ܡܓܰܠܝܘܢ ܕܠܘܩܐ 24

ܗ̄ܺܝ ܩܝܰܡܬܳܐ ܡܫܰܒܰܚܬܳܐ

ܗ̄ܽܘ ܩܰܒ̥ܪܳܐ ܠܰܝܒܶܗ ܢܳܫܳܐ

ܡܬܝ 28‏:1‏‐10؛ ܡܪܩܘܣ 16‏:1‏‐8؛ ܝܘܚܢܢ 20‏:1‏‐10

1ܘܒܺܗ̄ܝ ܩܶܕܰܡܬܳܐ ܕܽܗ̄ܘ ܚܽܕ̱ܒ̥ܫܰܒܳܐ، ܗܶܫ ܥܶܬܡܳܐ، ܐܰܬ̥݄ܢ (ܗ̄ܰܢ ܢܶܫ̈ܶܐ) ܠܽܗ̄ܘ ܩܰܒ̥ܪܳܐ ܘܡܰܝܬܰܠّܶܗ ܗ̄ܰܒّܰܣܡ̈ܶܐ ܕ݄ܡܛܰܝܰܒّܶܗ، ܘܟ݄ܬ ܗ̄ܘܰܐ ܐܰܥܡܰܝّܶܗ ܢܶܫ̈ܶܐ ܚܪ̈ܶܢܶܐ. 2ܘ݄ܚܙܰܠّܶܗ ܗ̄ܺܝ ܟܶܐܦܳܐ ܡܓܰܢܕܰܪܬܳܐ ܡܽܗ̄ܘ ܩܰܒ̥ܪܳܐ. 3ܘܥܰܒܺܝܪܺܝ، ܘܠܳܐ ܚܙܰܠّܶܗ ܗ̄ܽܘ ܦܰܓ̥ܪܳܐ ܕܝܶܫܽܘܥ. 4ܘܗ݄ܢّܶܝ ܡܕܰܘܡܪ̈ܶܐ ܡܽܗ̄ܘ ܡܶܕܰܢܳܐ، ܟܰܐܠܶܗ ܬܪܶܝ ܓܰܒܪ̈ܶܐ ܩܰܝܺܝܡܺܝ ܠܰܠܥ݄ܠ، ܘܡܰܒܪܰܩ ܗ̄ܘܰܐ ܗ̄ܽܘ ܠܒܽܘܫܰܬّ̥ܶܗ. 5ܘܙܰܝܺܝܥܺܝ ܘܟ݄ܦّܶܗ ܦܳܬ̥ܰܝّܶܗ ܠܺܗ̄ܝ ܐܰܪܥܳܐ. ܘܐܡ݄ܪّܰܢّܶܗ (ܗ̄ܰܬܪܶܝ ܓܰܒܪ̈ܶܐ): ”ܡ݄ܢܝܳܐ ܕܟܳܟ݄ܪܟ̥ܺܝܬܽܘ ܥܰܠ ܗ̄ܽܘ ܚܰܝܳܐ ܒܰܝܢ ܗ̄ܰܡّܺܝ̈ܬ̥ܶܐ؟ 6ܠܰܝ̱ܬ ܝܳܐ ܗܰܪܟܶܐ، ܩܰܝ݄ܡ! ܡܰܝܬܰܝܽܘ ܠܒܳܠܰܝܟ̥ܽܘ ܡ݄ܢ ܐܡ݄ܪ ܠܶܗ ܠܟ̥ܽܘ ܗܶܫ ܗܺܝّܶܗ ܒܽܗ̄ܘ ܓܠܺܝܠܳܐ. 7ܐܡ݄ܪ ܗ̄ܘܰܝ ܠܶܗ: ܐܰܒܪܶܗ ܕܢܳܫܳܐ ܓܡܺܝܬܰܫܠ݄ܡ ܒܺܐܝܕ̥̈ܶܐ ܕܰܚّܰܛܳܝ̈ܶܐ، ܘܓ݄ܕܡ݄ܨܠܽܒ̥، ܘܠܰܬܠܳܬ̥ܳܐ ܝܰܘܡ̈ܶܐ ܓ݄ܕܩܳܝ݄ܡ.“ 8ܘܰܐܬ̥ܺܝ ܠܒܳܠܰܝّܶܗ ܗ̄ܰܡّܰܐܡܪ̈ܰܝܕ̥ܶܗ. 9ܘܕܰܥܺܝܪܺܝ ܡܽܗ̄ܘ ܩܰܒ̥ܪܳܐ ܘܐܡ݄ܪّܶܗ ܗܰܢܺܝ ܟܽܘܠّܶܗ ܠܰܚܕ̥ܰܥܣܰܪ (ܬܰܠܡܺܝܕ̥̈ܶܐ) ܘܠܰܚܪ̈ܶܢܶܐ. 10(ܘܰܗ̄ܢ ܢܶܫ̈ܰܢ݄ܟ) ܕܟ݄ܬ ܗ̄ܘܰܝܢܶܝ: ܡܰܪܝܰܡ ܡܰܓ̥ܕܠܰܝܬܳܐ ܘܝܽܘܚܰܢ ܘܡܰܪܝܰܡ ܐܶܡܶܗ ܕܝܰܥܩܽܘܒ ܘܰܚܪ̈ܶܢܶܐ ܕܰܐܥܡܰܝّܶܗ، ܗܰܢܺܝ ܢܶܝ ܕܐܡ݄ܪّܶܗ ܠܰܫܠܺܝܚ̈ܶܐ. 11ܘ݄ܚܙ݄ܢ ܒܥܰܝܢ̈ܳܬ̥ܰܝّܶܗ ܗ̄ܰܡّܰܐܡܪ̈ܰܢܺܝ ܐܟ̥ ܕܡܰܐܡܪ̈ܶܐ ܕܠ݄ܐ ܟܥ݄ܒܪܺܝ ܒܗܰܘܢܳܐ، ܘܠܳܐ ܡܰܫܪ݄ܢّܶܗ. 12ܐܶ‌ܠܳܐ ܫܶܡܥܽܘܢ ܩܰܝ݄ܡ ܘܪܰܗ݄ܛ ܠܽܗ̄ܘ ܩܰܒ̥ܪܳܐ، ܘܡܰܕ݄ܩ ܠܶܗ ܚܙܶܐ ܠܶܗ ܗ̄ܰܟّܶܬܳܢ̈ܶܐ ܡܰܚ̈ܬܶܐ ܠܚܽܘܕ̥ܰܝّܶܗ، ܘܕܰܥ݄ܪ ܡܕܰܘܡܪܳܐ ܡܽܗ̄ܘ ܡܶܕܶܐ ܕܗܰܘܺܝ.

ܒܽܗ̄ܘ ܕܰܪܒܳܐ ܕܥܶܡܰܐܘܽܣ

13ܘܒܽܗ̄ܘ ܝܰܘܡܰܘܳܐ، ܟܰܐܠܶܗ ܬܪܶܝ ܡܰܢ̱ ܬّܰܠܡܺܝܕ̥̈ܶܐ ܐܰܙ̈ܳܠܶܐ ܗ̄ܘܰܝܢܶܝ ܠܺܗ̄ܝ ܩܪܺܝܬ̥ܳܐ ܕ݄ܐܫܡܰܗ ܥܶܡܰܐܘܽܣ، ܘܪܰܚܽܘܩܳܐ ܡܶܢ̱ ܐܽܘܪܶܫܠܶܡ ܫܰܒ̥ܥܳܐ ܡܺܝ̈ܠܶܐ، 14ܘܡ݄ܫܓ̥ܳܠܺܝ ܗ̄ܘܰܘ̱ ܚܰܕ̱ ܥܰܡ ܚܰܕ̱ ܥܰܠ ܟܽܘܠّܶܗ ܗܰܢܺܝ ܕܗܰܘ݄ܢ. 15ܘܗ݄ܢّܶܝ ܟܡ݄ܫܓ̥ܳܠܺܝ ܘܟܳܗ̄ܒ݄ܢ ܘܫ݄ܩܠܺܝ ܥܰܡ ܚܕ̥ܳܕ̥̈ܶܐ، ܗܺܝّܶܗ ܝܶܫܽܘܥ ܐܰܬ̥ܺܝ ܘܡܰܛܺܝ ܐܰ‌ܠّܶܗ ܘ݄ܡܗܰܠܰܟ̥ ܗ̄ܘܰܐ ܐܰܥܡܰܝّܶܗ. 16ܘܥܰܝܢ̈ܳܬ̥ܰܝّܶܗ ܣܟ̥ܺܝܪ̈ܶܐ ܗ̄ܘܰܝܢܶܝ ܕܠ݄ܐ ܐܕ̥ܥܺܝ ܠܶܗ. 17ܘܐܡ݄ܪ ܠܰܗ ܠّܶܗ: ”ܡ݄ܢ ܢܶܝ ܗ̄ܰܡّܰܐܡܪ̈ܰܢܺܝ ܕܟܳܡ݄ܫܓ̥ܳܠܺܝܬܽܘ ܚܰܕ̱ ܥܰܡ ܚܰܕ̱، ܘܗܰܬܽܘ ܟ݄ܡܗܰܠܟ̥ܺܝܬܽܘ ܟܡܺܝܪ̈ܳܝܶܐ.“ 18ܘܡܰܕܥܰܪ ܠܶܗ ܚܰܕ̱ ܡ݄ܢّܶܗ ܕ݄ܐܫܡܶܗ ܩܠܶܝܳܘܦܳܐ ܘܐܡ݄ܪ ܠܶܗ ܠܶܗ: ”ܩܰܝ ܗܰܬ ܒܶܠܚܽܘܕ̥ܳܟ̥ ܗܰܬ ܢܽܘܟ̥ܪܳܝܳܐ ܒܽܐܘܪܶܫܠܶܡ ܕܠ݄ܐ ܟ݄ܐܕ̥ܥܰܬ ܗ̄ܽܘ ܡܶܕܶܐ ܕܗܰܘܺܝ ܒܰܝّܰܘܡ̈ܳܬ̥ܰܢ݄ܟ؟“ 19ܟܳܐܡܰܪّܶܗ: ”ܡ݄ܢܝܳܐ؟“ ܟ݄ܐܡّܺܪ̱ܝ ܠܶܗ ܥܰܠ ܝܶܫܽܘܥ ܗܰܘܳܐ ܕܡܶܢ̱ ܢܳܨܪܰܬ̥، ܓܰܒ̥ܪܳܐ ܕܟ݄ܬ ܗ̄ܘܰܐ ܢܒܺܝܳܐ، ܘܡܳܪܳܐ ܕܚܰܝܠܳܐ ܒܽܗ̄ܘ ܡܰܐܡܪܳܐ ܘܒܽܗ̄ܘ ܥܰܡܠܳܐ ܩ݄ܕ̱ܡ ܐܰ‌ܠܳܗܳܐ ܘܩ݄ܕ̱ܡ ܟܽܘܠܶܗ ܗ̄ܽܘ ܥܰܡܳܐ. 20ܐܶ‌ܠܳܐ ܗ̄ܰܪّܰܒ̈ܶܐ ܕܰܟّܳܗ̈ܢܶܐ ܘܰܩّܰܫ̈ܶܐ ܡܰܫܠܰܡّܶܗ ܠܽܗ̄ܘ ܕܺܝܢܳܐ ܕܽܗ̄ܘ ܡܰܘܬܳܐ، ܘ݄ܨܠܽܒّ̥ܶܗ. 21ܘܰܐܚܢܰܐ ܟ݄ܬ ܗ̄ܘܰܝ ܠܰܢ ܣܰܒܪܳܐ ܕܗܺܝّܶܗ ܝܳܐ ܕܓ݄ܕܦܳܪ݄ܩ ܐܺܝܣܪܳܐܶܝܠ. ܘܗܰܢܺܝ ܬܠܳܬ̥ܳܐ ܝܰܘܡ̈ܶܐ ܡܺܗ̄ܝ ܢܰܩܠܐ ܕܗܰܢܺܝ ܟܽܘܠّܶܗ ܗܰܘ݄ܢ. 22ܐܶ‌ܠܳܐ ܗ݄ܢ ܡܰܗ̄ܢ ܢܶܫ̈ܶܐ ܕܡܶܢܰܢ ܡܕܰܘܡܰܪّܰܗ ܠܰܢ؛ ܐܰܙّ݄ܢ ܒܩܶܕܰܡܬܳܐ ܠܽܗ̄ܘ ܩܰܒ̥ܪܳܐ، 23ܘܺܗ̄ܝ ܢܰܩܠܐ ܕܠܳܐ ܚܙܰܠّܶܗ ܗ̄ܽܘ ܦܰܓ̥ܪܰܝܕ̥ܶܗ، ܐܰܬ̥݄ܢ ܐܡ݄ܪّܰܗ ܠܰܢ ܕܡܰܠܰܐܟ̥̈ܶܐ ܚܙܶܐ ܠܰܢ ܬܰܡܳܐ، ܘܟ݄ܐܡّܺܪ̱ܝ ܐܰܥܠܶܗ ܕܟ݄ܬ ܝܳܐ ܚܰܝܳܐ. 24ܘܢܳܫ̈ܶܐ ܡܶܢܰܢ ܣܬܶܝ ܐܰܙّ݄ܢ ܠܽܗ̄ܘ ܩܰܒ̥ܪܳܐ، ܘ݄ܚܙܰܠّܶܗ ܗܰܘܟ̥ܰܐ ܐܟ̥ ܕܽܗ̄ܘ ܡܶܕܶܐ ܕܐܡ݄ܪّܶܗ ܗ̄ܰܢ ܢܶܫ̈ܶܐ. ܐܶ‌ܠܳܐ ܐܶ‌ܠܶܗ (ܠܝܶܫܽܘܥ) ܠܳܐ ܚܙܰܠّܰܗ. 25ܗ̄ܺܝ ܢܰܩܠܝܳܐ، ܝܶܫܽܘܥ ܐܡ݄ܪ ܠܰܗ ܠّܶܗ: ”ܝܰܐ ܢܳܩ݄ܨ ܗܰܘܢܳܐ ܘܠܶܒܳܐ ܝܰܩܽܘܪܳܐ ܗܰܬܽܘ ܒܺܗ̄ܝ ܗܰܝܡܳܢܽܘܬ̥ܳܐ ܒܟܽܘܠّܶܗ ܗܰܢܺܝ ܕܐܡ݄ܪّܶܗ ܗ̄ܰܢܒܺܝ̈ܶܐ. 26ܠܳܐ ܗܰܢܺܝ (ܗ̄ܰܚّܰܫ̈ܶܐ) ܐܳܒܰܥ ܗ̄ܘܰܐ ܕܛܳܥܰܢّܶܗ ܡܫܺܝܚܳܐ، ܘ݄ܓܥܳܒ݄ܪ ܠܽܗ̄ܘ ܫܽܘܒܚܰܝܕ̥ܶܗ؟“ 27ܘ݄ܡܫܰܪܶܐ ܠܶܗ ܡܶܢ̱ ܡܽܘܫܶܐ ܘܡܶܢ̱ ܟܽܘܠّܶܗ ܗ̄ܰܢܒܺܝ̈ܶܐ ܘܡܰܚܘܶܐ (ܘ݄ܡܦܰܫ݄ܩ) ܗ̄ܘܰܐ ܠّܶܗ ܥܰܠ ܢܰܦܫܶܗ ܡܶܢ̱ ܟܽܘܠّܶܗ ܗ̄ܰܟܬ̥ܳܒ̥̈ܶܐ.

28ܘ݄ܡܩܰܪܰܒّ̥ܶܗ ܡܺܗ̄ܝ ܩܪܺܝܬ̥ܰܝܳܐ ܕ݄ܐܙّ݄ܢ ܗ̄ܘܰܝ ܠܰܗ. ܘܗܺܝّܶܗ ܡܰܚܘܶܐ ܗ̄ܘܰܐ ܪܽܘܚܶܗ ܕܟܳܐܒ݄ܥ ܐ݄ܙّܶܗ ܠܕܽܘܟܬ̥ܳܐ ܪܰܚܽܘܩܬܳܐ. 29ܘܗ݄ܢّܶܝ ܚ݄ܨّܶܗ ܐܰܥܠܶܗ ܘܐܡ݄ܪّܰܗ ܠܶܗ: ”ܦܘܿܫ ܓܰܒܰܢ، ܥܰܠ ܕܽܗ̄ܘ ܝܰܘܡܳܐ ܐܳܥܕܳܐ ܟ݄ܦ ܠܶܗ ܘܢܰܚ݄ܬ ܠܽܗ̄ܘ ܚܶܫܟ̥ܳܐ.“ ܘܥܰܒ݄ܪ ܕܒܳܝ݄ܬ (ܦܳܝ݄ܫ) ܓܰܒܰܝّܶܗ. 30ܘܺܗ̄ܝ ܢܰܩܠܐ ܕܝܰܬܽܒ̥ ܐܰܥܡܰܝّܶܗ ܥܰܠ ܗ̄ܽܘ ܡܽܐܘܟܠܳܐ، ܡ݄ܕ ܠܶܗ ܠܰܚܡܳܐ ܘ݄ܡܒܰܪܰܟ̥ ܠܶܗ ܘ݄ܩܨܶܐ ܠܶܗ ܘܗܽܒ̥ ܠܰܗ ܠّܶܗ. 31ܘܡܶܚܕ̥ܳܐ ܦܬܺܝܚܺܝ ܥܰܝܢ̈ܳܬ̥ܰܝّܶܗ، ܘܰܐܕ̥ܺܝܥܺܝ ܠܶܗ، ܘܗܺܝّܶܗ ܥܰܠܺܝ ܡ݄ܢّܶܗ. 32ܘ݄ܐܡّܺܪ̱ܝ ܗ̄ܘܰܘ̱ ܚܰܕ̱ ܠܚܰܕ̱: ”ܠܰܝ̱ܬ ܗ̄ܘܰܐ ܠܶܒܰܢ ܝܰܩܺܝܪܳܐ ܒܓܰܘܰܢ ܗ̄ܺܝ ܢܰܩܠܐ ܕ݄ܫܓ̥ܺܝܠ ܐܰܥܡܰܢ ܒܽܗ̄ܘ ܕܰܪܒܳܐ ܘ݄ܡܦܰܫܰܩ ܠܰܢ ܗ̄ܰܟܬ̥ܳܒ̥̈ܶܐ؟“ 33ܘܩܰܝܺܝܡܺܝ ܒܺܗ̄ܝ ܫܳܥܬ̥ܰܝܕ̥ܰܗ، ܘܕܰܥܺܝܪܺܝ ܠܽܐܘܪܶܫܠܶܡ، ܘ݄ܚܙܰܠّܶܗ ܠܰܚܕ̥ܰܥܣܰܪ (ܫܠܺܝܚ̈ܶܐ) ܕܠܰܬܺܝܡܺܝ ܘܠܰܗ̄ܢܺܝ ܕܰܐܥܡܰܝّܶܗ، 34ܘܗ݄ܢّܶܝ ܟ݄ܐܡّܺܪ̱ܝ: ”ܒ݄ܫܪܳܪܳܐ ܩܰܝ݄ܡ ܡܳܪܰܢ ܘ݄ܚܙܶܐ ܠܫܶܡܥܽܘܢ.“ 35ܘܗ݄ܢّܶܝ (ܗ̄ܰܬܪ̈ܰܢܺܝ) ܣܬܶܝ ܐܡ݄ܪّܰܢّܶܗ ܗ̄ܽܘ ܡܶܕܶܐ ܕܗܰܘܺܝ ܐܰܥܡܰܝّܶܗ ܒܽܗ̄ܘ ܕܰܪܒܳܐ، ܘܰܐܝܕܰܪܒܳܐ ܐܰܕ̥ܺܝܥܺܝ ܠܶܗ ܗ̄ܺܝ ܢܰܩܠܐ ܕ݄ܩܨܶܐ ܠܶܗ ܗ̄ܽܘ ܠܰܚܡܳܐ.

ܝܶܫܽܘܥ ܟܡ݄ܚܙܶܐ ܠܰܫܠܺܝܚܰܝܕ̈ܶܗ

ܡܬܝ 28‏:16‏‐20؛ ܡܪܩܘܣ 16‏:14‏‐18؛ ܝܘܚܢܢ 20‏:19‏‐23؛ ܥܒܳܕ̥̈ܶܐ 1‏:6‏‐8

36ܘܗ݄ܢّܶܝ ܡ݄ܫܓ̥ܳܠܺܝ ܗ̄ܘܰܘ̱ ܒܰܗ̄ܢܺܝ، ܝܶܫܽܘܥ ܩܰܝ݄ܡ ܒܰܝܢܳܬ̥ܰܝّܶܗ ܘܐܡ݄ܪ ܠܰܗ ܠّܶܗ: ”ܫܠܳܡܳܐ ܐܰܥܡܰܝܟ̥ܽܘ، ܐܳܢܳܐ ܐ̱ܢܳܐ ܠܳܐ ܙܰܝܥܺܝܬܽܘ.“ 37ܘܗ݄ܢّܶܝ ܫܓ̥ܺܝܫܺܝ ܘܙܰܝܺܝܥܺܝ، ܥܰܠ ܕܚܳܫܒ̥ܺܝ ܗ̄ܘܰܘ̱ ܕܪܽܘܚܳܐ ܟܚܳܙ݄ܢ. 38ܘܝܶܫܽܘܥ ܐܡ݄ܪ ܠܰܗ ܠّܶܗ: ”ܡ݄ܢܝܳܐ ܕܟܳܙܰܝܥܺܝܬܽܘ؟ ܘܡ݄ܢ ܟܳܐܬ̥ܶܐ ܥܰܠ ܒܳܠܰܝܟ̥ܽܘ؟ 39ܚܙܰܝܽܘ ܐܺܝܕ̥̈ܳܬ̥ܺܝ ܘܪ̈ܰܓ̥ܠܺܝ ܕܳܐܢܳܐ ܐ̱ܢܳܐ. ܓܽܘܫܽܘ ܐܶܒܺܝ ܘܺܝܕ̥ܰܥܽܘ ܕܺܗ̄ܝ ܪܽܘܚܳܐ ܠܰܝ̱ܬ ܠܰܗ ܒܰܣܪܳܐ ܘܓܰܪ̈ܡܶܐ ܐܟ̥ ܕܽܗ̄ܘ ܡܶܕܶܐ ܕܟܳܚܳܙܺܝܬܽܘ ܕܟ݄ܬ ܠܺܝ.“ 40ܘܺܗ̄ܝ ܢܰܩܠܐ ܕܐܡ݄ܪ ܠܶܗ ܗܰܢܺܝ، ܡܰܚܘܶܐ ܠܰܗ ܠّܶܗ ܐܺܝܕ̥̈ܳܬ̥ܶܗ ܘܪ̈ܰܓ̥ܠܳܬ̥ܶܗ. 41ܘܺܗ̄ܝ ܢܰܩܠܐ ܕܗ݄ܠ ܐܳܥܕܳܐ ܠܳܐ ܡܰܫܪܺܝ ܗ̄ܘܰܘ̱ ܡܺܗ̄ܝ ܦܨܺܝܚܽܘܬ̥ܳܐ، ܘ݄ܡܕܰܘܡܪ̈ܶܐ ܗ̄ܘܰܝܢܶܝ، ܐܡ݄ܪ ܠܰܗ ܠّܶܗ: ”ܟ݄ܬܟ̥ܽܘ ܗܰܪܟܶܐ ܡܶܕܶܐ ܠܽܗ̄ܘ ܡܽܐܘܟܠܳܐ؟“ 42ܘܗܽܒّ̥ܰܗ ܠܶܗ ܦܰܠܩܳܐ ܕܢܽܘܢܳܐ ܡܛܰܘܝܳܐ ܘܕܰܒ̥ܫܳܐ ܣܳܗܕܳܐ 43ܘܡ݄ܕ ܠܶܗ ܘܰܐܟ̥ܺܝܠ ܠܶܗ ܩ݄ܕ̱ܡ ܥܰܝܢ̈ܳܬ̥ܰܝّܶܗ. 44ܘܐܡ݄ܪ ܠܰܗ ܠّܶܗ: ”ܗܰܢܺܝ ܢܶܝ ܗ̄ܰܡّܶܠ̈ܶܐ ܕ݄ܫܓ̥݄ܠ ܐ̱ܢܳܐ ܐܰܥܡܰܝܟ̥ܽܘ، ܗ̄ܺܝ ܢܰܩܠܐ ܕܟ݄ܬ ܗ̄ܘܰܝ ܐ̱ܢܳܐ ܓܰܒܰܝܟ̥ܽܘ، ܕܠܳܙ݄ܡ ܟܳܡ݄ܠ ܟܽܘܠ ܡܶܕܶܐ ܕ݄ܟܬ̥ܺܝܒ̥ ܐܰܥܠܺܝ ܒܽܗ̄ܘ ܢܳܡܽܘܣܳܐ ܕܡܽܘܫܶܐ ܘܒܰܗ̄ܢ ܢܒܺܝ̈ܶܐ ܘܒܰܡّܰܙܡܽܘܪ̈ܶܐ.“ 45ܗ̄ܺܝ ܢܰܩܠܝܳܐ، ܦܬ݄ܚ ܠܶܗ ܗܰܘܢܰܝّܶܗ ܕܝܳܠܦܺܝ ܘ݄ܐܕ̥ܥܺܝ ܗ̄ܰܟܬ̥ܳܒ̥̈ܶܐ، 46ܘܐܡ݄ܪ ܠܰܗ ܠّܶܗ: ”ܗܰܘܟ̥ܰܐ ܟܬ̥ܺܝܒ̥، ܘܗܰܘܟ̥ܰܐ ܠܳܙܰܡ ܗ̄ܘܰܐ ܕ݄ܡܫܺܝܚܳܐ ܛܳܥ݄ܢ ܚܰܫܳܐ، ܘ݄ܕܩܳܝ݄ܡ ܡܒܰܝܢ ܗ̄ܰܡّܺܝ̈ܬ̥ܶܐ ܠܰܬܠܳܬ̥ܳܐ ܝܰܘܡ̈ܶܐ، 47ܘ݄ܕܡ݄ܟܪܳܙܳܐ ܒ݄ܐܫܡܶܗ ܗ̄ܺܝ ܬܝܳܒܽܘܬ̥ܳܐ ܠܫܽܘܒܩܳܢܳܐ ܕܰܚܛܳܗ̈ܶܐ ܒܰܝܢ ܗ̄ܰܥّܰܡ̈ܶܐ ܟܽܘܠّܶܗ؛ ܘܒܽܗ̄ܘ ܪܺܝܫܳܐ ܓܕܳܗ̄ܘܶܐ ܡܶܢ̱ ܐܽܘܪܶܫܠܶܡ. 48ܘܗܰܬܽܘ ܗ̄ܬܽܘ ܣܳܗܕ̈ܶܐ ܕܰܗ̄ܢܺܝ. 49ܘܳܐܢܳܐ ܓ݄ܡܫܰܕܰܪ ܐ̱ܢܳܐ ܠܟ̥ܽܘ ܗ̄ܽܘ ܘܰܥܕܳܐ ܕܽܗ̄ܘ ܐܰܒܰܝܕ̥ܺܝ. ܘܗܰܬܽܘ ܦܽܘܫܽܘ ܒܺܗ̄ܝ ܡܕ̥ܺܝܢ̱ܬܳܐ ܕܽܐܘܪܶܫܠܶܡ ܗܳܠ ܕܠܳܒ̥ܫܺܝܬܽܘ ܚܰܝܠܳܐ ܡܽܗ̄ܘ ܪܰܘܡܳܐ ܥܶܠܳܝܳܐ.“

ܗ̄ܽܘ ܣܽܘܠܳܩܳܐ ܕܡܳܪܰܢ ܠܺܗ̄ܝ ܫܡܰܝܳܐ

ܡܪܩܘܣ 16‏:19‏‐20؛ ܥܒܳܕ̥̈ܶܐ 1‏:9‏‐11

50ܘܡܰܘܦܩܺܝ ܠܶܗ ܗܳܠ ܠܒܶܝܬ̥ ܥܰܢܝܳܐ، ܘܡܰܥܠܶܐ ܠܶܗ ܐܺܝܕ̥̈ܳܬ̥ܶܗ ܘ݄ܡܒܰܪܟ̥ܺܝ ܠܶܗ. 51ܘܗܰܘܺܝ، ܘܗܺܝّܶܗ ܟ݄ܡܒܰܪܰܟّ̥ܶܗ، ܦܪܺܝܫ ܡ݄ܢّܶܗ ܘܣܰܠ݄ܩ ܠܺܗ̄ܝ ܫܡܰܝܳܐ. 52ܘܗ݄ܢّܶܝ ܣܓ̥݄ܕّܰܗ ܠܶܗ، ܘܕܰܥܺܝܪܺܝ ܠܽܐܘܪܶܫܠܶܡ ܒ݄ܦܨܺܝܚܽܘܬ̥ܳܐ ܪܰܒܬ̥ܳܐ. 53ܘ݄ܒܟܽܘܠ ܙܰܒܢܳܐ ܗܳܘ݄ܢ ܗ̄ܘܰܘ̱ ܒܽܗ̄ܘ ܗܰܝܟܠܳܐ ܘ݄ܡܫܰܒܚܺܝ ܗ̄ܘܰܘ̱ ܘ݄ܡܒܰܪܟ̥ܺܝ ܗ̄ܘܰܘ̱ ܠܰܐ‌ܠܳܗܳܐ. ܐܰܡܺܝܢ.

Currently Selected:

ܡܓܰܠܝܘܢ ܕܠܘܩܐ 24: ܟܬܒܐ

Highlight

Copy