ܡܓܰܠܝܘܢ ܕܝܘܚܢܢ 15

ܝܶܫܽܘܥ ܝܳܐ ܗ̄ܺܝ ܣܰܬܳܐ ܕܽܗ̄ܘ ܫܪܳܪܳܐ

1”ܐܳܢܳܐ ܐ̱ܢܳܐ ܗ̄ܺܝ ܣܰܬܳܐ ܕܽܗ̄ܘ ܫܪܳܪܳܐ ܘܽܗ̄ܘ ܐܰܒܰܝܕ̥ܺܝ ܗ̄ܽܘ ܦܰܠܳܚܳܐ ܝܳܐ. 2ܟܽܘܠ ܟܰܪܣܒ̥ܳܢܳܐ ܕܶܐܒܺܝ ܕܠ݄ܐ ܟܳܗ̄ܒܶܐ ܦܺܐܪ̈ܶܐ ܟܩܳܛܰܥ ܠܶܗ، ܘܰܐܝܢܰܐ ܕܟܳܗ̄ܒܶܐ ܦܺܐܪ̈ܶܐ ܟܟܳܣܰܚ ܠܶܗ ܠܰܫܰܢ ܕܳܗ̄ܒܶܐ ܦܺܐܪ̈ܶܐ ܓ̥ܰܠܰܒܶܐ. 3ܡܳܐܥܕܳܐ ܗܰܬܽܘ ܟܣܺܝܚ̈ܶܐ (ܕܰܟ̥ܝ̈ܶܐ) ܗܰܬܽܘ ܡܽܗ̄ܘ ܡܰܐܡܪܳܐ ܕܐܡ݄ܪ ܠܺܝ. 4ܦܽܘܫܽܘ ܐܶܒܺܝ ܘܳܐܢܳܐ ܐܰܒܟ̥ܽܘ. ܒܶܗ ܐܰܝܕܰܪܒܳܐ ܗ̄ܽܘ ܟܰܪܣܒ̥ܳܢܳܐ ܠܰܝܒܶܗ ܗ̄ܳܒܶܐ ܦܺܐܪ̈ܶܐ ܡܶܢ̱ ܪܽܘܚܶܗ ܕܠܳܐ ܦܳܝ݄ܫ ܒܺܗ̄ܝ ܣܰܬܳܐ، ܗܰܘܟ̥ܰܐ ܣܬܶܝ ܗܰܬܽܘ ܕܠܳܐ ܦܰܝܫܺܝܬܽܘ ܐܶܒܺܝ. 5ܐܳܢܳܐ ܐ̱ܢܳܐ ܗ̄ܺܝ ܣܰܬܳܐ ܘܗܰܬܽܘ ܗ̄ܰܟّܰܪ̈ܣܒ̥ܳܢ̈ܶܐ، ܡܰܢ ܕܦܳܝ݄ܫ ܐܶܒܺܝ ܘܳܐܢܳܐ ܐܶܒܶܗ، ܗܰܢܳܐ ܟܳܗ̄ܒܶܐ ܦܺܐܪ̈ܶܐ ܓ̥ܰܠܰܒܶܐ، ܥܰܠ ܕܠܳܐ ܡܶܢܺܝ ܠܰܒܟ̥ܽܘ ܣܰܝܡܺܝܬܽܘ ܡܶܕܶܐ. 6ܘܢܳܫܳܐ ܕܠ݄ܐ ܟܦܳܝ݄ܫ ܐܶܒܺܝ ܟܡܺܝܚܰܠ݄ܩ ܠܰܪܒ̥ܰܠ ܐܟ̥ ܕܽܗ̄ܘ ܟܰܪܣܒ̥ܳܢܳܐ ܕܝܳܒ݄ܫ، ܘ݄ܟܡܰܠܬܡܺܝ ܠܶܗ ܘ݄ܡܚܰܠܩܺܝ ܠܶܗ ܒܺܗ̄ܝ ܢܽܘܪܳܐ ܕܝܳܩ݄ܕ̥. 7ܘܶܐܢ ܦܰܝܫܺܝܬܽܘ ܐܶܒܺܝ، ܘܰܡّܰܐܡܪ̈ܰܝܕ̥ܺܝ ܟܦܰܝܫܺܝ ܐܰܒܟ̥ܽܘ، ܗ̄ܽܘ ܡܶܕܶܐ ܕܪܳܚܡܺܝܬܽܘ ܕ݄ܡܫܰܐܺܠܺܝܬܽܘ ܓܕܳܗ̄ܘܰܠܟ̥ܽܘ. 8ܒܗܰܬ̥ܶܐ ܟܡܺܝܫܰܒ݄ܚ ܗ̄ܽܘ ܐܰܒܳܐ ܕܦܺܐܪ̈ܶܐ ܓ̥ܰܠܰܒܶܐ ܓܣܰܝܡܺܝܬܽܘ ܘܬܰܠܡܺܝܕ̥̈ܶܐ ܐܶ‌ܠܺܝ ܓܕܳܗ̄ܘܺܝܬܽܘ. 9ܒܶܗ ܐܰܝܕܰܪܒܳܐ ܗ̄ܽܘ ܐܰܒܰܝܕ̥ܺܝ ܪܚ݄ܡ ܠܶܗ ܠܺܝ، ܐܳܢܳܐ ܣܬܶܝ ܪܚ݄ܡ ܠܺܝ ܠܟ̥ܽܘ، ܦܽܘܫܽܘ ܒܺܗ̄ܝ ܚܽܘܒܰܝܕ̥ܺܝ. 10ܐܶܢ ܢ݄ܛܪܺܝܬܽܘ ܗ̄ܰܦّܽܘܩܕ̈ܳܢܰܝܕ̥ܺܝ ܒܺܗ̄ܝ ܚܽܘܒܰܝܕ̥ܺܝ ܓܦܰܝܫܺܝܬܽܘ، ܐܟ̥ ܕܳܐܢܳܐ ܢܛ݄ܪ ܠܺܝ ܗ̄ܰܦّܽܘܩܕ̈ܳܢܶܐ ܕܽܗ̄ܘ ܐܰܒܰܝܕ̥ܺܝ ܘ݄ܟܦܳܝܰܫ ܐ̱ܢܳܐ ܒܺܗ̄ܝ ܚܽܘܒܰܝܕ̥ܶܗ. 11ܗܰܢܺܝ ܫܓ̥݄ܠ ܐ̱ܢܳܐ ܐܰܥܡܰܝܟ̥ܽܘ ܠܰܫܰܢ ܗ̄ܺܝ ܦܨܺܝܚܽܘܬ̥ܰܝܕ̥ܺܝ ܗܳܘܝܳܐ ܐܰܒܟ̥ܽܘ، ܘܺܗ̄ܝ ܦܨܺܝܚܽܘܬ̥ܰܬ̥ܟ̥ܽܘ ܟܝ݄ܪܒ̥ܳܐ ܘܟ݄ܡܠܳܐ. 12ܗܰܢܳܐ ܝܳܐ ܗ̄ܽܘ ܦܽܘܩܕܳܢܰܝܕ̥ܺܝ، ܕܪܳܚܡܺܝܬܽܘ ܠ݄ܚܕ̥ܳܕ̥̈ܶܐ ܐܟ̥ ܕܳܐܢܳܐ ܪܚ݄ܡ ܠܺܝ ܠܟ̥ܽܘ. 13ܚܽܘܒܳܐ ܕܪܰܒ ܡܰܗ̄ܬ̥ܶܐ ܠܰܝܬ، ܕܢܳܫܳܐ ܡܰܚ݄ܬ ܗ̄ܺܝ ܢܰܦܫܰܝܕ̥ܶܗ ܡܶܢ̱ ܚܠܳܦ ܕܰܚّܰܒܺܝܒ̈ܰܝܕ̥ܶܗ. 14ܗܰܬܽܘ ܚܰܒܺܝܒ̈ܰܝܕ̥ܺܝ ܗܰܬܽܘ ܐܶܢ ܕܣܰܝܡܺܝܬܽܘ ܗ̄ܰܦّܽܘܩܕ̈ܳܢܶܐ ܕܗܽܒ̥ ܠܺܝ ܠܟ̥ܽܘ. 15ܠܳܐ ܦܰܝ݄ܫ ܩܳܪܶܐ ܐ̱ܢܳܐ ܠܟ̥ܽܘ ܓܪ̈ܶܝܥܶܐ، ܥܰܠ ܕܽܗ̄ܘ ܓܪܶܝܥܳܐ ܠ݄ܐ ܟܳܐܕ̥݄ܥ ܡ݄ܢ ܟܣܳܝ݄ܡ ܗ̄ܽܘ ܡܳܪܰܝܕ̥ܶܗ. ܚܰܒܺܝܒ̈ܰܝܕ̥ܺܝ ܩܪܶܐ ܠܺܝ ܠܟ̥ܽܘ، ܥܰܠ ܕܡܰܘܕ̥ܰܥ ܠܺܝ ܠܟ̥ܽܘ ܟܽܘܠ ܡܶܕܶܐ ܕܫܰܡ݄ܥ ܐ̱ܢܳܐ ܡܽܗ̄ܘ ܐܰܒܰܝܕ̥ܺܝ. 16ܠܳܐ ܗܰܬܽܘ ܓܒܰܠܟ̥ܽܘ ܠܺܝ، ܐܶ‌ܠܳܐ ܐܳܢܳܐ ܓܒܶܐ ܠܺܝ (ܡܢܰܩܶܐ ܠܺܝ) ܠܟ̥ܽܘ ܘ݄ܡܥܰܝܰܢ ܠܺܝ ܠܟ̥ܽܘ ܠܰܫܰܢ ܕܗܰܬܽܘ ܣܬܶܝ ܕ݄ܐܙّܳܟ̥ܽܘ ܣܰܝܡܺܝܬܽܘ ܦܺܐܪ̈ܶܐ ܘܰܦّܺܐܪ̈ܰܬ̥ܟ̥ܽܘ ܓܦܰܝܫܺܝ، ܕܟܽܘܠ ܡܶܕܶܐ ܕ݄ܡܫܰܐܺܠܺܝܬܽܘ ܡܽܗ̄ܘ ܐܰܒܰܝܕ̥ܺܝ ܒ݄ܐܫܡܺܝ ܓܕܳܗ̄ܒܰܠܟ̥ܽܘ ܝܳܐ. 17ܗ̄ܰܦّܽܘܩܕ̈ܳܢܰܢܺܝ ܟܳܗ̄ܒܶܢܰܢܟ̥ܽܘ ܕܪܳܚܡܺܝܬܽܘ ܠ݄ܚܕ̥ܳܕ̥̈ܶܐ.

ܗ̄ܽܘ ܥܳܠܡܳܐ ܟ݄ܡܥܰܢ݄ܬ ܡ݄ܢܟ̥ܽܘ

18”ܐܶܢ ܗ̄ܽܘ ܥܳܠܡܳܐ ܟ݄ܡܥܰܢ݄ܬ ܡ݄ܢܟ̥ܽܘ، ܝܕ̥ܰܥܽܘ ܕ݄ܡܥܰܢܰܬ ܠܶܗ ܡܶܢܺܝ ܡܶܩ݄ܕ̱ܡ ܡ݄ܢܟ̥ܽܘ. 19ܘܕܳܗ̄ܘܺܝܬܽܘ ܗ̄ܘܰܘ̱ ܡܽܗ̄ܘ ܥܳܠܡܳܐ، ܗ̄ܽܘ ܥܳܠܡܳܐ ܪܳܚܰܡ ܗ̄ܘܰܐ ܗܰܢܺܝ ܕܕܺܝܕ̥ܶܗ (ܗ̄ܰܢ ܢܳܫ̈ܰܝܕ̥ܶܗ). ܐܶ‌ܠܳܐ ܠܰܐ ܗ̄ܘܺܝܬܽܘ ܡܽܗ̄ܘ ܥܳܠܡܳܐ، ܘܳܐܢܳܐ ܓܒܶܐ ܠܺܝ (ܡܢܰܩܶܐ ܠܺܝ) ܠܟ̥ܽܘ ܡܽܗ̄ܘ ܥܳܠܡܳܐ، ܡܰܗ̄ܘܟ̥ܰܐ ܗ̄ܽܘ ܥܳܠܡܳܐ ܟ݄ܡܥܰܢܰܬ ܡ݄ܢܟ̥ܽܘ. 20ܡܰܝܬܰܝܽܘ ܠܒܳܠܰܝܟ̥ܽܘ ܗ̄ܽܘ ܡܰܐܡܪܳܐ ܕܳܐܢܳܐ ܐܡ݄ܪ ܠܺܝ ܠܟ̥ܽܘ، ܕܠܰܝܬ ܓܪܶܝܥܳܐ ܪܰܒ ܡܽܗ̄ܘ ܡܳܪܰܝܕ̥ܶܗ؛ ܐܶܢ ܐܶ‌ܠܺܝ ܛܪ݄ܕّܶܗ، ܐܰ‌ܠܟ̥ܽܘ ܣܬܶܝ ܓܛܳܪܕܺܝ؛ ܘܶܐܢ ܫܰܡܺܝܥܺܝ ܗ̄ܽܘ ܡܰܐܡܪܰܝܕ̥ܺܝ، ܓܫ݄ܡܥܺܝ ܗ̄ܽܘ ܡܰܐܡܪܰܬ̥ܟ̥ܽܘ ܣܬܶܝ. 21ܐܶ‌ܠܳܐ ܗܰܢܺܝ ܟܽܘܠّܶܗ ܓܣܰܝܡܺܝ ܐܰܒܟ̥ܽܘ ܠܰܫܰܢ ܗ̄ܽܘ ܐ݄ܫܡܰܝܕ̥ܺܝ ܡܺܐܝܕ̥ܶܗ ܕܠ݄ܐ ܟ݄ܐܕ̥ܥܺܝ ܡܰܢܝܳܐ ܕ݄ܡܫܰܕܰܪ ܠܶܗ ܠܺܝ. 22ܐܶܢ ܕܠܳܐ ܐܬ̥ܶܐ ܗ̄ܘܰܝ ܐ̱ܢܳܐ ܘ݄ܫܓ̥݄ܠ ܐ̱ܢܳܐ ܐܰܥܡܰܝّܶܗ ܠܳܐ ܗ̄ܘܶܐ ܗ̄ܘܰܐ ܠّܶܗ ܚܛܺܝܬ̥ܳܐ. ܐܶ‌ܠܳܐ ܐܳܥܕܳܐ ܠܳܐ ܦܰܝ݄ܫّܶܗ ܥܶܠܬ̥ܳܐ ܕܣܰܝܡܺܝ ܚܛܺܝܬ̥ܳܐ. 23ܡܰܢ ܕ݄ܡܥܰܢܰܬ ܡܶܢܺܝ، ܟ݄ܡܥܰܢܰܬ ܡܽܗ̄ܘ ܐܰܒܰܝܕ̥ܺܝ ܣܬܶܝ. 24ܘ݄ܕܠܳܐ ܣܳܝܰܡ ܗ̄ܘܰܝ ܐ̱ܢܳܐ ܗ̄ܰܥܒܳܕ̥̈ܶܐ ܩ݄ܕ̱ܡ ܥܰܝܢ̈ܳܬ̥ܰܝّܶܗ، ܗܰܢܺܝ ܕܢܳܫܳܐ ܚܪܶܢܳܐ ܠܳܐ ܣ݄ܡ ܠܶܗ، ܠܳܐ ܗ̄ܘܶܐ ܗ̄ܘܰܐ ܠّܶܗ ܚܛܺܝܬ̥ܳܐ. ܐܶ‌ܠܳܐ ܐܳܥܕܳܐ ܕ݄ܚܙܰܠّܶܗ، ܡܥܰܢܰܬّܶܗ ܡܶܢܺܝ ܘܡܽܗ̄ܘ ܐܰܒܰܝܕ̥ܺܝ ܣܬܶܝ، 25ܠܰܫܰܢ ܕܟܳܡ݄ܠ ܗ̄ܽܘ ܡܰܐܡܪܳܐ ܕ݄ܟܬ̥ܺܝܒ̥ ܒܽܗ̄ܘ ܢܳܡܽܘܣܰܬّ̥ܶܗ: ’ܡܥܰܢܰܬّܶܗ ܡܶܢܺܝ ܡܰܓܳܢ.‘ 26ܘܡ݄ܐ ܕܰܐܬ̥ܺܝ ܗ̄ܽܘ ܦܰܪܰܩܠܺܛܳܐ (ܡܥܰܕܪܳܢܳܐ)، ܗܰܘܳܐ ܕܳܐܢܳܐ ܓ݄ܡܫܰܕܰܪܢܰܢܟ̥ܽܘ ܡܶܢ̱ ܓܰܒ ܗ̄ܽܘ ܐܰܒܰܝܕ̥ܺܝ، ܪܽܘܚܳܐ ܕܽܗ̄ܘ ܫܪܳܪܳܐ، ܗܰܘܳܐ ܕܡܶܢ̱ ܓܰܒ ܗ̄ܽܘ ܐܰܒܰܝܕ̥ܺܝ ܟܢܳܦ݄ܩ، ܗܺܝّܶܗ ܓܣܳܗ݄ܕ ܐܰܥܠܺܝ. 27ܘܗܰܬܽܘ ܣܬܶܝ ܟܣܳܗܕܺܝܬܽܘ ܥܰܠ ܕܟ݄ܬ ܗ̄ܰܬܽܘ ܐܰܥܡܺܝ ܡܽܗ̄ܘ ܪܺܝܫܳܐ.

Currently Selected:

ܡܓܰܠܝܘܢ ܕܝܘܚܢܢ 15: ܟܬܒܐ

Highlight

Copy