Zââ 16
16
1«Mə pâ əpʉ səye kə e rə ndə kə pa lɔsu e te te ne. 2Əndje sə kə grɔ e lə aanda aangbɔ, â alɔ nə ndje sə kə na gu nə ə̂në azü nɔ̂ ə̂në əndje sə kə wo e kɔ, sə kə wu ənə̂ əndje ə pa äwä kə vrɔ Ndjapä kə sə̂ â alane ə vrɔ ətshə kɔ. 3Əndje sə kə mbrə ərə səkɔ mbrə ə̂në əndje wûsə̂ Abä wû alɔ bale ne â ə də̂ əmə, əndje wusə̂ əmə bale ne. 4Mə pâ əpʉ sə̂ kə e rə ndə kə pa kədə alɔ nə kə lï, e li tshelə e ə pa, əmə, mə pâ əpʉ sə̂ kə e gâ ye.»
Kosəra nə̂ Âgbɔ̂ Yîrə̂
«Mə pâ əpʉ sə̂ pâ kə e kerə pə tə̂ ama nə ne, mbrə ə̂në mə sə pə lə takpa tə̂ e. 5Bale, ə̂në a ləye, mə sə kə gu gâ tə̂ ətshə ə̂në tshə wlâ əmə kɔ, â əzü bale lə takpa tə̂ e yu əmə yu ə pa mə sə kə na mâta ne. 6Bale, mbrə əpʉ sə̂ ə̂në mə pâ kə e rə kɔ, əyo sû lɔsu e gâ ye. 7Kandää, əmə, mə sə kə pa djatra əpʉ kə e: ə sə tə ə̂rɔ̂nə mbrə e ndə kə pa, əmə, mə ro. Mbrə ə̂në kədə mə ro ro gu na ye ne, Awotɨ azü nə sə sə kə na gâ tə̂ e ne. Bale, kədə mə ro gu na ye, mə sə kə wla ətshə kə e. 8Alɔ ə̂në tshə â na, tshə sə kə yisə̂ nə gashu kə azü tshepashɔ ə pa əndje djîngli äwä gâ pâ əpʉ nyaka, gâ pâ əpʉ ərə ə̂në ə sə də äwänə kɔ, gâ pâ əpʉ ngbanga gâ ye. 9Azü nə djîngli äwä gâ pâ əpʉ nyaka nə, mbrə ə̂në əndje za lɔsu əndje za kə əmə ne, 10gâ pâ əpʉ ərə ə̂në ə sə də äwänə kɔ, mbrə ə̂në mə sə kə ro gu na ye mâ ndə Abä, â e sə sə kə wu əmə kwatə̂-e ne. 11Əndje djîngli äwä gâ pâ əpʉ ngbanga nə, mbrə ə̂në Ndjapä wâ ngbanga gâ lə kumu əyïngerə tshepashɔ səye gâ ye.
12«Mə sə kwatə̂mə də aəpʉ ngbatshe ndə kə pa nə kə e, bale e lï lï ndə kə dji tshelə nə ə̂në a ləye ne. 13Alɔ ə̂në tshə â na, ətshə, Âgbɔ̂ Yîrə̂ djatra əpʉ nə, tshə sə kə yisə̂ äwä kə e lə djatra əpʉ nɔ̂. Mbrə ə̂në tshə sə sə kə pa əpʉ ndə kumu ye ne, bale tshə pa əpʉ aərə nɔ̂ ə̂në tshə sə kə dji nə kɔ kə e je ə mʉ əpʉ aərə ə̂në ə sə kə na gu nə kɔ kə e je. 14Ətshə, tshə yisə̂ ə̂yî əmə gashu je, mbrə ə̂në tshə sə kə sɔtə̂ ərə ə̂në ə sə tə ənə̂ əmə kɔ ndə kə pa tshə mʉ əpʉ nə kə e. 15Ərə nɔ̂ ə̂në Abä sə də nə kɔ, ə sə tə ənə̂ əmə. Âdârə ə̂në mə pâ əpʉ ə pa tshə sə kə sɔtə̂ ərə ə̂në ə sə tə ənə̂ əmə kɔ ndə kə pa tshə mʉ əpʉ nə kə e kɔ kə sə̂.
16«Ə daka pə teashe, e sə sə kə wu əmə kwatə̂-e ne, â teashe kwatəndje, e wu əmə je.»
17Rəkɔ, alabə̈ azü lə takpa tə̂ atrawaya nə̂ ye pâ lə takpa tə̂ əndje ə pa: «Əpʉ yekɔ də̂ tshə yində kə pa kə əzə̂ â pa: “Ə daka pə teashe, e sə sə kə wu əmə ne; â teashe kwatəndje, e wu əmə je” kɔ? Â tshə pâ kwatə̂ye ə pa: “Mə sə kə gu mâ ndə Abä” kɔ?»
18Rəkɔ, əndje pâ: «Əpʉ ə̂në tshə pâ: “Ə daka pə teashe” kɔ, tshə yində kə pa atâ kôto? A wusə̂ âdâ əpʉ ə̂në tshə pâ kɔ wu ne.»
19Ə̂në Jezu wûsə̂ nə ə pa əndje yîndə kə yu ətshə də ə̈bə̈ əpʉ kɔ, tshə pâ kə əndje ə pa: «E sə kə yu tə̂ e lə takpa tə̂ e gâ pâ əpʉ nə ə̂në mə pâ: “Ə daka pə teashe, e sə sə kə wu əmə ne, â teashe kwatəndje, e wu əmə je.” 20Djatra əpʉ, mə pa kə e, e-e, e kɨ je ə kɨ əkɨ əyo e je, â azü tshepashɔ ə sə lə ə̂rû je. E-e, e sə də əyo tə̂ lɔsu je, bale əyo nə̂ e nə sə kə do tə̂ ye tə ə̂rû.
21«Alɔ ə̂në yashe sə kə zu nə, tshə sə lə əyo, mbrə ə̂në əlo ye lî gâ ye. Bale, alɔ ə̂në tshə â zû əgblə nə gâ ye kɔ, ə̂sə̂ əyo səkɔ djerə ətshə gâ ye mbrə ə̂në tshə sə də ə̂rû ə̂në tshə zû ə̈bə̈ əzü gâ pâ ashɔ gâ ye kɔ. 22Rəkɔ, e-e ndje, ə̂në a ləye, e sə də əyo tə̂ lɔsu e; bale mə wu e kwatə̂mə je: lɔsu e ə sə də ə̂rû je, â ə̈bə̈ əzü bale ə za ə̂rû nə za tə̂ lɔsu e ne.
23«Tə̂ əlo nə səkɔ, e sə sə kə yu əmə kwatə̂-e tə̂ ə̈bə̈ ərə bale ne. Djatra əpʉ, mə pa kə e, ərə ə̂në e sə kə yu tshuku nə lə kəna Abä, tshə sə kə za kə e də əɨrɨ əmə. 24Ʉrrr ndjɔ kpəsəye, e yu tshuku ə̈bə̈ ərə yu bale də əɨrɨ əmə ne. E yü tshuku ərə, e sə kə sɔtə̂ nə, kanika ə̂rû tshelə e lï nɔ̂.»
Jezu rô tshepashɔ də awlra gâ ye
25«Mə pâ əpʉ sə̂ nɔ̂ kə e tə̂ äwä əpʉ kəwû. Alɔ nə sə kə na gu nə ə̂në mə sə sə kə pa əpʉ kwatə̂mə kə e tə̂ äwä aəpʉ kəwû ne, bale mə sə kə mʉ əpʉ gâ pâ Abä kə e orâ orâ. 26Tə̂ əlo nə səkɔ, e sə kə yu tshuku aərə də əɨrɨ əmə, â mə pa pa kə e ə pa əmə kə yu Abä mbrə e ne, 27mbrə ə̂në Abä də ə̂tə̂ ye yində e, mbrə ə̂në, e-e, e yində əmə ə yində nə də lɔsu e ə pa, əmə, mə tô mâ ndə Ndjapä â nâ kɔ. 28Mə tô mâ ndə Abä â nâ gâ pâ ashɔ kɔ. Ə̂në a ləye, mə sə kə katə̂ tshepashɔ nə ə gu mâ ndə Abä.» 29Atrawaya nə̂ Jezu nə pâ kə ətshə ə pa: «Kpəsəye, bə sə kə pa əpʉ orâ orâ ə pa əpʉ pa lə əpʉ kəwû ne. 30Ə̂në a ləye, ä wusə̂ nə ə pa bə wusə̂ aərə nɔ̂ â bə sə sə ndje də əgo ndə kə pa ə̈bə̈ əzü yu əbə ə yu də ə̈bə̈ əpʉ ne. Âdârə ə̂në ä wusə̂ nə mâ tə̂ lɔsu ä ə pa bə tô mâ ndə Ndjapä â nâ kɔ kə sə̂.» 31Jezu kîrə əpʉ kə əndje ə pa: «Ə̂në a ləye də̂ e yində əpʉ nə də lɔsu e kɔ a? 32E wü-a, alɔ nə sə kə na gu nə, ə wûtu gâ ye, ə̂në e sə kə ndjɔ tshelə e â əzü bale bale sə kə za äwä nə̂ ye, â e sə kə tshi əmə tʉ kʉtə̂ əmə; bale mə sə sə kʉtə̂ əmə ne, mbrə ə̂në Abä sə gâ ndə əmə. 33Mə pâ əpʉ kə e rə ndə kə pa e sə də blatshe tə̂ äwä əmə. Aərə əyo sə kə wutu gâ tə̂ e pâ ashɔ, bale e gbɔ̈ ə gbɔ̈! Əmə, mə rô pâ tshepashɔ də awlra gâ ye!»
Currently Selected:
Zââ 16: liy
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation
