ܥܒܳܕ̥̈ܶܐ ܕܰܫܠܺܝܚ̈ܶܐ 22

1”ܝܰܐ ܐܰܚ̈ܽܘܢܳܢܶܐ ܘܝܰܐ ܒܰܒܳܢ̈ܶܐ، ܫܡܰܥܽܘ ܗ̄ܽܘ ܡܰܦܬܰܚ ܦܶܡܳܐ ܕܟ݄ܬ ܠܺܝ ܓܰܒܰܝܟ̥ܽܘ.“ 2ܘܺܗ̄ܝ ܢܰܩܠܐ ܕܫܰܡܺܝܥܺܝ ܕܒܽܗ̄ܘ ܥܶܒܪܳܝܳܐ ܡ݄ܫܓ̥ܰܠ ܗ̄ܘܰܐ ܐܰܥܡܰܝّܶܗ، ܙ݄ܕ ܟܰܠ݄ܢ، ܘܐܡ݄ܪ ܠܰܗ ܠّܶܗ: 3”ܐܳܢܳܐ ܓܰܒ̥ܪܳܐ ܝܽܘܕ̥ܳܝܳܐ ܐ̱ܢܳܐ، ܘܡܰܘܠܰܕ̥ ܐ̱ܢܳܐ ܒܛܰܪܣܳܘܣ ܕܩܺܝܠܺܝܩܺܝܰܐ. ܡܪܰܒܶܐ ܐ̱ܢܳܐ ܒܺܗ̄ܝ ܡܕ̥ܺܝܢ̱ܬܰܬ̥ܶܐ ܥܰܡ ܗ̄ܽܘ ܓܰܒܳܐ ܕܪ̈ܰܓ̥ܠܶܐ ܕܓܰܡܰܠܺܝܐܶܝܠ. ܘܝܰܠ݄ܦ ܐ̱ܢܳܐ ܘ݄ܡܗܰܠܰܟ̥ ܠܺܝ ܛܳܒ̥ܳܐ ܛܳܒ̥ܳܐ ܒܽܗ̄ܘ ܢܳܡܽܘܣܳܐ ܕܰܒّܰܒܳܢ̈ܰܝܕ̥ܰܢ. ܘܛܰܢܳܢܳܐ ܕܰܐ‌ܠܳܗܳܐ ܗ̄ܘܰܝܢܳܐ ܐܟ̥ ܕܟ݄ܬ ܗ̄ܰܬܽܘ ܟܽܘ̇ܠܟ̥ܽܘ ܗܰܬܽܘ ܣܬܶܝ. 4ܘܠܽܗ̄ܘ ܕܰܪܒܰܢܳܐ ܡܰܩ݄ܡ ܠܺܝ ܪܕܽܘܦܝܳܐ (ܘܣܰܝܦܳܐ) ܗܳܠ ܠܽܗ̄ܘ ܡܰܘܬܳܐ، ܘܳܐܢܳܐ ܡܰܐܣ݄ܪ ܗ̄ܘܰܝ ܐ̱ܢܳܐ ܘܡܰܫܠܰܡ ܗ̄ܘܰܝ ܐ̱ܢܳܐ ܓܰܒܪ̈ܶܐ ܘܢܶܫ̈ܶܐ ܠܽܗ̄ܘ ܚܒܽܘܫܝܳܐ، 5ܐܟ̥ ܕܟܳܣܳܗܕܺܝ ܐܰܥܠܺܝ ܗ̄ܽܘ ܪܰܒܳܐ ܕܰܟّܳܗ̈ܢܶܐ ܘܟܽܘܠّܶܗ ܗ̄ܰܩّܰܫ̈ܶܐ ܕܡ݄ܢّܶܗ ܡܰܩܒܶܠ ܠܺܝ ܐܶܓܪ̈ܳܬ̥ܳܐ ܕ݄ܐܙّܺܝ ܓܰܒ ܗ̄ܰܢ ܐܰܚ̈ܽܘܢܳܢܶܐ ܕ݄ܒܕܰܪܰܡܣܽܘܩ ܠܰܫܰܢ ܕܠܰܗ̄ܢ݄ܟ ܣܬܶܝ ܕܟ݄ܬ ܢܶܝ ܬܰܡܳܐ ܡܰܝܬܶܢܰܢّܶܗ ܡܰܐܣܪ̈ܶܐ ܠܽܐܘܪܶܫܠܶܡ، ܘܡܰܩ݄ܒܠܺܝ ܡܣܳܡ ܒܪܺܝܫܳܐ. 6ܘܳܐܢܳܐ ܐܰܙܳܠܳܐ، ܘ݄ܡܫܰܪܶܐ ܠܺܝ ܕܡܳܛܶܐ ܐ̱ܢܳܐ ܠܕܰܪܰܡܣܽܘܩ، ܒܦܰܠܓܶܗ ܕܝܰܘܡܳܐ، ܡܶܚܕ̥ܳܐ ܡܺܗ̄ܝ ܫܡܰܝܳܐ، ܡܰܢܗܰܪ ܠܶܗ ܐܰܥܠܺܝ ܢܽܘܗܪܳܐ ܪܰܒܳܐ. 7ܘܢܰܦ݄ܠ ܐ̱ܢܳܐ ܥܰܠ ܗ̄ܺܝ ܐܰܪܥܳܐ، ܘܫܰܡ݄ܥ ܐ̱ܢܳܐ ܩܳܠܳܐ ܕܳܐܡܰܪ ܗ̄ܘܰܝ ܠܺܝ: ܫܳܐܘܳܠ ܫܳܐܘܳܠ ܡ݄ܢܝܳܐ ܕܟܳܪ݄ܕ̥ܦܰܬ ܠܺܝ؟“ 8ܘܳܐܢܳܐ ܣܬܶܝ ܡܰܕܥܰܪ ܠܺܝ ܘܐܡ݄ܪ ܠܺܝ: ”ܡܰܢ ܗܰܬ، ܡܳܪܝ؟“ ܘܗܺܝّܶܗ ܐܡ݄ܪ ܠܶܗ ܠܺܝ: ”ܐܳܢܳܐ ܐ̱ܢܳܐ ܝܶܫܽܘܥ ܗ̄ܽܘ ܢܳܨܪܳܝܳܐ ܕܗܰܬ ܟܳܪ݄ܕ̥ܦܰܬ.“ 9ܘܰܗ̄ܢ ܢܳܫ̈ܶܐ ܕܟ݄ܬ ܗ̄ܘܰܝܢܶܝ ܐܰܥܡܺܝ ܚܙܰܠّܶܗ ܗ̄ܽܘ ܢܽܘܗܪܳܐ، ܐܶ‌ܠܳܐ ܩܳܠܳܐ ܠܳܐ ܫܰܡܺܝܥܺܝ ܕܗܰܘܳܐ ܕܡ݄ܫܓ̥ܰܠ ܗ̄ܘܰܐ ܐܰܥܡܺܝ. 10ܘܐܡ݄ܪ ܠܺܝ: ”ܡ݄ܢ ܣܳܝܰܡ ܐ̱ܢܳܐ، ܡܳܪܝ؟“ ܘܡܳܪܰܢ ܐܡ݄ܪ ܠܶܗ ܠܺܝ: ”ܩܘܿܡ، ܙܳܟ̥ ܠܕܰܪܰܡܣܽܘܩ، ܘܬܰܡܳܐ ܓܡܺܝܬܰܫܓ̥݄ܠ ܐܰܥܡܳܟ̥ ܥܰܠ ܟܽܘܠ ܡܶܕܶܐ ܕܠܳܙ݄ܡ ܣܰܝܡܰܬ.“

11ܘܡܺܐܝܕ̥ܶܗ ܕܠ݄ܐ ܡ݄ܚܙܶܐ ܗ̄ܘܰܐ ܠܺܝ ܡܽܗ̄ܘ ܚܰܝܠܳܐ (ܫܽܘܒܚܳܐ) ܕܽܗ̄ܘ ܢܽܘܗܪܰܘܳܐ، ܙܒ݄ܛّܶܗ ܒܺܐܝܕ̥̈ܺܝ ܗܰܢ݄ܟ ܕܟ݄ܬ ܗ̄ܘܰܝܢܶܝ ܐܰܥܡܺܝ ܘܥܰܒ݄ܪ ܐ̱ܢܳܐ ܠܕܰܪܰܡܣܽܘܩ. 12ܘܚܰܢܰܢܝܳܐ، ܚܰܕ̱ ܓܰܒ̥ܪܳܐ ܟܺܐܢܳܐ ܒܽܗ̄ܘ ܢܳܡܽܘܣܳܐ ܐܟ̥ ܕܣܳܗܕ̥ܺܝ ܗ̄ܘܰܘ̱ ܐܰܥܠܶܗ ܟܽܘܠّܶܗ ܗ̄ܰܝّܽܘܕ̥̈ܳܝܶܐ ܕܬܰܡܳܐ، 13ܐܰܬ̥ܺܝ ܠܣܺܝܕܺܝ ܘܐܡ݄ܪ ܠܶܗ ܠܺܝ: ”ܫܳܐܘܳܠ، ܐܰܚܽܘܢܺܝ، ܦܬܰܚ ܥܰܝ̈ܢܳܬ̥ܳܟ̥.“ ܘܒܺܗ̄ܝ ܫܳܥܬ̥ܰܝܕ̥ܰܗ ܦܬܺܝܚܺܝ ܥܰܝ̈ܢܳܬ̥ܺܝ ܘܚ݄ܪ ܠܺܝ ܐܶܒܶܗ، 14ܘܐܡ݄ܪ ܠܶܗ ܠܺܝ: ”ܐܰ‌ܠܳܗܳܐ ܕܰܒّܰܒܳܢ̈ܰܝܕ̥ܰܢ ܡܰܩ݄ܡ ܠܶܗ ܠܳܟ̥ ܕ݄ܐܕ̥ܥܰܬ ܗ̄ܽܘ ܨܶܒܝܳܢܰܝܕ̥ܶܗ ܘ݄ܕܚܳܙܰܬ ܗ̄ܽܘ ܙܰܕܺܝܩܳܐ ܘ݄ܕܫܳܡܥܰܬ ܩܳܠܳܐ ܡܶܢ̱ ܦܶܡܶܗ، 15ܘܕܳܗ̄ܘܰܬ ܠܶܗ ܣܳܗܕܳܐ ܓܰܒ ܟܽܘܠّܶܗ ܗ̄ܰܢ ܢܳܫ̈ܶܐ ܥܰܠ ܟܽܘܠ ܡܶܕܶܐ ܕ݄ܚܙܶܐ ܠܳܟ̥ ܘܫܰܡܺܝܥܰܬ. 16ܘܳܐܥܕܳܐ، ܩܰܝ ܟܳܡܺܝܥܰܘܩܰܬ؟ ܩܘܿܡ ܥܡܰܕ̥ ܘܡܺܝܕܰܟܰܝ ܡܰܢ̱ ܚ̈ܛܳܗܰܝܕ̥ܳܟ̥ ܘ݄ܩܪܰܝ ܒ݄ܐܫܡܶܗ.“ 17ܘܕܰܥ݄ܪ ܐ̱ܢܳܐ ܐܰܬ̥ܺܝ ܐ̱ܢܳܐ ܠܰܗ̄ܪܟܶܐ ܠܽܐܘܪܶܫܠܶܡ، ܘ݄ܡܨܰܠܶܐ ܠܺܝ ܒܽܗ̄ܘ ܗܰܝܟܠܳܐ. 18ܘ݄ܚܙܶܐ ܠܺܝ ܒܚܶܙܘܳܐ ܘܗܺܝّܶܗ ܟܳܐܡܰܪ ܠܺܝ: ”ܡܰܠ݄ܙ ܢܦܰܩ ܡܶܢ̱ ܐܽܘܪܶܫܠܶܡ ܥܰܠ ܕܠ݄ܐ ܟܡܰܩܒܠܺܝ ܗ̄ܺܝ ܣܳܗܕܽܘܬ̥ܰܝܕ̥ܳܟ̥ ܕܰܐܥܠܺܝ.“ 19ܘܳܐܢܳܐ ܐܡ݄ܪ ܠܺܝ: ”ܡܳܪܝ، ܗ݄ܢّܶܝ ܣܬܶܝ ܟ݄ܐܕ̥ܥܺܝ ܕܳܐܢܳܐ ܡܰܫܠܰܡ ܗ̄ܘܰܝ ܐ̱ܢܳܐ ܠܽܗ̄ܘ ܚܒܽܘܫܝܳܐ، ܘܡܳܚܶܐ ܗ̄ܘܰܝ ܐ̱ܢܳܐ ܒܟܽܘܠّܶܗ ܗ̄ܰܟܢܽܘܫ̈ܳܬ̥ܳܐ ܠܰܐܝܢܰܐ ܕ݄ܡܗܰܝܡܢܺܝ ܗ̄ܘܰܘ̱ ܐܶܒܳܟ̥. 20ܘܺܗ̄ܝ ܢܰܩܠܐ ܕܡܺܝܒ݄ܙ ܗ̄ܘܰܐ ܗ̄ܽܘ ܐܰܕܡܳܐ ܕܶܐܣܛܶܦܰܢܳܘܣ ܗ̄ܽܘ ܣܳܗܕܰܝܕ̥ܳܟ̥، ܐܳܢܳܐ ܣܬܶܝ ܐܰܥܡܰܝّܶܗ ܩܳܝܰܡ ܗ̄ܘܰܝ ܐ̱ܢܳܐ، ܘܥܰܡ ܗ̄ܽܘ ܨܶܒܝܳܢܳܐ ܕܰܩّܰܛܳܠܰܝ̈ܕ̥ܶܗ ܗ̄ܘܰܝ ܐ̱ܢܳܐ. ܘܢܳܛܰܪ ܗ̄ܘܰܝ ܐ̱ܢܳܐ ܗ̄ܰܠܒܽܘܫ̈ܶܐ ܕܰܐܝܢܰܐ ܕܪ݄ܓ̥ܡܺܝ ܗ̄ܘܰܝ ܠܶܗ.“ 21ܘܐܡ݄ܪ ܠܶܗ ܠܺܝ: ”ܙܳܟ̥، ܕܳܐܢܳܐ ܓ݄ܡܫܰܕܰܪ ܐ̱ܢܳܐ ܠܳܟ̥ ܠܪܽܘܚܩܳܐ ܕܟܳܪܙܰܬ ܠܰܥّܰܡ̈ܶܐ.“

22ܘܺܗ̄ܝ ܢܰܩܠܐ ܕܫܰܡܺܝܥܺܝ ܠܦܰܘܠܳܘܣ ܗܳܠ ܠܽܗ̄ܘ ܡܰܐܡܪܰܢܳܐ، ܡܰܥܠܰܠّܶܗ ܩܳܠܰܝّܶܗ ܘܡܰܙܥܰܩّܶܗ: ”ܛܪܳܐ ܡ݄ܬܠܶܐ ܘܠܳܐ ܦܳܝ݄ܫ ܥܰܠ ܦܳܬ̥ܰܗ ܕܺܗ̄ܝ ܐܰܪܥܳܐ ܐܰܝܢܰܐ ܕܟ݄ܬ ܝܳܐ ܗܰܘܟ̥ܰܐ، ܡܺܐܝܕ̥ܶܗ ܕܠ݄ܐ ܟܳܗ̄ܘܶܐ ܕܦܳܝ݄ܫ ܒܰܚّܰܝ̈ܶܐ.“ 23ܘܗ݄ܢّܶܝ ܡܥܰܝܛܺܝ ܗ̄ܘܰܘ̱ ܘ݄ܡܚܰܠܩܺܝ ܗ̄ܘܰܘ̱ ܗ̄ܰܠܒܽܘܫ̈ܰܬّ̥ܶܗ ܘ݄ܡܕܰܪ݄ܢ ܗ̄ܘܰܘ̱ ܥܰܦܪܳܐ ܠܺܗ̄ܝ ܫܡܰܝܳܐ، 24ܗ̄ܽܘ ܪܺܝܫܳܐ ܕܰܗ̄ܢ ܐܰ‌ܠܦܳܐ ܗܽܒ̥ ܠܶܗ ܦܽܘܩܕܳܢܳܐ ܕܡܰܥܒܪܺܝ ܠܶܗ ܠܺܗ̄ܝ ܡܰܫܪܺܝܬ̥ܳܐ ܘܒ݄ܡܚܳܝܳܐ ܕܡܺܝܫܰܐܶܠ ܠܰܫܰܢ ܕܳܐܕ̥݄ܥ ܡܶܢܶܗ ܩܰܝ ܡܥܰܝܛܺܝ ܗ̄ܘܰܘ̱ ܐܰܥܠܶܗ. 25ܘܺܗ̄ܝ ܢܰܩܠܐ ܕ݄ܫܛ݄ܚّܶܗ ܘܡܰܐܣ݄ܪّܶܗ ܒܰܚّܰܒ̥̈ܠܶܐ، ܦܰܘܠܳܘܣ ܐܳܡܰܪ ܗ̄ܘܰܐ ܠܽܗ̄ܘ ܩܶܢܛܪܽܘܢܳܐ ܕܩܳܝܰܡ ܗ̄ܘܰܐ ܐܰܥܠܶܗ: ”ܩܰܝ ܟ݄ܬܟ̥ܽܘ ܫܽܘܠܛܳܢܳܐ ܕܡܳܚܺܝܬܽܘ ܠܓܰܒ̥ܪܳܐ ܪܽܘܡܳܝܳܐ ܕܠܳܐ ܕܺܝܢܳܐ؟“ 26ܘܺܗ̄ܝ ܢܰܩܠܐ ܕܫܰܡ݄ܥ ܗ̄ܽܘ ܩܶܢܛܪܽܘܢܳܐ، ܐܰܙّܶܗ ܠܓܰܒ ܗ̄ܽܘ ܪܺܝܫܳܐ ܕܰܗ̄ܢ ܐܰ‌ܠܦܳܐ ܘܐܡ݄ܪ ܠܶܗ ܠܶܗ: ”ܡ݄ܢ ܟܣܰܝܡܰܬ! ܗ̄ܽܘ ܓܰܒ̥ܪܰܢܳܐ ܪܽܘܡܳܝܳܐ ܝܳܐ.“ 27ܘ݄ܡܩܰܪܰܒ̥ ܠܶܗ ܗ̄ܽܘ ܪܺܝܫܳܐ ܠܓܰܒܶܗ ܘܐܡ݄ܪ ܠܶܗ ܠܶܗ: ”ܐܰܡܰܪ ܠܺܝ، ܗܰܬ ܪܽܘܡܳܝܳܐ ܗܰܬ؟“ ܐܡ݄ܪ ܠܶܗ ܠܶܗ ”ܐܺܝܢ!“ 28ܘܡܰܕܥܰܪ ܠܶܗ ܗ̄ܽܘ ܪܺܝܫܳܐ ܕܰܐ‎ܠܦܳܐ ܘܐܡ݄ܪ ܠܶܗ: ”ܐܳܢܳܐ ܒܙܽܘܙ̈ܶܐ ܓ̥ܰܠܰܒܶܐ ܩܢܶܐ ܠܺܝ ܗ̄ܺܝ ܗܝܳܝܽܘܬ̥ܳܐ ܪܳܘܡܳܝܬܳܐ.“ ܐܡ݄ܪ ܠܶܗ ܠܶܗ ܦܰܘܠܳܘܣ: ”ܐܶ‌ܠܳܐ ܐܳܢܳܐ ܡܰܘܠܰܕ̥ ܐ̱ܢܳܐ (ܡܬܰܘܠܰܕ̥ ܐ̱ܢܳܐ) ܐܶܒܰܗ.“ 29ܘܡܶܚܕ̥ܳܐ ܡܰܪܚܰܩّܶܗ ܡܶܢܶܗ ܗܰܢ݄ܟ ܕܳܐܒܥܺܝ ܗ̄ܘܰܘ̱ ܕܡܳܚ݄ܢ ܠܶܗ. ܘܙܰܝ݄ܥ ܗ̄ܽܘ ܪܺܝܫܳܐ ܕܰܗ̄ܢ ܐܰ‌ܠܦܳܐ ܗ̄ܺܝ ܢܰܩܠܐ ܕܰܐܕ݄ܥ ܕܪܽܘܡܳܝܳܐ ܝܳܐ، ܥܰܠ ܕܡܰܐܣ݄ܪ ܗ̄ܘܰܝ ܠܶܗ.

ܦܰܘܠܳܘܣ ܟܩܳܝ݄ܡ ܩ݄ܕ̱ܡ ܗ̄ܽܘ ܟܢܽܘܫܝܳܐ ܕܰܝّܽܘܕ̥̈ܳܝܶܐ

30ܘܒܽܗ̄ܘ ܝܰܘܡܳܐ ܚܪܶܢܳܐ، ܐܳܒܰܥ ܗ̄ܘܰܐ ܕܳܐܕ̥݄ܥ ܒ݄ܫܪܳܪܳܐ ܕܡ݄ܢ ܫܟܳܝܳܐ ܡܰܫܟ݄ܢ ܗ̄ܘܰܘ̱ ܐܰܥܠܶܗ ܗ̄ܰܝّܽܘܕ̥̈ܳܝܶܐ. ܘܦ݄ܟ ܠܶܗ ܗ̄ܰܢ ܐܰܣܽܘܪ̈ܰܝܕ̥ܶܗ، ܘܗܽܒ̥ ܠܶܗ ܦܽܘܩܕܳܢܳܐ ܕܳܐܬ̥݄ܢ ܗ̄ܰܪّܰܒ̈ܶܐ ܕܰܟّܳܗ̈ܢܶܐ ܘܟܽܘܠّܶܗ ܗ̄ܰܪّܺܝܫܳܢ̈ܶܐ ܕܰܟܢܽܘܫ̈ܳܬ̥ܰܬّ̥ܶܗ، ܘܡܰܘܒܶܠ ܠܶܗ ܠܦܰܘܠܳܘܣ ܘܡܰܩ݄ܡ ܠܶܗ ܒܰܝܢܳܬ̥ܰܝّܶܗ.

Currently Selected:

ܥܒܳܕ̥̈ܶܐ ܕܰܫܠܺܝܚ̈ܶܐ 22: ܟܬܒܐ

Highlight

Copy