Matiɔ 13

Əpʉ awolu angwa rəgo

(Markə 4.1-9; Luki 8.4-8)

1Kʉ pə tə̂ alɔ nə səkɔ, Jezu wûtu lə anda ə nâ ə sə̂ gâ tʉ mâ tə̂ ama dala ə̂ngû əgɔ Galile. 2Ə̈bə̈ əgerə ə̂kpû azü ngbô tə̂ əndje gâ ngotə̂ ye â tshə ô gâ lə ə̈bə̈ əgerə âgbâ â sə̂ gâ tʉ. Azü nə kâ ənə̂ əndje mâ tə̂ ama ə̂ngû nə. 3Tshə pâ əpʉ kə əndje tə bandanə tə̂ äwä aəpʉ kəwû. Tshə pâ: «Ə̈bə̈ awolu ərə nâ gâ lə kəndɨ ndə kə lu angwa rəgo. 4Ə̂në tshə sə̂ kə lu angwa rəgo nə kɔ, alabə̈ nə yɔ̂ gâ ndʉ äwä, ayanu nâ ə dê nɔ̂. 5Alabə̈ nə yɔ̂ gâ pâ ashɔ badja ə̂në ashɔ nə mî mî ne kɔ. Angwa rəgo nə kô ə gêrə katshä, mbrə ə̂në ashɔ nə mî mî ne. 6Bale, ə̂në alɔ âfɔ ndə kə tɔ nə kɔ, ə tshû nɔ̂ ə ôrɔ mbrə ə̂në aəshe nə lî ashɔ lî tə ə̂rɔ̂nə ne. 7Alabə̈ nə yɔ̂ gâ lə gonge. Gonge nə gêrə ə wô rəgo nə nɔ̂. 8Alabə̈ nə yɔ̂ gâ lə ə̂rɔ̂ ashɔ. Ə kô ə lê: ə̈bə̈ nə lê ngbangbo bale (100), ə̈bə̈ nə lê zazü vəta, â ə̈bə̈ ata nə lê zazü bale də morofo.» 9Jezu pâ kwatə̂ye ə pa: «Əzü ə̂në tshə sə də ətu kə dji də əpʉ, tshə djï!»

Âdâ kə pa əpʉ nə̂ Jezu lə aəpʉ kəwû

(Markə 4.10-12; Luki 8.9-10)

10 Atrawaya nâ trö də ətshə ə yû ətshə ə pa: «Bə pa əpʉ kə əndje tə̂ äwä aəpʉ kəwû mbrə yekɔ?» 11Tshə kîrə əpʉ kə əndje ə pa: «Ndjapä zâ äwä kə e ndə kə pa e wusə̂ tshelə âdâ əpʉ kəwû Əgɔngerə tshelafɔ. Bale, ənə̂ əndje, Ndjapä zâ äwä nə zâ kə əndje bale ne. 12Mbrə ə̂në, əzü ə̂në tshə sə də ə̈bə̈ ərə ndə ye, əndje sə kə za ə̈bə̈ nə gâ pâ nə kə ətshə â tshə sə kə sə də ərə ro pâ nə. Bale, əzü ə̂në tshə sə sə də ə̈bə̈ ərə ndə ye ne, əndje sə kə za aya ərə ə̂në tshə sə də nə kɔ tə̂ ye. 13Âdârə ə̂në mə pa əpʉ kə əndje lə aəpʉ kəwû kɔ kə sə̂: əndje sə kə lishi, ə wu ərə wu bale ne; əndje sə kə dji əpʉ, ə dji tshelə âdâ əpʉ nə dji bale ne. 14Rəkɔ, ka əpʉ ama Ndjapä ə̂në Ezayi pâ mbrə əndje kɔ, ndəma nə ma. Tshə tâ ə pa:

“E sə kə dji əpʉ tə ə̂rɔ̂nə,

bale e sə sə kə dji tshelə nə kpiabale ne.

E sə kə lishi tə ə̂rɔ̂nə,

bale e sə sə kə wu ə̈bə̈ ərə kpiabale ne.

15Mbrə ə̂në lɔsu azü əgɔ səye gbɔ̂ gâ ye.

Əndje bî ətu əndje gâ tə̂ nə gâ ye

ə pî ala əndje gâ tə̂ nə gâ ye

ndə kə pa əndje wu ərə wu də ala əndje ne,

əndje dji əpʉ dji də ətu əndje ne,

ə dji tshelə âdâ əpʉ dji ne,

ə tshi äwä angbrɔ kə ma tə̂ əndje tshi tʉ

kanika mə gɔ grɔ rəka nə̂ əndje tə̂ əndje ne.”#13.15 Wu Eza 6.9-10.

16«Ənə̂ e tə ə̂rɔ̂nə mbrə ə̂në ala e sə kə wu ərə â ətu e sə kə dji əpʉ. 17Djatra əpʉ, mə pa kə e, aawopandəma Ndjapä də aə̂rɔ̂ azü ngbatshe yîndə kə wu kəmə ərə ə̂në e sə kə wu nə kɔ, bale, əndje wû wû ne. Əndje yîndə kə dji kəmə əpʉ sə̂ ə̂në e sə kə dji nə kɔ, bale, əndje djî djî ne.»

Tshelə âdâ əpʉ angwa rəgo

(Markə 4.13-20; Luki 8.11-15)

18«Rəkɔ, e djï tshelə âdâ əpʉ kəwû nə̂ awolu angwa rəgo nə. 19Azü ə̂në əndje dji əpʉ Əgɔngerə tshelafɔ ə dji tshelə nə dji ne kɔ, djablo na ə za ərə ə̂në əndje lû gâ tə̂ lɔsu əndje kɔ ə ro də nə. Əndje sə mata tshe ndʉ äwä ə̂në angwa rəgo nə yɔ̂ gâ tə̂ nə kɔ. 20Alabə̈ azü sə mata ashɔ badja ə̂në angwa rəgo nə yɔ̂ gâ tə̂ nə kɔ. Əndje dji əpʉ nə ə yində nə trale də amɔ tshelə əndje. 21Bale, əpʉ nə za lɔsu əndje za ne. Əndje yində əpʉ nə kʉ ndə ə̈bə̈ alɔ. Alɔ ə̂në ərə əyo kə wutu wala azü gi əyo tə̂ əndje mbrə əpʉ nə, əndje tshi äwä əpʉ nə tʉ. 22Alabə̈ azü sə mata ashɔ tshelə əshi ə̂në angwa rəgo nə yɔ̂ gâ lə nə kɔ. Əndje dji əpʉ nə, bale, kə li tshelə əndje gâ pâ aərə tshepashɔ səye, də əgo aərə ə̂në ə frɔ əndje kɔ, kânga äwä tə̂ əpʉ nə ndə kə pa ə le. 23Alabə̈ azü sə mata ə̂rɔ̂ ashɔ ə̂në angwa rəgo nə yɔ̂ gâ lə nə kɔ. Əndje dji əpʉ nə ə dji tshelə nə ə le tə ə̂rɔ̂nə. Alabə̈ nə le ngbangbo bale, alabə̈ əndje le zazü vəta, â alabə̈ aata əndje le zazü bale də morofo.»

Əmbrʉ ebe

24Jezu kwatə̂ye ə pâ ə̈bə̈ əpʉ kəwû kə əndje ə pa: «Əgɔngerə tshelafɔ sə mata əpʉ nə̂ ə̈bə̈ koshe ə̂në tshə lû ə̂rɔ̂ angwa rəgo gâ lə kəndɨ nə̂ ye. 25Bale, alɔ ə̂në azü lô na ye gâ ye kɔ, əyïkowɔ nə̂ ye nâ ə lû əmbrʉ angwa rəgo gâ lə angwa ble nə ə rô ərə nə̂ ye. 26Alɔ ə̂në rəgo nə kô ə gêrə gâ ye kɔ, ə vɔ̂tə̂ kə le nə, əmbrʉ ebe nə gêrə ndje. 27Alayïkosəra nə̂ əyïnga kəndɨ nə nâ ə pâ kə ətshə ə pa: “Âgbɔ̂ əzü, ə də̂ ə̂rɔ̂ angwa rəgo də̂ bə lû gâ lə kəndɨ nə̂ zə nə kɔ ne a? Rəkɔ, əmbrʉ ebe səye to ənə̂ ye mata a?” 28Tshə kîrə əpʉ kə əndje ə pa: “Ə̈bə̈ əyïkowɔ kə mâ ərə səkɔ.” Bale, alayïkosəra nə yû ətshə ə pa: “Bə yində nə ə pa ä na ə su əmbrʉ ebe nə a?” 29Tshə pâ kə əndje ə pa: “Bale ne. Mbrə ə̂në, kədə e sə kə su əmbrʉ ebe nə, e lï ndje äwä bale ndə kə su aəshe ble nə. 30E kätə̂ nə nɔ̂ ə gerə äwä bale ʉrrr ndjɔ gâ tə̂ alɔ kə wa angwa rəgo nə. Kədə alɔ kə wa angwa rəgo nə kə lî gâ ye, mə sə kə pa kə alayïkosəra nə ə pa: e sü əmbrʉ ebe nə angbʉlînə ə ngbö gâ tə̂ nə ndə kə sho nə gâ ye kane. Bale, e ngbö ble nə gâ lə agrɔ nə̂ əmə.”»

Ə̂ndjî mutardə

(Markə 4.30-32; Luki 13.18-19)

31Jezu kwatə̂ye ə pâ ə̈bə̈ əpʉ kəwû kə əndje ə pa: «Əgɔngerə tshelafɔ sə mata ə̂ndjî ayɔ ə̂në əɨrɨ nə kə də̂ mutardə kɔ, ə̂në ə̈bə̈ əzü zâ ə lû gâ lə kəndɨ nə̂ ye kɔ. 32Ə sə tə ə̂ndjî rəgo ə̂në ə sə teashe ə rô ə̂dû ə̂ndjî arəgo nɔ̂. Bale, alɔ ə̂në ə gêrə gâ ye kɔ ə rô ə̂dû akako gûsû tshelə kəndɨ nə nɔ̂. Ə mâ ndje tə əgerə ayɔ â ayanu na ə ma akomɔ əndje gâ lə ayana nə.»

Əyï mapa

(Luki 13.20-21)

33Jezu kwatə̂ye ə pâ ə̈bə̈ ata əpʉ kəwû kə əndje ə pa: «Əgɔngerə tshelafɔ sə mata əyï mapa ə̂në ə̈bə̈ yashe zâ ə vɔ̂ gâ lə əgerə ndjuwu kə ma də mapa ə zâ tshelə nə ʉrrr â ômɔ nɔ̂.»

Jezu mʉ̂ əpʉ aərə ə̂në ə kô tə̂ əndje wû

(Markə 4.33-34)

34Jezu pâ əpʉ sə̂ nɔ̂ kə ə̂kpû azü nə tə̂ äwä aəpʉ kəwû. Tshə pâ əpʉ pâ kə azü nə tə̂ ə̈bə̈ äwä kpî ne. Tshə pâ əpʉ kə əndje kʉ tə̂ äwä aəpʉ kəwû, 35ndə kə pa ndəma əpʉ ə̂në awopandəma Ndjapä pâ kɔ ma. Tshə pâ:

«Mə sə kə pa əpʉ kə əndje tə̂ äwä əpʉ kəwû.

Mə sə kə mʉ əpʉ aərə ə̂në ə kô tə̂ əndje wû-e kɔ

ə vɔ̂tə̂ nə mâ tə̂ alɔ kə ma tshepashɔ.»#13.35 Wu Ətsh 78.2.

Jezu yîsə̂ âdâ əpʉ əmbrʉ ebe

36Bale, Jezu kâtə̂ ə̂kpû azü nə â gû na ye gâ lə manda. Atrawaya nə̂ ye nâ trö də ətshə ə pâ kə ətshə ə pa: «Yisə̂ tshelə âdâ əpʉ kəwû əmbrʉ ebe ə̂në ə sə lə kəndɨ nə kɔ kə ä.» 37Tshə kîrə əpʉ kə əndje ə pa: «Əzü ə̂në tshə lu ə̂rɔ̂ angwa rəgo nə kɔ, kə də̂ Əgblə nə̂ Əzü. 38Kəndɨ nə kə də̂ tshepashɔ. Ə̂rɔ̂ angwa rəgo nə kə də̂ azü ə̂në əndje sə tə azü Əgɔngerə nə. Əmbrʉ ebe nə, kə də̂ aneshe nə̂ djablo. 39Əyïkowɔ nə ə̂në tshə lû əmbrʉ ebe nə kɔ, kə də̂ djablo. Tshekɨ kə ko angwa rəgo nə kə də̂ kə nglɔ tshepashɔ nɔ̂. Azü kə ko angwa rəgo nə kə də̂ atrawaya nə̂ Ndjapä. 40Mata ə̂në əndje ngbo əmbrʉ ebe gâ tə̂ nə ndə kə sho nə kɔ, ərə nə sə kə sə ndje äwä bale rə tə̂ alɔ kə nglɔ tshepashɔ. 41Əgblə nə̂ Əzü sə kə wla atrawaya nə̂ Ndjapä. Əndje sə kə wutu də azü nɔ̂ ə̂në əndje sə kə ma ndə kə pa angâ əndje te gâ lə nyaka kɔ, də azü ə̂në əndje sə kə ma əmbrʉ ərə kɔ lə Əgɔngerə nə̂ Ndjapä gashu. 42Əndje sə kə wli əndje gâ ala âgbɔ̂ əwo ə̂në ə rɨ rɨ tə̂ ərə ne kɔ. Kôto də̂ əndje sə kə kɨ nə də ngɔla əndje ə zɨ tshelə əji əndje. 43Bale, aə̂rɔ̂ azü sə kə tshe mata alɔ lə Əgɔngerə nə̂ Abä əndje. Əzü ə̂në tshə sə də ətu kə dji də əpʉ, tshə djï!»

Agrɔ ə̂në ə zâ tə̂ ye wû

44«Əgɔngerə tshelafɔ sə kwatə̂ye mata ə̈bə̈ agrɔ ə̂në əndje zâ wû gâ lə ə̈bə̈ kəndɨ. Ə̈bə̈ əzü sɔ̂tə̂ nə â zâ əndʉ nə wû kwatə̂ye. Tshelə ye mɔ̂ â tshə nâ ə kâ aərə nə̂ ye nɔ̂ â yɔ̂ kəndɨ səkɔ.»

Kədji əgerə ndogɔ

45«Əgɔngerə tshelafɔ sə kwatə̂ye mata ə̈bə̈ awoka aərə ə̂në tshə sə kə pra ə̂rɔ̂ kədji ndə kə yɔ nə. 46Alɔ ə̂në tshə sɔ̂tə̂ ə̈bə̈ nə ə̂në ndogɔ nə gbɔ̂ wââ kɔ, tshə nâ ə kâ aərə nə̂ ye nɔ̂ ə yɔ̂ kədji səkɔ.»

Əpʉ gbânda

47«Əgɔngerə tshelafɔ sə kwatə̂ye mata gbânda ə̂në əndje wlî gâ ala ə̂ngû əngbrʉ ə̂në ə kô adongo agiangû nɔ̂. 48Alɔ ə̂në agiangû nə sû tshelə gbânda nə gâ ye kɔ, aawopra agiangû nə gbə̂tɔ gbânda nə gâ tə̂ ama ə̂ngû nə, ə sə̂ gâ tʉ ə rô tshelə agiangû nə: əndje kô aə̂rɔ̂ əndje gâ lə akakli, bale, ə kô aəmbrʉ əndje nə vê-e. 49Tə̂ alɔ kə nglɔ tshepashɔ, ə sə kə sə ndje äwä bale rə. Atrawaya nə̂ Ndjapä sə kə na ndə kə sɔ tshelə takpa tə̂ alayïnyaka də aə̂rɔ̂ azü 50ə ko alayïnyaka nə wli gâ ala âgbɔ̂ əwo ə̂në ə rɨ rɨ tə̂ ərə ne kɔ. Kôto də̂ əndje sə kə kɨ nə də ngɔla əndje ə zɨ tshelə əji əndje.»

Ə̂dû əpʉ

51Jezu yû əndje ə pa: «E djî tshelə aəpʉ sə̂ nɔ̂ a?» Əndje kîrə əpʉ kə ətshə ə pa: «Ä djî tshelə nə gâ ye.» 52Bale, tshə pâ kə əndje ə pa: «Âdârə ə̂në awoyisə̂ âgbɔ̂ əpʉ nə̂ Mayïzə nɔ̂ ə̂në tshə wûsə̂ ərə gâ pâ Əgɔngerə tshelafɔ gâ ye kɔ, tshə sə mata əyïnga anda ə̂në tshə sə kə wutu də atafa aərə də aangbrɔ aərə lə agrɔ nə̂ ye gashu.»

Azü Nazaratə zâ lɔsu əndje zâ kə Jezu ne

(Markə 6.1-6; Luki 4.16-24)

53Alɔ ə̂në Jezu pâ əpʉ tə̂ äwä aəpʉ kəwû səkɔ ə kâ gâ ye kɔ, tshə âfɔ kôto ə rô. 54Tshə nâ na ye mâ lə gala ə̂në tshə gêrə lə nə kɔ ə vɔ̂tə̂ kə yisə̂ ərə kə azü lə anda aangbɔ nə̂ əndje. Azü ə̂në əndje sə̂ kə dji əpʉ nə̂ ye kɔ, kumu əndje kpê pâ əndu əndje â əndje pâ: «Tshə sɔ̂tə̂ marä tə̂ kə wusə̂ ərə səke də marä awlra kə ma aərə ə̈lü səke kotâ a? 55Ə də̂ ɨrɨ awosuru tshelə aayɔ də̂ kə səye ne a? Ə də̂ əyï nə də̂ Marə̂ ne a? Ə də̂ alaye nə də̂ Zake, Jozafu, Shemɔ gâ ndə Zudə ne a? 56Alakobɔ nə sə sə koye lə takpa tə̂ əzə̂ ne a? Tshə sɔ̂tə̂ aərə sə̂ nɔ̂ kotâ a?» 57Aərə sə̂ nɔ̂ kânga äwä tə̂ əndje ndə kə pa əndje za lɔsu əndje kə ətshə. Bale, Jezu pâ kə əndje ə pa: «Əndje yində awopandəma Ndjapä yi lə əgɔ nə̂ ye wala lə bəngʉ nə̂ ye də ə̂tə̂ ye ne.» 58Jezu mâ aərə ə̈lü mâ ngbatshe kôto ne, mbrə ə̂në azü nə zâ lɔsu əndje zâ kə ətshə ne.

Currently Selected:

Matiɔ 13: liy

Highlight

Copy