ܥܒܳܕ̥̈ܶܐ ܕܰܫܠܺܝܚ̈ܶܐ 26

ܦܰܘܠܳܘܣ ܟܣܳܝ݄ܡ ܡܰܦܬܰܚ ܦܶܡܳܐ ܩ݄ܕ̱ܡ ܐܰܓ̥ܪܺܦܰܘܳܣ

1ܘܐܡ݄ܪ ܠܶܗ ܐܰܓ̥ܪܺܦܰܘܳܣ ܠܦܰܘܠܳܘܣ: ”ܟܺܝܒܳܟ̥ ܕܡ݄ܫܓ̥ܳܠܰܬ ܥܰܠ ܪܽܘܚܳܟ̥.“ ܗ̄ܺܝ ܢܰܩܠܝܳܐ ܦܰܘܠܳܘܣ ܦܫ݄ܛ ܠܶܗ ܐܺܝܕ̥ܶܗ، ܘܣܳܝܰܡ ܗ̄ܘܰܐ ܡܰܦܬܰܚ ܦܶܡܳܐ ܘܐܡ݄ܪ ܠܶܗ: 2”ܥܰܠ ܟܽܘܠ ܡܶܕܶܐ ܕܡܰܫܟܰܠّܶܗ ܐܰܥܠܺܝ ܗ̄ܰܝّܽܘܕ̥̈ܳܝܶܐ، ܝܰܐ ܡܰܠܟܳܐ ܐܰܓ̥ܪܺܦܶܐ، ܟܳܐܡܰܪ ܐ̱ܢܳܐ ܥܰܠ ܪܽܘܚܺܝ ܕܟ݄ܬ ܐ̱ܢܳܐ ܦܨܺܝܚܳܝܳܐ ܕܩܽܘܕ̱ܡܳܟ̥ ܐܰܕܝܰܘܡܰܐ ܟܳܣܳܝܰܡ ܐ̱ܢܳܐ ܡܰܦܬܰܚ ܦܶܡܳܐ. 3ܘܙ݄ܕ ܡܶܕܶܐ ܕܟܳܐܕ̥ܰܥ ܐ̱ܢܳܐ ܕܓ̥ܰܠܰܒܶܐ ܟ݄ܐܕ̥ܥܰܬ ܥܰܠ ܗ̄ܰܫّܽܘ̈ܐܳܠܶܐ ܘܰܗ̄ܢ ܢܳܡܽܘܣ̈ܶܐ ܕܰܝّܽܘܕ̥̈ܳܝܶܐ. ܡܰܗ̄ܘܟ̥ܰܐ ܟܳܐܒܰܥ ܐ̱ܢܳܐ ܡܶܢܳܟ̥ ܕܡܰܘܪܟ̥ܰܬ ܒܳܠܳܟ̥ ܐܰܥܠܺܝ ܘܫ݄ܡܥܰܬ ܠܺܝ. 4ܡܺܐܝܕ̥ܶܗ ܕܰܗّܽܘܕ̥̈ܳܝܰܢ݄ܟ ܣܬܶܝ ܟ݄ܐܕ̥ܥܺܝ، ܐܶܢ ܟ݄ܐܒܥܺܝ ܕܣܳܗܕܺܝ، ܗ̄ܺܝ ܬܰܫܥܺܝܬ̥ܳܐ ܕܰܚّܰܝ̈ܰܝܕ̥ܺܝ ܗܶܫ ܡܶܢ̱ ܢܰܥܡܽܘܬ̥ܺܝ، ܡܽܗ̄ܘ ܫܽܘܪܳܝܳܐ ܕܗܰܘܺܝ ܠܺܝ ܒܰܝܢ ܗ̄ܽܘ ܥܰܡܰܝܕ̥ܺܝ ܘܒܽܐܘܪܶܫܠܶܡ، 5ܥܰܠ ܕܡܶܢ̱ ܙܰܒ̥ܢܳܐ ܟ݄ܐܕ̥ܥܺܝ ܠܺܝ ܛܳܒ̥ܳܐ، ܘܟ݄ܐܕ̥ܥܺܝ ܕܒܽܗ̄ܘ ܝܽܘܠܦܳܢܳܐ ܪܺܝܫܳܝܳܐ ܕܰܦܪ̈ܺܝܫܶܐ ܝܰܪܽܒ̥ ܐ̱ܢܳܐ. 6ܘܳܐܥܕܳܐ ܥܰܠ ܗ̄ܽܘ ܣܰܒܪܳܐ ܕܽܗ̄ܘ ܘܰܥܕܳܐ ܕ݄ܡܘܰܥܰܕ ܠܶܗ ܐܰ‌ܠܳܗܳܐ ܠܰܒّܰܒܳܢ̈ܰܝܕ̥ܰܢ ܟܩܳܝܰܡ ܐ̱ܢܳܐ ܘ݄ܟܡܺܝܕܰܢ ܐ̱ܢܳܐ، 7ܘܥܰܠ ܗ̄ܽܘ ܣܰܒܪܰܢܳܐ ܗ̄ܰܬܪܰܥܣܰܪ ܫܰܪ̈ܒܳܬ̥ܳܐ (ܕܺܐܝܣܪܳܐܶܝܠ) ܗܰܘ݄ܠّܶܗ ܣܰܒܪܳܐ ܕܡܳܛ݄ܢ ܠܶܗ ܒܰܨܠܰܘ̈ܳܬ̥ܳܐ ܐܰܡܺܝܢ̈ܳܬ̥ܳܐ ܒܺܐܝܡܳܡܳܐ ܘܠܰܠܝܳܐ. ܘܥܰܠ ܗ̄ܽܘ ܣܰܒܪܰܢܳܐ، ܗ̄ܰܝّܽܘܕ̥̈ܳܝܶܐ ܟܡܰܫܟ݄ܢ ܐܰܥܠܺܝ، ܝܰܐ ܡܰܠܟܳܐ ܐܰܓ̥ܪܺܦܶܐ. 8ܡ݄ܢܝܳܐ ܕ݄ܟܕܰܝܢܺܝܬܽܘ؟ ܩܰܝ ܠ݄ܐ ܟܳܗ̄ܘܶܐ ܕ݄ܡܗܰܝܡܢܺܝܢܰܐ ܕܰܐ‌ܠܳܗܳܐ ܟܡܰܩ݄ܡ ܗ̄ܰܡّܺܝ̈ܬ̥ܶܐ؟

9”ܘܳܐܢܳܐ ܡܶܢ̱ ܡܶܩ݄ܕ̱ܡ ܡܰܚ݄ܬ ܠܺܝ ܒܗܰܘܢܺܝ ܕܣܳܝܰܡ ܐ̱ܢܳܐ ܥܒܳܕ̥̈ܶܐ ܓ̥ܰܠܰܒܶܐ ܡܩܰܒ݄ܠ ܕܐ݄ܫܡܶܗ ܕܝܶܫܽܘܥ ܗ̄ܽܘ ܢܳܨܪܳܝܳܐ. 10ܘܗܰܢܳܐ ܕܣ݄ܡ ܠܺܝ ܣܬܶܝ ܒܽܐܘܪܶܫܠܶܡ، ܘܩܰܕ̈ܺܝܫܶܐ ܓ̥ܰܠܰܒܶܐ ܡܚܰܠܩܺܝ ܠܺܝ ܒܽܗ̄ܘ ܚܒܽܘܫܝܳܐ، ܒܽܗ̄ܘ ܫܽܘܠܛܳܢܳܐ ܕܡܰܩܒܶܠ ܠܺܝ ܡܰܢ̱ ܪّܰܒ̈ܶܐ ܕܰܟّܳܗ̈ܢܶܐ. ܘ݄ܠܗ݄ܢ ܡ݄ܢّܶܗ، ܗ̄ܺܝ ܢܰܩܠܐ ܕܡ݄ܩܛܳܠܺܝ ܗ̄ܘܰܘ̱، ܐܳܢܳܐ ܣܬܶܝ ܡܥܰܕܪܳܢܳܐ ܗ̄ܘܰܝ ܐ̱ܢܳܐ ܠܰܗ̄ܢܺܝ ܕܣ݄ܡّܰܢّܶܗ ܕܺܝܢܳܐ (ܕܩܰܛܠܳܐ). 11ܘ݄ܒܟܽܘܠ ܟ̥ܢܽܘܫܬܳܐ ܡܰܟܽܒ̥ ܗ̄ܘܰܝܢܰܢّܶܗ، ܘܳܐܢܳܐ ܟܡܰܥ݄ܩ ܗ̄ܘܰܝ ܐ̱ܢܳܐ ܐܰܥܠܰܝّܶܗ ܠܰܫܰܢ ܕ݄ܡܓܰܕܦܺܝ ܒ݄ܐܫܡܶܗ ܕܝܶܫܽܘܥ. ܘܥܰܠ ܕܟ݄ܬ ܗ̄ܘܰܝ ܐ̱ܢܳܐ ܡܰܠܝܳܐ ܪܽܘܓ̥ܙܳܐ ܐܰܥܠܰܝّܶܗ، ܢܳܦܰܩ ܗ̄ܘܰܝ ܐ̱ܢܳܐ ܒ݄ܬ̥ܪܰܝّܶܗ ܠ݄ܡܕ̈ܺܝܢܳܬ̥ܳܐ ܚܪ̈ܶܢܶܐ. 12ܘܺܗ̄ܝ ܢܰܩܠܐ ܕܟ݄ܬ ܗ̄ܘܰܝ ܐ̱ܢܳܐ ܐܰܙܳܠܳܐ ܠܰܫܰܢ ܗܰܬ̥ܶܐ ܠܕܰܪܰܡܣܽܘܩ، ܒܽܗ̄ܘ ܫܽܘܠܛܳܢܳܐ ܘܒܺܗ̄ܝ ܪܳܥܝܽܘܬ̥ܳܐ ܕܰܪّܰܒ̈ܶܐ ܕܰܟّܳܗ̈ܢܶܐ، 13ܒܦܰܠܓܶܗ ܕܝܰܘܡܳܐ، ܒܽܗ̄ܘ ܕܰܪܒܳܐ، ܝܰܐ ܡܰܠܟܳܐ، ܚܙܶܐ ܠܺܝ ܡܺܗ̄ܝ ܫܡܰܝܳܐ ܢܽܘܗܪܳܐ ܕܡܰܒܪܰܩ ܠܶܗ ܐܰܥܠܺܝ ܘܥܰܠ ܟܽܘܠّܶܗ ܕܰܐܥܡܺܝ ܢܽܘܗܪܳܐ ܒܰܗ݄ܪ ܙ݄ܕ ܡܺܗ̄ܝ ܫܶܡܫܳܐ. 14ܘܟܽܘܠܰܢ ܢܰܦܺܝܠܺܝܢܰܐ ܥܰܠ ܗ̄ܺܝ ܐܰܪܥܳܐ. ܘܫܰܡ݄ܥ ܐ̱ܢܳܐ ܩܳܠܳܐ ܕܟܳܐܡܰܪ ܠܺܝ ܒܽܗ̄ܘ ܥܶܒܪܳܝܳܐ: ’ܫܳܐܘܳܠ ܫܳܐܘܳܠ ܠܡ݄ܢ ܟܳܪ݄ܕ̥ܦܰܬ ܠܺܝ؟ ܥܰܣܩܳܐ ܝܳܐ ܐܰܥܠܳܟ̥ ܕܡܰܒ݄ܥܛܰܬ ܗ̄ܰܟّܽܘܒ̈ܶܐ.‘ 15ܘܳܐܢܳܐ ܐܡ݄ܪ ܠܺܝ: ’ܡܰܢ ܗܰܬ، ܝܰܐ ܡܳܪܰܝܕ̥ܺܝ؟‘ ܘܡܳܪܰܢ ܐܡ݄ܪ ܠܶܗ ܠܺܝ: ’ܐܳܢܳܐ ܐ̱ܢܳܐ ܝܶܫܽܘܥ ܗ̄ܽܘ ܢܳܨܪܳܝܳܐ ܕܗܰܬ ܟܳܪ݄ܕ̥ܦܰܬ.‘ 16ܘܐܡ݄ܪ ܠܶܗ ܠܺܝ: ’ܩܘܿܡ ܥܰܠ ܪ̈ܰܓ̥ܠܳܬ̥ܳܟ̥، ܡܰܗ̄ܘܟ̥ܰܐ ܚܙܶܐ ܐ̱ܢܳܐ ܐܶ‌ܠܳܟ̥، ܠܰܫܰܢ ܕܡܰܩ݄ܡܢܳܟ̥ ܡܫܰܡܫܳܢܳܐ ܘܣܳܗܕܳܐ ܥܰܠ ܗ̄ܽܘ ܡܶܕܶܐ ܕ݄ܚܙܶܐ ܠܳܟ̥ ܠܺܝ ܘ݄ܕܓ݄ܕܚܳܙܰܬ ܠܺܝ. 17ܘܓ݄ܡܦܰܨܶܢܳܟ̥ ܡܽܗ̄ܘ ܥܰܡܳܐ ܕܰܝّܽܘܕ̥̈ܳܝܶܐ ܘܡܰܢ̱ ܥّܰܡ̈ܶܐ ܚܪ̈ܶܢܶܐ ܕ݄ܠܓܰܒܰܝّܶܗ ܓ݄ܡܫܰܕܰܪܢܳܟ̥، 18ܕܦܳܬܚܰܬ ܥܰܝܢ̈ܳܬ̥ܰܝّܶܗ ܠܰܫܰܢ ܕܕܳܥܪܺܝ ܡܽܗ̄ܘ ܥܰܡܛܳܢܳܐ ܠܽܗ̄ܘ ܢܽܘܗܪܳܐ، ܘܡܽܗ̄ܘ ܫܽܘܠܛܳܢܳܐ ܕܽܗ̄ܘ ܣܳܛܳܢܳܐ ܠܓܰܒ ܐܰ‌ܠܳܗܳܐ، ܘܡܰܩܒܠܺܝ ܫܽܘܒܩܳܢܳܐ ܕܰܚܛܳܗ̈ܶܐ ܘ݄ܡܢܳܬ̥ܳܐ ܥܰܡ ܗ̄ܰܩّܰܕ̈ܺܝܫܶܐ ܒܺܗ̄ܝ ܗܰܝܡܳܢܽܘܬ̥ܳܐ ܕܶܐܒܺܝ.‘ 19ܘܡܰܗ̄ܘܟ̥ܰܐ، ܝܰܐ ܡܰܠܟܳܐ ܐܰܓ̥ܪܺܦܶܐ، ܠܳܐ ܩܰܝ݄ܡ ܐ̱ܢܳܐ ܡܩܰܒ݄ܠ ܕܽܗ̄ܘ ܚܶܙܘܳܐ ܕܺܗ̄ܝ ܫܡܰܝܳܐ. 20ܐܶ‌ܠܳܐ ܟܪ݄ܙ ܠܺܝ ܒܺܗ̄ܝ ܩܰܕ̱ܡܰܝܬܳܐ ܠܰܗ̄ܢ݄ܟ ܕ݄ܒܕܰܪܰܡܣܽܘܩ، ܘܠܰܗ̄ܢ݄ܟ ܕܒܽܐܘܪܶܫܠܶܡ ܘ݄ܒܟܽܘܠّܶܗ ܗ̄ܰܩّ݄ܪ̈ܝܰܘܳܬ̥ܳܐ ܕܺܝܗܽܘܕ̥، ܘܠܰܥّܰܡ̈ܶܐ ܣܬܶܝ ܟܪ݄ܙ ܠܺܝ ܠܰܫܰܢ ܕܬܰܝܒܺܝ ܘܕܳܥܪܺܝ ܠܓܰܒ ܐܰ‌ܠܳܗܳܐ ܘܣܰܝܡܺܝ ܥܒܳܕ̥̈ܶܐ ܕܫܳܘ݄ܢ ܠܺܗ̄ܝ ܬܝܳܒܽܘܬ̥ܳܐ. 21ܘܠܰܫܰܢ ܗܰܢܺܝ ܨ݄ܕّܰܗ ܠܺܝ ܗ̄ܰܝّܽܘܕ̥̈ܳܝܶܐ ܒܽܗ̄ܘ ܗܰܝܟܠܳܐ، ܘ݄ܐܒܥܺܝ ܗ̄ܘܰܘ̱ ܕܩܳܛܠܺܝ ܠܺܝ. 22ܐܶ‌ܠܳܐ ܐܰ‌ܠܳܗܳܐ ܡܥܰܕܰܪ ܠܶܗ ܠܺܝ ܗܳܠ ܠܰܐܕܝܰܘܡܰܐ، ܘܟܰܐܠܶܗ ܟܳܩܳܝܰܡ ܐ̱ܢܳܐ ܘܟܳܣܳܗܰܕ ܐ̱ܢܳܐ ܠܽܗ̄ܘ ܢܰܥܺܝܡܳܐ ܘܠܽܗ̄ܘ ܪܰܒܳܐ: ܡܶܕܶܐ ܠܰܪܒ̥ܰܠ ܡܽܗ̄ܘ (ܢܳܡܽܘܣܳܐ) ܕܡܽܘܫܶܐ ܘܰܗ̄ܢ ܢܒܺܝ̈ܶܐ ܠܳܐ ܟܳܐܡܰܪ ܐ̱ܢܳܐ، ܐܶ‌ܠܳܐ ܐܰܝܢܰܐ ܕܗ݄ܢّܶܝ ܐܡ݄ܪّܶܗ ܕ݄ܓܕܳܗ̄ܘ݄ܢ: 23’ܕ݄ܡܫܺܝܚܳܐ ܟܛܳܥ݄ܢ ܚܰܫܳܐ، ܘܕܳܗ̄ܘܶܐ ܗ̄ܽܘ ܩܰܕ̱ܡܳܝܳܐ ܕܓ݄ܕܩܳܝ݄ܡ ܡܒܰܝܢ ܗ̄ܰܡّܺܝ̈ܬ̥ܶܐ، ܘܗܺܝّܶܗ ܓ݄ܕܟܳܪ݄ܙ ܢܽܘܗܪܳܐ ܠܽܗ̄ܘ ܥܰܡܳܐ ܘܠܰܥّܰܡ̈ܶܐ.‘“ 24ܘܺܗ̄ܝ ܢܰܩܠܐ ܕܗܰܘܟ̥ܰܐ ܦܰܘܠܳܘܣ ܣܳܝܰܡ ܗ̄ܘܰܐ ܡܰܦܬܰܚ ܦܶܡܳܐ، ܡܰܙܥܰܩ ܠܶܗ ܦܺܗܣܛܳܘܣ ܒܩܳܠܳܐ ܥܶܠܳܝܳܐ: ”ܡܕܰܝܘܰܢ ܠܳܟ̥ ܝܰܐ ܦܰܘܠܶܐ، ܗ̄ܽܘ ܩܪܳܝܳܐ ܕܓ̥ܰܠܰܒܶܐ ܟܬ̥ܳܒ̥̈ܶܐ ܡܕܰܝܘܰܢ ܠܶܗ ܠܳܟ̥.“

25ܐܡ݄ܪ ܠܶܗ ܦܰܘܠܳܘܣ: ”ܠܳܐ ܡܕܰܝܘܰܢ ܠܺܝ، ܝܰܐ ܢܰܨܺܝܚܳܐ ܦܺܗܣܛܳܘܣ، ܐܶ‌ܠܳܐ ܗ̄ܰܡّܰܐܡܪ̈ܶܐ ܕܽܗ̄ܘ ܫܪܳܪܳܐ ܘܕܺܗ̄ܝ ܬܪܺܝܨܽܘܬ̥ܳܐ ܟܡ݄ܫܓ̥ܰܠ ܐ̱ܢܳܐ. 26ܘܽܗ̄ܘ ܡܰܠܟܳܐ ܐܰܓ̥ܪܺܦܰܘܳܣ ܙ݄ܕ ܟܳܐܕ̥݄ܥ ܥܰܠ ܗܰܢܺܝ، ܡܰܗ̄ܘܟ̥ܰܐ ܒܓܰܠܝܳܐ ܟܡ݄ܫܓ̥ܰܠ ܐ̱ܢܳܐ ܩܽܘܕ̱ܡܶܗ، ܡܺܐܝܕ̥ܶܗ ܕܟܳܐܡܰܪ ܐ̱ܢܳܐ ܠܰܝܬ ܚܰܕ̱ ܡܰܐܡܪܳܐ ܡܰܢ̱ ܡّܰܐܡܪ̈ܰܢܺܝ ܕܠ݄ܐ ܟܳܐܕ̥ܰܥ ܠܶܗ، ܥܰܠ ܕܠܰܐ ܗ̄ܘ݄ܢ ܒܟܰܣܝܳܐ. 27ܟ݄ܡܗܰܝܡܢܰܬ، ܝܰܐ ܡܰܠܟܳܐ ܐܰܓ̥ܪܺܦܶܐ، ܒܰܗ̄ܢ ܢܒܺܝ̈ܶܐ؟ ܟܳܐܕ̥ܰܥ ܐ̱ܢܳܐ ܕܟ݄ܡܗܰܝܡܢܰܬ.“

28ܘܟܳܐܡܰܪ ܠܶܗ ܐܰܓ̥ܪܺܦܰܘܳܣ: ”ܒܡܶܕܶܐ ܐ݄ܫܡܳܐ ܟܛܳܪܰܬ ܕܡܰܫ݄ܪ ܐ̱ܢܳܐ ܕܳܗ̄ܘܶܐ ܐ̱ܢܳܐ ܡܫܺܝܚܳܝܳܐ؟“

29ܘܦܰܘܠܳܘܣ ܐܡ݄ܪ ܠܶܗ: ”ܐܳܒܰܥ ܗ̄ܘܰܝ ܐ̱ܢܳܐ ܡܰܢ̱ ܐ‌ܠܳܗܳܐ، ܒ݄ܐܫܡܳܐ ܘ݄ܒܓ̥ܰܠܰܒܶܐ، ܠܳܐ ܐܶ‌ܠܳܟ̥ ܒܶܠܚܽܘܕ̥ܳܟ̥ ܐܶ‌ܠܳܐ ܠܟܘ̇ܠّܶܗ ܗܰܢܺܝ ܕܟܳܫܳܡܥܺܝ ܠܺܝ ܐܰܕܝܰܘܡܰܐ، (ܟܳܐܒܰܥ ܐ̱ܢܳܐ) ܕܳܗ̄ܘ݄ܢ ܐܟ̥݄ܕܘܳܬ̥ܺܝ ܕܠܳܐ ܡܰܗ̄ܢ ܐܰܣܽܘܪ̈ܰܢܺܝ.“

30ܘܩܰܝ݄ܡ ܗ̄ܽܘ ܡܰܠܟܳܐ ܘܽܗ̄ܘ ܫܰܠܺܝܛܳܐ ܘܒܶܪܢܺܝܩܺܝ ܘܗܰܢ݄ܟ ܕܝܳܬܒ̥ܺܝ ܗ̄ܘܰܘ̱ ܐܰܥܡܰܝّܶܗ. 31ܘܺܗ̄ܝ ܢܰܩܠܐ ܕܰܐܙّ݄ܢ ܡܶܢ̱ ܬܰܡܳܐ، ܡ݄ܫܓ̥ܳܠܺܝ ܗ̄ܘܰܘ̱ ܚܰܕ̱ ܥܰܡ ܚܰܕ̱ ܘ݄ܐܡّܺܪ̱ܝ ܗ̄ܘܰܘ̱: ”ܡܶܕܶܐ ܕܫܳܘܶܐ ܠܽܗ̄ܘ ܡܰܘܬܳܐ ܐܰܘ ܠܰܗ̄ܢ ܐܰܣܽܘܪ̈ܶܐ ܠܳܐ ܣ݄ܡ ܠܶܗ ܗ̄ܽܘ ܓܰܒ̥ܪܰܢܳܐ.“

32ܘܐܡ݄ܪ ܠܶܗ ܐܰܓ̥ܪܺܦܰܘܳܣ ܠܦܺܗܣܛܳܘܣ: ”ܟܳܗ̄ܘܶܐ ܕܡܺܝܬܰܪܦܶܐ ܗ̄ܘܰܐ ܗ̄ܽܘ ܓܰܒ̥ܪܰܢܳܐ ܕܠܳܐ ܩܳܪܶܐ ܗ̄ܘܰܐ ܠܽܗ̄ܘ ܣܽܘܬܳܪܳܐ ܕܩܶܣܰܪ.“

Currently Selected:

ܥܒܳܕ̥̈ܶܐ ܕܰܫܠܺܝܚ̈ܶܐ 26: ܟܬܒܐ

Highlight

Copy