ܡܓܰܠܝܘܢ ܕܝܘܚܢܢ 20

ܩܰܒ̥ܪܳܐ ܣܦܺܝܩܳܐ (ܠܰܝܒܶܗ ܢܳܫܳܐ)

ܡܬܝ 28‏:1‏‐10؛ ܡܪܩܘܣ 16‏:1‏‐8؛ ܠܘܩܐ 24‏:1‏‐12

1ܘ݄ܒܩܶܕܰܡܬܳܐ ܕܚܽܕ̱ܒ̥ܫܰܒܳܐ، ܘܗܶܫ ܥܰܡܛܳܢܳܐ ܗ̄ܘܰܐ، ܐܰܬ̥ܝܳܐ ܡܰܪܝܰܡ ܗ̄ܺܝ ܡܰܓ̥ܕܠܰܝܬܳܐ ܠܰܩّܰܒ̥ܪ̈ܶܐ ܘ݄ܚܙܶܐ ܠܰܗ ܠܺܗ̄ܝ ܟܶܐܦܳܐ ܡܺܝܕܳܐ ܡܽܗ̄ܘ ܩܰܒ̥ܪܳܐ. 2ܘܪܰܗܺܝܛܳܐ ܐܰܬ̥ܝܳܐ ܠܓܰܒ ܫܶܡܥܽܘܢ ܟܶܐܦܳܐ ܘܽܗ̄ܘ ܬܰܠܡܺܝܕ̥ܳܐ ܚܪܶܢܳܐ ܕܪܳܚܰܡ ܗ̄ܘܰܝ ܠܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܡ݄ܕّܶܗ ܡܳܪܰܢ ܡܽܗ̄ܘ ܩܰܒ̥ܪܳܐ ܘܠ݄ܐ ܟ݄ܐܕ̥ܥܳܐ ܐ̱ܢܳܐ ܐܰܝܟܳܐ ܡܰܚ݄ܬّܶܗ.“ 3ܘܢܰܦ݄ܩ ܫܶܡܥܽܘܢ ܘܽܗ̄ܘ ܬܰܠܡܺܝܕ̥ܰܘܳܐ ܗ̄ܽܘ ܚܪܶܢܳܐ ܘܰܐܬ̥݄ܢ ܠܰܩّܰܒ̥ܪ̈ܶܐ. 4ܘܰܬܪ̈ܰܝّܶܗ ܪܳܗܛܺܝ ܗ̄ܘܰܘ̱ ܥܰܡ ܚܕ̥ܳܕ̥̈ܶܐ. ܘܽܗ̄ܘ ܬܰܠܡܺܝܕ̥ܰܘܳܐ ܪܰܗ݄ܛ ܡܰܛܺܝ ܡܶܩ݄ܕ̱ܡ ܫܶܡܥܽܘܢ، ܘܰܐܬ̥ܺܝ ܒܺܗ̄ܝ ܩܰܕ̱ܡܰܝܬܳܐ ܠܽܗ̄ܘ ܩܰܒ̥ܪܳܐ، 5ܘܡܰܕ݄ܩ ܠܶܗ ܚܙܶܐ ܠܶܗ ܗ̄ܰܟّܶܬܳܢ̈ܶܐ ܡܰܚ̈ܬܶܐ، ܐܶ‌ܠܳܐ ܥܒܳܪܳܐ ܠܳܐ ܥܰܒ݄ܪ. 6ܘܰܐܬ̥ܺܝ ܫܶܡܥܽܘܢ ܒ݄ܬ̥ܪܶܗ، ܘܥܰܒ݄ܪ ܠܽܗ̄ܘ ܩܰܒ̥ܪܳܐ ܘ݄ܚܙܶܐ ܠܶܗ ܗ̄ܰܟّܶܬܳܢ̈ܶܐ ܡܰܚ̈ܬܶܐ، 7ܘܽܗ̄ܘ ܡܰܢܕܺܝܠܳܐ ܕܟ݄ܬ ܗ̄ܘܰܐ ܡܰܐܣܪܳܐ ܒܪܺܝܫܶܗ ܠܰܝ̱ܬ ܗ̄ܘܰܐ ܥܰܡ ܗ̄ܰܟّܶܬܳܢ̈ܶܐ ܐܶ‌ܠܳܐ ܠܺܝܦܳܐ ܘܡܰܚܬܳܐ ܠܪܽܘܚܶܗ ܒܕܽܘܟܬ̥ܳܐ ܚܪܶܬܳܐ. 8ܗ̄ܺܝ ܢܰܩܠܝܳܐ، ܥܰܒ݄ܪ ܗ̄ܽܘ ܬܰܠܡܺܝܕ̥ܰܘܳܐ ܣܬܶܝ ܕܰܐܬ̥ܺܝ ܒܺܗ̄ܝ ܩܰܕ̱ܡܰܝܬܳܐ ܠܽܗ̄ܘ ܩܰܒ̥ܪܳܐ، ܘ݄ܚܙܶܐ ܠܶܗ ܘ݄ܡܗܰܝܡܰܢ ܠܶܗ. 9ܡܺܐܝܕ̥ܶܗ ܕܗܶܫ ܠ݄ܐ ܐܕ̥ܥܺܝ ܗ̄ܘܰܘ̱ ܡܰܢ̱ ܟܬ̥ܳܒ̥̈ܶܐ ܕܓ݄ܕܩܳܝ݄ܡ ܡܒܰܝܢ ܗ̄ܰܡّܺܝ̈ܬ̥ܶܐ. 10ܘܰܬّܰܠܡܺܝܕ̥̈ܰܢ݄ܟ ܕܰܥܺܝܪܺܝ ܢܰܩܠܐ ܚܪܶܬܳܐ ܠܺܗ̄ܝ ܕܽܘܟܬ̥ܰܬّ̥ܶܗ.

ܝܶܫܽܘܥ ܟܡ݄ܚܙܶܐ ܠܡܰܪܝܰܡ ܡܰܓ̥ܕܠܰܝܬܳܐ

ܡܪܩܘܣ 16‏:9‏‐11

11ܘܡܰܪܝܰܡ ܗ̄ܺܝ ܡܰܓ̥ܕܠܰܝܬܳܐ ܩܰܝܡܳܐ ܗ̄ܘܰܐ ܓܰܒ ܗ̄ܽܘ ܩܰܒ̥ܪܳܐ ܘܒܳܟ̥ܝܳܐ ܗ̄ܘܰܐ. ܘܗܺܝّܰܗ ܟܒܳܟ̥ܝܳܐ، ܡܰܕ݄ܩ ܠܰܗ ܒܽܗ̄ܘ ܩܰܒ̥ܪܳܐ، 12ܘ݄ܚܙܶܐ ܠܰܗ ܬܪܶܝ ܡܰܠܰܐܟ̥̈ܶܐ ܒܚܶܘܳܪ̈ܶܐ ܝܰܬܺܝܒ̥̈ܶܐ ܒܺܗ̄ܝ ܕܽܘܟܬ̥ܳܐ ܕܟ݄ܬ ܗ̄ܘܰܐ ܗ̄ܽܘ ܦܰܓ̥ܪܳܐ ܕܝܶܫܽܘܥ، ܚܰܕ̱ ܡܶܢ̱ ܓܰܒ ܪܺܝܫܶܗ ܘܚܰܕ̱ ܡܶܢ̱ ܓܰܒ ܪ̈ܰܓ̥ܠܳܬ̥ܶܗ. 13ܘܐܡ݄ܪّܰܗ ܠܰܗ: ”ܐܰܢ̱ܬ̥ܬܳܐ، ܠܡ݄ܢ ܟܳܒܳܟ̥ܝܰܬ؟“ ܗܺܝّܰܗ ܐܡ݄ܪ ܠܰܗ ܠّܶܗ: ”ܡ݄ܕّܶܗ ܗ̄ܽܘ ܡܳܪܰܝܕ̥ܺܝ، ܘܠ݄ܐ ܟ݄ܐܕ̥ܥܳܐ ܐ̱ܢܳܐ ܐܰܝܟܳܐ ܡܰܚ݄ܬّܶܗ.“ 14ܗܰܬ̥ܶܐ ܐܡ݄ܪ ܠܰܗ، ܘܡܰܕܥܰܪ ܠܰܗ ܦܳܬ̥ܰܗ ܘ݄ܚܙܶܐ ܠܰܗ ܝܶܫܽܘܥ ܕܟܰܐܠܶܗ ܟܰܠܝܳܐ، ܘܠܰܐ ܐܕ̥ܺܝܥܳܐ ܕܝܶܫܽܘܥ ܝܳܐ. 15ܐܡ݄ܪ ܠܶܗ ܠܰܗ ܝܶܫܽܘܥ: ”ܐܰܢ̱ܬ̥ܬܳܐ، ܩܰܝ ܟܳܒܳܟ̥ܝܰܬ؟ ܘ݄ܠܡܰܢ ܟ݄ܐܒܥܰܬ؟“ ܗܺܝّܰܗ ܚܫܽܒ̥ ܠܰܗ ܕܟ݄ܬ ܝܳܐ ܗ̄ܽܘ ܓܰܢܳܢܳܐ، ܘܐܡ݄ܪ ܠܰܗ ܠܶܗ: ”ܡܳܪܝ، ܐܶܢ ܗܰܬ ܡ݄ܕ ܠܳܟ̥، ܐܡܰܪ ܠܺܝ ܐܰܝܟܳܐ ܡܰܚ݄ܬ ܠܳܟ̥ ܓܕ݄ܐܙّܺܝ ܡܰܝܕܰܠّܶܗ.“ 16ܐܡ݄ܪ ܠܶܗ ܠܰܗ ܝܶܫܽܘܥ: ”ܡܰܪܝܰܡ!“ ܘܡܰܕܥܰܪ ܠܰܗ ܦܳܬ̥ܰܗ ܘܐܡ݄ܪ ܠܰܗ ܠܶܗ، ܒܽܗ̄ܘ ܥܶܒܪܳܝܳܐ: ”ܪܰܒܽܘܢܺܝ!“ ܕ݄ܟܡ݄ܩܪܶܐ ܡܰܠܦܳܢܳܐ. 17ܘܐܡ݄ܪ ܠܶܗ ܠܰܗ ܝܶܫܽܘܥ: ”ܠܳܐ ܓܰܝܫܰܬ ܐܶܒܺܝ ܥܰܠ ܕܗܶܫ ܠܳܐ ܣܰܠ݄ܩ ܐ̱ܢܳܐ ܓܰܒ ܗ̄ܽܘ ܐܰܒܰܝܕ̥ܺܝ. ܐܶ‌ܠܳܐ ܙܰܟ̥ ܓܰܒ ܗ̄ܰܢ ܐܰܚ̈ܽܘܢܳܢܰܝܕ̥ܺܝ ܘܐܡܰܪّܶܗ: ’ܟܣܳܠܰܩ ܐ̱ܢܳܐ ܓܰܒ ܗ̄ܽܘ ܐܰܒܰܝܕ̥ܺܝ ܘܽܗ̄ܘ ܒܰܒܰܬ̥ܟ̥ܽܘ، ܘܽܗ̄ܘ ܐܰ‌ܠܳܗܰܝܕ̥ܺܝ ܘܽܗ̄ܘ ܐܰ‌ܠܳܗܰܬ̥ܟ̥ܽܘ.‘“ 18ܗ̄ܺܝ ܢܰܩܠܝܳܐ ܐܰܬ̥ܝܳܐ ܡܰܪܝܰܡ ܗ̄ܺܝ ܡܰܓ̥ܕܠܰܝܬܳܐ ܘ݄ܡܣܰܒܰܪ ܠܰܗ ܗ̄ܰܬّܰܠܡܺܝܕ̥̈ܶܐ ܕ݄ܚܙܶܐ ܠܰܗ ܠܡܳܪܰܢ، ܘ݄ܕܐܡ݄ܪ ܠܶܗ ܠܰܗ ܗܰܢܺܝ.

ܝܶܫܽܘܥ ܟܡ݄ܚܙܶܐ ܠܰܬّܰܠܡܺܝܕ̥̈ܰܝܕ̥ܶܗ

ܡܬܝ 28‏:16‏‐20؛ ܡܪܩܘܣ 16‏:14‏‐18؛ ܠܘܩܐ 24‏:36‏‐49

19ܘܒ݄ܓܢܰܝܬܶܗ ܕܽܗ̄ܘ ܝܰܘܡܰܘܳܐ ܕܽܗ̄ܘ ܚܽܕ̱ܒ̥ܫܰܒܳܐ، ܘܰܬّܰܪ̈ܥܶܐ ܣܟ̥ܺܝܪ̈ܶܐ ܒܺܗ̄ܝ ܕܽܘܟܬ̥ܳܐ ܕܟ݄ܬ ܗ̄ܘܰܝܢܶܝ ܗ̄ܰܬّܰܠܡܺܝܕ̥̈ܶܐ ܡܺܗ̄ܝ ܙܽܘܥܬ̥ܳܐ ܕܰܝّܽܘܕ̥̈ܳܝܶܐ، ܐܰܬ̥ܺܝ ܝܶܫܽܘܥ ܘܩܰܝ݄ܡ ܒܰܝܢܳܬ̥ܰܝّܶܗ ܘܐܡ݄ܪ ܠܰܗ ܠّܶܗ: ”ܫܠܳܡܳܐ ܐܰܥܡܰܝܟ̥ܽܘ.“ 20ܐܡ݄ܪ ܠܶܗ ܗܰܬ̥ܶܐ، ܘܡܰܚܘܶܐ ܠܰܗ ܠّܶܗ ܐܺܝܕ̥̈ܳܬ̥ܶܗ ܘܽܗ̄ܘ ܓܰܒܰܝܕ̥ܶܗ؛ ܘ݄ܦܨܺܝܚܺܝ ܗ̄ܰܬّܰܠܡܺܝܕ̥̈ܶܐ ܕ݄ܚܙܰܠّܶܗ ܠܡܳܪܰܢ. 21ܘܕܰܥ݄ܪ ܝܶܫܽܘܥ ܐܡ݄ܪ ܠܰܗ ܠّܶܗ: ”ܫܠܳܡܳܐ ܐܰܥܡܰܝܟ̥ܽܘ! ܐܟ̥ ܕ݄ܡܫܰܕܰܪ ܠܶܗ ܠܺܝ ܗ̄ܽܘ ܐܰܒܰܝܕ̥ܺܝ، ܐܳܢܳܐ ܣܬܶܝ ܟܳܡܫܰܕܰܪܢܰܢܟ̥ܽܘ.“ 22ܘܺܗ̄ܝ ܢܰܩܠܐ ܕܐܡ݄ܪ ܠܶܗ ܗܰܢܺܝ، ܢܦ݄ܚ ܠܶܗ ܐܰܒّܶܗ ܘܐܡ݄ܪ ܠܰܗ ܠّܶܗ: ”ܡܰܩܒܶܠܽܘ ܪܽܘܚܳܐ ܕܩܽܘܕܫܳܐ. 23ܐܶܢ ܫ݄ܒܩܺܝܬܽܘ ܗ̄ܰܚܛܳܗ̈ܶܐ ܕܢܳܫܳܐ ܓܡ݄ܫܒܳܩܺܝ، ܘܶܐܢ ܕܡܰܐܚܕܺܝܬܽܘ ܕܢܳܫܳܐ، ܓܡܺܝܬܰܐܚܕܺܝ.“

ܝܶܫܽܘܥ ܟܡܰܚܘܶܐ ܠܬܳܐܘܡܰܐ ܗ̄ܽܘ ܫܪܳܪܳܐ

24ܘܬܳܐܘܡܰܐ، ܚܰܕ̱ ܡܰܢ̱ ܬܪܰܥܣܰܪ ܬܰܠܡܺܝܕ̥̈ܶܐ، ܕܡܺܝܬܰܘܡܰܪ ܠܶܗ ܬܳܐܘܡܳܐ، ܠܰܝ̱ܬ ܗ̄ܘܰܐ ܬܰܡܳܐ ܐܰܥܡܰܝّܶܗ ܗ̄ܺܝ ܢܰܩܠܐ ܕܰܐܬ̥ܺܝ ܝܶܫܽܘܥ. 25ܘܐܡ݄ܪّܰܗ ܠܶܗ ܗ̄ܰܬّܰܠܡܺܝܕ̥̈ܶܐ: ”ܚܙܶܐ ܠܰܢ ܡܳܪܰܢ.“ ܐܶ‌ܠܳܐ ܗܺܝّܶܗ ܐܡ݄ܪ ܠܰܗ ܠّܶܗ: ”ܐܶܢ ܕܠܳܐ ܚܳܙܶܐ ܐ̱ܢܳܐ ܒܺܐܝܕ̥̈ܳܬ̥ܶܗ ܗ̄ܰܕّܽܘ̈ܟܳܬ̥ܳܐ ܕܰܨّܶܨ̈ܶܐ، ܘܡܰܚ݄ܬ ܐ̱ܢܳܐ ܨܰܒ̥ܥ̈ܳܬ̥ܺܝ ܐܰܒّܶܗ، ܘܒܺܐܝܕ̥ܺܝ ܓܳܝܰܫ ܐ̱ܢܳܐ ܒܽܗ̄ܘ ܓܰܒܰܝܕ̥ܶܗ ܠ݄ܐ ܟ݄ܡܗܰܝܡܰܢ ܐ̱ܢܳܐ.“ 26ܘܒ݄ܬ̥݄ܪ ܬܡܰܢܝܳܐ ܝܰܘܡ̈ܶܐ، ܢܰܩܠܐ ܚܪܶܬܳܐ ܗ̄ܰܬّܰܠܡܺܝܕ̥̈ܶܐ ܠܰܘܓ̥݄ܠ ܗ̄ܘܰܝܢܶܝ ܘܰܐܥܡܰܝّܶܗ ܬܳܐܘܡܰܐ، ܐܰܬ̥ܺܝ ܝܶܫܽܘܥ، ܘܰܬّܰܪ̈ܥܶܐ ܣܟ̥ܺܝܪ̈ܶܐ، ܘܩܰܝ݄ܡ ܒܽܗ̄ܘ ܦܰܠܓܳܐ ܘܐܡ݄ܪ ܠܰܗ ܠّܶܗ: ”ܫܠܳܡܳܐ ܐܰܥܡܰܝܟ̥ܽܘ!“ 27ܘܗܺܝّܶܗ ܐܡ݄ܪ ܠܶܗ ܠܬܳܐܘܡܰܐ: ”ܡܰܝܬܰܝ ܨܰܒ̥ܥܳܟ̥ ܠܰܗ̄ܪܟܶܐ، ܘ݄ܚܙܰܝ ܐܺܝܕ̥̈ܳܬ̥ܺܝ، ܘܡܰܝܬܰܝ ܐܺܝܕ̥ܳܟ̥ ܘܓܘܿܫ ܒܓܰܒܺܝ، ܘܠܳܐ ܗ̄ܘܰܬ ܠܳܐ ܡܗܰܝܡܢܳܐ ܐܶ‌ܠܳܐ ܡܗܰܝܡܢܳܐ.“ 28ܡܰܕܥܰܪ ܠܶܗ ܬܳܐܘܡܰܐ ܘܐܡ݄ܪ ܠܶܗ ܠܶܗ: ”ܗ̄ܽܘ ܡܳܪܰܝܕ̥ܺܝ ܘܰܐ‌ܠܳܗܰܝܕ̥ܺܝ!“ 29ܐܡ݄ܪ ܠܶܗ ܝܶܫܽܘܥ: ”ܐܳܥܕܳܐ ܕ݄ܚܙܶܐ ܠܳܟ̥ ܠܺܝ ܡܗܰܝܡܰܢ ܠܳܟ̥. ܛܽܘܒܳܐ ܠܰܐܝܢܰܐ ܕܠܳܐ ܚܙܰܠّܰܗ ܠܺܝ ܘ݄ܡܗܰܝܡܰܢّܶܗ.“

ܗ̄ܽܘ ܢܺܝܫܳܐ ܕܽܗ̄ܘ ܟܬ̥ܳܒ̥ܳܐ

30ܘܓ̥ܰܠܰܒܶܐ ܐܳܬ̥ܘ̈ܳܬ̥ܳܐ ܚܪ̈ܶܢܶܐ ܣ݄ܡ ܠܶܗ ܝܶܫܽܘܥ ܩ݄ܕ̱ܡ ܗ̄ܰܬّܰܠܡܺܝܕ̥̈ܰܝܕ̥ܶܗ ܕܠܰܝ̱ܬ ܢܶܝ ܟܬ̥ܺܝܒ̥̈ܶܐ ܒܽܗ̄ܘ ܟܬ̥ܳܒ̥ܰܢܳܐ. 31ܘܗܰܢܺܝ ܣܬܶܝ ܕ݄ܟܬ̥ܺܝܒ̥ܺܝ ܠܰܫܰܢ ܕ݄ܡܗܰܝܡܢܺܝܬܽܘ ܕܝܶܫܽܘܥ ܝܳܐ ܡܫܺܝܚܳܐ، ܗ̄ܽܘ ܐܰܒܪܳܐ ܕܰܐ‌ܠܳܗܳܐ، ܘܡ݄ܐ ܕ݄ܡܗܰܝܡܰܢܟ̥ܽܘ ܓܕܳܗ̄ܘܰܠܟ̥ܽܘ ܒ݄ܐܫܡܶܗ ܚܰܝ̈ܶܐ ܕ݄ܠܥܳܠܰܡ.

Currently Selected:

ܡܓܰܠܝܘܢ ܕܝܘܚܢܢ 20: ܟܬܒܐ

Highlight

Copy