ܣܶܦܪܳܐ ܕܡܰܦܩܳܢܳܐ 8
8
1ܘܐܡ݄ܪ ܠܶܗ ܡܳܪܝܳܐ ܠܡܽܘܫܶܐ: ”ܙܳܟ̥ ܓܰܒ ܦܶܪܥܽܘܢ ܘܐܡܰܪ ܠܶܗ: ܗܰܘܟ̥ܰܐ ܟܳܐܡ݄ܪ ܡܳܪܝܳܐ: ܡܫܰܕ݄ܪ ܠܽܗ̄ܘ ܥܰܡܰܝܕ̥ܺܝ ܕܥܳܒܰܕ ܠܺܝ. 2ܘ݄ܕܠ݄ܐ ܐܒܥܰܬ ܡܫܰܕܪܰܬ، ܟܰܐܠܺܝ ܟܡܳܚܶܐ ܐ̱ܢܳܐ ܠܟܽܘܠܶܗ ܗ̄ܽܘ ܬܚܽܘܡܰܝܕ̥ܳܟ̥ ܒܰܗ̄ܢ ܐܽܘܪ̈ܕܥܶܐ. 3ܘܽܗ̄ܘ ܢܰܗܪܳܐ ܓܡܰܘܦ݄ܩ ܐܽܘܪ̈ܕܥܶܐ، ܘ݄ܓܣܳܠܩܺܝ ܘܥܳܒܪܺܝ ܠܽܗ̄ܘ ܒܰܝܬܰܝܕ̥ܳܟ̥ ܘܠܺܗ̄ܝ ܕܽܘܟܬ̥ܳܐ ܕܽܗ̄ܘ ܕܡܳܟ̥ܰܝܕ̥ܳܟ̥ ܘܠܰܓّܰܠܰܝ̈ܕ̥ܳܟ̥، ܘܒ̈ܰܒّܳܬܶܐ ܕܰܓܪ̈ܶܝܥܰܝܕ̥ܳܟ̥، ܘܒܽܗ̄ܘ ܥܰܡܰܝܕ̥ܳܟ̥، ܘܒܰܬّܰܢܽܘܪ̈ܰܝܕ̥ܳܟ̥ ܘܒܰܣّܶܦܳܩ̈ܶܐ ܕܰܠّܰܝܫ̈ܰܝܕ̥ܳܟ̥. 4ܘܶܐܒܳܟ̥ ܘ݄ܒܟܽܘܠܶܗ ܗ̄ܽܘ ܥܰܡܰܝܕ̥ܳܟ̥ ܓܣܳܠܩܺܝ ܐܽܘܪ̈ܕܥܶܐ.“
5ܘܐܡ݄ܪ ܠܶܗ ܡܳܪܝܳܐ ܠܡܽܘܫܶܐ: ”ܐܡܰܪ ܠܰܐܗܪܽܘܢ ܐܰܚܽܘܢܳܟ̥: ܡܰܥܠܰܝ ܐܺܝܕ̥ܳܟ̥ ܒܺܗ̄ܝ ܚܰܛܪܰܝܕ̥ܳܟ̥ ܥܰܠ ܗ̄ܰܢ ܢܰܗܪ̈ܶܐ ܘܥܰܠ ܗ̄ܰܪّܰܘܡ̈ܶܐ ܘܥܰܠ ܗ̄ܰܢ ܐܰܪ̈ܓܰܠܝܳܬ̥ܳܐ، ܘܡܰܣܠ݄ܩ ܐܽܘܪ̈ܕܥܶܐ ܥܰܠ ܗ̄ܺܝ ܐܰܪܥܳܐ ܕܡܶܨܪܶܝܢ.“ 6ܘܡܰܥܠܶܐ ܠܶܗ ܐܰܗܪܽܘܢ ܐܺܝܕ̥ܶܗ ܥܰܠ ܗ̄ܰܡّܰܝ̈ܶܐ ܕܰܡّܶܨܪ̈ܳܝܶܐ، ܘܣܰܠܺܝܩܺܝ ܐܽܘܪ̈ܕܥܶܐ، ܘ݄ܡܟܰܣܰܠّܶܗ ܗ̄ܺܝ ܐܰܪܥܳܐ ܕܡܶܨܪܶܝܢ. 7ܘܗܰܘܟ̥ܰܐ ܣܬܶܝ ܣ݄ܡّܶܗ ܗ̄ܰܚّܰܪ̈ܳܫܶܐ ܒܰܚّܶܪ̈ܫܰܬّ̥ܶܗ، ܘܡܰܣܠܰܩّܶܗ ܐܽܘܪ̈ܕܥܶܐ ܥܰܠ ܗ̄ܺܝ ܐܰܪܥܳܐ ܕܡܶܨܪܶܝܢ. 8ܘ݄ܩܪܶܐ ܠܶܗ ܦܶܪܥܽܘܢ ܠܡܽܘܫܶܐ ܘܠܰܐܗܪܽܘܢ، ܘܐܡ݄ܪ ܠܰܗ ܠّܶܗ: ”ܡܨܰܠܶܝܽܘ ܩ݄ܕ̱ܡ ܡܳܪܝܳܐ ܕܡܰܪܚ݄ܩ ܗ̄ܰܢ ܐܽܘܪ̈ܕܥܶܐ، ܡܶܢܺܝ ܘܡܽܗ̄ܘ ܥܰܡܰܝܕ̥ܺܝ. ܘܓ݄ܡܫܰܕܰܪ ܐ̱ܢܳܐ ܗ̄ܽܘ ܥܰܡܳܐ ܕ݄ܡܕܰܒܚܺܝ ܩ݄ܕ̱ܡ ܡܳܪܝܳܐ.“ 9ܘܐܡ݄ܪ ܠܶܗ ܡܽܘܫܶܐ ܠܦܶܪܥܽܘܢ: ”ܝܺܒܰܥ ܠܳܟ̥ ܙܰܒܢܳܐ؟ ܐܶܡܰܐ ܡܨܰܠܶܐ ܐ̱ܢܳܐ ܐܰܥܠܳܟ̥ ܘܥܰܠ ܗ̄ܰܓܪ̈ܶܝܥܰܝܕ̥ܳܟ̥ ܘܥܰܠ ܗ̄ܽܘ ܥܰܡܰܝܕ̥ܳܟ̥، ܕܡܰܪܚ݄ܩ ܗ̄ܰܢ ܐܽܘܪ̈ܕܥܶܐ ܡܶܢܳܟ̥ ܘܡܽܗ̄ܘ ܒܰܝܬܰܝܕ̥ܳܟ̥؟“ 10ܘܐܡ݄ܪ ܠܶܗ ܠܶܗ: ”ܪܰܡܚ݄ܠ.“ ܘܐܡ݄ܪ ܠܶܗ ܠܶܗ: ”ܐܟ̥ ܕܽܗ̄ܘ ܡܰܐܡܪܰܝܕ̥ܳܟ̥، ܠܰܫܰܢ ܕ݄ܐܕ̥ܥܰܬ ܕܠܰܝܬ ܐܟ̥ ܕܡܳܪܝܳܐ ܐܰܠܳܗܰܝܕ̥ܰܢ. 11ܘܓ݄ܕܪܳܚܩܺܝ ܗ̄ܰܢ ܐܽܘܪ̈ܕܥܶܐ ܡܶܢܳܟ̥ ܘܡܽܗ̄ܘ ܒܰܝܬܰܝܕ̥ܳܟ̥ ܘܡܰܢ̱ ܓܪ̈ܶܝܥܰܝܕ̥ܳܟ̥ ܘܡܽܗ̄ܘ ܥܰܡܰܝܕ̥ܳܟ̥. ܘܒܽܗ̄ܘ ܢܰܗܪܳܐ ܒܶܠܚܽܘܕ̥ܶܗ ܓܦܰܝܫܺܝ.“ 12ܘܢܰܦܺܝܩܺܝ ܡܽܘܫܶܐ ܘܰܐܗܪܽܘܢ ܡܶܢ̱ ܓܰܒ ܦܶܪܥܽܘܢ. ܘ݄ܡܨܰܠܶܐ ܠܶܗ ܡܽܘܫܶܐ ܩ݄ܕ̱ܡ ܡܳܪܝܳܐ ܠܰܫܰܢ ܗ̄ܰܢ ܐܽܘܪ̈ܕܥܶܐ ܕܡܰܝܬܶܐ ܠܶܗ ܥܰܠ ܦܶܪܥܽܘܢ. 13ܘܣ݄ܡ ܠܶܗ ܡܳܪܝܳܐ ܐܟ̥ ܕܽܗ̄ܘ ܡܰܐܡܪܳܐ ܕܡܽܘܫܶܐ. ܘܡܰܝܺܝܬ̥ܺܝ ܗ̄ܰܢ ܐܽܘܪ̈ܕܥܶܐ ܡܰܢ̱ ܒّܳܬ̈ܶܐ ܘܡܰܢ̱ ܕّܳܪ̈ܳܬ̥ܳܐ ܘܡܰܢ̱ ܚّܰܩ̈ܠܶܐ. 14ܘܡܰܠܬ݄ܡ݄ܢّܶܗ ܠܶܗ ܠܰܘܡ̈ܶܐ ܠܰܘܡ̈ܶܐ، ܘܣܰܪܝܳܐ ܗ̄ܺܝ ܐܰܪܥܳܐ.
15ܘ݄ܚܙܶܐ ܠܶܗ ܦܶܪܥܽܘܢ ܕܗܰܘܺܝ ܬ̥ܢܺܝܚܽܘܬ̥ܳܐ، ܘܡܰܩܫܶܐ ܠܶܗ ܠܶܒܶܗ ܘܠܳܐ ܫܰܡ݄ܥّܶܗ، ܐܟ̥ ܕܐܡ݄ܪ ܠܶܗ ܡܳܪܝܳܐ ܠܡܽܘܫܶܐ. 16ܘܐܡ݄ܪ ܠܶܗ ܡܳܪܝܳܐ ܠܡܽܘܫܶܐ: ”ܐܡܰܪ ܠܰܐܗܪܽܘܢ: ܡܰܥܠܰܝ ܗ̄ܺܝ ܚܰܛܪܰܝܕ̥ܳܟ̥ ܘ݄ܡܚܰܝ ܠܽܗ̄ܘ ܥܰܦܪܳܐ ܕܺܗ̄ܝ ܐܰܪܥܳܐ، ܘ݄ܓܕܳܗ̄ܘܶܐ ܩܰܠܡܳܐ ܒܟܽܘܠܰܗ ܗ̄ܺܝ ܐܰܪܥܳܐ ܕܡܶܨܪܶܝܢ.“ 17ܘܣ݄ܡ ܠܶܗ ܗܰܘܟ̥ܰܐ. ܘܡܰܥܠܶܐ ܠܶܗ ܐܰܗܪܽܘܢ ܐܺܝܕ̥ܶܗ ܒܺܗ̄ܝ ܚܰܛܪܰܝܕ̥ܶܗ، ܘ݄ܡܚܶܐ ܠܶܗ ܠܽܗ̄ܘ ܥܰܦܪܳܐ ܕܺܗ̄ܝ ܐܰܪܥܳܐ. ܘܗܰܘܺܝ ܩܰܠܡܳܐ ܒܰܗ̄ܢ ܢܳܫ̈ܶܐ ܘܒܰܚّܰܝ̈ܘܳܬ̥ܳܐ. ܘܟܽܘܠܶܗ ܗ̄ܽܘ ܥܰܦܪܳܐ ܕܺܗ̄ܝ ܐܰܪܥܳܐ ܗܰܘܺܝ ܐܶܒܶܗ ܩܰܠܡܳܐ ܒܟܽܘܠܰܗ ܗ̄ܺܝ ܐܰܪܥܳܐ ܕܡܶܨܪܶܝܢ. 18ܘܗܰܘܟ̥ܰܐ ܣܬܶܝ ܣ݄ܡّܶܗ ܗ̄ܰܚّܰܪ̈ܳܫܶܐ ܒܰܚّܶܪ̈ܫܰܬّ̥ܶܗ ܘܠܳܐ ܩܰܕܺܝܪܺܝ ܕܡܰܪܚܩܺܝ ܗ̄ܺܝ ܩܰܠܡܳܐ. ܗܰܘܺܝ ܩܰܠܡܳܐ ܒܰܗ̄ܢ ܢܳܫ̈ܶܐ ܘܒܰܚّܰܝ̈ܘܳܬ̥ܳܐ. 19ܘܐܡ݄ܪّܶܗ ܗ̄ܰܚّܰܪ̈ܳܫܶܐ ܠܦܶܪܥܽܘܢ: ”ܗ̄ܺܝ ܨܰܒ̥ܥܳܐ ܕܰܐܠܳܗܳܐ ܝܳܐ.“ ܘܩܰܫܺܝ ܠܶܒܶܗ ܕܦܶܪܥܽܘܢ ܘܠܳܐ ܫܰܡ݄ܥّܶܗ ܐܟ̥ ܕܐܡ݄ܪ ܠܶܗ ܡܳܪܝܳܐ. 20ܘܐܡ݄ܪ ܠܶܗ ܡܳܪܝܳܐ ܠܡܽܘܫܶܐ: ”ܒܨܰܦܪܳܐ ܩܶܕܰܡܬܳܐ ܩܘ̇ܡ ܩ݄ܕ̱ܡ ܦܶܪܥܽܘܢ. ܟܰܐܠܶܗ ܟܢܳܦ݄ܩ ܠܰܡّܰܝ̈ܶܐ، ܘܐܡܰܪ ܠܶܗ: ܗܰܘܟ̥ܰܐ ܡܳܪܝܳܐ ܟܳܐܡ݄ܪ: ܡܫܰܕ݄ܪ ܗ̄ܽܘ ܥܰܡܰܝܕ̥ܺܝ ܕܥܳܒܰܕ ܠܺܝ. 21ܘ݄ܕܠܳܐ ܐܒܥܰܬ ܕ݄ܡܫܰܕܪܰܬ ܗ̄ܽܘ ܥܰܡܰܝܕ̥ܺܝ، ܟܰܐܠܺܝ ܓ݄ܡܫܰܕܰܪ ܐ̱ܢܳܐ ܐܰܥܠܳܟ̥ ܘܥܰܠ ܗ̄ܽܘ ܥܰܡܰܝܕ̥ܳܟ̥ ܘܥܰܠ ܗ̄ܰܒّܳܬܰܝ̈ܕ̥ܳܟ̥ ܕ݄ܕܒ̥ܳܢ̈ܶܐ ܡܶܢ̱ ܟܘ̇ܠ ܓܶܢܣܳܐ، ܘ݄ܟܡ݄ܡܠ݄ܢ ܗ̄ܰܒّܳܬ̈ܶܐ ܕܰܡّܶܨܪ̈ܳܝܶܐ ܕ݄ܕܒ̥ܳܢ̈ܶܐ ܐܟ̥ ܕܺܗ̄ܝ ܐܰܪܥܳܐ ܕܟ݄ܬܢܶܝ ܐܰܥܠܰܗ. 22ܘܓ݄ܕܦܳܪܰܫ ܐ̱ܢܳܐ ܒܽܗ̄ܘ ܝܰܘܡܰܘܳܐ ܠܺܗ̄ܝ ܐܰܪܥܳܐ ܕܓܶܫܳܢ ܕ݄ܟܝܳܬܽܒ̥ ܐܶܒܰܗ ܗ̄ܽܘ ܥܰܡܰܝܕ̥ܺܝ ܕܠܳܐ ܗ̄ܘܶܐ ܬܰܡܳܐ ܕ݄ܕܒ̥ܳܢ̈ܶܐ، ܠܰܫܰܢ ܕ݄ܐܕ̥ܥܰܬ ܕܳܐܢܳܐ ܐ̱ܢܳܐ ܡܳܪܝܳܐ ܒܓܰܘܰܗ ܕܺܗ̄ܝ ܐܰܪܥܳܐ. 23ܘ݄ܓܣܳܝܰܡ ܐ̱ܢܳܐ ܦܽܘܪܫܳܢܳܐ ܒܰܝܢ ܗ̄ܽܘ ܥܰܡܰܝܕ̥ܺܝ ܘܠܽܗ̄ܘ ܥܰܡܰܝܕ̥ܳܟ̥. ܘܪܰܡܚ݄ܠ ܓܕܽܗ̄ܘܝܳܐ ܗ̄ܺܝ ܐܳܬ̥ܰܬ̥ܶܐ.“ 24ܘܣ݄ܡ ܠܶܗ ܡܳܪܝܳܐ ܗܰܘܟ̥ܰܐ. ܘܡܰܝܬܶܐ ܠܶܗ ܕ݄ܕܒ̥ܳܢ̈ܶܐ ܚܺܝ̈ܨܶܐ ܥܰܠ ܗ̄ܽܘ ܒܰܝܬܳܐ ܕܦܶܪܥܽܘܢ ܘܥܰܠ ܗ̄ܰܒّܳܬ̈ܶܐ ܕܰܓܪ̈ܶܝܥܰܝܕ̥ܶܗ، ܘ݄ܒܟܽܘܠܰܗ ܗ̄ܺܝ ܐܰܪܥܳܐ ܕܡܶܨܪܶܝܢ، ܘܚܰܪܺܝܒ̥ܳܐ ܗ̄ܺܝ ܐܰܪܥܳܐ ܡܰܢ̱ ܕّܶܕܒ̥ܳܢ̈ܶܐ.
25ܘ݄ܩܪܶܐ ܠܶܗ ܦܶܪܥܽܘܢ ܠܡܽܘܫܶܐ ܘܠܰܐܗܪܽܘܢ، ܘܐܡ݄ܪ ܠܰܗ ܠّܶܗ: ”ܙܳܟ̥ܽܘ ܡܕܰܒܶܚܽܘ ܩ݄ܕ̱ܡ ܡܳܪܝܳܐ ܐܰܠܳܗܰܬ̥ܟ̥ܽܘ ܒܺܗ̄ܝ ܐܰܪܥܳܐ (ܕܡܶܨܪܶܝܢ).“ 26ܘܐܡ݄ܪ ܠܶܗ ܡܽܘܫܶܐ: ”ܠܰܝ̱ܬ ܝܳܐ ܫܰܦܺܝܪܳܐ ܕܗܰܘܟ̥ܰܐ ܣܰܝܡܺܝܢܰܐ، ܡܺܐܝܕ̥ܶܗ ܕܽܗ̄ܘ ܡܶܕܶܐ ܕܟ݄ܬܝܳܐ ܡܚܰܪܡܳܐ ܓܰܒ ܗ̄ܰܡّܶܨܪ̈ܳܝܶܐ ܓܕܳܒܚܺܝܢܰܐ ܠܡܳܪܝܳܐ ܐܰܠܳܗܰܝܕ̥ܰܢ. ܘܶܐܢ ܕܕܳܒܚܺܝܢܰܐ ܩ݄ܕ̱ܡ ܥܰܝ̈ܢܰܝّܶܗ ܗ̄ܽܘ ܡܶܕܶܐ ܕܟ݄ܬܝܳܐ ܡܩܰܕܫܳܐ ܓܰܒ ܗ̄ܰܡّܶܨܪ̈ܳܝܶܐ، ܓܪܳܓܡܺܝ ܠܰܢ. 27ܗܰܠܟ̥ܳܐ ܕ݄ܬܠܳܬ̥ܳܐ ܝܰܘܡ̈ܶܐ ܓܕ݄ܐܙّܰܢ ܠܽܗ̄ܘ ܡܰܕ̥݄ܒܪܳܐ، ܘܕܳܒܚܺܝܢܰܐ ܠܡܳܪܝܳܐ ܐܰܠܳܗܰܝܕ̥ܰܢ، ܐܟ̥ ܕܳܐܡܰܪ ܠܰܢ.“ 28ܘܐܡ݄ܪ ܠܶܗ ܦܶܪܥܽܘܢ: ”ܐܳܢܳܐ ܓ݄ܡܫܰܕܰܪ ܐ̱ܢܳܐ ܠܟ̥ܽܘ ܕܕܳܒܚܺܝܬܽܘ ܠܡܳܪܝܳܐ ܐܰܠܳܗܰܬ̥ܟ̥ܽܘ ܒܽܗ̄ܘ ܡܰܕ̥݄ܒܪܳܐ، ܐܶܠܳܐ ܪܽܘܚܩܳܐ ܠܳܐ ܪܳܚܩܺܝܬܽܘ ܒܽܗ̄ܘ ܡܰܐܙܠܳܐ، ܘ݄ܡܨܰܠܶܝܽܘ ܐܰܥܠܺܝ ܣܬܶܝ.“ 29ܘܐܡ݄ܪ ܠܶܗ ܡܽܘܫܶܐ ܠܦܶܪܥܽܘܢ: ”ܟܰܐܠܺܝ ܓܢܳܦܰܩ ܐ̱ܢܳܐ ܡܶܢ̱ ܣܺܝܕܳܟ̥، ܘܓ݄ܡܨܰܠܶܐ ܐ̱ܢܳܐ ܠܡܳܪܝܳܐ ܠܰܫܰܢ ܕܡܰܪܚ݄ܩ ܗ̄ܰܕّܶܕܒ̥ܳܢ̈ܶܐ ܡܶܢ̱ ܦܶܪܥܽܘܢ ܘܡܰܢ̱ ܓܪ̈ܶܝܥܰܝܕ̥ܶܗ ܘܡܽܗ̄ܘ ܥܰܡܰܝܕ̥ܶܗ ܪܰܡܚ݄ܠ. ܐܶܠܳܐ ܟܳܐܒܰܥ ܐ̱ܢܳܐ ܕܠܳܐ ܕܳܥ݄ܪ ܡܕܰܓ݄ܠ ܦܶܪܥܽܘܢ، ܘ݄ܕܠܳܐ ܡܫܰܕ݄ܪ ܗ̄ܽܘ ܥܰܡܳܐ ܘܕܳܒܚܺܝ ܠܡܳܪܝܳܐ.“
30ܘܢܰܦ݄ܩ ܡܽܘܫܶܐ ܡܶܢ̱ ܩܽܘܕ̱ܡܶܗ ܕܦܶܪܥܽܘܢ، ܘ݄ܡܨܰܠܶܐ ܠܶܗ ܠܡܳܪܝܳܐ. 31ܘܣ݄ܡ ܠܶܗ ܡܳܪܝܳܐ ܐܟ̥ ܕܽܗ̄ܘ ܡܰܐܡܪܳܐ ܕܡܽܘܫܶܐ، ܘܡܰܪܚܰܩ ܠܶܗ ܗ̄ܰܕّܶܕܒ̥ܳܢ̈ܶܐ ܡܶܢ̱ ܦܶܪܥܽܘܢ ܘܡܰܢ̱ ܓܪ̈ܶܝܥܰܝܕ̥ܶܗ ܘܡܽܗ̄ܘ ܥܰܡܰܝܕ̥ܶܗ. ܘܠܳܐ ܦܰܝ݄ܫ ܘܠܳܐ ܚܰܕ̱. 32ܘܗܰܢ ܢܰܩܠܐ ܣܬܶܝ ܩܰܫܺܝ ܠܶܒܶܗ ܕܦܶܪܥܽܘܢ، ܘܠܳܐ ܡܫܰܕܰܪ ܠܶܗ ܗ̄ܽܘ ܥܰܡܳܐ.
Currently Selected:
ܣܶܦܪܳܐ ܕܡܰܦܩܳܢܳܐ 8: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
