa əzü mbrə bale ne ə mbrə gana ala azü mbrə ne. Bale, bə yisə̂ djatra əpʉ gâ pâ kə mâ tə̂ əzü ə̂në Ndjapä yində nə kɔ. Pä kə ä: âgbɔ̂ əpʉ zâ äwä kə əzü ndə kə pa tshə piyi lapɔ kə Sezarə, âgbɔ̂ əyïngerə əgɔ Rɔmə a? Ä lï ndə kə piyi nə wala ä piyi nə pi ne a?»
15Bale, Jezu wûsə̂ əmbrʉ əpʉ ə̂në ə sə̂ mâ tə̂ lɔsu əndje kɔ, tshə kîrə əpʉ kə əndje ə pa: «E yində kə le əmə ə le mbrə yekɔ? E zä ə̈bə̈ ngbengewle ngendja kə əmə mə wu.» 16Əndje zâ ə̈bə̈ ngbengewle ngendja ə nâ də nə â Jezu yû əndje ə pa: «Tshitshi əde də əɨrɨ əde kə sə̂ la nə kɔ?» Əndje pâ: «Ənə̂ Sezarə.» 17Bale, tshə pâ kə əndje ə pa: «E kö aərə ə̂në ə sə tə ənə̂ Sezarə kɔ kə Sezarə, ə kö aərə ə̂në ə sə tə ənə̂ Ndjapä kɔ kə Ndjapä nə.» Kumu əndje kpê pâ əndu əndje mandâ əpʉ nə ə̂në tshə pâ kɔ.
Akuzu ə she je a?
(Matiɔ 22.23-33; Luki 20.27-40)
18 Asadusa ə̂në əndje pa akuzu sə sə kə she nə ne kɔ, əndje nâ gâ tə̂ Jezu ə yû ətshə də əpʉ səye ə pa: 19«Awoyisə̂ ərə, Mayïzə tâ əpʉ gâ lə fraka kə əzə̂ ə pa: “Kədə ə̈bə̈ əzü kə tshu â tshî əwɔ nə tʉ â sə sə də aneshe ne, aye nə sə kə za yashe nə ndə kə pa tshə zu aneshe də əɨrɨ kuzu nə.”#12.19 Wu Əpʉ 25.5-6. 20Kandää, alabə̈ alaye azü mindû amanə bishi sə̂ je. Angbʉlî əzü nə zâ yashe ə zû angwa ye zû ne ə tshû. 21Bishi əzü nə zâ yashe koya nə ə tshû ə sə̂ sə̂ də əgblə ne. Vəta əzü nə tshû kʉ rə. 22Əndje mindû amanə bishi nə nɔ̂ zâ yashe nə bale bale ə tshû ə zû aneshe zû ne. Mandâ əndje nɔ̂, yashe nə tshû ndje. 23Tə̂ alɔ kə she akuzu, əde lə takpa tə̂ əndje də̂ yashe nə sə kə sə tə ənə̂ ye? Mbrə ə̂në əndje mindû amanə bishi nə nɔ̂ zâ ətshə tə yashe gâ ye kɔ?» 24Jezu pâ kə əndje ə pa: «E tshî äwä əpʉ nə tʉ gâ ye mbrə ə̂në e wusə̂ tshelə âdâ Fraka nə̂ Ndjapä wala awlra nə̂ Ndjapä wu ne. 25Alɔ ə̂në akuzu sə kə she nə, akoshe sə sə kə ko ayashe ne wala ayashe sə sə kə ko akoshe ne. Bale, əndje sə kə sə mata atrawaya nə̂ Ndjapä mâ lafɔ. 26Bale, gâ pâ əpʉ kə she akuzu, e dɨ̂ dɨ̂ əpʉ nə lə fraka ə̂në Mayïzə tâ kɔ ne a? Alɔ ə̂në Ndjapä pâ əpʉ kə ətshə trö tə̂ tshelə ə̂mî kɔ ə pa: “Mə də̂ Ndjapä nə̂ Abraamo, Ndjapä nə̂ Izakə, Ndjapä nə̂ Jakɔbə.” 27Ndjapä sə sə tə Ndjapä nə̂ akuzu ne, bale tshə sə tə Ndjapä nə̂ asorô. E tshî äwä əpʉ nə tʉ hoâ gâ ye.»
Angbʉlî əpʉ lə âgbɔ̂ əpʉ nə̂ Mayizə kə də̂ ənə̂ta a?
(Matiɔ 22.34-40; Luki 10.25-28)
28Ə̈bə̈ awoyisə̂ âgbɔ̂ əpʉ nə̂ Mayïzə bale ə̂në tshə djî Jezu də Asadusa də ashera nə kɔ, wû ə pa Jezu kîrə əpʉ nə də äwänə kə əndje. Tshə nâ trö də Jezu nə ə yû ətshə ə pa: «Angbʉlî əpʉ lə âgbɔ̂ əpʉ nə̂ Mayïzə ə̂në ə rô ə̂dû nə nɔ̂ kɔ kə də̂ ənə̂ta a?» 29Jezu kîrə əpʉ ə pa: «Angbʉlî əpʉ nə kə səye: “Djï əpʉ səye kane, Isərayalə! Əyïlingû, tə Ndjapä nə̂ əzə̂, sə tə Âgbɔ̂ Əyïngerə kpiabale. 30Yïndə Əyïlingû tə Ndjapä nə̂ zə də lɔsu zə nɔ̂, də yîrə̂ zə nɔ̂, də kə wusə̂ ərə nə̂ zə nɔ̂, də awlra zə nɔ̂.”#12.30 Wu Əpʉ 6.4-5. 31Ənə̂ sə̂ ə̂në ə na mandânə kɔ kə səye: “Yïndə ngâ zə mata ə də əbə də ə̂tə̂ zə.”#12.31 Wu Əkrɔ 19.18. Ə̈bə̈ əpʉ ə̂në ə rô aəpʉ bishi səye kɔ gûta gû ne.» 32Awoyisə̂ âgbɔ̂ əpʉ nə pâ kə ətshə ə pa: «Ə̂rɔ̂nə, awoyisə̂ ərə! Əpʉ nə ə̂në bə pâ kɔ ə sə tə djatra əpʉ: Âgbɔ̂ Əyïngerə sə kʉ kpiabale. Ə̈bə̈ ata nə kpî tə̂ ye guta gu ne. 33Əzü bale bale â yində Ndjapä də lɔsu ye nɔ̂, də kə wusə̂ ərə nə̂ ye nɔ̂, də awlra ye nɔ̂ â yində ngâ nə mata ətshə də ə̂tə̂ ye, ə ro aagia nɔ̂ ə̂në əndje sho əndje gâ pâ gblaka kə Ndjapä də aərə nɔ̂ ə̂në azü ə ko kə Ndjapä kɔ.» 34Jezu wû ə pa tshə kîrə əpʉ nə tə̂ äwä kə wusə̂ ərə ə pâ kə ətshə ə pa: «Bə sə sə ngrʉ̂ tə̂ Əgɔngerə nə̂ Ndjapä ne.» Mandânə, ə̈bə̈ əzü bale mâ mâ əgo ndə kə yu ətshə də ə̈bə̈ əpʉ kwatəndje ne.
Kristə sə tə Âgbɔ̂ Əyïngerə nə̂ Davidə
(Matiɔ 22.41-46; Luki 20.41-44)
35Ə̂në Jezu sə̂ kə yisə̂ əpʉ lə Anda Ndjapä nə kɔ, tshə yû əpʉ ə pa: «Mbrə yekɔ də̂ aawoyisə̂ âgbɔ̂ əpʉ nə̂ Mayïzə sə kə pa əpʉ ə pa Kristə sə tə ɨrɨ Davidə kɔ? 36Davidə nə pâ əpʉ də ə̂tə̂ ye tə̂ äwä Âgbɔ̂ Yîrə̂ ə pa:
“Əyïlingû pâ kə Âgbɔ̂ Əyïngerə nə̂ əmə ə pa:
Sə̈ gâ tʉ gâ ndə ndəkɔ əmə,
ʉrrr ndjɔ mə ko alayïkowɔ nə̂ zə gâ tshekudu ə̈nü zə gâ ye kane.”#12.36 Wu Ətsh 110.1.
37Davidə nə də ə̂tə̂ ye ê ətshə tə “Âgbɔ̂ Əyïngerə”, rəkɔ ə ma atâ â Kristə nə ə sə tə ɨrɨ nə?»
E mbrə̈ aərə mbrə̈ mata aawoyisə̂ âgbɔ̂ əpʉ ne
(Matiɔ 23.1-36; Luki 20.45-47)
Ə̂kpû azü ə̂në əndje ngbâ ə ngbâ kɔ sə̂ kə dji əpʉ nə̂ Jezu nə də ə̂rû tə̂ lɔsu əndje. 38Tshə yîsə̂ əpʉ kə əndje ə pa: «E bäta tə̂ e ndə kə pa e sə sə mata aawoyisə̂ âgbɔ̂ əpʉ nə̂ Mayïzə ne. Əndje yində kə na ana kʉ də aə̈ngrʉ̈ aləba tə̂ əndje ə yində nə ə pa azü afɔ a ka ə bla alane tə̂ aətshe ə̂në azü ə kpu tə̂ əndje tə̂ nə kɔ. 39Əndje yində kə sə kʉ gâ pâ angende tshitshinə lə aanda aangbɔ â sə kʉ gâ ə̂sə̂ əgbro azü lə asandaga. 40Əndje sə kə ko aərə tshelə aanda nə̂ ayashe koya nɔ̂ tə̂ äwä əterə â ndə kə pa azü wu alane, əndje yu Ndjapä, əndje yu ətshə ʉrrr əndʉ nə dɨ̂. Ndjapä sə kə wa ngbanga gâ pâ əndje ə rô pâ nə.»
Yashe koya tə əyïəyo
(Luki 21.1-4)
41Jezu sə̂ gâ tʉ lə Anda Ndjapä, sandugu kə ko ngendja gâ lə nə sə̂ ətshi ye. Tshə sə̂ kə wu äwä ə̂në ə̂kpû azü nə sə̂ kə ko ngendja gâ lə sandugu nə kɔ. Alayïrishi ngbatshe kô əgerə ngendja gâ lə nə. 42Ə̈bə̈ yashe koya ə̂në tshə sə̂ tə əyïəyo kɔ nâ ndje də ə̂lê mea bishi ə̂në ə lî lî də pata bale ne kɔ ə kô gâ lə nə. 43Bale, Jezu ê atrawaya nə̂ ye ə pâ kə əndje ə pa: «Djatra əpʉ, mə pa kə e: yashe koya səye ə̂në tshə sə tə əyïəyo kɔ, tshə kô ngendja gâ lə sandugu nə ə rô ə̂dû azü nə nɔ̂ ə̂në əndje kô ngendja nə kɔ gâ ye. 44Mbrə ə̂në ə̂dû azü nə nɔ̂ kô tshepa ngendja ə̂në ərə kə mbrə də nə guta gu ne kɔ. Bale, ətshə, lə əyo nə̂ ye, tshə kô ngendja ə̂në tshə sə̂ də nə kɔ nɔ̂, ngendja nə̂ ye ndə kə zɨ də rəgo kɔ nɔ̂.»
Currently Selected:
Markə 12: liy
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation
