ܥܒܳܕ̥̈ܶܐ ܕܰܫܠܺܝܚ̈ܶܐ 20

ܦܰܘܠܳܘܣ ܟܛܳܪܶܐ ܐܶܦܶܣܳܘܣ

1ܘܒ݄ܬ̥݄ܪ ܕܟܰܠܺܝ ܘܫܰܠܺܝ ܗ̄ܽܘ ܫܓ̥ܽܘܫܝܳܐ، ܦܰܘܠܳܘܣ ܩܪܶܐ ܠܶܗ ܠܰܬّܰܠܡܺܝܕ̥̈ܶܐ ܘ݄ܡܒܰܣܰܡ ܠܶܗ ܘܡܰܩܘܶܐ ܠܶܗ ܠܶܒܰܝّܶܗ، ܘ݄ܢܫܺܝܩܺܝ ܠܶܗ ܘܢܰܦ݄ܩ ܐܰܙّܶܗ ܠܡܰܩܶܕܳܘܢܺܝܰܐ. 2ܘܟܰܪ݄ܟ̥ ܒܰܗ̄ܢ ܐܰܬ̥ܪ̈ܰܘܳܬ̥ܰܢܺܝ، ܘ݄ܡܒܰܣܰܡ ܠܶܗ ܘܡܰܩܘܶܐ ܠܶܗ ܠܶܒܰܝّܶܗ (ܕܰܡܗܰܝܡܢ̈ܶܐ) ܒܓ̥ܰܠܰܒܶܐ ܡ̈ܶܠܶܐ، ܐܰܬ̥ܺܝ ܠܽܗ̄ܘ ܐܰܬ̥ܪܳܐ ܕܗܶܠܰܣ. 3ܘܦܰܝ݄ܫ ܬܰܡܳܐ ܬܠܳܬ̥ܳܐ ܝܰܪ̈ܚܶܐ. ܘܰܝّܽܘܕ̥̈ܳܝܶܐ ܣ݄ܡّܶܗ ܐܰܥܠܶܗ ܢܟ̥ܺܝܠܽܘܬ̥ܳܐ، ܗ̄ܺܝ ܢܰܩܠܐ ܕܰܐܒ݄ܥ ܗ̄ܘܰܐ ܕ݄ܐܙّܶܗ ܠܣܽܘܪܺܝܰܐ، ܗ̄ܺܝ ܢܰܩܠܝܳܐ ܚܫܽܒ̥ ܠܶܗ ܕܕܳܥ݄ܪ ܠܡܰܩܶܕܳܘܢܺܝܰܐ. 4ܘܢܰܦܺܝܩܺܝ ܐܰܥܡܶܗ ܗܳܠ ܐܰܣܺܝܰܐ: ܣܳܘܦܰܛܪܳܘܣ ܕܟ݄ܬ ܝܳܐ ܡܺܗ̄ܝ ܡܕ̥ܺܝܢ̱ܬܳܐ ܕܒܶܪܳܘܰܐܐ ܘܰܐܪܺܣܛܰܪܟ̥ܳܘܣ ܘܣܶܩܽܘܢܕܳܘܣ ܕܟ݄ܬ ܢܶܝ ܡܶܢ̱ ܬܶܣܰܠܳܘܢܺܝܩܺܝ، ܘܓܰܐܝܳܘܣ ܡܺܗ̄ܝ ܡܕ̥ܺܝܢ̱ܬܳܐ ܕܕܶܪܒܺܝ، ܘܛܺܝܡܳܬ̥ܶܐܳܘܣ ܕܡܶܢ̱ ܠܽܘܣܛܪܰܐ، ܘܡܶܢ̱ ܐܰܣܺܝܰܐ ܛܽܘܟ̥ܺܝܩܳܘܣ ܘ݄ܛܪܳܘܦܺܝܡܳܘܣ. 5ܗܰܢܺܝ ܐܰܙّ݄ܢ ܡܶܩ݄ܕ̱ܡ ܡܶܢܰܢ ܠ݄ܛܪܳܘܰܐܣ ܘܢ݄ܛܪܺܝ ܗ̄ܘܰܝ ܠܰܢ. 6ܘܰܐܚܢܰܐ ܣܬܶܝ ܢܰܦܺܝܩܺܝܢܰܐ ܡܺܗ̄ܝ ܡܕ̥ܺܝܢ̱ܬܳܐ ܕܦܺܝܠܺܝܦܳܘܣ ܕܡܰܩܶܕܳܘܢܺܝܰܐ ܒ݄ܬ̥݄ܪ ܡܽܗ̄ܘ ܥܶܐܕ̥ܳܐ ܕܰܦّܰܛܺܝܪ̈ܶܐ، ܘܰܐܙّܰܢ ܒܽܗ̄ܘ ܝܰܡܳܐ، ܘܰܐܬ̥ܺܝܢܰܐ ܠ݄ܛܪܳܘܰܐܣ ܒ݄ܬ̥݄ܪ ܚܰܡܫܳܐ ܝܰܘܡ̈ܶܐ، ܘܦܰܝܺܝܫܺܝܢܰܐ ܬܰܡܳܐ ܫܰܒ̥ܥܳܐ ܝܰܘܡ̈ܶܐ.

ܗ̄ܽܘ ܡܰܘܬܳܐ ܘܺܗ̄ܝ ܩܝܰܡܬܳܐ ܕܚܰܕ̱ ܥܠܰܝܡܳܐ ܒ݄ܛܪܳܘܰܐܣ

7ܘ݄ܒܝܰܘܡܶܗ ܕܚܽܕ̱ܒ̥ܫܰܒܳܐ، ܘܰܐܚܢܰܐ ܠܰܬܺܝܡ̈ܶܐ ܠܽܗ̄ܘ ܩܨܳܝܳܐ (ܕܽܗ̄ܘ ܠܰܚܡܳܐ) ܕܺܗ̄ܝ ܬܰܘܕܺܝܬ̥ܳܐ، ܦܰܘܠܳܘܣ ܫܓ̥ܺܝܠ ܐܰܥܡܰܝّܶܗ ܡܺܐܝܕ̥ܶܗ ܕܟ݄ܬ ܗ̄ܘܰܐ ܐܰܙܳܠܳܐ ܒܽܗ̄ܘ ܝܰܘܡܳܐ ܕܒ݄ܬ̥ܪܶܗ. ܘܡܰܘܪܰܟ̥ ܠܶܗ ܗ̄ܽܘ ܡܰܐܡܪܰܝܕ̥ܶܗ ܗܳܠ ܦܰܠܓܶܗ ܕܠܰܠܝܳܐ. 8ܘܒܺܗ̄ܝ ܥܶܠܺܝܬ̥ܳܐ ܕܟ݄ܬ ܗ̄ܘܰܝܢܰܐ ܠܰܬܺܝܡ̈ܶܐ، ܟ݄ܬ ܗ̄ܘܰܐ ܐܶܒܰܗ ܓ̥ܰܠܰܒܶܐ ܫܪ̈ܳܓ̥ܶܐ ܕܺܗ̄ܝ ܢܽܘܪܳܐ. 9ܘܟ݄ܬ ܗ̄ܘܰܐ ܚܰܕ̱ ܥܠܰܝܡܳܐ ܐ݄ܫܡܶܗ ܐܶܘܛܽܟܳܘܣ ܝܰܬܺܝܒ̥ܳܐ ܓܰܒ ܗ̄ܺܝ ܟܰܘܬܳܐ ܘܫܳܡ݄ܥ ܗ̄ܘܰܐ، ܘܛܰܒ̥݄ܥ ܒܫܰܢܬ̥ܳܐ ܝܰܩܽܘܪܬܳܐ ܗ̄ܺܝ ܢܰܩܠܐ ܕܡܰܘܪܰܟ̥ ܠܶܗ ܦܰܘܠܳܘܣ ܗ̄ܽܘ ܡܰܐܡܪܰܝܕ̥ܶܗ. ܘܢܰܦ݄ܠ ܡܽܗ̄ܘ ܡܶܕ̥ܝܳܪܳܐ ܕܰܬܠܳܬ̥ܳܐ، ܘ݄ܛܥ݄ܢّܶܗ ܡܺܝܬ̥ܳܐ. 10ܘܢܰܚ݄ܬ ܦܰܘܠܳܘܣ ܘܢܰܦ݄ܠ ܐܰܥܠܶܗ ܘ݄ܙܒ݄ܛ ܠܶܗ ܘܐܡ݄ܪ ܠܶܗ: ”ܠܳܐ ܙܰܝܥܺܝܬܽܘ، ܡܺܐܝܕ̥ܶܗ ܕܺܗ̄ܝ ܪܽܘܚܰܝܕ̥ܶܗ ܐܶܒܶܗ ܝܳܐ.“ 11ܘܣܰܠ݄ܩ ܠܰܠܥ݄ܠ ܘ݄ܩܨܶܐ ܠܶܗ ܠܰܚܡܳܐ ܘܰܐܟ̥ܺܝܠ ܠܶܗ. ܘܦܰܝ݄ܫ ܟܡ݄ܫܓ̥݄ܠ ܗܳܠ ܠܽܗ̄ܘ ܣܠܳܩܶܗ ܕܝܰܘܡܳܐ، ܘܺܗ̄ܝ ܢܰܩܠܝܳܐ ܢܰܦ݄ܩ ܕ݄ܐܙّܶܗ ܥܰܠ ܗ̄ܽܘ ܕܰܪܒܳܐ. 12ܘܡ݄ܕّܶܗ ܗ̄ܽܘ ܥܠܰܝܡܳܐ ܘܗܺܝّܶܗ ܒܰܚّܰܝ̈ܶܐ، ܘ݄ܦܨܺܝܚܺܝ ܓ̥ܰܠܰܒܶܐ.

ܗ̄ܽܘ ܡܰܐܙܠܳܐ ܠܡܺܝܛܽܘܠܺܝܢܺܝ

13ܘܰܐܚܢܰܐ ܢܰܚܺܝܬܺܝܢܰܐ ܠܺܗ̄ܝ ܣܦܺܝܢ̱ܬܳܐ ܘܰܐܙّܰܢ ܠܰܐܦ ܬܰܣܳܘܣ، ܕܡܶܢ̱ ܬܰܡܳܐ ܓܚܳܙܺܝ ܗ̄ܘܰܝܢܰܐ ܠܦܰܘܠܳܘܣ، ܡܺܐܝܕ̥ܶܗ ܕܗܰܘܟ̥ܰܐ ܐܰܒ݄ܥ ܡܶܢܰܢ ܗ̄ܺܝ ܢܰܩܠܐ ܕܰܐܙّܶܗ ܗ̄ܘܰܐ ܒܽܗ̄ܘ ܕܰܪܒܳܐ. 14ܘܺܗ̄ܝ ܢܰܩܠܐ ܕ݄ܚܙܶܐ ܠܰܢ ܒܬܰܣܳܘܣ، ܡ݄ܕ ܠܰܢ ܐܰܥܡܰܢ ܘܰܐܬ̥ܺܝܢܰܐ ܒܺܗ̄ܝ ܣܦܺܝܢ̱ܬܳܐ ܠܡܺܝܛܽܘܠܺܝܢܺܝ. 15ܘܡܶܢ̱ ܬܰܡܳܐ ܘܗܳܠ ܠܽܗ̄ܘ ܝܰܘܡܳܐ ܚܪܶܢܳܐ، ܐܰܙّܰܢ ܠܰܐܦ ܗ̄ܺܝ ܓܙܺܝܪܬܳܐ ܕܟܺܝܳܘܣ. ܘܗܳܠ ܠܽܗ̄ܘ ܝܰܘܡܳܐ ܕܰܬܠܳܬ̥ܳܐ ܐܰܬ̥ܺܝܢܰܐ ܠܣܰܡܳܘܣ ܘܦܰܝܺܝܫܺܝܢܰܐ ܕܰܡܺܝܟ̥ܺܝܢܰܐ ܒ݄ܛܪܳܘܓܺܠܺܝܳܘܢ، ܘܒܽܗ̄ܘ ܝܰܘܡܳܐ ܚܪܶܢܳܐ ܐܰܬ̥ܺܝܢܰܐ ܠܡܺܝܠܺܝܛܳܘܣ، 16ܡܺܐܝܕ̥ܶܗ ܕܳܐܒܰܥ ܗ̄ܘܰܐ ܦܰܘܠܳܘܣ ܕܫܳܦ݄̊ܥ ܥܰܠ ܐܶܦܶܣܳܘܣ ܕܠ݄ܐ ܐܙّܶܗ ܡܺܝܥܰܘ݄ܩ ܬܰܡܳܐ، ܥܰܠ ܕܟ݄ܬ ܗ̄ܘܰܐ ܡܣܰܪ݄ܗܒܳܐ ܕܣܳܝ݄ܡ ܗ̄ܽܘ ܥܶܐܕ̥ܳܐ ܕܦܶ̊ܢܛܺܩܳܘܣܛܺܝ ܒܽܐܘܪܶܫܠܶܡ ܐܶܢ ܟܺܝܒܶܗ.

ܦܰܘܠܳܘܣ ܟܳܐܡ݄ܪ ܦܘܿܫ ܒ݄ܫܠܳܡܳܐ ܠܰܩّܰܫ̈ܶܐ ܕܶܐܦܶܣܳܘܣ

17ܘܡܶܢ̱ ܡܺܝܠܺܝܛܳܘܣ ܡܫܰܕܰܪ ܠܶܗ ܡܰܝܬܶܐ ܠܶܗ ܠܰܩّܰܫ̈ܶܐ ܕܺܗ̄ܝ ܥܺܕ̱ܬܳܐ ܕܶܐܦܶܣܳܘܣ. 18ܘܺܗ̄ܝ ܢܰܩܠܐ ܕܰܐܬ̥݄ܢ ܠܓܰܒܶܗ، ܐܡ݄ܪ ܠܰܗ ܠّܶܗ: ”ܗܰܬܽܘ ܟ݄ܐܕ̥ܥܺܝܬܽܘ ܡܽܗ̄ܘ ܝܰܘܡܳܐ ܩܰܕ̱ܡܳܝܳܐ ܕܥܰܒ݄ܪ ܐ̱ܢܳܐ ܠܰܐܣܺܝܰܐ ܐܰܝܕܰܪܒܳܐ ܗܰܘܺܝ ܐ̱ܢܳܐ ܐܰܥܡܰܝܟ̥ܽܘ ܟܘܿܠܶܗ ܗ̄ܽܘ ܙܰܒܢܳܐ. 19ܘܳܐܢܳܐ ܟܥܳܒ̥ܰܕ ܐ̱ܢܳܐ ܠܰܐ‌ܠܳܗܳܐ ܒܓ̥ܰܠܰܒܶܐ ܡܰܟܺܝܟ̥ܽܘܬ̥ܳܐ، ܘ݄ܒܕܰܡܥ̈ܶܐ ܘ݄ܒܢܶܣܝ̈ܽܘܢܶܐ ܕܳܐܬ̥݄ܢ ܗ̄ܘܰܘ̱ ܐܰܥܠܺܝ ܡܺܗ̄ܝ ܢܟ̥ܺܝܠܽܘܬ̥ܳܐ ܕܰܝّܽܘܕ̥̈ܳܝܶܐ. 20ܘܠܳܐ ܡܰܢܩܰܨ ܠܺܝ ܕܣܳܝܰܡ ܐ̱ܢܳܐ ܡܶܕܶܐ ܕܟ݄ܬ ܝܳܐ ܛܳܒ̥ܳܐ ܠܢܰܦܫ̈ܰܝܟ̥ܽܘ، ܟܪ݄ܙ ܠܺܝ ܘܡܰܘܠܰܦ ܠܺܝ ܠܟ̥ܽܘ ܒܰܫّܽܘܩ̈ܶܐ ܘܒ̈ܰܒّܳܬܶܐ، 21ܘܳܐܢܳܐ ܟܣܳܗܰܕ ܐ̱ܢܳܐ (ܘ݄ܡܣܰܒܰܪ ܐ̱ܢܳܐ) ܠܰܝّܽܘܕ̥̈ܳܝܶܐ ܘܠܰܗ̄ܢ ܐܰܪ̈ܡܳܝܶܐ ܥܰܠ ܗ̄ܺܝ ܬܝܳܒܽܘܬ̥ܳܐ ܠܰܐ‌ܠܳܗܳܐ ܘܺܗ̄ܝ ܗܰܝܡܳܢܽܘܬ̥ܳܐ ܕ݄ܒܡܳܪܰܢ ܝܶܫܽܘܥ ܡܫܺܝܚܳܐ. 22ܘܳܐܥܕܳܐ ܗܰܘܺܝ ܐ̱ܢܳܐ ܡܰܐܣܪܳܐ ܒܺܗ̄ܝ ܪܽܘܚܳܐ، ܘܰܐܙܳܠܳܐ ܐ̱ܢܳܐ ܠܽܐܘܪܶܫܠܶܡ، ܘܠ݄ܐ ܟܳܐܕ̥ܰܥ ܐ̱ܢܳܐ ܡ݄ܢ ܓܕܳܐܬ̥ܶܐ ܩܽܘܕ̱ܡܺܝ ܬܰܡܳܐ. 23ܐܶ‌ܠܳܐ ܪܽܘܚܳܐ ܕܩܽܘܕܫܳܐ، ܒܟܽܘܠ ܡܕ̥ܺܝܢ̱ܬܳܐ، ܟܡܰܚܘܝܳܐ ܠܺܝ ܘܟ݄ܐܡّܳܪ̱ܐ: ’ܐܰܣܽܘܪ̈ܶܐ ܘܥܺܝܩܽܘܬ̥ܳܐ ܓܕܳܐܬ̥݄ܢ ܐܰܥܠܳܟ̥.‘ 24ܐܶ‌ܠܳܐ ܠ݄ܐ ܟܚܳܫܰܒ̥ ܐ̱ܢܳܐ ܢܰܦܫܺܝ ܡܶܕܶܐ، ܐܟ̥ ܕܟܳܐܒܰܥ ܐ̱ܢܳܐ ܕ݄ܡܟܰܡܰܠ ܐ̱ܢܳܐ ܗ̄ܽܘ ܕܰܪܒܰܝܕ̥ܺܝ، ܘܺܗ̄ܝ ܬܶܫܡܶܫܬܳܐ ܕܡܰܩܒܶܠ ܠܺܝ ܡܶܢ̱ ܡܳܪܰܢ ܝܶܫܽܘܥ ܠܰܫܰܢ ܕܣܳܗܰܕ ܐ̱ܢܳܐ ܥܰܠ ܗ̄ܺܝ ܣܒܰܪܬ̥ܳܐ ܕܺܗ̄ܝ ܛܰܝܒܽܘܬ̥ܳܐ ܕܰܐ‌ܠܳܗܳܐ. 25ܘܳܐܥܕܳܐ ܟܳܐܕ̥ܰܥ ܐ̱ܢܳܐ ܕܢܰܩܠܐ ܚܪܶܬܳܐ ܠ݄ܐ ܟܚܳܙܺܝܬܽܘ ܦܳܬ̥ܺܝ، ܟܽܘ̇ܠܟ̥ܽܘ ܗܰܬܽܘ ܕܟܰܪ݄ܟ̥ ܐ̱ܢܳܐ ܒܰܝܢܳܬ̥ܰܝܟ̥ܽܘ ܘ݄ܟܪ݄ܙ ܠܺܝ ܠܟ̥ܽܘ ܗ̄ܺܝ ܡܰܠܟܽܘܬ̥ܳܐ. 26ܘܡܰܗ̄ܘܟ̥ܰܐ ܟܣܳܗܰܕ ܐ̱ܢܳܐ ܩܽܘܕ̱ܡܰܝܟ̥ܽܘ ܐܰܕܝܰܘܡܰܐ: ܡܒܰܪܝܳܐ ܐ̱ܢܳܐ ܡܽܗ̄ܘ ܐܰܕܡܰܬ̥ܟ̥ܽܘ. 27ܡܺܐܝܕ̥ܶܗ ܕܠܳܐ ܟܰܠܺܝ ܐ̱ܢܳܐ ܕܡܰܘܕ̥ܰܥ ܐ̱ܢܳܐ ܠܟ̥ܽܘ ܟܽܘܠܶܗ ܗ̄ܽܘ ܨܶܒܝܳܢܳܐ ܕܰܐ‌ܠܳܗܳܐ. 28ܗܰܢ ܢܰܩܠܐ ܗܘܰܝܽܘ ܡܳܪܳܐ ܠܪ̈ܽܘܚܰܝܟ̥ܽܘ ܘ݄ܠܟܽܘܠܰܗ ܗ̄ܺܝ ܡܰܪܥܺܝܬ̥ܳܐ ܗܰܝܳܐ ܕܡܰܩ݄ܡ ܠܰܗ ܠܟ̥ܽܘ ܐܶܒܰܗ ܪܽܘܚܳܐ ܕܩܽܘܕܫܳܐ ܐܶܦܺܣ̈ܩܽܘܦܶܐ ܕܡܰܪܥܺܝܬܽܘ ܠܺܗ̄ܝ ܥܺܕ̱ܬܳܐ ܕܰܐ‌ܠܳܗܳܐ ܗܰܝܳܐ ܕ݄ܩܢܶܐ ܠܶܗ ܒܽܗ̄ܘ ܐܰܕܡܰܝܕ̥ܶܗ. 29ܘܟܳܐܕ̥ܰܥ ܐ̱ܢܳܐ ܕܒ݄ܬ̥݄ܪ ܕ݄ܐܙّܺܝ ܐ̱ܢܳܐ، ܕ̈ܶܒ̥ܶܐ ܚ̈ܳܛܽܘܦܶܐ ܓܥܳܒܪܺܝ ܒܰܝܢܳܬ̥ܰܝܟ̥ܽܘ ܕܠ݄ܐ ܟܡܰܪ݄ܚܡܺܝ ܥܰܠ ܗ̄ܺܝ ܡܰܪܥܺܝܬ̥ܳܐ. 30ܘܡܶܢ̱ ܒܰܝܢܳܬ̥ܰܝܟ̥ܽܘ ܣܬܶܝ ܓ݄ܕܢܳܦܩܺܝ ܓܰܒܪ̈ܶܐ ܡܕ̈ܰܓܠܳܢܶܐ ܠܰܫܰܢ ܕܡܰܛܥ݄ܢ ܗ̄ܰܬّܰܠܡܺܝܕ̥̈ܶܐ ܘܠܰܫܰܢ ܕܛܳܪ݄ܢّܶܗ ܕܳܐܬ̥݄ܢ ܒ݄ܬ̥ܪܰܝّܶܗ. 31ܡܰܗ̄ܘܟ̥ܰܐ ܗܘܰܝܽܘ ܩܺܝܡ̈ܶܐ ܘܠܳܐ ܕ݄ܡܟ̥ܺܝܬܽܘ، ܘܡܰܝܬܰܝܽܘ ܠܒܳܠܰܝܟ̥ܽܘ ܕ݄ܬܠ݄ܬ̥ ܐ݄ܫܢ̈ܶܐ ܠܳܐ ܟܰܠܺܝ ܐ̱ܢܳܐ ܒܠܰܠܝܳܐ ܘܒܺܐܝܡܳܡܳܐ، ܘܳܐܢܳܐ ܒܰܕّܰܡܥ̈ܶܐ (ܡܶܢ̱ ܟܽܘܠ ܠܶܒܺܝ) ܡܰܘܠܰܦ ܗ̄ܘܰܝ ܐ̱ܢܳܐ ܠܚܰܕ̱ ܚܰܕ̱ ܡ݄ܢܟ̥ܽܘ. 32ܘܳܐܥܕܳܐ ܟܛܳܪܶܐ ܐ̱ܢܳܐ ܠܟ̥ܽܘ ܒ݄ܫܠܳܡܳܐ ܠܰܐ‌ܠܳܗܳܐ ܘܠܺܗ̄ܝ ܡܶܠܬ̥ܳܐ ܕܺܗ̄ܝ ܛܰܝܒܽܘܬ̥ܰܝܕ̥ܶܗ ܕܗܺܝّܰܗ ܟܺܝܒܰܗ ܒܳܢܝܰܠܟ̥ܽܘ ܘܳܗ̄ܒܰܠܟ̥ܽܘ ܝܳܪܬ̥ܽܘܬ̥ܳܐ ܥܰܡ ܟܽܘܠّܶܗ ܗ̄ܰܩّܰܕ̈ܺܝܫܶܐ. 33ܠܳܐ ܪܰܝ݄ܓ̥ ܠܺܝ ܣܶܐܡܳܐ ܐܰܘ ܕܰܗܒ̥ܳܐ ܐܰܘ ܠܒܽܘܫܳܐ. 34ܘܗܰܬܽܘ ܟ݄ܐܕ̥ܥܺܝܬܽܘ ܠܰܫܰܢ ܗ̄ܺܝ ܣܢܺܝܩܽܘܬ̥ܰܝܕ̥ܺܝ ܘܠܰܗ̄ܢܺܝ ܕܟ݄ܬ ܢܶܝ ܐܰܥܡܺܝ، ܒܺܐܝܕ̥̈ܳܬ̥ܺܝ ܥܒ̥݄ܕ ܠܺܝ. 35ܘܟܽܘܠ ܡܶܕܶܐ ܡܰܚܘܶܐ ܠܺܝ ܠܟ̥ܽܘ ܕܗܰܘܟ̥ܰܐ ܟܳܐܒ݄ܥ ܕܚܰܕ̱ ܥܳܒ̥݄ܕ ܘܒܳܛ݄ܠ ܘܗܳܘܶܐ ܡܳܪܳܐ ܠܰܟّܰܐܺܝܒ̥̈ܶܐ، ܘ݄ܕܡܰܝܬܶܐ ܠܒܳܠܶܗ ܗ̄ܽܘ ܡܰܐܡܪܳܐ ܕܡܳܪܰܢ ܝܶܫܽܘܥ، ܥܰܠ ܕܗܺܝّܶܗ ܐܡ݄ܪ ܠܶܗ: ’ܛܽܘܒܳܐ ܝܳܐ ܘ݄ܦܨܺܝܚܽܘܬ̥ܳܐ ܠܰܐܝܢܰܐ ܕܟܳܗ̄ܒܶܐ ܙ݄ܕ ܡܰܐܝܢܰܐ ܕܟܳܡܳܝ݄ܕ.‘“

36ܘܺܗ̄ܝ ܢܰܩܠܐ ܕܐܡ݄ܪ ܠܶܗ ܗܰܢܺܝ، ܒܰܪ݄ܟ ܥܰܠ ܒܰܪ̈ܟܳܬ̥ܶܗ ܘ݄ܡܨܰܠܶܐ ܠܶܗ، ܘܟܽܘܠّܶܗ ܗ̄ܰܢ ܢܳܫ̈ܶܐ ܐܰܥܡܶܗ. 37ܘܟܽܘܠّܶܗ ܒܰܟ̥݄ܢ ܒܰܟ̥ܝܳܐ ܪܰܒܳܐ، ܘ݄ܡܥܰܦܰܩّܰܗ ܘ݄ܢܫ݄ܩّܶܗ. 38ܘܒܽܗ̄ܘ ܙܳܝܽܘܕܳܐ ܟܰܝܽܒّ̥ܶܗ ܥܰܠ ܗ̄ܺܝ ܡܶܠܬ̥ܳܐ ܕܐܡ݄ܪ ܠܶܗ: ”ܠܳܐ ܦܰܝ݄ܫ ܓܚܳܙܺܝܬܽܘ ܦܳܬ̥ܺܝ.“ ܘܢܰܦܺܝܩܺܝ ܐܰܥܡܶܗ ܗܳܠ ܠܺܗ̄ܝ ܣܦܺܝܢ̱ܬܳܐ.

Currently Selected:

ܥܒܳܕ̥̈ܶܐ ܕܰܫܠܺܝܚ̈ܶܐ 20: ܟܬܒܐ

Highlight

Copy