ܐܶܓܰܪܬ̥ܳܐ ܠܰܪّܽܘܡܳܝ̈ܶܐ 13

ܫܡܳܥܳܐ ܠܰܫّܰܠܺܝ̈ܛܶܐ

1ܟܽܘܠ ܢܳܫܳܐ ܠܰܫّܽܘܠܛܳܢ̈ܶܐ ܥܶܠܳܝ̈ܶܐ ܛܪܳܐ ܫܳܡ݄ܥ، ܡܺܐܝܕ̥ܶܗ ܕܠܰܝܬ ܫܽܘܠܛܳܢܳܐ ܕܠܰܝ̱ܬ ܝܳܐ ܡܰܢ̱ ܐ‌ܠܳܗܳܐ. ܘܰܫّܽܘܠܛܳܢ̈ܶܐ ܕܟ݄ܬܢܶܝ، ܒܽܗ̄ܘ ܦܽܘܩܕܳܢܳܐ ܕܰܐ‌ܠܳܗܳܐ ܢܶܝ. 2ܗܰܢ ܢܰܩܠܐ ܡܰܢ ܕܩܳܝ݄ܡ ܡܩܰܒ݄ܠ ܕܽܗ̄ܘ ܫܽܘܠܛܳܢܳܐ، ܡܩܰܒ݄ܠ ܕܽܗ̄ܘ ܦܽܘܩܕܳܢܳܐ ܕܰܐ‌ܠܳܗܳܐ ܟܩܳܝ݄ܡ. ܘܗܰܢܺܝ ܕ݄ܟܩܰܝܡܺܝ ܡܩܰܒ݄ܠ ܕ݄ܬّ̥ܶܗ ܓܡܺܝܕܳܢܺܝ (ܘܡ݄ܚܟ݄ܡ ܐܰܥܠܰܝّܶܗ). 3ܡܺܐܝܕ̥ܶܗ ܕܰܕّܰܝܳܢ̈ܶܐ ܠܰܝ̱ܬ ܢܶܝ ܙܽܘܥܬ̥ܳܐ ܠܰܐܝܢܰܐ ܕ݄ܟܣܰܝܡܺܝ ܥܒܳܕ̥̈ܶܐ ܛܳܒ̥̈ܶܐ، ܐܶ‌ܠܳܐ ܠܰܐܝܢܰܐ ܕ݄ܟܣܰܝܡܺܝ ܥܒܳܕ̥̈ܶܐ ܒܺܝܫ̈ܶܐ. ܗܰܢ ܢܰܩܠܐ ܕܳܐܒܥܰܬ ܕܠܳܐ ܙܰܝܥܰܬ ܡܽܗ̄ܘ ܫܽܘܠܛܳܢܳܐ ܣܘܿܡ ܥܒܳܕ̥̈ܶܐ ܛܳܒ̥̈ܶܐ، ܘ݄ܓܕܳܗ̄ܘܶܐ ܠܳܟ̥ ܫܽܘܒܚܳܐ ܡܶܢܶܗ، 4ܥܰܠ ܕܟ݄ܬ ܝܳܐ ܗ̄ܽܘ ܡܫܰܡܫܳܢܳܐ ܕܰܐ‌ܠܳܗܳܐ، ܘ݄ܟܣܳܝ݄ܡ ܠܺܗ̄ܝ ܛܳܒ̥ܽܘܬ̥ܰܝܕ̥ܳܟ̥. ܘܶܐܢ ܒܺܝܫܬܳܐ (ܘܚܰܪܒܽܘܬ̥ܳܐ) ܟܣܰܝܡܰܬ ܙܘܿܥ ܡܶܢܶܗ، ܡܺܐܝܕ̥ܶܗ ܕܠܳܐ ܥܰܠ ܒܰܛܺܝܠܳܐ ܟܛܳܥ݄ܢ ܗ̄ܽܘ ܣܰܝܦܳܐ ܒܺܐܝܕ̥ܶܗ: ܐܟ̥ ܕܽܗ̄ܘ ܡܫܰܡܫܳܢܳܐ ܕܰܐ‌ܠܳܗܳܐ ܓܡܰܢܚ݄ܬ ܪܽܘܓ̥ܙܳܐ ܥܰܠ ܐܰܝܢܰܐ ܕ݄ܟܣܰܝܡܺܝ ܗ̄ܰܒّܺܝܫ̈ܳܬ̥ܳܐ. 5ܡܰܗ̄ܘܟ̥ܰܐ ܟܠܳܙܰܡ ܠܰܢ ܕܫܳܡܥܺܝܢܰܐ، ܠܳܐ ܡܺܗ̄ܝ ܙܽܘܥܬ̥ܳܐ ܕܽܗ̄ܘ ܪܽܘܓ̥ܙܳܐ ܒܶܠܚܽܘܕ̥ܶܗ، ܐܶ‌ܠܳܐ ܠܰܫܰܢ ܗ̄ܺܝ ܬ̥ܢܺܝܚܽܘܬ̥ܳܐ ܕܒܳܠܰܢ (ܬܺܐܪܬܰܢ) ܣܬܶܝ. 6ܡܰܗ̄ܘܟ̥ܰܐ ܗܰܬܽܘ ܟܣܶܦܪܺܝܫܳܐ ܣܬܶܝ ܟܳܗ̄ܒܺܝܬܽܘ، ܥܰܠ ܕܟ݄ܬܢܶܝ ܡܫܰܡܫܳܢ̈ܶܐ ܕܰܐ‌ܠܳܗܳܐ ܕ݄ܟܩܰܝܡܺܝ ܥܰܠ ܗ̄ܰܡّܶܕ̈ܳܢܰܢܺܝ. 7ܗܰܢ ܢܰܩܠܐ ܗܰܒ̥ܽܘ ܠܟܽܘܠ ܚܰܕ̱ ܗ̄ܽܘ ܡܶܕܶܐ ܕ݄ܟܢܳܦܶܠ ܠܶܗ: ܠܡܰܢ ܟܣܶܦܪܺܝܫܳܐ، ܟܣܶܦܪܺܝܫܳܐ، ܘ݄ܠܡܰܢ ܡܰܟ̥ܣܳܐ، ܡܰܟ̥ܣܳܐ، ܘ݄ܠܡܰܢ ܙܽܘܥܬ̥ܳܐ، ܙܽܘܥܬ̥ܳܐ، ܘ݄ܠܡܰܢ ܐܺܝܩܳܪܳܐ، ܐܺܝܩܳܪܳܐ.

ܢ݄ܟܦܽܘܬ̥ܳܐ ܘܡܰܟܺܝܟ̥ܽܘܬ̥ܳܐ

8ܘܠܳܐ ܗ̄ܘܺܝܬܽܘ ܬܰܚܬܶܗ ܕܰܝܢܳܐ ܠܢܳܫܳܐ، ܐܶ‌ܠܳܐ ܒܚܽܘܒܳܐ ܗܘܰܝܽܘ ܠ݄ܚܕ̥ܳܕ̥̈ܶܐ. ܡܰܢ ܕܪܳܚ݄ܡ ܗ̄ܽܘ ܚܰܒ̥ܪܰܝܕ̥ܶܗ ܣ݄ܡ ܠܶܗ ܟܽܘܠܶܗ ܗ̄ܽܘ ܢܳܡܽܘܣܳܐ. 9ܘܗܰܝܳܐ ܣܬܶܝ ܕܐܡ݄ܪ ܠܶܗ: ”ܠܳܐ ܙܳܢܰܬ ܘܠܳܐ ܩ݄ܛܠܰܬ، ܘܠܳܐ ܓ݄ܢܒ̥ܰܬ، ܠܳܐ ܪܰܝܓ̥ܰܬ،“ ܘܶܐܢ ܟܺܝܬ ܦܽܘܩܕܳܢܳܐ ܚܪܶܢܳܐ ܒܺܗ̄ܝ ܡܶܠܬ̥ܰܬ̥ܶܐ ܟܟܳܡ݄ܠ: ”ܪܚܰܡ ܠܽܗ̄ܘ ܩܰܪܺܝܒ̥ܰܝܕ̥ܳܟ̥ ܐܟ̥ ܕܺܗ̄ܝ ܢܰܦܫܰܝܕ̥ܳܟ̥.“

10ܡܰܢ ܕܪܳܚ݄ܡ ܠܽܗ̄ܘ ܩܰܪܺܝܒ̥ܰܝܕ̥ܶܗ ܠ݄ܐ ܟܣܳܝ݄ܡ ܚܰܪܒܽܘܬ̥ܳܐ ܐܰܥܡܶܗ، ܡܺܐܝܕ̥ܶܗ ܕܺܗ̄ܝ ܚܽܘܒܳܐ ܡܰܠܝܽܘܬ̥ܳܐ ܕܽܗ̄ܘ ܢܳܡܽܘܣܳܐ ܝܳܐ. 11ܘܗܰܬ̥ܶܐ ܣܬܶܝ ܝܕ̥ܰܥܽܘ: ܗ̄ܽܘ ܙܰܒܢܳܐ ܝܳܐ ܘܺܗ̄ܝ ܫܳܥܬ̥ܳܐ ܝܳܐ ܕܩܰܝܡܺܝܢܰܐ ܡܺܗ̄ܝ ܫܰܢܬ̥ܰܝܕ̥ܰܢ: ܥܰܠ ܕܳܐܥܕܳܐ ܡܩܰܕܰܡ ܠܶܗ ܗ̄ܽܘ ܦܽܘܪܩܳܢܰܝܕ̥ܰܢ (ܗ̄ܰܚّܰܝ̈ܰܝܕ̥ܰܢ) ܙ݄ܕ ܡܽܗ̄ܘ ܝܰܘܡܳܐ ܕ݄ܡܗܰܝܡܰܢ ܠܰܢ. 12ܘܽܗ̄ܘ ܠܰܠܝܳܐ ܫܰܦ݄̊ܥ ܘܽܗ̄ܘ ܐܺܝܡܳܡܳܐ ܡܩܰܕܰܡ ܠܶܗ، ܗܰܢ ܢܰܩܠܐ ܛܪܳܐ ܡܚܰܠܩܺܝܢܰܐ ܡܶܢܰܢ ܗ̄ܰܥܒܳܕ̥̈ܶܐ ܕܽܗ̄ܘ ܥܰܡܛܳܢܳܐ ܘܠܳܒ̥ܫܺܝܢܰܐ ܗ̄ܽܘ ܙܰܝܢܳܐ ܕܽܗ̄ܘ ܢܽܘܗܪܳܐ. 13ܘ݄ܐܟ̥ ܕܒܽܗ̄ܘ ܢܽܘܗܪܳܐ ܕܽܗ̄ܘ ܐܺܝܡܳܡܳܐ، ܛܪܳܐ ܒܰܛّܳܒ̥̈ܳܬ̥ܳܐ ܡܗܰܠܟ̥ܺܝܢܰܐ، ܠܳܐ ܒܽܗ̄ܘ ܙܡܳܪܳܐ ܘܠܳܐ ܒܺܗ̄ܝ ܪܰܘܳܝܽܘܬ̥ܳܐ ܘܠܳܐ ܒܽܗ̄ܘ ܕܡܳܟ̥ܳܐ ܡܚܰܪܡܳܐ ܘܠܳܐ ܒܽܗ̄ܘ ܚܣܳܡܳܐ ܘܠܳܐ ܒܽܗ̄ܘ ܡܰܐܡܪܳܐ ܘܬܶܢܳܝܳܐ. 14ܐܶ‌ܠܳܐ ܠܒ̥ܰܫܽܘ ܠܡܳܪܰܢ ܝܶܫܽܘܥ ܡܫܺܝܚܳܐ، ܘܠܳܐ ܗ̄ܘܺܝܬܽܘ ܡܳܪܳܐ ܠܰܪ̈ܓ̥ܺܝܓ̥ܳܬ̥ܳܐ ܕܽܗ̄ܘ ܓܽܘܫܡܰܬ̥ܟ̥ܽܘ.

Currently Selected:

ܐܶܓܰܪܬ̥ܳܐ ܠܰܪّܽܘܡܳܝ̈ܶܐ 13: ܟܬܒܐ

Highlight

Copy