ܣܶܦܪܳܐ ܕܡܰܦܩܳܢܳܐ 24
24
1ܘ݄ܠܡܽܘܫܶܐ ܐܡ݄ܪ ܠܶܗ: ”ܣܠܰܩ ܠܓܰܒ ܡܳܪܝܳܐ، ܗܰܬ ܘܰܐܗܪܽܘܢ ܘܢܳܕܳܒ ܘܰܐܒܺܝܗܽܘ ܘܫܰܒ̥ܥܺܝ ܓܰܒ̥ܪ̈ܶܐ ܡܰܢ̱ ܣّܳܒ̥̈ܶܐ ܕܺܐܝܣܪܳܐܶܝܠ، ܘܣܳܓ̥ܕܺܝܬܽܘ ܡܶܢ̱ ܪܽܘܚܩܳܐ. 2ܘ݄ܛܪܳܐ ܡܽܘܫܶܐ ܡܩܰܕ݄ܡ ܩܽܘܕ̱ܡܶܗ ܕܡܳܪܝܳܐ ܒܶܠܚܽܘܕ̥ܶܗ، ܘܗ݄ܢّܶܝ ܠܳܐ ܡܩܰܕܡܺܝ، ܘܽܗ̄ܘ ܥܰܡܳܐ ܠܳܐ ܣܳܠ݄ܩ ܐܰܥܡܶܗ.“
3ܘܰܐܬ̥ܺܝ ܡܽܘܫܶܐ ܘܐܡ݄ܪ ܠܶܗ ܠܽܗ̄ܘ ܥܰܡܳܐ ܟܽܘܠّܶܗ ܗ̄ܰܡّܰܐܡܪ̈ܶܐ ܕܡܳܪܝܳܐ ܘܟܽܘܠّܶܗ ܗ̄ܰܩّܳܢܽܘܢ̈ܶܐ. ܘܡܰܙܥܰܩ ܠܶܗ ܗ̄ܽܘ ܥܰܡܳܐ ܟܽܘܠܶܗ ܒܚܰܕ̱ ܩܳܠܳܐ ܘܐܡ݄ܪّܶܗ: ”ܟܘ̇ܠ ܡܶܕܶܐ ܕܐܡ݄ܪ ܠܶܗ ܡܳܪܝܳܐ ܓܣܰܝܡܺܝܢܰܐ.“ 4ܘ݄ܟܬ̥ܽܒ̥ ܠܶܗ ܡܽܘܫܶܐ ܟܽܘܠّܶܗ ܗ̄ܰܡّܰܐܡܪ̈ܶܐ ܕܡܳܪܝܳܐ. ܘ݄ܡܩܰܕܰܡ ܠܶܗ ܒܨܰܦܪܳܐ ܘ݄ܒܢܶܐ ܠܶܗ ܡܰܕ̥݄ܒܚܳܐ ܒ݄ܫܦܽܘ̈ܠܶܗ ܕܽܗ̄ܘ ܛܽܘܪܳܐ ܘ݄ܬܪܰܥܣܰܪ ܥܰܡܽܘܕ̈ܶܐ ܠܰܬܪܰܥܣܰܪ ܫܰܒ̈ܛܶܐ ܕܺܐܝܣܪܳܐܶܝܠ. 5ܘ݄ܡܫܰܕܰܪ ܠܶܗ ܥܠܰܝܡ̈ܶܐ ܡܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܘܡܰܣܠܰܩّܶܗ ܝܰܩܕ̈ܶܐ ܟܰܡܺܝ̈ܠܶܐ، ܘ݄ܕܒ݄ܚّܶܗ ܕܶܒܚ̈ܶܐ ܟܰܡܺܝ̈ܠܶܐ ܬܰܘܪ̈ܶܐ ܠܡܳܪܝܳܐ. 6ܘܡ݄ܕ ܠܶܗ ܡܽܘܫܶܐ ܦܰܠܓܶܗ ܕܽܗ̄ܘ ܐܰܕܡܳܐ ܘ݄ܪܡܶܐ ܠܶܗ ܒܽܗ̄ܘ ܣܶܦܳܩܳܐ، ܘܦܰܠܓܶܗ ܕܽܗ̄ܘ ܐܰܕܡܳܐ ܡܰܪ݄ܣ ܠܶܗ ܥܰܠ ܗ̄ܽܘ ܡܰܕ̥݄ܒܚܳܐ. 7ܘܡ݄ܕ ܠܶܗ ܗ̄ܽܘ ܟܬ̥ܳܒ̥ܳܐ ܕܽܗ̄ܘ ܩܝܳܡܳܐ ܘ݄ܩܪܶܐ ܠܶܗ ܩ݄ܕ̱ܡ ܗ̄ܽܘ ܥܰܡܳܐ. ܘܐܡ݄ܪّܶܗ: ”ܟܘ̇ܠ ܡܶܕܶܐ ܕܐܡ݄ܪ ܠܶܗ ܡܳܪܝܳܐ ܓܫܳܡܥܺܝܢܰܐ ܘܣܰܝܡܺܝܢܰܐ.“ 8ܘܡ݄ܕ ܠܶܗ ܡܽܘܫܶܐ ܐܰܕܡܳܐ ܘܡܰܪ݄ܣ ܠܶܗ ܥܰܠ ܗ̄ܽܘ ܥܰܡܳܐ ܘܐܡ݄ܪ ܠܶܗ: ”ܗܰܢܳܐ ܝܳܐ ܗ̄ܽܘ ܐܰܕܡܳܐ ܕܽܗ̄ܘ ܩܝܳܡܳܐ ܕܡܰܩ݄ܡ ܠܶܗ ܡܳܪܝܳܐ ܐܰܥܡܰܝܟ̥ܽܘ ܥܰܠ ܟܽܘܠّܶܗ ܗ̄ܰܡّܰܐܡܪ̈ܰܢܺܝ.“ 9ܘܣܰܠܺܝܩܺܝ ܡܽܘܫܶܐ ܘܰܐܗܪܽܘܢ ܘܢܳܕܳܒ ܘܰܐܒܺܝܗܽܘ ܘܫܰܒ̥ܥܺܝ ܣܳܒ̥̈ܶܐ ܡܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ. 10ܘ݄ܚܙܰܠّܶܗ ܠܰܐܠܳܗܳܐ ܕܺܐܝܣܪܳܐܶܝܠ. ܘܬܰܚܬܶܗ ܪ̈ܰܓ̥ܠܳܬ̥ܶܗ ܐܟ̥ ܕܺܗ̄ܝ ܒܶܪܽܘܠܳܐ ܫܦܺܝܬ̥ܳܐ، ܘ݄ܐܟ̥ ܕܽܗ̄ܘ ܓܰܘܢܳܐ ܫܰܦܝܳܐ ܕܺܗ̄ܝ ܫܡܰܝܳܐ ܫܦܺܝܬ̥ܳܐ. 11ܘܥܰܠ ܗ̄ܰܣّܳܒ̥̈ܶܐ ܕܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܠܳܐ ܦܫ݄ܛ ܠܶܗ ܐܺܝܕ̥ܶܗ. ܘ݄ܚܙܰܠّܶܗ ܠܰܐܠܳܗܳܐ ܘܰܐܟ̥݄ܠّܶܗ ܘ݄ܫܬܰܠّܶܗ.
12ܘܐܡ݄ܪ ܠܶܗ ܡܳܪܝܳܐ ܠܡܽܘܫܶܐ: ”ܣܠܰܩ ܠܣܺܝܕܺܝ ܠܽܗ̄ܘ ܛܽܘܪܳܐ ܘ݄ܗܘܰܝ ܬܰܡܳܐ، ܘ݄ܓܕܳܗ̄ܒܶܢܳܟ̥ ܗ̄ܰܠّܽܘܚ̈ܶܐ ܕܺܗ̄ܝ ܟܶܐܦܳܐ ܘܰܗ̄ܢ ܢܳܡܽܘܣ̈ܶܐ ܘܰܦّܽܘܩܕ̈ܳܢܶܐ ܕ݄ܟܬ̥ܺܝܒ̥ܺܝ ܠܺܝ ܕܡܰܘܠܦܰܬّܶܗ ܢܶܝ.“ 13ܘܩܰܝ݄ܡ ܡܽܘܫܶܐ ܘܗܽܘܫܳܥ ܗ̄ܽܘ ܡܫܰܡܫܳܢܰܝܕ̥ܶܗ، ܘܣܰܠ݄ܩ ܡܽܘܫܶܐ ܠܽܗ̄ܘ ܛܽܘܪܳܐ ܕܰܐܠܳܗܳܐ. 14ܘܐܡ݄ܪ ܠܶܗ ܠܰܣّܳܒ̥̈ܶܐ: ”ܢܛܰܪܽܘ ܠܰܢ ܗܰܪܟܶܐ ܗ݄ܠ ܕܳܥܪܺܝܢܰܐ ܠܣܺܝܕܰܝܟ̥ܽܘ. ܘܟܰܐܠܶܗ ܐܰܗܪܽܘܢ ܘܚܽܘܪ ܐܰܥܡܰܝܟ̥ܽܘ، ܡܰܢ ܕܟ݄ܬ ܠܶܗ ܡܰܐܡܪܳܐ ܛܪܳܐ ܐܬ̥ܶܐ ܠܣܺܝܕܰܝّܶܗ.“
15ܘܣܰܠ݄ܩ ܡܽܘܫܶܐ ܠܽܗ̄ܘ ܛܽܘܪܳܐ، ܘܽܗ̄ܘ ܥܰܝܡܳܐ ܡܟܰܣܶܐ ܠܶܗ. 16ܘܢܰܚ݄ܬ ܗ̄ܽܘ ܫܽܘܒܚܳܐ ܕܡܳܪܝܳܐ ܥܰܠ ܗ̄ܽܘ ܛܽܘܪܳܐ ܕܣܺܝܢܰܝ. ܘܽܗ̄ܘ ܥܰܝܡܳܐ ܡܟܰܣܶܐ ܠܶܗ ܐ݄ܫܬܳܐ ܝܰܘܡ̈ܶܐ. ܘ݄ܩܪܶܐ ܠܶܗ ܡܳܪܝܳܐ ܠܡܽܘܫܶܐ ܒܽܗ̄ܘ ܝܰܘܡܳܐ ܕܰܫّܰܒ̥ܥܳܐ ܡܶܢ̱ ܓܰܘܶܗ ܕܽܗ̄ܘ ܥܰܝܡܳܐ. 17ܘ݄ܚܙܶܐ ܠܶܗ ܗ̄ܽܘ ܫܽܘܒܚܳܐ ܕܡܳܪܝܳܐ ܐܟ̥ ܕܺܗ̄ܝ ܢܽܘܪܳܐ ܕܟܳܕܳܠܩܳܐ ܒܪܺܝܫܶܗ ܕܽܗ̄ܘ ܛܽܘܪܳܐ ܠܩܽܒ̥ܠ ܥܰܝܢܶܗ ܕܟܽܘܠّܶܗ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ. 18ܘܥܰܒ݄ܪ ܡܽܘܫܶܐ ܠܓܰܘܶܗ ܕܽܗ̄ܘ ܥܰܝܡܳܐ ܘܣܰܠ݄ܩ ܠܽܗ̄ܘ ܛܽܘܪܳܐ، ܘܦܰܝ݄ܫ ܡܽܘܫܶܐ ܒܽܗ̄ܘ ܛܽܘܪܳܐ ܐܰܪܒܥܺܝ ܝܰܘܡ̈ܶܐ ܘܰܐܪܒܥܺܝ ܠܰܠܝ̈ܶܐ.
Currently Selected:
ܣܶܦܪܳܐ ܕܡܰܦܩܳܢܳܐ 24: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
