ܥܒܳܕ̥̈ܶܐ ܕܰܫܠܺܝܚ̈ܶܐ 17

ܥܳܩ̈ܳܬ̥ܐ ܒܬܶܣܰܠܳܘܢܺܝܩܺܝ

1ܘܫܰܦܺܝܥܺܝ ܥܰܠ ܗ̄ܰܡܕ̥ܺܝ̈ܢܳܬ̥ܳܐ ܕܰܐܡܦܺܝܦܳܘܠܺܝܣ ܘܰܐܦܳܠܳܘܢܺܝܰܐ ܘܰܐܬ̥݄ܢ ܠܬܶܣܰܠܳܘܢܺܝܩܺܝ ܐܰܝܟܳܐ ܕܟ݄ܬ ܗ̄ܘܰܐ ܟ̥ܢܽܘܫܬܳܐ ܕܰܝّܽܘܕ̥̈ܳܝܶܐ. 2ܘܥܰܒ݄ܪ ܦܰܘܠܳܘܣ ܐܟ̥ ܕܽܗ̄ܘ ܥܝܳܕ̥ܰܝܕ̥ܶܗ ܠܓܰܒܰܝّܶܗ، ܘܠܰܬܠ݄ܬ̥ ܫܰܒ̈ܶܐ ܡ݄ܫܓ̥ܰܠ ܗ̄ܘܰܐ ܐܰܥܡܰܝّܶܗ ܡܰܢ ܟܬ̥ܳܒ̥̈ܶܐ، 3ܘ݄ܡܦܰܫܰܩ ܗ̄ܘܰܐ ܘܡܰܚܘܶܐ ܗ̄ܘܰܐ ܕ݄ܡܫܺܝܚܳܐ ܓܛܳܥ݄ܢ ܚܰܫܳܐ، ܘܓ݄ܕܩܳܝ݄ܡ ܡܒܰܝܢ ܗ̄ܰܡّܺܝ̈ܬ̥ܶܐ، ܘܗܺܝّܶܗ ܝܳܐ ܝܶܫܽܘܥ ܡܫܺܝܚܳܐ ܗܰܢܳܐ ܕܟܳܡܣܰܒܰܪ ܐ̱ܢܳܐ ܠܟ̥ܽܘ. 4ܘܢܳܫ̈ܶܐ ܡ݄ܢّܶܗ ܡܗܰܝܡܰܢّܶܗ ܘܡܰܛ݄ܢ ܠܦܰܘܠܳܘܣ ܘ݄ܠܫܺܝܠܳܐ، ܘܓ̥ܰܠܰܒܶܐ ܡܰܢ̱ ܝّܰܘܢܳܝ̈ܶܐ ܗܰܢܺܝ ܕܙܰܝܥܺܝ ܗ̄ܘܰܘ̱ ܡܰܢ̱ ܐ‌ܠܳܗܳܐ، ܘܓ̥ܰܠܰܒܶܐ ܡܰܗ̄ܢ ܢܶܫ̈ܶܐ ܝܕ̥̈ܺܝܥܶܐ. 5ܐܶ‌ܠܳܐ ܗ̄ܰܝّܽܘܕ̥̈ܳܝܶܐ ܚܣ݄ܡّܶܗ، ܘܡܰܝܬܰܠّܶܗ ܐܰܥܡܰܝّܶܗ ܢܳܫ̈ܶܐ ܒܺܝܫ̈ܶܐ ܡܰܢ̱ ܫّܽܘܩ̈ܶܐ ܕܺܗ̄ܝ ܡܕ̥ܺܝܢ̱ܬܳܐ، ܘܡܰܩ݄ܡّܶܗ ܥܰܡܳܐ ܓ̥ܰܠܰܒܶܐ ܘܣ݄ܡّܶܗ ܫܓ̥ܽܘܫܝܳܐ ܒܺܗ̄ܝ ܡܕ̥ܺܝܢ̱ܬܳܐ، ܘܰܐܬ̥݄ܢ ܩܰܝܺܝܡܺܝ ܥܰܠ ܗ̄ܽܘ ܒܰܝܬܳܐ ܕܺܐܝܰܣܳܘܢ، ܘ݄ܐܒܥܺܝ ܗ̄ܘܰܘ̱ ܕܡܰܘܦܩ݄ܢّܶܗ ܡܶܢ̱ ܬܰܡܳܐ ܘܡܰܫܠܡ݄ܢّܶܗ ܠܽܗ̄ܘ ܥܰܡܳܐ. 6ܘܺܗ̄ܝ ܢܰܩܠܐ ܕܠܳܐ ܚܙܰܢّܶܗ ܬܰܡܳܐ، ܡܓܰܪܓܰܫّܶܗ ܠܺܐܝܰܣܳܘܢ ܘܠܰܗ̄ܢ ܐܰܚ̈ܽܘܢܳܢܶܐ ܕܟ݄ܬ ܗ̄ܘܰܘ̱ ܬܰܡܳܐ ܘܡܰܝܬܰܠّܶܗ ܠܓܰܒ ܗ̄ܰܪّܺܝܫܳܢ̈ܶܐ ܕܺܗ̄ܝ ܡܕ̥ܺܝܢ̱ܬܳܐ، ܘܗ݄ܢّܶܝ ܡܰܙܥܩܺܝ ܗ̄ܘܰܘ̱: ”ܗܰܢܺܝ ܢܶܝ ܕܣ݄ܡّܶܗ ܫܓ̥ܽܘܫܝܳܐ ܒܺܗ̄ܝ ܐܰܪܥܳܐ، ܘܟܰܐܠܶܗ ܠܰܗ̄ܪܟܶܐ ܣܬܶܝ ܐܰܬ̥݄ܢ. 7ܘܗܰܢܳܐ ܐܺܝܰܣܳܘܢ ܗ̄ܽܘ ܡܰܩ݄ܒܠܳܢܰܬّ̥ܶܗ ܝܳܐ، ܘܟܽܘܠّܶܗ ܗܰܢܺܝ ܡܩܰܒ݄ܠ ܕܰܦّܽܘܩܕ̈ܳܢܶܐ ܕܩܶܣܰܪ ܟܩܰܝܡܺܝ ܘܟ݄ܐܡّܺܪ̱ܝ: ’ܟܺܝܬ ܡܰܠܟܳܐ ܚܪܶܢܳܐ، ܝܶܫܽܘܥ.‘“ 8ܘܺܗ̄ܝ ܢܰܩܠܐ ܕܫܰܡܺܝܥܺܝ ܗܰܢܺܝ، ܗ̄ܰܪّܺܝܫܳܢ̈ܶܐ ܕܺܗ̄ܝ ܡܕ̥ܺܝܢ̱ܬܳܐ ܘܟܽܘܠܶܗ ܗ̄ܽܘ ܥܰܡܳܐ ܫܓ̥ܺܝܫܺܝ. 9ܘܡ݄ܕّܶܗ ܥܰܪ̈ܳܒ̥ܶܐ ܡܶܢ̱ ܐܺܝܰܣܳܘܢ ܘܡܰܗ̄ܢ ܐܰܚ̈ܽܘܢܳܢܶܐ ܣܬܶܝ، ܘܺܗ̄ܝ ܢܰܩܠܝܳܐ ܡܰܪܦܰܢّܶܗ.

ܦܰܘܠܳܘܣ ܒܒܶܪܘܰܐܐ

10ܘܰܗ̄ܢ ܐܰܚ̈ܽܘܢܳܢܶܐ، ܒܺܗ̄ܝ ܫܳܥܬ̥ܰܝܕ̥ܰܗ، ܒܽܗ̄ܘ ܠܰܠܝܰܘܳܐ، ܫܪܰܠّܶܗ ܠܦܰܘܠܳܘܣ ܘ݄ܠܫܺܝܠܳܐ ܠܺܗ̄ܝ ܡܕ̥ܺܝܢ̱ܬܳܐ ܕܒܶܪܳܘܰܐܐ. ܘܺܗ̄ܝ ܢܰܩܠܐ ܕܰܐܬ̥݄ܢ ܠܬܰܡܳܐ، ܥܳܒܪܺܝ ܗ̄ܘܰܘ̱ ܠܰܟܢ̈ܽܘܫܳܬܳܐ ܕܰܝّܽܘܕ̥̈ܳܝܶܐ. 11ܘܡܺܐܝܕ̥ܶܗ ܕܚܺܐܪ̈ܶܐ ܗ̄ܘܰܝܢܶܝ ܗ̄ܰܗّܽܘܕ̥̈ܳܝܰܢ݄ܟ ܙ݄ܕ ܡܰܢ̱ ܝّܽܘܕ̥̈ܳܝܶܐ ܕ݄ܒܬܶܣܰܠܳܘܢܺܝܩܺܝ. ܘܒ݄ܦܨܺܝܚܽܘܬ̥ܳܐ ܫ݄ܡܥܺܝ ܗ̄ܘܰܘ̱ ܡ݄ܢّܶܗ ܠܺܗ̄ܝ ܡܶܠܬ̥ܳܐ ܟܽܘܠ ܝܰܘܡܳܐ، ܘ݄ܡܥܰܩܒܺܝ ܗ̄ܘܰܘ̱ ܡܰܢ̱ ܟܬ̥ܳܒ̥̈ܶܐ ܕܗܰܢܺܝ ܗܰܘܟ̥ܰܐ ܢܶܝ. 12ܘܓ̥ܰܠܰܒܶܐ ܡ݄ܢّܶܗ ܡܗܰܝܡܰܢّܶܗ ܘܗܰܘܟ̥ܰܐ ܣܬܶܝ ܓܰܒܪ̈ܶܐ ܓ̥ܰܠܰܒܶܐ ܘܢܶܫ̈ܶܐ ܝܕ̥̈ܺܝܥܶܐ ܡܰܢ̱ ܝّܰܘܢܳܝ̈ܶܐ: 13ܘܺܗ̄ܝ ܢܰܩܠܐ ܕܰܐܕ̥ܺܝܥܺܝ ܗܰܢ݄ܟ ܗ̄ܰܝّܽܘܕ̥̈ܳܝܶܐ ܕܡܶܢ̱ ܬܶܣܰܠܳܘܢܺܝܩܺܝ ܕܦܰܘܠܳܘܣ ܟܪ݄ܙ ܠܶܗ ܗ̄ܺܝ ܡܶܠܬ̥ܳܐ ܕܰܐ‌ܠܳܗܳܐ ܒܺܗ̄ܝ ܡܕ̥ܺܝܢ̱ܬܳܐ ܕܒܶܪܳܘܰܐܐ، ܐܰܬ̥݄ܢ ܠܬܰܡܳܐ ܣܬܶܝ ܘܠܳܐ ܟܰܠ݄ܢ ܡܽܗ̄ܘ ܣܝܳܡܳܐ ܕܒܽܘܠܒ̈ܳܠܶܐ ܘ݄ܫܓ̥ܽܘܫܝܳܐ ܒܰܝܢ ܗ̄ܰܢ ܢܳܫ̈ܶܐ. 14ܘܰܗ̄ܢ ܐܰܚ̈ܽܘܢܳܢܶܐ ܫܪܰܠّܶܗ ܠܦܰܘܠܳܘܣ ܕܢܳܚ݄ܬ ܠܽܗ̄ܘ ܝܰܡܳܐ، ܘܦܰܝܺܝܫܺܝ ܫܺܝܠܳܐ ܘܛܺܝܡܳܬ̥ܶܐܳܘܣ ܒܺܗ̄ܝ ܡܕ̥ܺܝܢ̱ܬܰܝܳܐ 15ܘܗܰܢ݄ܟ ܕܰܐܙّ݄ܢ ܥܰܡ ܦܰܘܠܳܘܣ، ܐܰܬ̥݄ܢ ܐܰܥܡܶܗ ܗܳܠ ܠܺܗ̄ܝ ܡܕ̥ܺܝܢ̱ܬܳܐ ܕܰܐܬ̥ܺܢܳܘܣ. ܘܺܗ̄ܝ ܢܰܩܠܐ ܕܢܰܦܺܝܩܺܝ ܡܶܢ̱ ܣܺܝܕ̥ܶܗ، ܡ݄ܕّܶܗ ܡܶܢܶܗ ܐܶܓܰܪܬ̥ܳܐ ܠܫܺܝܠܳܐ ܘ݄ܠܛܺܝܡܳܬ̥ܶܐܳܘܣ ܕ݄ܐܙّ݄ܢ ܠܣܺܝܕ̥ܶܗ ܡܰܠܺܝܙܳܐ.

ܦܰܘܠܳܘܣ ܒܰܝܢ ܗ̄ܰܦܝܠܳܣ̈ܳܘܦܶܐ ܕܰܐܬ̥ܺܢܳܘܣ

16ܘܗܺܝّܶܗ ܦܰܘܠܳܘܣ، ܗ̄ܺܝ ܢܰܩܠܐ ܕܦܳܝܰܫ ܗ̄ܘܰܐ ܒܰܐܬ̥ܺܢܳܘܣ، ܢܰܦܫܶܗ ܡܺܝܡܰܪܡܪܳܐ ܗ̄ܘܰܐ ܗ̄ܺܝ ܢܰܩܠܐ ܕܚܳܙܶܐ ܗ̄ܘܰܐ ܗ̄ܺܝ ܡܕ̥ܺܝܢ̱ܬܳܐ ܟܽܘܠܰܗ ܡܰܠܝܳܐ ܨܰܠܡ̈ܶܐ. 17ܘܡ݄ܫܓ̥ܰܠ ܗ̄ܘܰܐ ܒܺܗ̄ܝ ܟ̥ܢܽܘܫܬܳܐ ܥܰܡ ܗ̄ܰܝّܽܘܕ̥̈ܳܝܶܐ ܘܥܰܡ ܗܰܢܺܝ ܕܙܰܝܥܺܝ ܗ̄ܘܰܘ̱ ܡܰܢ̱ ܐ‌ܠܳܗܳܐ، ܘܡ݄ܫܓ̥ܰܠ ܗ̄ܘܰܐ ܒܺܗ̄ܝ ܫܽܘܩܳܐ ܥܰܡ ܗܰܢܺܝ ܕܚܳܙܶܐ ܗ̄ܘܰܐ ܠّܶܗ ܟܽܘܠ ܝܰܘܡܳܐ. 18ܘܗ݄ܢ ܡܰܢ̱ ܦّܺܝܠܳܣ̈ܳܘܦܶܐ ܕܡܽܗ̄ܘ ܝܽܘܠܦܳܢܳܐ ܕܶܐܦܺܝܩܳܘܪܳܣ ܘ݄ܚܪ̈ܶܢܶܐ ܕ݄ܟܡ݄ܩܪ݄ܢ ܣܛܳܘܐܺܝܩܳܘ ܕܳܪܫܺܝ ܗ̄ܘܰܘ̱ ܐܰܥܡܶܗ. ܘܗ݄ܢ ܡ݄ܢّܶܗ ܐ݄ܡّܺܪ̱ܝ ܗ̄ܘܰܘ̱: ”ܡ݄ܢ ܟܳܐܒ݄ܥ ܗܰܢܳܐ ܕܟܳܡ݄ܫܓ̥݄ܠ ܓ̥ܰܠܰܒܶܐ؟“ ܘ݄ܚܪ̈ܶܢܶܐ ܐ݄ܡّܺܪ̱ܝ ܗ̄ܘܰܘ̱: ”ܥܰܠ ܐܰ‌ܠܳܗ̈ܶܐ ܢܽܘܟ̥ܪ̈ܳܝܶܐ ܟܟܳܪ݄ܙ،“ ܡܺܐܝܕ̥ܶܗ ܕܦܰܘܠܳܘܣ ܟܳܪܰܙ ܗ̄ܘܰܐ ܠّܶܗ ܥܰܠ ܝܶܫܽܘܥ ܘܥܰܠ ܗ̄ܺܝ ܩܝܰܡܬܰܝܕ̥ܶܗ. 19ܘ݄ܙܒ݄ܛّܶܗ ܘܡܰܝܬܰܠّܶܗ ܠܽܗ̄ܘ ܒܶܝܬ̥ ܕܺܝܢܳܐ ܕ݄ܟܡ݄ܩܪܶܐ ܐܰܪܺܝܳܘܣ ܦܰܓ̥ܳܘܣ، ܘܐܡ݄ܪّܰܗ ܠܶܗ: ”ܟܺܝܒܰܢ ܐܳܕ̥ܥܺܝܢܰܐ ܡ݄ܢܝܳܐ ܗ̄ܽܘ ܝܽܘܠܦܳܢܰܢܳܐ ܗ̄ܽܘ ܚܰܕ̱ܬ̥ܳܐ ܕܟܳܟ݄ܪܙܰܬ؟ 20ܥܰܠ ܕܡ̈ܶܠܶܐ ܢܽܘܟ̥ܪ̈ܳܝܶܐ ܟܳܙ݄ܪܥܰܬ ܒܰܐܕ̥̈ܢܰܢ، ܘܟ݄ܐܒܥܺܝܢܰܐ ܕܳܐܕ̥ܥܺܝܢܰܐ ܡ݄ܢ ܢܶܝ ܗܰܢܺܝ.“ 21ܘܰܗ̄ܢ ܢܳܫ̈ܶܐ ܟܽܘܠّܶܗ ܕܰܐܬ̥ܺܢܳܘܣ ܘܰܗ̄ܢ ܢܽܘܟ̥ܪ̈ܳܝܶܐ ܕܳܐܬ̥݄ܢ ܗ̄ܘܰܘ̱ ܠܬܰܡܳܐ ܪܳܚܡܺܝ ܗ̄ܘܰܘ̱ ܕ݄ܐܡّܺܪ̱ܝ ܘܫ݄ܡܥܺܝ ܡܶܕܶܐ ܚܰܕ̱ܬ̥ܳܐ، ܘܠܳܐ ܚܰܪܽܒّ̥ܰܗ ܠّܶܗ ܡܶܢ̱ ܡܶܕܶܐ ܚܪܶܢܳܐ.

ܦܰܘܠܳܘܣ ܒܰܐܪܺܝܳܘܣ ܦܰܓ̥ܳܘܣ

22ܘܺܗ̄ܝ ܢܰܩܠܐ ܕܩܰܝ݄ܡ ܦܰܘܠܳܘܣ ܒܰܐܪܺܝܳܘܣ ܦܰܓ̥ܳܘܣ ܐܡ݄ܪ ܠܶܗ: ”ܓܰܒܪ̈ܶܐ ܕܰܐܬ̥ܺܢܳܘܣ، ܟܚܳܙܶܐ ܐ̱ܢܳܐ ܠܟ̥ܽܘ ܓ̥ܰܠܰܒܶܐ ܥܰܒܳܕ̈ܶܐ ܒܟܽܘܠ ܡܶܕܶܐ ܒܽܗ̄ܘ ܙܳܝܽܘܕܳܐ ܣܰܓܳܕ̈ܶܐ ܗܰܬܽܘ ܕܰܫّܺܐܕ̈ܶܐ. 23ܥܰܠ ܕܺܗ̄ܝ ܢܰܩܠܐ ܕܟܳܪܰܟ̥ ܗ̄ܘܰܝ ܐ̱ܢܳܐ ܘܚܳܙܶܐ ܗ̄ܘܰܝ ܐ̱ܢܳܐ ܒܰܒّܳܬ̈ܶܐ ܕܰܗ̄ܢ ܐܰ‌ܠܳܗ̈ܰܬ̥ܟ̥ܽܘ، ܚܙܶܐ ܠܺܝ ܚܰܕ̱ ܡܰܕ̥ܒܚܳܐ ܟܬ̥ܺܝܒ̥ܳܐ ܐܰܥܠܶܗ: ܐܰ‌ܠܳܗܳܐ ܠܳܐ ܝܕ̥ܺܝܥܳܐ. ܗܰܢ ܢܰܩܠܐ ܠܰܗ̄ܘܳܐ ܕܠ݄ܐ ܟ݄ܐܕ̥ܥܺܝܬܽܘ ܟܣ݄ܓ̥ܕܺܝܬܽܘ، ܐܶ‌ܠܶܗ ܠܰܗ̄ܢܳܐ ܐܳܢܳܐ ܟ݄ܡܣܰܒܰܪ ܐ̱ܢܳܐ ܠܟ̥ܽܘ. 24ܗܺܝّܶܗ ܝܳܐ ܐܰ‌ܠܳܗܳܐ ܕܣ݄ܡ ܠܶܗ ܗ̄ܽܘ ܥܳܠܡܳܐ ܘܟܽܘܠ ܡܶܕܶܐ ܕܟܺܝܬ ܐܶܒܶܗ، ܘܗܺܝّܶܗ ܝܳܐ ܗ̄ܽܘ ܡܳܪܳܐ ܕܺܗ̄ܝ ܫܡܰܝܳܐ ܘܕܺܗ̄ܝ ܐܰܪܥܳܐ، ܘܠ݄ܐ ܟܫܳܪܶܐ ܘܝܳܬܽܒ̥ ܒܗܰܝܟ̈ܠܶܐ ܣܺܝܡ̈ܶܐ ܒܰܗ̄ܢ ܐܺܝܕ̥̈ܳܬ̥ܳܐ. 25ܘܠ݄ܐ ܟܡܺܝܫܰܡ݄ܫ ܡܰܗ̄ܢ ܐܺܝܕ̥̈ܳܬ̥ܳܐ ܕܰܗ̄ܢ ܢܳܫ̈ܶܐ، ܘܥܰܠ ܡܶܕܶܐ ܠܰܝ̱ܬ ܝܳܐ ܣܢܺܝܩܳܝܳܐ، ܥܰܠ ܕܗܺܝّܶܗ ܗܽܒ̥ ܠܶܗ ܠܟܽܘܠ ܢܳܫܳܐ ܚܰܝ̈ܶܐ ܘܢܰܦܫܳܐ. 26ܘܡܶܢ̱ ܚܰܕ̱ ܐܰܕܡܳܐ ܣ݄ܡ ܠܶܗ ܠܰܗ̄ܢ ܢܳܫ̈ܶܐ ܒܟܽܘܠܶܗ ܗ̄ܽܘ ܥܳܠܡܳܐ ܠܰܫܰܢ ܕܚܳܝ݄ܢ ܥܰܠ ܦܳܬ̥ܰܗ ܕܺܗ̄ܝ ܐܰܪܥܳܐ ܟܽܘܠܰܗ، ܘܒܽܗ̄ܘ ܦܽܘܩܕܳܢܰܝܕ̥ܶܗ ܦܪ݄ܫ ܠܶܗ ܗ̄ܰܙّܰܒܢ̈ܶܐ ܘܣ݄ܡ ܠܶܗ ܬܚܽܘܡ̈ܶܐ ܠܰܕّܽܘܟ̈ܳܬ̥ܳܐ ܕܚܳܝ݄ܢ ܐܰܒّܶܗ ܗ̄ܰܢ ܢܳܫ̈ܶܐ، 27ܠܰܫܰܢ ܕܳܐܒܥܺܝ ܠܰܐ‌ܠܳܗܳܐ ܘ݄ܡܥܰܩܒܺܝ ܘܡܰܢ̱ ܒّܶܪ̈ܝܳܬ̥ܰܝܕ̥ܶܗ ܟܚܳܙ݄ܢ ܠܶܗ، ܥܰܠ ܕܗܺܝّܶܗ ܣܬܶܝ ܠܰܝ̱ܬ ܝܳܐ ܪܰܚܽܘܩܳܐ ܡܶܢ̱ ܟܽܘܠ ܚܰܕ̱ ܡܶܢܰܢ، 28ܡܺܐܝܕ̥ܶܗ ܕܶܐܒܶܗ ܟܳܚܳܝܺܝܢܰܐ ܘ݄ܟܪ݄ܡܫܺܝܢܰܐ ܘܗܰܘܺܝܢܰܐ ܒܰܚّܰܝ̈ܶܐ. ܘ݄ܐܟ̥ ܢܳܫ̈ܶܐ ܣܬܶܝ ܡܰܢ ܚّܰܟܺܝ̈ܡܰܬ̥ܟ̥ܽܘ ܐܡ݄ܪّܶܗ: ’ܡܶܢܶܗ ܝܳܐ ܗ̄ܽܘ ܫܶܪܫܰܝܕ̥ܰܢ.‘ 29ܗܰܢ ܢܰܩܠܐ ܐܰܚܢܰܐ ܗ̄ܰܢ ܢܳܫ̈ܶܐ ܕܟ݄ܬ ܝܳܐ ܗ̄ܽܘ ܫܶܪܫܰܝܕ̥ܰܢ ܡܰܢ̱ ܐ‌ܠܳܗܳܐ، ܠ݄ܐ ܟܳܗ̄ܘܶܐ ܕܚܳܫܒ̥ܺܝܢܰܐ ܠܽܗ̄ܘ ܕܰܗܒ̥ܳܐ ܐܰܘ ܣܶܐܡܳܐ ܐܰܘ ܟܶܐܦܳܐ ܢܩ݄ܫܬܳܐ ܒܽܐܘܡܳܢܽܘܬ̥ܳܐ ܘܒܺܝܕ̥ܰܥܬܳܐ ܕܽܗ̄ܘ ܢܳܫܳܐ ܟܕܳܡܝܳܐ ܠܺܗ̄ܝ ܐܰ‌ܠܳܗܽܘܬ̥ܳܐ. 30ܡܺܐܝܕ̥ܶܗ ܕܰܐ‌ܠܳܗܳܐ ܡܰܥܒܰܪ ܠܶܗ ܗ̄ܰܙّܰܒܢ̈ܶܐ ܕܺܗ̄ܝ ܛܰܥܝܽܘܬ̥ܳܐ، ܘܒܽܗ̄ܘ ܙܰܒܢܰܢܳܐ ܟܳܗ̄ܒܶܐ ܦܽܘܩܕܳܢܳܐ ܠܟܽܘܠ ܢܳܫܳܐ ܒܟܽܘܠ ܕܽܘܟܬ̥ܳܐ ܕܬܳܝ݄ܒ. 31ܥܰܠ ܕ݄ܦܪ݄ܫ ܠܶܗ ܗ̄ܽܘ ܝܰܘܡܳܐ ܕܶܐܒܶܗ ܓܕܳܝ݄ܢ ܗ̄ܺܝ ܐܰܪܥܳܐ ܟܽܘܠܰܗ ܒܟܺܐܢܽܘܬ̥ܳܐ ܥܰܠ ܐܺܝܕ̥ܶܗ ܕܓܰܒ̥ܪܳܐ ܗܰܢܳܐ ܕ݄ܦܪ݄ܫ ܠܶܗ ܘܡܰܕܥܰܪ ܠܶܗ ܟܽܘܠ ܢܳܫܳܐ ܠܺܗ̄ܝ ܗܰܝܡܳܢܽܘܬ̥ܰܝܕ̥ܶܗ ܗ̄ܺܝ ܢܰܩܠܐ ܕܡܰܩ݄ܡ ܠܶܗ ܡܒܰܝܢ ܗ̄ܰܡّܺܝ̈ܬ̥ܶܐ.“ 32ܘܺܗ̄ܝ ܢܰܩܠܐ ܕܫܰܡܺܝܥܺܝ، ܗ̄ܺܝ ܩܝܰܡܬܳܐ ܕܡܶܢ̱ ܒܰܝܢ ܗ̄ܰܡّܺܝ̈ܬ̥ܶܐ، ܗ݄ܢ ܡ݄ܢّܶܗ ܓܳܚܟ̥ܺܝ ܗ̄ܘܰܘ̱، ܘܗ݄ܢ ܐ݄ܡّܺܪ̱ܝ ܗ̄ܘܰܘ̱: ”ܒܙܰܒܢܳܐ ܚܪܶܢܳܐ ܓܫܳܡܥܺܝܢܰܐ ܠܳܟ̥ ܥܰܠ ܗܰܬ̥ܶܐ.“ 33ܘܗܰܘܟ̥ܰܐ ܢܰܦ݄ܩ ܦܰܘܠܳܘܣ ܡܶܢ̱ ܒܰܝܢܳܬ̥ܰܝّܶܗ. 34ܘܢܳܫ̈ܶܐ ܡ݄ܢّܶܗ ܐܰܙّ݄ܢ ܒ݄ܬ̥ܪܶܗ ܘ݄ܡܗܰܝܡܰܢّܶܗ. ܘܚܰܕ̱ ܡ݄ܢّܶܗ ܟ݄ܬ ܗ̄ܘܰܐ ܕܺܝܳܢܽܘܣܺܝܳܘܣ ܚܰܕ̱ ܡܰܢ̱ ܕّܰܝܳܢ̈ܶܐ ܕܰܐܪܺܝܳܘܣ ܦܰܓ̥ܳܘܣ، ܘ݄ܚܕ̥ܳܐ ܐܰܢ̱ܬ̥ܬܳܐ ܐ݄ܫܡܰܗ ܕܰܡܰܪܺܝܣ، ܘ݄ܚܪ̈ܶܢܶܐ ܐܰܥܡܰܝّܶܗ.

Currently Selected:

ܥܒܳܕ̥̈ܶܐ ܕܰܫܠܺܝܚ̈ܶܐ 17: ܟܬܒܐ

Highlight

Copy