ܣܶܦܪܳܐ ܕܡܰܦܩܳܢܳܐ 20
20
1ܘܐܡ݄ܪ ܠܶܗ ܐܰܠܳܗܳܐ ܟܽܘܠّܶܗ ܗ̄ܰܡّܰܐܡܪ̈ܰܢܺܝ: 2”ܐܳܢܳܐ ܐ̱ܢܳܐ ܡܳܪܝܳܐ ܐܰܠܳܗܰܝܕ̥ܳܟ̥̥ ܕܡܰܣܠܰܩ ܠܺܝ ܠܳܟ̥ ܡܺܗ̄ܝ ܐܰܪܥܳܐ ܕܡܶܨܪܶܝܢ، ܡܽܗ̄ܘ ܐܰܬ̥ܪܳܐ ܕܺܗ̄ܝ ܓܪܰܥܝܽܘܬ̥ܳܐ، 3ܠܳܐ ܗ̄ܘ݄ܢ ܠܳܟ̥ ܐܰܠܳܗ̈ܶܐ ܚܪ̈ܶܢܶܐ ܣܛܰܪ ܡܶܢܺܝ. 4ܠܳܐ ܣܰܝܡܰܬ ܠܳܟ̥ ܐܰܝܢܰܐ ܨܰܠܡܳܐ ܐܰܘ ܐܰܝܢܰܐ ܨܽܘܪܬܳܐ ܕܟܺܝܬ ܒܺܗ̄ܝ ܫܡܰܝܳܐ ܡܶܢ̱ ܠܰܠܥ݄ܠ، ܘ݄ܕܟܺܝܬ ܒܺܗ̄ܝ ܐܰܪܥܳܐ ܡܶܢ̱ ܠܰܠܬܰܚ، ܘ݄ܕܟܺܝܬ ܒܰܡّܰܝ̈ܶܐ ܕܠܰܠܬܰܚ ܡܺܗ̄ܝ ܐܰܪܥܳܐ، 5ܠܳܐ ܣܳܓ̥ܕܰܬّܶܗ ܘܠܳܐ ܥܳܒܕܰܬّܶܗ، ܡܺܐܝܕ̥ܶܗ ܕܳܐܢܳܐ ܐ̱ܢܳܐ ܡܳܪܝܳܐ ܐܰܠܳܗܰܝܕ̥ܳܟ̥̥، ܐܰܠܳܗܳܐ ܛܰܢܳܢܳܐ، ܟܳܡܥܰܩܰܒ ܐ̱ܢܳܐ ܗ̄ܰܢ ܐܰܒܢ̈ܶܐ ܥܰܠ ܗ̄ܰܚܛܳܗ̈ܶܐ ܕܰܒّܰܒ̈ܶܐ ܗ݄ܠ ܬܠܳܬ̥ܳܐ ܐܰܘ ܐܰܪܒܥܳܐ ܕܳܪ̈ܶܐ ܠܰܗ̄ܢܺܝ ܕܟܳܚܳܛ݄ܢ ܠܺܝ. 6ܘܟܳܣܳܝܰܡ ܐ̱ܢܳܐ ܛܰܝܒܽܘܬ̥ܳܐ ܠܰܐܠܦܳܐ ܕܳܪ̈ܶܐ ܥܰܡ ܗܰܢܺܝ ܕܟܳܪܳܚܡܺܝ ܠܺܝ ܘܟܳܢܳܛܪܺܝ ܗ̄ܰܦّܽܘܩܕ̈ܳܢܰܝܕ̥ܺܝ. 7ܠܳܐ ܝܳܡܰܬ ܒ݄ܐܫܡܶܗ ܕܡܳܪܝܳܐ ܐܰܠܳܗܰܝܕ̥ܳܟ̥̥ ܒܰܕّܽܘܓ̈ܠܶܐ، ܡܺܐܝܕ̥ܶܗ ܕܠܳܐ ܓ݄ܡܒܰܪܶܐ ܡܳܪܝܳܐ ܗ̄ܽܘ ܚܰܕ̱ ܕܝܳܡܶܐ ܒ݄ܐܫܡܶܗ ܒܰܕّܽܘܓ̈ܠܶܐ. 8ܢܛܰܪ ܝܰܘܡܶܗ ܕܫܰܒܬ̥ܳܐ ܕ݄ܡܩܰܕܫܰܬ ܠܶܗ. 9ܐ݄ܫܬܳܐ ܝܰܘܡ̈ܶܐ ܟܥܳܒ̥ܕܰܬ ܘܣܰܝܡܰܬ ܟܽܘܠܶܗ ܗ̄ܽܘ ܥܒ̥ܳܕܰܝܕ̥ܳܟ̥. 10ܘܽܗ̄ܘ ܝܰܘܡܳܐ ܕܰܫّܰܒ̥ܥܳܐ ܫܰܒܬ̥ܳܐ ܠܡܳܪܝܳܐ ܐܰܠܳܗܰܝܕ̥ܳܟ̥̥ ܝܳܐ. ܠܳܐ ܣܰܝܡܰܬ ܐܶܒܶܗ ܐܰܝܢܰܐ ܥܒ̥ܳܕܳܐ، ܗܰܬ ܘܽܗ̄ܘ ܐܰܒܪܰܝܕ̥ܳܟ̥ ܘܺܗ̄ܝ ܒܰܪܬ̥ܰܝܕ̥ܳܟ̥ ܘܽܗ̄ܘ ܓܪܶܝܥܰܝܕ̥ܳܟ̥ ܘܺܗ̄ܝ ܓܪܰܥܬܰܝܕ̥ܳܟ̥، ܘܰܚّܰܝ̈ܘܳܬ̥ܰܝܕ̥ܳܟ̥، ܘܽܗ̄ܘ ܢܽܘܟ̥ܪܳܝܳܐ ܕܒܰܡܕ̥ܺܝܢ̈ܳܬ̥ܰܝܕ̥ܳܟ̥. 11ܡܺܐܝܕ̥ܶܗ ܕܒ݄ܐܫܬܳܐ ܝܰܘܡ̈ܶܐ ܣ݄ܡ ܠܶܗ ܡܳܪܝܳܐ ܗ̄ܺܝ ܫܡܰܝܳܐ ܘܺܗ̄ܝ ܐܰܪܥܳܐ، ܘܰܝّܰܡ̈ܶܐ ܘܟܘ̇ܠ ܕܟܺܝܬ ܐܰܒّܶܗ، ܘ݄ܬ̥ܢܺܝܚ ܒܽܗ̄ܘ ܝܰܘܡܳܐ ܕܰܫّܰܒ̥ܥܳܐ. ܡܰܗ̄ܘܟ̥ܰܐ ܡܳܪܝܳܐ ܡܒܰܪܰܟ̥ ܠܶܗ ܗ̄ܽܘ ܝܰܘܡܳܐ ܕܰܫّܰܒ̥ܥܳܐ ܘ݄ܡܩܰܕܰܫ ܠܶܗ. 12ܡܝܰܩ݄ܪ ܠܒܰܒܳܟ̥ ܘܠܶܐܡܳܟ̥ ܕܙܰܝܕܺܝ ܗ̄ܰܝّܰܘܡ̈ܰܝܕ̥ܳܟ̥ ܒܺܗ̄ܝ ܐܰܪܥܳܐ ܕ݄ܓܕܳܗ̄ܒܶܐ ܠܳܟ̥ ܡܳܪܝܳܐ ܐܰܠܳܗܰܝܕ̥ܳܟ̥̥. 13ܠܳܐ ܩܳܛܠܰܬ. 14ܠܳܐ ܙܳܢܰܬ (ܓܰܝܪܰܬ). 15ܠܳܐ ܓܳܢܒ̥ܰܬ. 16ܠܳܐ ܣܳܗܕܰܬ ܥܰܠ ܚܰܒ̥ܪܳܟ̥ ܣܳܗܕܽܘܬ̥ܳܐ ܕܰܓܳܠܬܳܐ. 17ܠܳܐ ܪܰܝܓܰܬ ܗ̄ܽܘ ܒܰܝܬܳܐ ܕܚܰܒ̥ܪܳܟ̥. ܠܳܐ ܪܰܝܓܰܬ ܗ̄ܺܝ ܐܰܢ̱ܬ̥ܬܳܐ ܕܚܰܒ̥ܪܳܟ̥ ܘܽܗ̄ܘ ܓܪܶܝܥܰܝܕ̥ܶܗ ܘܺܗ̄ܝ ܓܪܰܥܬܰܝܕ̥ܶܗ، ܘܽܗ̄ܘ ܬܰܘܪܰܝܕ̥ܶܗ ܘܽܗ̄ܘ ܚܡܳܪܰܝܕ̥ܶܗ، ܘܟܘ̇ܠ ܡܶܕܶܐ ܕܟܺܝܬ ܠܽܗ̄ܘ ܚܰܒ̥ܪܰܝܕ̥ܳܟ̥.“
18ܘܟܽܘܠܶܗ ܗ̄ܽܘ ܥܰܡܳܐ ܚܳܙܶܐ ܗ̄ܘܰܐ ܗ̄ܰܩّܳܠ̈ܶܐ (ܕܰܒّܰܪ̈ܩܶܐ) ܘܰܫܪ̈ܳܓ̥ܶܐ، ܘܽܗ̄ܘ ܩܳܠܳܐ ܕܺܗ̄ܝ ܩܰܪܢܳܐ، ܘܽܗ̄ܘ ܛܽܘܪܳܐ ܕܟܳܡܰܘܦ݄ܩ ܬܶܢܳܢܳܐ. ܘ݄ܚܙܶܐ ܠܶܗ ܗ̄ܽܘ ܥܰܡܳܐ ܘܙܰܝ݄ܥ، ܘܩܰܝܺܝܡܺܝ ܡܶܢ̱ ܪܽܘܚܩܳܐ. 19ܘܐܡ݄ܪّܶܗ ܠܡܽܘܫܶܐ: ”ܗܰܬ ܡ݄ܫܓ̥݄ܠ ܐܰܥܡܰܢ ܘܓ݄ܕܫܳܡܥܺܝܢܰܐ. ܘܠܳܐ ܡ݄ܫܓ̥݄ܠ ܐܰܥܡܰܢ ܐܰܠܳܗܳܐ ܕܠ݄ܐ ܐܙّܰܢ ܡܰܝܬ̥ܺܝܢܰܐ.“ 20ܘܐܡ݄ܪ ܠܶܗ ܡܽܘܫܶܐ ܠܽܗ̄ܘ ܥܰܡܳܐ: ”ܠܳܐ ܙܰܝܥܺܝܬܽܘ، ܠܰܫܰܢ ܗ̄ܽܘ ܢܶܣܝܽܘܢܰܬ̥ܟ̥ܽܘ ܐܰܬ̥ܺܝ ܐܰܠܳܗܳܐ ܘܠܰܫܰܢ ܕܳܗ̄ܘܝܳܐ ܗ̄ܺܝ ܙܽܘܥܬܰܝܕ̥ܶܗ ܩ݄ܕ̱ܡ ܦ̈ܳܬ̥ܰܝܟ̥ܽܘ ܘ݄ܕܠܳܐ ܚܳܛܺܝܬܽܘ.“ 21ܘܟܰܠܺܝ ܗ̄ܽܘ ܥܰܡܳܐ ܡܶܢ̱ ܪܽܘܚܩܳܐ. ܘܡܽܘܫܶܐ ܡܩܰܪܰܒ̥ ܠܶܗ ܠܓܰܒ ܗ̄ܽܘ ܥܰܪܦܶܠܳܐ ܐܰܝܟܳܐ ܕܬܰܡܳܐ ܝܳܐ ܐܰܠܳܗܳܐ. 22ܘܐܡ݄ܪ ܠܶܗ ܡܳܪܝܳܐ ܠܡܽܘܫܶܐ: ”ܗܰܘܟ̥ܰܐ ܓܕ݄ܐܡّܰܪ̱ܬ ܠܒܶܝ ܐܺܝܣܪܳܐܶܝܠ: ܗܰܬܽܘ ܚܙܰܠܟ̥ܽܘ ܕܡܺܗ̄ܝ ܫܡܰܝܳܐ ܡ݄ܫܓ̥ܶܠ ܠܺܝ ܐܰܥܡܰܝܟ̥ܽܘ. 23ܠܳܐ ܣܰܝܡܺܝܬܽܘ ܠܟ̥ܽܘ ܐܰܥܡܺܝ ܐܰܠܳܗ̈ܶܐ ܡܽܗ̄ܘ ܕܰܗܒ̥ܳܐ، ܘܰܐܠܳܗ̈ܶܐ ܡܽܗ̄ܘ ܣܶܐܡܳܐ ܠܳܐ ܣܰܝܡܺܝܬܽܘ ܠܟ̥ܽܘ. 24ܡܰܕ̥݄ܒܚܳܐ ܡܽܗ̄ܘ ܥܰܦܪܳܐ ܓܣܰܝܡܰܬ ܠܺܝ، ܘܕܳܒܚܰܬ ܐܰܥܠܶܗ ܗ̄ܰܥܠܰܘ̈ܳܬ̥ܰܝܕ̥ܳܟ̥ ܘܰܩّܽܘܪ̈ܒܳܢܰܝܕ̥ܳܟ̥ ܘܰܥܘܳܢ̈ܰܝܕ̥ܳܟ̥ ܘܰܬّܰܘܪ̈ܰܝܕ̥ܳܟ̥. ܒܟܘ̇ܠ ܕܽܘܟܬ̥ܳܐ ܕܕ̥ܳܟܪܰܬ ܐ݄ܫܡܺܝ، ܓܕܳܐܬ̥ܶܐ ܐ̱ܢܳܐ ܠܣܺܝܕܳܟ̥ ܘ݄ܡܒܰܪܰܟ̥ܢܳܟ̥. 25ܘܶܐܢ ܡܰܕ̥݄ܒܚܳܐ ܕܰܟّܶܐܦ̈ܶܐ ܣܰܝܡܰܬ ܠܺܝ، ܠܳܐ ܒܳܢܰܬ ܠܶܗ ܡܶܢ̱ ܟܶܐܦ̈ܶܐ ܩܛܺܝܥ̈ܶܐ ܕ݄ܡܚܶܐ ܠܳܟ̥ ܦܰܪܙܠܳܐ (ܣܰܟܬ̥ܳܐ) ܐܰܒّܶܗ ܘ݄ܡܚܰܪܡܺܝ ܠܳܟ̥. 26ܠܳܐ ܣܳܠܩܰܬ ܒܕܰܪ̈ܓܶܐ ܠܽܗ̄ܘ ܡܰܕ̥݄ܒܚܰܝܕ̥ܺܝ ܕܠܳܐ ܡ݄ܓܠܶܐ ܗ̄ܽܘ ܥܰܝܒܰܝܕ̥ܳܟ̥ ܐܰܥܠܶܗ.“
Currently Selected:
ܣܶܦܪܳܐ ܕܡܰܦܩܳܢܳܐ 20: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
