ܐܶܓܰܪܬ̥ܳܐ ܠܰܪّܽܘܡܳܝ̈ܶܐ 9
9
ܗ̄ܺܝ ܥܺܕ̱ܬܳܐ ܡܢܰܩܰܝܬܳܐ ܕ݄ܡܫܺܝܚܳܐ
ܗ̄ܽܘ ܥܰܡܳܐ ܕܠܳܐ ܗܰܝܡܳܢܽܘܬ̥ܳܐ
1ܗ̄ܽܘ ܫܪܳܪܳܐ ܟܳܐܡܰܪ ܐ̱ܢܳܐ ܒ݄ܡܫܺܝܚܳܐ ܘܠ݄ܐ ܟ݄ܡܕܰܓܰܠ ܐ̱ܢܳܐ، ܘܠܶܒܺܝ ܟܣܳܗ݄ܕ ܐܰܥܠܺܝ ܒܪܽܘܚܳܐ ܕܩܽܘܕܫܳܐ 2ܕܓ̥ܰܠܰܒܶܐ ܟܰܪܝܳܐ ܠܺܝ، ܘܽܗ̄ܘ ܟܶܐܒ̥ܳܐ ܕܠܶܒܺܝ ܠ݄ܐ ܟܟܳܠܶܐ. 3ܘ݄ܡܨܰܠܶܐ ܗ̄ܘܰܝ ܐ̱ܢܳܐ (ܘܳܐܒܰܥ ܗ̄ܘܰܝ ܐ̱ܢܳܐ) ܕܳܐܢܳܐ ܒܢܰܦܫܺܝ ܚܪܺܝܡܳܐ ܗܳܘܶܐ ܐ̱ܢܳܐ ܡܶܢ̱ ܡܫܺܝܚܳܐ ܡܶܢ̱ ܚܠܳܦ ܗ̄ܰܢ ܐܰܚ̈ܽܘܢܳܢܰܝܕ̥ܺܝ ܘܰܩّܰܪ̈ܺܝܒ̥ܰܝܕ̥ܺܝ ܕܒܽܗ̄ܘ ܦܰܓ̥ܪܳܐ. 4ܗܰܢܺܝ ܕܟ݄ܬܢܶܝ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ، ܕܗ݄ܢّܶܝ ܩܪ݄ܢ: ܐܰܒܢ̈ܶܐ ܕܰܐܠܳܗܳܐ، ܘܰܐܠّܶܗ ܗܰܘܺܝ ܗ̄ܽܘ ܫܽܘܒܚܳܐ ܘܰܩܝܳܡ̈ܶܐ ܘܽܗ̄ܘ ܢܳܡܽܘܣܳܐ ܘܺܗ̄ܝ ܬܶܫܡܶܫܬܳܐ ܕܶܐܒܶܗ، ܘܰܘّܰܥܕ̈ܶܐ، 5ܘܰܗ̄ܢ ܐܰܒܳܗ̈ܶܐ، ܘܡ݄ܢّܶܗ ܚܙܶܐ ܡܫܺܝܚܳܐ ܒܽܗ̄ܘ ܦܰܓ̥ܪܳܐ، ܕܟ݄ܬ ܝܳܐ ܐܰܠܳܗܳܐ ܥܰܠ ܟܘܿܠ، ܕܶܐܠܶܗ ܫܽܘܒܚ̈ܶܐ ܘܒܽܘܪ̈ܟܳܬ̥ܳܐ ܠܥܳܠܰܡ ܥܳܠܡܺܝܢ، ܐܰܡܺܝܢ. 6ܡܺܐܝܕ̥ܶܗ ܕܠܳܐ ܢܦܳܠܳܐ ܢܰܦܺܝܠܳܐ ܗ̄ܺܝ ܡܶܠܬ̥ܳܐ ܕܰܐܠܳܗܳܐ، ܡܺܐܝܕ̥ܶܗ ܕܠܳܐ ܟܽܘܠّܶܗ ܕܟ݄ܬܢܶܝ ܡܶܢ̱ ܐܺܝܣܪܳܐܶܝܠ ܐܺܝܣܪܳܐܶܝܠ ܢܶܝ. 7ܘܠܳܐ ܥܰܠ ܕܟ݄ܬܢܶܝ ܡܽܗ̄ܘ ܙܰܪܥܳܐ ܕܰܐܒܪܳܗܳܡ ܟܽܘܠّܶܗ ܐܰܒܢ̈ܶܐ ܢܶܝ، ܥܰܠ ܕܐܡܺܝܪ: ”ܒܺܐܝܣܚܳܩ ܓܡ݄ܩܪܶܐ ܠܳܟ̥ ܙܰܪܥܳܐ.“ 8ܘܗܰܢܳܐ ܝܳܐ ܕܠܳܐ ܟܳܐܡ݄ܪ ܕܰܗ̄ܢ ܐܰܒܢ̈ܶܐ ܕܽܗ̄ܘ ܦܰܓ̥ܪܳܐ ܐܰܒܢ̈ܶܐ ܕܰܐܠܳܗܳܐ ܢܶܝ. ܐܶܠܳܐ ܗ̄ܰܢ ܐܰܒܢ̈ܶܐ ܕܽܗ̄ܘ ܘܰܥܕܳܐ ܟܡ݄ܚܫܳܒ̥ܺܝ ܙܰܪܥܳܐ. 9ܘܽܗ̄ܘ ܡܰܐܡܪܳܐ ܕܽܗ̄ܘ ܘܰܥܕܳܐ ܗܰܢܳܐ ܝܳܐ: ”ܒܽܗ̄ܘ ܙܰܒܢܰܢܳܐ ܓܕܳܐܬ̥ܶܐ ܐ̱ܢܳܐ، ܘ݄ܓܕܳܗ̄ܘܶܐ ܐܰܒܪܳܐ ܠܣܰܪܳܐ.“ 10ܘܠܳܐ ܗܰܬ̥ܶܐ ܒܶܠܚܽܘܕ̥ܰܗ، ܐܶܠܳܐ ܪܰܦܩܳܐ ܣܬܶܝ ܕ݄ܛܥܺܝܢܳܐ ܡܶܢ̱ ܚܰܕ̱، ܡܶܢ̱ ܒܰܒܰܢ ܐܺܝܣܚܳܩ، 11ܘܡܶܩ݄ܕ̱ܡ ܕܳܗ̄ܘ݄ܢ ܗ̄ܰܢ ܐܰܒܢ̈ܰܝܕ̥ܰܗ، ܘܡܶܩ݄ܕ̱ܡ ܕܣܰܝܡܺܝ ܛܳܒ̥ܽܘܬ̥ܳܐ ܐܰܘ ܚܰܪܒܽܘܬ̥ܳܐ، ܗܰܘܺܝ ܝܕ̥ܺܝܥܳܐ ܠܡܰܢ ܓܒܶܐ ܠܶܗ (ܘ݄ܡܢܰܩܶܐ ܠܶܗ) ܐܰܠܳܗܳܐ، ܘܗܰܢܳܐ ܟܦܳܝ݄ܫ: ܕܠܳܐ ܒܰܥܒܳܕ̥̈ܶܐ ܐܶܠܳܐ ܒܺܗ̄ܝ ܩܪܰܝܬܳܐ ܕܰܗ̄ܘܳܐ ܕ݄ܩܪܶܐ ܠܶܗ. 12ܥܰܠ ܕܐܡܺܝܪ: ”ܗ̄ܽܘ ܪܰܒܳܐ ܓܕܳܗ̄ܘܶܐ ܓܪܶܝܥܳܐ ܠܽܗ̄ܘ ܙܥܽܘܪܳܐ.“ 13ܐܟ̥ ܕ݄ܟܬ̥ܺܝܒ̥: ”ܪܚ݄ܡ ܠܺܝ ܝܰܥܩܽܘܒ ܘ݄ܡܥܰܢܰܬ ܠܺܝ ܡܶܢ̱ ܥܺܝܣܽܘ.“
ܗ̄ܽܘ ܨܶܒܝܳܢܳܐ ܕܰܐܠܳܗܳܐ
14ܗܰܢ ܢܰܩܠܐ ܡ݄ܢ ܐ݄ܡّܺܪ̱ܝܢܰܐ: ܩܰܝ ܟܺܝܬ ܛܠܽܘܡܝܳܐ ܓܰܒ ܐܰܠܳܗܳܐ؟ ܠܳܐ، ܚܳܣ. 15ܟܰܐܠܶܗ ܠܡܽܘܫܶܐ ܣܬܶܝ ܐܡ݄ܪ ܠܶܗ: ”ܓܡܰܪܚܰܡ ܐ̱ܢܳܐ ܥܰܠ ܐܰܝܢܰܐ ܕܡܰܪܚܰܡ ܐ̱ܢܳܐ، ܘ݄ܓܡܰܚ݄ܢ ܐ̱ܢܳܐ ܠܰܐܝܢܰܐ ܕܡܰܚ݄ܢ ܐ̱ܢܳܐ.“ 16ܗܰܢ ܢܰܩܠܐ ܠܰܝ̱ܬ ܝܳܐ ܒܺܐܝܕ̥̥ܶܗ ܕܡܰܢ ܕܟܳܐܒ݄ܥ، ܘܠܳܐ ܒܺܐܝܕ̥ܶܗ ܕܟܽܘܠ ܚܰܕ̱ ܕ݄ܟܪܳܗ݄ܛ، ܐܶܠܳܐ ܒܺܐܝܕ̥ܶܗ ܕܰܐܠܳܗܳܐ ܗ̄ܽܘ ܡܪܰܚܡܳܢܳܐ. 17ܡܰܗ̄ܘܟ̥ܰܐ ܐܡ݄ܪ ܠܶܗ ܒܽܗ̄ܘ ܟܬ̥ܳܒ̥ܳܐ ܠܦܶܪܥܽܘܢ: ”ܠܰܫܰܢ ܗܰܬ̥ܶܐ ܡܰܩ݄ܡ ܠܺܝ ܠܳܟ̥، ܕܡܰܚܘܶܐ ܐ̱ܢܳܐ ܐܶܒܳܟ̥ ܗ̄ܽܘ ܚܰܝܠܰܝܕ̥ܺܝ، ܘ݄ܕܡ݄ܟܪ݄ܙ ܐ݄ܫܡܺܝ ܒܺܗ̄ܝ ܐܰܪܥܳܐ ܟܽܘܠܰܗ.“ 18ܘܗܰܘܟ̥ܰܐ، ܥܰܠ ܡܰܢ ܕܳܐܒ݄ܥ ܟܡܰܪܚ݄ܡ، ܘܥܰܠ ܡܰܢ ܕܳܐܒ݄ܥ ܟܩܳܫܶܐ.
ܗ̄ܽܘ ܒܳܠܳܐ ܝܰܪܺܝܟ̥ܳܐ ܕܰܐܠܳܗܳܐ ܘܽܗ̄ܘ ܪܽܘܓ̥ܙܰܝܕ̥ܶܗ
19ܘܟܳܗ̄ܘܶܐ ܕ݄ܐܡّܰܪ̱ܬ ܥܰܠ ܡ݄ܢ ܟܡܰܚ݄ܬ ܚܛܺܝܬ̥ܳܐ ܐܰܥܠܰܢ؟ ܡܰܢܝܳܐ ܕܟܺܝܒܶܗ ܩܳܝ݄ܡ ܡܩܰܒ݄ܠ ܕܽܗ̄ܘ ܨܶܒܝܳܢܰܝܕ̥ܶܗ؟ 20ܗܰܬ، ܡܰܢ ܗܰܬ ܝܰܐ ܢܳܫܳܐ ܕܡܰܕܥܪܰܬ ܦܽܘܢܳܝܳܐ ܠܰܐܠܳܗܳܐ؟ ܩܰܝ ܒܪܺܝܬ̥ܳܐ ܟ݄ܐܡّܳܪ̱ܐ ܠܽܗ̄ܘ ܒܳܪܽܘܝܰܝܕ̥ܰܗ ܩܰܝ ܗܰܘܟ̥ܰܐ ܒܪܶܐ ܠܳܟ̥ ܠܺܝ؟ 21ܐܰܘ ܗ̄ܽܘ ܩܰܘܳܩܳܐ ܠܰܝ̱ܬ ܠܶܗ ܫܽܘܠܛܳܢܳܐ ܥܰܠ ܗ̄ܽܘ ܛܺܝܢܰܝܕ̥ܶܗ ܕܣܳܝ݄ܡ ܡܶܢܶܗ ܬܪܶܝ ܣܶܦܳܩ̈ܶܐ، ܚܰܕ̱ ܠܽܗ̄ܘ ܐܺܝܩܳܪܳܐ ܘܚܰܕ̱ ܠܽܗ̄ܘ ܚܶܩܳܪܳܐ؟ 22ܐܶܢ ܕܰܐܒ݄ܥ ܐܰܠܳܗܳܐ ܕܡܰܚܘܶܐ ܗ̄ܽܘ ܪܽܘܓ̥ܙܰܝܕ̥ܶܗ ܘܡܰܘܕ̥݄ܥ ܗ̄ܽܘ ܚܰܝܠܰܝܕ̥ܶܗ، ܡܰܡܛܶܐ ܠܶܗ ܒܠܶܒܶܗ ܕܟ݄ܬ ܝܳܐ ܓ̥ܰܠܰܒܶܐ ܪܘܺܝܚܳܐ ܪܽܘܓ̥ܙܳܐ ܥܰܠ ܗ̄ܰܣّܶܦܳܩ̈ܶܐ ܕܽܗ̄ܘ ܪܽܘܓ̥ܙܳܐ ܕܣܺܝܡܺܝ ܠܽܗ̄ܘ ܣܶܟܳܪܳܐ، 23ܘ݄ܒܝܳܙܳܐ ܒ݄ܙ ܠܶܗ ܗ̄ܰܪّܰܚ̈ܡܰܝܕ̥ܶܗ ܥܰܠ ܗ̄ܰܣّܶܦܳܩ̈ܶܐ ܕܰܪّܰܚܡ̈ܶܐ، ܕܣܺܝܡܺܝ ܠܰܐܠܳܗܳܐ ܠܽܗ̄ܘ ܫܽܘܒܚܳܐ، 24ܘܰܐܚܢܰܐ ܕܟ݄ܬܢܰܐ ܩܰܪ̈ܝܶܐ، ܠܳܐ ܒܶܠܚܽܘܕ̥ܶܗ ܡܰܢ̱ ܝّܽܘܕ̥̈ܳܝܶܐ ܢܰܐ، ܐܶܠܳܐ ܘܡܰܢ̱ ܥّܰܡ̈ܶܐ ܣܬܶܝ. 25ܘ݄ܐܟ̥ ܕܐܡ݄ܪ ܠܶܗ ܒܗܽܘܫܳܥ: ”ܓ݄ܕܩܳܪܶܐ ܐ̱ܢܳܐ ܠܰܗ̄ܢܺܝ ܕܠܰܝ̱ܬ ܗ̄ܘܰܝܢܶܝ ܗ̄ܽܘ ܥܰܡܰܝܕ̥ܺܝ ܥܰܡܳܐ ܕܺܝܕ̥ܺܝ، ܘܠܰܗ̄ܝܳܐ ܕܠܰܝ̱ܬ ܗ̄ܘܰܐ ܪܚ݄ܡܬܳܐ، ܪܚ݄ܡܬܳܐ ܗܰܘܝܳܐ.“
26ܘ݄ܓܕܳܗ̄ܘܶܐ ܒܺܗ̄ܝ ܕܽܘܟܬ̥ܳܐ ܕܡ݄ܩܪ݄ܢ ܗ̄ܘܰܘ̱، ܠܳܐ ܗ̄ܽܘ ܥܰܡܰܝܕ̥ܺܝ، ܬܰܡܳܐ ܓܡ݄ܩܪ݄ܢ ܐܰܒܢ̈ܶܐ ܠܰܐܠܳܗܳܐ ܗ̄ܽܘ ܚܰܝܳܐ. 27ܘܶܐܫܰܥܝܳܐ ܣܬܶܝ ܟܪ݄ܙ ܠܶܗ ܥܰܠ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ، ”ܘܶܐܢ ܗܰܘܺܝ ܗ̄ܽܘ ܡܶܢܝܳܢܳܐ ܕܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܐܟ̥ ܕܽܗ̄ܘ ܥܰܦܪܳܐ ܢܚܺܝܠܳܐ ܕܒܽܗ̄ܘ ܝܰܡܳܐ، ܐ݄ܫܡ݄ܢܬܳܐ ܕܡ݄ܢّܶܗ ܒܶܠܚܽܘܕ̥ܶܗ ܓܚܳܝ݄ܢ. 28ܘܡܳܪܝܳܐ ܚܟ݄ܡ ܠܶܗ ܘܐܡ݄ܪ ܠܶܗ ܗ̄ܽܘ ܡܰܐܡܪܰܝܕ̥ܶܗ ܘܓ݄ܕܣܳܝܰܡ ܠܶܗ ܥܰܠ ܗ̄ܺܝ ܐܰܪܥܳܐ.“ 29ܘ݄ܐܟ̥ ܕܐܡ݄ܪ ܠܶܗ ܡܶܢ̱ ܡܶܩ݄ܕ̱ܡ ܐܶܫܰܥܝܳܐ: ”ܕܠܳܐ ܗ̄ܘܶܐ ܡܶܢ̱ ܡܳܪܝܳܐ ܕܰܚّܰܝ̈ܠܶܐ ܕ݄ܛܪܶܐ ܠܶܗ ܠܰܢ ܗ̄ܺܝ ܐ݄ܫܡ݄ܢܬܳܐ ܕܦܰܝܺܝܫܳܐ (ܡܽܗ̄ܘ ܥܰܡܰܝܕ̥ܰܢ)، ܓܕܳܗ̄ܘܺܝ ܗ̄ܘܰܝܢܰܐ ܐܟ̥ ܕܰܗ̄ܢ ܢܳܫ̈ܶܐ ܕ݄ܣܕ̥ܽܘܡ ܘ݄ܕܥܳܡܽܘܪܳܐ.“
ܗ̄ܺܝ ܟܺܐܢܽܘܬ̥ܳܐ ܠ݄ܐ ܟ݄ܡܗܰܢܝܳܐ ܒܽܗ̄ܘ ܢܳܡܽܘܣܳܐ، ܐܶܠܳܐ ܒܺܗ̄ܝ ܗܰܝܡܳܢܽܘܬ̥ܳܐ
30ܗܰܢ ܢܰܩܠܐ ܡ݄ܢ ܐ݄ܡّܺܪ̱ܝܢܰܐ؟ ܗ̄ܰܥّܰܡ̈ܶܐ ܕܠܳܐ ܪܰܗܺܝܛܺܝ ܒ݄ܬ̥݄ܪ ܗ̄ܺܝ ܟܺܐܢܽܘܬ̥ܳܐ، ܡܰܛ݄ܢ ܠܺܗ̄ܝ ܟܺܐܢܽܘܬ̥ܳܐ، ܗ̄ܺܝ ܟܺܐܢܽܘܬ̥ܳܐ ܕܟ݄ܬ ܝܳܐ ܡܺܗ̄ܝ ܗܰܝܡܳܢܽܘܬ̥ܳܐ. 31ܘܺܐܝܣܪܳܐܶܝܠ ܕܪܳܗܰܛ ܗ̄ܘܰܐ ܒ݄ܬ̥݄ܪ ܗ̄ܽܘ ܢܳܡܽܘܣܳܐ ܕܺܗ̄ܝ ܟܺܐܢܽܘܬ̥ܳܐ، ܠܽܗ̄ܘ ܢܳܡܽܘܣܳܐ ܕܺܗ̄ܝ ܟܺܐܢܽܘܬ̥ܳܐ ܠܳܐ ܡܰܛܺܝ. 32ܠܡ݄ܢ (ܠܳܐ ܡܰܛܺܝ)؟ ܡܺܐܝܕ̥ܶܗ ܕܠܰܝ̱ܬ ܗ̄ܘܰܐ ܡܺܗ̄ܝ ܗܰܝܡܳܢܽܘܬ̥ܳܐ ܐܶܠܳܐ ܡܰܢ̱ ܥܒܳܕ̥̈ܶܐ ܕܽܗ̄ܘ ܢܳܡܽܘܣܳܐ. ܘܗܰܘܟ̥ܰܐ ܡܛܰܪܒܠܺܝ ܒܺܗ̄ܝ ܟܶܐܦܳܐ ܕܺܗ̄ܝ ܛܶܪܒܰܠܬܳܐ. 33ܘ݄ܐܟ̥ ܕ݄ܟܬ̥ܺܝܒ̥: ”ܟܰܐܠܺܝ ܟܡܰܚ݄ܬ ܐ̱ܢܳܐ ܒܨܶܗܝܽܘܢ ܟܶܐܦܳܐ ܕܺܗ̄ܝ ܛܶܪܒܰܠܬܳܐ، ܟܶܐܦܳܐ ܕܽܗ̄ܘ ܦܽܘܠܳܓ̥ܳܐ، ܘܡܰܢ ܕ݄ܡܗܰܝܡ݄ܢ ܐܶܒܰܗ ܠ݄ܐ ܓܡܺܝܢܰܟ݄ܦ.“
Currently Selected:
ܐܶܓܰܪܬ̥ܳܐ ܠܰܪّܽܘܡܳܝ̈ܶܐ 9: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
