ܣܶܦܪܳܐ ܕܡܰܦܩܳܢܳܐ 12
12
1ܘܐܡ݄ܪ ܠܶܗ ܡܳܪܝܳܐ ܠܡܽܘܫܶܐ ܘܠܰܐܗܪܽܘܢ ܒܺܗ̄ܝ ܐܰܪܥܳܐ ܕܡܶܨܪܶܝܢ: 2”ܗ̄ܽܘ ܝܰܪܚܰܢܳܐ ܓܕܳܗ̄ܘܰܠܟ̥ܽܘ ܝܳܐ ܗ̄ܽܘ ܪܺܝܫܳܐ ܕܰܝّܰܪ̈ܚܶܐ. ܗ̄ܽܘ ܩܰܕ̱ܡܳܝܳܐ ܕܰܝّܰܪ̈ܚܶܐ ܕܺܗ̄ܝ ܫܰܢ̱ܬܳܐ ܓܕܳܗ̄ܘܰܠܟ̥ܽܘ ܝܳܐ. 3ܐܰܡܰܪ ܠܟܽܘܠܰܗ ܗ̄ܺܝ ܟ̥ܢܽܘܫܬܳܐ ܕܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ: ܒܥܰܣܪܳܐ ܒܽܗ̄ܘ ܝܰܪܚܰܢܳܐ، ܟܘ̇ܠ ܓܰܒ̥ܪܳܐ ܛܪܳܐ ܡܳܝ݄ܕ ܦܰܪܳܐ ܠܽܗ̄ܘ ܒܰܝܬܳܐ، ܘܦܰܪܳܐ ܠܽܗ̄ܘ ܒܰܝܬܳܐ ܕܽܗ̄ܘ ܒܰܒܳܐ. 4ܘܶܐܢ ܙܥܽܘܪܳܐ ܝܳܐ ܗ̄ܽܘ ܒܰܝܬܳܐ، ܘܠܳܐ ܩܳܕ݄ܪ ܐܳܟ̥݄ܠ ܗ̄ܽܘ ܦܰܪܳܐ ܟܽܘܠܶܗ، ܛܪܳܐ ܡܳܝ݄ܕ ܗܺܝّܶܗ ܘܽܗ̄ܘ ܫܒܳܒܰܝܕ̥ܶܗ ܕܟ݄ܬܝܳܐ ܩܰܪܺܝܒ̥ܳܐ ܠܽܗ̄ܘ ܒܰܝܬܰܝܕ̥ܶܗ، ܒܽܗ̄ܘ ܡܶܢܝܳܢܳܐ ܕܰܗ̄ܢ ܢܰܦܫ̈ܳܬ̥ܳܐ (ܕܽܗ̄ܘ ܒܰܝܬܳܐ). ܟܘ̇ܠ ܚܰܕ̱ ܒܽܗ̄ܘ ܟܰܝܠܳܐ ܕܽܗ̄ܘ ܡܽܐܘܟܠܰܝܕ̥ܶܗ ܓܒܳܢܺܝܬܽܘ (ܓܚܳܫܒ̥ܺܝܬܽܘ) ܥܰܠ ܗ̄ܽܘ ܦܰܪܳܐ. 5ܦܰܪܳܐ ܕܠܰܝܒܶܗ ܥܰܝܒܳܐ. ܦܰܪܳܐ ܐܰܒܪܶܗ ܕܫܰܢ̱ܬܳܐ ܓܕܳܗ̄ܘܶܐ. ܡܰܢ̱ ܦّܰܪ̈ܶܐ ܘܡܰܢ̱ ܨّܰܦܽܘܪ̈ܶܐ ܓܡܰܝܕܺܝܬܽܘ. 6ܘܛܳܪܺܝܬܽܘ ܠܶܗ ܗ݄ܠ ܐܰܪܒܰܥܣܰܪ ܒܽܗ̄ܘ ܝܰܪܚܰܢܳܐ. ܘܟܽܘܠܶܗ ܗ̄ܽܘ ܥܰܡܳܐ ܕܺܗ̄ܝ ܟ̥ܢܽܘܫܬܳܐ ܕܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܓܢܳܚܪܺܝ ܠܶܗ ܒ݄ܓܢܰܝܬܶܗ ܕܝܰܘܡܳܐ. 7ܘ݄ܓܡܰܝܕܺܝ ܡܽܗ̄ܘ ܐܰܕܡܰܝܕ̥ܶܗ ܘܡܰܪܺܝܣܺܝ ܥܰܠ ܗ̄ܰܬܪܶܝ ܠܽܘܚ̈ܛܶܐ (ܕܽܗ̄ܘ ܬܰܪܥܳܐ) ܘܥܰܠ ܗ̄ܰܩّܶܫ̈ܬܳܬ̥ܳܐ ܕܥ݄ܠ ܡܽܗ̄ܘ ܬܰܪܥܳܐ ܘܥܰܠ ܗ̄ܰܒّܳܬ̈ܶܐ ܕܳܐܟ̥ܠܺܝ ܠܶܗ ܐܰܒّܶܗ. 8ܘܕܳܐܟ̥ܠܺܝ ܗ̄ܽܘ ܒܰܣܪܳܐ ܒܽܗ̄ܘ ܠܰܠܝܰܢܳܐ، ܡܛܰܘܝܳܐ ܒܺܗ̄ܝ ܢܽܘܪܳܐ، ܘܦܰܛܺܝܪܳܐ ܥܰܡ ܓܶܠܳܐ ܡܰܪ̱ܺܝܪܳܐ ܕܳܐܟ̥ܠܺܝ ܠܶܗ. 9ܠܳܐ ܐܟ̥ܠܺܝܬܽܘ ܡܶܢܶܗ ܡܶܕܶܐ ܕܠܳܐ ܗ̄ܘܶܐ ܒܰܫܺܝܠܳܐ، ܘܠܳܐ ܒܰܫܺܝܠܳܐ ܡܒܰܫܠܳܐ ܒܰܡّܰܝ̈ܶܐ. ܐܶܠܳܐ ܕܳܗ̄ܘܶܐ ܡܛܰܘܝܳܐ ܒܺܗ̄ܝ ܢܽܘܪܳܐ، ܘܪܺܝܫܶܗ ܥܰܡ ܟܪ̈ܳܥܶܗ ܘܓܰܘܶܗ. 10ܠܳܐ ܛܳܪܺܝܬܽܘ ܡܶܢܶܗ ܠܨܰܦܪܳܐ. ܘܽܗ̄ܘ ܡܶܕܶܐ ܕܦܳܝ݄ܫ ܡܶܢܶܗ ܠܨܰܦܪܳܐ، ܒܺܗ̄ܝ ܢܽܘܪܳܐ ܓܡܰܘܩܕ̥ܺܝܬܽܘ ܠܶܗ. 11ܘܗܰܘܟ̥ܰܐ ܓܕܳܐܟ̥ܠܺܝܬܽܘ ܠܶܗ: ܚܰܨ̈ܰܝܟ̥ܽܘ ܡܰܐܣܪ̈ܶܐ، ܘܰܡܣܳܢ̈ܰܝܟ̥ܽܘ ܒܪ̈ܰܓ̥ܠܰܝܟ̥ܽܘ، ܘܰܚّܰܛܪ̈ܳܬ̥ܰܬ̥ܟ̥ܽܘ ܒܺܐܝܕ̥̈ܳܬ̥ܰܬ̥ܟ̥ܽܘ. ܒܣܽܘܪܗܳܒܳܐ ܐܰܟ̥ܽܘܠܽܘ ܠܶܗ ܥܰܠ ܕܟ݄ܬ ܝܳܐ ܗ̄ܽܘ ܦܶܨܚܳܐ ܕܡܳܪܝܳܐ. 12ܘܓ݄ܕܥܳܒܰܪ ܐ̱ܢܳܐ ܒܺܗ̄ܝ ܐܰܪܥܳܐ ܕܡܶܨܪܶܝܢ ܐܰܕܠܰܠܝܳܐ. ܘ݄ܓܡܰܝܬ̥ܺܝ ܟܽܘܠّܶܗ ܗ̄ܰܒّܽܘܟ̥ܪ̈ܶܐ ܕܺܗ̄ܝ ܐܰܪܥܳܐ ܕܡܶܨܪܶܝܢ، ܡܰܗ̄ܢ ܢܳܫ̈ܶܐ ܗ݄ܠ ܠܰܚّܰܝ̈ܘܳܬ̥ܳܐ. ܘ݄ܒܟܽܘܠّܶܗ ܗ̄ܰܢ ܐܰܠܳܗ̈ܶܐ (ܗ̄ܰܨّܰܠܡ̈ܶܐ) ܕܰܡّܶܨܪ̈ܳܝܶܐ ܓܣܳܝܰܡ ܐ̱ܢܳܐ ܕܺܝܢܳܐ. ܐܳܢܳܐ ܡܳܪܝܳܐ. 13ܘ݄ܓܕܳܗ̄ܘܰܠܟ̥ܽܘ ܗ̄ܽܘ ܐܰܕܡܰܢܳܐ ܐܳܬ̥ܳܐ ܥܰܠ ܗ̄ܰܒّܳܬ̈ܶܐ ܕܟ݄ܬ ܗ̄ܰܬܽܘ ܐܰܒّܶܗ. ܘ݄ܓܚܳܙܶܐ ܐ̱ܢܳܐ ܗ̄ܽܘ ܐܰܕܡܳܐ ܘ݄ܓܥܳܒܰܪ ܐ̱ܢܳܐ ܡܰܢ̱ ܐܥܠܰܝܟ̥ܽܘ، ܘܽܗ̄ܘ ܡܰܘܬܳܐ ܠܳܐ ܓܡܰܡ݄ܬ̥ܟ̥ܽܘ ܗ̄ܺܝ ܢܰܩܠܐ ܕܩܳܛܰܠ ܐ̱ܢܳܐ ܒܺܗ̄ܝ ܐܰܪܥܳܐ ܕܡܶܨܪܶܝܢ. 14ܘ݄ܓܕܳܗ̄ܘܰܠܟ̥ܽܘ ܗ̄ܽܘ ܝܰܘܡܰܢܳܐ ܕܽܘܟ̥ܪܳܢܳܐ. ܘ ܣܽܘܡܽܘ ܠܶܗ ܥܶܐܕ̥ܳܐ ܠܡܳܪܝܳܐ، ܥܶܐܕ̥ܳܐ ܠܙܰܒܢ̈ܶܐ ܘܕܳܪ̈ܶܐ. ܢܳܡܽܘܣܳܐ ܠܥܳܠܰܡ ܣܽܘܡܽܘ ܠܶܗ.
15”ܫܰܒ̥ܥܳܐ ܝܰܘܡ̈ܶܐ ܦܰܛܺܝܪ̈ܶܐ ܓܕܳܐܟ̥ܠܺܝܬܽܘ. ܘܡܽܗ̄ܘ ܝܰܘܡܳܐ ܩܰܕ̱ܡܳܝܳܐ ܕ݄ܡܒܰܛܠܺܝܬܽܘ ܗ̄ܽܘ ܚܡܺܝܪܳܐ ܡܰܢ̱ ܒّܳܬ̈ܰܬ̥ܟ̥ܽܘ. ܡܺܐܝܕ̥ܶܗ ܕܟܘ̇ܠ ܚܰܕ̱ ܕܳܐܟ̥݄ܠ ܚܰܡܺܝܥܳܐ ܡܰܢ̱ ܒّܳܬ̈ܰܬ̥ܟ̥ܽܘ، ܗ̄ܺܝ ܢܰܦܫܰܝܳܐ ܓܡܺܝܣܰܟܪܳܐ ܡܶܢ̱ ܐܺܝܣܪܳܐܶܝܠ، ܡܽܗ̄ܘ ܝܰܘܡܳܐ ܩܰܕ̱ܡܳܝܳܐ ܗ݄ܠ ܠܽܗ̄ܘ ܝܰܘܡܳܐ ܕܰܫّܰܒ̥ܥܳܐ. 16ܗ̄ܽܘ ܝܰܘܡܳܐ ܩܰܕ̱ܡܳܝܳܐ ܩܰܪܝܳܐ ܘ݄ܡܩܰܕܫܳܐ. ܘܽܗ̄ܘ ܝܰܘܡܳܐ ܕܰܫّܰܒ̥ܥܳܐ ܩܰܪܝܳܐ ܘ݄ܡܩܰܕܫܳܐ ܓܕܳܗ̄ܘܰܠܟ̥ܽܘ، ܘ݄ܥܒ̥ܳܕܳܐ ܠ݄ܐ ܟܳܗ̄ܘܶܐ ܕܡ݄ܥܒ̥݄ܕ ܐܰܒّܶܗ. ܐܶܠܳܐ ܗ̄ܽܘ ܡܶܕܶܐ ܕܳܐܟ̥݄ܠ ܗ̄ܽܘ ܢܳܫܳܐ، ܗܰܘܳܐ ܒܶܠܚܽܘܕ̥ܶܗ ܟܣܰܝܡܺܝܬܽܘ. 17ܘ݄ܓܢܳܛܪܺܝܬܽܘ ܗ̄ܽܘ ܦܰܛܺܝܪܳܐ، ܡܺܐܝܕ̥ܶܗ ܕܒܽܗ̄ܘ ܝܰܘܡܰܢܳܐ ܡܰܘܦܰܩ ܠܺܝ ܗ̄ܰܚّܰܝ̈ܠܰܘܳܬ̥ܰܬ̥ܟ̥ܽܘ ܡܺܗ̄ܝ ܐܰܪܥܳܐ ܕܡܶܨܪܶܝܢ. ܘ݄ܓܢܳܛܪܺܝܬܽܘ ܗ̄ܽܘ ܝܰܘܡܰܢܳܐ ܐܟ̥ ܕܢܳܡܽܘܣܳܐ ܠܥܳܠܰܡ، ܠܙܰܒܢ̈ܶܐ ܘܕܳܪ̈ܶܐ. 18ܒܽܗ̄ܘ ܝܰܪܚܳܐ ܩܰܕ̱ܡܳܝܳܐ، ܒܰܐܪܒܰܥܣܰܪ ܒܽܗ̄ܘ ܝܰܪܚܳܐ، ܒ݄ܓܢܰܝܬܶܗ ܕܝܰܘܡܳܐ، ܓܕܳܐܟ̥ܠܺܝܬܽܘ ܦܰܛܺܝܪܳܐ ܗ݄ܠ ܠܽܗ̄ܘ ܝܰܘܡܳܐ ܕܚܰܕ̱ ܘܥ݄ܣܪܺܝ ܒܽܗ̄ܘ ܝܰܪܚܳܐ ܒ݄ܓܢܰܝܬܶܗ ܕܝܰܘܡܳܐ. 19ܫܰܒ̥ܥܳܐ ܝܰܘܡ̈ܶܐ ܚܰܡܺܝܥܳܐ ܠܳܐ ܡ݄ܚܙܶܐ ܒܰܒّܳܬ̈ܰܬ̥ܟ̥ܽܘ، ܡܺܐܝܕ̥ܶܗ ܕܟܘ̇ܠ ܕܳܐܟ̥݄ܠ ܚܰܡܺܝܥܳܐ ܓܡܺܝܣܰܟܪܳܐ ܗ̄ܺܝ ܢܰܦܫܰܝܳܐ ܡܺܗ̄ܝ ܟ̥ܢܽܘܫܬܳܐ ܕܺܐܝܣܪܳܐܶܝܠ، ܡܰܢ̱ ܪّܺܝܫ̈ܳܢܶܐ ܘܡܰܢ̱ ܥّܳܡܽܘܪ̈ܶܐ (ܢܽܘܟ̥ܪ̈ܳܝܶܐ) ܕܺܗ̄ܝ ܐܰܪܥܳܐ. 20ܟܘ̇ܠ ܡܶܕܶܐ ܚܰܡܺܝܥܳܐ ܠܳܐ ܐܟ̥ܠܺܝܬܽܘ. ܒܟܽܘܠّܶܗ ܗ̄ܰܒّܳܬ̈ܰܬ̥ܟ̥ܽܘ ܦܰܛܺܝܪܳܐ ܓܕܳܐܟ̥ܠܺܝܬܽܘ.“
21ܘ݄ܩܪܶܐ ܠܶܗ ܡܽܘܫܶܐ ܠܟܽܘܠّܶܗ ܗ̄ܰܣّܳܒ̥̈ܶܐ ܕܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܘܐܡ݄ܪ ܠܰܗ ܠّܶܗ: ”ܒܰܥܓܰܠ ܡܽܘܕܽܘ ܥܘܳܢ̈ܶܐ ܠܰܫّܰܪ̈ܒܳܬ̥ܰܬ̥ܟ̥ܽܘ ܘ݄ܢܚܰܪܽܘ ܗ̄ܽܘ ܦܶܨܚܳܐ. 22ܘ݄ܓܡܰܝܕܺܝܬܽܘ ܡܶܐܣܰܪܬܳܐ ܕܙܽܘܦܳܐ، ܘ݄ܓܨܰܒ̥ܥܺܝܬܽܘ ܠܰܗ ܒܽܗ̄ܘ ܐܰܕܡܳܐ ܕܽܗ̄ܘ ܦܰܪܳܐ، ܘܡܰܪܺܝܣܺܝܬܽܘ ܥܰܠ ܗ̄ܰܩّܶܫ̈ܬܳܬ̥ܳܐ ܘܥܰܠ ܗ̄ܰܬܪܶܝ ܠܽܘܚ̈ܛܶܐ (ܕܽܗ̄ܘ ܬܰܪܥܳܐ) ܡܽܗ̄ܘ ܐܰܕܡܳܐ ܕܟܺܝܬ ܒܽܗ̄ܘ ܣܶܦܳܩܳܐ. ܘܗܰܬܽܘ ܠܳܐ ܡܰܘܦܩܺܝܬܽܘ ܢܳܫܳܐ ܡܽܗ̄ܘ ܬܰܪܥܳܐ ܕܽܗ̄ܘ ܒܰܝܬܰܝܕ̥ܶܗ ܗ݄ܠ ܨܰܦܪܳܐ. 23ܘ݄ܓܥܳܒ݄ܪ ܡܳܪܝܳܐ ܕܡܳܚܶܐ ܠܰܡّܶܨܪ̈ܳܝܶܐ. ܘ݄ܓܚܳܙܶܐ ܠܽܗ̄ܘ ܐܰܕܡܳܐ ܕܥܰܠ ܗ̄ܰܩّܶܫ̈ܬܳܬ̥ܳܐ ܕܽܗ̄ܘ ܬܰܪܥܳܐ ܘܥܰܠ ܗ̄ܰܬܪܶܝ ܠܽܘܚ̈ܛܶܐ (ܕܽܗ̄ܘ ܬܰܪܥܳܐ)، ܘ݄ܓܥܳܒ݄ܪ ܡܳܪܝܳܐ ܥܰܠ ܗ̄ܰܬّܰܪ̈ܥܶܐ، ܘܠܳܐ ܓܛܳܪܶܐ ܗ̄ܽܘ ܡܰܡܺܝܬ̥ܳܢܳܐ ܕܥܳܒ݄ܪ ܠܰܒّܳܬ̈ܰܬ̥ܟ̥ܽܘ ܘܡܰܡ݄ܬ̥. 24ܘ݄ܓܢܳܛܪܺܝܬܽܘ ܗ̄ܽܘ ܡܰܐܡܪܰܢܳܐ ܘܽܗ̄ܘ ܢܳܡܽܘܣܰܢܳܐ ܐܰܠܟ̥ܽܘ ܘܠܰܗ̄ܢ ܐܰܒܢ̈ܰܬ̥ܟ̥ܽܘ ܗ݄ܠ ܥܳܠܰܡ. 25ܘܡ݄ܐ ܕܥܰܒܺܝܪܺܝܬܽܘ ܠܺܗ̄ܝ ܐܰܪܥܳܐ ܕ݄ܓܕܳܗ̄ܒܰܠܟ̥ܽܘ ܡܳܪܝܳܐ ܐܟ̥ ܕܐܡ݄ܪ ܠܶܗ، ܓܢܳܛܪܺܝܬܽܘ ܗ̄ܺܝ ܬܶܫܡܶܫܬܰܬ̥ܶܐ. 26ܘ݄ܓܕܳܗ̄ܘܶܐ ܗ̄ܺܝ ܢܰܩܠܐ ܕ݄ܐܡّ݄ܪ̱ܢܟ̥ܽܘ ܗ̄ܰܢ ܐܰܒܢ̈ܰܬ̥ܟ̥ܽܘ: ܗ̄ܺܝ ܬܶܫܡܶܫܬܰܬ̥ܶܐ ܡ݄ܢܝܳܐ؟ 27ܓܕ݄ܐܡّܺܪ̱ܝܬܽܘ ܐܰܠّܶܗ: ܕܶܒܚܬ̥ܳܐ ܝܳܐ ܕܽܗ̄ܘ ܦܶܨܚܳܐ ܕܡܳܪܝܳܐ ܕܥܰܒ݄ܪ ܥܰܠ ܗ̄ܰܒّܳܬ̈ܶܐ ܕܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܒܡܶܨܪܶܝܢ ܗ̄ܺܝ ܢܰܩܠܐ ܕ݄ܡܚܶܐ ܠܶܗ ܠܰܡّܶܨܪ̈ܳܝܶܐ، ܘ݄ܦܪ݄ܩ ܠܶܗ ܗ̄ܰܒّܳܬܰܝ̈ܕ̥ܰܢ.“ ܘ݄ܒܪ݄ܟّܶܗ ܗ̄ܽܘ ܥܰܡܳܐ ܘ݄ܣܓ̥݄ܕّܶܗ ܠܡܳܪܝܳܐ. 28ܘܰܐܙّ݄ܢ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܘܣ݄ܡّܶܗ ܐܟ̥ ܕܐܡ݄ܪ ܠܶܗ ܡܳܪܝܳܐ ܠܡܽܘܫܶܐ ܘܠܰܐܗܪܽܘܢ، ܗܰܘܟ̥ܰܐ ܣ݄ܡّܶܗ. 29ܘܗܰܘܺܝ ܒܦܰܠܓܶܗ ܕܽܗ̄ܘ ܠܰܠܝܳܐ، ܘܡܳܪܝܳܐ ܩܛܺܝܠ ܠܶܗ ܟܽܘܠّܶܗ ܗ̄ܰܒّܽܘܟ̥ܪ̈ܶܐ ܕܺܗ̄ܝ ܐܰܪܥܳܐ ܕܡܶܨܪܶܝܢ، ܡܽܗ̄ܘ ܒܽܘܟ̥ܪܳܐ ܕܦܶܪܥܽܘܢ ܕܟܳܝܳܬܽܒ̥ ܥܰܠ ܗ̄ܽܘ ܟܽܘܪܣܝܰܝܕ̥ܶܗ ܗ݄ܠ ܠܽܗ̄ܘ ܒܽܘܟ̥ܪܳܐ ܕܽܗ̄ܘ ܝܰܣܺܝܪܳܐ ܕܟ݄ܬ ܝܳܐ ܒܽܗ̄ܘ ܚܒܽܘܫܝܳܐ، ܘܟܽܘܠّܶܗ ܗ̄ܰܒّܽܘܟ̥ܪ̈ܶܐ ܕܰܚّܰܝ̈ܘܳܬ̥ܳܐ. 30ܘܩܰܝ݄ܡ ܦܶܪܥܽܘܢ ܒܽܗ̄ܘ ܠܰܠܝܰܘܳܐ ܘܟܽܘܠّܶܗ ܗ̄ܰܓܪ̈ܶܝܥܰܝܕ̥ܶܗ ܘܟܽܘܠّܶܗ ܗ̄ܰܡّܶܨܪ̈ܳܝܶܐ، ܘܗܰܘܺܝ ܒܰܟ̥ܝܳܐ ܪܰܒܳܐ ܒܺܗ̄ܝ ܐܰܪܥܳܐ ܕܡܶܨܪܶܝܢ، ܡܺܐܝܕ̥ܶܗ ܕܠܰܝ̱ܬ ܗ̄ܘܰܐ ܒܰܝܬܳܐ ܕܠܰܐ ܗ̄ܘܺܝ ܐܶܒܶܗ ܡܺܝܬ̥ܳܐ.
31ܘ݄ܩܪܶܐ ܠܶܗ ܦܶܪܥܽܘܢ ܠܡܽܘܫܶܐ ܘܠܰܐܗܪܽܘܢ ܒܽܗ̄ܘ ܠܰܠܝܰܘܳܐ ܘܐܡ݄ܪ ܠܰܗ ܠّܶܗ: ”ܩܽܘܡܽܘ ܢܦܰܩܽܘ ܡܒܰܝܢ ܗ̄ܽܘ ܥܰܡܰܝܕ̥ܺܝ، ܗܰܬܽܘ ܘܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ، ܘܙܳܟ̥ܽܘ ܥܒܰܕܽܘ ܠܡܳܪܝܳܐ ܐܟ̥ ܕܐܡ݄ܪܟ̥ܽܘ. 32ܘܰܥܘܳܢ̈ܰܬ̥ܟ̥ܽܘ ܘܰܬّܰܘܪ̈ܰܬ̥ܟ̥ܽܘ ܡܰܘܒ݄ܠܽܘ ܐܟ̥ ܕܐܡ݄ܪܟ̥ܽܘ. ܙܳܟ̥ܽܘ ܘ݄ܡܒܰܪܶܟ̥ܽܘ ܠܺܝ ܣܬܶܝ.“ 33ܘܡܰܥ݄ܩّܶܗ ܗ̄ܰܡّܶܨܪ̈ܳܝܶܐ ܠܽܗ̄ܘ ܥܰܡܳܐ ܕ݄ܒܣܽܘܪܗܳܒܳܐ ܢܳܦܩܺܝ ܡܺܗ̄ܝ ܐܰܪܥܳܐ، ܥܰܠ ܕ݄ܐܡّܺܪ̱ܝ ܗ̄ܘܰܘ̱: ”ܟܽܘܠܰܢ ܓܡܰܝܬ̥ܺܝܢܰܐ.“ 34ܘܽܗ̄ܘ ܥܰܡܳܐ ܡ݄ܕّܶܗ ܗ̄ܽܘ ܠܰܝܫܰܬّ̥ܶܗ، ܡܶܩ݄ܕ̱ܡ ܕܚܳܡ݄ܥ، ܡܰܐܣܪܳܐ ܒܰܦّܰܣ̈ܰܬّ̥ܶܗ ܘܡܰܚܬܳܐ ܥܰܠ ܟܰܬܦܳܬ̥ܰܝّܶܗ. 35ܘܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܣ݄ܡّܶܗ ܐܟ̥ ܕܽܗ̄ܘ ܡܰܐܡܪܳܐ ܕܡܽܘܫܶܐ، ܘܰܐܒܺܝܥܺܝ ܡܰܢ̱ ܡّܶܨܪ̈ܳܝܶܐ ܣܶܦܳܩ̈ܶܐ ܕܣܶܐܡܳܐ ܘܣܶܦܳܩ̈ܶܐ ܕܕܰܗܒ̥ܳܐ ܘܰܠܒܽܘܫ̈ܶܐ. 36ܘܡܰܚ݄ܬ ܠܶܗ ܡܳܪܝܳܐ ܪ̈ܰܚܡܶܐ ܒܠܶܒܶܗ ܕܰܡّܶܨܪ̈ܳܝܶܐ ܥܰܠ ܗ̄ܽܘ ܥܰܡܳܐ، ܘܗܽܒّ̥ܰܢّܶܗ. ܘܗܰܘܟ̥ܰܐ ܡܰܫܠܰܚّܶܗ ܗ̄ܰܡّܶܨܪ̈ܳܝܶܐ.
37ܘܡܰܛܥܰܢّܶܗ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܡܶܢ̱ ܪܰܥ݄ܡܣܺܝܣ ܗ݄ܠ ܣܳܟܽܘܬ̥، ܫܶܬ̥ ܡܳܐܐ ܐܰܠܦܳܐ ܓܰܒ̥ܪ̈ܶܐ ܡܗܰܠܟ̥ܳܢ̈ܶܐ ܕܠܳܐ ܡܰܗ̄ܢ ܐܺܝܩܰܪ̈ܝܳܬ̥ܳܐ. 38ܘܢܳܫ̈ܶܐ ܓ̥ܰܠܰܒܶܐ ܣܰܠܺܝܩܺܝ ܐܰܥܡܰܝّܶܗ، ܘ݄ܥܘܳܢ̈ܶܐ ܘܬܰܘܪ̈ܶܐ ܘܩܶܢ̈ܝܳܢܶܐ ܓ̥ܰܠܰܒܶܐ ܓ̥ܰܠܰܒܶܐ. 39ܘ݄ܕܘ݄ܩّܶܗ ܠܰܚܡܳܐ ܡܽܗ̄ܘ ܠܰܝܫܳܐ ܕܡܰܘܦܰܩّܶܗ ܡܶܢ̱ ܡܶܨܪܶܝܢ، ܛܠܰܡܬܳܐ ܕܦܰܛܺܝܪܳܐ ܥܰܠ ܕܠܳܐ ܚܰܡ݄ܥ ܗ̄ܘܰܐ، ܡܺܗ̄ܝ ܐܺܝܕ̥ܶܗ ܕܰܡّܶܨܪ̈ܳܝܶܐ ܡܰܘܦܩ݄ܢّܶܗ، ܘܠܳܐ ܩܰܕܺܝܪܺܝ ܕܟܳܪܟ̥ܺܝ ܘܣܰܝܡ݄ܢّܶܗ ܙܘܳܕ̈ܶܐ.
40ܘܽܗ̄ܘ ܝܬܳܒ̥ܳܐ ܕܝܰܬܺܝܒ̥ܺܝ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܒܡܶܨܪܶܝܢ: ܐܰܪܒܰܥܡܳܐܐ ܘ݄ܬܠܶܬ̥ܺܝ ܐ݄ܫܢ̈ܶܐ. 41ܘܗܰܘܺܝ ܒ݄ܬ̥݄ܪ ܡܶܢ̱ ܐܰܪܒܰܥܡܳܐܐ ܘ݄ܬܠܶܬ̥ܺܝ ܐ݄ܫܢ̈ܶܐ، ܒܶܗ ܒܽܗ̄ܘ ܝܰܘܡܰܢܳܐ، ܢܰܦܺܝܩܺܝ ܟܽܘܠّܶܗ ܗ̄ܰܚّܰܝ̈ܠܰܘܳܬ̥ܳܐ ܕܡܳܪܝܳܐ ܡܺܗ̄ܝ ܐܰܪܥܳܐ ܕܡܶܨܪܶܝܢ. 42ܠܰܠܝܳܐ ܢܛܺܝܪܳܐ ܗ̄ܘܰܐ ܠܡܳܪܝܳܐ ܕܡܰܘܦܰܩّܶܗ ܡܺܗ̄ܝ ܐܰܪܥܳܐ ܕܡܶܨܪܶܝܢ. ܗܺܝّܶܗ ܗ̄ܽܘ ܠܰܠܝܰܢܳܐ ܠܡܳܪܝܳܐ ܢܛܺܝܪܳܐ ܗ̄ܘܰܐ ܡܶܢ̱ ܟܽܘܠّܶܗ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܠܰܕّܳܪ̈ܰܬّ̥ܶܗ.
43ܘܐܡ݄ܪ ܠܶܗ ܡܳܪܝܳܐ ܠܡܽܘܫܶܐ ܘܠܰܐܗܪܽܘܢ: ”ܗܰܢܳܐ ܝܳܐ ܗ̄ܽܘ ܢܳܡܽܘܣܳܐ ܕܽܗ̄ܘ ܦܶܨܚܳܐ: ܟܘ̇ܠ ܢܽܘܟ̥ܪܳܝܳܐ ܠܳܐ ܐܟ̥݄ܠ ܡܶܢܶܗ 44ܘܟܘ̇ܠ ܓܰܒ̥ܪܳܐ ܓܪܶܝܥܳܐ ܙܒ̥ܺܝܢܳܐ ܒܰܙّܽܘܙ̈ܶܐ، ܡ݄ܐ ܕ݄ܓܙ݄ܪ ܠܳܟ̥، ܛܪܳܐ ܐܳܟ̥݄ܠ ܡܶܢܶܗ. 45ܢܽܘܟ̥ܪܳܝܳܐ ܘܰܐܓ̥ܺܝܪܳܐ ܠܳܐ ܐܳܟ̥݄ܠ ܡܶܢܶܗ. 46ܒܚܰܕ̱ ܒܰܝܬܳܐ ܓܡ݄ܬܐܟ̥݄ܠ. ܘܠܳܐ ܡܰܘܦܩܺܝܬܽܘ ܡܶܢܶܗ، ܡܽܗ̄ܘ ܒܰܣܪܳܐ، ܠܰܪܒ̥ܰܠ ܡܽܗ̄ܘ ܒܰܝܬܳܐ، ܘܓܰܪܡܳܐ ܠܳܐ ܬܳܒ̥ܪܺܝܬܽܘ ܐܶܒܶܗ. 47ܟܽܘܠܰܗ ܗ̄ܺܝ ܟ̥ܢܽܘܫܬܳܐ ܕܺܐܝܣܪܳܐܶܝܠ ܓܣܰܝܡܺܝ ܠܶܗ. 48ܘܺܗ̄ܝ ܢܰܩܠܐ ܕܝܳܬܽܒ̥ ܐܰܥܡܰܝܟ̥ܽܘ ܢܽܘܟ̥ܪܳܝܳܐ، ܘܣܳܝ݄ܡ ܦܶܨܚܳܐ ܠܡܳܪܝܳܐ، ܛܪܳܐ ܓܳܙ݄ܪ ܡܶܢܶܗ ܟܘ̇ܠ ܐܰܒܪܳܐ، ܗܶܕܺܝ ܛܪܳܐ ܡܩܰܪܽܒ̥ ܘܣܳܝܰܡ ܠܶܗ (ܠܽܗ̄ܘ ܦܶܨܚܳܐ)، ܘ݄ܓܕܳܗ̄ܘܶܐ ܐܟ̥ ܕܰܡّܳܪ̈ܶܐ ܕܺܗ̄ܝ ܐܰܪܥܳܐ. ܘܟܘ̇ܠ ܚܰܕ̱ ܕܠܰܝ̱ܬ ܝܳܐ ܓܙܺܝܪܳܐ ܠܳܐ ܐܟ̥݄ܠ ܡܶܢܶܗ. 49ܘܚܰܕ̱ ܢܳܡܽܘܣܳܐ ܓܕܳܗ̄ܘܶܐ ܠܽܗ̄ܘ ܥܰܡܳܐ ܕܺܗ̄ܝ ܐܰܪܥܳܐ ܘܠܰܝّܰܬܺܝܒ̥̈ܶܐ (ܢܽܘܟ̥ܪ̈ܳܝܶܐ) ܕܒܰܝܢܳܬ̥ܰܝܟ̥ܽܘ.“ 50ܘܣ݄ܡّܶܗ ܟܽܘܠّܶܗ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܐܟ̥ ܕܐܡ݄ܪ ܠܶܗ ܡܳܪܝܳܐ ܠܡܽܘܫܶܐ ܘܠܰܐܗܪܽܘܢ، ܗܰܘܟ̥ܰܐ ܣ݄ܡّܶܗ. 51ܘܗܰܘܺܝ ܒܶܗ ܒܽܗ̄ܘ ܝܰܘܡܰܢܳܐ، ܡܳܪܝܳܐ ܡܰܘܦܰܩ ܠܶܗ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܡܺܗ̄ܝ ܐܰܪܥܳܐ ܕܡܶܨܪܶܝܢ، ܟܽܘܠّܶܗ ܗ̄ܰܚّܰܝ̈ܠܰܘܳܬ̥ܰܬّ̥ܶܗ.
Currently Selected:
ܣܶܦܪܳܐ ܕܡܰܦܩܳܢܳܐ 12: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
