Zââ 1
1
Jezu Kristə sə tə Əpʉ Ndjapä
1Tə̂ alɔ kə vɔtə̂ aərə, Əpʉ nə sə̂ je, Əpʉ nə sə̂ gâ ngotə̂ Ndjapä, Əpʉ nə sə tə Ndjapä. 2Tshə sə̂, tə̂ alɔ kə vɔtə̂ aərə nə, gâ ngotə̂ Ndjapä nə. 3Ndjapä nə mbrə̂ aərə nɔ̂ tə̂ äwä ye, â ə̈bə̈ ərə ə̂në Ndjapä nə mbrə̂ tə̂ ə̈bə̈ äwä kpî tə̂ ye kɔ guta gu ne. 4Sorô sə lə ye, â sorô nə sə tə ə̂yîəwo mbrə azü. 5Ə̂yîəwo nə sə kə tshe lə əbutshe, â əbutshe nə yîndə ye yî ne. 6Ə̈bə̈ koshe sə̂ je ə̂në Ndjapä wlâ ətshə, əɨrɨ ye kə də̂ Zââ. 7Tshə nâ tə əzü ə̂në tshə na ndə kə pa ndə əpʉ ərə nə, ndə kə pa ndə əpʉ ə̂yîəwo nə, kanika azü nɔ̂ za lɔsu əndje kə Ndjapä tə̂ äwä ye. 8Ə də̂ ətshə də̂ kə sə tə ə̂yîəwo nə ne, bale tshə nâ ndə kə pa ndə əpʉ ə̂yîəwo nə. 9Əpʉ nə sə tə djatra ə̂yîəwo nə, ə̂në ə nâ gâ pâ ashɔ â azü nɔ̂ sə kə lishi ngbʉ̂ ndə nə kɔ. 10Ətshə ə̂në tshə sə tə Əpʉ nə kɔ, tshə sə̂ gâ pâ ashɔ gâ ye, â Ndjapä nə mbrə̂ tshepashɔ nə tə̂ äwä ye, bale azü tshepashɔ nə wûsə̂ ye wû bale ne. 11Tshə nâ gâ ndə azü əgɔ nə̂ ye də ə̂tə̂ ye, bale azü əgɔ nə̂ ye nə yîndə əpʉ ye yî ne. 12Bale, azü nɔ̂ ə̂në əndje yîndə əpʉ ye nə â zâ lɔsu əndje kə ətshə kɔ, tshə zâ äwä kə əndje ndə kə pa əndje do tə̂ əndje tə aneshe nə̂ Ndjapä. 13Əndje zû əndje zû tə̂ äwä ə̈ndjï, wala tə̂ äwä əgo əndu əzü wala tə̂ äwä ərə ə̂në tshelə əzü kə yində nə kɔ ne, bale əndje zû əndje tə̂ äwä Ndjapä.
14Əpʉ nə dô tə̂ ye tə əzü, tshə mâ əgɔ lə takpa tə̂ əzə̂. Ä wû ə̂yî ye, tə ə̂yî kpiabale Ɨrɨ Abä; ə̂yî nə sû ə sû də ə̂rɔ̂tə̂ də djatra əpʉ trɔ̂.
15Zââ nə sə̂ kə pa əpʉ gâ pâ əpʉ nə̂ ye ə tâ râwâ ə pa: Ətshə kə sə̂ â mə pâ ndə ye â pa: «Ətshə ə̂në tshə sə kə na gu nə mandâ əmə kɔ, tshə sə tə âgbɔ̂ əzü ə rô əmə gâ ye, mbrə ə̂në tshə sə̂ angbʉlînə tə̂ əmə.»
16Ngâ, əzə̂ nɔ̂, a sɔ̂tə̂ ə̂rɔ̂tə̂ gâ pâ nə gâ pâ nə, lə aə̂rɔ̂ aərə ə̂në ə sû ətshə ə sû trɔ̂ kɔ. 17Mbrə ə̂në Ndjapä zâ âgbɔ̂ əpʉ kə əzə̂ tə̂ äwä Mayïzə, bale ə̂rɔ̂tə̂ də djatra əpʉ nâ tə̂ äwä Jezu Kristə. 18Ə̈bə̈ əzü bale wû Ndjapä wû alɔ bale ne. Bale, kʉtə̂ Kpiabale Ɨrɨ nə, ə̂në tshə sə tə Ndjapä kɔ, ə̂në əndje də Abä sə kʉ bale kɔ, ətshə kə yîsə̂ Ndjapä nə gashu ndə kə pa a yerɔ ətshə.
Əpʉ ə̂në Zââ Batistə pâ gâ pâ əpʉ nə̂ Jezu kɔ
(Matiɔ 3.1-12; Markə 1.1-8; Luki 3.1-18)
19Əpʉ ə̂në Zââ nə pâ, alɔ ə̂në aâgbɔ̂ azü nə̂ Ajuwufu mâ Jeruzalamə wlâ aawotokrɔ gâ ndə azü lə marä nə̂ Levi kə ətshə ndə kə pa əndje yu ətshə ə pa: «Əbə, bə sə tə əde?» 20Tshə pâ əpʉ orâ ə blê əpʉ blê ne ə pa: «Əmə, mə sə sə tə Kristə nə ne.» 21Əndje yû ətshə ə pa: «Rəkɔ, bə sə tə əde? Bə sə tə Eli a?» Bale, tshə pâ: «Mə sə sə tə ətshə ne.» Əndje pâ: «Əbə də̂ Awopandəma Ndjapä nə kə sə̂ a?» Tshə kîrə əpʉ ə pa: «Ə’ə ne.» 22Bale, əndje pâ kə ətshə ə pa: «Bə sə tə əde? Ə lï ndə kə pa ä gu də ndəma əpʉ nə kə azü ə̂në əndje wlâ ä kɔ. Bə pa atâ gâ pâ əpʉ nə̂ zə nə də ə̂tə̂ zə?» 23Tshə pâ:
«Əmə, mə sə tə ətshə ə̂në
tshə sə kə ta râwâ lə ngbûndû kɔ ə pa:
“E gämba äwä ə̂në Âgbɔ̂ Əyïngerə ə na tə̂ nə kɔ ndji!”#1.23 Wu Eza 40.3.,
mata ə̂në awopandəma Ndjapä Ezayi pâ ndə nə gâ ye kɔ.»
24 Afariza sə̂ lə takpa tə̂ azü nə ə̂në əndje wlâ əndje kə Zââ nə kɔ. 25Əndje yû ətshə də əpʉ ə pa: «Rəkɔ, bə sə kə za batamo kə azü mbrə yekɔ, kədə bə sə sə tə Kristə nə, wala tə Eli nə, wala tə Awopandəma Ndjapä nə ne kɔ?» 26Zââ nə kîrə əpʉ kə əndje ə pa: «Əmə, mə sə kə za batamo ə̂ngû kə e. Bale, lə takpa tə̂ e, ə̈bə̈ əzü sə je ə̂në e wusə̂ ye wu ne kɔ, 27ə̂në tshə sə kə na gu nə mandâ əmə kɔ, â mə lï lï ndə kə pa mə wora ə̂wû tama nə̂ ye ne.» 28Ərə nə wûtu mâ Betani, mâ ətshî ə̂ngû Jurda, tə̂ ətshe ə̂në Zââ nə sə̂ kə za batamo kə azü tə̂ nə kɔ.
Jezu sə tə Ɨrɨ Ndjapä
29Tshe nə krâ, Zââ nə wû Jezu ə̂në tshə sə̂ kə na gu nə gâ tə̂ ye kɔ, ə pâ əpʉ ə pa: «Aya Ndalimi nə̂ Ndjapä ə̂në tshə sə kə djɔ nyaka lə kumu azü tshepashɔ kɔ kə səye. 30Ətshə də̂ mə pâ ndə ye alɔ nə sə̂ ə pa: “Ə̈bə̈ əzü sə kə na gu nə mandâ əmə kɔ, ə̂në tshə sə tə âgbɔ̂ əzü ə rô əmə gâ ye, mbrə ə̂në tshə sə̂ angbʉlînə tə̂ əmə.” 31Əmə ndje, mə wûsə̂ ye wû ne, bale kədə mə nâ ndə kə za batamo ə̂ngû kə azü, ə sə ndə kə pa tshə ma tə̂ ye gashu kə azü əgɔ Isərayalə.»
32Zââ nə pâ əpʉ səye ə pa: «Mə wû Âgbɔ̂ Yîrə̂ ə̂në tshə tô mâ lafɔ ə sə̂ kə jerə mata gbakuduba â sə gâ pâ Jezu nə. 33Əmə, mə wûsə̂ ye wû ne, bale, ətshə nə ə̂në tshə wlâ əmə ndə kə za batamo ə̂ngû nə kə azü nə kɔ pâ kə əmə ə pa: “Ətshə ə̂në bə sə kə wu Âgbɔ̂ Yîrə̂ nə ə̂në tshə sə kə jerə ə sə gâ pâ ye nə kɔ, ətshə kə sə kə za batamo Âgbɔ̂ Yîrə̂ nə kə azü.” 34Əmə, mə wû ərə nə də ala əmə, ə pâ əpʉ ə pa ətshə də̂ Ɨrɨ Ndjapä nə kə sə̂.»
Aangbʉlî atrawaya nə̂ Jezu
35Tshe nə krâ, Zââ nə sə̂ kwatə̂ye kôto də alabə̈ atrawaya nə̂ ye bishi. 36Tshə wû Jezu ə̂në tshə sə̂ kə ro nə kɔ, ə pâ əpʉ ə pa: «Aya Ndalimi nə̂ Ndjapä kə səye!»
37Atrawaya nə bishi nə djî aəpʉ səkɔ ə zâ äwä Jezu nə. 38Jezu nə dô tə̂ ye ə wû ə pa atrawaya nə sə̂ kə za äwä əne ə pâ əpʉ kə əndje ə pa: «E sə kə pra yekɔ?» Əndje pâ kə ətshə ə pa: «Rabi, (âdâ nə kə də̂ Awoyisə̂ ərə), bə sho kotâ a?» 39Tshə pâ kə əndje ə pa: «E nä gâ əmə, e wu je.» Əndje nâ ə wû ətshe nə ə̂në tshə lô tə̂ nə kɔ. Əndje sə̂ gâ ngotə̂ ye tə̂ alɔ nə səkɔ. Ə̈nü alɔ sə̂ mata vəna də lɔkədɨ.
40Andre, aye Shemɔ Piarə, sə̂ lə ə̂grû tə̂ əndje bishi nə ə̂në əndje djî əpʉ nə ə̂në Zââ nə pâ kɔ â zâ äwä Jezu nə kɔ. 41Andre nə tê angbʉlînə aye nə də ə̂tə̂ ye də Shemɔ ə pâ kə ətshə ə pa: «Ä sɔ̂tə̂ Mesi gâ ye», ə̂në tshelə âdâ nə kə də̂ «Kristə» kɔ. 42Tshə nâ də Shemɔ nə gâ tə̂ Jezu nə. Jezu nə shêkɔ ətshə ə pa: «Əbə, bə sə tə Shemɔ, ɨrɨ Zââ, əndje sə kə e əbə ə pa Sefasə#1.42 Sefasə: Də ama arameya Sefasə, də ama frandje «Pierre», də ama grakə Petrɔsə, vəta nɔ̂ kɔ âdâ nə kə də̂ əkpʉ..» Âdâ nə kə də̂ «Əkpʉ».
43Tshe nə krâ, Jezu yîndə kə na mâ lə ashɔ əgɔ Galile, ə tê Flipə ə pâ kə ətshə ə pa: «Zä äwä əmə.» 44Flipə nə sə̂ tə əzü əgɔ Betəsayida, gala nə̂ a-Andre də Piarə nə. 45Flipə nə sɔ̂tə̂ Natanayalə ə pâ kə ətshə pa: «Ətshə ə̂në âgbɔ̂ əpʉ nə̂ Mayïzə də fraka nə̂ aawopandəma Ndjapä pâ ndə ye kɔ, ä sɔ̂tə̂ ye gâ ye, ətshə də̂ Jezu, əzü əgɔ Nazaratə, ɨrɨ Jozafu.» 46Natanayalə nə pâ kə ətshə ə pa: «Ə̈bə̈ ə̂rɔ̂ ərə lï ndə kə pa ə to lə əgɔ Nazaratə ə wutu a?» Flipə nə pâ kə ətshə ə pa: «Nä gâ əmə ə wü.»
47Alɔ ə̂në Jezu wû Natanayalə nə ə̂në tshə sə̂ kə na gu nə gâ tə̂ ye kɔ, tshə pâ əpʉ ye ə pa: «Djatra əzü əgɔ Isərayalə kə səye, ə̂në əterə sə sə lə ye ne kɔ.» 48Natanayalə nə pâ kə ətshə ə pa: «Bə wusə̂ əmə kotâ a?» Jezu kîrə əpʉ kə ətshə ə pa: «Angbʉlînə ndə kə pa Flipə ê əbə, alɔ ə̂në bə sə̂ tshekudu ayɔ figə kɔ, mə wû əbə gâ ye.» 49Natanayalə nə kwâtə̂ye ə zâ əpʉ ə pâ: «Awoyisə̂ ərə, əbə, bə sə tə Ɨrɨ Ndjapä, əbə, bə sə tə əyïngerə əgɔ Isərayalə.» 50Jezu kîrə əpʉ kə ətshə ə pa: «Mbrə ə̂në mə pâ kə əbə ə pa mə wû əbə tshekudu ayɔ figə kɔ, də̂ bə yində nə də lɔsu zə kɔ a? Bə wu alabə̈ aâgbɔ̂ aərə ngbatshe ə̂në ə sə kə ro ənə̂ səye kɔ kwatə̂zə je!»
51Jezu kwâtə̂ye ə pâ: «Djatra əpʉ, mə pa kə e, e sə kə wu tshelafɔ ə sə kə krɔ nə â e sə kə wu atrawaya nə̂ Ndjapä ə̂në əndje sə kə o ə sə kə jerə tə̂ Əgblə nə̂ Əzü kɔ.»
Currently Selected:
Zââ 1: liy
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation
