ܐܶܓܰܪܬ̥ܳܐ ܠܰܪّܽܘܡܳܝ̈ܶܐ 1
1
ܡܚܰܘܝܳܢܽܘܬ̥ܳܐ
1ܦܰܘܠܳܘܣ، ܗ̄ܽܘ ܥܰܒܕܳܐ ܕܝܶܫܽܘܥ ܡܫܺܝܚܳܐ، ܗ̄ܽܘ ܩܰܪܝܳܐ ܘܽܗ̄ܘ ܫܠܺܝܚܳܐ، ܕ݄ܦܪܺܝܫ ܠܽܗ̄ܘ ܡܓܰܠܝܘ̇ܢ ܕܰܐܠܳܗܳܐ، 2ܕܡܶܢ̱ ܡܶܩ݄ܕ̱ܡ ܡܘܰܥܰܕ ܠܶܗ ܒܰܢܒܺܝ̈ܰܝܕ̥ܶܗ ܒܰܟܬ̥ܳܒ̥̈ܶܐ ܩܰܕ̈ܺܝܫܶܐ، 3ܥܰܠ ܗ̄ܽܘ ܐܰܒܪܰܝܕ̥ܶܗ، ܗܰܘܳܐ ܕܡܰܘܠ݄ܕ̥ (ܕ݄ܡܬܰܘܠ݄ܕ̥) ܒܽܗ̄ܘ ܦܰܓ̥ܪܳܐ ܡܽܗ̄ܘ ܙܰܪܥܳܐ ܕܒܶܝܬ̥ ܕܰܘܺܝܕ̥، 4ܘܺܝܕ̥ܺܝܥ ܗ̄ܽܘ ܐܰܒܪܳܐ ܕܰܐܠܳܗܳܐ ܒܚܰܝܠܳܐ ܘ݄ܒܪܽܘܚܳܐ ܕܩܽܘܕܫܳܐ ܒܺܗ̄ܝ ܩܝܰܡܬܳܐ ܕܩܰܝ݄ܡ ܡܒܰܝܢ ܗ̄ܰܡّܺܝ̈ܬ̥ܶܐ، ܡܳܪܰܢ ܝܶܫܽܘܥ ܡܫܺܝܚܳܐ، 5ܕܶܐܒܶܗ ܡ݄ܕ ܠܰܢ ܛܰܝܒܽܘܬ̥ܳܐ ܘܗܰܘܺܝܢܰܐ ܫܠܺܝܚ̈ܶܐ ܒܟܽܘܠّܶܗ ܗ̄ܰܥّܰܡ̈ܶܐ ܠܰܫܰܢ ܕܫܳܡܥܺܝ ܠܺܗ̄ܝ ܗܰܝܡܳܢܽܘܬ̥ܳܐ ܕ݄ܐܫܡܶܗ، 6ܕܗܰܬܽܘ ܣܬܶܝ ܡ݄ܢّܶܗ ܗܰܬܽܘ، ܩܰܪ̈ܝܶܐ ܒܝܶܫܽܘܥ ܡܫܺܝܚܳܐ، 7ܠܟܘ̇ܠّܶܗ ܕܟ݄ܬܢܶܝ ܒܪܽܗ̄ܘܡܺܝ، ܚܰܒܺܝܒ̈ܶܐ ܕܰܐܠܳܗܳܐ، ܩܰܪ̈ܝܶܐ ܘܩܰܕ̈ܺܝܫܶܐ: ܫܠܳܡܳܐ ܘܛܰܝܒܽܘܬ̥ܳܐ ܐܰܥܡܰܝܟ̥ܽܘ ܡܰܢ̱ ܐܠܳܗܳܐ ܐܰܒܘܿܢ، ܘܡܶܢ̱ ܡܳܪܰܢ ܝܶܫܽܘܥ ܡܫܺܝܚܳܐ.
ܦܰܘܠܳܘܣ ܟܪܳܚ݄ܡ ܕ݄ܐܙّܶܗ ܠܪܽܘܡܺܝ
8ܒܺܗ̄ܝ ܩܰܕ̱ܡܰܝܬܳܐ، ܟܡܰܘܕܶܐ ܐ̱ܢܳܐ ܠܰܐܠܳܗܰܝܕ̥ܺܝ ܒܝܶܫܽܘܥ ܡܫܺܝܚܳܐ ܡܶܢ̱ ܚܠܳܦ ܟܽܘܿܠܟ̥ܽܘ، ܕܺܗ̄ܝ ܗܰܝܡܳܢܽܘܬ̥ܰܬ̥ܟ̥ܽܘ ܫܡܺܝܥܳܐ ܒܟܽܘܠܶܗ ܗ̄ܽܘ ܥܳܠܡܳܐ. 9ܘ݄ܟܣܳܗܰܕ ܠܺܝ ܐܰܠܳܗܳܐ ܕܶܐܠܶܗ ܟ݄ܡܫܰܡܰܫ ܐ̱ܢܳܐ ܒܺܗ̄ܝ ܪܽܘܚܳܐ ܒܽܗ̄ܘ ܡܓܰܠܝܘ̇ܢ ܕܽܗ̄ܘ ܐܰܒܪܰܝܕ̥ܶܗ، ܕܠܳܐ ܟܠܳܝܳܐ، ܒܟܽܘܠ ܙܰܒܢܳܐ ܟܡܰܕ̥ܟܰܪ ܐ̱ܢܳܐ ܠܟ̥ܽܘ ܒܰܨܠܰܘ̈ܳܬ̥ܰܝܕ̥ܺܝ. 10ܘܡܶܢ̱ ܙܰܒܢܳܐ ܟܳܡܨܰܠܶܐ ܐ̱ܢܳܐ ܕܡ݄ܦܬܰܚ ܠܺܝ ܕܰܪܒܳܐ، ܒܽܗ̄ܘ ܨܶܒܝܳܢܳܐ ܕܰܐܠܳܗܳܐ، ܕܳܐܬ̥ܶܐ ܐ̱ܢܳܐ ܠܓܰܒܰܝܟ̥ܽܘ. 11ܥܰܠ ܕܓ̥ܰܠܰܒܶܐ ܠܗܺܝܩܳܝܳܐ ܐ̱ܢܳܐ ܕܚܳܙܶܐ ܐ̱ܢܳܐ ܠܟ̥ܽܘ، ܘܕܳܗ̄ܒܶܐ ܐ̱ܢܳܐ ܠܟ̥ܽܘ ܗ̄ܺܝ ܡܰܘܗܰܒܬܳܐ ܕܺܗ̄ܝ ܪܽܘܚܳܐ ܕܶܐܒܰܗ ܡܺܝܚܳܨܺܝܬܽܘ. 12ܘܥܰܡ ܚܕ̥ܳܕ̥̈ܶܐ ܡܺܝܒܰܣܡܺܝܢܰܐ ܒܺܗ̄ܝ ܗܰܝܡܳܢܽܘܬ̥ܰܬ̥ܟ̥ܽܘ ܘܕܺܝܕ̥ܺܝ. 13ܐܰܚܽܘ̈ܢܳܢܶܐ، ܟܳܐܒܰܥ ܐ̱ܢܳܐ ܕܳܐܕ̥ܥܺܝܬܽܘ ܕܓ̥ܰܠܰܒܶܐ ܟܳܪ̈ܶܐ ܐܰܒ݄ܥ ܐ̱ܢܳܐ ܕܳܐܬ̥ܶܐ ܐ̱ܢܳܐ ܠܓܰܒܰܝܟ̥ܽܘ، ܘܗܳܠ ܐܳܥܕܳܐ ܡܰܟܠܶܐ ܐ̱ܢܳܐ، ܠܰܫܰܢ ܕܰܐܒܟ̥ܽܘ ܣܬܶܝ ܗܳܘܶܐ ܠܺܝ ܦܺܐܪܳܐ ܐܟ̥ ܕܒܰܥّܰܡ̈ܶܐ ܚܪ̈ܶܢܶܐ: 14ܝܰܘܢܳܝ̈ܶܐ ܘܒܰܪܒܪ̈ܳܝܶܐ، ܚܰܟܺܝܡ̈ܶܐ ܘܣܰܟ̥̈ܠܶܐ، ܥܰܠ ܕܕܰܝܢܳܐ ܝܳܐ ܕܰܝܢܳܐ ܐܰܥܠܺܝ ܕ݄ܠܟܽܘܠ ܢܳܫܳܐ ܕܟܳܪܰܙ ܐ̱ܢܳܐ. 15ܘܗܰܘܟ̥ܰܐ ܡܶܢ ܟܽܘܠܶܗ ܠܶܒܺܝ ܕܰܐܠܟ̥ܽܘ ܣܬܶܝ ܕ݄ܒܪܽܘܗ̄ܡܺܝ ܕܟܳܪܰܙ ܐ̱ܢܳܐ.
ܗ̄ܽܘ ܚܰܝܠܳܐ ܕܺܗ̄ܝ ܣܒܰܪܬ̥ܳܐ
16ܘܳܐܢܳܐ ܠ݄ܐ ܟܡܺܝܢܰܟܰܦ ܐ̱ܢܳܐ ܒܽܗ̄ܘ ܡܓܰܠܝܘ̇ܢ، ܥܰܠ ܕܚܰܝܠܳܐ ܕܰܐܠܳܗܳܐ ܠܰܚّܰܝ̈ܶܐ ܕܟܽܘܠ ܕ݄ܡܗܰܝܡ݄ܢ ܐܶܒܶܗ: ܐܶܢ ܡܰܢ̱ ܝّܽܘܕ̥̈ܳܝܶܐ ܒܺܗ̄ܝ ܩܰܕ̱ܡܰܝܬܳܐ، ܐܰܘ ܡܰܗ̄ܢ ܐܰܪ̈ܡܳܝܶܐ، 17ܥܰܠ ܕܺܗ̄ܝ ܟܺܐܢܽܘܬ̥ܳܐ ܕܰܐܠܳܗܳܐ ܐܶܒܶܗ (ܒܽܗ̄ܘ ܡܓܰܠܝܘ̇ܢ) ܟܡ݄ܓܠܳܝܳܐ ܡܶܢ̱ ܗܰܝܡܳܢܽܘܬ̥ܳܐ ܠܗܰܝܡܳܢܽܘܬ̥ܳܐ، ܐܟ̥ ܕ݄ܟܬ̥ܺܝܒ̥: ”ܗ̄ܽܘ ܟܺܐܢܳܐ ܡܺܗ̄ܝ ܗܰܝܡܳܢܽܘܬ̥ܳܐ ܟܚܳܝܶܐ.“
ܗ̄ܰܫّܰܪܺܝܪ̈ܳܬ̥ܳܐ ܕ݄ܟܠ݄ܙܡܺܝ
ܗ̄ܺܝ ܚܛܺܝܬ̥ܳܐ ܕܺܗ̄ܝ ܢܳܫܽܘܬ̥ܳܐ
18ܘܽܗ̄ܘ ܪܽܘܓ̥ܙܳܐ ܕܰܐܠܳܗܳܐ ܟܡ݄ܓܠܶܐ ܡܺܗ̄ܝ ܫܡܰܝܳܐ ܥܰܠ ܗ̄ܺܝ ܚܛܺܝܬ̥ܳܐ ܘܺܗ̄ܝ ܒܺܝܫܬܳܐ ܟܽܘܠܰܗ ܕܰܗ̄ܢ ܢܳܫ̈ܶܐ، ܗܰܢ݄ܟ ܕܟܳܣܳܟ̥ܪܺܝ ܩ݄ܕ̱ܡ ܗ̄ܽܘ ܫܪܳܪܳܐ ܒܺܗ̄ܝ ܚܛܺܝܬ̥ܳܐ، 19ܥܰܠ ܕܺܗ̄ܝ ܝܕ̥ܰܥܬܳܐ ܕܰܐܠܳܗܳܐ ܓܰܠܝܳܐ ܐܰܠّܶܗ: ܘܰܐܠܳܗܳܐ ܓܰܠܝܳܐ ܠܶܗ ܐܰܠّܶܗ. 20ܡܺܐܝܕ̥ܶܗ ܕܡܽܗ̄ܘ ܗܘܳܝܳܐ ܕܽܗ̄ܘ ܥܳܠܡܳܐ ܗ̄ܰܟّܰܣܝ̈ܳܬ̥ܳܐ ܕܰܐܠܳܗܳܐ ܘܽܗ̄ܘ ܚܰܝܠܰܝܕ̥ܶܗ ܘܺܗ̄ܝ ܐܰܠܳܗܽܘܬ̥ܰܝܕ̥ܶܗ ܕ݄ܠܥܳܠܰܡ ܟܡ݄ܚܙ݄ܢ ܒܽܗ̄ܘ ܗܰܘܢܳܐ ܠܰܒّܶܪ̈ܝܳܬ̥ܰܝܕ̥ܶܗ، ܠܰܫܰܢ ܕܠܳܐ ܗ̄ܘܰܠّܶܗ ܡܰܦܬܰܚ ܦܶܡܳܐ. 21ܥܰܠ ܕܰܐܕ̥ܺܝܥܺܝ ܠܰܐܠܳܗܳܐ، ܘܠܳܐ ܐܟ̥ ܕܠܰܐܠܳܗܳܐ ܡܫܰܒܰܚّܶܗ ܘܡܰܘܕܰܠّܰܗ ܠܶܗ. ܐܶܠܳܐ ܐܰܙّ݄ܢ ܒ݄ܬ̥ܪܶܗ ܕ݄ܚܫܳܒ̥̈ܶܐ ܒܰܛܺܝ̈ܠܶܐ، ܘܥܰܬ݄ܡ ܠܶܒܰܝّܶܗ ܕܠܳܐ ܦܳܗ݄ܡ. 22ܘ݄ܟܚܳܫܒ̥ܺܝ ܪܽܘܚܰܝّܶܗ ܕܚܰܟܺܝܡ̈ܶܐ ܢܶܝ، ܗܰܘ݄ܢ ܣܰܟ̈ܠܶܐ. 23ܘ݄ܡܚܰܠܰܦّܶܗ ܗ̄ܽܘ ܫܽܘܒܚܳܐ ܕܰܐܠܳܗܳܐ ܕܠ݄ܐ ܟܚܳܪܽܒ̥ ܒܨܽܘܪܬܳܐ ܕܒܰܪܢܳܫܳܐ ܕ݄ܟܚܳܪܽܒ̥، ܘ݄ܒܨܽܘܪܬܳܐ ܕܰܛّܰܝܪ̈ܶܐ، ܘܕܰܗ̄ܢ ܐܰܪܒܰܥ ܪ̈ܰܓ̥ܠܶܐ، ܘܕܰܪّܰܚܫ̈ܳܐ ܕܺܗ̄ܝ ܐܰܪܥܳܐ. 24ܡܰܗ̄ܘܟ̥ܰܐ، ܐܰܠܳܗܳܐ ܡܰܫܠܡܺܝ ܠܶܗ ܠܰܪ̈ܓ̥ܺܝܓ̥ܳܬ̥ܳܐ ܡܚܰܪ̈ܡܶܐ ܕܠܶܒܰܝّܶܗ ܕܰܐܒّܶܗ ܡܚܰܪܰܡܺܝ ܦܰܓ̥ܪ̈ܰܝّܶܗ. 25ܘ݄ܡܚܰܠܰܦّܶܗ ܗ̄ܽܘ ܫܪܳܪܳܐ ܕܰܐܠܳܗܳܐ ܒܺܗ̄ܝ ܕܽܘܓܠܳܐ. ܘ݄ܣܓ̥݄ܕّܶܗ ܘ݄ܡܫܰܡܰܫّܶܗ ܠܒܶܪ̈ܝܳܬ̥ܳܐ ܛܰܒ̥ ܡܶܢ̱ ܗ̄ܽܘ ܒܳܪܽܘܝܳܐ ܕ݄ܒܪܰܠّܶܗ، ܐܰܠܳܗܳܐ، ܕܶܐܠܶܗ ܬܶܫ݄ܒܚ̈ܳܬ̥ܳܐ ܘܒܽܘܪ̈ܟܳܬ̥ܳܐ ܠܥܳܠܰܡ ܥܳܠܡܺܝܢ. ܐܰܡܺܝܢ. 26ܡܰܗ̄ܘܟ̥ܰܐ، ܐܰܠܳܗܳܐ ܡܰܫܠܡܺܝ ܠܶܗ ܠܰܟّܶܐܒ̥̈ܶܐ ܕܽܗ̄ܘ ܥܰܝܒܳܐ (ܘܕܺܗ̄ܝ ܢ݄ܟܦܽܘܬ̥ܳܐ). ܗ̄ܰܢ ܢܶܫ̈ܰܬّ̥ܶܗ ܡܚܰܠܰܦّܶܗ ܗ̄ܽܘ ܥܒ̥ܳܕ̥ܳܐ ܕܽܗ̄ܘ ܟܝܳܢܰܬّ̥ܶܗ، ܘܒܽܗ̄ܘ ܡܶܕܶܐ ܕܠܳܐ ܟܳܗ̄ܘܶܐ ܣ݄ܡّܶܗ. 27ܘܗܰܘܟ̥ܰܐ ܣܬܶܝ ܗ̄ܰܓّܰܒ̥ܪ̈ܰܬّ̥ܶܗ، ܛܪܰܠّܶܗ ܗ̄ܽܘ ܥܒ̥ܳܕ̥ܳܐ ܕܽܗ̄ܘ ܟܝܳܢܳܐ ܕܥܰܡ ܗ̄ܰܢ ܢܶܫ̈ܶܐ، ܘ݄ܙܢܰܠّܶܗ ܚܰܕ̱ ܥܰܡ ܚܰܕ̱، ܓܰܒ̥ܪܳܐ ܥܰܡ ܓܰܒ̥ܪܳܐ، ܢ݄ܟܦܽܘܬ̥ܳܐ ܪܰܒܬ̥ܳܐ ܣ݄ܡّܶܗ. ܘܽܗ̄ܘ ܐܰܓ̥ܪܳܐ ܕܫܳܘܶܐ ܗ̄ܘܰܐ ܠܺܗ̄ܝ ܛܳܥܝܽܘܬ̥ܰܬّ̥ܶܗ ܒܪܽܘܚܰܝّܶܗ ܡܰܩܒܰܠّܶܗ. 28ܘ݄ܐܟ̥ ܕܠܰܐ ܐܒܺܝܥܺܝ ܕܳܐܕ̥ܥܺܝ ܒܪܽܘܚܰܝّܶܗ ܠܰܐܠܳܗܳܐ، ܐܰܠܳܗܳܐ ܡܰܫܠܡܺܝ ܠܶܗ ܠܡܰܕ̥ܥܳܐ ܒܰܛܺܝܠܳܐ ܕܣܰܝܡܺܝ ܗ̄ܽܘ ܡܶܕܶܐ ܕܠ݄ܐ ܟܳܗ̄ܘܶܐ ܕܡܺܝܣ݄ܡ. 29ܘܗ݄ܢّܶܝ ܡܰܠܝ̈ܶܐ ܟܽܘܠ ܚܛܺܝܬ̥ܳܐ ܘܙܳܢܝܽܘܬ̥ܳܐ ܘܡܰܪܺܝܪܽܘܬ̥ܳܐ ܘܒܺܝܫܽܘܬ̥ܳܐ ܘܝܰܥܢܽܘܬ̥ܳܐ ܘ݄ܚܣܳܡܳܐ ܘܩܰܛܠܳܐ ܘܡܰܐܡܪܳܐ ܘܬܶܢܳܝܳܐ ܘ݄ܢܟ̥ܺܝܠܽܘܬ̥ܳܐ ܘ݄ܚܫܳܒ̥̈ܶܐ ܒܺܝܫ̈ܶܐ، 30ܘܛܽܘܪܛܳܡܳܐ ܘ݄ܫܟܳܝܳܐ، ܘܠ݄ܐ ܟܪܳܚܡܺܝ ܠܰܐܠܳܗܳܐ، ܡܨܰܥܪ̈ܳܢܶܐ، ܪ̈ܳܡܳܢܶܐ، ܫܰܒܗܪ̈ܳܢܶܐ، ܘܣܰܝܳܡ̈ܶܐ ܕܒܺܝܫ̈ܳܬ̥ܳܐ، ܢܳܩ݄ܨ ܗܰܘܢܳܐ ܕܠܰܒّܰܒ̈ܳܢܰܬّ̥ܶܗ ܠ݄ܐ ܟܫܳܡܥܺܝ، 31ܘ݄ܩܝܳܡܳܐ ܠܰܝ̱ܬّܶܗ، ܘܠܳܐ ܚܽܘܒܳܐ ܘܠܳܐ ܫܰܝܢܳܐ ܘܠܳܐ ܪ̈ܰܚܡܶܐ ܟܺܝܬ ܐܰܒّܶܗ. 32ܗܰܢ݄ܟ ܥܰܡ ܕܟܳܐܕ̥ܥܺܝ ܕܽܗ̄ܘ ܕܺܝܢܳܐ ܕܰܐܠܳܗܳܐ ܡܰܘܬܳܐ ܝܳܐ ܥܰܠ ܐܰܝܢܰܐ ܕܗܰܘܟ̥ܰܐ ܟܣܰܝܡܺܝ، ܥܰܡ ܗܰܘܟ̥ܰܐ ܠܳܐ ܒܶܠܚܽܘܕ̥ܶܗ ܗ݄ܢّܶܝ ܟܣܰܝܡܺܝ (ܗ̄ܰܒّܺܝܫ̈ܳܬ̥ܳܐ) ܐܶܠܳܐ ܘܟ݄ܡܫܰܘܬܦܺܝ ܥܰܡ ܐܰܝܢܰܐ ܕ݄ܟܣܰܝܡ݄ܢّܶܗ ܗܰܢܺܝ.
Currently Selected:
ܐܶܓܰܪܬ̥ܳܐ ܠܰܪّܽܘܡܳܝ̈ܶܐ 1: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
