ܡܓܰܠܝܘܢ ܕܠܘܩܐ 12

ܛܪܰܝܽܘ ܒܳܠܳܐ ܡܰܗ̄ܢ ܢܳܫ̈ܶܐ ܕܰܬّܰܪܬܶܝ ܦ̈ܳܬ̥ܳܬ̥ܳܐ

1ܘܺܗ̄ܝ ܢܰܩܠܐ ܕܠܰܬܺܝܡܺܝ ܐܰ‌ܠܦܰܝ̈ܶܐ ܕܢܳܫ̈ܶܐ ܓ̥ܰܠܰܒܶܐ، ܗܳܠ ܕܕܰܝܫܺܝ ܗ̄ܘܰܘ̱ ܚܰܕ̱ ܠܚܰܕ̱، ܡܫܰܪܶܐ ܠܶܗ ܝܶܫܽܘܥ ܕܳܐܡ݄ܪ ܠܰܬّܰܠܡܺܝܕ̥̈ܰܝܕ̥ܶܗ: ”ܒܺܗ̄ܝ ܩܰܕ̱ܡܰܝܬܳܐ ܡܰܒܶܗܽܘ ܥܰܠ ܪ̈ܽܘܚܰܝܟ̥ܽܘ ܡܽܗ̄ܘ ܚܡܺܝܪܳܐ ܕܰܦܪ̈ܺܝܫܶܐ ܕܟ݄ܬ ܝܳܐ ܬܰܪܬܶܝ ܦ̈ܳܬ̥ܳܬ̥ܳܐ. 2ܘܠܰܝܬ ܡܶܕܶܐ ܬܰܠܝܳܐ ܕܠܳܐ ܡ݄ܓܠܶܐ، ܘܠܳܐ ܡܶܕܶܐ ܡܟܰܣܝܳܐ ܕܠܳܐ ܡܺܝܕ̥݄ܥ. 3ܡܺܐܝܕ̥ܶܗ ܕܟܽܘܠ ܡܶܕܶܐ ܕܐܡ݄ܪܟ̥ܽܘ ܒܽܗ̄ܘ ܥܰܡܛܳܢܳܐ، ܒܽܗ̄ܘ ܒܰܗܪܳܐ ܓܡ݄ܫܡ݄ܥ، ܘܽܗ̄ܘ ܡܶܕܶܐ ܕ݄ܡܘܰܫܘܰܫܟ̥ܽܘ ܒܠܰܘܓ̥݄ܠ ܒܰܗ̄ܢ ܐܰܕ̥̈ܢܶܐ، ܥܰܠ ܗ̄ܰܢ ܐܶܓܳܪ̈ܶܐ ܓܡ݄ܟܪ݄ܙ.

ܡܶܢ̱ ܡܰܢ ܟܠܳܙ݄ܡ ܚܰܕ̱ ܕܙܳܝ݄ܥ

ܡܬܝ 10‏:28‏‐31

4”ܘܟܳܐܡܰܪ ܐ̱ܢܳܐ ܠܟ̥ܽܘ، ܝܰܐ ܚܰܒܺܝܒ̈ܰܝܕ̥ܺܝ: ܠܳܐ ܙܰܝܥܺܝܬܽܘ ܡܰܗ̄ܢܺܝ ܕܟܳܩܳܛܠܺܝ ܗ̄ܽܘ ܦܰܓ̥ܪܳܐ، ܘܒ݄ܬ̥݄ܪܟܶܐ ܠܰܝ̱ܬّܶܗ ܡܶܕܶܐ ܙ݄ܕ ܕܣܰܝܡܺܝ. 5ܐܶ‌ܠܳܐ ܓܡܰܚܘܶܐ ܐ̱ܢܳܐ ܠܟ̥ܽܘ ܡܶܢ̱ ܡܰܢ ܕܙܰܝܥܺܝܬܽܘ: ܡܰܗ̄ܘܳܐ ܕܒ݄ܬ̥݄ܪ ܡܶܢ̱ ܕܩܳܛ݄ܠ ܟ݄ܬ ܠܶܗ ܫܽܘܠܛܳܢܳܐ ܕ݄ܡܚܰܠ݄ܩ ܒܺܗ̄ܝ ܓܺܗܰܢܳܐ. ܐܺܝܢ ܟܳܐܡܰܪ ܐ̱ܢܳܐ ܠܟ̥ܽܘ: ܡܰܗ̄ܢܳܐ ܙܽܘܥܽܘ. 6ܠܳܐ ܚܰܡܫܳܐ ܨܰܦܪ̈ܽܘܢܶܐ ܟܡܺܝܙܰܒܢܺܝ ܒ݄ܬܪܶܝ ܦܶܠܣ̈ܶܐ؟ ܘܰܐ‌ܠܳܗܳܐ ܠ݄ܐ ܟܛܳܥܶܐ ܚܰܕ̱ ܡ݄ܢّܶܗ. 7ܘܗܰܬܽܘ، ܗܳܠ ܕܰܡّܶܢ̈ܶܐ ܕܽܗ̄ܘ ܣܰܥܪܳܐ ܕܪ̈ܺܝܫܰܝܟ̥ܽܘ ܟܽܘܠّܶܗ ܡܰܢܝ̈ܶܐ ܢܶܝ. ܗܰܢ ܢܰܩܠܐ ܠܳܐ ܙܰܝܥܺܝܬܽܘ، ܡܺܐܝܕ̥ܶܗ ܕܛܰܒ̥ ܗܰܬܽܘ ܡܶܢ̱ ܓ̥ܰܠܰܒܶܐ ܨܰܦܪ̈ܽܘܢܶܐ.

ܡܰܘܕܝܳܢܽܘܬ̥ܳܐ ܘ݄ܟܦܳܪܳܐ ܕܒ݄ܡܫܺܝܚܳܐ

ܡܬܝ 10‏:32‏‐33؛ 21‏:32؛ 10‏:19‏‐20

8”ܘܟܳܐܡܰܪ ܐ̱ܢܳܐ ܠܟ̥ܽܘ: ܟܽܘܠ ܕܡܰܘܕܶܐ ܐܶܒܺܝ ܩ݄ܕ̱ܡ ܗ̄ܰܢ ܢܳܫ̈ܶܐ، ܐܰܒܪܶܗ ܕܢܳܫܳܐ ܣܬܶܝ ܓܡܰܘܕܶܐ ܐܶܒܶܗ ܩ݄ܕ̱ܡ ܗ̄ܰܡّܰܠܰܐܟ̥̈ܶܐ ܕܰܐ‌ܠܳܗܳܐ. 9ܘܰܐܝܢܰܐ ܕܟܳܦ݄ܪ ܐܶܒܺܝ ܩ݄ܕ̱ܡ ܗ̄ܰܢ ܢܳܫ̈ܶܐ، ܓܡ݄ܟܦ݄ܪ ܐܶܒܶܗ ܩ݄ܕ̱ܡ ܗ̄ܰܡّܰܠܰܐܟ̥̈ܶܐ ܕܰܐ‌ܠܳܗܳܐ. 10ܘܟܽܘܠ ܕܳܐܡ݄ܪ ܡܰܐܡܪܳܐ ܥܰܠ ܐܰܒܪܶܗ ܕܢܳܫܳܐ، ܓܡ݄ܫܒ݄ܩ ܠܶܗ، ܐܶ‌ܠܳܐ ܡܰܢ ܕ݄ܡܓܰܕ݄ܦ ܥܰܠ ܪܽܘܚܳܐ ܕܩܽܘܕܫܳܐ ܠ݄ܐ ܓܡ݄ܫܒ݄ܩ ܠܶܗ. 11ܘܺܗ̄ܝ ܢܰܩܠܐ ܕ݄ܡܩܰܕܡ݄ܢܟ̥ܽܘ ܠܰܟܢܽܘܫ̈ܳܬ̥ܳܐ ܩ݄ܕ̱ܡ ܗ̄ܰܪّܺܝܫܳܢ̈ܶܐ ܘܰܫّܰܠܺܝ̈ܛܶܐ، ܠܳܐ ܛܳܥܢܺܝܬܽܘ ܓ̥ܰܡܳܐ ܐܰܝܕܰܪܒܳܐ ܓܣܰܝܡܺܝܬܽܘ ܡܰܦܬܰܚ ܦܶܡܳܐ، ܐܰܘ ܡ݄ܢ ܓܕ݄ܐܡّܺܪ̱ܝܬܽܘ، 12ܡܺܐܝܕ̥ܶܗ ܕܺܗ̄ܝ ܪܽܘܚܳܐ ܕܩܽܘܕܫܳܐ ܓܡܰܘܠܰܦܟ̥ܽܘ ܒܺܗ̄ܝ ܫܳܥܬ̥ܰܝܕ̥ܰܗ ܗ̄ܽܘ ܡܶܕܶܐ ܕܠܳܙ݄ܡ ܕ݄ܐܡّܺܪ̱ܝܬܽܘ.“

ܗ̄ܽܘ ܡܰܬ̥ܠܳܐ ܕܽܗ̄ܘ ܥܰܬܺܝܪܳܐ ܣܰܟ̥ܠܳܐ

ܡܬܝ 6‏:25‏‐34

13ܘܚܰܕ̱ ܡܰܗ̄ܢ ܢܳܫ̈ܰܢ݄ܟ ܐܡ݄ܪ ܠܶܗ ܠܶܗ: ”ܡܰܠܦܳܢܳܐ، ܐܡܰܪ ܠܰܐܚܽܘܢܺܝ ܕܦܳܠ݄ܓ̥ ܐܰܥܡܺܝ ܗ̄ܺܝ ܝܳܪܬ̥ܽܘܬ̥ܳܐ.“ 14ܘܝܶܫܽܘܥ ܐܡ݄ܪ ܠܶܗ ܠܶܗ: ”ܝܰܐ ܓܰܒ̥ܪܳܐ، ܡܰܢܝܳܐ ܕܡܰܩ݄ܡ ܠܶܗ ܠܺܝ ܐܰܥܠܰܝܟ̥ܽܘ ܕܰܝܳܢܳܐ ܘ݄ܡܦܰܠܓ̥ܳܢܳܐ؟“ 15ܘܐܡ݄ܪ ܠܶܗ ܠܰܬّܰܠܡܺܝܕ̥̈ܰܝܕ̥ܶܗ: ”ܡܰܒܶܗܽܘ ܡܶܢ̱ ܟܽܘܠܰܗ ܗ̄ܺܝ ܝܰܥܢܽܘܬ̥ܳܐ، ܡܺܐܝܕ̥ܶܗ ܕܠܳܐ ܒܰܙّܽܘܙ̈ܶܐ ܙܳܝܽܘܕ̈ܶܐ ܟܺܝܬ ܚܰܝ̈ܶܐ.“

16ܘܐܡ݄ܪ ܠܰܗ ܠّܶܗ ܡܰܬ̥ܠܳܐ: ”ܚܰܕ̱ ܓܰܒ̥ܪܳܐ ܥܰܬܺܝܪܳܐ ܕܺܗ̄ܝ ܐܰܪܥܰܝܕ̥ܶܗ ܗܽܒ̥ ܠܰܗ ܠܶܗ ܦܺܐܪ̈ܶܐ ܘ݄ܚܨܳܕܳܐ ܓ̥ܰܠܰܒܶܐ. 17ܘܳܐܡܰܪ ܗ̄ܘܰܐ ܠܪܽܘܚܶܗ: ܡ݄ܢ ܣܳܝܰܡ ܐ̱ܢܳܐ ܕܠܰܝ̱ܬ ܠܺܝ ܕܽܘܟܬ̥ܳܐ ܕܡܰܚ݄ܬ ܐ̱ܢܳܐ ܗ̄ܽܘ ܚܨܳܕܳܐ ܕ݄ܚܨ݄ܕ ܠܺܝ؟ 18ܘܐܡ݄ܪ ܠܶܗ: ܗܰܬ̥ܶܐ ܓܣܳܝܰܡ ܐ̱ܢܳܐ. ܓܡܰܚܪܰܒ̥ ܐ̱ܢܳܐ ܗ̄ܰܟّܳܪ̈ܶܐ ܕܟ݄ܬ ܠܺܝ، ܘ݄ܓܒܳܢܶܐ ܐ̱ܢܳܐ ܘܡܰܘܪܰܒ̥ܢܰܢّܶܗ، ܘܬܰܡܳܐ ܓܡܰܚ݄ܬ ܐ̱ܢܳܐ ܟܽܘܠّܶܗ ܗ̄ܰܚّܶܛ̈ܶܐ ܘܰܛّܳܒ̥̈ܳܬ̥ܳܐ ܕܗܰܘ݄ܢ ܠܺܝ. 19ܘ݄ܓܕܳܐܡܰܪ ܐ̱ܢܳܐ ܠܢܰܦܫܺܝ: ܝܰܐ ܢܰܦܫܺܝ، ܟ݄ܬ ܠܰܟ̥ ܓ̥ܰܠܰܒܶܐ ܛܳܒ̥̈ܳܬ̥ܳܐ ܕܡܰܚܬܺܝ ܠܓ̥ܰܠܰܒܶܐ ܐ݄ܫܢ̈ܶܐ، ܡ݄ܬ̥ܢܰܚ، ܐܰܟ̥ܽܘܠ، ܫܬܰܝ، ܡ݄ܦܨܰܚ. 20ܐܶ‌ܠܳܐ ܐܰ‌ܠܳܗܳܐ ܐܡ݄ܪ ܠܶܗ ܠܶܗ: ܝܰܐ ܢܳܩ݄ܨ ܗܰܘܢܳܐ، ܒܽܗ̄ܘ ܠܰܠܝܰܢܳܐ، ܗ̄ܺܝ ܢܰܦܫܰܝܕ̥ܳܟ̥ ܓܕ݄ܐܒܥܺܝ ܠܰܗ ܡܶܢܳܟ̥، ܘܗܰܢܺܝ ܕ݄ܡܛܰܝܰܒ ܠܳܟ̥ ܠܡܰܢ ܓܕܳܗ̄ܘ݄ܢ؟ 21ܗܰܘܟ̥ܰܐ ܝܳܐ ܡܰܢ ܕܣܳܝܰܡ ܠܶܗ ܣܺܝܡ̈ܳܬ̥ܳܐ، ܘܒܰܐ‌ܠܳܗܳܐ ܠܰܝ̱ܬ ܝܳܐ ܥܰܬܺܝܪܳܐ.“

ܠܳܐ ܛܳܥܢܺܝܬܽܘ ܓ̥ܰܡܳܐ ܕܪ̈ܽܘܚܰܝܟ̥ܽܘ

ܡܬܝ 6‏:25‏‐34

22ܘܐܡ݄ܪ ܠܶܗ ܠܰܬّܰܠܡܺܝܕ̥̈ܰܝܕ̥ܶܗ: ”ܡܰܗ̄ܘܟ̥ܰܐ ܟܳܐܡܰܪ ܐ̱ܢܳܐ ܠܟ̥ܽܘ: ܠܳܐ ܗ̄ܘܺܝܬܽܘ ܡܳܪܳܐ ܠܪܽܘܚܰܝܟ̥ܽܘ: ܡ݄ܢ ܓܕ݄ܐܟ̥ܠܺܝܬܽܘ، ܘܠܳܐ ܠܽܗ̄ܘ ܦܰܓ̥ܪܰܬ̥ܟ̥ܽܘ ܡ݄ܢ ܓܠܳܒ̥ܫܺܝܬܽܘ. 23ܥܰܠ ܕܺܗ̄ܝ ܢܰܦܫܳܐ ܛܰܒ̥ ܡܽܗ̄ܘ ܡܽܐܘܟܠܳܐ ܝܳܐ، ܘܽܗ̄ܘ ܦܰܓ̥ܪܳܐ ܡܽܗ̄ܘ ܠܒܽܘܫܳܐ. 24ܚܽܘܪܽܘ ܒܰܛّܰܝܪ̈ܶܐ ܕܠ݄ܐ ܟܙ݄ܪܥܺܝ ܘܠ݄ܐ ܟܚ݄ܨܕܺܝ، ܘܠܰܝ̱ܬّܶܗ ܒ̈ܳܬܶܐ ܘܟܳܪ̈ܶܐ، ܘܰܐ‌ܠܳܗܳܐ ܟܡܰܘܟܰܠّܶܗ. ܗܰܢ ܢܰܩܠܐ، ܡ݄ܩܰܐ ܗܰܬܽܘ ܛܰܒ̥ ܗܰܬܽܘ ܡܰܢ̱ ܛّܰܝܪ̈ܶܐ. 25ܘܰܐܝܢܰܐ ܡ݄ܢܟ̥ܽܘ، ܗ̄ܺܝ ܢܰܩܠܐ ܕܳܗ̄ܘܶܐ ܡܳܪܳܐ ܠܪܽܘܚܶܗ، ܟܺܝܒܶܗ ܡܰܙ݄ܕ ܥܰܠ ܗ̄ܺܝ ܩܽܘܡܬ̥ܰܝܕ̥ܶܗ ܚܰܕ̱ ܕܪܳܥܳܐ؟ 26ܘܶܐܢ ܠܰܒܟ̥ܽܘ ܥܰܠ ܡܶܕܶܐ ܢܰܥܺܝܡܳܐ، ܡ݄ܢܝܳܐ ܕܟܳܗ̄ܘܺܝܬܽܘ ܡܳܪܳܐ ܥܰܠ ܗ̄ܰܡّܶܕ̈ܳܢܶܐ ܚܪ̈ܶܢܶܐ. 27ܚܽܘܪܽܘ ܒܰܫّܽܘܫܰܢ̈ܶܐ ܐܰܝܕܰܪܒܳܐ ܟܝ݄ܪܒ̥ܺܝ، ܕܠ݄ܐ ܟܒ݄ܛܠܺܝ ܘܠ݄ܐ ܟܥ݄ܙܠܺܝ، ܘܟܳܐܡܰܪ ܐ̱ܢܳܐ ܠܟ̥ܽܘ: ܘܠܳܐ ܫܠܶܝܡܳܘܢ، ܒܟܽܘܠܶܗ ܗ̄ܽܘ ܫܽܘܒܚܰܝܕ̥ܶܗ، ܠܒ̥݄ܫ ܠܶܗ ܐܟ̥ ܕ݄ܚܕ̥ܳܐ ܡܰܗ̄ܢܺܝ. 28ܘܶܐܢ ܠܽܗ̄ܘ ܓܶܠܳܐ ܕܟ݄ܬ ܝܳܐ ܐܰܕܝܰܘܡܰܐ ܒܺܗ̄ܝ ܚܰܩܠܳܐ ܘܪܰܡܚ݄ܠ ܓܢܳܦ݄ܠ ܒܽܗ̄ܘ ܬܰܢܽܘܪܳܐ، ܐܰ‌ܠܳܗܳܐ ܗܰܘܟ̥ܰܐ ܟܡܰܠܒ̥ܰܫ ܠܶܗ، ܡ݄ܩܰܐ ܙ݄ܕ ܐܰ‌ܠܟ̥ܽܘ (ܟܡܰܠܒ̥݄ܫ)، ܝܰܐ ܢܳܩ݄ܨ ܗܰܝܡܳܢܽܘܬ̥ܳܐ. 29ܘܗܰܬܽܘ ܠܳܐ ܡܫܰܐܺܠܺܝܬܽܘ ܡ݄ܢ ܓܕ݄ܐܟ̥ܠܺܝܬܽܘ ܘܡ݄ܢ ܓܫܳܬܺܝܬܽܘ، ܘܠ݄ܐ ܐܙّܶܗ ܗܰܘܢܰܝܟ̥ܽܘ ܒ݄ܬ̥݄ܪ ܗ̄ܰܡّܶܕ̈ܳܢܰܢܺܝ. 30ܡܺܐܝܕ̥ܶܗ ܕܗܰܢܺܝ ܟܽܘܠّܶܗ، ܗ̄ܰܥّܰܡ̈ܶܐ ܕܽܗ̄ܘ ܥܳܠܡܳܐ ܟ݄ܡܫܰܐܺܠܺܝ ܐܰܥܠܰܝّܶܗ. ܐܶ‌ܠܳܐ ܗܰܬܽܘ، ܗ̄ܽܘ ܒܰܒܰܬ̥ܟ̥ܽܘ ܣܬܶܝ ܟܳܐܕ̥݄ܥ ܕܟܳܐܒܰܥܟ̥ܽܘ ܗܰܢܺܝ. 31ܐܶܠܳܐ ܝܺܒܰܥܽܘ ܗ̄ܺܝ ܡܰܠܟܽܘܬ̥ܳܐ ܕܰܐ‌ܠܳܗܳܐ، ܘܗܰܢܺܝ ܟܽܘܠّܶܗ ܓܡܺܝܬܰܙܝܕܺܝ ܐܰ‌ܠܟ̥ܽܘ.

ܗ̄ܺܝ ܣܺܝܡܬܳܐ ܕܠ݄ܐ ܟܬܰܝܡܳܐ

32”ܠܳܐ ܙܰܝܥ݄ܬ، ܝܰܐ ܩܰܛܥܳܐ ܢܰܥܺܝܡܳܐ، ܥܰܠ ܕܽܗ̄ܘ ܒܰܒܰܬ̥ܟ̥ܽܘ ܐܰܒ݄ܥ ܕܳܗ̄ܒܰܠܟ̥ܽܘ ܗ̄ܺܝ ܡܰܠܟܽܘܬ̥ܳܐ. 33ܡܙܰܒܶܢܽܘ ܟܽܘܠ ܕܟ݄ܬܟ̥ܽܘ ܘܗܰܒ̥ܽܘ ܙܶܕܰܩܬܳܐ. ܘܣܽܘܡܽܘ ܠܟ̥ܽܘ ܟܺܝ̈ܣܶܐ ܕܠ݄ܐ ܟܒܰܝܩܺܝ ܘܣܺܝܡܬܳܐ ܒܺܗ̄ܝ ܫܡܰܝܳܐ ܕܠ݄ܐ ܟܬܰܝܡܳܐ، ܬܰܡܳܐ ܐܰܝܟܳܐ ܕܓܰܢܳܒ̥ܳܐ ܠ݄ܐ ܟ݄ܡܩܰܪܽܒ̥، ܘܣܳܣܳܐ ܠ݄ܐ ܟܡܰܚܪܽܒ̥. 34ܡܺܐܝܕ̥ܶܗ ܕܰܐܝܟܳܐ ܕܟ݄ܬ ܝܳܐ ܗ̄ܺܝ ܣܺܝܡܬܰܬ̥ܟ̥ܽܘ، ܬܰܡܳܐ ܓܕܳܗ̄ܘܶܐ ܠܶܒܰܝܟ̥ܽܘ ܣܬܶܝ.

ܠܽܘܒܳܒܳܐ ܕܥܰܠ ܗ̄ܽܘ ܫܰܗܪܳܐ

ܡܬܝ 24‏:42‏‐44

35”ܡܰܐܣܶܪܽܘ ܚܰܨܰܝܟ̥ܽܘ ܘܡܰܢܗܶܪܽܘ ܗ̄ܰܫܪ̈ܳܓ̥ܰܬ̥ܟ̥ܽܘ، 36ܘ݄ܗܘܰܝܽܘ ܐܟ̥ ܕܢܳܫ̈ܶܐ ܕܟܳܢܳܛܪܺܝ ܗ̄ܽܘ ܡܳܪܰܬّ̥ܶܗ ܕܶܐܡܰܐ ܕܕܳܥ݄ܪ ܡܺܗ̄ܝ ܡ݄ܫܬܽܘܬ̥ܳܐ، ܕܺܗ̄ܝ ܢܰܩܠܐ ܕܳܐܬ̥ܶܐ ܘܕܳܝ݄ܩ، ܡܶܚܕ̥ܳܐ ܓܦܳܬܚܺܝ ܠܶܗ. 37ܛܽܘܒܳܐ ܠܰܓܪ̈ܶܝܥܰܢ݄ܟ ܕܺܗ̄ܝ ܢܰܩܠܐ ܕܳܐܬ̥ܶܐ ܗ̄ܽܘ ܡܳܪܰܬّ̥ܶܗ ܘܚܳܙܰܠّܶܗ ܩܺܝܡ̈ܶܐ. ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܓܡܰܐܣ݄ܪ ܚܰܨܶܗ ܘܡܰܘܬܰܒّ̥ܶܗ ܥܰܠ ܗ̄ܽܘ ܡܽܐܘܟܠܳܐ، ܘܥܳܒ݄ܪ ܡܫܰܡܰܫّܶܗ. 38ܘܶܐܢ ܕܳܐܬ̥ܶܐ ܚܶܕ̥ܳܪ ܦܰܠܓܶܗ ܕܠܰܠܝܳܐ ܐܰܘ ܒ݄ܬ̥݄ܪ، ܘܚܳܙܰܠّܶܗ ܗܰܘܟ̥ܰܐ (ܩܺܝܡ̈ܶܐ)، ܛܽܘܒܳܐ ܠܰܓܪ̈ܶܝܥܰܢ݄ܟ. 39ܘܗܰܬ̥ܶܐ ܣܬܶܝ ܝܺܕ̥ܰܥܽܘ، ܐܶܢ ܕܳܐܕ̥ܰܥ ܗ̄ܘܰܐ ܡܳܪܶܗ ܕܽܗ̄ܘ ܒܰܝܬܳܐ ܐܶܡܰܐ ܓܕܳܐܬ̥ܶܐ ܗ̄ܽܘ ܓܰܢܳܒ̥ܳܐ، ܦܳܝܰܫ ܗ̄ܘܰܐ ܩܺܝܡܳܐ، ܘܠܳܐ ܛܳܪܶܐ ܗ̄ܘܰܐ ܕܡ݄ܦܠ݄ܫ ܗ̄ܽܘ ܒܰܝܬܰܝܕ̥ܶܗ. 40ܘܗܰܬܽܘ ܣܬܶܝ ܗܘܰܝܽܘ ܡܛܰܝܒ̈ܶܐ، ܕܒܺܗ̄ܝ ܫܳܥܬ̥ܰܝܳܐ ܕܠ݄ܐ ܟܚ݄ܫܒ̥ܺܝܬܽܘ ܓܕܳܐܬ̥ܶܐ ܐܰܒܪܶܗ ܕܢܳܫܳܐ.“

ܗ̄ܽܘ ܡܰܬ̥ܠܳܐ ܕܽܗ̄ܘ ܓܪܶܝܥܳܐ ܡܗܰܝܡܢܳܐ

41ܘܐܡ݄ܪ ܠܶܗ ܠܶܗ ܫܶܡܥܽܘܢ ܟܶܐܦܳܐ: ”ܡܳܪܰܢ، ܐܶ‌ܠܰܢ ܟ݄ܐܡّܰܪ̱ܬ ܗ̄ܽܘ ܡܰܬ̥ܠܰܢܳܐ، ܐܰܘ ܠܟܽܘܠ ܢܳܫܳܐ؟“ 42ܘܝܶܫܽܘܥ ܐܡ݄ܪ ܠܶܗ ܠܶܗ: ”ܡܰܢܝܳܐ ܗ̄ܽܘ ܪܰܒܒܰܝܬܳܐ (ܘܰܟܺܝܠܳܐ) ܡܗܰܝܡܢܳܐ ܘܚܰܟܺܝܡܳܐ ܕܡܰܩ݄ܡ ܠܶܗ ܗ̄ܽܘ ܡܳܪܰܝܕ̥ܶܗ ܥܰܠ ܗ̄ܺܝ ܬܶܫܡܶܫܬܰܝܕ̥ܶܗ، ܠܰܫܰܢ ܕܳܗ̄ܒܶܐ ܗ̄ܽܘ ܡܽܐܘܟܠܳܐ ܒܽܗ̄ܘ ܙܰܒܢܰܝܕ̥ܶܗ؟ 43ܛܽܘܒܳܐ ܠܽܗ̄ܘ ܓܪܶܝܥܰܘܳܐ ܕܺܗ̄ܝ ܢܰܩܠܐ ܕܳܐܬ̥ܶܐ ܗ̄ܽܘ ܡܳܪܰܝܕ̥ܶܗ ܚܳܙܶܐ ܠܶܗ ܕܟܳܣܳܝ݄ܡ ܗܰܘܟ̥ܰܐ. 44ܒ݄ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܓ݄ܕܡܰܩ݄ܡ ܠܶܗ ܥܰܠ ܟܽܘܠܶܗ ܗ̄ܽܘ ܡܳܠܰܝܕ̥ܶܗ. 45ܘܶܐܢ ܗ̄ܽܘ ܓܪܶܝܥܰܘܳܐ ܕܳܐܡ݄ܪ ܒܠܶܒܶܗ: ܗ̄ܽܘ ܡܳܪܰܝܕ̥ܺܝ ܟܡܥܰܘ݄ܩ ܕܕܳܥ݄ܪ. ܘܟ݄ܡܫܰܪܶܐ ܕܡܳܚܶܐ ܠܰܓܪ̈ܶܝܥܶܐ ܘܠܰܓܪ̈ܰܥܝܳܬ̥ܳܐ ܕܽܗ̄ܘ ܡܳܪܰܝܕ̥ܶܗ، ܘܟ݄ܡܫܰܪܶܐ ܕܳܐܟ̥݄ܠ ܘܫܳܬܶܐ ܘܪܳܘܶܐ. 46ܓܕܳܐܬ̥ܶܐ ܡܳܪܶܗ ܕܽܗ̄ܘ ܓܪܶܝܥܰܘܳܐ ܒܝܰܘܡܳܐ ܕܠܳܐ ܥܰܠ ܒܳܠܶܗ ܘ݄ܒܫܳܥܬ̥ܳܐ ܕܠ݄ܐ ܟܳܐܕ̥ܰܥ، ܘܓ݄ܕܦܳܠܰܩ ܠܶܗ ܘܚܳܫܰܒ̥ ܠܶܗ ܥܰܡ ܗܰܢ݄ܟ ܕܠܰܝ̱ܬ ܢܶܝ ܡܗܰܝܡܢ̈ܶܐ. 47ܐܶܠܳܐ ܗ̄ܽܘ ܓܪܶܝܥܳܐ ܕܟܳܐܕ̥݄ܥ ܗ̄ܽܘ ܨܶܒܝܳܢܳܐ ܕܽܗ̄ܘ ܡܳܪܰܝܕ̥ܶܗ ܘܠܳܐ ܣ݄ܡ ܠܶܗ ܐܟ̥ ܕܽܗ̄ܘ ܨܶܒܝܳܢܰܝܕ̥ܶܗ، ܓܕܳܐܟ̥ܶܠ ܡܰܚܝܳܐ ܓ̥ܰܠܰܒܶܐ. 48ܘܗܰܘܳܐ ܕܠ݄ܐ ܟܳܐܕ̥݄ܥ ܘܣܳܝ݄ܡ ܡܶܕܶܐ ܕܫܳܘܶܐ ܠܡܰܚܝܳܐ، ܓܕܳܐܟ̥݄ܠ ܐ݄ܫܡܳܐ ܕܡܰܚܝܳܐ. ܡܺܐܝܕ̥ܶܗ ܕܟܽܘܠ ܚܰܕ̱ ܕܡܺܝܬܰܗܒ̥ܶܐ ܠܶܗ ܓ̥ܰܠܰܒܶܐ، ܓ̥ܰܠܰܒܶܐ ܓܡܺܝܒ݄ܥ ܡܶܢܶܗ، ܘܠܰܗ̄ܘܳܐ ܕ݄ܡܗܰܝܡܢܺܝ ܠܶܗ ܥܰܠ ܓ̥ܰܠܰܒܶܐ، ܙ݄ܕ ܒܓ̥ܰܠܰܒܶܐ ܓܕ݄ܐܒܥܺܝ ܡܶܢܶܗ.

ܠܰܐ ܐܬ̥ܺܝ ܐ̱ܢܳܐ ܕ݄ܡܚܰܠܰܩ ܐ̱ܢܳܐ ܫܠܳܡܳܐ ܐܶ‌ܠܳܐ ܦܠܺܝܓ̥ܽܘܬ̥ܳܐ

ܡܬܝ 10‏:34‏‐36

49”ܐܰܬ̥ܺܝ ܐ̱ܢܳܐ ܕܪܳܡܶܐ ܐ̱ܢܳܐ ܢܽܘܪܳܐ ܒܺܗ̄ܝ ܐܰܪܥܳܐ، ܘܪܳܝܰܓ ܗ̄ܘܰܝ ܐ̱ܢܳܐ ܕܡܶܢ̱ ܙܰܒܢܳܐ ܝܳܩܕ̥ܳܐ ܗ̄ܘܰܐ. 50ܘܡܰܥܡܽܘܕ̥ܺܝܬ̥ܳܐ ܟ݄ܬ ܠܺܝ ܕܥܳܡܰܕ̥ ܐ̱ܢܳܐ، ܘܓ̥ܰܠܰܒܶܐ ܟܥܳܝܰܩ ܠܺܝ ܗܳܠ ܕܟܳܡܠܳܐ. 51ܟܚ݄ܫܒ̥ܺܝܬܽܘ ܐܰܬ̥ܺܝ ܐ̱ܢܳܐ ܕܕܳܪܶܐ ܐ̱ܢܳܐ ܫܠܳܡܳܐ ܒܺܗ̄ܝ ܐܰܪܥܳܐ؟ ܠܳܐ، ܟܳܐܡܰܪ ܐ̱ܢܳܐ ܠܟ̥ܽܘ، ܐܶ‌ܠܳܐ ܦܠܺܝܓ̥ܽܘܬ̥ܳܐ. 52ܘܡܳܐܥܕܳܐ ܓܕܳܗ̄ܘ݄ܢ ܚܰܡܫܳܐ ܒܚܰܕ̱ ܒܰܝܬܳܐ، ܬܠܳܬ̥ܳܐ ܡ݄ܢّܶܗ ܦܠܺܝܓ̥̈ܶܐ ܥܰܠ ܬܪܶܝ، ܘ݄ܬܪܶܝ ܥܰܠ ܬܠܳܬ̥ܳܐ. 53ܘܽܗ̄ܘ ܒܰܒܳܐ ܓܡ݄ܦܠ݄ܓ̥ ܥܰܠ ܗ̄ܽܘ ܐܰܒܪܳܐ، ܘܽܗ̄ܘ ܐܰܒܪܳܐ ܥܰܠ ܗ̄ܽܘ ܒܰܒܳܐ، ܗ̄ܺܝ ܐܶܡܳܐ ܥܰܠ ܗ̄ܺܝ ܒܰܪܬ̥ܳܐ، ܘܺܗ̄ܝ ܒܰܪܬ̥ܳܐ ܥܰܠ ܗ̄ܺܝ ܐܶܡܳܐ، ܘܺܗ̄ܝ ܚܡܳܬ̥ܳܐ ܥܰܠ ܗ̄ܺܝ ܟܰܠܳܐ ܘܺܗ̄ܝ ܟܰܠܳܐ ܥܰܠ ܚܡܳܬ̥ܳܐ.“

ܗ̄ܰܢ ܐܳܬ̥ܘ̈ܳܬ̥ܳܐ ܕܽܗ̄ܘ ܙܰܒܢܳܐ ܚܰܪܳܝܳܐ

ܡܬܝ 16‏:1‏‐4؛ ܡܪܩܘܣ 8‏:11‏‐13

54ܘܐܡ݄ܪ ܠܶܗ ܠܰܗ̄ܢ ܢܳܫ̈ܶܐ: ”ܗ̄ܺܝ ܢܰܩܠܐ ܕܚܳܙܺܝܬܽܘ ܥܰܝܡܳܐ ܕܢܳܦ݄ܩ ܡܽܗ̄ܘ ܡܰܥ݄ܪܒܳܐ، ܡܶܚܕ̥ܳܐ ܟ݄ܐܡّܺܪ̱ܝܬܽܘ ܓܕܳܐܬ̥ܶܐ ܡܰܛܪܳܐ، ܘܟܳܗ̄ܘܶܐ ܗܰܘܟ̥ܰܐ. 55ܘܺܗ̄ܝ ܢܰܩܠܐ ܕܩܰܝܡܳܐ ܗܰܘܰܐ ܡܽܗ̄ܘ ܬܰܝܡܢܳܐ ܟ݄ܐܡّܺܪ̱ܝܬܽܘ ܓܕܳܗ̄ܘܶܐ ܚܶܡܳܐ، ܘܟܳܗ̄ܘܶܐ. 56ܝܰܐ ܕܰܬّܰܪܬܶܝ ܦ̈ܳܬ̥ܳܬ̥ܳܐ، ܦܳܬ̥ܰܗ ܕܺܗ̄ܝ ܐܰܪܥܳܐ ܘܕܺܗ̄ܝ ܫܡܰܝܳܐ ܟ݄ܐܕ̥ܥܺܝܬܽܘ ܕܦܳܪܫܺܝܬܽܘ، ܘܽܗ̄ܘ ܙܰܒܢܰܢܳܐ ܐܰܝܕܰܪܒܳܐ ܠ݄ܐ ܟܦ݄ܪܫܺܝܬܽܘ؟ 57ܘܩܰܝ ܡܶܢ̱ ܪܽܘܚܰܝܟ̥ܽܘ ܠ݄ܐ ܟܕܰܝܢܺܝܬܽܘ ܗ̄ܽܘ ܫܪܳܪܳܐ؟

58”ܘܺܗ̄ܝ ܢܰܩܠܐ ܕ݄ܐܙّܳܟ̥ ܥܰܡ ܗ̄ܽܘ ܒܥܶܠܕܺܝܢܰܝܕܳܟ̥ (ܡܰܫܟܝܳܢܳܐ ܕܰܐܥܠܳܟ̥) ܠܽܗ̄ܘ ܫܰܠܺܝܛܳܐ، ܘܗܶܫ ܗܰܬ ܒܽܗ̄ܘ ܕܰܪܒܳܐ، ܗܰܒ̥ ܘ݄ܫܩܰܠ ܐܰܥܡܶܗ ܠܰܫܰܢ ܕܦܳܪܩܰܬ ܡܶܢܶܗ، ܕܠ݄ܐ ܐܙّܶܗ ܡܰܘܒܶܠ ܠܳܟ̥ ܓܰܒ ܗ̄ܽܘ ܕܰܝܳܢܳܐ، ܘܽܗ̄ܘ ܕܰܝܳܢܳܐ ܓܡܰܫܠܰܡ ܠܳܟ̥ ܠܽܗ̄ܘ ܓܰܒܳܝܳܐ، ܘܽܗ̄ܘ ܓܰܒܳܝܳܐ ܓ݄ܡܚܰܠܰܩ ܠܳܟ̥ ܒܽܗ̄ܘ ܚܒܽܘܫܝܳܐ. 59ܘܟܳܐܡܰܪ ܐ̱ܢܳܐ ܠܳܟ̥: ܕܠ݄ܐ ܟܢ݄ܦܩܰܬ ܡܶܢ̱ ܬܰܡܳܐ ܗܳܠ ܕܳܗ̄ܒܰܬ ܗ̄ܽܘ ܦܶܠܣܳܐ ܚܰܪܳܝܳܐ.“

Currently Selected:

ܡܓܰܠܝܘܢ ܕܠܘܩܐ 12: ܟܬܒܐ

Highlight

Copy