Luki 10
10
Jezu wla atrawaya 72 ndə kə mʉ əpʉ Əgɔngerə nə̂ Ndjapä
1Mandânə, Âgbɔ̂ Əyïngerə kê alabə̈ aata atrawaya zazü vəta də morofo amanə bishi (72)#10.1 Alabə̈ afraka pâ ənə̂ əndje ə pa «zazü vəta də morofo (70).» ə wlâ əndje bishi bishi ətshi ye lə agala nɔ̂ də ətshe nɔ̂ ə̂në tshə yində kə na tə̂ nə kɔ. 2Tshə pâ kə əndje ə pa: «Rəgo lê lə kəndɨ tə bandanə, bale alayïkosəra nə ngba ngba ne. E yü əyïnga kəndɨ nə ndə kə pa tshə wla alayïkosəra nə ndə kə pa əndje rɔ ə̂lê rəgo nə lə kəndɨ nə̂ ye nə. 3E nä nä ye! Mə wla e mata aaya andalimi lə takpa tə̂ atshɔndjɔ. 4E kö kö ngendja gâ ndə ngbede də tama ne. E kä kä lə äwä ndə kə bla azü ne. 5Alɔ ə̂në e li gâ lə ə̈bə̈ anda, e pä angbʉlînə ə pa: “Tshelə anda səye sə̈ də blatshe.” 6Kədə ə̈bə̈ əzü ə̂në tshə sə tə əyïblatshe kə sə̂ lə anda nə, blatshe nə̂ e sə̈ gâ pâ ye. Kədə tə̂ nə kə sə sə rə ne, blatshe nə̂ e nə dö tə̂ ye kə e. 7E sə̈ kpə lə anda nə səkɔ ə zɨ̈ ərə ə ndju ərə ə̂në əndje sə kə ko kə e kɔ, mbrə ə̂në əyïkosəra lï ndə kə pa tshə sɔtə̂ ngendja kosəra nə̂ ye. E nä nä lə manda bale bale na na ye ne. 8Kədə e li gâ lə ə̈bə̈ gala â azü nə wəra e tə ə̂rɔ̂nə, e zɨ̈ rəgo ə̂në əndje sə kə ko nə kə e kɔ. 9E grɔ̈ arəka tə̂ alayïrəka lə əgɔ nə ə pä kə azü nə ə pa: “Əgɔngerə nə̂ Ndjapä gî tə̂ ye trö də e gâ ye.” 10Kədə e li gâ lə ə̈bə̈ gala â azü nə yində kə wəra e yi ne, e wütu gâ ala äwä ə pä: 11“A grɔ ashɔ gala nə̂ e ə̂në ə gû gâ tə̂ ə̈nü ä kɔ gbo e. E wüsə̂ nə ə pa Əgɔngerə nə̂ Ndjapä gî tə̂ ye trö də e gâ ye.” 12Mə pa kə e, tə̂ alɔ kə wa ngbanga nə̂ Ndjapä, ngbanga nə̂ azü gala səkɔ sə kə ro pâ ənə̂ azü gala Sɔdɔmə.»
Agala ə̂në ə wəra tə̂ əndje ndə kə yində Əpʉ nə̂ Ndjapä
(Matiɔ 11.20-24)
13Tshə pâ: «Əyo gâ pâ e, azü gala Koraza! Əyo gâ pâ e, azü gala Betəsayida! Mbrə ə̂në, kədə azü aəgɔ Tirə də Sidɔ kə wû kəmə aərə ə̈lü ə̂në ə wûtu lə takpa tə̂ e kɔ, kandää, kerə əndje yî kəmə ləba mbadja ə sə̂ gâ tʉ gâ lə mvrowo ə tshî äwä angbrɔ kə mbrə tə̂ əndje tʉ gâ ye. 14Âdârə ə̂në tə̂ alɔ kə wa ngbanga nə̂ Ndjapä, ngbanga nə̂ e sə kə ro pâ ənə̂ azü agala Tirə də Sidɔ. 15Ənə̂ e azü Kaprənayɔmə, e wu ənə̂ e ə pa e sə kə o ʉrrr ə goro tshelafɔ a? Bale ne! E sə kə jerə ʉrrr mâ ə̂sə̂ akuzu-e.» 16Jezu pâ kwatə̂ye kə atrawaya nə̂ ye ə pa: «Əzü ə̂në tshə dji əpʉ nə̂ e, tshə dji əpʉ nə̂ əmə. Əzü ə̂në tshə wəra tə̂ ye tə̂ e, tshə wəra tə̂ ye tə̂ əmə. Ətshə ə̂në tshə wəra tə̂ ye tə̂ əmə, tshə wəra tə̂ ye tə̂ ətshə ə̂në tshə wlâ əmə kɔ.»
Atrawaya 72 dô tə̂ əndje
17Alayïawla nə zazü vəta də morofo amanə bishi (72)#10.17 Wu 10.1. nə dô tə̂ əndje ə gû də amɔ tshelə əndje ə pâ: «Âgbɔ̂ Əyïngerə, də əɨrɨ zə aafrɔ ayirə̂ ndje djî əpʉ ama ä.» 18Jezu pâ kə əndje ə pa: «Mə wû Sataa tshə âfɔ mâ lafɔ ə tê mata kə sro yavrɨ. 19E djï əmə kane! Mə za awlra kə e ndə kə na pâ aəkrɔ də akplakongo, ndje ndə kə na pâ awlra nə̂ əyïkowɔ nə̂ Ndjapä. Ə̈bə̈ ərə bale sə sə kə mbrə tə̂ e ne. 20Bale, tshelə e mɔ mɔ mbrə ə̂në aafrɔ ayirə̂ djî əpʉ ama e kɔ ne, tshelə e mɔ mbrə ə̂në Ndjapä tâ əɨrɨ e mâ lafɔ gâ ye kɔ.»
Jezu yisə̂ Abä nə kə aəngʉ azü
(Matiɔ 11.25-27; 13.16-17)
21Kʉ pə kôto səkɔ, Âgbɔ̂ Yîrə̂ sû Jezu də âgbɔ̂ ə̂rû â tshə pâ: «Mə tɔlɔ əbə, Abä, Âgbɔ̂ Əyïngerə tshelafɔ də ashɔ, mbrə ə̂në bə kô aərə sə̂ wû tə̂ aawowusə̂ âdâ aərə də aawowusə̂ ərə gâ ye â yîsə̂ nə gashu kə aneshe. Ayî, Abä, mbrə ə̂në bə yində nə ə pa ə sə rə. 22Abä əmə kô aərə nɔ̂ kə əmə gâ ye. Əzü bale yerɔ Ɨrɨ nə yerɔ ne, kʉtə̂ Abä bale. Əzü bale yerɔ Abä yerɔ ne, kʉtə̂ Ɨrɨ nə də əzü ə̂në Ɨrɨ nə yində kə yisə̂ ye kə ətshə gashu kɔ.»
23Mandânə, Jezu dô tə̂ ye gâ tə̂ atrawaya nə̂ ye nə ə pâ kʉ kə əndje ə pa: «Ənə̂ e tə ə̂rɔ̂nə, e-e ə̂në e wu ərə sə̂ ə̂në e sə kə wu nə kɔ. 24Mə pa kə e ə pa aawopandəma Ndjapä də alayïngerə ngbatshe yîndə kə wu kəmə ərə sə̂ ə̂në e sə kə wu nə kɔ, bale əndje wû wû ne. Əndje yîndə kə dji kəmə əpʉ sə̂ ə̂në e sə kə dji nə kɔ, bale əndje djî djî ne.»
Yïndə Ndjapä gâ ndə bəngâ zə
25Ə̈bə̈ awoyisə̂ âgbɔ̂ əpʉ nə̂ Mayïzə âfɔ ndə kə tra lɔsu Jezu ə yû ətshə ə pa: «Awoyisə̂ ərə, ərə yekɔ də̂ mə lï ndə kə ma nə ndə kə sɔtə̂ sorô nə̂ alɔnɔ̂?» 26Jezu pâ kə ətshə ə pa: «Əpʉ yekɔ kə sə lə âgbɔ̂ əpʉ nə̂ Ndjapä? Bə dɨ ənə̂ zə atâ a?» 27Koshe səkɔ kîrə əpʉ ə pa: «Yïndə Əyïlingû, tə Ndjapä nə̂ zə də lɔsu zə nɔ̂, də yîrə̂ zə nɔ̂, də awlra zə nɔ̂, də kə wusə̂ ərə nə̂ zə nɔ̂ ə yïndə ngâ zə mata ə də əbə də ə̂tə̂ zə.»#10.27 Wu Əpʉ 6.5; Əkrɔ 19.18. 28Jezu pâ kə ətshə ə pa: «Bə kîrə əpʉ nə də äwänə. Mbrə rə kanika ə sə tə sorô.»
Əpʉ nə̂ ə̂rɔ̂ əzü əgɔ Samari
29Awoyisə̂ âgbɔ̂ nə yîndə kə yisə̂ nə ə pa kə yu əpʉ nə̂ əne nə sə də äwänə ə pa: «Bəngâ əmə kə də̂ əde?» 30Jezu kîrə əpʉ kə ətshə ə pa: «Ə̈bə̈ koshe âfɔ mâ Jeruzalamə ndə kə jerə gu na ye gâ Jerikɔ. Tshə nâ ʉrrr ə tê gâ lə kəna alayïkowɔ, əndje kô aərə nə̂ ye tə̂ ye nɔ̂, ə dâ ətshə ʉrrr trö də kuzu ə tshî ətshə tʉ ə rô ərə nə̂ əndje. 31Bale, ə̈bə̈ awotokrɔ kə Əyïlingû zâ kʉtə̂ äwä səkɔ ə wûtu gâ tə̂ koshe səkɔ, ə dɔ̂ ə dɔ̂ gâ pâ nə ə rô ərə nə̂ ye. 32Ə̈bə̈ əzü lə marä nə̂ Levi zâ ndje kʉtə̂ äwä səkɔ, ə wû koshe səkɔ ə dɔ̂ ə dɔ̂ gâ pâ nə ə rô ndje ərə nə̂ ye. 33Bale, mandânə, ə̈bə̈ əzü əgɔ Samari ə̂në tshə sə̂ lə ə̈ngrʉ̈ ana kɔ wûtu gâ tə̂ koshe səkɔ. Tshə wû ətshə, əyo ye mbrə̂ ətshə. 34Tshə nâ trö də ətshə ə yûtu tshela aəku nə̂ ye də kâdâ gâ ndə duva, də kə i tshela nə. Mandânə, tshə zâ ətshə gâ pâ agia ana nə̂ ye də ə̂tə̂ ye ə gû də ətshə gâ lə ə̈bə̈ anda nə̂ alayïana mbrə ndə kə pa tshə ga ndə ye. 35Tshe nə krâ, tshə kô ngendja#10.35 Ngendja tə̂ alɔ nə̂ Jezu kə də̂ deniye. Deniye bale sə̂ tə ngendja kosəra nə̂ əzü bale lə əlo bale. bishi kə əyïnga anda nə ə pâ kə ətshə ə pa: “Gä ndə koshe səye kə əmə. Kədə bə ndɨ ngendja â ro ənə̂ sə̂ ə̂në mə kô kə əbə kɔ, kə do tə̂ əmə mə piyi nə kə əbə je.”» 36Kwatəndje, Jezu yû awoyisə̂ âgbɔ̂ əpʉ nə̂ Əyïlingû səkɔ ə pa: «Ənə̂ zə, əde lə takpa tə̂ azü vəta səkɔ kə sə tə bəngâ koshe səkɔ ə̂në tshə tê gâ lə kəna alayïkowɔ səkɔ?» 37Tshə kîrə əpʉ ə pa: «Ətshə nə ə̂në tshə mbrə̂ ə̂rɔ̂ ərə kə ətshə kɔ.» Bale, Jezu pâ kə ətshə ə pa: «Gü, əbə ndje, ə mbrə̈ mata ətshə.»
Martə də Marə̂ wəra Jezu tə ə̂rɔ̂nə mâ lə anda nə̂ əndje
38Alɔ ə̂në Jezu sə̂ kə ro na ye də atrawaya nə̂ ye kɔ, tshə yî kumu ye gâ lə ə̈bə̈ aya əgɔ. Ə̈bə̈ yashe ə̂në əɨrɨ ye kə də̂ Martə kɔ wə̂ra ətshə tə ə̂rɔ̂nə mâ lə anda nə̂ ye. 39Martə nə sə̂ də ə̈bə̈ aye nə ə̂në əɨrɨ ye kə də̂ Marə̂ kɔ. Marə̂ nə sə̂ gâ tʉ gâ tə̂ ə̈nü Âgbɔ̂ Əyïngerə ə sə̂ kə dji əpʉ nə̂ ye. 40Kandää, kosəra rô pâ Martə nə gâ ye. Tshə wûtu ə pâ: «Âgbɔ̂ Əyïngerə, ə̂në aye əmə katə̂ əmə kʉtə̂ əmə tə̂ kosəra nə kɔ, bə wu lə ala zə ambanə a? Pä ndə nə kə ətshə ə pa tshə na ə yi kəna ye ndə kosəra nə kə əmə.» 41Âgbɔ̂ Əyïngerə nə kîrə əpʉ kə ətshə ə pa: «Martə, Martə, bə li tshelə zə ndə aərə tə bandanə â sə sə kpirə̂ ne kɔ. 42Kandää, kʉtə̂ ərə bale kə sə tə âgbɔ̂ ərə. Marə̂ kê ənə̂ ye ə̂rɔ̂ ərə nə ə̂në əzü bale sə sə kə za nə tə̂ ye ne.»
Currently Selected:
Luki 10: liy
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation
