ܡܓܰܠܝܘܢ ܕܠܘܩܐ 18

ܗ̄ܽܘ ܡܰܬ̥ܠܳܐ ܕܽܗ̄ܘ ܕܰܝܳܢܳܐ ܕܺܗ̄ܝ ܚܛܺܝܬ̥ܳܐ

1ܘܐܡ݄ܪ ܠܰܗ ܠّܶܗ ܣܬܶܝ ܡܰܬ̥ܠܳܐ ܕ݄ܒܟܽܘܠ ܙܰܒܢܳܐ ܕ݄ܡܨܰܠ݄ܢ ܘܠܳܐ ܪܳܦ݄ܢ: 2”ܟ݄ܬ ܗ̄ܘܰܐ ܚܰܕ̱ ܕܰܝܳܢܳܐ ܒ݄ܚܕ̥ܳܐ ܡܕ̥ܺܝܢ̱ܬܳܐ ܕܠܳܐ ܙܳܝܰܥ ܗ̄ܘܰܐ ܡܰܢ̱ ܐ‌ܠܳܗܳܐ ܘܠܳܐ ܡܺܝܢܰܟܰܦ ܗ̄ܘܰܐ ܡܰܗ̄ܢ ܢܳܫ̈ܶܐ. 3ܘܟ݄ܬ ܗ̄ܘܰܐ ܚܕ̥ܳܐ ܐܰܪܡܰܠܬܳܐ ܒܺܗ̄ܝ ܡܕ̥ܺܝܢ̱ܬܰܝܳܐ، ܘܳܐܬ̥ܝܳܐ ܗ̄ܘܰܐ ܠܣܺܝܕ̥ܶܗ ܘ݄ܐܡّܳܪ̱ܐ ܗ̄ܘܰܐ: ’ܣ݄ܡ ܠܺܝ ܕܺܝܢܳܐ ܟܺܐܢܳܐ ܥܰܠ ܗ̄ܽܘ ܡܰܫܟܝܳܢܰܝܕ̥ܺܝ.‘ 4ܘ݄ܠܙܰܒܢܳܐ ܝܰܪܺܝܟ̥ܳܐ ܠܳܐ ܐܒܰܥ ܗ̄ܘܰܐ، ܘܒ݄ܬ̥݄ܪ ܐܡ݄ܪ ܠܶܗ ܒܢܰܦܫܶܗ: ’ܐܶܢ ܡܰܢ̱ ܐ‌ܠܳܗܳܐ ܠ݄ܐ ܟܙܳܝܰܥ ܐ̱ܢܳܐ ܘܡܰܗ̄ܢ ܢܳܫ̈ܶܐ ܠ݄ܐ ܟܡܺܝܢܰܟܰܦ ܐ̱ܢܳܐ، 5ܐܶ‌ܠܳܐ ܥܰܠ ܕܡܰܥ݄ܦ ܠܰܗ ܠܺܝ ܗ̄ܺܝ ܐܰܪܡܰܠܬܰܬ̥ܶܐ ܓ݄ܕܣܳܝܰܡ ܐ̱ܢܳܐ ܠܰܗ ܕܺܝܢܳܐ ܟܺܐܢܳܐ، ܕܠܳܐ ܟܽܘܠ ܢܰܩܠܐ ܐ݄ܬ̥ܝܳܐ ܡܰܟܺܝܒ̥ܳܐ ܪܺܝܫܺܝ.‘“ 6ܘܡܳܪܰܢ ܐܡ݄ܪ ܠܶܗ: ”ܫܡܰܥܽܘ ܡ݄ܢ ܐܡ݄ܪ ܠܶܗ ܗ̄ܽܘ ܕܰܝܳܢܳܐ ܗ̄ܽܘ ܚܰܛܳܝܳܐ، 7ܘܰܐ‌ܠܳܗܳܐ ܠܳܐ ܒܽܗ̄ܘ ܙܳܝܽܘܕܳܐ ܓܣܳܝ݄ܡ ܕܺܝܢܳܐ ܟܺܐܢܳܐ ܠܰܗ̄ܢ݄ܟ ܕ݄ܓܒܶܐ ܠܶܗ؟ ܗܰܢ݄ܟ ܕܩܳܪ݄ܢ ܠܶܗ ܒܺܐܝܡܳܡܳܐ ܘܠܰܠܝܳܐ، ܘ݄ܟܡܰܘܪ݄ܟ̥ ܒܳܠܶܗ ܐܰܥܠܰܝّܶܗ؟ 8ܟܳܐܡܰܪ ܐ̱ܢܳܐ ܠܟ̥ܽܘ: ܡܰܠܺܝܙܳܐ ܓܣܳܝܰܡّܶܗ ܕܺܝܢܳܐ ܟܺܐܢܳܐ. ܐܶ‌ܠܳܐ ܓܕܳܐܬ̥ܶܐ ܐܰܒܪܶܗ ܕܢܳܫܳܐ ܘܩܰܝ ܓܚܳܙܶܐ ܗܰܝܡܳܢܽܘܬ̥ܳܐ ܥܰܠ ܗ̄ܺܝ ܐܰܪܥܳܐ؟“

ܡܳܟ̥ܣܳܐ ܘ݄ܦܪܺܝܫܳܐ

9ܘܐܡ݄ܪ ܠܶܗ ܗ̄ܽܘ ܡܰܬ̥ܠܰܢܳܐ ܡܩܰܒ݄ܠ ܕܢܳܫ̈ܶܐ ܕܟ݄ܬܢܶܝ ܬܟ̥ܺܝܠܳܝ̈ܶܐ ܥܰܠ ܪ̈ܽܘܚܰܝّܶܗ ܘ݄ܟܚ݄ܫܒ̥ܺܝ ܪ̈ܽܘܚܰܝّܶܗ ܙܰܕ̈ܺܝܩܶܐ، ܘܟ݄ܡܚܰܩܪܺܝ ܟܽܘܠ ܢܳܫܳܐ: 10”ܬܪܶܝ ܓܰܒܪ̈ܶܐ ܣܰܠܺܝܩܺܝ ܠܽܗ̄ܘ ܗܰܝܟܠܳܐ ܕ݄ܡܨܰܠ݄ܢ، ܚܰܕ̱ ܦܪܺܝܫܳܐ ܘ݄ܚܪܶܢܳܐ ܡܳܟ̥ܣܳܐ. 11ܘܽܗ̄ܘ ܦܪܺܝܫܳܐ ܩܳܝܰܡ ܗ̄ܘܰܐ ܒܰܝܢ ܐܶ‌ܠܶܗ ܠܢܰܦܫܶܗ ܘܗܰܢܺܝ ܡܨܰܠܶܐ ܗ̄ܘܰܐ: ’ܝܰܐ ܐܰ‌ܠܳܗܳܐ، ܟܡܰܘܕܶܐ ܐ̱ܢܳܐ ܠܳܟ̥ ܕܠܰܐ ܗ̄ܘܺܝ ܐ̱ܢܳܐ ܐܟ̥ ܕܰܗ̄ܢ ܢܳܫ̈ܶܐ ܚܪ̈ܶܢܶܐ ܕܟ݄ܬܢܶܝ ܓܰܢܳܒ̥̈ܶܐ ܘܝܰܥ̈ܢܶܐ ܘܓܰܝܳܪ̈ܶܐ، ܘܠܳܐ ܐܟ̥ ܕܽܗ̄ܘ ܡܳܟ̥ܣܰܢܳܐ. 12ܐܶܠܳܐ ܟܨܳܝܰܡ ܐ̱ܢܳܐ ܬܰܪܬܶܝ ܟܳܪ̈ܶܐ ܒܺܗ̄ܝ ܫܰܒܬ̥ܳܐ، ܘܟܳܗ̄ܒܶܐ ܐ̱ܢܳܐ ܥܽܘܣܪܳܐ (ܚܰܕ̱ ܡܶܢ̱ ܥܰܣܪܳܐ) ܡܶܢ̱ ܟܽܘܠ ܡܶܕܶܐ ܕܟܳܐܬ̥ܶܐ ܠܺܝ.‘ 13ܐܶ‌ܠܳܐ ܗ̄ܽܘ ܡܳܟ̥ܣܰܘܳܐ ܩܳܝܰܡ ܗ̄ܘܰܐ ܡܶܢ̱ ܪܽܘܚܩܳܐ، ܘܠܳܐ ܐܒܰܥ ܗ̄ܘܰܐ ܘܠܳܐ ܥܰܝܢ̈ܳܬ̥ܶܗ ܕܡܰܥܠܶܐ ܠܺܗ̄ܝ ܫܡܰܝܳܐ، ܘܡܳܚܶܐ ܗ̄ܘܰܐ ܥܰܠ ܨܰܕܪܶܗ ܘܳܐܡ݄ܪ ܗ̄ܘܰܐ: ’ܐܰ‌ܠܳܗܳܐ، ܡܰܪܚ݄ܡ ܐܰܥܠܺܝ، ܚܰܛܳܝܳܐ ܐ̱ܢܳܐ.‘ 14ܟܳܐܡܰܪ ܐ̱ܢܳܐ ܠܟ̥ܽܘ: ܗܰܢܳܐ ܢܰܚ݄ܬ ܠܽܗ̄ܘ ܒܰܝܬܰܝܕ̥ܶܗ ܡܙܰܕܩܳܐ (ܙܰܕܺܝܩܳܐ) ܙ݄ܕ ܡܽܗ̄ܘ ܦܪܺܝܫܰܘܳܐ. ܡܺܐܝܕ̥ܶܗ ܕܟܽܘܠ ܢܳܫܳܐ ܕܡܰܥܠܶܐ ܪܽܘܚܶܗ ܓܡܺܝܬܰܢܚ݄ܬ، ܘܟܽܘܠ ܕܡܰܢܚ݄ܬ ܪܽܘܚܶܗ ܓܡܺܝܬܰܥܠܶܐ.“

ܝܶܫܽܘܥ ܟ݄ܡܒܰܪ݄ܟ̥ ܠܰܛܠܳܝ̈ܶܐ

ܡܬܝ 19‏:13‏‐15؛ ܡܪܩܘܣ 10‏:13‏‐16

15ܘ݄ܡܩܰܪܰܒّ̥ܰܗ ܠܶܗ ܝܰܠܽܘܕ̥̈ܶܐ ܣܬܶܝ ܕܡܰܚ݄ܬ ܐܺܝܕ̥ܳܐ ܐܰܥܠܰܝّܶܗ. ܘ݄ܚܙܰܢّܶܗ ܗ̄ܰܬّܰܠܡܺܝܕ̥̈ܶܐ ܘ݄ܡܥܰܝܰܛّܶܗ ܐܰܥܠܰܝّܶܗ. 16ܐܶ‌ܠܳܐ ܝܶܫܽܘܥ ܩܪܶܐ ܠܰܗ ܠّܶܗ ܘܐܡ݄ܪ ܠܰܗ ܠّܶܗ: ”ܛܪܰܝܽܘ ܗ̄ܰܛܠܳܝ̈ܶܐ ܕܳܐܬ̥݄ܢ ܠܣܺܝܕ̥ܺܝ، ܘܠܳܐ ܡܰܟܠܺܝܬܽܘܢّܶܗ، ܥܰܠ ܕܠܰܐܝܢܰܐ ܕܟ݄ܬܢܶܝ ܐܟ̥ ܕܰܗ̄ܢܺܝ، ܕ݄ܬّ̥ܶܗ ܝܳܐ ܗ̄ܺܝ ܡܰܠܟܽܘܬ̥ܳܐ ܕܺܗ̄ܝ ܫܡܰܝܳܐ. 17ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܡܰܢ ܕܠ݄ܐ ܟܡܰܩܒ݄ܠ ܗ̄ܺܝ ܡܰܠܟܽܘܬ̥ܳܐ ܕܰܐ‌ܠܳܗܳܐ ܐܟ̥ ܕܛܰܠܝܳܐ، ܠ݄ܐ ܓܥܳܒܰܪ ܠܰܗ.“

ܝܶܫܽܘܥ ܘܽܗ̄ܘ ܥܽܘܬ̥ܪܳܐ

ܡܬܝ 19‏:16‏‐30؛ ܡܪܩܘܣ 10‏:17‏‐31

18ܘܚܰܕ̱ ܡܰܢ̱ ܪّܺܝܫܳܢ̈ܶܐ ܡܫܰܐܶܠ ܠܶܗ ܘܐܡ݄ܪ ܠܶܗ ܠܶܗ: ”ܡܰܠܦܳܢܳܐ ܛܳܒ̥ܳܐ، ܡ݄ܢ ܣܳܝܰܡ ܐ̱ܢܳܐ ܕܝܳܪܰܬ̥ ܐ̱ܢܳܐ ܗ̄ܰܚّܰܝ̈ܶܐ ܕ݄ܠܥܳܠܰܡ؟“ 19ܝܶܫܽܘܥ ܐܡ݄ܪ ܠܶܗ ܠܶܗ: ”ܡ݄ܢܝܳܐ ܕܟܳܩܳܪܰܬ ܠܺܝ ܛܳܒ̥ܳܐ؟ ܠܰܝܬ ܛܳܒ̥ܳܐ ܐܶ‌ܠܳܐ ܐܶܢ ܚܰܕ̱، ܐܰ‌ܠܳܗܳܐ. 20ܟ݄ܐܕ̥ܥܰܬ ܗ̄ܰܦّܽܘܩܕ̈ܳܢܶܐ: ܠܳܐ ܩ݄ܛܠܰܬ ܘܠܳܐ ܓܰܝܪܰܬ ܘܠܳܐ ܓ݄ܢܒ̥ܰܬ ܘܠܳܐ ܣ݄ܗܕܰܬ ܒܰܕّܽܘܓ̈ܠܶܐ، ܡܝܰܩ݄ܪ ܠܒܰܒܳܟ̥ ܘܠܶܐܡܳܟ̥.“ 21ܐܡ݄ܪ ܠܶܗ ܠܶܗ: ”ܗܰܢܺܝ ܟܽܘܠّܶܗ ܢܛܺܝܪܺܝ ܠܺܝ ܡܶܢ̱ ܢܰܥܡܽܘܬ̥ܺܝ.“ 22ܘܺܗ̄ܝ ܢܰܩܠܐ ܕܗܰܢܺܝ ܫܰܡ݄ܥ ܝܶܫܽܘܥ ܐܡ݄ܪ ܠܶܗ ܠܶܗ: ”ܚܰܕ̱ ܡܶܕܶܐ ܟܢܳܩܰܨ ܠܳܟ̥، ܙܳܟ̥ ܡܙܰܒ݄ܢ ܟܽܘܠ ܡܶܕܶܐ ܕܟ݄ܬ ܠܳܟ̥ ܘܗܰܒ̥ ܠܰܡّܶܣܟܶܢ̈ܶܐ، ܘ݄ܓܕܳܗ̄ܘܶܐ ܠܳܟ̥ ܣܺܝܡܬܳܐ ܒܺܗ̄ܝ ܫܡܰܝܳܐ، ܘܬܳܟ̥ ܒ݄ܬ̥ܪܺܝ.“ 23ܘܗܺܝّܶܗ، ܗ̄ܺܝ ܢܰܩܠܐ ܕܫܰܡ݄ܥ ܗܰܢܺܝ، ܟܰܪܝܳܐ ܠܶܗ ܡܺܐܝܕ̥ܶܗ ܕܟ݄ܬ ܗ̄ܘܰܐ ܓ̥ܰܠܰܒܶܐ ܥܰܬܺܝܪܳܐ. 24ܘܺܗ̄ܝ ܢܰܩܠܐ ܕ݄ܚܙܶܐ ܠܶܗ ܝܶܫܽܘܥ ܕܟܰܪܝܳܐ ܠܶܗ، ܐܡ݄ܪ ܠܶܗ: ”ܡ݄ܩܰܐ ܥܰܣܩܳܐ ܝܳܐ ܥܰܠ ܐܰܝܢܰܐ ܕܟ݄ܬّܶܗ ܡܳܠܳܐ (ܙܽܘܙ̈ܶܐ) ܕܥܳܒܪܺܝ ܠܺܗ̄ܝ ܡܰܠܟܽܘܬ̥ܳܐ ܕܰܐ‌ܠܳܗܳܐ. 25ܦܫܺܝܩܳܐ ܝܳܐ ܠܺܗ̄ܝ ܓܰܡܠܳܐ ܕܥܳܒܪܳܐ ܒܽܗ̄ܘ ܢܰܩܒ̥ܳܐ ܕܺܗ̄ܝ ܡܚܰܛܳܐ ܡܶܢ̱ ܕܽܗ̄ܘ ܥܰܬܺܝܪܳܐ ܕܥܳܒ݄ܪ ܠܺܗ̄ܝ ܡܰܠܟܽܘܬ̥ܳܐ ܕܰܐ‌ܠܳܗܳܐ.“ 26ܐܡ݄ܪّܰܗ ܠܶܗ ܗܰܢܺܝ ܕܫܰܡܺܝܥܺܝ: ”ܘܡܰܢܝܳܐ ܕܟܺܝܒܶܗ ܥܳܒ݄ܪ ܠܰܚّܰܝ̈ܶܐ؟“ 27ܘܝܶܫܽܘܥ ܐܡ݄ܪ ܠܶܗ: ”ܐܰܝܢܰܐ ܕܓܰܒ ܗ̄ܰܢ ܢܳܫ̈ܶܐ ܠ݄ܐ ܟܳܗ̄ܘ݄ܢ، ܓܰܒ ܐܰ‌ܠܳܗܳܐ ܟܳܗ̄ܘ݄ܢ.“ 28ܘܐܡ݄ܪ ܠܶܗ ܠܶܗ ܫܶܡܥܽܘܢ ܟܶܐܦܳܐ: ”ܟܰܐܠܶܗ ܐܰܚܢܰܐ ܛܪܶܐ ܠܰܢ ܟܽܘܠ ܡܶܕܶܐ ܘܰܐܬ̥ܺܝܢܰܐ ܒ݄ܬ̥ܪܳܟ̥.“ 29ܝܶܫܽܘܥ ܐܡ݄ܪ ܠܶܗ ܠܶܗ: ”ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܠܰܝܬ ܢܳܫܳܐ ܕܛܳܪܶܐ ܒ̈ܳܬܶܐ ܐܰܘ ܒܰܒ̈ܶܐ ܐܰܘ ܐܰܚ̈ܽܘܢܳܢܶܐ ܐܰܘ ܐܰܢ̱ܬ̥ܬܳܐ ܐܰܘ ܐܰܒܢ̈ܶܐ ܠܰܫܰܢ ܗ̄ܺܝ ܡܰܠܟܽܘܬ̥ܳܐ ܕܰܐ‌ܠܳܗܳܐ، 30ܘܠ݄ܐ ܓܡܳܝ݄ܕ ܙ݄ܕ ܒܓ̥ܰܠܰܒܶܐ ܟܳܪ̈ܶܐ ܒܽܗ̄ܘ ܙܰܒܢܰܢܳܐ، ܘܒܽܗ̄ܘ ܥܳܠܡܳܐ ܕܳܐܬ̥ܶܐ ܗ̄ܰܚّܰܝ̈ܶܐ ܕ݄ܠܥܳܠܰܡ.“

ܝܶܫܽܘܥ ܟܡܰܘܕ̥݄ܥ ܠܰܬܠ݄ܬ̥ ܟܳܪ̈ܶܐ ܥܰܠ ܗ̄ܽܘ ܚܰܫܰܝܕ̥ܶܗ ܘܽܗ̄ܘ ܡܰܘܬܰܝܕ̥ܶܗ ܘܺܗ̄ܝ ܩܝܰܡܬܰܝܕ̥ܶܗ

ܡܬܝ 20‏:17‏‐19؛ ܡܪܩܘܣ 10‏:32‏‐34

31ܘܡܰܘܒܶܠ ܠܶܗ ܝܶܫܽܘܥ ܗ̄ܰܬܪܰܥܣܰܪܰܝܕ̥ܶܗ ܘܐܡ݄ܪ ܠܰܗ ܠّܶܗ: ”ܟܰܐܠܶܗ ܟܣ݄ܠܩܺܝܢܰܐ ܠܽܐܘܪܶܫܠܶܡ، ܘܓ݄ܕܟ݄ܡܠܺܝ ܟܽܘܠّܶܗ ܕ݄ܟܬ̥ܺܝܒ̥ܺܝ ܒܰܗ̄ܢ ܢܒܺܝ̈ܶܐ ܥܰܠ ܐܰܒܪܶܗ ܕܢܳܫܳܐ، 32ܥܰܠ ܕܓ݄ܕܡܺܝܬܰܫܠ݄ܡ ܠܰܥّܰܡ̈ܶܐ، ܘܓ݄ܕܓ݄ܚܟ̥ܺܝ ܐܰܥܠܶܗ ܘܪܰܝܩܺܝ ܒܦܳܬ̥ܶܗ، 33ܘܓ݄ܡܓܰܪܓ݄ܫܺܝ ܠܶܗ، ܘܓ݄ܡܨܰܥܪܺܝ ܠܶܗ ܘ݄ܓܩܳܛܠܺܝ ܠܶܗ، ܘܠܽܗ̄ܘ ܝܰܘܡܳܐ ܕܰܬܠܳܬ̥ܳܐ ܓ݄ܕܩܳܝ݄ܡ.“ 34ܘܗ݄ܢّܶܝ ܘܠܳܐ ܚܕ̥ܳܐ ܡܰܗ̄ܢܺܝ ܐܰܕ̥ܺܝܥܺܝ. ܗ̄ܽܘ ܡܰܐܡܪܰܢܳܐ ܡܟܰܣܝܳܐ ܗ̄ܘܰܐ ܐܰܥܠܰܝّܶܗ، ܘܠ݄ܐ ܐܕ̥ܥܺܝ ܗ̄ܘܰܘ̱ ܗܰܢܺܝ ܕܡܺܝܬܰܫܓ̥ܰܠ ܗ̄ܘܰܘ̱ ܐܰܥܡܰܝّܶܗ.

ܗ̄ܽܘ ܣܰܡܝܳܐ ܟܰܪܳܟ̥ܳܐ ܘܓܰܒ̥ܳܝܐ ܕܺܐܝܪܺܝܚܽܘ

ܡܬܝ 20‏:29‏‐34؛ ܡܪܩܘܣ 10‏:46‏‐52

35ܘܺܗ̄ܝ ܢܰܩܠܐ ܕܩܰܪܽܒ̥ ܠܺܐܝܪܺܝܚܽܘ، ܟ݄ܬ ܗ̄ܘܰܐ ܚܰܕ̱ ܣܰܡܝܳܐ ܝܳܬܰܒ̥ ܗ̄ܘܰܐ ܥܰܠ ܣܰܦ̊ܬܶܗ ܕܽܗ̄ܘ ܕܰܪܒܳܐ ܘܓܳܒ̥ܶܐ ܗ̄ܘܰܐ، 36ܘܫܰܡ݄ܥ ܩܳܠܳܐ ܕܢܳܫ̈ܶܐ ܟܳܫ݄ܦ̊ܥܺܝ، ܘ݄ܡܫܰܐܰܠ ܗ̄ܘܰܐ: ”ܡ݄ܢܝܳܐ ܗܰܢܳܐ؟“ 37ܐܡ݄ܪّܰܗ ܠܶܗ: ”ܝܶܫܽܘܥ ܗ̄ܽܘ ܢܳܨܪܳܝܳܐ ܟܥܳܒ݄ܪ.“ 38ܘܡܰܙܥܰܩ ܠܶܗ ܘܐܡ݄ܪ ܠܶܗ: ”ܝܶܫܽܘܥ، ܗ̄ܽܘ ܐܰܒܪܳܐ ܕܕܰܘܺܝܕ̥، ܡܰܪܚ݄ܡ ܐܰܥܠܺܝ.“ 39ܘܗܰܢܺܝ ܕ݄ܡܗܰܠܟ̥ܺܝ ܗ̄ܘܰܘ̱ ܩܽܘܕ̱ܡܶܗ ܕܝܶܫܽܘܥ ܡܥܰܝܛܺܝ ܗ̄ܘܰܘ̱ ܐܰܥܠܶܗ ܠܰܫܰܢ ܕܟܳܠܶܐ. ܐܶ‌ܠܳܐ ܗܺܝّܶܗ ܙ݄ܕ ܡܰܙܥܰܩ ܗ̄ܘܰܐ: ”ܝܰܐ ܗ̄ܽܘ ܐܰܒܪܳܐ ܕܕܰܘܺܝܕ̥، ܡܰܪܚ݄ܡ ܐܰܥܠܺܝ.“ 40ܘܩܰܝ݄ܡ ܝܶܫܽܘܥ ܘܗܽܒ̥ ܠܶܗ ܦܽܘܩܕܳܢܳܐ ܕܡܰܝܬܺܝ ܠܶܗ ܠܣܺܝܕ̥ܶܗ. ܘܺܗ̄ܝ ܢܰܩܠܐ ܕ݄ܡܩܰܕܰܡ ܠܶܗ ܠܣܺܝܕ̥ܶܗ، ܡܫܰܐܶܠ ܠܶܗ ܠܶܗ، 41ܘܐܡ݄ܪ ܠܶܗ ܠܶܗ: ”ܡ݄ܢ ܟ݄ܐܒܥܰܬ ܕܣܳܝܰܡ ܐ̱ܢܳܐ ܠܳܟ̥؟“ ܘܗܺܝّܶܗ ܐܡ݄ܪ ܠܶܗ: ”ܡܳܪܝ، ܕܚܳܙܶܐ ܐ̱ܢܳܐ.“ 42ܘܝܶܫܽܘܥ ܐܡ݄ܪ ܠܶܗ ܠܶܗ: ”ܚܙܰܝ! ܗ̄ܺܝ ܗܰܝܡܳܢܽܘܬ̥ܰܝܕ̥ܳܟ̥ ܗܽܒ̥ ܠܰܗ ܠܳܟ̥ ܚܰܝ̈ܶܐ.“ 43ܘܒܺܗ̄ܝ ܫܳܥܬ̥ܰܝܕ̥ܰܗ، ܚܙܶܐ ܠܶܗ. ܘܰܐܬ̥ܺܝ ܒ݄ܬ̥ܪܶܗ، ܘ݄ܡܫܰܒܰܚ ܗ̄ܘܰܐ ܠܰܐ‌ܠܳܗܳܐ. ܘܟܽܘܠܶܗ ܗ̄ܽܘ ܥܰܡܳܐ ܕ݄ܚܙܶܐ ܠܶܗ ܗ̄ܳܒܶܐ ܗ̄ܘܰܐ ܫܽܘܒܚܳܐ ܠܰܐ‌ܠܳܗܳܐ.

Currently Selected:

ܡܓܰܠܝܘܢ ܕܠܘܩܐ 18: ܟܬܒܐ

Highlight

Copy