ܡܓܰܠܝܘܢ ܕܝܘܚܢܢ 18

ܗ̄ܽܘ ܨܠܳܒ̥ܳܐ ܘܺܗ̄ܝ ܩܝܰܡܬܳܐ ܕܝܶܫܽܘܥ

ܗ̄ܽܘ ܨܝܳܕܳܐ ܕܝܶܫܽܘܥ

ܡܬܝ 26‏:47‏‐56؛ ܡܪܩܘܣ 14‏:43‏‐50؛ ܠܘܩܐ 22‏:47‏‐53

1ܗܰܢܺܝ ܐܡ݄ܪ ܠܶܗ ܝܶܫܽܘܥ ܘܢܰܦ݄ܩ ܥܰܡ ܗ̄ܰܬّܰܠܡܺܝܕ̥̈ܰܝܕ̥ܶܗ ܠܽܗ̄ܘ ܓܰܒܳܐ ܚܪܶܢܳܐ ܕܽܗ̄ܘ ܫܰܠܒ̥ܳܐ ܕܩܶܕܪܽܘܢ، ܐܰܝܟܳܐ ܕܟ݄ܬ ܗ̄ܘܰܐ ܓܰܢܬ̥ܳܐ، ܘܬܰܡܳܐ ܥܰܒ݄ܪ ܗܺܝّܶܗ ܘܰܬّܰܠܡܺܝܕ̥̈ܰܝܕ̥ܶܗ. 2ܘܺܝܗܽܘܕ̥ܳܐ ܗ̄ܽܘ ܡܰܫ݄ܠܡܳܢܳܐ ܐܳܕ̥ܰܥ ܗ̄ܘܰܐ ܗ̄ܺܝ ܕܽܘܟܬ̥ܰܝܳܐ، ܡܺܐܝܕ̥ܶܗ ܕܓ̥ܰܠܰܒܶܐ ܟܳܪ̈ܶܐ ܝܶܫܽܘܥ ܠܳܬܰܡ ܗ̄ܘܰܐ ܬܰܡܳܐ ܥܰܡ ܗ̄ܰܬّܰܠܡܺܝܕ̥̈ܰܝܕ̥ܶܗ. 3ܘܗܺܝّܶܗ ܝܺܗܽܘܕ̥ܳܐ ܡ݄ܕ ܠܶܗ ܟ̥ܢܽܘܫܬܳܐ ܡܰܢ̱ ܪّܽܘܡܳܝ̈ܶܐ، ܘܡܶܢ̱ ܓܰܒ ܗ̄ܰܪّܰܒ̈ܶܐ ܕܰܟّܳܗ̈ܢܶܐ ܘܕܰܦܪ̈ܺܝܫܶܐ ܡ݄ܕ ܠܶܗ ܕ̈ܰܚܫܶܐ، ܘܰܐܬ̥ܺܝ ܠܬܰܡܳܐ ܘܰܐܥܡܰܝّܶܗ ܢܰܦܛܺܪ̈ܶܐ (ܫܰܡܥ̈ܶܐ ܡܽܗ̄ܘ ܢܰܦܛܳܐ) ܘܠܰܡܦܺܝܕ̈ܶܐ ܘܙܰܝܢܳܐ. 4ܘܝܶܫܽܘܥ ܕܳܐܕ̥ܰܥ ܗ̄ܘܰܐ ܟܽܘܠ ܡܶܕܶܐ ܕ݄ܓܕܳܐܬ̥ܶܐ ܐܰܥܠܶܗ، ܢܰܦ݄ܩ ܘܐܡ݄ܪ ܠܰܗ ܠّܶܗ: ”ܠܡܰܢ ܟ݄ܐܒܥܺܝܬܽܘ؟“ 5ܐܡ݄ܪّܰܗ ܠܶܗ: ”ܠܝܶܫܽܘܥ، ܗ̄ܽܘ ܢܳܨܪܳܝܳܐ.“ ܐܡ݄ܪ ܠܰܗ ܠّܶܗ ܝܶܫܽܘܥ: ”ܐܳܢܳܐ ܐ̱ܢܳܐ.“ ܘܺܝܗܽܘܕ̥ܳܐ ܣܬܶܝ، ܗ̄ܽܘ ܡܰܫ݄ܠܡܳܢܳܐ، ܟܰܠܝܳܐ ܗ̄ܘܰܐ ܐܰܥܡܰܝّܶܗ. 6ܘܺܗ̄ܝ ܢܰܩܠܐ ܕܐܡ݄ܪ ܠܰܗ ܠّܶܗ ܝܶܫܽܘܥ: ”ܐܳܢܳܐ ܐ̱ܢܳܐ“، ܕܰܥܺܝܪܺܝ ܠܒ݄ܬ̥ܪܰܝّܶܗ ܘܢܰܦܺܝܠܺܝ ܥܰܠ ܗ̄ܺܝ ܐܰܪܥܳܐ. 7ܘܕܰܥ݄ܪ ܡܫܰܐܺܠܺܝ ܠܶܗ ܝܶܫܽܘܥ: ”ܠܡܰܢ ܟ݄ܐܒܥܺܝܬܽܘ؟“ ܘܗ݄ܢّܶܝ ܐܡ݄ܪّܶܗ: ”ܝܶܫܽܘܥ، ܗ̄ܽܘ ܢܳܨܪܳܝܳܐ.“ 8ܘܐܡ݄ܪ ܠܰܗ ܠّܶܗ ܝܶܫܽܘܥ: ”ܐܡ݄ܪ ܠܺܝ ܠܟ̥ܽܘ ܕܳܐܢܳܐ ܐ̱ܢܳܐ، ܘܶܐܢ ܐܶ‌ܠܺܝ ܟ݄ܐܒܥܺܝܬܽܘ ܛܪܰܝܽܘ ܗܰܢܺܝ ܕ݄ܐܙّ݄ܢ.“ 9ܕܟܳܡ݄ܠ ܗ̄ܽܘ ܡܰܐܡܪܳܐ ܕܐܡ݄ܪ ܠܶܗ: ”ܗܰܢܺܝ ܕܗܽܒ̥ ܠܳܟ̥ ܠܺܝ ܠܳܐ ܡܣܰܟܰܪ ܠܺܝ ܘܠܳܐ ܚܰܕ̱ ܡ݄ܢّܶܗ.“ 10ܘܟ݄ܬ ܗ̄ܘܰܐ ܥܰܡ ܫܶܡܥܽܘܢ ܟܶܐܦܳܐ ܣܰܝܦܳܐ، ܘ݄ܫܡ݄ܛ ܠܶܗ ܘ݄ܡܚܶܐ ܠܶܗ ܠܽܗ̄ܘ ܓܪܶܝܥܳܐ ܕܽܗ̄ܘ ܪܰܒܳܐ ܕܰܟّܳܗ̈ܢܶܐ ܘ݄ܩܛ݄ܥ ܠܶܗ ܐܰܕ̥ܢܶܗ ܕܽܗ̄ܘ ܝܰܡܺܝܢܳܐ. ܐ݄ܫܡܶܗ ܕܽܗ̄ܘ ܓܪܶܝܥܳܐ ܡܳܠܶܟ̥ ܗ̄ܘܰܐ. 11ܘܝܶܫܽܘܥ ܐܡ݄ܪ ܠܶܗ ܠܟܶܐܦܳܐ: ”ܡܰܚ݄ܬ ܗ̄ܽܘ ܣܰܝܦܳܐ ܒܕܽܘܟܬ̥ܶܗ! ܗ̄ܽܘ ܟܳܣܳܐ ܕܗܽܒ̥ ܠܶܗ ܠܺܝ ܗ̄ܽܘ ܐܰܒܰܝܕ̥ܺܝ ܠ݄ܐ ܟܫܳܬܶܢܶܗ؟“

ܝܶܫܽܘܥ ܟܩܳܝ݄ܡ ܩ݄ܕ̱ܡ ܗ̄ܽܘ ܪܰܒܳܐ ܕܰܟّܳܗ̈ܢܶܐ

ܡܬܝ 26‏:57‏‐58؛ ܡܪܩܘܣ 14‏:53‏‐54؛ ܠܘܩܐ 22‏:54

12ܗ̄ܺܝ ܢܰܩܠܝܳܐ ܗ̄ܰܪّܽܘܡܳܝ̈ܶܐ ܘܰܪّܺܝܫܳܢ̈ܶܐ ܘܰܕّܰܚܫ̈ܶܐ ܕܰܝّܽܘܕ̥̈ܳܝܶܐ ܙܒ݄ܛّܶܗ ܝܶܫܽܘܥ ܘܡܰܐܣ݄ܪّܶܗ، 13ܘܡܰܝܬܰܠّܶܗ ܒܺܗ̄ܝ ܩܰܕ̱ܡܰܝܬܳܐ ܠܓܰܒ ܚܰܢܳܢ ܡܺܐܝܕ̥ܶܗ ܕܟ݄ܬ ܗ̄ܘܰܐ ܗ̄ܽܘ ܚܶܡܝܳܢܳܐ ܕܩܰܝܳܦܳܐ، ܗܰܘܳܐ ܕܟ݄ܬ ܗ̄ܘܰܐ ܗ̄ܽܘ ܪܰܒܳܐ ܕܰܟّܳܗ̈ܢܶܐ ܕܺܗ̄ܝ ܫܰܢ̱ܬܰܝܳܐ. 14ܘܩܰܝܳܦܳܐ ܗ̄ܘܰܐ ܕܐܡ݄ܪ ܠܶܗ ܠܰܝّܽܘܕ̥̈ܳܝܶܐ ܕܛܰܒ̥ ܝܳܐ ܕܚܰܕ̱ ܓܰܒ̥ܪܳܐ ܕܡܳܝ݄ܬ̥ ܡܶܢ̱ ܚܠܳܦ ܕܽܗ̄ܘ ܥܰܡܳܐ.

ܗ̄ܽܘ ܟܦܳܪܳܐ ܕܫܶܡܥܽܘܢ ܟܶܐܦܳܐ

ܡܬܝ 26‏:69‏‐70؛ ܡܪܩܘܣ 14‏:66‏‐68؛ ܠܘܩܐ 22‏:55‏‐57

15ܘܫܶܡܥܽܘܢ ܟܶܐܦܳܐ ܘܚܰܕ̱ ܚܪܶܢܳܐ ܡܰܢ̱ ܬّܰܠܡܺܝܕ̥̈ܶܐ ܐܳܬ̥݄ܢ ܗ̄ܘܰܘ̱ ܒ݄ܬ̥ܪܶܗ ܕܝܶܫܽܘܥ. ܘܽܗ̄ܘ ܪܰܒܳܐ ܕܰܟّܳܗ̈ܢܶܐ ܐܳܕ̥ܰܥ ܗ̄ܘܰܐ ܠܽܗ̄ܘ ܬܰܠܡܺܝܕ̥ܰܘܳܐ، ܘܥܰܒ݄ܪ ܥܰܡ ܝܶܫܽܘܥ ܠܺܗ̄ܝ ܕܳܪܬܳܐ. 16ܘܫܶܡܥܽܘܢ ܩܳܝܰܡ ܗ̄ܘܰܐ ܠܰܪܒ̥ܰܠ، ܓܰܒ ܗ̄ܽܘ ܬܰܪܥܳܐ. ܘܢܰܦ݄ܩ ܗ̄ܽܘ ܬܰܠܡܺܝܕ̥ܳܐ ܚܪܶܢܳܐ ܗܰܘܳܐ ܕܳܐܕ̥ܰܥ ܗ̄ܘܰܝ ܠܶܗ ܗ̄ܽܘ ܪܰܒܳܐ ܕܰܟّܳܗ̈ܢܶܐ ܘ݄ܫܓ̥ܺܝܠ ܥܰܡ ܗ̄ܺܝ ܢܳܛܽܘܪܬܳܐ ܕܽܗ̄ܘ ܬܰܪܥܳܐ، ܘܡܰܥܒܰܪ ܠܶܗ ܫܶܡܥܽܘܢ. 17ܘܺܗ̄ܝ ܥܠܰܝܡܬܳܐ، ܗ̄ܺܝ ܢܳܛܽܘܪܬܳܐ ܕܽܗ̄ܘ ܬܰܪܥܳܐ ܐܡ݄ܪ ܠܰܗ ܠܫܶܡܥܽܘܢ: ”ܩܰܝ ܠܳܐ ܗܰܬ ܣܬܶܝ ܚܰܕ̱ ܡܰܢ̱ ܬّܰܠܡܺܝܕ̥̈ܶܐ ܕܽܗ̄ܘ ܓܰܒ̥ܪܰܢܳܐ ܗܰܬ؟“ ܐܡ݄ܪ ܠܶܗ ܠܰܗ: ”ܠܳܐ.“ 18ܘܰܥّܰܒܕ̈ܶܐ ܘܰܕّܰܚܫ̈ܶܐ ܕܩܰܝܡܺܝ ܗ̄ܘܰܘ̱ ܣ݄ܡّܶܗ ܢܽܘܪܳܐ ܕܡܰܫܚܢܺܝ ܪܽܘܚܰܝّܶܗ ܥܰܠ ܕܟ݄ܬ ܗ̄ܘܰܐ ܓ̥ܰܠܰܒܶܐ ܩܽܘܪܳܐ. ܘܫܶܡܥܽܘܢ ܣܬܶܝ ܩܳܝܰܡ ܗ̄ܘܰܐ ܐܰܥܡܰܝّܶܗ ܘܡܰܫܚܰܢ ܗ̄ܘܰܐ ܪܽܘܚܶܗ.

ܝܶܫܽܘܥ ܟܡܺܝܕ݄ܢ ܡܽܗ̄ܘ ܪܰܒܳܐ ܕܰܟّܳܗ̈ܢܶܐ

ܡܬܝ 26‏:59‏‐66؛ ܡܪܩܘܣ 14‏:55‏‐64؛ ܠܘܩܐ 22‏:66‏‐71

19ܘܽܗ̄ܘ ܪܰܒܳܐ ܕܰܟّܳܗ̈ܢܶܐ ܡܫܰܐܶܠ ܠܶܗ ܝܶܫܽܘܥ ܥܰܠ ܗ̄ܰܬّܰܠܡܺܝܕ̥̈ܰܝܕ̥ܶܗ ܘܥܰܠ ܗ̄ܽܘ ܝܽܘܠܦܳܢܰܝܕ̥ܶܗ. 20ܘܐܡ݄ܪ ܠܶܗ ܠܶܗ ܝܶܫܽܘܥ: ”ܐܳܢܳܐ، ܦܳܬ̥ܳܐ ܒܺܗ̄ܝ ܦܳܬ̥ܳܐ، ܡ݄ܫܓ̥ܶܠ ܠܺܝ ܥܰܡ ܗ̄ܽܘ ܥܰܡܳܐ، ܘܽܗ̄ܘ ܙܰܒܢܳܐ ܟܽܘܠܶܗ ܡܰܘܠܰܦ ܠܺܝ ܒܰܟܢܽܘܫ̈ܳܬ̥ܳܐ ܘܒܽܗ̄ܘ ܗܰܝܟܠܳܐ ܕܰܐܒّܶܗ ܟܠ݄ܬܡܺܝ ܗ̄ܰܝّܽܘܕ̥̈ܳܝܶܐ، ܘܡܶܕܶܐ ܒܽܗ̄ܘ ܐ̱ܪܳܙܳܐ ܠܳܐ ܡ݄ܫܓ̥ܶܠ ܠܺܝ. 21ܩܰܝ ܐܶ‌ܠܺܝ ܟ݄ܡܫܰܐܶܠܰܬ؟ ܡܫܰܐܺܠ ܠܰܗ̄ܢ݄ܟ ܕܫܰܡܺܝܥܺܝ ܡ݄ܢ ܡ݄ܫܓ̥ܶܠ ܠܺܝ ܐܰܥܡܰܝّܶܗ، ܟܰܐܠܶܗ ܗ݄ܢّܶܝ ܟ݄ܐܕ̥ܥܺܝ ܟܽܘܠ ܡܶܕܶܐ ܕܐܡ݄ܪ ܠܺܝ.“ 22ܘܺܗ̄ܝ ܢܰܩܠܐ ܕܐܡ݄ܪ ܠܶܗ ܗܰܢܺܝ، ܚܰܕ̱ ܡܰܢ̱ ܕّܰܚܫ̈ܶܐ ܕܟ݄ܬ ܗ̄ܘܰܐ ܟܰܠܝܳܐ ܬܰܡܳܐ ܡܚܶܐ ܠܶܗ ܫܰܩܡܳܐ ܠܝܶܫܽܘܥ ܘܐܡ݄ܪ ܠܶܗ ܠܶܗ: ”ܗܰܘܟ̥ܰܐ ܟܳܡܰܕܥܪܰܬ ܥܰܠ ܗ̄ܽܘ ܪܰܒܳܐ ܕܰܟّܳܗ̈ܢܶܐ؟“ 23ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܶܗ ܠܶܗ: ”ܐܶܢ ܚܰܪܒܳܐ ܡ݄ܫܓ̥ܶܠ ܠܺܝ، ܣܗܰܕ (ܘܐܡܰܪ) ܥܰܠ ܗ̄ܽܘ ܡܶܕܶܐ ܚܰܪܒܳܐ، ܘܶܐܢ ܛܳܒ̥ܳܐ ܩܰܝ ܡܚܶܐ ܠܳܟ̥ ܠܺܝ؟“

24ܘܒ݄ܬ̥݄ܪ، ܚܰܢܳܢ ܡܫܰܕܰܪ ܠܶܗ ܠܝܶܫܽܘܥ ܡܰܐܣܪܳܐ ܠܓܰܒ ܩܰܝܳܦܳܐ ܗ̄ܽܘ ܪܰܒܳܐ ܕܰܟّܳܗ̈ܢܶܐ.

ܫܶܡܥܽܘܢ ܟܟܳܦ݄ܪ ܬܰܪܬܶܝ ܟܳܪ̈ܶܐ

ܡܬܝ 26‏:17‏‐75؛ ܡܪܩܘܣ 14‏:69‏‐72؛ ܠܘܩܐ 22‏:58‏‐62

25ܘܫܶܡܥܽܘܢ ܟܶܐܦܳܐ ܩܳܝܰܡ ܗ̄ܘܰܐ ܘܡܰܫܚܰܢ ܗ̄ܘܰܐ ܪܽܘܚܶܗ. ܘܐܡ݄ܪّܰܗ ܠܶܗ: ”ܩܰܝ ܠܳܐ ܗܰܬ ܣܬܶܝ ܚܰܕ̱ ܡܰܢ̱ ܬّܰܠܡܺܝܕ̥̈ܰܝܕ̥ܶܗ ܗܰܬ؟“ ܘܗܺܝّܶܗ ܟܰܦ݄ܪ ܘܐܡ݄ܪ ܠܶܗ: ”ܠܳܐ ܠܰܝ̱ܬ ܐ̱ܢܳܐ.“ 26ܘܚܰܕ̱ ܡܰܢ̱ ܥّܰܒܕ̈ܶܐ ܕܽܗ̄ܘ ܪܰܒܳܐ ܕܰܟّܳܗ̈ܢܶܐ، ܩܰܪܺܝܒ̥ܳܐ ܠܰܗ̄ܘܳܐ ܕ݄ܩܛ݄ܥ ܠܶܗ ܫܶܡܥܽܘܢ ܐܰܕ̥ܢܶܗ، ܐܡ݄ܪ ܠܶܗ ܠܶܗ: ”ܠܳܐ ܐܳܢܳܐ ܚܙܶܐ ܠܺܝ ܠܳܟ̥ ܐܰܥܡܶܗ ܒܺܗ̄ܝ ܓܰܢܬ̥ܳܐ؟“ 27ܘܢܰܩܠܐ ܚܪܶܬܳܐ ܟܰܦ݄ܪ ܫܶܡܥܽܘܢ. ܘܒܺܗ̄ܝ ܫܳܥܬ̥ܰܝܕ̥ܰܗ، ܩܪܶܐ ܠܶܗ ܗ̄ܽܘ ܙܳܓ̥ܳܐ.

ܝܶܫܽܘܥ ܟܩܳܝ݄ܡ ܩ݄ܕ̱ܡ ܦܺܝܠܰܛܳܘܣ ܗ̄ܽܘ ܫܰܠܺܝܛܳܐ

ܡܬܝ 27‏:1‏‐2؛ 27‏:11‏‐14؛ ܡܪܩܘܣ 15‏:1‏‐15؛ ܠܘܩܐ 23‏:1‏‐5

28ܘܡܶܢ̱ ܓܰܒ ܩܰܝܳܦܳܐ، ܡܰܝܬܰܠّܶܗ ܝܶܫܽܘܥ ܠܽܗ̄ܘ ܩܽܘܨܪܳܐ ܕܽܗ̄ܘ ܫܰܠܺܝܛܳܐ. ܘܗܶܫ ܨܰܦܪܰܝܬܳܐ ܗ̄ܘܰܐ، ܘܗ݄ܢّܶܝ (ܗ̄ܰܝّܽܘܕ̥̈ܳܝܶܐ) ܠܳܐ ܥܰܒܺܝܪܺܝ ܠܽܗ̄ܘ ܩܽܘܨܪܳܐ ܠܰܫܰܢ ܕܠܳܐ ܡܛܰܘܫܺܝ ܪܽܘܚܰܝّܶܗ ܡܶܩ݄ܕ̱ܡ ܕܳܐܟ̥ܠܺܝ ܗ̄ܽܘ ܦܶܨܚܳܐ. 29ܘܢܰܦ݄ܩ ܦܺܝܠܰܛܳܘܣ ܠܰܪܒ̥ܰܠ ܓܰܒܰܝّܶܗ ܘܐܡ݄ܪ ܠܰܗ ܠّܶܗ: ”ܡ݄ܢ ܟܳܡܰܫܟܺܝܬܽܘ ܥܰܠ ܗ̄ܽܘ ܓܰܒ̥ܪܰܢܳܐ؟“ 30ܡܰܕܥܰܪّܶܗ ܘܐܡ݄ܪّܰܗ ܠܶܗ: ”ܕܠܳܐ ܣܳܝܰܡ ܗ̄ܘܰܐ ܚܰܪܒܳܐ ܠ݄ܐ ܟܡܰܫܠܡܺܝ ܗ̄ܘܰܝܢܰܐ ܠܶܗ ܐܶ‌ܠܳܟ̥.“ 31ܦܺܝܠܰܛܳܘܣ ܐܡ݄ܪ ܠܰܗ ܠّܶܗ: ”ܡܽܘܕܽܘ ܠܶܗ ܗܰܬܽܘ، ܘܣܽܘܡܽܘ ܠܶܗ ܕܺܝܢܳܐ ܐܟ̥ ܕܽܗ̄ܘ ܢܳܡܽܘܣܰܬ̥ܟ̥ܽܘ.“ ܐܡ݄ܪّܰܗ ܠܶܗ ܗ̄ܰܝّܽܘܕ̥̈ܳܝܶܐ: ”ܐܰܚܢܰܐ ܠܰܝ̱ܬ ܠܰܢ ܫܽܘܠܛܳܢܳܐ ܕܩܳܛܠܺܝܢܰܐ ܢܳܫܳܐ.“ 32ܠܰܫܰܢ ܕܟܳܡ݄ܠ ܗ̄ܽܘ ܡܰܐܡܪܳܐ ܕܐܡ݄ܪ ܠܶܗ ܝܶܫܽܘܥ ܘܗܺܝّܶܗ ܟܡܰܚܘܶܐ ܒܰܐܝܢܰܐ ܡܰܘܬܳܐ ܓ݄ܕܡܳܝ݄ܬ̥. 33ܘܥܰܒ݄ܪ ܦܺܝܠܰܛܳܘܣ ܠܽܗ̄ܘ ܩܽܘܨܪܳܐ ܘ݄ܩܪܶܐ ܠܶܗ ܝܶܫܽܘܥ ܘܐܡ݄ܪ ܠܶܗ ܠܶܗ: ”ܗܰܬ ܗ̄ܰܬ ܗ̄ܽܘ ܡܰܠܟܳܐ ܕܰܝّܽܘܕ̥̈ܳܝܶܐ؟“ 34ܘܝܶܫܽܘܥ ܐܡ݄ܪ ܠܶܗ ܠܶܗ: ”ܡܶܢ̱ ܩ݄ܕ̱ܡ ܪܽܘܚܳܟ̥ ܐܡ݄ܪ ܠܳܟ̥ ܗܰܬ̥ܶܐ ܐܰܘ ܚܪ̈ܶܢܶܐ ܐܡ݄ܪّܰܗ ܠܳܟ̥ ܐܰܥܠܺܝ؟“ 35ܦܺܝܠܰܛܳܘܣ ܐܡ݄ܪ ܠܶܗ ܠܶܗ: ”ܩܰܝ ܐܳܢܳܐ ܝܽܘܕ̥ܳܝܳܐ ܐ̱ܢܳܐ؟ ܗ̄ܰܢ ܐܰܒܢ̈ܶܐ ܕܽܗ̄ܘ ܥܰܡܰܝܕ̥ܳܟ̥ ܝܳܐ ܘܰܪّܰܒ̈ܶܐ ܕܰܟّܳܗ̈ܢܶܐ ܕܡܰܫܠܰܡّܰܗ ܠܳܟ̥ ܐܶ‌ܠܺܝ. ܡ݄ܢ ܣ݄ܡ ܠܳܟ̥؟“ 36ܐܡ݄ܪ ܠܶܗ ܠܶܗ ܝܶܫܽܘܥ: ”ܗ̄ܺܝ ܡܰܠܟܽܘܬ̥ܰܝܕ̥ܺܝ ܠܰܝ̱ܬ ܝܳܐ ܡܽܗ̄ܘ ܥܳܠܡܰܢܳܐ. ܘܕܳܗ̄ܘܝܳܐ ܗ̄ܘܰܐ ܗ̄ܺܝ ܡܰܠܟܽܘܬ̥ܰܝܕ̥ܺܝ ܡܽܗ̄ܘ ܥܳܠܡܰܢܳܐ، ܗ̄ܰܡܫܰܡܫܳܢ̈ܰܝܕ̥ܺܝ ܡܚܰܪܒܺܝ ܗ̄ܘܰܘ̱ ܕܠܳܐ ܡܺܝܫܰܠܰܡ ܐ̱ܢܳܐ ܠܰܝّܽܘܕ̥̈ܳܝܶܐ. ܘܳܐܥܕܳܐ، ܗ̄ܺܝ ܡܰܠܟܽܘܬ̥ܰܝܕ̥ܺܝ ܠܰܝ̱ܬ ܝܳܐ ܡܰܗ̄ܪܟܶܐ.“ 37ܦܺܝܠܰܛܳܘܣ ܐܡ݄ܪ ܠܶܗ ܠܶܗ: ”ܗܰܢ ܢܰܩܠܐ، ܡܰܠܟܳܐ ܗܰܬ؟“ ܐܡ݄ܪ ܠܶܗ ܠܶܗ ܝܶܫܽܘܥ: ”ܗܰܬ ܐܡ݄ܪ ܠܳܟ̥ ܕܟ݄ܬ ܐ̱ܢܳܐ ܡܰܠܟܳܐ. ܐܳܢܳܐ ܠܰܫܰܢ ܗܰܬ̥ܶܐ ܗܰܘܺܝ ܐ̱ܢܳܐ، ܘܠܰܗ̄ܬ̥ܶܐ ܐܰܬ̥ܺܝ ܐ̱ܢܳܐ ܠܽܗ̄ܘ ܥܳܠܡܳܐ، ܠܰܫܰܢ ܕܣܳܗܰܕ ܐ̱ܢܳܐ ܥܰܠ ܗ̄ܽܘ ܫܪܳܪܳܐ. ܟܽܘܠ ܡܰܢ ܕܟ݄ܬ ܝܳܐ ܡܽܗ̄ܘ ܫܪܳܪܳܐ ܟܫܳܡ݄ܥ ܩܳܠܺܝ.“

ܝܶܫܽܘܥ ܟܡܺܝܕ݄ܢ ܒܽܗ̄ܘ ܡܰܘܬܳܐ

38ܦܺܝܠܰܛܳܘܣ ܐܡ݄ܪ ܠܶܗ ܠܶܗ: ”ܡ݄ܢܝܳܐ ܗ̄ܽܘ ܫܪܳܪܳܐ؟“ ܘܺܗ̄ܝ ܢܰܩܠܐ ܕܐܡ݄ܪ ܠܶܗ ܗܰܬ̥ܶܐ، ܕܰܥ݄ܪ ܢܰܦ݄ܩ ܠܰܪܒ̥ܰܠ ܓܰܒ ܗ̄ܰܝّܽܘܕ̥̈ܳܝܶܐ ܘܐܡ݄ܪ ܠܰܗ ܠّܶܗ: ”ܐܳܢܳܐ، ܘܠܳܐ ܥܶܠܬ̥ܳܐ ܚܕ̥ܳܐ ܟܺܝܒܺܝ ܚܳܙܶܐ ܐ̱ܢܳܐ ܐܶܒܶܗ. 39ܟ݄ܬܟ̥ܽܘ ܥܝܳܕ̥ܳܐ ܕܚܰܕ̱ ܟܡܰܪܦܶܐ ܐ̱ܢܳܐ ܠܟ̥ܽܘ ܒܽܗ̄ܘ (ܥܶܐܕ̥ܳܐ ܕܽܗ̄ܘ) ܦܶܨܚܳܐ. ܟ݄ܐܒܥܺܝܬܽܘ ܕܡܰܪܦܶܐ ܐ̱ܢܳܐ ܠܟ̥ܽܘ ܠܰܗ̄ܢܳܐ، ܗ̄ܽܘ ܡܰܠܟܳܐ ܕܰܝّܽܘܕ̥̈ܳܝܶܐ؟“ 40ܘܟܽܘܠّܶܗ ܡܰܙܥܰܩّܶܗ ܘܐܡ݄ܪّܶܗ: ”ܠܳܐ ܡܰܪܦܰܬ ܠܰܗ̄ܢܳܐ، ܐܶ‌ܠܳܐ ܠܒܰܪ ܐܰܒܰܐ.“ ܘܒܰܪ ܐܰܒܰܐ، ܗܰܢܳܐ، ܡܰܫ݄ܠܚܳܢܳܐ ܗ̄ܘܰܐ.

Currently Selected:

ܡܓܰܠܝܘܢ ܕܝܘܚܢܢ 18: ܟܬܒܐ

Highlight

Copy