ܣܶܦܪܳܐ ܕ݄ܒܪܺܝܬ̥ܳܐ 39

1ܘ݄ܠܝܰܘܣܶܦ ܡܰܢܚܰܬّܶܗ ܗ̄ܰܡّܶܕ̈ܝܰܢܳܝܶܐ ܠܡܶܨܪܶܝܢ، ܘ݄ܙܒ̥݄ܢ ܠܶܗ ܓܰܒ̥ܪܳܐ ܡܶܨܪܳܝܳܐ، ܦܽܘܛܺܝܦܳܪ ܗ̄ܽܘ ܡܗܰܝܡܢܳܐ ܕܦܶܪܥܽܘܢ، ܗ̄ܽܘ ܪܰܒܳܐ ܕܰܕّܰܚܫ̈ܶܐ، ܡܺܗ̄ܝ ܐܺܝܕ̥ܳܐ ܕܰܥّܰܪ̈ܒܳܝܶܐ ܕܡܰܢܚܰܬّܶܗ ܠܬܰܡܳܐ. 2ܘܗܰܘܺܝ ܡܳܪܝܳܐ ܥܰܡ ܝܰܘܣܶܦ. ܘܗܰܘܺܝ ܓܰܒ̥ܪܳܐ ܟܰܫܺܝܪܳܐ ܒܽܗ̄ܘ ܒܰܝܬܳܐ ܕܽܗ̄ܘ ܡܳܪܰܝܕ̥ܶܗ ܗ̄ܽܘ ܡܶܨܪܳܝܳܐ. 3ܘ݄ܚܙܶܐ ܠܶܗ ܗ̄ܽܘ ܡܳܪܰܝܕ̥ܶܗ ܕܡܳܪܝܳܐ ܐܰܥܡܶܗ ܝܳܐ، ܘܟܘ̇ܠ ܡܶܕܶܐ ܕ݄ܟܣܳܝ݄ܡ ܡܳܪܝܳܐ ܟܡܰܟܫ݄ܪ ܒܺܐܝܕ̥ܶܗ. 4ܘ݄ܚܙܶܐ ܠܶܗ ܝܰܘܣܶܦ ܪ̈ܰܚܡܶܐ ܒܥܰܝܢ̈ܳܬ̥ܶܗ (ܕܦܽܘܛܺܝܦܳܪ) ܘ݄ܡܫܰܡܰܫ ܠܶܗ. (ܘܦܽܘܛܺܝܦܳܪ) ܡܫܰܠܰܛ ܠܶܗ ܥܰܠ ܗ̄ܽܘ ܒܰܝܬܰܝܕ̥ܶܗ، ܘܟܘ̇ܠ ܕܟ݄ܬ ܠܶܗ ܗܽܒ̥ ܠܶܗ ܒܺܐܝܕ̥̈ܳܬ̥ܶܗ. 5ܘܗܰܘܺܝ ܡܽܗ̄ܘ ܙܰܒܢܳܐ ܕ݄ܡܫܰܠܰܛ ܠܶܗ ܥܰܠ ܗ̄ܽܘ ܒܰܝܬܰܝܕ̥ܶܗ ܘܥܰܠ ܟܘ̇ܠ ܕܟ݄ܬ ܠܶܗ، ܡܳܪܝܳܐ ܡܒܰܪܰܟ̥ ܠܶܗ ܗ̄ܽܘ ܒܰܝܬܳܐ ܕܽܗ̄ܘ ܡܶܨܪܳܝܳܐ ܡܶܢ̱ ܦܳܬ̥ܶܗ ܕܝܰܘܣܶܦ. ܘܗܰܘܝܳܐ ܗ̄ܺܝ ܒܽܘܪܟܬ̥ܳܐ ܕܡܳܪܝܳܐ ܒܟܘ̇ܠ ܕܟ݄ܬ ܠܶܗ ܒܽܗ̄ܘ ܒܰܝܬܳܐ ܘܒܺܗ̄ܝ ܚܰܩܠܳܐ. 6ܘܡܰܪܦܶܐ ܠܶܗ ܟܘ̇ܠ ܡܶܕܶܐ ܕܟ݄ܬ ܠܶܗ ܒܺܐܝܕ̥ܶܗ ܕܝܰܘܣܶܦ. ܘܠܳܐ ܐܒܰܥ ܗ̄ܘܰܐ (ܘܦܽܘܛܺܝܦܳܪ) ܕܳܐܕ̥݄ܥ ܡܶܕܶܐ ܐܶܠܳܐ ܗ̄ܽܘ ܠܰܚܡܳܐ ܕܳܐܟ̥ܰܠ ܗ̄ܘܰܐ. ܘܝܰܘܣܶܦ ܫܰܦܺܝܪܳܐ ܗ̄ܘܰܐ ܒܽܗ̄ܘ ܚܶܙܘܰܝܕ̥ܶܗ ܘܚܰܠܝܳܐ ܒܺܗ̄ܝ ܨܽܘܪܬܰܝܕ̥ܶܗ.

7ܘܗܰܘܺܝ ܡܶܢ̱ ܒ݄ܬ̥݄ܪ ܗ̄ܰܡّܰܐܡܪ̈ܰܢܺܝ، ܗ̄ܺܝ ܐܰܢ̱ܬ̥ܬܳܐ ܕܽܗ̄ܘ ܡܳܪܰܝܕ̥ܶܗ ܡܰܚܰܬ ܠܰܗ ܥܰܝܢܳܐ ܥܰܠ ܝܰܘܣܶܦ، ܘܐܡ݄ܪ ܠܰܗ ܠܶܗ: ”ܕܡܰܟ̥ ܐܰܥܡܺܝ.“ 8ܘܠܰܐ ܐܒ݄ܥ. ܘܐܡ݄ܪ ܠܶܗ ܠܺܗ̄ܝ ܐܰܢ̱ܬ̥ܬܳܐ ܕܽܗ̄ܘ ܡܳܪܰܝܕ̥ܶܗ: ”ܟܰܐܠܶܗ ܗ̄ܽܘ ܡܳܪܰܝܕ̥ܺܝ ܠ݄ܐ ܟܳܐܕ̥݄ܥ ܡ݄ܢ ܟܺܝܬ ܐܰܥܡܺܝ ܒܽܗ̄ܘ ܒܰܝܬܰܝܕ̥ܶܗ، ܘܟܘ̇ܠ ܕܟ݄ܬ ܠܶܗ ܡܰܚ݄ܬ ܠܶܗ ܒܺܐܝܕ̥ܺܝ، 9ܘܠܰܝܬ ܕܪܰܒ ܡܶܢܺܝ ܒܽܗ̄ܘ ܒܰܝܬܰܢܳܐ. ܘܠܳܐ ܡܰܟܠܶܐ ܠܶܗ ܡܶܕܶܐ ܡܶܢܺܝ ܐܶܠܳܐ ܗܰܬ ܕܟ݄ܬ ܗ̄ܰܬ ܗ̄ܺܝ ܐܰܢ̱ܬ̥ܬܰܝܕ̥ܶܗ. ܘܰܐܝܕܰܪܒܳܐ ܓܣܳܝܰܡ ܐ̱ܢܳܐ ܗ̄ܺܝ ܒܺܝܫܬܰܬ̥ܶܐ ܗ̄ܺܝ ܪܰܒܬ̥ܳܐ، ܘܚܳܛܶܐ ܐ̱ܢܳܐ ܠܰܐ‌ܠܳܗܳܐ؟“ 10ܘܗܺܝّܰܗ ܐܳܡّܳܪ̱ܐ ܗ̄ܘܰܝ ܠܶܗ ܟܘ̇ܠ ܝܰܘܡܳܐ، ܘܠܳܐ ܫܳܡܰܥ ܗ̄ܘܰܝ ܠܰܗ ܕܕܳܡ݄ܟ̥ ܣܺܝܕ̥ܰܗ ܘܗܳܘܶܐ ܐܰܥܡܰܗ.

11ܘܗܰܘܺܝ ܒܚܰܕ̱ ܡܰܢ̱ ܝّܰܘܡ̈ܶܐ، ܘܥܰܒ݄ܪ ܝܰܘܣܶܦ ܠܽܗ̄ܘ ܒܰܝܬܳܐ ܕܣܳܝ݄ܡ ܗ̄ܽܘ ܥܒ̥ܳܕܳܐ، ܘܠܰܝ̱ܬ ܗ̄ܘܰܐ ܢܳܫܳܐ ܡܰܗ̄ܢ ܢܳܫ̈ܶܐ ܕܽܗ̄ܘ ܒܰܝܬܳܐ ܬܰܡܳܐ ܒܽܗ̄ܘ ܒܰܝܬܳܐ. 12ܘܨ݄ܕ ܠܰܗ ܒܽܗ̄ܘ ܠܒܽܘܫܰܝܕ̥ܶܗ ܘܐܡ݄ܪ ܠܰܗ ܠܶܗ: ”ܕܡܰܟ̥ ܐܰܥܡܺܝ.“ ܘ݄ܛܪܶܐ ܠܶܗ ܗ̄ܽܘ ܠܒܽܘܫܰܝܕ̥ܶܗ ܒܺܐܝܕ̥̈ܳܬ̥ܰܗ، ܘܥܰܪ݄ܩ ܢܰܦ݄ܩ ܠܰܪܒ̥ܰܠ. 13ܘܗܰܘܺܝ ܗ̄ܺܝ ܢܰܩܠܐ ܕ݄ܚܙܶܐ ܠܰܗ ܕ݄ܛܪܶܐ ܠܶܗ ܗ̄ܽܘ ܠܒܽܘܫܰܝܕ̥ܶܗ ܒܺܐܝܕ̥ܰܗ ܘܥܰܪ݄ܩ ܠܰܪܒ̥ܰܠ، 14ܩܪܶܐ ܠܰܗ ܠܰܗ̄ܢ ܢܳܫ̈ܶܐ ܕܽܗ̄ܘ ܒܰܝܬܰܝܕ̥ܰܗ ܘܐܡ݄ܪ ܠܰܗ ܠّܶܗ: ”ܚܙܰܝܽܘ ܕܡܰܝܬܶܐ ܠܶܗ ܠܰܢ ܓܪܶܝܥܳܐ ܥܶܒܪܳܝܳܐ ܕܓܳܚ݄ܟ̥ ܐܰܥܠܰܢ. ܥܰܒ݄ܪ ܐܰܥܠܺܝ ܕܕܳܡ݄ܟ̥ ܐܰܥܡܺܝ، ܘܡܰܙܥܰܩ ܠܺܝ ܒܩܳܠܳܐ ܥܶܠܳܝܳܐ. 15ܘܺܗ̄ܝ ܢܰܩܠܐ ܕܫܰܡ݄ܥ ܕܡܰܥܠܶܐ ܠܺܝ ܩܳܠܺܝ ܘܡܰܙܥܰܩ ܠܺܝ، ܛܪܶܐ ܠܶܗ ܗ̄ܽܘ ܠܒܽܘܫܰܝܕ̥ܶܗ ܓܰܒܺܝ ܘܥܰܪ݄ܩ ܢܰܦ݄ܩ ܠܰܪܒ̥ܰܠ.“

16ܘܡܰܚܰܬ ܠܰܗ ܗ̄ܽܘ ܠܒܽܘܫܰܝܕ̥ܶܗ ܓܰܒܰܗ ܗ݄ܠ ܕܥܰܒ݄ܪ ܗ̄ܽܘ ܡܳܪܰܝܕ̥ܶܗ ܠܽܗ̄ܘ ܒܰܝܬܳܐ. 17ܘܐܡ݄ܪ ܠܰܗ ܠܶܗ ܐܟ̥ ܕܰܡّܰܐܡܪ̈ܰܢܺܝ: ”ܥܰܒ݄ܪ ܐܰܥܠܺܝ ܗ̄ܽܘ ܓܪܶܝܥܳܐ ܥܶܒܪܳܝܳܐ ܕܡܰܝܬܶܐ ܠܳܟ̥ ܠܰܢ ܕ݄ܡܚܰܩܰܪ ܠܰܢ. 18ܘܺܗ̄ܝ ܢܰܩܠܐ ܕܡܰܥܠܶܐ ܠܺܝ ܩܳܠܺܝ ܘܡܰܙܥܰܩ ܠܺܝ، ܛܪܶܐ ܠܶܗ ܗ̄ܽܘ ܠܒܽܘܫܰܝܕ̥ܶܗ ܒܺܐܝܕ̥ܺܝ ܘܥܰܪ݄ܩ ܢܰܦ݄ܩ ܠܰܪܒ̥ܰܠ.“ 19ܘܺܗ̄ܝ ܢܰܩܠܐ ܕܫܰܡ݄ܥ ܗ̄ܽܘ ܡܳܪܰܝܕ̥ܶܗ ܗ̄ܽܘ ܡܰܐܡܪܳܐ ܕܺܗ̄ܝ ܐܰܢ̱ܬ̥ܬܰܝܕ̥ܶܗ ܕܐܡ݄ܪ ܠܰܗ ܠܶܗ ”ܕܗܰܘܟ̥ܰܐ ܣ݄ܡ ܠܶܗ ܐܶܒܺܝ ܗ̄ܽܘ ܓܪܶܝܥܰܝܕ̥ܳܟ̥،“ ܚܰܝ݄ܡ ܗ̄ܽܘ ܪܽܘܓ̥ܙܰܝܕ̥ܶܗ. 20ܘܡܰܘܒܶܠ ܠܶܗ ܗ̄ܽܘ ܡܳܪܰܝܕ̥ܶܗ ܘ݄ܡܚܰܠܰܩ ܠܶܗ ܒܽܗ̄ܘ ܚܒܽܘܫܝܳܐ، ܗ̄ܺܝ ܕܽܘܟܬ̥ܳܐ ܕܰܝّܰܣܺܝܪ̈ܶܐ ܕܽܗ̄ܘ ܡܰܠܟܳܐ ܕ݄ܚܒܺܝܫ̈ܶܐ ܗ̄ܘܰܝܢܶܝ. ܘܦܰܝ݄ܫ ܬܰܡܳܐ ܒܽܗ̄ܘ ܚܒܽܘܫܝܳܐ.

21ܘܗܰܘܺܝ ܡܳܪܝܳܐ ܥܰܡ ܝܰܘܣܶܦ، ܘܡܰܪܚܰܡ ܠܶܗ ܐܰܥܠܶܗ، ܘܡܰܪܚܰܡ ܠܶܗ ܒܥܰܝܢܶܗ ܕܽܗ̄ܘ ܪܰܒܳܐ ܕܽܗ̄ܘ ܚܒܽܘܫܝܳܐ. 22ܘܽܗ̄ܘ ܪܰܒܳܐ ܕܽܗ̄ܘ ܚܒܽܘܫܝܳܐ ܗܽܒ̥ ܠܶܗ ܒܺܐܝܕ̥ܶܗ ܟܽܘܠّܶܗ ܗ̄ܰܝّܰܣܺܝܪ̈ܶܐ ܕܽܗ̄ܘ ܚܒܽܘܫܝܳܐ. ܘܽܗ̄ܘ ܡܶܕܶܐ ܕܥܳܒ̥ܕܺܝ ܗ̄ܘܰܘ̱ ܬܰܡܳܐ ܗܺܝّܶܗ ܗ̄ܘܰܐ ܗ̄ܽܘ ܥܰܒ̥ܳܕܳܐ. 23ܘܽܗ̄ܘ ܪܰܒܳܐ ܕܽܗ̄ܘ ܚܒܽܘܫܝܳܐ ܠܳܐ ܚܳܝܰܪ ܗ̄ܘܰܐ ܥܰܠ ܗ̄ܽܘ ܡܶܕܶܐ ܕܟܺܝܬ ܒܺܐܝܕ̥ܶܗ، ܡܺܐܝܕ̥ܶܗ ܕܡܳܪܝܳܐ ܐܰܥܡܶܗ ܗ̄ܘܰܐ. ܘܟܘ̇ܠ ܡܶܕܶܐ ܕܣܳܝܰܡ ܗ̄ܘܰܐ، ܡܳܪܝܳܐ ܡܰܟܫܰܪ ܗ̄ܘܰܝ ܠܶܗ.

Currently Selected:

ܣܶܦܪܳܐ ܕ݄ܒܪܺܝܬ̥ܳܐ 39: ܟܬܒܐ

Highlight

Copy