ܣܶܦܪܳܐ ܕ݄ܒܪܺܝܬ̥ܳܐ 42

1ܘ݄ܚܙܶܐ ܠܶܗ ܝܰܥܩܽܘܒ ܕܟܺܝܬ ܚ̈ܶܛܶܐ ܒܡܶܨܪܶܝܢ، ܘܐܡ݄ܪ ܠܶܗ ܝܰܥܩܽܘܒ ܠܰܗ̄ܢ ܐܰܒܢ̈ܶܐ: ”ܠܳܐ ܙܰܝܥܺܝܬܽܘ، 2ܟܰܐܠܶܗ ܫܰܡ݄ܥ ܐ̱ܢܳܐ ܕܟܺܝܬ ܚ̈ܶܛܶܐ ܒܡܶܨܪܶܝܢ، ܢܚܰܬܽܘ ܠܬܰܡܳܐ ܘ݄ܙܒ̥ܰܢܽܘ ܠܰܢ ܚ̈ܶܛܶܐ ܡܶܢ̱ ܬܰܡܳܐ ܠܰܫܰܢ ܕܚܳܝܺܝܢܰܐ ܘܠܳܐ ܡܰܝܬ̥ܺܝܢܰܐ.“ 3ܘܢܰܚܺܝܬܺܝ ܥܰܣܪܳܐ ܐܰܚ̈ܽܘܢܳܢܶܐ ܕܝܰܘܣܶܦ ܕܙܳܒ̥ܢܺܝ ܚ̈ܶܛܶܐ ܡܶܢ̱ ܡܶܨܪܶܝܢ. 4ܘܝܰܥܩܽܘܒ ܠܳܐ ܡܫܰܕܰܪ ܠܶܗ ܒܶܢܝܳܡܶܝܢ ܗ̄ܽܘ ܐܰܚܽܘܢܳܐ ܕܝܰܘܣܶܦ ܥܰܡ ܗ̄ܰܢ ܐܰܚ̈ܽܘܢܳܢܶܐ، ܥܰܠ ܕܐܡ݄ܪ ܠܶܗ ܕܠ݄ܐ ܐܙّܶܗ ܗܳܘܶܐ ܠܶܗ ܡܶܕܶܐ ܒܺܝܫܳܐ.

5ܘܰܐܬ̥݄ܢ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܕܙܳܒ̥ܢܺܝ ܚ̈ܶܛܶܐ ܥܰܡ ܗܰܢܺܝ ܕܟ݄ܐܙّ݄ܢ ܡܺܐܝܕ̥ܶܗ ܕܚܺܝܨ ܗ̄ܽܘ ܟܰܦܢܳܐ ܒܺܗ̄ܝ ܐܰܪܥܳܐ ܕ݄ܟܢܰܥܢ. 6ܘܝܰܘܣܶܦ ܗܺܝّܶܗ ܗ̄ܘܰܐ ܗ̄ܽܘ ܫܰܠܺܝܛܳܐ ܥܰܠ ܗ̄ܺܝ ܐܰܪܥܳܐ، ܘܗܺܝّܶܗ ܗ̄ܘܰܐ ܕ݄ܡܙܰܒܰܢ ܗ̄ܘܰܐ ܚ̈ܶܛܶܐ ܠܟܽܘܠܶܗ ܗ̄ܽܘ ܥܰܡܳܐ ܕܺܗ̄ܝ ܐܰܪܥܳܐ. ܘܰܐܬ̥݄ܢ ܗ̄ܰܢ ܐܰܚ̈ܽܘܢܳܢܶܐ ܕܝܰܘܣܶܦ ܘ݄ܣܓ̥݄ܕّܰܗ ܠܶܗ ܥܰܠ ܦܳܬ̥ܰܝّܶܗ ܥܰܠ ܗ̄ܺܝ ܐܰܪܥܳܐ. 7ܘ݄ܚܙܶܐ ܠܶܗ ܝܰܘܣܶܦ ܗ̄ܰܢ ܐܰܚ̈ܽܘܢܳܢܶܐ ܘܰܐܕ̥݄ܥّܶܗ، ܘܣ݄ܡ ܠܶܗ ܪܽܘܚܶܗ ܢܽܘܟ̥ܪܳܝܳܐ ܐܰܥܠܰܝّܶܗ، ܘ݄ܒܩܰܫܝܽܘܬ̥ܳܐ ܫܓ̥ܺܝܠ ܐܰܥܡܰܝّܶܗ، ܘܐܡ݄ܪ ܠܰܗ ܠّܶܗ: ”ܡܰܐܝܟܳܐ ܗܰܬܽܘ؟“ ܘܐܡ݄ܪّܶܗ: ”ܡܺܗ̄ܝ ܐܰܪܥܳܐ ܕ݄ܟܢܰܥܢ ܐܰܬ̥ܺܝܢܰܐ ܕܙܳܒ̥ܢܺܝܢܰܐ ܚ̈ܶܛܶܐ.“ 8ܘܰܐܕ̥݄ܥ ܝܰܘܣܶܦ ܗ̄ܰܢ ܐܰܚ̈ܽܘܢܳܢܶܐ، ܘܗ݄ܢّܶܝ ܠܰܐ ܐܕ̥ܺܝܥܺܝ ܠܶܗ.

9ܘܰܐܬ̥ܺܝ ܠܒܳܠܶܗ ܕܝܰܘܣܶܦ ܗ̄ܰܚّܶܠܡ̈ܶܐ ܕ݄ܚܙܶܐ ܗ̄ܘܰܝ ܠܶܗ ܐܰܥܠܰܝّܶܗ. ܘܐܡ݄ܪ ܠܰܗ ܠّܶܗ: ”ܓܳܫܽܘܫ̈ܶܐ ܗܰܬܽܘ، ܐܰܬ̥ܺܝܬܽܘ ܕܚܳܙܺܝܬܽܘ ܡ݄ܢ ܟܳܗ̄ܘܶܐ ܒܺܗ̄ܝ ܐܰܪܥܳܐ (ܕܡܶܨܪܶܝܢ).“ 10ܘܐܡ݄ܪّܶܗ: ”ܠܳܐ ܝܰܐ ܗ̄ܽܘ ܡܳܪܰܝܕ̥ܰܢ، ܗ̄ܰܓܪ̈ܶܝܥܰܝܕ̥ܳܟ̥ ܐܰܬ̥݄ܢ ܕܙܳܒ̥ܢܺܝ ܚ̈ܶܛܶܐ. 11ܟܽܘܠܰܢ ܐܰܒܢ̈ܶܐ ܕܚܰܕ̱ ܓܰܒ̥ܪܳܐ ܢܰܐ. ܘܢܳܫ̈ܶܐ ܛܳܒ̥̈ܶܐ ܢܰܐ، ܘܰܓܪ̈ܶܝܥܰܝܕ̥ܳܟ̥ ܠܰܝ̱ܬ ܢܶܝ ܓܳܫܽܘܫ̈ܶܐ.“ 12ܘܝܰܘܣܶܦ ܐܡ݄ܪ ܠܰܗ ܠّܶܗ: ”ܠܰܝ̱ܬ ܝܳܐ ܗܰܘܟ̥ܰܐ. ܐܰܬ̥ܺܝܬܽܘ ܕܚܳܙܺܝܬܽܘ ܡ݄ܢ ܟܳܗ̄ܘܶܐ ܒܺܗ̄ܝ ܐܰܪܥܳܐ.“ 13ܘܐܡ݄ܪّܰܗ ܠܶܗ: ”ܬܪܰܥܣܰܪ ܐܰܚ̈ܽܘܢܳܢܶܐ ܢܰܐ، ܗ̄ܰܓܪ̈ܶܝܥܰܝܕ̥ܳܟ̥ ܐܰܒܢ̈ܶܐ ܕܓܰܒ̥ܪܳܐ ܚܰܕ̱ ܒܺܗ̄ܝ ܐܰܪܥܳܐ ܕ݄ܟܢܰܥܢ. ܘܽܗ̄ܘ ܢܰܥܺܝܡܳܐ ܟܰܐܠܶܗ ܓܰܒ ܒܰܒܰܢ ܝܳܐ ܐܰܕܝܰܘܡܰܐ، ܘܚܰܕ̱ ܡܣܰܟܪܳܐ.“ 14ܐܡ݄ܪ ܠܶܗ ܝܰܘܣܶܦ: ”ܗܰܢܳܐ ܝܳܐ ܕܐܡ݄ܪ ܠܺܝ ܠܟ̥ܽܘ: ܓܳܫܽܘܫ̈ܶܐ ܗܰܬܽܘ. 15ܒܽܗ̄ܘ ܡܶܕܰܢܳܐ ܓܡܺܝܢܰܣܺܝܬܽܘ (ܘܡܺܝܕ̥ܳܥܺܝܬܽܘ): ܒܰܚّܰܝ̈ܶܐ ܕܦܶܪܥܽܘܢ ܠ݄ܐ ܓܢܳܦܩܺܝܬܽܘ ܡܰܗ̄ܪܟܶܐ ܕܠܳܐ ܐܬ̥ܶܐ ܐܰܚܽܘܢܰܝܟ̥ܽܘ ܗ̄ܽܘ ܢܰܥܺܝܡܳܐ ܠܰܗ̄ܪܟܶܐ. 16ܡܫܰܕܶܪܽܘ ܚܰܕ̱ ܡܰܢܟ̥ܽܘ ܕܡܰܝܬܶܐ ܗ̄ܽܘ ܐܰܚܽܘܢܰܬ̥ܟ̥ܽܘ ܘܗܰܬܽܘ ܓܡ݄ܚܒܳܫܺܝܬܽܘ، ܘ݄ܓܡܺܝܕ̥݄ܥ ܗ̄ܽܘ ܡܰܐܡܪܰܬ̥ܟ̥ܽܘ ܐܶܢ ܫܪܳܪܳܐ ܟܳܐܡّܺܪ̱ܝܬܽܘ. ܘܶܐܠܳܐ، ܒܰܚّܰܝ̈ܶܐ ܕܦܶܪܥܽܘܢ، ܓܳܫܽܘܫ̈ܶܐ ܗܰܬܽܘ.“ 17ܘ݄ܡܚܰܠܩܺܝ ܠܶܗ ܒܽܗ̄ܘ ܚܒܽܘܫܝܳܐ ܬܠܳܬ̥ܳܐ ܝܰܘܡ̈ܶܐ.

18ܘܒܽܗ̄ܘ ܝܰܘܡܳܐ ܕ݄ܬܠܳܬ̥ܳܐ، ܐܡ݄ܪ ܠܰܗ ܠّܶܗ ܝܰܘܣܶܦ: ”ܣܽܘܡܽܘ ܗܰܬ̥ܶܐ ܘ݄ܓܚܳܝܺܝܬܽܘ. ܐܳܢܳܐ ܡܰܢ̱ ܐ‌ܠܳܗܳܐ ܟܙܳܝܰܥ ܐ̱ܢܳܐ. 19ܐܶܢ ܢܳܫ̈ܶܐ ܛܳܒ̥̈ܶܐ ܗܰܬܽܘ، ܚܰܕ̱ ܡܰܗ̄ܢ ܐܰܚ̈ܽܘܢܳܢܰܬ̥ܟ̥ܽܘ ܓܡ݄ܚܒ݄ܫ ܒܽܗ̄ܘ ܚܒܽܘܫܝܰܬ̥ܟ̥ܽܘ، ܘܗܰܬܽܘ ܙܳܟ̥ܽܘ ܡܰܘܒܶܠܽܘ ܚ̈ܶܛܶܐ ܠܰܟّܰܦܺܝܢ̈ܶܐ ܕܟ݄ܬܢܶܝ ܒܰܒّܳܬ̈ܰܬ̥ܟ̥ܽܘ. 20ܘܠܰܐܚܽܘܢܰܝܟ̥ܽܘ ܗ̄ܽܘ ܢܰܥܺܝܡܳܐ ܡܰܝܬܰܝܽܘ ܣܺܝܕܺܝ، ܘܰܡّܰܐܡܪ̈ܰܬ̥ܟ̥ܽܘ ܟܡܰܚܘ݄ܢ ܫܪܳܪܳܐ، ܘܠ݄ܐ ܓܡܰܝܬ̥ܺܝܬܽܘ.“ ܘܣ݄ܡّܶܗ ܗܰܘܟ̥ܰܐ. 21ܘܐܡ݄ܪّܶܗ ܚܰܕ̱ ܠܽܗ̄ܘ ܐܰܚܽܘܢܳܐ: ”ܫܪܳܪܳܐ ܚܰܛܺܝܢܰܐ ܥܰܠ ܐܰܚܽܘܢܰܢ ܕ݄ܚܙܶܐ ܠܰܢ ܒܢܰܦܫܳܐ ܡܰܥܰܩܬܳܐ ܪ̈ܰܚܡܶܐ ܐܳܒܰܥ ܗ̄ܘܰܐ ܡܶܢܰܢ، ܘܠܳܐ ܫܰܡܺܝܥܺܝܢܰܐ ܠܶܗ. ܡܰܗ̄ܘܟ̥ܰܐ ܐܰܬ̥ܝܳܐ ܐܰܥܠܰܢ ܗ̄ܺܝ ܥܺܝܩܽܘܬ̥ܰܬ̥ܶܐ.“ 22ܘܡܰܕܥܰܪ ܠܶܗ ܪܽܘܒܶܝܠ ܘܐܡ݄ܪ ܠܰܗ ܠّܶܗ: ”ܠܳܐ ܐܡ݄ܪ ܠܺܝ ܠܟ̥ܽܘ ܠܳܐ ܚܳܛܺܝܬܽܘ ܒܽܗ̄ܘ ܛܰܠܝܳܐ، ܘܠܳܐ ܫܰܡܺܝܥܺܝܬܽܘ؟ ܘܟܰܐܠܶܗ ܗ̄ܽܘ ܐܰܕܡܰܝܕ̥ܶܗ ܣܬܶܝ ܟܳܡ݄ܒܥܶܐ (ܡܰܢܟ̥ܽܘ).“ 23ܘܗ݄ܢّܶܝ ܠܳܐ ܐܕ̥ܥܺܝ ܗ̄ܘܰܘ̱ ܕܟܳܫܳܡ݄ܥ ܝܰܘܣܶܦ، ܡܺܐܝܕ̥ܶܗ ܕܚܰܕ̱ ܡܬܰܪܓܡܳܢܳܐ ܩܳܝܰܡ ܗ̄ܘܰܐ ܒܰܝܢܳܬ̥ܰܝّܶܗ. 24ܘܕܰܥ݄ܪ ܡܶܢ̱ ܓܰܒܰܝّܶܗ ܘܒܰܟ̥ܺܝ. ܘܰܐܬ̥ܺܝ ܢܰܩܠܐ ܚܪܶܬܳܐ ܠܓܰܒܰܝّܶܗ ܘ݄ܫܓ̥ܺܝܠ ܐܰܥܡܰܝّܶܗ، ܘܡ݄ܕ ܠܶܗ ܡ݄ܢّܶܗ ܫܶܡܥܽܘܢ، ܘܡܰܐܣ݄ܪ ܠܶܗ ܩ݄ܕ̱ܡ ܥܰܝܢ̈ܳܬ̥ܰܝّܶܗ.

25ܘܝܰܘܣܶܦ ܗܽܒ̥ ܠܶܗ ܦܽܘܩܕܳܢܳܐ ܕܡܳܠ݄ܢ ܗ̄ܰܣّܶܦܳܩ̈ܰܬّ̥ܶܗ ܚ̈ܶܛܶܐ، ܘ݄ܕܡܰܕ݄ܥܪܺܝ ܗ̄ܽܘ ܣܶܐܡܳܐ ܕܟܘ̇ܠ ܚܰܕ̱ ܒܽܗ̄ܘ ܛܰܥܢܰܝܕ̥ܶܗ، ܘܕܳܗ̄ܒ݄ܢّܶܗ ܙܘܳܕ̈ܶܐ ܠܽܗ̄ܘ ܕܰܪܒܳܐ. ܘܣ݄ܡّܰܢّܶܗ ܗܰܘܟ̥ܰܐ. 26ܘܡܰܛܥܰܢّܶܗ ܗ̄ܰܚّܶܛ̈ܰܬّ̥ܶܗ ܥܰܠ ܗ̄ܰܚܡܳܪ̈ܰܬّ̥ܶܗ ܘܰܐܙّ݄ܢ ܡܶܢ̱ ܬܰܡܳܐ. 27ܘ݄ܦܬ݄ܚ ܠܶܗ ܚܰܕ̱ ܡ݄ܢّܶܗ ܗ̄ܽܘ ܛܰܥܢܰܝܕ̥ܶܗ ܕܳܗ̄ܒܶܐ ܡܽܐܘܟܠܳܐ ܠܽܗ̄ܘ ܚܡܳܪܰܝܕ̥ܶܗ ܒܽܗ̄ܘ ܒܶܝܬ̥ ܒܰܘܬܳܐ، ܘ݄ܚܙܶܐ ܠܶܗ ܗ̄ܽܘ ܣܶܐܡܰܝܕ̥ܶܗ ܡܰܚܬܳܐ ܒܦܶܡܶܗ ܕܽܗ̄ܘ ܛܰܥܢܰܝܕ̥ܶܗ. 28ܘܐܡ݄ܪ ܠܶܗ ܠܰܗ̄ܢ ܐܰܚ̈ܽܘܢܳܢܶܐ: ”ܕܰܥ݄ܪ ܗ̄ܽܘ ܣܶܐܡܰܝܕ̥ܺܝ، ܘܟܰܐܠܶܗ ܒܦܶܡܶܗ ܕܽܗ̄ܘ ܛܰܥܢܰܝܕ̥ܺܝ.“ ܘܙܰܝ݄ܥ ܠܶܒܰܝّܶܗ ܘ݄ܡܒܰܠ݄ܗܕܺܝ، ܘܰܐܚܳܐ ܠܽܗ̄ܘ ܐܰܚܽܘܢܳܐ ܐܳܡܰܪ ܗ̄ܘܰܐ: ”ܡ݄ܢܝܳܐ ܗܰܬ̥ܶܐ ܕܣ݄ܡ ܠܶܗ ܐܰ‌ܠܳܗܳܐ ܐܰܥܡܰܢ؟“

29ܘܰܐܬ̥݄ܢ ܠܓܰܒ ܝܰܥܩܽܘܒ ܗ̄ܽܘ ܒܰܒܰܬّ̥ܶܗ ܠܺܗ̄ܝ ܐܰܪܥܳܐ ܕ݄ܟܢܰܥܢ. ܘܡܰܚܘܰܠّܰܗ ܠܶܗ ܟܘ̇ܠ ܕܰܗ̄ܘܺܝ ܐܰܥܡܰܝّܶܗ ܘܐܡ݄ܪّܰܗ ܠܶܗ: 30”ܗ̄ܽܘ ܓܰܒ̥ܪܳܐ ܡܳܪܶܗ ܕܺܗ̄ܝ ܐܰܪܥܳܐ ܫܓ̥ܺܝܠ ܐܰܥܡܰܢ ܒܩܰܫܝܽܘܬ̥ܳܐ، ܘ݄ܚܫܽܒ̥ ܠܶܗ ܠܰܢ ܐܟ̥ ܕܓܳܫܽܘܫ̈ܶܐ ܕܺܗ̄ܝ ܐܰܪܥܳܐ. 31ܘܐܡ݄ܪ ܠܰܢ ܠܶܗ ܕܢܳܫ̈ܶܐ ܛܳܒ̥̈ܶܐ ܢܰܐ، ܘܠܰܝ̱ܬܢܰܐ ܓܳܫܽܘܫ̈ܶܐ. 32ܬܪܰܥܣܰܪ ܐܰܚ̈ܽܘܢܳܢܶܐ ܢܰܐ، ܐܰܒܢ̈ܶܐ ܕܒܰܒܰܢ، ܘܚܰܕ̱ ܡܣܰܟܪܳܐ ܝܳܐ. ܘܽܗ̄ܘ ܢܰܥܺܝܡܳܐ ܓܰܒ ܒܰܒܰܢ ܝܳܐ ܐܰܕܝܰܘܡܰܐ ܒܺܗ̄ܝ ܐܰܪܥܳܐ ܕ݄ܟܢܰܥܢ. 33ܘܐܡ݄ܪ ܠܶܗ ܠܰܢ ܗ̄ܽܘ ܓܰܒ̥ܪܳܐ ܡܳܪܶܗ ܕܺܗ̄ܝ ܐܰܪܥܳܐ: ܒܰܗ̄ܬ̥ܶܐ ܓܕܳܐܕ̥ܰܥ ܐ̱ܢܳܐ ܕܢܳܫ̈ܶܐ ܛܳܒ̥̈ܶܐ ܗܰܬܽܘ: ܛܪܰܝܽܘ ܚܰܕ̱ ܡܰܗ̄ܢ ܐܰܚ̈ܽܘܢܳܢܰܬ̥ܟ̥ܽܘ ܣܺܝܕܺܝ، ܘܚ̈ܶܛܶܐ ܠܰܟّܰܦܺܝܢ̈ܶܐ ܕܰܒّܳܬܰܬ̥̈ܟ̥ܽܘ ܡܽܘܕܽܘ ܘܙܳܟ̥ܽܘ. 34ܘܡܰܝܬܰܝܽܘ ܐܰܚܽܘܢܰܝܟ̥ܽܘ ܗ̄ܽܘ ܢܰܥܺܝܡܳܐ ܠܣܺܝܕܺܝ، ܘ݄ܓܕܳܐܕ̥ܰܥ ܐ̱ܢܳܐ ܕܠܰܝ̱ܬ ܗ̄ܰܬܽܘ ܓܳܫܽܘܫ̈ܶܐ ܐܶܠܳܐ ܢܳܫ̈ܶܐ ܛܳܒ̥̈ܶܐ ܗܰܬܽܘ. ܘܰܐܚܽܘܢܰܝܟ̥ܽܘ ܓܕܳܗ̄ܒܶܐ ܐ̱ܢܳܐ ܠܟ̥ܽܘ ܝܳܐ، ܘܒܺܗ̄ܝ ܐܰܪܥܳܐ ܓܣܰܝܡܺܝܬܽܘ ܬܰܓܳܪܽܘܬ̥ܳܐ.“ 35ܘܗܰܘܺܝ ܕܺܗ̄ܝ ܢܰܩܠܐ ܕ݄ܡܣܰܦܩܺܝ ܗ̄ܘܰܘ̱ ܗ̄ܰܛّܰܥܢ̈ܰܬّ̥ܶܗ، ܟܰܐܠܶܗ ܩܰܛܪܳܐ ܕܽܗ̄ܘ ܣܶܐܡܳܐ ܕܟܘ̇ܠ ܚܰܕ̱ ܒܦܶܡܶܗ ܕܽܗ̄ܘ ܛܰܥܢܰܝܕ̥ܶܗ. ܘ݄ܚܙܰܠّܶܗ ܗ̄ܰܩّܰܛܪ̈ܶܐ ܕܽܗ̄ܘ ܣܶܐܡܰܬّ̥ܶܗ، ܗ݄ܢّܶܝ ܘܽܗ̄ܘ ܒܰܒܰܬّ̥ܶܗ، ܘܙܰܝܺܝܥܺܝ. 36ܘܐܡ݄ܪ ܠܰܗ ܠّܶܗ ܝܰܥܩܽܘܒ ܗ̄ܽܘ ܒܰܒܰܬّ̥ܶܗ: ”ܩܛ݄ܥܟ̥ܽܘ ܠܺܝ ܡܰܗ̄ܢ ܢܰܥܺܝܡ̈ܰܝܕ̥ܺܝ: ܝܰܘܣܶܦ ܠܰܝܬ، ܘܫܶܡܥܽܘܢ ܠܰܝܬ، ܘ݄ܠܒܶܢܝܳܡܶܝܢ ܓܡܰܘܒܠܺܝܬܽܘ. ܒܪܺܝܫܺܝ ܐܰܬ̥݄ܢ ܗܰܢܺܝ ܟܽܘܠّܶܗ.“ 37ܘܐܡ݄ܪ ܠܶܗ ܪܽܘܒܶܝܠ ܠܽܗ̄ܘ ܒܰܒܳܐ: ”ܠܰܬܪܶܝ ܢܰܥܺܝܡ̈ܰܝܕ̥ܺܝ ܡܰܡ݄ܬ̥ ܕܠܳܐ ܡܰܝܬܶܐ ܐ̱ܢܳܐ ܠܶܗ ܐܶ‌ܠܳܟ̥. ܗܰܒ̥ ܠܺܝ ܝܳܐ، ܘܳܐܢܳܐ ܓܡܰܕܥܰܪ ܐ̱ܢܳܐ ܠܳܟ̥ ܝܳܐ.“ 38ܘܐܡ݄ܪ ܠܶܗ: ”ܐܰܒܪܺܝ ܠ݄ܐ ܓܢܳܚ݄ܬ ܐܰܥܡܰܝܟ̥ܽܘ، ܥܰܠ ܕܽܗ̄ܘ ܐܰܚܽܘܢܳܐ ܡܰܝ݄ܬ̥، ܘܗܺܝّܶܗ ܠܚܽܘܕ̥ܶܗ ܦܰܝ݄ܫ ܠܺܗ̄ܝ ܐܶܡܰܝܕ̥ܶܗ. ܘܶܐܢ ܗܰܘܺܝ ܠܶܗ ܡܶܕܶܐ ܒܺܝܫܳܐ ܒܽܗ̄ܘ ܕܰܪܒܳܐ ܕ݄ܓܕ݄ܐܙّܳܟ̥ܽܘ، ܓܡܰܢܚܬܺܝܬܽܘ ܗ̄ܺܝ ܣܳܒ̥ܽܘܬ̥ܰܝܕ̥ܺܝ ܒ݄ܡܪܳܪ̈ܶܐ ܠ݄ܫܝܽܘܠ.“

Currently Selected:

ܣܶܦܪܳܐ ܕ݄ܒܪܺܝܬ̥ܳܐ 42: ܟܬܒܐ

Highlight

Copy